1. Майлаткандардыҥ ончозы теҥеридӧӧн качан алылар?

 АЛДЫНДА ӧйдӧ Иегованыҥ ишчилеринде мындый сурак болгон: «Майлаткандардыҥ калганчызы качан теҥеридӧӧн алылар?» Бис майлаткандардыҥ кезиги Армагеддон ӧдӧ берзе, кандый да ӧйгӧ јерде болор деп сананганыс. Је 2013 јылдыҥ јаан изӱ айыныҥ 15-чи кӱнинде чыккан «Каруулчы шибееде» јерде арткан майлаткандардыҥ ончозы Армагеддонноҥ озо теҥеридӧӧн алылар деп айдылган болгон (Матф. 24:31).

2. Бисте кандый сурак болордоҥ айабас? Бу јӧрмӧлдӧ нени шӱӱжерис?

² Је мындый сурак чыгар болор: «Улу тӱбектиҥ» ӧйинде Иеговага чындык иштеп турган Иисустыҥ «ӧскӧ койлорыла» не болор? (Иоанн 10:16; Матф. 24:21). Бӱгӱнги кӱнде кезик ака-эјелер олордыҥ сӱӱп турган майлаткан ака-эјелери теҥеридӧӧн јӱрӱп калза, олор эмди јаҥыскан артып калдыс деп санааркаардаҥ айабас. Оныҥ учун эмди бу ака-эјелер библиялык кандый эки учуралдаҥ мынайып сананып турганын кӧрӱп ийектер. Оноҥ биске бу керегинде нениҥ учун санааркабас керек деп шӱӱжип ийерис.

НЕ БОЛБОС?

3, 4. Кезик ака-эјелер неге санааркайт, нениҥ учун?

³ Кезик ака-эјелер, Башкару јӧптӧ иштеп турган акалар теҥеридӧӧн јӱре берзе, ӧскӧ койлор чындыктаҥ туура јӱре берер деп санааркайт. Олордо ондый санааркаш, байла, Агару Бичикте айдылган эки учуралдаҥ улам болуп турган. Баштапкы учурал Иодай деп улу абыс керегинде. Ол Иегованыҥ чындык ишчизи болгон. Иодай ӱйиле, Иехошевала, Иоас деп кичинек уулчакты ӧлӱмнеҥ аргадап, Иегованыҥ чындык ишчизи  болзын деп чыдадып салган. Оноҥ ол чыдап келеле, каан болгон. Иоас, Иодай тирӱ јӱрерде, Иеговага чындык иштеген. Је качан ол божоп каларда, Иоас калју јайзаҥдардыҥ сӧзине кирип, јаман керектер эдип турала, Кудайдаҥ туура јӱре берген (2 Лет. 24:2, 15—19).

⁴ Анайда ок экинчи чактыҥ христиандары керегинде куучындажып ийектер. Качан калганчы апостол Иоанн эзен-амыр јӱрерде, христиандар оныҥ јакшы темин кӧрӱп, Иеговага чындык иштегендер (3 Иоанн 4). Ол ӧскӧ апостолдорло кожо јаҥы ла ӧзӱм алынып јаткан Кудайдаҥ јана базарыла коркышту тыҥ тартышкан (2 Фес. 2:7; 1 Иоанн 2:18). Је Иоанн божоп каларда, јана базары ӧрт чилеп, тыҥ таркай берген. Анайып, тоолу ла он јылдардыҥ туркунына јуун христиан нормалардаҥ ла ӱредӱлердеҥ тууралап калган.

5. Агару Бичиктеги эки учуралдаҥ улам бисте кандый санаа болбос керек?

⁵ Агару Бичикте бичилген бу эки учуралда чылап, майлаткандар теҥеридӧӧн јӱре берзе, Христостыҥ ӧскӧ койлорыла андый ла неме боло бербес пе? Чындык христиандар Иоас чылап јаман неме эдип баштабас па? Олор бистиҥ эраныҥ экинчи чагында христиандар чылап, Кудайдаҥ јана баспас па? Јок, андый неме болбос! Майлаткандар теҥеридӧӧн јӱре берзе, чындык христиандар кору јок артпас, олор оноҥ ло ары Иеговага чындык болор. Бис бого нениҥ учун алаҥзыбай јадыс?

АРУ БАЖЫРЫШ ЈОГОЛБОС

6. Бис кандый ӱч ӧйди кыскарта кӧрӧрис?

⁶ Удабас коркышту кӱч ӧйлӧр дӧ болотон болзо, бис агару бажырыш јоголбос деп, нениҥ учун алаҥзыбас аргалу? Нениҥ учун дезе Агару Бичикте бистиҥ ӧй керегинде айдылган сӧстӧр бар. Бистиҥ ӧй јебрен Израильдеги ле бистиҥ эраныҥ экинчи чактагы ӧйдӧҥ чек башка. Оныҥ учун бу ӱч ӧй керегинде кӧрӱп ийектер: 1) јебрен Израильдеги ӧй, 2) апостолдор божоп калган кийнинде ӧй, 3) бистиҥ ӧй, «ончо неме орныгар ӧй» (Ап. ижи 3:21).

7. Нениҥ учун чындык израильтяндар, бастыра албаты ла каандар чын јолдоҥ туура јӱрӱп те турарда, Кудайга оноҥ ло ары иштегендер?

⁷ Јебрен Израильдеги ӧй. Божоор алдында Моисей израильтяндарга мындый сӧстӧр айткан: «Мен божоп калзам, слер јескинчилӱ керектер эдип, кӧргӱзип салган јолдоҥ туура јӱрӱп калараар деп билерим» (Јаҥ. т. 31:29). Анайда ок израильтяндар Кудайды укпаза, олјого апарылар деп, Моисей база айдып салган (Јаҥ. т. 28:35, 36). Оныҥ сӧстӧри бӱткен бе? Эйе. Канча чактардыҥ туркунына кӧп каандар јастыра јолго турган. Олор Кудайдыҥ да албатызын чын јолдоҥ туура апарган. Мынаҥ улам Иегова бойыныҥ албатызын јектеп, јердеги каандардыҥ ӱйезин ӱзӱп салган (Иез. 21:25—27). Је чындык израильтяндар Иегованыҥ сӧзиниҥ бӱдӱп турганын кӧрӱп, ого оноҥ ло ары чындык иштегендер (Иса. 55:10, 11).

8. Экинчи чакта христиан јуундардыҥ чындыктаҥ јӱре бергени бисти кайкадат па? Јартап беригер.

⁸ Апостолдор божоп калган кийнинде ӧй. Экинчи чакта христиан јуундардыҥ чындыктаҥ јӱре бергени бисти кайкадат па? Јок. Кайкатпай јат. Нениҥ учун дезе Иисус андый болорын озодоҥ айдып салган (Матф. 7:21—23; 13:24—30, 36—43). Бу судурдыҥ чын ла баштапкы  чакта бӱдӱп баштаганын апостол Пётр, Павел ле Иоанн керелегендер (2 Фес. 2:3, 7; 2 Пётр 2:1; 1 Иоанн 2:18). Экинчи чакта христиан јуун чачылып турарда, тӧгӱн христиан јаҥ башталган. Бу јаҥ Улу Вавилонго — тӧгӱн кудай-јаҥдардыҥ империязына — кирет. Анайып, Иисустыҥ айткан судуры бӱдӱп калды.

9. Бистиҥ ӧй јебрен Израильдеги ӧйдӧҥ лӧ бистиҥ эраныҥ экинчи чагыныҥ ӧйинеҥ незиле башка болот?

⁹ «Ончо неме орныгар ӧй». Бистиҥ ӧй јебрен Израильдеги ӧйдӧҥ лӧ бистиҥ эраныҥ экинчи чактагы ӧйдӧҥ аҥыланып јат. Экинчи чакта коркышту кӧп христиандар чындыктаҥ јана болгон. Је бистиҥ ӧй канай адалып јат? Бажыска баштапкы ла катап келген неме — телекейдиҥ «калганчы кӱндери» деп адалып турган (2 Тим. 3:1). Је Агару Бичикле болзо, бу кӱндерле кожо јаан учурлу ла узак ӧйгӧ улалатан ӧй башталган. Качан Кудайдыҥ Каандыгы улусты толо кемдӱ ле јерди рай эдип салза, бу ӧй тӱгенип калар. Ол «ончо неме орныгар ӧй» деп адалат (Ап. ижи 3:21). Оныҥ башталган ӧйи 1914 јыл. Ол ӧйдӧ не орныктырылган? Иисус Теҥеридеги Каандыктыҥ Кааны болуп калган. Анайып, Давидтиҥ ӱйезинеҥ барган ла Иегованы кӧргӱзип турган Каан тургузылган. Је Иегова база нени орныктырган? Ару бажырышты (Иса. 2:2—4; Иез. 11:17—20). Бу бажырыш база јоголып калбас па?

10. а) Агару Бичикте бистиҥ кӱндердеги ару бажырыш керегинде кандый судур айдылган? (Исайя 54:17). б) Нениҥ учун мындый судурлар келер ӧйгӧ алаҥзыбаска болужат?

¹⁰ Исайя 54:17 кычырыгар. «Сеге удура эдилген кандый да мылтык-јепсел бир де једимдӱ болбос»! деген судурды сананып ийзегер. Бу судур бӱгӱнги кӱнде бӱдӱп јат. Анайда ок база бир судурдыҥ бӱдӱп турганын кӧрӧдис: «Сениҥ ончо балдарыҥды Иегова ӱредер. Олордыҥ амыры артыгынча болор. Сен чындыкта бек турарыҥ... Сен недеҥ де коркыбазыҥ, недеҥ де јалтанбазыҥ, коркышка алдыртпазыҥ» (Иса. 54:13, 14). Керек дезе Сатана да, «бу чактыҥ кудайы», Иегованыҥ ишчилериниҥ ижин токтодып болбос (2 Кор. 4:4). Ару бажырыш орныктырылып калган, ол јажын-чакка артар. Кандый да мылтык-јепсел биске удура туруп болбос!

 НЕ БОЛОР?

11. Майлаткандар теҥеридӧӧн јӱрӱп те калза, кара-бајырт албаты недеҥ де коркыбас деп нениҥ учун алаҥзыбайдыс?

¹¹ Майлаткандар теҥеридӧӧн јӱрӱп калза не болор? Ундыбагар, бистиҥ Кӱдӱчи — Иисус. Ол христиан јуунныҥ башчызы. Ол бойы мынайда айткан: «Слердиҥ баштаачы јаҥыс — Христос» (Матф. 23:10). Иисус бойыныҥ ӱренчиктерин јаантайын кичеер. Бисле Иегованыҥ Уулы бойы башкарып турган болордо, бис недеҥ де коркыбазыс. Је ол ӧйдӧ Иисус бойыныҥ улузына кандый башкартулар берерин јакшы билбезис. Оныҥ учун Агару Бичиктеҥ кӱӱнис кӧдӱретен кезик темдер кӧрӱп ийектер.

12. Иегова албатызын канайып башкарган: а) Моисей божоп каларда? б) Илья јаҥы јакылта аларда? (Јурукты база кӧрӱгер.)

¹² Моисей Израильдиҥ албатызы Ханаан јерге киргелекте божоп калган. Ол ӧйдӧ Кудайдыҥ албатызы болуш јок артып калды ба? Јок. Кудай, Моисей божоголокто, Иисус Навинди албатыга башчы эдип кӧстӧп салзын деп јакару берген. А Моисей дезе Иисусты мынаҥ озо ӱредип баштап койгон болгон (Чыг. 33:11; Јаҥ. т. 34:9). Анайда ок албатыда он бажы, бежен бажы, јӱс бажы, муҥ бажы болуп турган эр улус бар болгон (Јаҥ. т. 1:15). Айдарда, ол ӧйдӧ Кудайдыҥ албатызы јакшы башкарылган. Бого тӱҥей учурал судурчы Ильяныҥ ӧйинде болгон. Ол ӧйдӧ Илья израильтяндарга Иеговага бажырарга болушкан. Је оноҥ Кудай ого Иудеяда иштензин деп јакару берген (2 Каан. 2:1; 2 Лет. 21:12). Ол ӧйдӧ он уктаҥ турган израильтяндар башкару јок артып калды ба? Јок. Нениҥ учун дезе Илья канча јылдардыҥ туркунына Елисейди ӱредип турган болгон. Анайда ок ол ӧйдӧ судурчылардыҥ уулдары да бар болгон. Олор до, байла, ӱредӱ алган болор (2 Каан. 2:7). Оныҥ учун Иегованыҥ албатызы башкару јок артпаган. Иегова анайып бойыныҥ амадузын оноҥ ары бӱдӱрген ле бойыныҥ чындык ишчилерин бир де артыргыспаган.

13. Еврейлерге 13:5б-да Иегова не деп сӧзин берет? (Јурукты база кӧрӱгер.)

¹³ Айдарда, ӧрӧги темдерди кӧрзӧӧс, теҥеридӧӧн калганчы майлаткан јӱрӱп калза, Кудайдыҥ албатызыла не болор? Бис каруузын билерис. Иегова  Агару Бичик ажыра ол бойыныҥ албатызын качан да артыргыспас деп айдып салган. (Еврейлерге 13:5 кычырыгар.) Бӱгӱнги кӱнде Моисей ле Илья чылап бисле башкарып турган јаан эмес бӧлӱк майлаткандар ака-эјелерди ӱредер керек деп јакшы оҥдоп јадылар. Канча он јылдардыҥ туркунына Башкару јӧптиҥ акалары ӧскӧ койлорго кирип турган акаларды ӱредип јат. Темдектезе, олор башка-башка сургалдар ӧткӱрет. Аксагалдарды ӱредет, аймак кӧрӧӧчилерди, Бет-Элдиҥ комитедине кирип турган акаларды, анайда ок Бет-Элде каруулу акаларды ла ӧскӧ дӧ акаларды ӱреткилейт. Башкару јӧп дезе Башкару јӧптиҥ комитединиҥ болушчыларын таҥынаҥ ӱреткилейт. Бу болушчылар бӱгӱнги ле кӱнде Иегованыҥ организациязында башка-башка иш бӱдӱрет ле коркышту јаан молјуларлу болот. Олор, майлаткандар теҥеридӧӧн јӱре берзе, Христостыҥ койлорын башкарарга, эмди ле јакшы ӱредилип калган.

14. Бу јӧрмӧлдиҥ тӧс шӱӱлтези кандый?

¹⁴ Бу јӧрмӧлдиҥ тӧс шӱӱлтези мындый: улу тӱбектиҥ чек ле учы јаар майлаткандардыҥ калганчызы теҥеридӧӧн јӱрӱп калза, јердеги ару бажырыш јоголбос. Бис Иисустыҥ башкарузынаҥ улам Иеговага оноҥ ло ары бажырарыс. Је ол ӧйдӧ Магог јериниҥ Гогы, албатылардыҥ коалициязы, Кудайдыҥ албатызына табару эдер. Је оныҥ табарузы кыска ӧйгӧ болор ло једимдӱ болбос (Иез. 38:18—20). Бистиҥ агару ижис бир де арайлабас. Иегова бойыныҥ улузын аргадап алар! Нениҥ учун дезе апостол Иоанн кӧрӱлтеде Христостыҥ «кара-бајырт» ӧскӧ койлорын кӧргӧн. Агару Бичикте бу улус «улу ачу-коронды» чыккан деп айдылат (Ачыл. 7:9, 14).

15, 16. Ачылта 17:14-лӧ болзо, майлаткандар Армагеддондо нени эдер? Нениҥ учун бу бистиҥ кӱӱнисти кӧдӱрет?

¹⁵ Је тӱҥей ле та кемде де мындый сурак чыгардаҥ айабас: «А теҥериге барган майлаткандар нени эдер?» Агару  Бичик биске јап-јарт каруу берет. Анда айдылганыла болзо, телекейлик јаҥдар «Кураанга удура јуулажар». А «Кураан» дезе «јеҥер». Айдарда, телекейлик јаҥдар јеҥдиртип алар. А Кураанга кемдер болужар? Бу ла ӱлгерде каруузы бичилип калган: «Айттырылган, талдалган ла чындык улус». (Ачылта 17:14 кычырыгар.) Олор кемдер? Тирилген майлаткандар! Оныҥ учун улу тӱбектиҥ чек ле учы јаар калганчы майлаткан теҥериге јӱре берзе, олорго Иисус јуу-согушка чыгыгар деп јакылта берер. Кандый кайкамчылу јакылта дезеер? Кезик майлаткандар чындыкты билердеҥ озо јобош улус болгон деп айдып болбозыҥ. Не дезе кезиктери јуу-согушка да туружып туратан. Је чындык христиан бололо, улусла эптӱ-јӧптӱ јӱрерге ӱренип алгандар (Гал. 5:22; 2 Фес. 3:16). Оныҥ учун бастыра мылтык-јепселдерин таштап салган. Је теҥериге барган кийнинде майлаткандар Иисус Христос ло оныҥ агару ангелдериле кожо Кудайдыҥ ӧштӱлериле јуулажарга, јуу-согушка чыгар.

¹⁶ Јерде арткан майлаткандар эмди карып, чучурай берген. Је олор теҥериде јӱрӱмге тирилзе, ийде-кӱчтӱ ле качан да ӧлбӧйтӧн тындар болуп калар. Оныҥ кийнинде олор бойыныҥ Кааныла, Иисус Христосло, кожо јердеги јаманды јоголтор. Армагеддонныҥ кийнинде дезе олор Христосло кожо улуска толо кемине једерге болужар. Майлаткандардыҥ болужы теҥериге барза, канча киреге кӧп болор!

17. Армагеддондо Кудайдыҥ ончо ишчилерине не де каршу јетирбес деп кайдаҥ билерис?

¹⁷ Армагеддон деп јуу-согуш башталза, ӧскӧ койлорго нени эдер керек болор? Иеговага иженер ле оныҥ башкарузына сӧсуккур болор керек. Бого не кирет? Агару Бичикте мындый токуналу сӧстӧр бар: «Тӧриндеги кыптарыҥа кирип, эжиктериҥди бӧктӧп ал. Мениҥ чугулым ӧтпӧгӧнчӧ бир эмеш ӧйгӧ јажынып ал» (Иса. 26:20). Ол ӧйдӧ Кудайдыҥ теҥеридеги де, јердеги де ишчилерине не де каршу јетирбес. Бис Павел ле чилеп «јаҥдар да, эмди болуп турганы да, келер ӧйлӧрдӧ дӧ болотоны... бисти Кудайдыҥ... сӱӱжинеҥ айрып болбос» деп алаҥзыбай јадыс (Рим. 8:38, 39, JT). Оныҥ учун ундыбай јӱрӱгер: Иегова слерди сӱӱп јат! Ол слерди качан да артыргыспас!