Херээжен улусту куду деңнелдиг деп санаар чурттар бар. Боливияда кожуун хайгааракчызы Ханс мынча дээн: «Чамдык оолдарга чажындан-на ёзулуг эр кижи — кадыг, каржы, херээжен улуска көңгүс хүндүткел чок болур деп өөредир». Тайваньда хуралдың удуртукчузу Шэн Сянь үлешкен: «Культуравыста херээжен улус бодалын чугаалаар эргези чок база эр улустуң херектеринче киришпес ужурлуг. Эр кижи херээжен кижиниң санал-бодалын дыңнап эгелээр болза, эштериниң мурнунга үнези кудулай бээр». А чамдык эр улус херээжен улуска багай хамаарылгазын шоолуг эскертинмес арга-биле көргүзер. Чижээ, херээжен улусту куду көрүп баштактаныры.

Өөрүнчүг чүүл, культуравыстың чаңчылдарын сагыыр негелде чок. Өскен чериңерде эр кижини херээжен улустан бүгү талада бедик деп санаар-даа болза, ынчаар бодаары албан эвес (Эф. 4:22—24). Иеговадан үлегер алыр болза, угаан-бодалды өскертип ап болур. Бо статьяга үш айтырыгны сайгарар бис: Иегованың херээжен улуска хамаарылгазы кандыг? Оларга Иегова ышкаш хамаарылгалыг болурунга акыларга чүү дузалаар? Удуртукчулар угбаларга хүндүткелдиг үлегерни канчаар көргүзүп болур?

ХЕРЭЭЖЕН УЛУСКА ИЕГОВАНЫҢ ХАМААРЫЛГАЗЫ КАНДЫГ?

Иегова — херээжен улуска шын хамаарылганың үлегери. Чылыг-чымчак Ачавыс шупту ажы-төлүнге ынак (Ин. 3:16). А угбаларывыс ооң ынак уруглары. Иегованың херээжен улуска хүндүткелин канчаар илереткенин көрээлиңер.

 Ылгавас. Иегова эр-херээжен улусту бодунуң овур-хевиринге дүүштүр чаяаган (Э. д. 1:27). Ол эр улусту херээжен улустан дээре, салым-чаяанныг, угаанныг деп санавас (2 Чыл. 19:7). Бурган биске библейжи алыс шынны билип алыр база ооң шынарларын илередир дөмей арганы берген. Оон аңгыда, Иегова эр-даа, херээжен-даа улустуң бүзүрелин бир дең шаңнаар. Шуптузунга черге мөңге чурттаар арганы азы дээрге хааннар, бараалгакчылар болур арганы хайырлаан (2 Пет. 1:1). Иегова херээжен улусту кызып-кыйбазы дыка эки билдингир!

Дыңнаар. Иеговага херээжен улустуң минниишкиннери, дүвүрелдери хамаанчок деп болбас. Ол Рахил биле Аннаның мөргүлүн дыңнап, дилеглерин күүседип турган (Э. д. 30:22; 1 Хаан. 1:10, 11, 19, 20). Оон аңгыда, Бурган Библияже херээжен улустуң сөзүн дыңнаан эр улустуң төөгүлерин киирген. Чижээ, Авраам Иегованың аайы-биле өөнүң ишти Сарраны дыңнаан (Э. д. 21:12—14). А Давид хаан Авигеяны дыңнаан, безин ону Иегова чорудупкан деп санаан (1 Хаан. 25:32—35). Иисус кезээде Адазы ышкаш алдынар болгаш, авазы Марияның сөстерин кичээнгейлиг дыңнаар турган (Ин. 2:3—10). Ол чижектерден алырга, Иегова херээжен улуска хүндүткелди оларны дыңнаары-биле көргүскен.

Бүзүрээр. Чижээ, Иегова Адам биле Евага чер дээш сагыш човаар даалга берген (Э. д. 1:28). Еваны ашааның дузалакчызы кылдыр чаяагаш, Бурган ону Адамны ышкаш үнелээрин көргүскен. Иегова Девора биле Олда ышкаш херээжен улуска чугула даалганы бүзүрээн: оларны чонунуң медээчилери кылдыр шилээн, олар-биле шииткекчи болгаш хаан сүмележип турган (Башт. 4:4—9; 4 Хаан. 22:14—20). Иегова амгы үеде база херээжен улуска бүзүрээр. Угбаларывыс өөрүшкүлүг медээни суртаалдап, эгелекчилеп, миссионерлеп турарлар. Олар Хурал залдарын, Вефил тудугларын шыйып, тудуп, септеп турар. Чамдыызы Вефилде, а өскелери очулга офизинде бараалгап чоруур. Ол угбаларывыс дыка улуг аай-чурумнуг шериг ышкаш, Иегованың күзелин күүседип турарлар (Ыд. ыр. 67:12). Чугаажок, Иегова херээжен улусту харык чок, ажыл кылып билбес деп санавас.

ХЕРЭЭЖЕН УЛУСКА ИЕГОВА ЫШКАШ ХАМААРЫЛГАНЫ КАНЧААР САЙЗЫРАДЫР?

Акылар, угбаларывыска хамаарылгавыс Иегованыы ышкаш деп канчаар билип алыр бис? Ону тодарадып алырда, бодалдарывысты, алдынарывысты ажыы-биле шүгдүнер болза эки. Шын эвес угаан-бодалды эскербейн барып болур бис. Рентген аппарады чүректиң аарыын тодарадыптары ышкаш, эки эш болгаш Бурганның Сөзү херээжен улуска шын эвес хамаарылганы көрүп каарынга дузалаар. Ындыг дузаны кайыын алыр?

Эжиңниң бодалын айтыр (У. ч. 18:18). Эки аттыг, бодамчалыг эживис бар болза, мындыг айтырыгларны салып болур бис: «Чүү деп бодаар сен, угбаларга мээң хамаарылгам кандыг? Хүндүткелимни олар миннип турар бе? Оларга хамаарылгамны өскертир чүүл бар-дыр бе?» Эжиң сүме бээрге, камгаланма. Ооң орнунга күжүңнү экижип алырынче угла.

Библия өттүр бодуңну шинчиле. Угбаларга хамаарылгавысты шүгдүнерде дузалыг эң-не эки херексел — Библия (Евр. 4:12). Ооң арыннарында янзы-бүрү эр улустуң төөгүлери бар. Чамдыктарының херээжен улуска хамаарылгазы эки, а өскелериниң багай турган. Бурганның Сөзүн өөренип, олар-биле бодувусту деңнеп болур бис. Оон аңгыда, бүгү Библияда чүнү чугаалаанын кичээнгейге алыры чугула. Ынчан херээжен улуска хамаарыштыр шын эвес көрүштү бадыткап, контекстиге дүүшпес кылдыр шүлүктер тайылбырлавас бис. Чижээ, 1 Пётр 3:7-де херээжен кижини «кошкак, уян» b деп бижээн. Кыс кижи эр кижиге бодаарга  угааны, харык-шинээ шоолуг эвес дээни ол бе? Чок, болбайн канчаар! Пётрнуң сөстерин Галатчыларга 3:26—29-та сөстер-биле деңнеп көрүңер. Ында Иисус-биле кады башкарар кылдыр Иегова эр-даа, херээжен-даа улусту шилип алганын чугаалаан. Эр-кыс-даа эки эш-биле сүмележип, Бурганның Сөзүн шинчилээр болзувусса, угбаларга чогуур хүндүткелди көргүзүп өөренип алыр бис.

УДУРТУКЧУЛАР УГБАЛАРГА ХҮНДҮТКЕЛДИ КАНЧААР КӨРГҮЗҮП ТУРАРЫЛ?

Чыышта акылар сагыш човангыр удуртукчуларның угбаларга хүндүткелдиг хамаарылгазындан өөренип ап болур. Угбаларывыс хүндүткелди миннир кылдыр удуртукчулар чүнү кылып турар? Каш чижекти көрээлиңер.

Угбаларны мактаар. Павел элчин удуртукчуларга эки чижекти көргүскен. Римчилерге чагаада ол угбаларны мактаан (Рим. 16:12). Бүдүн чыыш мурнунга ол чагааны номчуп турда, угбаларның өөрүшкүзүн бодап көрүңер даан! Шак ынчаар удуртукчулар эки сөстер-биле деткиир. Олар угбаларының эки шынарларын эскергеш, Иеговага кылган бүгү-ле чүүлү дээш мактап турарлар. Угбаларывыс ынчалдыр оларны хүндүлээр, үнелээр деп миннир. Чамдыкта удуртукчунуң чылыг-чымчак сөстери — Иеговага шынчы бараалгап чоруур угбавыска дыка херек боор (У. ч. 15:23).

Удуртукчулар угбаларын сеткилинден бир-ле чүүл дээш мактаарын кызар. Чүге? Дже́ссика мынча дээн: «Акылар кижини: „Эр-хей!“ дээрге дыка өөрүнчүг. Бир-ле чүве дээш мактаарга, оон-даа эки. Чижээ, угбавыс ажы-төлүн чыыштарга томаанныг олурарынга өөредири дээш азы Библия өөренип турар кижини Хурал залынга чедирери дээш мактап болур». Акылар тодаргай херектери дээш мактаарга,  угбалар чыышка боттарын чугула база оларны үнелээр-дир деп миннир.

Угбаларны дыңнаар. Биче сеткилдиг удуртукчулар эки бодалдар чугаалаар эрге чүгле оларда деп бодавас. Угбалардан сүме айтыргаш, кичээнгейлиг дыңнаар. Ынчалдыр удуртукчулар угбаларны сорук киирер, боттары база өөренир. Вефилде бараалгап чоруур Гера́рдо деп удуртукчу мындыг чүүл эскерген: «Угбалар-биле сүмележиримге, даалгаларымны оон-даа эки күүседир апарган мен. Акыларның хөй кезиинге бодаарга, кандыг-бир ажылга оларның дуржулгазы улуг боору ховар эвес». Дыка хөй угбаларывыс эгелекчилеп турар. Ынчангаш чурттап турар черинде улусту эки билир. Бра́йан деп удуртукчу мынча дээн: «Угбаларывыс организациявыска херек дыка хөй эки шынарларлыг, арга-мергежилдиг. Ынчангаш ол кызымак ажылчыннарны үнелеңер!»

Угбаларывыс сүме кадарга, мерген угаанныг удуртукчулар кичээнгейлиг дыңнаар. Чүге? Э́двард деп удуртукчу мынча дээн: «Угбавыстың бодалы база дуржулгазы байдалче өске талалардан көөрүнге, улустуң сеткилин кичээнгейге алырынга акывыска дузалап болур» (У. ч. 1:5). Угбазының сүмезин ажыглаар аргазы чок-даа болза, удуртукчу ону эскериичел болганы дээш мактаар.

Угбаларны өөредир. Бурунгаар көрүштүг удуртукчулар угбаларны өөредир. Чижээ, оларга суртаалга белеткээр ужуражылганы канчаар эрттирерин тайылбырлап бээр. Ынчан сугга суктурган акылар чокта угбалар чүнү канчаарын билир боор. Удуртукчулар организациявыстың тудугларынга болгаш септелгеге киржир аргалыг болзун дээш, угбаларны херекселдер, машина-техника ажыглап өөредир. Вефилде харыысалгалыг акылар угбаларны аңгы-аңгы ажылдарга өөредип турар: техника септелгези, хандырылгага, саң-хөөге, программированиеге. Угбаларын өөредирде удуртукчулар оларны өөрениичел, бүзүрелдиг деп санаарын көргүзер.

Дыка хөй угбаларывыс өөренип алган билиглерин өске улуска дузалажырда ажыглап турар. Чижээ, тудугжу арга-мергежилге өөренип алган угбалар бойдус халавынга үрелген бажыңнарны катап тудуп турар. А өскелери хөй ниити черлеринге суртаалдаарынга инструктаж эрткен. Ам олар өске угбаларга дуржулгазын дамчыдып турар. Башкыларының дугайында угбаларывыс чүнү чугаалаан? Дже́ннифер мынча дээн: «Бир Хурал залының тудуунга ажылдаанымны сактыр мен. Проект дээш харыысалгалыг акый мени өөредирде үезин харамнанмаан. Ол мээң ажылымны эскерип, үргүлчү мактаар турган. Ооң-биле кады ажылдаары дыка эки болган. Ынчан мени үнелээр, меңээ бүзүрээр-дир деп көрген мен».

ХЕРЭЭЖЕН УЛУСКА ИЕГОВА ЫШКАШ ХАМААРЫЛГАЛЫГ БОЛУРУ ЧҮГЕ ЧУГУЛА?

Улуг өг-бүлевисте эргим угбаларывыска ынак бис. Оларга Иегова ышкаш хамаарылгалыг болурун күзээр бис (1 Тим. 5:1, 2). Угбаларывысты үнелээр бис, олар-биле кады Бурганга бараалгаары биске өөрүнчүг. Олар ынакшылывыска, деткимчевиске бүзүрээр боорга, аас-кежиктиг бис. Ване́сса мынча дээн: «Иегованың чонунга хамааржырым дээш төнчү чок өөрүп четтирер мен! Ында эки сөстүг, кичээнгейлиг акылар дыка хөй». А Тайваньдан угбавыс үлешкен: «Иегованың база ооң организациязының херээжен улуска, оларның сеткилинге сагыш човангыры меңээ дыка эки. Ол чүүл мээң бүзүрелимни быжыглап турар, ооң кежигүнү болганымны оон-даа артык үнелээр-дир мен».

Акыларывыс, херээжен улуска шын хамаарылгалыг болур дээш кызарыңарга Иегова көрүп турар. Ол силер дээш дыка чоргаарланыр! (У. ч. 27:11). Шотландияда Бе́нджамин дээр удуртукчу акый мынча дээн: «Бо делегейге херээженнер хүндүткел чок чорукка бо-ла таваржыр. Ынчангаш олар Хурал залынга келгеш, ылгалды көрүп каарын күзээр бис». Эргим угбаларывыска төлептиг ынакшылды, хүндүткелди көргүзээлиңер (Рим. 12:10).