ნამთინე ქომოლკოჩიქ თიცალ კულტურას ირდჷ, სოდეთ ოსურეფს პატის ვა ცენა დო არდებულო ოქცუნა. ბოლივიას მახორუ ართ რაიონულ ზედამხედველ, ჰენს, თეცალ სიტყვეფს იჩიებ: „ნამთინე ქომოლკოჩ თეშ მორდეს, ნამდა ოსურკათას ჟიშე უჯინე დო მუთუნო ვემიორჩქ. თინეფიშ აზროვნებას ტომბას აფჷ ჩხვიჩხვეფ გოდგუმილ თი აზრის, ნამდა ოსურეფშე ბრელით უმოს მაღალ მდგომარეობა უკებუნა დო ოშწილო უჯგუნა“. ტაივანს მახორუ ართ უხუცეს, შენშენ, იჩიებ: „თი ადგილს, სოდეთ მა ვოხორანქ, ბრელ ფიქრენს, ნამდა ოსურკოჩიქ ქომოლკოჩიშ საქმეშა ოკო ვემშართას. ქომოლკოჩ ხალხწკუმა მუდგარენ საკითხშენ ოსურიშ აზრის ქიმიშინუანს-და, შხვა კოჩეფ თის არდებულო დუჭყანა ჯინას დო თიშ პატიცემას მიოდინუანა“. შხვადო ქომოლკოჩეფ ოსურკათაშ მიმართ უპატიცემლობას გვალო თეცალ თოლშა მალაფარო ვეგმირჩქინანა, მარა შილებე მუნეფიშ ციგანობეფით ოსურეფ დამცირან დო თეშნერო გიმირჩქინან უპატიცემლობა თინეფიშ მიმართ.

ვა უღჷ მნიშვნელობა, მუნერ კულტურას ირდჷ ქომოლკოჩიქ, საბედნეროთ, თის შეულებ გიორჯგინას აზროვნებას, ნამდა კოჩის ოსურშე ბრელით უმოს მაღალ მდგომარეობა უკინებ (ეფეს. 4:​22—24). თეშ მენჭირნაფა თის იეჰოვაშ მაგალითიშ მეჸუნათ შეიალებე. თე სტატიას გუვარჩიენთ, მუნერ დამოკიდებულება უღჷ იეჰოვას ოსურკათაშ მიმართ, მუჭო შეულებუნა ჯიმალეფს, მიაჸუნან თიშ მაგალითის დო მუჭო შეულებუნა უხუცესეფს, ოსურკათაშ მიმართ პატიცემაშ გიმორჩქინაშ ჯგირ მაგალით რდან შხვეფშო.

ᲛᲣᲜᲔᲠ ᲓᲐᲛᲝᲙᲘᲓᲔᲑᲣᲚᲔᲑᲐ ᲣᲦᲷ ᲘᲔᲰᲝᲕᲐᲡ ᲝᲡᲣᲠᲙᲐᲗᲐᲨ ᲛᲘᲛᲐᲠᲗ?

იეჰოვა სრულყოფილ მაგალითის მარზენა თიწკუმა დაკავშირებით, მუნერ დამოკიდებულება ოკო მიღუდან ოსურკათაშ მიმართ. თინა შხვეფიშ გაჭირებაშ გურშა მიმაღალარ მუმა რე, მიდგას მანგარო უჸორს მუშ სქუალეფ (იოან. 3:16). თის ნამთინ სქუა ვა აფჷ გიშართილ დო ართგურ დალეფ თიშო ძვირფას ოსურსქუალეფ რენა. მორთჷ, ასე გუვარჩუათ, მუჭო გიმირჩქინანს იეჰოვა ჸოროფა დო პატიცემას ოსურკათაშ მიმართ.

 ვეგმირჩქინანს გიშაკერძაფას თინეფიშ მიმართ. იეჰოვაქ ქოთ კოჩ დო ქოთ ოსურ მუშ ამნახანტო გაჭყჷ (დაბ. 1:27). თის ქომოლკოჩშა ოსურშე უმოს ნიჭ დო უნარ ვემუჩამ დო ვართ ართიანშე გიშართუნს თინეფს (2 მატ. 19:7). იეჰოვაქ თინეფ თეშ გაჭყჷ, ნამდა ართნერო შეულებუნა ინანჭან ბიბლიურ ჭეშმარიტებას დო გავითარან თიცალ თვისებეფ, მუნერით ღორონთის უღჷ. ხვალე თენა ვარინ, იეჰოვა ქოთ ქომოლკოჩის დო ქოთ ოსურკოჩის, მუნეფიშ გიმორჩქინელ რწმენაშ გურშენ ართნერ ჯილდოს არზენს. მაგალთო, ნამთინე სამოთხეთ გინორთელ დედამიწას იცხოვრენს დო ნამთინე იჸუაფ ზეცას, მუჭოთ მღვდელ დო მეფე (2 პეტ. 1:1). არგამა რე, იეჰოვა ვეგმირჩქინანს გიშაკერძაფას ოსურკათაშ მიმართ დო მანგარო აფასენს თინეფს.

ურჩქილე თინეფს. იეჰოვაშო არძა ართ ვა რე ოსურკათაშ გრძნობეფ დო ირიათო გურშა მეუღ თინეფიშ პრობლემეფ დო ოწუხებელ. მაგალთო, მუჭოთ მიჩქუნა, თიქ ქიმირჩქილუ რახელიშ დო ხანაშ ალალას რაგადებულ ლოცვეფ დო შეუსრულ ოთხუალ (დაბ. 30:22; 1 სამ. 1:​10, 11, 19, 20). თეს გეძინელ, იეჰოვაქ ბიბლიაშ მაჭარალეფს მუშ სიტყვას ინაჭარაფუ თი ქომოლკოჩეფიშ შემთხვევეფ, მიდგაქ მურჩქილუეს ოსურკათას. მაგალთო, აბრაამქ მიაჸუნ იეჰოვაშ მითითებას დო ქუმურჩქილუ სარას (დაბ. 21:​12—14). მეფე დავითიქ ქუმურჩქილუ აბიგაილს დო თის ხოლო ქიმეხვად, ნამდა თე ოსურ იეჰოვაშ მეშქუმალირ რდჷ (1 სამ. 25:​32—35). იესო ხოლო, მით სრულყოფილო გიმირჩქინანს მუშ ზეციერ მუმაშ თვისებეფს, ურჩქილედ დიამუშის, მარიამს (იოან. 2:​3—10). თე მაგალითეფშე არგამათ იძირე, მუჭო გიმირჩქინანს იეჰოვა ოსურკათაშ პატიცემას თინეფიშ მორჩქილაფათ.

ონდჷ თინეფს. მაგალთო, იეჰოვაქ ევას ხოლო მიანდჷ პასუხიშმგებლობა, ნამდა ქიმკაჯინუკო დედამიწას (დაბ. 1:28). თეშ კეთებათ ღორონთიქ ოძირუ, ნამდა თიშ თოლს ევას ადამშე დაბალ მდგომარეობა ვა უკინებუდ, თეშ გინაწონს, თიშ შესაფერის დამხმარე რდჷ. იეჰოვაქ შხვა დროს ხოლო მიანდჷ ოსურკათას მნიშვნელოვან პასუხიშმგებლობეფ. მაგალთო, თიქ წინასწარმეტყველ ოსურეფს, დებორას დო ხულდას, დავალ რჩევაშ მეჩამა მუშ ხალხშა, თინეფ შქას მსაჯულ დო მეფეშა (მსაჯ. 4:​4—9; 2 მეფ. 22:​14—20). იეჰოვა ვათირე დო ამდღა ხოლო ონდჷ ქრისტიან ოსურკათას მნიშვნელოვან პასუხიშმგებლობეფს. თე ართგურ დალეფ ქადაგენა სახიოლო ამბეს, მსახურენა პიონერეფო დო მისიონერეფო დო თეს გეძინელ, მონაწილებას ღებულენა დარბაზეფიშ დო ფილიალეფიშ დაპროექტებაშ, მშენებლობაშ დო მიკოჯინაშ საქმეს. თინეფშე ნამთინე მსახურენს ბეთელს დო მთარგმნელობით ოფისეფს. თე დალეფ დიდ ლაშქარცალ რენა, მიდგას იეჰოვა მუშ ნებაშ შეიოსრულებერო ირინუანს (ფსალმ. 68:11). არგამა რე, იეჰოვა წუთით ხოლო ვა ფიქრენს, ნამდა ოსურეფს მუთუნიშ კეთებაშ უნარ ვა უღუნა დო სუსტეფ რენა.

ᲛᲣᲭᲝ ᲨᲔᲣᲚᲔᲑᲣᲜᲐ ᲯᲘᲛᲐᲚᲔᲤᲡ ᲛᲘᲐᲸᲣᲜᲐᲜ ᲘᲔᲰᲝᲕᲐᲨ ᲛᲐᲒᲐᲚᲘᲗᲘᲡ?

ჯიმალეფ, თიშ გაგებელო, ქოიღუნან დო ვარ ოსურკათაშ მიმართ თიცალ დამოკიდებულება, მუნერით იეჰოვას უღჷ, საჭირო რე, ალალას გეგმირკვიათ გურ დო ქიდეკვირათ, სინამდვილეს მუს ფიქრენთ ოსურკათაშე დო მუჭო ოქცუთ თინეფს. მარა თეშ ოკეთებელო მოხვარა გოსაჭირუნა. მუჭოთ რენტგენიშ აპარატით რე შეიოლებერ თიშ გაგება, გურს მუთუნ პრობლემა ხომ ვა მიღუნა, თეშ, ჯგირ მეგობარიშ დო ღორონთიშ სიტყვაშ ჭყოლოფათ შემლებუნა ბძირათ, მიღუნან დო ვარ გურს უარყოფით დამოკიდებულება ოსურკათაშ მიმართ. მორთჷ, ასე ქიგებგათ, მუჭო შემლებუნა მიბღათ მოხვარა თე საკითხის.

აზრ ქელაკითხეთ მეგობარს (იგავ. 18:17). ჯგირ იჸუაფ, აზრ ქელვაკითხუათ თი მეგობარს, მიდგას ვონდუთ, ირიათო გაწონასწორებულ რე დო ჯგირო ოქცუ შხვეფს. შემლებუნა თეცალ მუდგარენეფ ბკითხათ: „მუს ფიქრენქ, მუჭო ვოქცუქ დალეფს? ქოგინაფლენანო ჩქიმდე პატიცემას? სქან აზრით, მუშ გაუჯგუშება შემლებ თე საკითხის?“. მეგობარ რჩევას ქიმერჩანა დო კონკრეტულ საკითხის გაუჯგუშებას ქელაიჩანან-და, დუდიშ მართლება ვედიჭყათ, თეშ გინაწონს, მზათ რდათ საჭირო ცვლილებეფიშ ოკეთებელო.

გეგმირკვით ღორონთიშ სიტყვა. ღორონთიშ სიტყვაშ ტომბაშო გიმორკვიება რე არძაშ უჯგუშ საშვალება თიშ ოძირაფალო, მუნერ დამოკიდებულება მიღუნა ოსურკათაშ მიმართ დო მუჭო ვოქცუთ თინეფს (ებრ. 4:12). ბიბლიას ინოჭარილ რე თიცალ ქომოლკათაშ მაგალითეფ, მით ჯგირო დო პატიცემათ ოქცუდეს ოსურეფს, დო თინეფიშ ხოლო, მით უპატიცემლობას გიმირჩქინანდეს ოსურკათაშ მიმართ. თინეფიშ მაგალითეფიშ გიმორკვიებაშ დროს შემლებუნა ჩქინ დუდის ქიდვეკვირათ დო დეფიფქრათ, ჩქი მუჭო ვოქცუთ ოსურკათას. თეს გეძინელ, შხვადოშხვა ბიბლიურ მუხლეფიშ ართიანწკუმა შედარება მიმეხვარებუნა, დუდ ევუჩილითუათ კონტექსტიშ უმშო, ართ ბიბლიურ მუხლით არასწორ დასკვნაშ გიშაღალას. მაგალთო 1 პეტრეშ 3:7-ის ოსურეფ  ეჭარილ რენა, მუჭოთ „სუსტ ჭურჭელ“. a ნიშნენსო თენა, ნამდა ოსურ კოჩშე ნაკლებო ჭკვერ რე დო იზმათ უნარიან ვა რე? მუშო ოკო რაგად, ვარ. პეტრეშ ნარაგადას გალატელეფიშ 3:​26—29-ს ინოჭარილ სიტყვეფს ქეშუდარენთ-და, ქობძირუნთ, ნამდა იეჰოვაქ ქომოლკათაწკუმა ართო, ოსურკათა ხოლო გიშეგორ, ნამდა ქრისტეწკუმა ართო იმართველან ზეცას. ღორონთიშ სიტყვაშ გიმორკვიება დო მეგობარშა აზრიშ ელაკითხირ მიმეხვარებუნა, გეგმიფრჩქინათ პატიცემა ოსურკათაშ მიმართ დო მიღუდან თიცალ დამოკიდებულება, მუნერით იეჰოვას უღჷ.

ᲛᲣᲭᲝ ᲒᲘᲛᲘᲠᲩᲥᲘᲜᲐᲜᲐ ᲣᲮᲣᲪᲔᲡᲔᲤ ᲞᲐᲢᲘᲪᲔᲛᲐᲡ ᲝᲡᲣᲠᲙᲐᲗᲐᲨ ᲛᲘᲛᲐᲠᲗ?

მოჸოროფე უხუცესეფიშ მაგალითშე ჯიმალეფ ბრელ მუდგარენს გურაფლენა თიწკუმა დაკავშირებით, მუჭო გიმირჩქინან პატიცემა ოსურკათაშ მიმართ. მორთჷ, გუვარჩუათ მუსხირენ მხარე, მუდგათ უხუცესეფ თე საკთიხის ჯგირ მაგალითის არზენა ჯიმალეფს.

თინეფ ოცქვანა დალეფს. თე საკითხის უხუცესეფს ჯგირ მაგალით დოუტუ მოციქულ პავლექ. რომიშ კრებაშა მეჭარილ წერილს თიქ სახალხოთ ქაცქუ მუსხირენ დას (რომ. 16:12). წერმიდგინით, მუშმადიდა ხიოლ აღვენუდეს თე დალეფს, მუჟამსით კრებას პავლეშ წერილს წეკითხენდეს. ამდღა უხუცესეფ მეჸუნა პავლეშ მაგალითის დო შურ დო გურით ოცქვანა დალეფს მუნეფიშ ჯგირ თვისებეფშე დო თიშე, ნამდა ბრელს ხანდენა იეჰოვაშო. თენა ოგინაფუანს დალეფს, ნამდა თანაქრისტიანეფ აფასენა დო პატის ცენა. უხუცესიშ რაგადებულ გურიშემაკინალ სიტყვეფ შილებე რდას ზუსტას თინა, მუთ დას ოსაჭირ, ნამდა გაგრძელას იეჰოვაშ ართგურო მსახურება (იგავ. 15:23).

მნიშვნელოვან რე, უხუცესეფქ ალალას დო კონკრეტულო ქაცქუან დალეფს. ართ დაშ, ჯესიკაშ, სიტყვეფშე ბგებულენთ, მუშენ რე თეშ კეთება ჯგირ. თინა იჩიებ: «მუშო ოკო რაგად, მანგარ სასიამოვნო რე თიშ მორჩქილაფა, მუჟამსით ჯიმალეფ დას ურაგადუნა: „მალადეც!“, მარა განსაკუთრებულო თის ვაფასენთ, მუჟამსით ჯიმალეფ მუდგარენ  კონკრეტულიშ გურშენ მოცქვანა. მაგალთო, თიშ გურშენ, ნამდა სქუალეფს ვოგურუანთ, კრებაშ შეხვალამას ვეხმაურან დო წყინარო მიკოხედან; ვარდა თიშ გურშენ, ნამდა ბიბლიაშ მაგურაფალეფს ჸუდეშა მიკულუანთ დო კრებაშ შეხვალამაშა მოპჸუნა». თაშ ნამდა, მუჟამსით უხუცესეფ დალეფს კონკრეტულ საკითხიშ გურშენ ოცქვანა, თეშნერო, დუდის დაფასებულო დო საჭიროთ ოგინებაფუანა.

თინეფ ურჩქილენა დალეფს. თანდაბალ უხუცესეფს არჩქილენა, ნამდა ჯგირ იდეეფ ხვალე მუნეფს ვა მალენა. ათეშენ რჩევას ელაკითხანა დალეფს დო ყურადღებათ ურჩქილენა თინეფს. თეშნერ მოქმედება გურშა ელუკინანს დალეფს დო ჯგირობუა მოუღ უხუცესეფშო ხოლო. მუშენ იფჩიებუთ თეს? ართ უხუცეს, სახელო ჯერარდო, მით ბეთელს მსახურენს, იჩიებ: „ბრელშა გიმოფცად, ნამდა დალეფშა რჩევაშ ელაკითხირ მოხვარ, ჩქიმ საქმე უჯგუშო გუვაკეთე, მუშენდა, ხშირ შემთხვევას, მუდგარენ საქმეს თინეფს უმოს გამოცდილება უღუნა, ვინემ ჯიმალეფიშ უმენტაშის“. კრებას ბრელ ძვირფას პიონერ და ხოლო პჸუნა, მით ჯგირო იჩინენს მუნეფიშ კრებაშ ტერიტორიას მახორუ კათას. ართ უხუცეს, სახელო ბრაიან, იჩიებ: „დალეფ ბრელს ორთუნა იეჰოვაშ ორგანიზაციაშო. ათეშენ, ჯგირ იჸუაფ, დიბგურუათ თინეფიშ გამოცდილებაშე“.

გონიერ უხუცეს ხეთეშე ვა თქუანს ვარიას დაშე მეღებულ რჩევაშ გიმორინაფაშენ. ართ უხუცეს, სახელო ედვარდ, იჩიებ: „დალეფიშ აზრიქ დო გამოცდილებაქ შილებე მეხვარას ჯიმას მთლიან სურათიშ ძირაფას დო შხვეფიშ გრძნობეფიშ გაგებას“ (იგავ. 1:5). თიმწკუმა ხოლო, მუჟამსით უხუცესის ვა გათვალისწინებე დაშ რჩევა, ჯგირ იჸუაფ, იშენით ქუწუას დას მადლობა აზრიშ გიმოხანტუაშენ დო საკითხიშ ინონჭაფაშენ.

თინეფ ამზადენა დალეფს. გონიერ უხუცესეფ ირნერ შესაძლებლობას ირინუანა, ნამდა შხვადოშხვა საქმეშო მამზადან დალეფ. მაგალთო, თინეფს შეულებუნა დაგურუან დალეფს, მუჭო ჩატარან სამქადაგებლო შეხვალამეფ, თიცალ შემთხვევეფს, მუჟამსით თექ ნათილ ჯიმა ვა რე. თეს გეძინელ, შეულებუნა დაგურუან შხვადოშხვა ომუშებელ ხელსაწყოეფიშ დო დანადგარეფიშ გიმორინაფა, ნამდა შეიალებუან მონაწილება მიღან თეოკრატიულ შენობეფიშ მშენებლობაშ დო მიკოჯინაშ საქმეს. ბეთელს ზედამხედველეფ ამზადენა დალეფს შხვადოშხვა დავალებეფშო. მაგალთო, მუნერით რე: ტექმომსახურება, შესყიდვეფ, ბუღალტერია, კომპიუტერულ პროგრამირება დო შხვა. მუჟამსით უხუცესეფ დალეფს შხვადოშხვა საქმეშო ამზადენა, თეშნერო ოძირანა, ნამდა ონდუნა თინეფს დო დარწმუნებულეფ რენა, ნამდა უღუნა საქმეშ კეთებაშ უნარ.

უხუცესეფშე მეღებულ რჩქინას ბრელ და შხვეფიშ საჯგირობუოთ ირინუანს. მაგალთო, ნამთინე, მით მშენებლობაშ საქმეეფშო მამზადეს, სტიქიურ უბედრობათ დაზარალებურ თანაქრისტიანეფს ოგურუანს, მუჭო აღადგინან მუნეფიშ ჸუდეეფ. თეს გეძინელ, თი დალეფ, მიდგაქ საჯარო ადგილს ქადაგებაშო მომზადება მიკორთეს, ბრელ დას ოხვარუნა, გეუჯგუშან მსახურებაშ თე სფეროს. დალეფ მანგარო აფასენა თი უხუცესეფს, მიდგაქ მამზადეს თინეფ შხვადოშხვა საქმეშო. ართ და, სახელო ჯენიფერ, იჩიებ: „ართშა, მუჟამსით დარბაზიშ მშენებლობას ბღებულენდჷ მონაწილებას, ზედამხედველქ დრო გეგმურთჷ ჩქიმდა თიშ გურაფას, მუჭო ოკო ვაკეთიკო საქმე. თინა ორწყედ ჩქიმ კეთებულ საქმეს დო ირიათო მოცქვანდჷ. მანგარო მიჸორდჷ თიწკუმა ართო მუშობა, მუშენდა ბგინაფლენდჷ, ნამდა მაფასენდჷ დო მონდუდ“.

ᲛᲔᲥᲪᲘᲗ ᲓᲐᲚᲔᲤᲡ ᲝᲯᲐᲮᲘᲨ ᲬᲔᲕᲠᲔᲤᲪᲐᲚᲝ

იეჰოვაცალო, ჩქი ხოლო მანგარო მიჸორა ჩქინ ართგურ დალეფ დო ოჯახიშ წევრეფცალო ვოქცუთ თინეფს (1 ტიმ. 5:​1, 2). ჩქინო დიდ პატი რე დო მოამაყუნა, ნამდა თინეფწკუმა ართო ვომსახურუთ ღორონთის. თეს გეძინელ, მანგარო მოხიოლუნა, მუჟამსით თე დალეფ ჸოროფას დო ელარნას გინაფლენა. ართ და, სახელო ვანესა, იჩიებ: „მანგარ მარდულ ვაფუქ იეჰოვას, ნამდა მომიჸონ მუშ ორგანიზაციაშა, სოდეთ პჸუნსჷ თიცალ ჯიმალეფ, მით ირიათო გურშა ელამკინანა დო მაფასენა“. ართ ტაივანელ და იჩიებ: „ვუმარდუქ იეჰოვას დო თიშ ორგანიზაციას, მუშენდა არგამათ ვორწყექ, მუჭო აფასენა ოსურკათას დო უთხილანა ჩქინ გრძნობეფს. თეშ ძირაფა რწმენას მიმანგარენს დო ხოლო უმოსო ვაფასენქ, ნამდა მიღჷ პატი, ვორდე იეჰოვაშ დიდ ოჯახიშ ნაწილ“.

წერმიდგინით, მუშმადიდა ხიოლ მოუღ იეჰოვაშა თიშ ძირაფას, ნამდა ართგურ ქრისტიან ქომოლკოჩეფ მეჸუნა თიშ მაგალითის დო თიცალ დამოკიდებულება უღუნა ოსურკათაშ მიმართ, მუნერით ღორონთის უღჷ (იგავ. 27:11). შოტლანდიას მახორუ ართ უხუცეს, ბენჯამინ, იჩიებ: „ამდღა, ქვეყნიერებას ბრელ ქომოლკოჩ უპატიცემლობას გიმირჩქინანს ოსურკათაშ მიმართ. ათეშენ, მუჟამსით ოსურეფ დარბაზშა მინულა, მოკონა, იგინან განსხვავება ქვეყნიერებაშ დო იეჰოვაშ ორგანიზაციაშ შქას“. მორთჷ, დუდ ვა დაბზოგათ, ნამდა მივაჸუნათ იეჰოვაშ მაგალითის დო ჩქინ ძვირფას დალეფიშ მიმართ გიმიფრჩქინათ ჸოროფა დო პატიცემა, მუდგას დასურო იმსახურენა! (რომ. 12:10).