Issoti issoti attuma asay maccaasaa toochchiyo wogan diccidosona. Leemisuwawu, Boliviyan woradaa xomoosiya Hanzi hagaadan giis: “Issi issi attumaageeti attuma asay otorettanaadan oottiya wogan diccidosona; hegaa mala asati banttana maccaasaappe aadhdhiyabadan qoppoosona, qassi darotoo maccaasaa kawushshiyabaa oottoosona.” Taywanen deꞌiya, Shemzhiyana giyo cimay hagaadan giis: “Taani diccido heeran daro attuma asay maccaasay ba qofaa attuma asaassi yootana bessenna giidi qoppees. Attumaagee issibaa xeelliyagan maccaasaa qofaa yootikko, A laggeti A boroosona.” Hara attuma asay qassi maccaasaa toochchiyogaa dumma ogiyan qonccissees. Leemisuwawu, eti maccaasaa toochchiya naachchaa naacana danddayoosona.

Ufayssiyabay, issi attumaagee ay wogan diccikkonne laamettana danddayees. I attuma asaynne maccaasay lagge gidiyogaa tamaarana danddayees. (Efi. 4:22-24) Yihoowa leemisuwa kaalliyogan hegaadan oottana danddayettees. Yihooway maccaasaa waati xeelliyakko, ishantti maccaasaa Yihooway xeelliyogaadan waati xeellana danddayiyakko, qassi cimati michchontta bonchchiyogan waani leemiso gidana danddayiyakko nuuni ha huuphe yohuwan beꞌana.

YIHOOWAY MACCAASAA WAATI XEELLII?

Yihooway maccaasaa bonchchiyogan wottiyobi baynna leemiso. I ba naata ubbaa siiqiya qarettiya Aawa. (Yoh. 3:16) Qassi ammanettidi ayyo goynniya maccaasay alꞌꞌo macca naatu mala. Yihooway  maccaasaa siiqiyogaanne bonchchiyogaa bessiya kaalliya ogeta akeeka.

I asa asappe shaakkenna. Yihooway attuma asaanne maccaasaa ba leemisuwan medhdhiis. (Doo. 1:27) I attuma asaassi maccaasaagaappe aadhdhiya eraa immidi medhdhibeenna; woy attuma asaa maccaasappe aattidi xeellenna. (2 Odi. 19:7) I attuma asawunne maccaasawu Geeshsha Maxaafaa tumaa akeekananne A loꞌꞌo eeshshata bessana danddayiyo issi mala eray deꞌanaadan oottidi medhdhiis. Yihooway banan ammanettiya attuma asaakka maccaasaakka nashshees. I attuma asawukka macca asawukka saꞌan merinawu deꞌiyo hidootaa woy saluwan kawonne kahine gidiyo hidootaa immiis. (2 PHe. 1:1) Yihooway maccaasaa lagennaagee qoncce.

I eti yootiyobaa siyees. Maccaasaassi siyettiyabaynne eta metoy Yihoowa qofissees. Leemisuwawu, Yihooway Raaheelanne Haanna woossido woosaa siyidi zaariis. (Doo. 30:22; 1 Sam. 1:10, 11, 19, 20) Yihooway maccaasay yootiyobaa siyida attumaasaa taarikee Geeshsha Maxaafan xaafettanaadankka oottiis. Leemisuwawu, Abrahaami Yihoowa azazuwa kaallidi ba machchiya Saara yootidobaa siyiis. (Doo. 21:12-14) Kawuwa Daawiti Abigaala yootidobaa siyiis. I ubba, A haasayissanaadan kiittiday Yihoowa giidi qoppiis. (1 Sam. 25:32-35) Wottiyobi baynna hanotan ba Aawaa eeshshaa bessiya Yesuusi ba aayyiya Mayraama yootiyobaa siyiis. (Yoh. 2:3-10) Ha leemisoti qonccissiyogaadan, Yihooway maccaasaa bonchchiyogaa bessiyo ogetuppe issoy eti yootiyobaa siyiyogaa.

I etan ammanettees. Leemisuwawu, Yihooway Heewana kumetta saꞌaa haariyogan hashetanaadan maataa immiyogan iini ammanettiis. (Doo. 1:28) Hegaadan oottiyogan, Yihooway O I azinaa Addaameppe laafiyabadan gidennan, maaddana danddayiyabadan xeelliyogaa bessiis. Xoossay erissidobaa yootiya Dibooranne Huldda daannaanne kawuwa gujjin, Xoossaa asaa zoranaagaa Yihooway ammanettiis. (Daan. 4:4-9; 2 Kaw. 22:14-20) Ha wodiyan, Yihooway Kiristtaane maccaasati A oosuwa oottanaagaa ammanettees. He ammanettida michchontti aassiyageeta, aqinyetanne misoonaaweta gididi haggaazoosona. Eti Shiiquwa Addaraashatuyyonne macara biirotuyyo keexuwa halchchuwa kessiyogan, keexxiyogaaninne bottokoniyogan maaddoosona. Etappe amaridaageeti Beeteelen, harati qassi haahosan xuufiya birshshiyo biirotun haggaazoosona. Ha michchontti Yihooway ba sheniya polanawu goꞌettiyo daro wotaaddara mala. (Maz. 68:11) Yihooway maccaasaa laafadan woy pattennabadan xeellennaagee qoncce.

ISHANTTI MACCAASAA YIHOOWAGAADAN WAATI XEELLANA DANDDAYIYONAA?

Ishanttoo, nuuni Kiristtaane michchontta Yihoowagaadan xeelliyakkonne aggiyakko shaakki eranawu nu qoppiyobaanne oottiyobaa loytti qorana koshshees. Hegaadan oottanawu nuussi maadoy koshshees. Issi uraa wozanay payyakkonne hargganchchakko shaakki eranawu issi dottoree pilggiyo miishshaa goꞌettees. Hegaadankka, nuuni maccaasaa xeelliyo ogee Yihoowa ufayssiyakkonne aggiyakko shaakki eranawu loꞌꞌo laggetinne Xoossaa Qaalay nuna maaddoosona. Hegaa mala maaduwa demmanawu nuuni ay oottana danddayiyoo?

Loꞌꞌo laggeta oychcha. (Lee. 18:17) Ammanettiya, kehanne bessiyagaadan qoppiya laggeta hagaa mala oyshata oychchana danddayoos: “Taani michchontta waata xeelliyanaa? Taani eta bonchchiyabadan etawu siyettii? Taani eta xeelliyo ogiyara gayttidaagan giigissana bessiyabi deꞌii?” Ne laggee neeni giigissana bessiyo issi issibata yootikko, yiillotoppa. Yiillotiyogaappe, koshshiyaban laamettanawu eeno ga.

Xoossaa Qaalaa xannaꞌa. Nuuni michchontta bonchchiyakkonne eranawu maaddiya loꞌꞌo ogee Xoossaa Qaalaa goꞌettidi nu qoppiyobaanne oottiyobaa qoriyogaa. (Ibr. 4:12) Nuuni Geeshsha Maxaafaa xannaꞌiyo wode maccaasaa loytti bonchchidanne bonchchibeenna attuma asaabaa tamaaroos. Yaatidi, eti oottidobaa nu oottiyobaara geeddarssana danddayoos. Hegaa bollikka, Geeshsha Maxaafaa xiqiseta geeddarssidi xeelliyogee nuuni xiqiseta maccaasaa xeelliyagan nuuyyo deꞌiya bala qofaa kaafiyabadan qoppennaadan maaddana danddayees. Leemisuwawu, 1 PHeexiroosa 3:7y (NW) yootiyogaadan, machchiya  “meqqiya miishsha” b gidiyo gishshawu I azinay O bonchchana bessees. Hegaa giyogee eran ba azinaappe laafawusu giyogee? Chii gidenna! Yihooway maccaasaynne attuma asay Yesuusaara issippe saluwan haaranaadan dooridoogaa qonccissiya Galaatiyaa 3:26-29 Pheexiroosi giidobaara geeddarssa. Nuuni Yihoowa Qaalaa xannaꞌikko, qassi maccaasaa xeelliyo ogiyara gayttidaagan nu laggeta qofaa oychchikko nu michchontta bessiyagadan bonchchana danddayoos.

CIMATI MICHCHONTTA BONCHCHIYOGAA WAATI BESSIYONAA?

Galchchan deꞌiya ishantti siiqiya cimatu leemisuwa kaalliyogan, michchontta bonchchana danddayoosona. Michchontta bonchchiyogan cimati waani leemiso gidiyonaa? Amarida ogeta beꞌa.

Eti michchontta galatoosona. Kiitettida Phawuloosi cimatussi loꞌꞌo leemiso. I Roomen deꞌiya galchchaassi xaafido dabddaabbiyan daro michchontta sunttaa xeesidi galatiis. (Roo. 16:12) Phawuloosi xaafido dabddaabbee galchchaassi nabbabettiyo wode, he michchontti ay keena ufayttidaakko qoppa. Hegaadankka, cimati eta loꞌꞌo eeshshawunne eti Yihoowawu oottiyo oosuwawu michchontta kehatettan galatoosona. Hegee michchontti galchchay eta bonchchiyogaanne nashshiyogaa eranaadan oottees. Issi cimay haasayiyo minttettiyabay michchontti ammanettidi Yihoowawu haggaaziyogaa aggennaadan maaddana danddayees.—Lee. 15:23.

Cimati michchontta galatiyo wode qonccissidi wozanappe galatana bessees. Aybissi? Jesiko giyo issi michchiya hagaadan gaasu: “Ishantti issi michchiyo ‘galatays’ giidi yootiyogee keehi loꞌꞌoba. Shin nuuni nu naati shiiquwa loytti kaallanaadan tamaarissiyo gishshawu woy nu xinaateta shiiquwa ehiyo gishshawu ishantti hegaa qonccissidi  nuna galatiyo wode keehi minettoos.” Cimati issibaa qonccissidi michchontta galatiyogee michchontti galchchan koshshiyabadaninne maaddiyabadan etawu siyettanaadan oottees.

Eti michchontti yootiyobaa siyoosona. Ashkke cimati loꞌꞌo qofay deꞌiyoy eta xallaassa gidennaagaa akeekoosona. Hegaa mala cimati michchontti bantta qofaa yootanaadan oychchoosona; qassi eti yootiyo wode loytti ezggoosona. Cimati yaatiyogan michchontta minttettoosonanne banttawukka goꞌettoosona. Waatidi? Beeteelen haggaaziya Jerarda giyo issi cimay hagaadan giis: “Michchontti bantta qofaa yootanaadan oychchiyogee taani ta oosuwa loytta oottanaadan maaddiyogaa akeekaas. Darotoo eti sabbakuwa oosuwa hara ishanttuppe aaruwan oottoosona.” Galchchan daro michchontti aqinye gididi haggaaziyo gishshawu he moottan deꞌiya asaabaa loytti eroosona. Beryana giyo issi cimay hagaadan giis: “Nu michchontti Yihoowa dirijjitiyan darobaa oottoosona. Yaatiyo gishshawu, eta meeziyappe goꞌetta!”

Akeekanchcha cimati michchontti yootiyo qofaa sheneho gookkona. Aybissi? Edwarda giyo issi cimay hagaadan giis: “Issi michchiya yootiyo qofaynne I meezee issi allaalliya loytti akeekanaadaaninne haratussi siyettiyabaa loytti eranaadan issi ishaa maaddana danddayees.” (Lee. 1:5) Issi cimay issi michchiya yootido qofaa goꞌettana xayikkonne, A ba qofaa qonccissido gishshawu, qassi ba eriyobaanne akeekidobaa yootido gishshawu O galatana danddayees.

Eti michchontta loohissoosona. Akeekanchcha cimati michchontta loohissiyo injjiya koyoosona. Leemisuwawu, xammaqettida ishay baynna wode haggaazo shiiquwa waati kaalettanaakko cimati michchontta loohissana danddayoosona. Nu dirijjitee goꞌettiyo keettata keexxiyogaaninne bottokoniyogan maaddana mala keexo miishshatanne maashineta waati goꞌettanaakko eti michchontta loohissana danddayoosona. Beeteelen oosuwa xomoosiyageeti bottokoniyogaa, shammiyogaa, hisaabiya oottiyogaanne komppiyutere prograamiya mala daro oosota waati oottanaakko michchontta loohissidosona. Cimati michchontta loohissiyo wode eti michchontta ammanettiyanne maaddiya asadan xeelliyogaa bessoosona.

Daro michchontti cimati banttana loohissidobaa harata maaddanawu goꞌettoosona. Leemisuwawu, issi issi michchontti meretay daafabaa gatti simmin, bantta keettaa zaarettidi keexxanaadan harata maaddanawu eti demmido keexuwa loohissuwa goꞌettoosona. Hara michchontti qassi dabaaban markkattanawu eti loohidobaa daro michchontta loohissana danddayoosona. Michchontti banttana loohissida cimata xeelliyagan qoppiyobay aybee? Jenifero giyo issi michchiya hagaadan gaasu: “Issi Shiiquwa Addaraashaa keexuwa oosuwan taani oottido wode oosuwa xomoosiya ishay ba wodiya bazzidi tana loohissiis. I taani oottidobaa akeekidi tana galatiis. I tana nashshiyogaanne ammanettiyogaa taani akeekidoogee aara oottiyo wodiyan ufayttanaadan maaddiis.”

MICHCHONTTA NU SO ASADAN XEELLIYOGEE DEMISSIYO GOꞌꞌAA

Ammanettida nu michchontta Yihooway siiqiyogaadan siiqoos! Yaaniyo gishshawu nuuni eta nu so asadan xeelloos. (1 Xim. 5:1, 2) Nuuni eta nashshoosinne etaara oottiyogan ufayttoos. Nuuni eta dosiyogaanne maaddiyogaa eti akeekiyo wode keehi ufayttoos. Vaneso giyo issi michchiya hagaadan gaasu: “Tana keehi minttettiya ishantti kumido Yihoowa dirijjitiya yara gidiyo gishshawu, taani A keehi galatays.” Taywanen deꞌiya issi michchiya hagaadan gaasu: “Yihoowaynne A dirijjitee maccaasaa xoqqu ootti xeelliyo gishshawunne etawu siyettiyabaa bonchchiyo gishshawu taani keehi galatays. Hegee ta ammanuwa minttiis; qassi Yihoowa dirijjitiya yara gidido gishshawu kaseegaappe aaruwan A galatanaadan oottiis.”

Yihooway maccaasaa aagaadan xoqqu oottidi xeelliyanne bochchiya ammanettida attuma asaa beꞌiyo wode ay keena ufayttiishsha! (Lee. 27:11) Iskotlandden deꞌiya Benjjaamina giyo cimay hagaadan giis: “Ha wodiyan alamiyan deꞌiya daro attuma asay maccaasaa mule bonchchenna. Yaaniyo gishshawu, maccaasay Shiiquwa Addaraashaa yiyo wode yan deꞌiya dummatettaa akeekanaadan koyoos.” Simi yaakko, nuuni ubbay nu alꞌꞌo michchontta siiqiyogaaninne bonchchiyogan Yihoowa milatanawu nuuyyo danddayettida ubbabaa oottiyageeta gidoos.—Roo. 12:10.