Arquanti fradei i ze stati slevadi in meso tanti òmini che i ghe fà de poco dele done. Varda cossa che Hans, un superintendente de sircuito nela Bolìvia, el ga dito: “Tanti òmini i ga imparà ancora de picinini che i ga de esser orgoliosi de esser òmini. Cossita, lori i pensa che i ze meio che le done e quasi sempre le trata sensa rispeto.” b Un ansiano de Taiwan de nome Shengxian el ga dito: “Ndove mi son de star, tanti òmini i pensa che le done no le ga de parlar la so opinion. Par quela, se un omo el ghe conta ai altri cossa che so dona la pensa, altri òmini no i gavarà pi rispeto par lu.” Ghen’è anca de quei che i ghe fà de poco dele done de altre maniere, come torle in giro par far i altri rider.

Ma no vol mia dir come che un omo l’è stà slevà gnanca quel che el ga imparà, lu el pol cavar via del cuor la idea che i òmini i ze meio che le done. (Efe. 4:22-24) Come? Lu el ga de ndarghe drio al esémpio de Geovà. In questo artìcolo, ndaremo veder come che Geovà el trata le done, come che i fradei i pol far compagno a lu e come che i ansiani i pol esser un bel esémpio in mostrar rispeto par le sorele.

COME CHE GEOVÀ EL TRATA LE DONE?

Geovà el ga dato el meio esémpio de come ghemo de tratar le done. Lu l’è un caro Pare e el ghe vol ben a tuti i so fioi. (Gio. 3:16) Alora, le nostre sorele le ze come so care fiole. Adesso, ndemo veder arquante maniere che Geovà el mostra amor e rispeto par le done.

 Lu el trata le done dela maniera giusta. Geovà el ga fato el omo e la dona cole medèsime qualità che lu el ga. (Gén. 1:27) Alora, i òmini no i sa de pi che le done gnanca i ga de pi abilità che lore. Geovà no’l ghe vol pi ben a un che a quelaltro. (2 Cró. 19:7) Tuti due i ze boni de capir quel che la Bìblia la dise e ndarghe drio al esémpio de Geovà. Geovà el ghe dà valor ala fede de tuti due, no vol mia dir se i ga la speransa de viver nte un paradiso qua nela Tera o de esser rè e sasserdoti nel cielo. (2 Pie. 1:1) Par quela, semo sicuri che Geovà el trata le done compagno el trata i òmini.

Lu el scolta le done. Geovà el se preocupa con quel che le done le pensa e le sente. Lu el ga scoltà le orassion de Rachel e de Ana, e le ga rispondeste. (Gén. 30:22; 1 Sam. 1:10, 11, 19, 20) Geovà anca el ga metesto nela Bìblia el esémpio de tanti òmini che i ga dato atension ale done. Un de questi òmini l’è stà Abraon. Lu el ga obedio a Geovà e el ga scoltà so dona, Sara. (Gén. 21:12-14) Anca el rè Davi el ghe ga dato atension a quel che Abigail la ga dito e el se ga nicorto che l’è stà Geovà mandarla. (1 Sam. 25:32-35) E Gesù, che el trata le done compagno a so Pare, el ga scoltà so mare, Maria. (Gio. 2:3-10) Alora, Geovà el mostra rispeto ale done parché lu le scolta.

Lu el se fida dele done. Geovà el ga mostrà che Adon e Eva i era compagni. Lu el ga domandà che anca Eva la giutesse a tender dela Tera. (Gén. 1:28) Pi tardi, Dio anca el ga doperà le profetise Dèbora e Ulda par dirghe a un rè, un giuis e ala nassion cossa che i gavaria de far. (Giui. 4:4-9; 2 Rè 22:14-20) Anca ancoi Geovà el se fida dele done par far tanti laori nela so organisassion. Ghen’è tante brave sorele che le ze predicadore, pioniere e missionàrie. Tante anca le giuta a far progeti, a far su e a tender de Saloni del Regno e de altri posti che la organisassion la dopera. Arquante brave sorele le laora in Betel e in scritòri remoti de tradussion (RTO). Cossita, vedemo che Geovà l’è drio doperar le done par far quel che lu el ga in mente e l’è drio mostrar che lore le ze brave e forte. — Sal. 68:11

COME CHE I FRADEI I POL TRATAR LE DONE COMPAGNO A GEOVÀ?

Noantri ghemo de proar veder cossa ghemo nel cuor e come semo drio tratar le done. Pensa nte un esémpio, un dotor el pol doperar una màchina de far esami par saver se el cuor de una persona el ga una malatia. Dela medèsima maniera, quel che la Bìblia la dise e boni amighi pol giutarne a saver se semo drio veder le done come Geovà el vol. Ndemo veder come.

Parla con un caro amigo. (Pro. 18:17) Pensa nte un amigo che te te fidi, che l’è bondoso e che el trata le sorele dela maniera giusta. Alora, proa domandarghe: ‘Sonti drio tratar ben le sorele? Sarà che le pensa che mi ghe mostro rispeto? Pénsito che mi podaria tratarle meio?’ Se to amigo el te dise qualcossa che te podarissi cambiar, no stà catar fora scuse. Invesse, sfòrsate de tratar meio le sorele.

Stùdia la Parola de Dio. La Parola de Dio la pol giutarne a saver se quel che pensemo dele done e come le tratemo l’è giusto. (Ebr. 4:12) Nela Bìblia, ghen’è tanti esempi de òmini che i ga tratà ben le done e tanti esempi de altri che i ze stati rugni. Alora, quando studiemo, podemo doperar questi esempi par saver a chi che semo drio far compagno. Ma ne ocore star atenti par no ciapar sol un per de testi dela Bìblia e doperarli come scusa par pensar de maniera sbaliada sora le done. Par esémpio, in 1 Piero 3:7 la Bìblia la dise che le done le ze come un vaso pi fiaco. c Ma questo no vol mia dir che le sa manco o le ga manco abilita che i òmini. Invesse, Gàlati 3:26-29 dise  che Geovà el ga scoliesto i òmini e anca le done par governar insieme de Gesù nel cielo. Alora, se studiemo la Bìblia e parlemo coi amighi par saver se semo drio tratar ben le done, ndaremo imparar a mostrarghe el rispeto che lore le mèrita.

COME CHE I ANSIANI I MOSTRA RISPETO ALE DONE?

Se i ansiani i trata le sorele con rispeto, anca i altri fradei dela congregassion i farà cossita. Adesso, ndemo veder come che i ansiani i pol tratar ben le done.

I ansiani i loda le sorele. El apòstolo Paolo el ga dato un bel esémpio ai ansiani. Quando el ga scrito una carta ala congregassion in Roma, lu el ga lodà diverse sorele. (Rom. 16:12) Pensa come quele sorele le ze restade contente quando la carta de Paolo la ze stata ledesta. Dela stessa maniera, ancoi i ansiani i loda le sorele par le so bele qualità e par el laoro che le fà par Geovà. Cossita, lori i mostra a queste care done che i ghe dà valor e che le rispeta. Le bele parole dei ansiani pol esser pròpio quel che le ga de bisogno par seitar a servir a Geovà. — Pro. 15:23.

Quando i ansiani i va lodar una sorela, lori i ga de parlar de cuor e dirghe cossa che ghe ga piasesto. Se lori i fà cossita, le sorele le vederà che le fà un bel laoro nela congregassion e che le ze importante par i fradei. Una sorela de nome Jessica la ga dito: “L’è bel quando i fradei i ghe dise a una sorela: ‘Te ghè fato ben!’ Ma l’è ancora meio se i dise cossa che ghe ga piasesto. Par esémpio, la restarà contenta se i la loda parché la ga insegnà so fioi a far polito nela riunion o parché la ze ndata tor una studiante par vegner al Salon.”

 I ansiani i scolta le sorele. Lori i ze ùmili e i sa che no i ze sol lori che i ga bone idee. Par quela, lori i domanda la opinion dele sorele e le scolta con atension quando lore le parla. Cossita, i ansiani i pol imparar cole sorele e anca giutarle a restar pi contente. Un ansiano de nome Gerardo, che el laora in Betel, el ga dito: “Go visto che la opinion dele sorele me giuta a far meio el me laoro. Dele volte, lore le sa de pi sora un assunto che tanti fradei.” Come tante sorele le ze pioniere, lore le cognosse de pi le persone che catemo nela predicassion. Un ansiano de nome Bryan el ga dito: “Le sorele le giuta tanto la congregassion par causa dele so bele qualità. Alora, sfòrsate de imparar tuto quel che te pol con lore!”

Alora, i ansiani i mostra sabedoria quando i scolta con atension quel che le sorele le dise. Un ansiano de nome Edward el ga dito che quel che una sorela la dise pol giutar un fradel a capir meio un assunto e a saver come i altri i se sente. (Pro. 1:5) Pol esser che gnanca sempre un fradel el poderà meter in pràtica quel che una sorela la ghe ga dito. Ancora cossita, lu el ga de ringrassiarla parché ela la ga parlà quel che la savea.

I ansiani ghe insegna le sorele. I ansiani i mostra sabedoria quando i insegna le sorele a far arquanti laori nela organisassion. Lori i pol insegnar le done a far le riunion par la predicassion. Cossita, quando no ghen’è mia un fradel batesà, lore le sarà pareciade par farle. I ansiani anca i pol insegnarghe a doperar màchine e altri mestieri par giutar a rangiar o far su Saloni o altri posti dela organisassion. In Betel, i fradei i insegna le sorele a far arquanti tipi de laori, come tender dele compre, dele conte, dei computadori e cossita avanti. Quando i fradei i insegna le sorele a far arquanti laori, lori i ze drio mostrar che lore le ze brave e persone de fidarse.

Tante sorele le dopera quel che le ga imparà par giutar i altri. Par esémpio, arquante de lore le ga giutà a far su la casa de fradei che i gavea passà par una desgràssia. Tante le ga imparà a predicar ben col careto e le ga insegnà altre. Cossa che le done le pensa sora i fradei che ghe ga insegnà? Una sorela de nome Jennifer la ga dito: “Quando son ndata nte una costrussion de Salon del Regno, un fradel el se ga tolto el tempo de insegnarme. Lu el ga visto quel che go fato e me ga lodà. Me ga piasesto tanto laorar con lu parché el me ga dato valor e el ga mostrà che el se fidea in mi.”

PARCHÉ CHE L’È BON TRATAR LE SORELE COME SE LE FUSSE DELA FAMEIA?

Noantri ghe volemo ben ale sorele compagno a Geovà. Par quela, ghemo de tratarle come se le fusse dela fameia. (1 Tim. 5:1, 2) Noantri ghemo caro de laorar insieme dele nostre sorele e volemo mostrarghe che ghe volemo ben e che semo qua par giutarle. Una sorela de nome Vanessa la ga dito: “Mi ringràssio tanto a Geovà parché el me ga assà far parte dela so organisassion insieme de tanti fradei che me incoraia.” Una sorela de Taiwan la ga dito: “Mi son pròpio contenta parché la organisassion de Geovà la dà tanto valor ale done e a come le se sente. Questo fà la me fede pi forte e me giuta a esser ancora pi contenta de far parte dela so organisassion.”

Sicuro che Geovà l’è pròpio contento de veder che i fradei i se sforsa de tratar le done con rispeto compagno a lu! (Pro. 27:11) Un ansiano de nome Benjamin, che l’è de star nela Scòssia, el ga dito: “Tanti òmini nel mondo no i mostra rispeto ale done. Par quela, quando lore le vien al Salon, le ga de veder la difarensa.” Alora, volemo sforsarse par far compagno a Geovà e tratar le nostre care sorele col amor e rispeto che le mèrita. — Rom. 12:10.