Pɩtɩkɛ alɩwaatʋ ndʋ ɖikpeɣliɣ nɛ ɖɩlakɩ ɛgbɛyɛ taa kediɣzisi, egeetiye kigbeɣliŋ nɛ kigbeɣliŋ sɔsɔŋ yɔ, tɩ-taa ɖeke ɖɩsɛɣ Yehowa. Ɛlɛ ɖɩsɛɣ-ɩ ɖɔɖɔ alɩwaatʋ ndʋ ɖɩlakɩ ɖa-tɩ yɔɔ kpɛlɩkʋʋ nɛ ɖɔ-hɔʋ taa Ɛsɔ sɛtʋ yɔ. Mbʋ ɩpɩzɩɣ nɛ ɩla mɩ-tɩ yɔɔ kpɛlɩkʋʋ nɛ mɩ-hɔʋ taa Ɛsɔ sɛtʋ alɩwaatʋ taa yɔ, pɩ-taa nabʋyʋ yɔ:

• Ɩpɩzɩɣ nɛ ɩñɔɔzɩ ɛgbɛyɛ taa kediɣzisi. Ɩpɩzɩɣ ɖɔɖɔ nɛ ɩkpɛlɩkɩ hendu teu nɛ ɩtɛ ɩsɩnɩ hɔʋ taa mba tɩŋa nɛ pɔñɔɔzɩ tɔm natʋyʋ nɛ pocosi kediɣzaɣ taa.

• Ɩpɩzɩɣ nɛ ɩkalɩ Bibl taa kɛdaɣ nakɛyɛ. Pʋwayɩ lɛ, ɩlɩzɩ mbʋ pɩlabɩ kɛdaɣ ŋga ka-taa yɔ, pɩ-taa nabʋyʋ kɩlɛmʋʋ yaa ɩma tɔm ndʋ ɩkpɛlɩkɩ ka-taa yɔ tɩ-taa natʋyʋ.

• Ɩpɩzɩɣ nɛ ɩtazɩ adɩma wena awɛ Bibl taa yɔ a-taa naayɛ taa, nɛ ɩyɔɔdɩ ɛzɩma apɩzɩɣ nɛ asɩnɩ-mɩ nɛ ɩñɔɔzɩ mɩ-adɩma nɛ awɛɛ ɖeu nɛ pɩkɩlɩ yɔ.

• Ɩpɩzɩɣ nɛ ɩcɔnɩ ɛgbɛyɛ tɛ video nakʋyʋ nɛ pʋwayɩ lɛ, mɩ nɛ ɛyaa lalaa ɩla kɛdaɣ kɩ-yɔɔ yaa ɩma tɔm natʋyʋ pɩlɩɩnɩ kɩ-yɔɔ.

• Ɩpɩzɩɣ nɛ ɩkpɛlɩkɩ ɛzɩma ɩñɔɔzɩ mɩ-tɩ nɛ iwolo tɔm susuu yɔ; pɩtɩla ɩpɩzɩɣ nɛ ɩla la ŋwɩlɩwaa.

• Ɩpɩzɩɣ nɛ ɩkpaɣ alɩwaatʋ ndʋ ɩcɔnɩ wondu kɩlɩzɩtʋ nɛ ɩmaɣzɩ tɩ-yɔɔ, yaa ɩyɔɔdɩ mbʋ tɩkpɛlɩkɩɣ-mɩ Yehowa yɔɔ yɔ pɩ-tɔm. a