Nán e aɲia kanngan nin aɲia dandan’m be ngunmin be bo yɛ e su Zoova-ɔ. Sanngɛ awlo lɔ’n, e ngunmin annzɛ e nin e awlofuɛ mun e su Zoova wie. Kɛ ɔ ngunmin annzɛ a nin ɔ awlofuɛ mun amún sú Zoova awlo lɔ’n, ninnge nga an kwla yo be’n be nun wie mun yɛ:

• Amun kwla siesie amun wun naan amun a wɔ aɲia’m be bo. I lɛ nun’n, amun kwla suan jue’m be tolɛ, yɛ amun kwla uka amun awlofuɛ’m be kwlaa naan b’a tɛ kosan’m be su.

• Amun kwla kanngan sran kun i su ndɛ’n nun Biblu’n nun. I sin’n amun kwla yi i bue nga amun kanngannin nun’n i su desɛn, annzɛ kusu amun kwla klɛ like nga ndɛ sɔ’n kle amun’n be sie.

• Amun kwla fa amun ɲin sie i sran kun i srɛlɛ m’ɔ o Biblu’n nun’n i su. Kpɛkun wafa nga i srɛlɛ sɔ’n kwla uka amun naan amun a srɛ Zoova kpa w’a tra laa’n, amun koko su yalɛ.

• An kwla nian video kun. Kpɛkun i sin’n an koko su yalɛ, annzɛ amun klɛ like nga video sɔ’n kle amun’n be sie.

• Amun kwla siesie amun wun naan amun a ɔ jasin fɛ’n i bolɛ. Sɛ amun klo’n, amun kwla yi wafa nga amún bó jasin fɛ’n i nglo.

• Amun kwla nian ninnge nga Ɲanmiɛn yili be’n. Kpɛkun Zoova i su like nga ninnge sɔ’m be kle amun’n, amun kwla bu su akunndan, annzɛ amun kwla koko su yalɛ. a