A yọnrọn evo ghwanre vwẹ asan re de ni eya kueku. Kerẹ udje, Hans, rọ dia oniruo okinriariẹ vwẹ Bolivia da ta: “A yọnrọn eshare evo ghwanre vwẹ asan rẹ eshare da kparoma, kẹ ayen nẹ oma rayen nẹ ayen yovwin nọ eya, ọtiọyena, ayen rhe muọghọ kẹ eya-a.” Shengxian, rọ dia ọkpako vwẹ Taiwan da ta: “Vwẹ asan me dia, eshare buebun no nẹ ofori eya vwo duvwunu phiyọ ota raye-en. Ọshare de djunute iroroẹjẹ rẹ aye vwọphia, igbeyan rọyen se no kueku.” Eshare efa dje uruemu nana phia vwẹ idjerhe ra fobọ nẹ sua-a. Kẹrẹ udje, ayen sa vwẹ eya jehwẹ vwẹ idjerhe rọ da nẹrhẹ e ni ayen kueku.

Vwọrẹ uyota, o toro asan rẹ ohwo dia ghwanre-e, o se wene iruemu rọyen. O se phi uruemu re vwo ni eya kueku kparobọ. (Ẹf 4:​22-​24) E se ru ọnana siẹrẹ a da vwẹrokere udje ri Jihova. Vwẹ uyovwinrota nana, avwanre cha ta ota kpahen obo ri Jihova nene eya yerẹn wan, oborẹ iniọvo eshare se vwo nene eya yerin kirobo ri Jihova ruẹ, kugbe oborẹ ekpako sa vwọ kobaro rẹ ọghọemuo vwọ kẹ eya.

MAVỌ YEN JIHOVA NENE EYA YERẸN WAN?

Jihova phi udje ọgbagba phiyotọ kpahen obo ro fori nẹ e nene eya yerin wan. Kerẹ Ọsẹ ro gbe arodọnvwẹ, o vwo ẹguọnọ orua rọyen rọhẹ otọrakpọ na. (Jọ 3:​16) Iniọvo eya nana re fuevun na pha kerẹ emetẹ re pha ghanghanre kẹ Jihova. E jẹ e roro kpahen idjerhe ri Jihova vwo brọghọ phiyọ eya oma.

Jihova ghwomaphiyọ ẹbẹre ọvo-o. Jihova ma eshare vẹ eya họhọ oma rọyen. (Jẹ 1:​27) Ọ ma eshare rẹ ayen vwọ tẹn ona yẹrẹ vwo  erianriẹn vrẹ eya-a; yẹrẹ ko siẹkẹrẹ eshare vrẹ eya-a. (2Ik 19:7) Oka rẹ ẹgba iroro ọvuọvo yen ọ vwọ kẹ eshare vẹ eya rere ayen se vwo vwo ẹruo rẹ iyono ri Baibol na, ji dje omamọ rẹ iruemu ro vwori phia. Ẹro ri Jihova vwo nẹ esegbuyota eshare yen o ji vwo nẹ ọ rẹ eya​—owenẹ ayen vwo iphiẹrophiyọ rẹ ayen vwọ dia Iparadaisi vwẹ otọrakpọ na bẹdẹ yẹrẹ ayen vwo iphiẹrophiyọ rẹ ayen vwọ dia ivie vẹ irherẹn vwẹ odjuvwu. (2Pi 1:1.) O phẹnre dẹn nẹ Jihova ghwomaphiyọ ẹbẹre rẹ eshare vrẹ ẹbẹre rẹ eya-a.

Ọ kerhọ rayen. Jihova davwerhọ rẹ iroro vẹ ọdavwẹ rẹ eya. Kẹrẹ udje, Ọ kerhọ je kpahenphiyọ ẹrhovwo ri Rachel vẹ Hanah. (Jẹ 30:22; 1Sa 1:​10, 11, 19, 20) Jihova ji mu ihwo ri si Baibol na vwọ niyẹnrẹn rẹ eshare re kerhọ rẹ eya. Kerẹ udje, Ebraham nene odjekẹ ri Jihova rọ vwọ kerhọ rẹ aye rọyen Sera. (Jẹ 21:​12-​14) Ovie Devid kerhọ rẹ Abigail. Vwọrẹ uyota, o niro nẹ Jihova yen ji Abigail bro rhe. (1Sa 25:​32-​35) Jesu rọ dia ohwo ro dje iruemu rẹ Ọsẹ rọyen phia gbagba, kerhọ rẹ oni rọyen Meri. (Jọ 2:​3-​10) Idje nana djerephia nẹ idjerhe ọvo ri Jihova vwo brọghọ phiyọ eya oma yen ọ vwọ kerhọ rayen.

Ọ vwẹroso ayen. Kerẹ udje, Jihova vwẹroso Ivi nẹ ọ cha vwẹ ukẹcha phia vwọ vwẹrote otọrakpọ na. (Jẹ 1:​28) Womarẹ ọnana, o djerephia nẹ Adam yovwin nọ Ivi rọ dia aye rọye-en, ukperẹ ọtiọyen, Ivi ọyen uvi rẹ ọchuko vwọ kẹ ọshare rọyen. Jihova je vwẹroso Dẹbora vẹ Hulda re dia emraro eya nẹ ayen vwẹ uchebro kẹ ihwo rọyen, tobọ ji te ovie kugbe oguẹdjọ. (Igu 4:​4-9; 2Iv 22:​14-​20) Nonẹna, Jihova je vwẹ ovwian vwọ kẹ eya re dia Inenikristi. Iniọvo eya nana re fuevun na ga kerẹ ighwoghwota, ekobaro vẹ imishọnare. Ayen vwẹ ukẹcha phia vwẹ ebanbọn, ẹrhuẹrẹ vẹ ẹroevwote rẹ Eguan Ruvie vẹ iwevwin ukoko na efa. Evo rayen ga vwẹ Bẹtẹl; efa ga vwẹ ọfisi re de ruiruo rẹ efanfan. Iniọvo eya nana pha kerẹ isodje buebun ri Jihova vwo ruẹ ọhọre rọyen. (Un 68:11) O phẹnre dẹn nẹ Jihova ni eya kerẹ evwiẹrẹ-ẹ.

MAVỌ YEN INIỌVO ESHARE SE VWO YONO OBO RE NENE EYA YERẸN KIROBO RI JIHOVA RUẸ?

Iniọvo eshare, a sa vwọ riẹn sẹ e nene iniọvo eya yerẹn kirobo ri Jihova ruẹ, ofori nẹ a nabọ fuẹrẹn oborẹ avwanre roro vẹ obo re ruẹ. A guọnọ ukẹcha e se vwo ru ọtiọyen. Kirobọ rẹ imashini ri X-ray sa mrẹ ega rehẹ evunrẹ udu rẹ ohworakpọ ye, ọtiọyen yen omamọ rẹ ugbeyan vẹ Ota rẹ Ọghẹnẹ sa vwẹ ukẹcha kẹ avwanre vwọ mrẹ iroro re chọre rehẹ udu rẹ avwanre kpahen eya. Die yen avwanre se ru vwọ mrẹ ukẹcha?

Riẹn mie omamọ rẹ ugbeyan. (Isẹ 18:17) Avwanre sa nọ ugbeyan ra vwẹroso, ra je riẹn phiyọ ohwo ro brorhiẹn abavo enọ nana: “Mavọ mi nene eya yerẹn wan? Ayen riẹnre nẹ mi brọghọ phiyọ ayen oma? O vwo asan mi de se ru yovwinphiyọ vwẹ oborẹ me vẹ ayen yerẹn wan?” Siẹrẹ ugbeyan wẹn de djunute asan evo wo de se ru yovwinphiyọ, wo guomariase-e. Ukperẹ ọtiọyen, davwẹngba vwo ru ewene ro fori.

Yono Ota rẹ Ọghẹnẹ. Idjerhe ro me yovwin avwanre vwọ riẹn sẹ a vẹ iniọvo eya riẹn yerẹn yẹn, a vwọ vwẹ Ota rẹ Ọghẹnẹ vwọ fuẹrẹn oma rẹ avwanre. (Hib 4:​12) Avwanre vwo yono Baibol na, e che yono kpahen eshare ri brọghọ phiyọ eya oma vẹ eshare ri ru ọtiọye-en. Kẹ avwanre sa vwẹ iruemu rayen vwọ vwanvwe ọ rẹ avwanre. Vwọba, o fori nẹ eshare tinkamu ẹkpo ri Baibol ọvo-o, ukperẹ ọtiọyen ayen reyọ vwọ vwanvwe ẹkpo efa vwẹ Baibol na rọ cha vwẹ ukẹcha kẹ ayen vwọ vwẹ ẹro abavo vwo ni eya. Kerẹ udje, vwo nene obo rehẹ 1 Pita 3:​7, ofori e vwo brọghọ phiyọ eya oma kidie ayen “pha yẹghẹ.” b Kẹ ọnana mudiaphiyọ nẹ eshare na yovwin nọ eya? Ẹjo, kakaka! Vwẹ eta ri Pita tare vwọ vwanvwe obo rehẹ Galesha 3:​26-​29, ro djerephia nẹ Jihova jẹ eya vẹ eshare reyọ rẹ ayen vwo nene Jesu sun vwẹ odjuvwu. Siẹrẹ avwanre  de yono Ota rẹ Ọghẹnẹ, je nokpẹn rẹ ukẹcha mie uvi rẹ ugbeyan nẹ ọ vuẹ avwanre kpahen obo re nene eya yerẹn wan, kẹ avwanre se yono obo re brọghọ phiyọ eya oma.

MAVỌ YEN EKPAKO SE VWO BRỌGHỌ PHIYỌ EYA OMA?

Iniọvo rehẹ ukoko na ji se yono obo re nene eya yerẹn vẹ ọghọ siẹrẹ ayen de nene udje rẹ ekpako na. Mavọ yen ekpako vwọ kobaro rẹ ọghọ emuo vwọ kẹ eya? E jẹ e roro kpahen idjerhe evo.

Ayen jiri iniọvo eya na. Ọyinkọn Pọl phi omamọ rẹ udje phiyotọ rẹ ekpako vwẹrokeri. Vwẹ ileta ro si rhe ukoko rọhẹ Rom, o jiri iniọvo eya evo. (Ro 16:12) Wọ sa vwẹ ẹwẹn roro aghọghọ ro che rhe iniọvo eya na re vwo se ileta ri Pọl si vwo rhe ukoko na? Vwẹ idjerhe vuọvo na, ekpako jiri iniọvo eya na fikirẹ omamọ rẹ uruemu ro rhe ayen, ọtiọyen ji te iruo rẹ ayen ruẹ vwọ kẹ Jihova. Ọnana nẹrhẹ iniọvo eya na riẹn nẹ e vwo ọdavwẹ rayen, nẹ e ji brọghọ phiyọ ayen oma. Eta rẹ ọbọngan rẹ ọkpako sa dia oborẹ iniọvo eya nana ghene guọnọ, rẹ ayen vwọ fuevun ga Jihova na.​​​—Isẹ 15:23.

Siẹrẹ ekpako de jiri iniọvo eya, e jẹ ujiri na dia ọ rẹ phiọgun, ro ji nẹ otọ ẹwẹn rhe. Diesorọ? Oniọvo aye re se Jessica da ta: “Ọ vwerhoma siẹrẹ iniọvo eshare da vuẹ oniọvo aye nẹ ‘wẹ kobiruo.’ Ẹkẹvuọvo, ọ nabọ da avwanre ẹro siẹrẹ iniọvo eshare de djunute obo re nẹrhẹ ayen jiri avwanre na, kerẹ ọke rẹ avwanre de yono emọ avwanre ayen vwo chidia gbiẹi vwevunrẹ uyono yẹrẹ ọke rẹ avwanre da reyọ ihwo ra vwẹ Baibol yono rhe uyono.” Siẹrẹ ekpako de djunute obo re nẹrhẹ ayen jiri eya na, kọ nẹrhẹ iniọvo eya na riẹn nẹ ukoko na ni ayen ghanghanre.

Ayen kerhọ rẹ iniọvo eya na. Ekpako re vwomakpotọ riẹnre nẹ ayen riẹn emu eje-e. Ekpako  tiọyena vuẹ iniọvo eya na nẹ ayen vwẹ iroroẹjẹ rayen vwọphia, je nabọ kerhọ siẹrẹ ayen da ta ota. Vwẹ idjerhe ọtiọyena, ekpako phiuduphiyọ ayen awọ, je mrẹ erere komobọ. Vwẹ idjerhe vọ? Ọkpako ọvo re se Gerardo, rọ gare vwẹ Bẹtẹl da ta: “Me rhe mrẹvughe re nẹ mi ruiruo mẹ fiotọ siẹrẹ me da nokpẹn rẹ ukẹcha mie iniọvo eya. Iniọvo eya na evo ruiruo na ọke grongron re vwọ vrẹ iniọvo eshare buebun.” Iniọvo eya buebun ekobaro vwevunrẹ ukoko na, ọtiọyena, ayen riẹn kpahen ihwo re dia ekogho na. Ọkpako ọvo re se Bryan da ta: “Iniọvo avwanre rẹ eya vwo iruemu vẹ ena buebun ri se fierere kẹ ukoko na. Ọtiọyena, gbe yono mie ayen!”

Ekpako ri vwo aghwanre brokpakpa gbobọnyẹ iroroẹjẹ rẹ eya-a. Diesorọ? Oniọvo ọshare re se Edward da ta: “Iroroẹjẹ rẹ oniọvo aye vẹ obo ro rhiẹromrẹ sa vwẹ ukẹcha kẹ oniọvo ọshare vwọ nabọ vwo ẹruọ rẹ ota rọhẹ otọ, ji dje erorokẹ phia.” (Isẹ 1:5) Ọ da tobọ dianẹ ọkpako cha reyọ iroroẹjẹ rẹ oniọvo aye vwo ruiruo-o, ọ je sa nabọ kpẹvwẹ fikirẹ oniso rọyen kugbe iroroẹjẹ rọ vwọphia na.

Ayen yono iniọvo eya. Ekpako ri vwo oniso guọnọ uphẹn rẹ ayen vwo yono iniọvo eya. Kerẹ udje, ayen se yono iniọvo eya oborẹ ayen sa vwọ vwẹrote omẹvwa re ruẹ tavwen e ki kpo aghwoghwo ọ da dianẹ oniọvo ọshare ro bromaphiyame herọ-ọ. Ekpako se yono ayen obo ra vwẹ imashini vẹ erọnvwọn efa vwo ruiruo rere ayen sa vwọ vwẹ ukẹcha phia vwẹ ẹroevwote vẹ ebanbọn rẹ iwevwin rẹ ukoko. Vwẹ Bẹtẹl, ekpako re vwẹrote akon rẹ iruo yono iniọvo eya rere ayen sa vwọ vwẹrote iruo sansan kerẹ erọnvwọn ẹdẹ, akantu, ikọmputa programu vẹ efa. Ekpako de yono iniọvo eya, kọyen ayen djephia nẹ ayen niro nẹ eya na muwan, nẹ a je sa vwẹroso ayen.

Iniọvo eya buebun reyọ uyono re yono ayen vwọ vwẹ ukẹcha kẹ ihwo efa. Kerẹ udje, iniọvo eya evo vwẹ uyono rẹ ayen yonori vwẹ iruo rẹ ebanbọn vwọ cha ihwo efa uko vwọ rhoma bọn iwevwin rayen ọke rẹ oghwọrọ vwọ vwomaphia. Efa vwẹ ona rẹ ayen yonori vwẹ aghwoghwo rẹ azagba vwo yono iniọvo eya efa rere ayen se vwo vwobọ vwọ. Oka rẹ ẹro vọ yen iniọvo eya vwo nẹ ekpako ri yono ayen na? Oniọvo aye re se Jennifer da ta: “Ọke re me vwọ wian vwẹ iruo rẹ ebanbọn rẹ Ọguan Ruvie ọvo, ọkpako ọvo da ghwọrọ ọke vwo yono uvwe. O vwo oniso rẹ obo ri mi ruru, ọ da nabọ jiri uvwe. Oma vwerhen ovwẹ mi vwo nene wian kidie o ni vwe ghanghanre, ọ je vwẹroso ovwẹ.”

ERERE RE HERỌ SIẸRẸ E DE NENE INIỌVO EYA YERẸN KERẸ IHWO RẸ ORUA AVWANRE

Avwanre vwo ẹguọnọ rẹ iniọvo eya kirobo ri Jihova vwo ẹguọnọ rayen! Ọtiọyena, avwanre ki nene ayen yerẹn kerẹ ihwo rẹ orua avwanre. (1Ti 5:​1, 2) Oma vwerhen avwanre siẹrẹ avwanre de nene ayen wian kuẹgbe. Ọ je vwerhen avwanre oma, rẹ ayen vwọ riẹn nẹ avwanre vwo ẹguọnọ rayen, ji biẹcha ayen. Oniọvo aye ọvo re se Vanessa da ta: “Me kpẹvwẹ Jihova mamọ kidie me hẹ evunrẹ ukoko rọyen, rọ vọnre vẹ iniọvo ri phiuduphiyọ ovwẹ awọ.” Oniọvo aye ọfa vwẹ Taiwan da rha ta: “Oma vwerhen ovwẹ mamọ nẹ Jihova vẹ ukoko rọyen ni eya ghanghanre, ji muọghọ kẹ ayen. Ọnana nẹrhẹ esegbuyota mẹ ganphiyọ, je nẹrhẹ mi vwo ọdavwaro kpahen uphẹn re me vwọ dia ukoko ri Jihova.”

Oma vwerhen Jihova mamọ rọ vwọ mrẹ eshare re fuevun re davwẹngba ayen vwo brọghọ phiyọ eya oma, ji nene ayen yerẹn kirobo ro ruẹ! (Isẹ 27:11) Ọkpako ọvo vwẹ Scotland re se Benjamin da ta: “Vwevunrẹ akpọ na nonẹna, eshare buebun muọghọ kẹ eya-a, ọtiọyena, iniọvo eya da ro evunrẹ Ọguan Ruvie, avwanre guọnọre nẹ o mu ayen ẹro nẹ e vwo ẹguọnọ rayen.” E jẹ avwanre ru obo re se ru eje vwọ vwẹrokere Jihova womarẹ e vwo nene iniọvo eya yerẹn vwọrẹ ẹguọnọ vẹ ọghọ ro fori nẹ e mu kẹ ayen.​—Ro 12:10.