Ay chaʼoxtul winiketik te la yichʼik chʼitesel te banti maʼyuk skʼoplal ya x-ilot te antse. Jtul superintendente yuʼun circuito ta Bolivia te Hans sbiil jich ya yal: «Ay chaʼoxtul winiketik te la yichʼik chʼitesel te banti ya skuyik te mukʼ skʼoplal te winiketike b, jaʼ yuʼun maʼyuk skʼoplal ya yilik te antsetike». Te Shengxian jtul anciano ta Taiwán, jich ya yal: «Te banti kuxinemon, bayal winiketik ya skuyik te ma xjuʼ ya yotses sba te antsetik ta swenta te bin ya spas te winiketik. Teme jtul winik ya yal te bin ya snop te antse, maniwan x-ichʼotix ta mukʼ yuʼun-a te yantike». Ay yantik winiketik te ya yakʼik ta ilel te ya spʼajik te antsetik te kʼalal ay bin ya yalik ta stseʼlayel.

Pero, te winik te jich chʼitesbil ya xjuʼ ya sjelontes te snopojibal yuʼun sok te mukʼ skʼoplal ya xjajch yil te antse (Efes. 4:​22-24). ¿Bin-utʼil ya xjuʼ yuʼun spasel? Jaʼ te kʼalal ya skʼayinbey stalel te Jehová. Ta artículo ini, ya xbajt kiltik bin yilel ya yil Jehová te antsetik, bin-utʼil ya xjuʼ ya skʼayinbeyik stalel te Jehová te hermanoetik ta swenta te bin yilel ya yilik te antsetik sok te bin-utʼil ya yakʼik ta ilel lekil ejemplo te ancianoetik.

¿BIN YILEL YA YIL JEHOVÁ TE ANTSETIKE?

Te Jehová jaʼ lekil ejemplo ta swenta te bitʼil ya skʼan yichʼ ilel te antsetike. Jaʼ jtul Tatil te kʼux ta yoʼtan spisil te sfamilia (Juan 3:16). Jich ya yil bitʼil yantsil nichʼnab te antsetik te ya x-ichʼot ta  mukʼ yuʼune. Kiltik cheʼoxeb ejemplo te ya yakʼ ta ilel te kʼux ta yoʼtan sok te ya yichʼtiklan ta mukʼe.

Te Jehová maba ya spʼaj te antsetik. Te Jehová la spas ta slokʼomba te winik sok te ants (Gén. 1:27). Ma la spas te winik yuʼun jaʼ bayalxan spʼijil o te jaʼ bayalxan bin ya snaʼ spasel te bitʼil te antse. Pajal la spastiklan yuʼun ya xkʼot ta yoʼtanik te bin ya yal te Biblia sok te ya yakʼik ta ilel te taleliletik yuʼune. Te Jehová ma jaʼuknax lek ya yil te winiketike (2 Crón. 19:7). Bayal skʼoplal ya yil te schʼuunel yoʼtan te ants jich bitʼil te schʼuunel yoʼtan te winike, sok yaloj te ya xkuxinik ta Balumilal ta sbajtelkʼinal o ta chʼulchan jich bitʼil ajwaliletik sok sacerdoteetik (2 Ped. 1:1). Jamal chikan ta ilel te Jehová maba ya spʼaj te antsetik.

Ya schʼam yaʼiy te bin ya yalike. Te Jehová bayal skʼoplal ta yoʼtan te bin yaʼiyel ya yaʼiy sbaik sok te wokolil ya xkʼax yuʼunik te antsetike. Jich bitʼil te la sjakʼbey skʼop te Raquel sok te Ana (Gén. 30:22; 1 Sam. 1:​10, 11, 19, 20). Jaʼnix jich la yakʼ ta tsʼibayel ta Biblia te relatoetik yuʼun winiketik te la schʼambey yaʼiyik skʼop te antsetike. Jtul te machʼa jich la spase, jaʼ te Abrahán, te la schʼuun te mantal akʼbot yuʼun te Jehová te yakuk schʼam yaʼiy te bin ya yal te Sara (Gén. 21:​12-14). Te ajwalil David la yaʼiybey skʼop te Abigaíl, sok la yal te jaʼ tikunbil yuʼun Jehová swenta ya xkʼopoj sok (1 Sam. 25:​32-35). Te Jesús, te machʼa ya skʼayinbey ta lek stalel te sTat, la yaʼiybey skʼop te snan, te María (Juan 2:​3-10). Jich bitʼil la kiltikix ta ejemploetik ini, te Jehová ya yakʼ ta ilel te ya yichʼ ta mukʼ te antsetik kʼalal ya schʼam yaʼiy te bin ya yalike.

Ya yakʼ smukʼul yoʼtan ta stojolik. Jich bitʼil te Jehová la yakʼbey yaʼtel te Eva yuʼun ya xkoltaywan ta skanantayel te Balumilale (Gén. 1:28). Ma jaʼuk mukʼxan skʼoplal la yil te Adán, te Jehová jich la yil te Eva bitʼil jtul jkoltaywanej te ya skoltay te smamalale. Jaʼnix jich la yalbey te j-alwanej antsetik te Débora sok te Huldá yuʼun ya yakʼbeyik consejo te lum yuʼun, jtul juez soknix jtul ajwalil (Juec. 4:​4-9; 2 Rey. 22:​14-20). Te Jehová ya yakʼ smukʼul yoʼtan ta stojol te antsetik te j-abatetik yuʼun sok ya yakʼtiklanbey yaʼtel. Te hermanaetik ini ya x-abatinik ta publicadoraetik, precursoraetik o misioneraetik. Ya xkoltaywanik ta schajpanel, ta spasel sok ta slekubtesel te sNail Tsoblejetik sok te Beteletik. Ay chaʼoxtul ya x-abatinik ta Betel o ta Oficina yuʼun Traducción. Tsobol te antsetik te ya stuuntes te Jehová yuʼun ya skʼotes ta pasel te skʼanojel yoʼtane (Sal. 68:11). Jamal chikan ta ilel te Jehová ma jichuk ya yil te maʼyuk yip te antsetik o te maʼyuk bin lek ya snaʼik spasele.

¿BIN-UTʼIL YA XJUʼ YA SKʼAYINBEYIK STALEL JEHOVÁ TE HERMANOETIKE?

Yuʼun ya jnaʼtik teme jich yakotik ta yilel te hermanaetik jich bitʼil ya yil te Jehová, ya skʼan ya kiltik ta lek te bin ay ta jpensartik sok te bin ya jpastike. Yuʼun jich ya jpastik, ya jkʼantik koltayel. Jich te bin-utʼil jun máquina yuʼun te rayos X te ya xjuʼ ya yil teme ay jun chamel ta koʼtantik, jaʼnix jich jtul lekil kamigotik sok te sKʼop Dios ya xjuʼ ya skoltayotik ta yilel teme ay ma lek ya kiltik te antsetik. Kiltik bin-utʼil.

Jkʼanbeytik koltayel jtul lekil kamigotik (Prov. 18:17). Kʼopojukotik sok jtul kamigotik o kamigatik te ya smukʼulin koʼtantik sok jich akʼa jojkʼoybeytik: «¿Bin yilel ya awil te ya kil te hermanaetik? ¿Yabal kichʼtiklan ta mukʼ? ¿Aybal bin ya xjuʼ ya jlekubtes ta swenta te bitʼil ya kiltiklan?». Teme la yakʼbotik consejo, mame x-ilinotik yuʼun. Akʼa jpastik sok akʼa jelontes te jtaleltike.

Jnoptik te skʼop Diose. Jun te bitʼil ya jnaʼtik teme lek yakotik ta yilel te hermanaetik jaʼ te ya jpajtik te bin ya jnoptik sok te bin ya jpastik ta swenta te bin ya yal te Bibliae (Heb. 4:12). Te kʼalal ya jnoptike, ya kiltik te ay winiketik te lek la yilik te antsetike sok te ay ma lek la yilike. Jaʼ yuʼun ya xjuʼ ya jojkʼoybey jbatik machʼa pajal jtaleltik sok. Lek teme ya jpajtik te bin ya yal bayal textoetik, jich maba ya jtuuntestik cheʼoxeb versiculoetik ta yalel te bin ma stojiluk ta stojol te antsetike. Jich te bitʼil te 1 Pedro 3:7 ya yal te ya skʼan ichʼel ta mukʼ te inamil «jich te bin-utʼil vasija te oranax ya xwuy». c ¿Yabal skʼan ya yal-abi te maʼyuk skʼoplal, te maʼyuk bayal spʼijil o te maʼyuk bayal bin ya snaʼ  spasele? ¡Maʼuk! Yuʼun ma yanuk bin ya jnoptik ta swenta te bin la yal te Pedro, jnoptik te bin ya yal Gálatas 3:​26-29. Tey ya schol ta alel-a te Jehová stsaoj antsetik sok winiketik yuʼun ya sjokinik ta ajwalinel te Jesús ta chʼulchan. Teme ya jnoptik te Biblia sok ya jkʼanbeytik consejo jtul lekil kamigotik o kamigatik yame jnoptik yichʼel ta mukʼ te hermanaetik jich te bitʼil te ya skʼan pasele.

¿BIN-UTʼIL YA YAKʼIK TA ILEL TE ANCIANOETIK TE YA YICHʼIK TA MUKʼ TE HERMANAETIK?

Te hermanoetik ta congregación ya xjuʼ ya snopik yichʼel ta mukʼ te hermanaetik te kʼalal ya yilik te bin ya spasik te ancianoetike. ¿Bin-utʼil ya yakʼik ta ilel lekil ejemplo te ancianoetik? Kiltik cheʼoxebuk te bin-utʼil ya yakʼik ta ilel te ya yichʼik ta mukʼ sok te kʼux ta yoʼtanik te hermanaetike.

Ya yutsilkʼoptayik. Te jpuk-kʼop Pablo jaʼ jun lekil ejemplo ta stojol te ancianoetike. La yutsilkʼoptay ta komonsitil bayal hermanaetik ta carta te la stsʼibay ta stojol te congregación ta Roma (Rom. 16:12). Jnop kaʼiytik te stseʼelil yoʼtan la yaʼiyik te antsetik-abi kʼalal la yichʼ kʼoponel te carta ta congregación. Jaʼnix jich, te ancianoetik kʼayemik ta yutsilkʼoptayel te hermanaetik ta swenta te tʼujbil taleliletik yuʼunik sok spisil te bin ya spasik ta stojol te Jehová. Jich ichʼbil ta mukʼ ya yaʼiy sbaik sok te mukʼ skʼoplalike. Te bin ya x-albotik yuʼun jtul anciano jaʼniwan te bin ya skʼanik yuʼun junxan yoʼtanik ya x-abatinik ta stojol te Jehová (Prov. 15:23).

Kʼalal te ancianoetik ya yutsilkʼoptayik te hermanaetik, spisil yoʼtan ya spasik sok ya yalbeyik te bin yuʼune. ¿Bin yuʼun te jich ya skʼan ya spasike? Te Jessica jich ya yal: «Melelnix-a te ya jmulantik te ya kichʼtik albeyel ‹Lek la apas›. Pero jaʼ ya jmulantikxan te ya kichʼtik albeyel te bin yuʼune, jich bitʼil te kʼalal ya jnojptestik te leknax ya yakʼ sbaik ta tsoblejetik te alaletike o te kʼalal ya kikʼtik bael ta tsoblej te estudiante kuʼuntike». Kʼalal te ancianoetik ya yalbeyik te bin yuʼun ya yutsilkʼoptayik te  hermanaetik, ya yakʼbeyik yil te bayal skʼoplalik ta congregación sok te bayal bin ya xjuʼ ya spasike.

Ya schʼam yaʼiyik te bin ya yalike. Te ancianoetik te pekʼel yoʼtanik ya snaʼik te ma jaʼukiknax te ay bin lek ya staik ta nopele. Jaʼ yuʼun ya sjojkʼoybeyik te hermanaetik te bin ya xjuʼ ya yichʼ pasel sok ya schʼam yaʼiyik te bin ya yalike. Jich lek ya xkʼot ta lokʼel spisil. Te hermanaetik ya sta smukʼul yoʼtanik yuʼun. ¿Bin lekilal ya staik yuʼun te ancianoetike? Jtul anciano te ya x-abatin ta Betel te Gerardo sbiil jich ya yal: «Ya kil te bin ya yalik te hermanaetik te ya xjuʼ ya yichʼ pasele skoltayojon yuʼun lekxan ya jpas te kaʼtele. Melel ayix bayal jaʼbil te hermanaetik yakik ta spasel te aʼtelil-abi». Ta congregación ay bayal hermanaetik te jaʼik precursoraetik, jaʼ yuʼun ya snaʼbeyik sba ta lek te territorioetike. Jtul anciano te Bryan sbiil jich ya yal: «Te hermanaetik bayal bin ya xjuʼ ya spasik ta organización. ¡Jnoptik ta swenta te bin snopojikixe!».

Te ancianoetik ya yichʼik ta wenta te bin ya yal te hermanaetik. ¿Bin yuʼun te lek te jich ya spasike? Jtul anciano te Edward sbiil jich ya yal: «Te bin ya yal sok te bin snopojix te jtul hermana ya xjuʼ xkoltayot te jtul hermano yuʼun ya yil te bin yak ta kʼoel ta pasel sok yuʼun ya xkʼot ta yoʼtan» (Prov. 1:5). Jaʼnix jich, teme maba ya yichʼ pasel te bin la yal jtul hermana, te ancianoetik ya yalbeyik wokol yuʼun te bin la yal sok te bin la sta ta ilele.

Ya snojptesik. Te ancianoetik ya yakʼik ta ilel te ay spʼijilik kʼalal ya snojptesik te hermanaetik. Ya xjuʼ ya snojptesik te bin-utʼil ta pasel te tsoblej yuʼun scholel skʼop Dios teme maʼyuk jtuluk hermano te yichʼoj jaʼ tey-ae. Jaʼnix jich ya xjuʼ ya scholbeyik yaʼiy te bin-utʼil ta tuuntesel te aʼtejibaletik sok maquinaetik ta ya yichʼ tuuntesel ta construcción sok ta mantenimiento. Ta Betel, te superintendenteetik spʼijubtesojik te hermanaetik yuʼun ya xkoltaywanik ta spasel bayal aʼteliletik, jich bitʼil te mantenimiento, manbajel, contabilidad sok ta programación. Te ancianoetik te ya spʼijubtesik te hermanaetik ya yakʼik ta ilel te ya yakʼ smukʼul yoʼtanik ta stojolik sok te bin ya snaʼik spasele.

Bayal hermanaetik ya stuuntesik te bin snopojik ta stojol te ancianoetik yuʼun ya skoltayik te yantike. Ay chaʼoxtul hermanaetik te yichʼojik capacitación ta construcción ya xkoltaywanik ta schaʼpasel te naetik te jin jilel ta skaj te kʼax te bin ya xjinawan jilel. Ay yantik hermanaetik te nojptesbilik ta scholel skʼop Dios ta bayuk sok ya stuuntesik yuʼun ya snojptesik yantik hermanaetik. ¿Bin ya yalik te hermanaetik ta swenta te nojptesel la yichʼik akʼbeyel yuʼun te ancianoetike? Te Jennifer jich ya yal: «Kʼalal aʼtejon ta spasel sNail Tsoblej, jtul hermano te ay ta swenta yilel te aʼtelile, la slokʼes tiempo yuʼun ya snojpteson. Te hermano ini ya yil te bintik ya jpas sok ya yutsilkʼoptayon. Ya jmulan-a te ya x-aʼtejon sok melel la kil te ya yakʼ smukʼul yoʼtan ta jtojol sok ay jkʼoplal la kaʼiy».

JICHUK AKʼA KILTIK BITʼIL JFAMILIATIK

Jich bitʼil te Jehová, kʼux ta koʼtantik te hermanaetik te jun yoʼtanik. Jich ya kiltik bitʼil jfamiliatik (1 Tim. 5:​1, 2). Jaʼ jun mukʼul majtanil te pajal ya kichʼtik ta mukʼ te Jehová sok te hermanaetike. Sok ya yakʼ stseʼelil koʼtantik te leknax ya yaʼiy sbaik sok te kʼux aʼiybilike. Te Vanessa jich ya yal: «Bayal ya kalbey wokol te Jehová te ayon ta lum yuʼun te banti ay bayal hermanoetik te leknax stalelike». Jtul hermana te ay ta Taiwán jich ya yal: «Bayal ya kalbey wokol te Jehová sok te organización yuʼun te bitʼil ay jkʼoplal ta yoʼtanik sok ya yichʼik ta wenta te bin yaʼiyel ya kaʼiy jbatik. Jaʼ-abi ya yakʼbeyxan yichʼ yip te schʼuunel koʼtan sok ya skoltayon ta yilel te jaʼ jun mukʼul majtanil te ayon ta lum yuʼun te Jehová».

Te Jehová tseʼel yoʼtan te kʼalal ya yil te winiketik, te jaʼik j-abatetik yuʼun, ya spasik tulan swenta lek ya yilik te antsetik (Prov. 27:11). Jtul anciano te ay ta Escocia te Benjamin sbiil jich ya yal: «Bayal winiketik ma xyichʼik ta mukʼ te antsetike. Jaʼ yuʼun, kʼalal ya xkʼotik ta sNail Tsoblej te antsetike, ya jkʼantik te ichʼbil ta mukʼ ya yaʼiy sbaike». Jpastik tulan ta skʼayinbeyel stalel te Jehová sok kakʼbeytik yil skʼuxul koʼtantik te hermanaetik sok akʼa kichʼtik ta mukʼ jich te bitʼil ya skʼan pasele (Rom. 12:10).