Alume vamue va kulila vapata ana okuti, akãi ka va kapiwileko. Ndeci, manji Hans ukulu ukuakunyula akongelo ko Bolivia wa popia hati: “Alume vamue va kulila vapata ana okuti, va vetiya alume oku lekisa ocituwa cepela. Kuenje alume vaco va litenda okuti, va velapo akãi kuenda olonjanja vialua va va tata lekambo liesumbilo.” b Manji umue ukulu wekongelo wo ko Taiwan o tukuiwa Shengxian wa popia hati: “Volupale ndi kasi, akãi ka citava okuti va eca ovisimĩlo vimue kalume. Nda ulume o tava ocisimĩlo cimue cukãi, akamba vaye vo sepula.” Alume vamue va tenda akãi lonjila yikuavo. Ndeci, ovo va popia olondaka vimue vielaviso viatiamẽla kakãi.

Pole, kepata liosi ulume umue atiamẽla, citava okuti, eye o pongoloka. Eye o pondola oku fetika oku lilongisa oku sima okuti, ulume ka velelepo ukãi. (Va Efe. 4:22-24) Eci ci lingiwa poku setukula ongangu ya Yehova. Vocipama cilo, tu ka konomuisa ndomo Yehova a tata akãi, ndomo vamanji alume va sukila oku lilongisa oku tata akãi, ndomo Yehova a siata oku ci linga kuenda ndomo akulu vekongelo va talavaya lomoko yavo yoku songuila lonjila yimue okuti va sumbila vamanji akãi.

YEHOVA O TATA NDATI AKÃI?

Yehova wa eca ongangu ya lipua ndomo alume va pondola oku tata akãi. Eye Isia umue o kuete ocikembe okuti, o sole omãla vaye vosi. (Yoa. 3:16) Vamanji akãi vakuekolelo va sokisiwa ndomãla va soliwe laye. Tu konomuisi olonjila vimue vi lekisa okuti Yehova o sole kuenda wa sumbila akãi.

Eye ka va tati locame. Yehova wa lulika ukãi lulume lesetahãlo liaye. (Efet. 1:27) Eye ka lulikile alume lonjila yimue okuti va loñolohapo vali okuti akãi ci sule, ale eye wa kapako vali alume okuti, akãi sio.  (2 Asa. 19:7) Yehova wa lulika ulume lukãi lepondolo limuamue lioku kuata elomboloko liocili Cembimbiliya kuenda oku setukula ovituwa viaye. Yehova wa kapako alume lakãi vana vo kolela kuenda wa eca kokuavo elavoko lioku ka kala komuenyo otembo ka yi pui palo posi, ale oku kuata elavoko lioku ka kala olosoma kuenda ovitunda kilu. (2 Pet. 1:1) Ocili okuti, Yehova ka kuetele ovisimĩlo vĩvi akãi

Yehova o va Yevelela. Eye o sakalala lekalo liakãi ndomo va liyevite kuenda ovitangi va kasi oku liyaka lavio. Ndeci, Yehova wa yeva kuenda wa tambulula olohutililo via Rahele la Hana. (Efet. 30:22; 1 Sam. 1:10, 11, 19, 20) Yehova wa tumavo asonehi Vembimbiliya oco va kongele ulandu walume vana va enda oku yevelela akãi. Ndeci, Avirahama wa kuama onumbi ya Yehova yoku yevelela ukãi waye Sara. (Efet. 21:​12-14) Soma Daviti wa yevelela Avigaile. Kuenje Daviti wa limbuka okuti Yehova eye wo tuma oco a vangule laye. (1 Sam. 25:32-35) Yesu okuti wa kuama ongangu ya lipua ya Isiaye, wa yevelela ina yaye Maria. (Yoa. 2:3-10) Ovolandu a-a a lekisa okuti, onjila yimue Yehova a lekisa esumbilo kakãi, poku va yevelela.

Yehova wa va kolela. Ndeci, Yehova wa ecele ku Eva ocikele coku kuatisa oku tata ongongo yosi. (Efet. 1:28) Poku ci linga, Yehova wa lekisa okuti, ko tendele nda umue o sule kovaso yulume waye Adama, pole, wo tendele ndoñuatisi yimue kulume waye. Yehova wa sapuilavo uprofeto ukãi Devora kuenda Hulida, oco va lungule afendeli vaye, oku kongelamo olonganji kuenda olosoma. (Olong. 4:4-9; 2 Olos. 22:14-20) Koloneke vilo, Yehova wa kolela akãi Akristão oco va linge upange waye. Vamanji vaco vakuekolelo, akundi vusoma, akundi votembo yosi kuenda olomisionaliu. Ovo va kuatisa koku tunga, oku tata Olonjango Viusoma kuenda olofiliale. Vamue pokati kavo va talavaya ko Betele; vakuavo koloseketa vioku pongolola alivulu. Vamanji ava akãi, olohoka vinene Yehova a tuma oco va linge ocipango caye. (Osa. 68:11) Omo liaco, Yehova ka tendi akãi ndu okuti va hongua, ale ka va kuete epondolo lioku linga upange.

VAMANJI ALUME VA LILONGISA NDATI OKU TENDA AKÃI NDECI YEHOVA?

A vamanji alume, oco tu kolele nda tu kasi oku tata vamanji akãi Akristão ndeci Yehova a linga, tu sukila oku kũlĩhĩsa lutima wosi ovisimĩlo vietu kuenda ovilinga. Omo liaco, tu sukila ekuatiso. Ondotolo yimue yi pondola oku talavaya lomakina oco a limbuke nda utima womunu umue u kasi ciwa, ale muli uvei. Cimuamue haico okuti, akamba vawa kuenda Ondaka ya Suku va pondola oku tu kuatisa oku limbuka ovisimĩlo vietu loku kũlĩhĩsa nda onjila ndomo tu tenda akãi, yi sanjuisa Yehova. Nye tu sukila oku linga oco tu tambule ekuatiso liaco.

Pula kekamba limue. (Olosap. 18:17) Tu pondola oku pula kekamba limue tua kolela okuti wa sunguluka kuenda wa lianja, loku u pula ndoco: “Nye o sima ndomo nda siata oku tata vamanji akãi? Anga hẽ va liyeva okuti nda va sumbila? Ndi kuete hẽ ocituwa cimue ndi sukila oku mioñolõla?” Nda ekamba liove lia ku situluila ovina vimue o sukila oku mioñolõla, yuvula oku li sandela esunga. Pole, linga apongoloko a sukiliwa.

Lilongisa Ondaka ya Suku. Onjila yiwa yoku kũlĩha nda tu kasi oku tata ciwa vamanji akãi, oku kũlĩhĩsa ovituwa vietu kuenda ovilinga vietu lekuatiso Liondaka ya Suku. (Va Hev. 4:12) Poku lilongisa Embimbiliya tu ka kũlĩha alume va enda oku tata ciwa akãi kuenda vana ka va tatele ciwa akãi. Tu pondola oku sokisa ovilinga viavo levi vietu. Vamanji alume va sukila oku kuata utate wokuti ka va konomuisa lika ocinimbu cimosi oco ovo ka va ka kuate ocisimĩlo ka ca sungulukile catiamẽla kakãi. Ovo va sukila oku konomuisa ovinimbu vialua Viembimbiliya vi lombolola ndomo alume va sukila oku tata akãi. Nda va ci linga, ovo va pondola oku kuata elomboloko liocisimĩlo ca Suku ndomo va tenda akãi. Ndeci, ku 1 Petulu 3:7, ulume o sukila oku tata ukãi waye ‘lesumbilo ndocikuata ca leñela.’ c Anga hẽ eci ci lekisa okuti eye o sule kuloño oku ci sokisa lulume waye? Sio! Sokisa olondaka via Petulu levi vi sangiwa ku Va Galatia 3:26-29, ku lekisa okuti, Yehova wa nõla akãi lalume oco va ka viale ndovitunda kilu la Yesu. Eci tu lilongisa Ondaka ya Suku kuenda tu pinga okuti ekamba limue lia koleliwa li tu sapuila ndomo tu kasi oku tata akãi, ci ka tu kuatisa oku lekisa esumbilo ku vamanji akãi.

 AKULU VEKONGELO VA LEKISA NDATI ESUMBILO KU VAMANJI AKÃI?

Vamanji alume vekongelo, va sukilavo oku lilongisa oku tata vamanji akãi lesumbilo, poku kuama ongangu yakulu vekongelo vakuacisola. Akulu vekongelo va lekisa ndati ongangu yoku lekisa esumbilo ku vamanji akãi? Tu konomuisi ndomo va siata oku ci linga.

Akulu vekongelo va siata oku pandiya vamanji akãi. Upostolo Paulu wa sia ongangu yiwa akulu vekongelo va sukila oku setukula. Eye wa pandiya akãi valua kukanda a sonehela ekongelo lia Va Roma. (Va Rom. 16:12) O pondola hẽ oku sokolola esanju vamanji vaco akãi va kuata eci kua tangiwa ukanda waco vekongelo? Cimuamue haico akulu vekongelo va siatavo oku linga, poku pandiya vamanji akãi omo liovituwa viavo viwa kuenda upange va siata oku lingila Yehova. Eci ci kuatisa vamanji akãi oku liyeva okuti va soliwe, va sumbiwa kuenda va kapiwako. Olondaka vi pamisa viukulu umue wekongelo, vi pondola oku kuatisa vamanji akãi oku amamako oku vumba Yehova lekolelo.—Olosap. 15:23.

Poku pandiya vamanji akãi, akulu vekongelo va ci linge lutima wosi. Momo lie? Manji umue o tukuiwa Jessica hati: “Ca fina calua nda vamanji alume va sapuila ku vamanji akãi okuti, ‘vu kasi oku linga upange uwa.’ Tu sanjuka calua eci vamanji alume va tu pandiya kocina cimue ndeci, ndomo tu longisa omãla vetu oku unjuka eci tu kasi kohongele, ale ceci tu ka pitula ondonge yimue Yembimbiliya oku enda kohongele.” Eci akulu vekongelo va pandiya vamanji akãi kovina vimue va linga, ovo va pondola oku liyeva okuti va kapiwako kuenda va kuete esilivilo vekongelo.

Akulu vekongelo va yevelela vamanji akãi. Akulu vekongelo okuti ambombe, va limbuka okuti havoko lika va kuete ovisimĩlo viwa. Akulu vaco vekongelo lumbombe walua, va pinga ku vamanji akãi oku eca ovisimĩlo viavo kuenda va yevelela lutate eci vamanji akãi va vangula. Poku ci linga, akulu vekongelo va  pamisa vamanji akãi kuenda va kuatisiwa. Ndamupi? Manji umue ukulu wekongelo o tukuiwa Gerardo okuti o panga onepa kepata lio Betele wa popia hati: “Nda limbuka okuti, oku pinga ovisimĩlo ku vamanji akãi ci ñuatisa oku linga ciwa ovopange ange. Olonjanja vialua vamanji akãi, va talavaya calua okuti, vamanji alume ci sule.” Vakongelo, vamanji valua akãi va talavaya ndakundi votembo yosi kuenje va kũlĩha ciwa omanu va sangiwa vocikanjo cekongelo. Manji umue ukulu wekongelo o tukuiwa Bryan wa popia hati: “Vamanji akãi va kuete ovituwa vialua viwa kuenda uloño u sukiliwa vocisoko. Omo liaco, kuatisiwi lovina ovo va tẽla!”

Akulu vekongelo vakualondunge, ka va yayulako oku likala ovisimĩlo via vamanji akãi. Momo lie? Ocisimĩlo kuenda ovoloño avo, a pondola oku kuatisa manji umue ulume oku kũlĩha ciwa ocina cimue kuenda oku limbukavo ovisimĩlo via vakuavo. (Olosap. 1:5) Ndaño okuti ukulu umue wekongelo ka kuama ocisimĩlo cimue ca eciwa la manji umue ukãi, eye lopo eca olopandu kovisimĩlo viaye kuenda oku limbuka alikolisilo aye.

Akulu vekongelo va pindisa vamanji akãi. Akulu vekongelo vakualondunge, va likolisilako oku pindisa vamanji akãi. Ndeci, ovo va longisa vamanji akãi oku songola ohongele yupange woku kunda nda okuti ka kuli manji umue ulume wa papatisiwa. Akulu vekongelo va pondolavo oku va pindisa oku talavaya lovimalẽho, ale lolomakina oco va kuatise kupange woku tunga kuenda oku semũlũla olonjo Viusoma. Ko Betele vamanji asongui va pindisa vamanji akãi oco va linge ovopange a likasi ndeci, oku semũlũla, oku landa ovina, oku linga olokonda, oku linga ovopange o komputador kuenda vikuavo. Eci akulu vekongelo va pindisa vamanji akãi, ovo va lekisa okuti vamanji vaco va tẽla oku linga ovopange kuenda va koleliwa.

Vamanji valua akãi va talavaya lepindiso va tambula kakulu vekongelo oco va kuatise omanu vakuavo. Ndeci, vamanji vamue akãi epindiso va tambula lioku tunga, lia siata oku va kuatisa poku semũlũla olonjo via vamanji va lipita lovilunga. Vamanji vakuavo akãi, epindiso va tambula lioku kundila volokololo, va kuatisa lalio koku pindisavo vamanji vakuavo akãi oku kuama onjila yaco. Vamanji akãi va liyeva ndati poku pindisiwa lakulu vekongelo? Manji umue o tukuiwa Jennifer wa popia hati: “Eci nda kala oku kuatisa koku tungiwa Kuonjango Yusoma, manji umue usongui wa sanda otembo oco a ndi pindise. Eye wa mola upange nda linga kuenje wa ndi pandiya. Nda sola calua oku talavaya laye, momo nda liyeva okuti nda kapiwako kuenda nda koleliwa.”

ASUMŨLŨHO OKU TATA AKÃI VOVEKONGELO NDA VAMANJETU

Tu sole calua vamanjetu akãi vakuekolelo, ndeci Yehova! Eli olio esunga lieci tu va tatela ndepata. (1 Tim. 5:​1, 2) Etu tua va kapako kuenda tu sole calua oku talavaya kumue lavo. Etu tu sanjukavo eci ovo va limbuka ocisola kuenda ekuatiso lietu. Manji umue o tukuiwa Vanessa wa popia hati: “Ndi pandula calua Yehova omo lioku panga onepa vocisoko caye, mueyuka vamanji valua alume okuti va siata oku ndi pamisa calua.” Manji umue ko Taiwan wa popiavo hati: “Ndi pandula calua Yehova kuenda ocisoko caye omo va kapako calua akãi kuenda ekalo liavo. Eci ci pamisa ekolelo liange kuenda ci ñuatisa oku sanjukila esumũlũho ndi kuete lioku panga onepa vocisoko ca Yehova.”

Yehova o sanjuka calua eci a mola alume Akristão vakuekolelo va kasi oku likolisilako oku tenda loku tata akãi ndeci eye a linga! (Olosap. 27:11) Manji umue ukulu wekonge ko Eskósia o tukuiwa Benjamin wa popia hati: “Koloneke vilo, alume valua voluali ka va sumbilile akãi. Eli olio esunga lieci okuti, eci vamanjetu akãi va kasi Vonjango Yusoma, va sukila oku liyeva okuti va sumbiwa kuenda va soliwe.” Omo liaco, vosi yetu tu likolisiliko oku setukula Yehova, poku tata vamanjetu akãi locisola kuenda lesumbilo va sesamẽla.—Va Rom. 12:10.