Asinna akina ehuuwale mapuro yaawo asilopwana eniisoonaaya okhala ootthuneyaxa. Mwa ntakihero, mutokweene a esirkwiitu oneeriwa Hans, yoowo onvara oBolivia ohimme ha: “Asilopwana akina ehuuwale mapuro yaawo asilopwana eraaya oowiitthuna, nave enoopereriwaaya wunnuwihera mukhalelo woowiikuxa yiisoonaka okhala a vasuluxa waapwaha asithiyana. Nto eyo, ennaweeriha ohaathokorora ni nttittimiho asithiyana.” b Mutokweene mmoha onkhala oTaiwan, oniitthaniwa Shengxian ohimme ha: “Muttetthe miyo kinkhalaaka, asilopwana enuupuwela weera muthiyana khontthuneya ohima moonelo awe. Wakhala weera mulopwana onnahima moonelo wa muthiyana woohima sa mwaha mukina, mulopwana owo khonttittimihiwa.” Asilopwana akina ennapaka itthu sinoonihera ohaattittimiha asithiyana. Mwa ntakihero, asilopwana awo ennuuluma nyaha soowaaveha asithiyana.

Yoohakalaliha ti yooweera, nihipwatthaka nipuro mulopwana ohuuwalaawe, owo pooti opaka matxentxo. Owo pooti oxuttera weera alopwana ni athiyana atthu oolikana, nave owo pooti osepaka wuupuwelela weera asilopwana tootthuneyaxa waapwaha asithiyana. (Aef. 4:22-24) Mene owo onoowera opaka eyo wakhala weera onootthara ntakihero na Yehova. Mpuwa mwa mwaha ene yoola, nnoorowa woona moota Yehova onaathokororaawe asithiyana, moota asinna enrowaaya otakiha moota Yehova onaathokororaawe asithiyana, ni moota asitokweene a mmulokoni enrowaaya opatxeriha woonihera nttittimiho wa asirokora.

MOOTA HEENI YEHOVA ONAATHOKORORAAWE ASITHIYANA?

Yehova oohiya ntakihero nootepa oreera na moota woowaathokorora asithiyana. Yehova Tiithi ahu, nave owo onnaasivela anamwane awe ootheene. (Yoh. 3:16) Nave asirokora oororomeleya, anamwane  ootepa otthuneya vamaithoni va Yehova. Vano ninrowa woona moota Yehova onaasivelaawe ni waattittimiha asithiyana.

Yehova khaanono nthalu woohima sa athiyana. Yehova ohaapaka asilopwana ni asithiyana mwa eneneero awe. (Eph. 1:27) Yehova khaavanhe oweera naari mikhalelo soopaka itthu asilopwana paahi, mene tho ohaavaha asithiyana; owo tho khaanono nthalu woohima sa alopwana naari asithiyana. (2 Sow. 19:7) Yehova ohaapaka asilopwana ni asithiyana mwa mukhalelo mmoha-moharu woowera wiiwexexa nnene sene ikhaikhai sa mBiblyani ni otakiha mikhalelo sawe. Yehova onnavaha mwiitti nroromelo na asilopwana vamoha ni nroromelo na asithiyana, ahipwatthaka waari weera yoowehereraaya okhala mparaisu elapo ela ya vathi naari okhala anamakeya naari mamwene wiirimu. (2 Ped. 1:1, enoota.) Vanooneya weera Yehova khaanono nthalu woohima sa athiyana.

Yehova onnawiiwelela asithiyana. Yehova onnamusivela vantxipale osuwela moota asithiyana eniisoonelaaya ni etthu enaaxupa. Mwa ntakihero, owo aahiiwa ni waakhula nivekelo na Rakheli ni Hana. (Eph. 30:22; 1 Sam. 1:10, 11, 19, 20) Nave-tho Yehova aahiwuupuxera anamalepa a Biblya waahela mpuwa asilopwana yaawo yaawiiwelenle asithiyana. Mwa ntakihero, Yehova aahimweerela Abrahamu weera amwiiwelele mwaarawe, Sara. (Eph. 21:12-14) Nave-tho mwene Davidi, aahimwiiwelela Abigayili. Moohihovela, aahisuwela weera Yehova taamurumme weera uulume ni yoowo. (1 Sam. 25:32-35) Nave-tho Yesu yoowo aatthara moomalela ntakihero na Atiithi awe, aahiwiiwelela ameyawe, Maria. (Yoh. 2:3-10) Matakihero ala ennoonihera weera Yehova onnawiiwelela asithiyana, ooniheraka weera onnaattittimiha vantxipale.

Yehova onnaroromela osuwela waya. Mwa ntakihero, Yehova aasuwela weera, Heva aakhalano owera wookosoopa elapo. (Eph. 1:28) Wa Yehova, Heva khaavirikanne ni Adamu, menento aari ekwanihero awe. Yehova tho aahaathanla asithiyana eeli weera ekhale maprofeti Debora ni Hulda weera yaavahe miruku atthu awe yaawo yaahela mpuwa aphuki ni mamwene. (Aph. 4:4-9; 2 Mam. 22:14-20) Olelo va, Yehova onnaroromela weera asirokora pooti okwanihera yoothanleliwa eri poothe. Asithiyana ala oororomeleya anamalaleera, mapioneiru ni mamisiyonariyu. Awosa tho ennakhavihera muteko wooteka ni oreherera Impa sa Omwene ni iBetheli, akina a yaawo ennavara muteko wa ehuhu yootheene oBetheli, akina envara mapuro sintaphuleliwaaya iliivuru sahu. Asirokora ala muloko mutokweene Yehova onvarihelaawe muteko weera akwanihere yootthunaawe. (Nsal. 68:12, [68:11, NM]) Vano, vannooneya weera wa moonelo wa Yehova asithiyana khaiyene atthu oohiwera naari oohisuwela.

MOOTA HEENI NINROWAAHU OMUTAKIHA YEHOVA MOOTA WOOWAATHOKORORA ASITHIYANA?

Weera musuwele waari weera munnamuthokorora murokora ntoko Yehova ontthunaawe, onnatthuneya opaka etthu enrowa woonihera moota munuupuwelaanyu ni moota mumpakaanyuno itthu. Mene weera nwere opaka eyo, onnatthuneya nikhavihero. Mwa ntakihero, raio-X pooti woonihera maxupo eri vamurimani va mutthu, emoha-moharu, asinthamwene ahu ni Biblya pooti onikhavihera woona waari weera ninnaathokorora asithiyana ntoko Yehova ontthunaawe. Moota heeni munrowaanyu waakhela nikhavihero nno?

Mmukohe nthamwene anyu. (Mir. 18:17) Nyuwo pooti onvekela nikhavihero nthamwene anyu yoowo osuwelinwe okhalano mikhalelo sooreera ni oreera wawe murima, oowiihiiha ni oowiiphima. Mutthu owo oororomeleya pooti okhala mulopwana naari muthiyana. Mmukohe ha: “Nyuwo munoonela hayi wa moota kinaakosoopaaka asirokora? Neereke awosa enniisoona weera miyo kinnaattittimiha? Neereke yookhala etthu miyo kintthuneyaaka oreherera wa mukhalelo ene yoola?” Wakhala weera nthamwene anyu owo onnooleelani etthu muntthuneyaanyu oreherera, muheerere wiisaakiha ohiya opaka eyo, muntthuneya opaka matxentxo yaawo eri ootthuneya.

Musomeke masu a Muluku. Etthu enrowa wookhaviherani osuwela waari weera munnaathokorora asirokora wa mukhalelo wooreera, ori ovarihela muteko masu a Muluku weera musuwele nyuupuwelo sanyu ni mapakelo anyu itthu. (Aheb. 4:12) Emaara nimmusomaahu Biblya hiyo ninnasoma woohima sa asilopwana yaawo yaathokoronre mooreerela asithiyana ni alopwana yaawo yahaathokoronre mooreerela, hiyo pooti olikanxa matakihero awo, weera noone moota nnaathokororaahu asithiyana. Opwaha mwa yeeyo, khiwaarowa okhala wooreera ovarihela muteko yoolepa ya mBiblyani weera nihime epontu yoohireera ya asithiyana. Mwa ntakihero, moovarihana ni 1 Pedru 3:7, mulopwana ontthuneya aattittimiheke amwaariye  mwaha wooweera erutthu aya tiyootteettheya. c Neereke eyo entthuna ohima weera muthiyana tooyevaxa naari neere khaanono osuwela ntoko mulopwana? Hooye. Mulikanxere masu a murummwa Pedru ni ele Biblya onhimaawe va Agalata 3:26-29 iversu iya sinniiwanyeiha weera Yehova ohaathanla asithiyana ni alopwana weera yalamuleleke ni Kristu wiirimu. Vaavo nimmusomaahu Biblya, ni nnaakoha asinthamwene ahu moota nnaathokororaahu asithiyana hiyo pooti woonihera nsivelo ni nttittimiho wa asirokora awo.

ASITOKWEENE A MMULOKONI ENOONIHERA MOOTA HEENI WEERA ENNAATTITTIMIHA AROKORA?

Asinna a mmulokoni pooti oxuttera moota woowaattittimiha asirokora ettharaka ntakihero na asitokweene a mmulokoni. Asitokweene a mmulokoni enrowa ovaha moota heeni ntakihero wa mukhalelo ene yoola? Nrowe noone moota woopaka eyo.

Awo ennaattottopela asirokora. Murummwa Paulo oohiya ntakihero nootepa oreera asitokweene a mmulokoni entthuneyaaya otthara. Ekaarta aalepenlaawe muloko wa oRoma, owo aahaattottopela asirokora antxipale. (Arom. 16:12) Onnooneya weera asirokora awo yaahakalala vantxipale vaavo ekaarta eyo yaasommwalaaya mmulokoni. Moolikana ni eyo, asitokweene a mmulokoni ennapaka ele enweraaya weera yaattottopele asirokora mwaha wa mikhalelo saya sootepa oreera ni muteko enanvarelaaya Yehova. Eyo ennaweeriha asirokora woonelela weera awo toosiveleya vantxipale nave ennattittimihiwa ni muloko. Masu oolipiha enuulumaaya asitokweene a mmulokoni, pooti okhala yeeyo ene asirokora enhaawelaaya weera evirelele onvarela Yehova moororomeleya. — Mir. 15:23.

Asitokweene entthuneya waattottopela asirokora ni murima aya wootheene mwaha wa muteko envaraaya. Mwaha wa heeni? Murokora mmoha oneeriwa Jéssica ohimme ha: “Ti wooreera ottottopeliwa ni asinna. Nave-tho ti wootepa oreera vaavo asinna ennittottopelaaya mwaha wa etthu nipankaahu. Mwa ntakihero, omuttottopela maaye mmoha mwaha  woowaamaaliha anamwane awe omithukumanoni naari omuttottopela murokora mmoha mwaha woowiilipihera weera amurowele namasoma a Biblya weera oonele mithukumano.” Vaavo asitokweene a mmulokoni enaattottopelaaya asirokora mwaha wa etthu empakaaya, awo enniisoona okhala ootthuneya ni oovareleya muteko mmulokoni.

Awo ennawiiwelela asirokora. Asitokweene a mmulokoni oopixa murima, ennasuwela weera khaiyene yaaworu paahi erinono miruku sooreera. Awo pooti ovekela nikhavihero na asirokora, nave owiiwelela moomaaleleya vaavo enuulumaaya. Mwa mukhalelo ola, asitokweene a mmulokoni enoorowa waalipiha asirokora awo nave asitokweene awo enoophwanya mareeliho. Moota heeni? Mutokweene mmoha oniitthaniwa Geraldo, onvara oBetheli, ohimme ha: “Miyo kohoonelela weera ovekela nikhavihero ni moonelo wa asirokora, onnakikhavihera okhumela nnene mmutekoni mwaka. Moohihovela, asirokora aasuwela vantxipale woohima sa muteko waapwaha asinna.” Mmulokoni, asirokora antxipale ennavara ntoko mapioneiru, mwaha wa yeeyo, awo ahaasuwela vantxipale atthu a mmuttettheni. Munna mmoha oneeriwa Bryan, ohimme ha: “Asirokora pooti okhavihera vantxipale muloko. Mwaha wa yeeyo, nintthuneya ottottela mureerelo itthu empakaaya ni mikhalelo saya!”

Asitokweene a miruku, khenrowa osepaka miruku envahiwaaya ni asirokora. Moota heeni? Mutokweene mmoha oneeriwa Edward, ohimme ha: “Miruku ni sooweereya sa asirokora, pooti onikhavihera owehexexa nnene sene mwaha ninthokororaahu, naari osuwela mikhalelo sa asinna akina.” (Mir. 1:5) Nnaamweera ikwaha sikina nihivarihelaka muteko miruku iyo asirokora ennivahaaya, waamukhala wooreera waattottopela ni waaxukurela mwaha wa miruku iyo enivanhaaya.

Awo ennaaxuttiha asirokora. Asitokweene a miruku ennattottela mureerelo etempu enkhalaayano weera yaaxuttihe asirokora. Mwa ntakihero, awo pooti waaxuttiha asirokora ohoolela muthukumano wa okhuma muteko woolaleera wakhala weera munna oopatisiwa khawiiye. Nave-tho awo pooti waaxuttiha asirokora ovarihela muteko maakina weera ekhavihereke muteko wooteka naari oreherera impa sa Omwene. OBetheli, mutokweene pooti waaxuttiha asirokora okwanihera nnene sene soothanleliwa saya, ntoko oreherera itthu, othuma itthu, osuka musurukhu, onvarela muteko computador ni itthu ikina. Vaavo Asitokweene a mmulokoni enaaxuttihaaya asirokora, ennoonihera weera enaroromela weera asirokora awo, enookwanihera soothanleliwa siri poothe.

Asirokora antxipale ennavarihela muteko etreinamentu yaakhenlaaya weera yaakhavihere atthu akina. Mwa ntakihero, akina ennavarihela muteko etreinamentu yaakhenlaaya weera ekhavihere muteko wooteka impa sa asinna ephwanyinwe ni erisa ya ephattu. Nave-tho asirokora akina ennavarihela muteko etreinamentu enaakhelaaya yoolaleera weera yaakhavihere asirokora akina okhumela nnene mwa muteko ene yoowo. Vanonto asirokora, munwoonela hayi asitokweene a mmulokoni eniihiyera etempu weera yooxuttiheni? Murokora mmoha oneeriwa Jennifer ohimme ha: “Vaavo miyo kaavaraaka muteko wooteka Empa ya Omwene, namahoolela aahiihiyera etempu weera akixuttihe. Owo annawehexexa muteko kaavaraaka ni annakittottopela mwaha wa yeeyo. Miyo waakisivela vantxipale ovara vamoha ni munna ole mwaha wooweera annakiroromela ni annavaha mwiitti muteko kaavaraaka.”

OTTHUNEYA WAYA WAATHOKORORA ASIROKORA NTOKO A VEEMUSINI VAHU

Hiyo ninnaasivela vantxipale asirokora oosiveleya ntoko Yehova onaasivelaawe! Mwaha wa yeeyo, ninnatthuneya waathokorora asirokora ala ntoko a veemusini vahu. (1 Tim. 5:1, 2) Hiyo ninnahakalala vantxipale omukokhorela Yehova vamoha ni asirokora ala. Nave ti woohakalaliha owoona asirokora ala yiisoonaka okhala oosiveleya ni ookosoopeya. Murokora mmoha oneeriwa Vanessa ohimme ha: “Miyo kinnamuxukhurela vantxipale Yehova mwaha wooweerela eparte mareherero awe vamoha ni asinna yaawo enkilipiha.” Murokora mmoha a oTaiwan ohimme ha: “Miyo kinnamuxukhurela Yehova ni mareherero awe mwaha woowaakosoopa nnene asithiyana ni ohela mpuwa nyuupuwelo saya. Eyo yoolipiha vantxipale nroromelo naka, nave ennakeeriha ovaha mwiitti eparakha ela kiraakano yooweerela eparte mareherero a Yehova.”

Moohihovela, Yehova onnahakalala vantxipale vaavo onwoonaawe asinna yiilipiheraka weera yaathokororeke asirokora ni nsivelo ni nttittimiho! (Mir. 27:11) Munna mmoha onkhala wEscócia oneeriwa Benjamin ohimme ha: “Atthu a mulaponi, khenaattittimiha asithiyana, nto emaara yeeyo asithiyana envolowaaya Empa ya Omwene, hiyo nintthuna owoonihera weera nipuro nna ti noovirikana.” Nto hiyo, nintthuneya opaka ele ninweraahu weera nimutakihe Yehova ni waathokorora asirokora mwa nsivelo ni nttittimiho awo emphwanelaaya. — Arom. 12:10.