Vhaṅwe vhanna vho aluselwa kha mvelele ine khayo vhanna vhanzhi vha dzhia vhafumakadzi vha si vha ndeme. Sa tsumbo, Vho Hans vhane vha vha mulavhelesi wa ḽiisela ngei Bolivia vha amba uri vhaṅwe vhanna vho aluselwa kha mvelele ine ya ṱuṱuwedza vhanna uri vha ḓikukumuse. Vhenevho vhanna vha tenda uri vhafumakadzi a si vha ndeme nahone vha anzela u vha fara nga nḓila ya lunyadzo. Vho Shengxian vhane vha vha muhulwane wa tshivhidzo ngei Taiwan vha ri: “Vhanna vhanzhi vha vhona u nga vhafumakadzi a vho ngo tea u vhudza vhanna mavhonele avho. Arali munna a amba mavhonele a mufumakadzi nga ha maṅwe mafhungo vhaṅwe vhanna vha nga thoma u mu nyadza. Vhaṅwe vhanna vha sumbedza u vha na tshiṱalula kha vhafumakadzi nga nḓila dzo dzumbamaho. Sa tsumbo, vha nga ita miswaswo ine ya sumbedza u nyadza vhafumakadzi.

Zwi a takadza u ḓivha uri munna a nga ita tshanduko hu sa londwi mvelele kana nḓila ye a aluswa ngayo. A nga guda uri vhanna a vha khwine u fhira vhafumakadzi. (Vhaef. 4:22-24) Zwenezwo a nga zwi ita nga u edzisa tsumbo ya Yehova. Kha ino thero, ri ḓo guda nga ha nḓila ine Yehova a fara ngayo vhafumakadzi, nḓila ine vhanna vha nga mu edzisa ngayo na nḓila ine vhahulwane vha tshivhidzo vha nga vhetshela ngayo vhaṅwe tsumbo nga u hulisa vhahashu vha tshifumakadzini.

YEHOVA U FARA HANI VHAFUMAKADZI?

Yehova o ri vhetshela tsumbo yavhuḓisa ya nḓila ine vhafumakadzi vha tea u farwa ngayo. Sa Khotsi ane a pfela vhuṱungu, u a funa vhana vhawe vhoṱhe. (Yoh. 3:16) Vhafumakadzi vha re na lutendo khae u vha dzhia sa vhananyana vhawe vha ndeme. Ṱhogomelani nḓila dzi tevhelaho dzine Yehova a sumbedza ngadzo uri u a funa na u ṱhonifha vhafumakadzi.

 Ha ṱaluli vhafumakadzi. Yehova o sika vhanna na vhafumakadzi a tshi ḓifanyisa. (Gen. 1:27) Ha ngo sika vhanna vhe na vhuṱali kana vhukoni vhu fhiraho ha vhafumakadzi nahone ha takaleli vhanna u fhira vhafumakadzi. (2 Koron. 19:7) O sika vhanna na vhafumakadzi vhe na vhukoni vhu fanaho ha u pfesesa ngoho i re Bivhilini na u edzisa nḓila ine a vha ngayo. Yehova u a dzhiela nṱha vhanna na vhafumakadzi vhane vha vha na lutendo khae, o vha ṋea fhulufhelo ḽa u tshila kha ḽifhasi kana ḽa u vha mahosi na vhotshifhe ngei ṱaḓulu. A zwi vhuyi zwa vhudziswa uri Yehova ha ṱaluli vhafumakadzi.

U a vha thetshelesa. Yehova u na ndavha na nḓila ine vhafumakadzi vha ḓipfa ngayo na thaidzo dzine vha sedzana nadzo. Sa tsumbo, o thetshelesa thabelo ya Rahele na ya Hanna nahone a dzi fhindula. (Gen. 30:22; 1 Sam. 1:10, 11, 19, 20) Yehova o dovha a hevhedza vhaṅwali vha Bivhili uri vha katele mafhungo a vhanna vhe vha thetshelesa vhafumakadzi. Sa tsumbo, Abrahamu o thetshelesa mufumakadzi wawe Sara, samusi Yehova o mu vhudza uri a ite nga u ralo. (Gen. 21:12-14) Khosi Davida o thetshelesa Abigaili. O zwi dzhia uri ndi Yehova we a mu ruma uri a ambe nae. (1 Sam. 25:32-35) Yesu ane a edzisa kokotolo nḓila ine Khotsi awe a vha ngayo, o thetshelesa mme awe Maria. (Yoh. 2:3-10) Dzenedzi tsumbo dzi bvisela khagala nḓila ine Yehova a sumbedza ngayo uri u a ṱhonifha vhafumakadzi. Zwenezwo u zwi ita nga u vha thetshelesa.

U a vha fhulufhela. Sa tsumbo, Yehova o ṋea Eva vhuḓifhinduleli ha u thusa Adamu u ṱhogomela ḽifhasi ḽoṱhe. (Gen. 1:28) Nga u ita zwenezwo, o mu dzhia e wa ndeme u fana na Adamu, sa muthusi ane a dzhielwa nṱha. Yehova o dovha a ṋea muporofita Debora na Huluda mushumo wa u eletshedza vhathu vhawe, u katela na muhaṱuli na khosi. (Vhahaṱ. 4:4-9; 2 Dzikh. 22:14-20) Na ṋamusi Yehova o ṋea vhafumakadzi vha Vhakriste vhuḓifhinduleli ha u ita mushumo wawe. Vhenevha vhafumakadzi vhane vha fhulufhedzea vha shuma sa vhahuweleli, vhavulanḓila na vharumiwa. Vha thusa u ola, u fhaṱa na u ṱhogomela Holo dza Ṱhanzi dza Yehova na zwifhaṱo zwa ndangulo. Vhaṅwe vhavho vha shuma Bethele, ngeno vhaṅwe vha tshi shuma ofisini dza u ṱalutshedzela. Vhenevha vhafumakadzi vha tou nga mmbi khulu ine Yehova a i shumisa u ita mushumo wawe. (Ps. 68:11) Zwi tou pfala uri Yehova u dzhia vhafumakadzi vhe vha ndeme.

VHAHASHU VHA TSHINNANI VHA NGA GUDA HANI U FARA VHAFUMAKADZI NGA NḒILA INE YEHOVA A VHA FARA NGAYO?

Vhahashu vha tshinnani, uri ri vhone arali ri tshi fara vhahashu vha tshifumakadzini nga nḓila ine Yehova a vha fara ngayo, ri tea u ṱolisisa nḓila ine ra humbula na u ita ngayo zwithu. Ri ṱoḓa thuso uri ri zwi kone. Dokotela a nga shumisa mutshini uri a vhone arali mbilu ya muthu i na mutakalo wavhuḓi kana i si na. Nga hu fanaho, Ipfi ḽa Mudzimu na khonani dzavhuḓi zwi nga ri thusa u vhona arali nḓila ine ra dzhia ngayo vhafumakadzi i tshi takadza Yehova kana i sa mu takadzi. Ri nga ita mini uri ri wane thuso?

Vhudzisani khonani yavhuḓi. (Mir. 18:17) Ni nga amba na khonani ine na i fhulufhela, i re na vhuthu na ine ya humbulela. Ni nga mu vhudzisa na ri: “Ni vhona u nga ndi fara hani vhahashu vha tshifumakadzini? Ni vhona u nga vha a zwi vhona uri ndi a vha ṱhonifha? Naa hu na zwine nda nga zwi ita uri ndi khwinise nḓila ine nda vha fara ngayo?” Arali khonani yaṋu a ni vhudza huṅwe hune na tea u khwinisa hone, ni songo ḓiimelela, fhedzi ḓiimiseleni u ita tshanduko dzi ṱoḓeaho.

Gudani Ipfi ḽa Mudzimu. U itela u ḓivha arali ni tshi khou fara vhahashu vha tshifumakadzini zwavhuḓi, ṱolisisani mavhonele aṋu na zwine na zwi ita, ni tshi shumisa Ipfi ḽa Mudzimu. (Vhahev. 4:12) Musi ri tshi guda Bivhili ri guda nga ha vhanna vhe vha fara vhafumakadzi zwavhuḓi na vhe vha sa vha fare zwavhuḓi. Ri nga vhambedza tsumbo dzavho na nḓila ine riṋe ra fara ngayo vhafumakadzi. Zwiṅwe hafhu, u vhambedza ndimana dza Bivhili zwi nga ri thusa u iledza u shumisa dziṅwe ndimana nga nḓila i si yavhuḓi u itela u tikedza mihumbulo yo khakheaho nga ha vhafumakadzi. Sa tsumbo, 1 Petro 3:7 i amba uri mufumakadzi u tea u hulisiwa ngauri u nga “mudzio u songo khwaṱhaho.” b Naa zwenezwi zwi amba uri vhafumakadzi vha fanela u dzhielwa fhasi, uri a vho ngo ṱalifha kana uri a vha na vhutsila u fana na vhanna? Na luthihi. Vhambedzani maipfi a Petro na zwine Vhagalata 3:26-29 ya zwi amba zwa uri Yehova o khetha vhafumakadzi na vhanna uri vha ye u vhusa na Yesu ṱaḓulu. Musi ri tshi guda Ipfi ḽa Mudzimu na u vhudzisa mavhonele a khonani yashu nga ha nḓila ine ra fara ngayo vhafumakadzi,  zwi nga ri thusa u guda nḓila yavhuḓi ine ra nga fara ngayo vhahashu vha tshifumakadzini.

VHAHULWANE VHA NGA SUMBEDZA HANI URI VHA A ṰHONIFHA VHAHASHU VHA TSHIFUMAKADZINI?

Vhahashu tshivhidzoni vha nga guda u fara vhahashu vha tshifumakadzini nga nḓila yavhuḓi vha tshi edzisa tsumbo ya vhahulwane vha tshivhidzo. Vhahulwane vha vhea hani tsumbo musi zwi tshi ḓa kha u ṱhonifha vhahashu vha tshifumakadzini? Kha ri haseledze nga ha dziṅwe nḓila.

Vha a vha khoḓa. Muapostola Paulo o vhetshela vhahulwane tsumbo yavhuḓi ine vha nga i edzisa. O khoḓa vhahashu vha tshifumakadzini kha vhurifhi he a vhu ṅwalela tshivhidzo tsha Roma he ha vha vhu tshi ḓo vhaliwa vhathu vhoṱhe vha tshi zwi pfa. (Vharoma 16:12) Humbulani uri vhenevho vhahashu vha tshifumakadzini vha nga vha vho vha vho takala hani musi vha tshi pfa vhurifhi ha Paulo vhu tshi vhaliwa. Nga hu fanaho, vhahulwane vha tshivhidzo vha dzula vha tshi khoḓa vhahashu vha tshifumakadzini nga nṱhani ha vhushaka havhuḓi vhune vha vha naho na Yehova na nga mushumo wavhuḓi u ne vha mu itela wone. Zwenezwo zwi ita uri vhahashu vha tshifumakadzini vha ṱhogomele nḓila ine vha ṱhonifhiwa na u funiwa ngayo. Maipfi a ṱuṱuwedzaho ane muhulwane a nga vhudza wahashu wa tshifumakadzini a nga mu ṱuṱuwedza uri a bvele phanḓa a tshi shumela Yehova nga u fhulufhedzea.​—Mir. 15:23.

Musi vhahulwane vha tshivhidzo vha tshi khoḓa vhahashu vha tshifumakadzini vha tea u amba ngaho livhaho zwi tshi bva mbiluni. Ndi ngani? Muṅwe wahashu ane a pfi Jessica u ri: “Ndi zwavhuḓi musi vhahashu vha tshi khoḓa wahashu wa tshifumakadzini vha ri ‘no shuma.’ Fhedzi ri a zwi takalela nga maanḓa musi vhahulwane vha tshi ri vhudza zwine vha khou ri khoḓela zwone, u fana na uri ri a gudisa vhana vhashu uri vha dzule fhasi vha fhumule miṱanganoni kana uri ri a ḓiṋea tshifhinga ra ya u dzhia mugudiswa washu ra ḓa nae miṱanganoni.” Musi vhahulwane vha tshi khoḓa vhahashu vha tshifumakadzini nga ho livhaho zwi ita uri vhahashu vha tshifumakadzini vha ḓipfe vhe vha ndeme tshivhidzoni.

 Vha a thetshelesa vhahashu vha tshifumakadzini. Vhahulwane vhane vha ḓiṱukufhadza vha a zwi ṱhogomela uri na vhahashu vha tshifumakadzini vha nga ḓa na mihumbulo yavhuḓi ya nḓila ine zwiṅwe zwithu zwa tea u itwa ngayo. Vhenevho vhahulwane vha a vhudzisa mavhonele a vhahashu vha tshifumakadzini nahone vha a thetshelesa nga vhuronwane musi vha tshi amba. Musi vhahulwane vha tshi ita nga u ralo, vha a vhuyelwa nahone zwi ṱuṱuwedza vhahashu vha tshifumakadzini. Nga nḓila ḓe? Muṅwe muhulwane ane a pfi Gerardo ane a shuma ngei Bethele u ri: “U humbela vhahashu vha tshifumakadzini uri vha ambe mavhonele avho zwi nthusa uri ndi ite mushumo wanga nga nḓila yavhuḓi. Kanzhi vha vha vhe na tshenzhemo ya mushumo u fhira vhahashu vha tshinnani.” Vhunzhi ha vhahashu vha tshifumakadzini ndi vhavulanḓila tshivhidzoni, nga nṱhani ha zwenezwo vha ḓivha zwithu zwinzhi nga ha vhathu vhane vha dzula kha tsimu ya tshivhidzo tsha havho. Muṅwe muhulwane ane a pfi Bryan u ri: “Vhahashu vha tshifumakadzini vha na zwinzhi zwine vha nga zwi ita ndanguloni. Nga zwenezwo, ri a vhuyelwa nga tshenzhelo dzavho.

Vhahulwane vha sumbedza vhuṱali nga u sa thudzela kule mihumbulo ya vhahashu vha tshifumakadzini. Ndi ngani? Muṅwe muhulwane ane a pfi Edward u ri: “Mavhonele na tshenzhemo zwa wahashu wa tshifumakadzini zwi nga thusa wahashu wa tshinnani uri a kone u pfesesa mafhungo nga vhuḓalo na uri a pfesese nḓila ine vhaṅwe vha khou ḓipfa ngayo. (Mir. 1:5) Naho muhulwane a sa ḓo kona u shumisa zwe wahashu wa tshifumakadzini a zwi amba, a nga mu livhuwa uri o mu vhudza mavhonele awe nga ha eneo mafhungo.

Vha a vha gudisa. Vhahulwane vha sumbedza vhuṱali nga u ṱoḓa zwibuli zwa u gudisa vhahashu vha tshifumakadzini. Sa tsumbo, vha nga vha gudisa u fara muṱangano wa tsimu, uri vha ite wonoyo muṱangano arali hu si na wahashu wa tshinnani o lovhedzwaho. Vha nga vha gudisa u shumisa mitshini uri vha kone u thusa kha mushumo wa u ṱhogomela zwifhaṱo zwa ndangulo na kha mushumo wa u fhaṱa. Ngei Bethele, vhalavhelesi vha gudisa vhahashu vha tshifumakadzini u ita mishumo yo fhambanaho sa mushumo wa u ṱhogomela zwifhaṱo zwa ndangulo, wa u renga, wa dzitshelede, wa dzikhomphyutha na miṅwe. Musi vha tshi gudisa vhahashu vha tshifumakadzini vha vha vha tshi khou sumbedza uri vha vha dzhia vhe vha ndeme na uri vha a vha fhulufhela.

Vhunzhi ha vhahashu vha tshifumakadzini vha shumisa zwe vha zwi gudiswa nga vhahulwane u itela u thusa vhaṅwe. Sa tsumbo, vhaṅwe vha shumisa vhutsila he vha vhu guda musi vha tshi khou ita mushumo wa u fhaṱa u itela vusulusa mahaya a vhahashu o tshinyadzwaho nga khombo dza mupo. Vhaṅwe vha shumisa vhutsila he vha vhu guda kha mushumo wa u huwelela khagala u itela u thusa vhaṅwe vhahashu vha tshifumakadzini uri na vhone vha kone u u ita. Vhahashu vha tshifumakadzini vha ḓipfa hani nga vhahulwane vhe vha vha gudisa? Muṅwe wahashu ane a pfi Jennifer u ri: “Musi ndi tshi khou shuma kha mushumo wa u fhaṱa holo, mulavhelesi o ḓiṋea tshifhinga a ngudisa. O vha a tshi dzhiela nṱha mushumo we nda u ita nahone o nkhoḓa. Ndo vha ndi tshi funa u shuma nae ngauri o vha a tshi ita uri ndi pfe ndi wa ndeme nahone a tshi mpfulufhela.”

RI VHUYELWA HANI NGA U DZHIA VHAHASHU VHA TSHIFUMAKADZINI SA TSHIPIḒA TSHA MUṰA WASHU?

Vhahashu vha tshifumakadzini vha fhulufhedzeaho ri a vha funa u fana na nḓila ine Yehova a vha funa ngayo. Ri vha dzhia sa miraḓo ya muṱa washu. (1 Tim. 5:1, 2) Ri a vha dzhiela nṱha nahone ri ḓiphiṋa nga u shumisana navho. Ri a takala musi vha tshi pfa uri ri a vha funa na u vha tikedza. Muṅwe wahashu wa tshifumakadzini ane a pfi Vanessa u ri: “Ndi livhuwa Yehova nge a ntendela ndi tshi vha tshipiḓa tsha ndangulo yawe, yo ḓalaho nga vhahashu vhe vha nṱuṱuwedza zwihulu. Muṅwe wahashu wa ngei Taiwan u ri: “Ndi livhuwa Yehova na ndangulo yawe ngauri vha dzhiela nṱha vhafumakadzi na u ṱhonifha nḓila ine ra ḓipfa ngayo. Zwi khwaṱhisa lutendo lwanga, zwa ita uri ndi pfe ndi tshi livhuwa nga maanḓa u vha tshipiḓa tsha ndangulo ya Yehova.”

Yehova u a takala vhukuma musi a tshi vhona vhanna vha Vhakriste vha tshi mu edzisa nga u hulisa vhafumakadzi na u vha ṱhonifha. (Mir. 27:11) Muṅwe muhulwane wa tshivhidzo wa ngei Scotland ane a pfi Benjamin u ri: “Vhanna vhanzhi a vha ṱhonifhi vhafumakadzi na luthihi.” Musi vhahashu vha tshifumakadzini vha tshi ḓa Holoni Ya Ṱhanzi Dza Yehova, ri ṱoḓa uri vha pfe vha tshi funiwa na u ṱhonifhiwa. U nga ri ri nga ita zwoṱhe zwine ra nga kona u itela u edzisa Yehova nga u fara vhahashu vha tshifumakadzini nga lufuno na ṱhonifho yo vha fanelaho.​—Vharoma 12:10.