Bay boch i yad ni ke ilal u boch e yalen ni yima tay e piin nib pin riy ni yad ba sobut’. I yog Hans nreb e walag ni pumoon ni ma lekag e ulung u Bolivia ni bay boch e pumoon nra ilalgad u boch e yalen ni yima pi’ e athamgil riy nga laniyan’ e piin pumoon ni ngaur ngongolgad u fithik’ e tolangan’. Pi pumoon ney e yad ma lemnag ni ka yad ba tolang ko piin nib pin, mab ga’ ni yad ma darifannagrad. Shengxian nreb e piilal u Taiwan e yog ni gaar: “Boor e pumoon ko gin gu ma par riy ni yad ma lemnag nsusun e dab i yog e piin nib pin ngorad rogon lanin’rad u boch ban’en. Faanra chey ni weliy reb e pumoon rogon laniyan’ reb e ppin u ban’en, ma aram e tin ka bay e pumoon e dab kur ted fan fare pumoon.” Ku bay yugu boch e kanawo’ ni ma dag boch e pumoon riy ndariy fan e piin nib pin u wan’rad. Bod ni bay boch i yad ni ma yog boch ban’en u murung’agen e piin nib pin ni ngan minmin ngay ni be darifannagrad.

Machane gad ba felfelan’ ni bochan e yugu demtrug rogon e yalen ko gin ni ilal reb e pumoon riy, ma rayog ni nge thil. Rayog ni nge tal i lemnag ni piin pumoon e yad ba tolang ko piin nib pin. (Efe. 4:​22-24) Rayog ni ngar rin’ed e re n’ey ni faan yad ra folwok rok Jehovah. Re article ney e gad ra weliy riy rogon e ngongol rok Jehovah ko piin nib pin, nge rogon nrayog ni nge fil e pi walag ni pumoon rogon ni ngaur ngongolgad ko piin nib pin ni bod rogon e ngongol rok Jehovah ngorad, nge rogon nrayog ni nge dag e piin piilal e kanawo’ u rogon ni ngaun tayfan e pi walag nib pin.

UW ROGON E NGONGOL ROK JEHOVAH KO PIIN NIB PIN?

Ke dag Jehovah e bin th’abi fel’ e kanawo’ u rogon e ngongol ni ngaud daged ko piin nib pin. Ir reb e Matam ni ma runguyey ni gubin pi fak ni ma t’ufegrad. (John 3:16) Ma pi walag nib pin ni yad ba yul’yul’ ngak e yad bod pi fak nib pin ni yad ba t’uf rok. Am lemnag boch e kanawo’ ni ma tay Jehovah fan e piin nib pin riy.

Der ma laniyan’ ngorad. I sunmiy Jehovah e pumoon nge ppin ni yad bod yaan. (Gen. 1:27) De sunmiy e piin pumoon ni kab ga’ e llowan’ ara salap rorad ko  piin nib pin; maku der ma lemnag ni kab fel’ e pumoon ko ppin. (2 Kron. 19:7) Ke sunmiy e pumoon nge ppin ni yow l’agruw nrayog rorow ni ngar nangew fan e tin riyul’ u Bible me m’ug pi fel’ngin rorow. Kub ga’ fan u wan’ Jehovah gubin e pumoon nge ppin nib mich Got u wan’rad, ndemtrug ko yad be athapeg e yafos ni manemus u paradis u fayleng ara ngar pigpiggad u tharmiy ni yad boch e pilung nge prist. (2 Pet. 1:1) Ere ba tamilang nder ma laniyan’ Jehovah ko piin nib pin.

Ma motoyil ngorad. Ma lemnag Jehovah rogon laniyan’ e piin nib pin nge pi magafan’ rorad. Bod ni motoyil miki fulweg taban e meybil rok Rachel nge Hannah. (Gen. 30:22; 1 Sam. 1:​10, 11, 19, 20) Ki thagthagnag nga laniyan’ e piin nra yoloyed e pi babyor u Bible ni ngar yoloyed murung’agen boch e pumoon nra motoyilgad ngak boch e ppin. Bod ni Abraham e fol ko n’en ni yog Jehovah ngak ni aram e nge motoyil ngak Sarah ni leengin. (Gen. 21:​12-14) Ma David ni Pilung e motoyil ngak Abigail. Bin riyul’ riy e lemnag ni Jehovah e ir e ke pi’ Abigail ni nge yib i non ngak. (1 Sam. 25:​32-35) Jesus ni ir e en nrib fel’ rogon ni i m’ug pi fel’ngin e Chitamangin rok e ki motoyil ngak Maria ni chitiningin. (John 2:​3-10) Pi n’ey ni kan weliy e be tamilangnag nreb e kanawo’ ni ma tay Jehovah fan e piin nib pin riy e aram e ma motoyil ngorad.

Be pagan’ ngorad. I pagan’ Jehovah ngak Efa nrayog ni nge ayuweg e fayleng ni ga’ngin. (Gen. 1:28) Bochan ni rin’ e re n’ey, ma aram me dag nder lemnag ni kab sobut’ Efa ngak Adam ni figirngin, ya i tay ni ir e taayuw rok Adam. Ki pagan’ Jehovah ngak Deborah nge Huldah ni fa gal profet nib pin, me pagrow ni ngaur piew e fonow ko girdi’ nib muun reb e judge nge reb e pilung ngay. (Judg. 4:​4-9; 2 Ki. 22:​14-20) Ngiyal’ ney e ku ma pag Jehovah e piin nib pin ni Kristiano ni ngar rin’ed e maruwel rok. Pi walag nib pin ney ni yad ba yul’yul’ e yad ma pigpig ni yad boch e tamachib, nge pioneer, nge missionary. Yad ma pi’ e ayuw u rogon ni ngan yoloy yaan boch e Tagil’ e Liyor nge naun rodad ni ngan toy, maku yad ma pi’ e ayuw ni ngan toy e pi naun ney, ma yad be guy rogon ni nga i par gubin ban’en riy nib fel’. Bay boch i yad ni ma pigpig u Bethel, ma boch e ma pigpig ko gin yima pilyeg e pi babyor rodad riy. Pi walag ney e yad bod ba ulung i salthaw nib ga’ ni be fanayrad Jehovah ni ngar lebguyed e n’en nib m’agan’ ngay. (Ps. 68:11) Ere ba tamilang nder ma lemnag Jehovah ni piin nib pin e yad ba meewar ara dariy ban’en nrayog rorad.

UW ROGON NI NGE NANG E PI WALAG NI PUMOON ROGON NI NGAUR NGONGOLGAD KO PIIN NIB PIN NI BOD JEHOVAH?

Pi walag ni pumoon, faanra ngad nanged ko gad ma ngongol ko pi walag nib pin ni bod Jehovah, ma aram e ba t’uf ni ngad fal’eged i lemnag rogon e lem nge ngongol rodad ngorad. Ba t’uf ban’en ni nge ayuwegdad ni faanra ngad rin’ed e re n’ey. Rayog ni ngan fanay e X-ray ni ngan nang ko bay e m’ar ko gum’ircha’ rok be’ fa dariy. Ere ku arrogon nrayog ni nge ayuwegdad reb e fager rodad ni be pagan’dad ngak nge Thin rok Got ni ngad nanged ko bay boch ban’en ni gad ma lemnag u rarogon e piin nib pin nde puluw fa danga’. Mang e gad ra rin’ me yag nni ayuwegdad?

Mu fith reb e fager rom ni be pagan’um ngak. (Prov. 18:17) Rayog ni ngad fithed reb e fager rodad ni be pagan’dad ngak, ma kub sumunguy mab puluw rogon ni ma lem ni nge lungudad: “Ga be lemnag ma uw rogon e ngongol rog ko pi walag nib pin? Rayog ni ngar nanged nug ma tay farad fa dabiyog? Bay ban’en nrayog ni nggu mon’og riy u rogon e ngongol nug ma dag ngorad fa dariy?” Faanra ke yog e fager rom ni bay boch ban’en nib t’uf ni ngam mon’og riy ma dab mu tawey nga boch ban’en, ya nge m’agan’um ngay ni ngam thilyeg boch ban’en u rarogom.

Mu fil e Thin rok Got. Bin th’abi fel’ e kanawo’ ni ngad nanged riy ko ba fel’ e ngongol ni gad ma dag ko pi walag nib pin e aram e ngad fanayed e Thin rok Got ni nge ayuwegdad ni ngad nanged rogon e lem nge ngongol rodad ngorad. (Heb. 4:12) Nap’an ni gad be fil e Bible, ma gad ra fil murung’agen boch e pumoon nib fel’ e ngongol ni yad ma dag ko piin nib pin nge boch ni danga’. Ngemu’ ma rayog ni ngad taareb rogonnaged e ngongol rorad ko ngongol rodad. Maku reb e faan gad ra taarebrogonnag e n’en be yog reb e thin nu Bible nga reb, ma aram e rayog ni nge dab da fanayed fan reb e thin nu Bible u reb e kanawo’ nde puluw ni bochan e nge m’ag nga rogon ni gad ma lemnag e piin nib pin. Bod ni be yog fare thin ko 1 Peter 3:7 ni en leengiy e ‘ba meewar ko pumoon, ere thingar un tay fan.’ b Gur, re n’ey e be yip’ fan ni ppin e ba sobut’ ko pumoon, ara ba achig e llowan’, ara salap rok? Danga’! Am taarebrogonnag e n’en ni yog Peter ko n’en  be yog e Galatia 3:​26-29 ni aram e ke mel’eg Jehovah boch e ppin nge pumoon ni ngar uned ngak Jesus ko gagiyeg u tharmiy. Nap’an ni gad ra fil e Thin rok Got, ma gad yog ngak reb e fager rodad ni be pagan’dad ngak ni nge yog rogon e ngongol ni ma guy ni gad ma dag ko piin nib pin, ma aram e rayog ni ngad nanged rogon ni ngaud ted fan e pi walag nib pin.

UW ROGON NI MA TAY E PIIN PIILAL FAN E PI WALAG NIB PIN?

Ku rayog ni nge fil e pi walag ni pumoon u lan e ulung rogon ni ngaur ted fan e pi walag nib pin ni aram e ngar folwokgad ko n’en ma rin’ e piin piilal ni yad ma t’ufegey. Uw rogon ni ma dag e piin piilal e kanawo’ nrayog ni ngan folwok riy u rogon ni yad ma tayfan e pi walag nib pin? Baaray boch e kanawo’.

Yad ma yog fel’ngin e tin kar rin’ed. I dag apostal Paul e kanawo’ nib manigil nrayog ni nge folwok e piin piilal riy. I yog fel’ngin boch ban’en ni ke rin’ boch e walag nib pin u lan fagi babyor ni yoloy ko ulung nu Roma. (Rom. 16:12) Am lemnag gelngin e felfelan’ ni tay e pi walag nib pin nem u nap’an nni beeg e gi babyor nem ni yoloy Paul ko ulung u rom. Ku arrogon e piin piilal ni yad ma pining e magar ngak e pi walag nib pin ni bochan pi fel’ngirad nib manigil nge maruwel ni yad ma rin’ ni fan ngak Jehovah. Re n’ey e ma ayuweg e pi walag ney ni ngar nanged ni yibe tay farad ma kub ga’ farad u wan’uy. Thin ni ma yog e piin piilal ni nge pi’ e athamgil nga laniyan’ e pi walag nib pin e rayog ni aram e n’en nib t’uf rorad ya nge yag nra ululgad ko pigpig ni yad be tay ngak Jehovah u fithik’ e yul’yul’.​—Prov. 15:23.

Nap’an ni be pining e piin piilal e magar ngak e pi walag nib pin, ma yad ma guy rogon ni nge m’ug riy ni ke yib u gum’ircha’rad maku yad ma tamilangnag e pi n’en nib fel’ ni ke rin’ e pi walag ney. Mang fan? I yog reb e walag nib pin ni ka nog Jessica ngak ni gaar: “De kireb ni nge gaar reb e walag ni pumoon ngak reb e walag nib pin, ‘ba manigil e n’en kam rin’.’ Machane ri ma yib e athamgil nga lanin’mad u nap’an nra yog reb e walag ni pumoon fel’ngin ban’en ni kug rin’ed, ni bod ni nge yog nib fel’ e n’en kug rin’ed ni kug filed ngak pi fakmad ndabi mada’ lamrad nga lang u nap’an e muulung ara rogon ni kug ayuweged be’ ni yibe fil e Bible ngak ni nge thap ko muulung.” Faanra tamilangnag e piin piilal ban’en nib manigil ni ke rin’ e pi walag nib pin, ma aram e yad ra nang ni yad ba t’uf ko ulung mab ga’ farad.

Yad ma motoyil ngorad. Piin piilal ni yad ba sobut’an’ e yad manang ni gathi kemus ni yigoo yad e yad manang rogon ni ngan rin’ boch ban’en nib fel’ rogon. Pi piilal ney e yad ma yog ko pi walag nib pin ni nga  rogned rogon lanin’rad u boch ban’en, ma yad ma fal’eg e motoyil ngorad u nap’an ni yad be non. Faan yad ra rin’ e re n’ey, ma aram e yad be pi’ e athamgil nga laniyan’ e pi walag nib pin maku ra yib angin ngorad. Ni uw rogon? Bay reb e piilal ni ka nog Gerardo ngak ni ma pigpig u Bethel ni yog ni gaar: “Kug guy ni faanra ug fith rogon laniyan’ e pi walag nib pin u boch ban’en ma ma ayuwegeg ni nggu mon’og u rogon nug be rin’ e maruwel rog. Ba ga’ ni bayi n’en ma yad e kab n’uw nap’an ni kar rin’ed fare maruwel nga n’umngin nap’an ni ke rin’ yooren e walag ni pumoon.” Boor e walag nib pin u lan e ulung ni yad ma pioneer, ere boor ban’en ni yad manang u rarogon e girdi’ ko gin yima machib riy. Bay reb e piilal ni ka nog Bryan ngak ni yog ni gaar: “Boor ban’en nrayog ni nge rin’ e pi walag nib pin ni fan ko ulung rodad. Ere mu guy rogon ni ngam fil boch ban’en ko tin yad manang!”

Piin piilal ni yad ba gonop e darur gurgad ngar siyeged boch e kanawo’ ni ke yog e pi walag nib pin ni ngan rin’ ban’en riy. Mang fan? Bay reb e piilal ni ka nog Edward ngak ni yog ni gaar, “N’en ke yog reb e walag nib pin nge pi n’en ni manang e rayog ni nge ayuweg reb e walag ni pumoon ni nge tamilangan’ u rarogon reb e ban’en, miki ayuweg ni nge nang rogon laniyan’ yugu boch e girdi’.” (Prov. 1:5) Mus ni faanra dabiyog ni nge fanay reb e piilal e n’en ke yog reb e walag nib pin, machane rayog ni nge pining e magar ngak ni ke weliy rogon laniyan’ riy nge tin ni manang u murung’agen fare n’em.

Yad ma skulnagrad. Piin piilal ni yad ba gonop e yad ma gay boch e kanawo’ nrayog ni ngar skulnaged e pi walag nib pin riy. Bod nrayog ni ngar filed ngorad rogon ni ngar yarmiyed e muulung ni fan ko machib u ba ngiyal’ ndariy taareb e walag ni pumoon ni kan taufenag ni bay nrayog ni nge yarmiy e muulung. Rayog ni ngar filed ngorad rogon ni ngar fanayed boch e talin e maruwel ya nge yag nra pied e ayuw ni ngan ngongliy e yungin ke kireb ara ngan toy boch e naun rodad. Pi walag ni pumoon ni yad ma yarmiy rogon ni ngan rin’ boch e maruwel u Bethel e kar filed ngak e pi walag nib pin rogon ni ngar rin’ed boch e maruwel nib thilthil ni bod ni ngan ngongliy e yungin ke kireb ko naun, ara ngan chuw’iy boch ban’en, ara ngan fal’eg boch e program u computer, nge ku boch e maruwel. Nap’an nra skulnag e piin piilal e pi walag nib pin, ma aram e yad be dag ni yad manang nrayog ni nge rin’ e pi walag ney boch e maruwel maku rayog ni ngan pagan’uy ngorad.

Boor e walag nib pin ni kar fanayed e pi n’en kar filed rok e piin piilal ni ngar ayuweged yugu boch e girdi’ ngay. Bod ni bay boch e pi walag ney ni kar fanayed e n’en kar filed u rogon e dimow naun ni ngar ayuweged boch e walag ni ngar toyed e naun rorad bayay u tomuren reb e yoko’, ara durru’, ara ban’en ni ke buch ni kan gafgow riy. Ku bay boch e pi walag ney ni yad ma fanay e pi n’en kan fil ngorad u rogon ni ngar machibgad ko yungi n’en ma muulung e girdi’ ni yoor ngay ni ngar skulnaged boch e walag nib pin u rogon ni ngar machibgad ko biney e kanawo’. Uw rogon ni ma lemnag e pi walag nib pin e pi piilal ni kar skulnaged yad? I yog reb e walag nib pin ni ka nog Jennifer ngak ni gaar: “Nap’an nug un i toy reb e Tagil’ e Liyor ma bay reb e piilal ni be yarmiy rogon e maruwel ni yibe rin’ ni tay e tayim ni nge fil boch ban’en ngog. I guy e maruwel ni ug rin’ me pining e magar riy ngog. Gu baadag ni gamow ma maruwel u taabang ni bochan e ma dag ngog nib ga’ fag maku be pagan’ ngog.”

ANGIN NI FAANRA UN TAY E PI WALAG NIB PIN NI BOD CHON E TABINAW RODAD

Ba t’uf e pi walag nib pin rodad ni yad ba yul’yul’ ni bod Jehovah! Ere gad ma tayrad ni yad bod chon e tabinaw rodad. (1 Tim. 5:​1, 2) Yad ba t’uf rodad maku gad baadag ni gad ma maruwel u taabang. Kub gel e felfelan’ ni gad ma tay ni faan yad ra nang ni yad ba t’uf rodad ma gad be ayuwegrad. I yog reb e walag nib pin ni ka nog Vanessa ngak ni gaar, “Rug be pining e magar ngak Jehovah ni gag bang ko ulung rok nib sug e pi walag ni pumoon riy nri yad ma pi’ e athamgil nga lanin’ug.” Ki yog reb e walag nib pin u Taiwan ni gaar: “Rug be pining e magar nrib ga’ fan e piin nib pin u wan’ Jehovah nge ulung rok ma yima tay farad. Re n’ey e be gelnag e michan’ rog, maku be k’aringeg ni ngari ga’ fan u wan’ug ni gag bang ko ulung rok Jehovah.”

Dariy e maruwar riy nri ma felfelan’ Jehovah u nap’an nra guy e pi pumoon ni Kristiano ni yad be guy rogon ni ngaur lemnaged e piin nib pin maku yad be ngongol ngorad ni bod ir! (Prov. 27:11) I yog reb e piilal u Scotland ni ka nog Benjamin ngak ni gaar: “Boor e pumoon u fayleng e ngiyal’ ney ndarur ted fan e piin nib pin. Ere nap’an nra yib e piin nib pin nga Tagil’ e Liyor rodad, ma gad baadag ni ngar nanged nib thil e ngongol ni yira dag ngorad u rom.” Ere manga yugu da athamgilgad ni gad gubin ngad folwokgad rok Jehovah ni aram e ngaud daged e t’ufeg nge tayfan ngak e pi walagdad nib pin ni bod rogon nsusun e ngad rin’ed.​—Rom. 12:10.