1. Ju ma juwiro ceke gibinwang’iri i polo i saa ma kani?

 PI ORO ma dupa, dhanu pa Yehova gibed gipenjiri kumae: ‘Jubiting’o dong Jukristu ma juwiro awene pi nidok i polo?’ Ku kwong’a, wabed waparu nia i ng’ey lwiny mi Armagedon, copere nyo jumoko m’i kindgi bikedong’ iwi ng’om ma bidoko ni Paradizo pi kare moko. Ento i Otkur ma Wiw mi nindo 15, mi dwi mir 7, 2013, waponjo nia ju ceke ma juwiro ma fodi gin’iwi ng’om, jubiting’ogi pi nidok i polo i wang’ ma lwiny mi Armagedon ucaki.—Mat. 24:31.

2. Waromo penjara ku penji ma kani, man wabiweco iwi ang’o i thiwiwec maeni?

² Ento waromo penjara kumae: Ang’o ma binwang’u “rombe mange” pa Kristu ma gibimediri asu nitimo ni Yehova ku bedopwe i saa mi “masendi ma dit”? (Yoh. 10:16; Mat. 24:21) Tin jumoko m’i kindgi giromo bedo ku lworo nia wigi bilal kunoke nia jubiwenjogi kinde ma juting’o umego ku nyimego migi ma jumer ma juwiro pi nidok i polo. Dong’ wakeng’iyu i kpawa ario mi Biblia ma romo ketho gipar kumeno. I ng’eye, wabineno gin ma bikonyowa ninyang’ nia wambe ku thelembe mi bedo ku lworo.

LEMBE MA BITIMERE NGO

3-4. Jumoko giromo paru angʼo, man ke pirang’o?

³ Jumoko giromo paru nia rombe mange gibiweko lemandha kinde m’umego ma juwiro mi Guriri m’utelowic gimbe i ng’etgi pi nitelo wigi. Copere nyo kpawa moko mi Biblia re m’ubecwalugi niparu kumeno. Dong’ wakewec iwi lapor ario mi kpawane. Mi kwong’o utie pa jalam ma dit ma nyinge Yehoyada. Ebino jatic pa Mungu ma won bedopwe ma lee. En giku Yehocabeath ma min ot pare, gigwoko jalawobi moko ma nyinge Yehoac, man gikonye edoko ni ubimo ma ber man ma won bedopwe. I nindo ceke ma Yehoyada  ubino kwo i iye, Yehoac utimo gin m’atira. Ento i ng’ey m’etho, ecaku timo lembe ma rac. Ecaku winjo judongo ma wijo ma reco man eweko Yehova.—2 Kei. 24:2, 15-19.

⁴ Lapor ma kucelo utie mi Jukristu mi rundi mir ario. Jakwenda Yohana m’ubino jakwenda ma tokcen m’udong’ kwo, ubino kud atelatela ma ber iwi Jukristu dupa; ekonyogi nigwoko bedoleng’ migi ni Yehova. (3 Yoh. 4) Ku jukwenda pa Yesu mange ma weg bedopwe, Yohana ukiedo ma tek pi kare moko pi nigwoko Jukristu i kum ponji mi vupo m’ubino nyay saa maeca. (1 Yoh. 2:18; 2 Thes. 2:7.) Ento i ng’ey m’etho, ponji mi ju m’ujai i kum Kristu umew ve mac mi luli. I kind oro m’ulubo, ponji man timo ma reco umondo lee mandha i cokiri mi Jukristu.

5. Kpawa ario ma waai waweco i wigi ubenyutho ngo ang’o?

⁵ Nyo kpawa ario maeno mi Biblia, ubenyutho nia lembe ma rom eno bitimo bende rombe mange pa Kristu kinde ma juting’o ju ma juwiro pi nidok i polo? I saa maeca, nyo Jukristu ma weg bedopwe ma gin’iwi ng’om gibiwil ku ponji ma jumiyo igi calu Yehoac, kunoke gibijai i kum Kristu calu Jukristu ma dupa mi rundi mir ario i N.N.Y.? Tak de ngo! Wacopo bedo kud andha nia saa ma ju ma juwiro giweko ng’om, Yehova bimedere nigwoko rombe mange man gin de gibimediri ku thier ma leng’. Pirang’o cwinywa copo bedo tek i kum lembuno?

JUBICIDO NGO THIER MA LENG’

6. Wabiweco iwi rundi adek ma kani i adundo?

⁶ Pirang’o wacopo bedo kud andha nia thier ma leng’ bicido ngo, kadok i saa mi lembe ma tek m’ubebino i wang’wa? Utie nikum lembe ma waponjo i Biblia iwi rundi ma wabekwo i iye kawoni. Rundi ma tin ukoc bor dit ku mi Juisrael ma con man ku mi Jukristu mi rundi mir ario. Dong’ wakeng’iyu kilili mandha i rundi adek maeno: (1) Rundi mi Juisrael ma con, (2) rundi m’i ng’ey tho mi jukwenda, man (3) rundi mwa m’utie rundi ma “piny ceke bidok kendo kakare.”—Tic. 3:21.

7. Pirang’o ugam ukwayu ngo nia cwiny Juisrael ma con ma weg bedopwe utur kinde ma jubim man dhanu mange gibetimo lembe ma reco?

⁷ Rundi mi Juisrael ma con. Nyanok i wang’ tho pa Musa, eyero ni Juisrael kumae: “Ang’eyo ma ber nia i ng’ey tho para wubitimo lembe ma rac andha, man wubilokuru cen kud i yo m’ang’olo pire iwu.” (Poy. 31:29) Ecimo bende wang’gi nia tek gijai, jubitero thek migi i ng’eca. (Poy. 28:35, 36) Nyo wec maeno upong’o andha? Eyo. Pi oro dak swa, jubim ma dupa ging’iyo nitimo lembe ma reco man giketho dhanu de ulubo tokgi. Pieno Yehova ukabu dhanu pare ma reco cen kud i wang’e, man ejigo niketho jubim i kindgi. (Eze. 21:25-27) Ento Juisrael ma weg bedopwe ginwang’u tegocwiny ma gimediri ko nitimo ni Yehova kinde ma gineno nia lembe m’eyero ubepong’o andha.—Isa. 55:10, 11.

8. Pirang’o ukwayu ngo jai m’ugam umondo i kind Jukristu mi rundi mir ario uwang’ iwa?

⁸ Rundi m’i ng’ey tho mi jukwenda. Pirang’o ukwayu ngo jai m’ugam umondo i kind Jukristu mi rundi mir ario uwang’ iwa? Pilembe Yesu ular uewo nia jai ma lee biwok. (Mat. 7:21-23; 13:24-30, 36-43) Paulo, Pethro man Yohana ma gibino jukwenda, ceke gicwaku nia lembila pa Yesu eno ucaku pong’o i rundi ma kwong’a i N.N.Y. (2 Thes. 2:3, 7; 2 Pet. 2:1-3, 17-19; 1 Yoh. 2:18) I rundi mir ario i N.N.Y., cokiri mi Jukristu ucido; dini mi Jukristu  m’ujai uwok, man edoko ni thenge ma pire tek mi Babeli ma dit m’udiko dini ceke mi vupo. E kumeno bende, lembila pa Yesu upong’o.

9. Rundi ma wabekwo i iye ukoc nenedi ku mi Juisrael ma con man ku mi cokiri mi Jukristu mi rundi mir ario?

⁹ Rundi ma “piny ceke bidok kendo kakare.” Rundi mwa ukoc ku mi Juisrael ma con man ku ma jai ma dit uwok i iye i rundi mir ario i N.N.Y. Wan’i rundi ma kani? Wang’ ma pol wabed walwong’e nia “kajik ceng’” mi ng’om ma rac maeni. (2 Tim. 3:1) Ento Biblia unyutho bende nia rundi moko ma dit man ma bigalu pi kare ma lee nisagu, de bicaku i saa ma rom ku kajik ceng’. Rundine bimedere cil ma Ker pa Masiya bidwoko kum dhanu bidoko m’umbe dubo man ng’om ni Paradizo. Julwong’e nia rundi ma “piny ceke bidok kendo kakare.” (Tic. 3:21) Ecaku i oro 1914. Ang’o m’udok kendo kakare i oro maeno? Juketho Yesu ni Ubimo iwi Ker mi polo. E kumeno Yehova unwang’u kendo jabim m’ucung kakare, ma tie bende jacampacu mi ker p’ubimo Daudi ma won bedopwe. Ento Ker eno kende ngo ma Yehova udwoko kendo kakare. I ng’eye nyanok, thier ma leng’ de udok kendo kakare! (Isa. 2:2-4; Eze. 11:17-20) Nyo ebicido kendo?

10. (a) Biblia ular uewo ang’o pi thier ma leng’ mi rundi mwa? (Isaya 54:17) (b) Pirang’o lembila maeno ubetielo cwinywa lee?

¹⁰ Som Isaya 54:17. Lembila maeno uyero kumae: “Jambali moko mbe ma jucwio i kumi ma bibedo miero”! Wec maeno ubepong’o tap tin eni. Wec ma tielo cwiny m’ulubo e bende ubepong’o i rundi mwa: “Yehova biponjo nyithindho peri ceke; man kwiocwiny mi nyithindho peri bibedo dit. Jubiketho icungo i bedopwe. . . . Lworo [man ndiri binegi ngo;] kum ebibino ceng’ni i vuti ngo.” (Isa. 54:13, 14) Kadok Sitani ma tie “mungu m’i ng’om maeni” ngi de umbe ku copo mi jigo tic mi ponji ma Yehova ubetelo wiye i kind dhanu pare. (2 Kor. 4:4) Thier ma ma leng’ udaru dok kendo kakare, man ebinyothere kendo tak de ngo. Ebibedo pi nja. Andhandha, jambali moko mbe ma juyiko i kumwa ma bibedo miero!

LEMBE MA BITEMERE

11. Ang’o m’ubetego cwinywa nia udul ma dit biweko ngo lemandha kinde ma ju ma juwiro gidok i polo?

¹¹ Ang’o ma bitimere kinde ma jucoko Jukristu ma juwiro pi nidok i polo? Poy  nia Yesu re m’utie Jakwac mwa. Etie bende wic mi cokiri mi Jukristu. Eyero kamaleng’ kumae: “Jatelwic mwu en acel, Kristu.” (Mat. 23:10) Tic p’Ubimo mwa ma kawoni mʼubebimo, bivoye ngo nyanok de. Calu ma Kristu bimaku lembe i cinge, julub pare m’iwi ng’om gibibedo mbe ku thelembe mi lworo gin moko acel de. Andha re, wang’eyo ngo lembe ceke iwi kite ma Kristu bitelo ko wi dhanu pare i saa maeca. Dong’ wakenenu lapor moko mi Biblia ma copo tielo cwinywa.

12. Yehova ugam ugwoko dhanu pare nenedi (a) i ng’ey tho pa Musa? (b) i ng’ey ma Eliya unwang’u tic mange? (Nen bende cal.)

¹² Tap i wang’ ma Juisrael gibecimondo i Ng’om mi lembang’ola, Musa utho. Lembang’o m’unwang’u dhanu pa Mungu? Saa ma won bedopwe maeno utho, nyo Mungu uweko ginen i wang’gi? Ungo. I nindo ceke ma gigwoko bedoleng’ migi ire, ekonyogi. I wang’ tho pa Musa, Yehova ukwaye nia eketh Yocuwa ni jatelwic mi dhanu pare. Nwang’u dong’ eponjo Yocuwa pi oro ma dupa. (Ai 33:11; Poy. 34:9) Bende, jumaco mange dupa ma giromo de gibino jutelwic; gibino judongo mi dhanu elufu, mi dhanu dak, mi dhanu pier abic, man kadok mi dhanu apar. (Poy. 1:15) Andha, dhanu pa Mungu ginwang’u gwok ceke ma gibino ku yenyne. Lapor pa Elica bende ubeponjowa ku lembe ma rom. Etelo wi thier ma leng’ i kind Juisrael pi oro m’ulwar. Ento saa ugam uromo ma Yehova uore i iye i tic mange yo piny mi Yuda. (2 Ub. 2:1; 2 Kei. 21:12) Nyo Yehova ugam uwenjo weg bedopwe mi suru apar mir Israeli? Ungo. Nwang’u dong’ Eliya udaru ponjo Elica pi oro dupa. “Wot jubila” de gibino nuti; copere nia gibino i ungu mi kalasi moko. (2 Ub. 2:7) E kumeno, weg bedopwe dupa gibino nuti pi nitelo wi dhanu pa Mungu. Lembakeca pa Yehova umedere i wang’e, man egwoko bende jutic pare ma weg bedopwe.

13. Juebrania 13:5b ubemiyo iwa tielocwiny ma kani? (Nen bende cal.)

¹³ Nimakere ku lapor maenogi, iparu nia ang’o ma bitimere kinde ma jucoko dong Jukristu ma tokcen ma juwiro pi nidok i polo? Wambe ku thelembe mi dieng’ hai i kum lembuno. Biblia unyutho lemandha ma yot man ma tielo cwiny ma e: Yehova biweko ki ngo dhanu pare m’iwi ng’om. (Som Juebrania 13:5b.) Tap calu  Musa gikud Eliya, ungu ma nok mi Jukristu ma juwiro ma gibetelo wi dhanu pa Mungu tin de ginyang’ nia pire tie tek lee niponjo (nitendo) jumange. Udoko pi oro ma dupa kawoni m’umego mi Guriri m’utelowic gibeponjo umego m’i kind rombe mange ku kite mi telo wi dhanu pa Mungu. Ku lapor, gipangu pi somo dupa pi niponjo judong cokiri, juliew mi twodiri, umego mi Komite mi filial, umego ma gi jutelwic i Bethel, jumisioner, ku jumange. Umego mi Guriri m’utelowic gin gigi de gibeponjo jukony mi komite ma tung’ tung’ mi Guriri m’utelowic. Kawoni jukony maeno gibepong’o ma ber mandha rwom ma pek ma jumiyo i korgi. Judaru lilogi cuu kara gidok gimak tic mi gwoko rombe pa Kristu.

14. Paru ma kani ma pire tek m’ukwayu wagwoki?

¹⁴ Nitundo kawoni, paru ma pire tek m’ukwayu wagwoki ni e: Kinde ma jucoko dong Jukristu ma tokcen ma juwiro pi nidok i polo ceng’ini i ajiki mi masendi ma dit, dhanu pa Yehova ma gidong’ iwi ng’om gibimediri ku thier ma leng’ i the telowic pa Yesu Kristu. Andha re i saa maeca, thek ma bidikiri ma Biblia ulwong’o Gog mi Magog biloy i wiwa ku lwiny. (Eze. 38:18-20) Ento lwiny maeno ma biting’o kare ma nok kende, birombo ngo; ebicero ngo dhanu pa Yehova nitimo ire thier. Ebibodhogi kwa! I gin ma wok i wang’ moko, jakwenda Yohana uneno “udul ma dit” mi rombe mange pa Kristu. Juyero ni Yohana nia “udul ma dit” maeno uai “kud i masendi ma dit.” (Nyu. 7:9, 14) Andhandha, gibibedo museme!

15-16. Nimakere ku Lembanyutha 17:14, Jukristu ma juwiro gibitimo ang’o i saa mi lwiny mi Armagedon, man pirang’o eno tie lembe mi tielocwiny ma lee?

¹⁵ Re asu jumoko giromo penjiri kumae: ‘Ka dong’ Jukristu ma juwiro ke? Gin gibilund timo ang’o i ng’ey ma giweko ng’omi?’ Biblia udwoko wang’ penji maeno i ayi ma terere. Enyutho nia jubim mi ng’om maeni “gibikiedo i dhu Nyathi rombo.” Ento lwiny bivoyogi, kum Biblia umedo nia ‘Nyathi rombo biloyogi.’ Jukani  ma bikonye? Biblia udwoko nia utie “ju ma julwong’o,” “ma jung’iyo,” man “ma gigwoko bedoleng’ migi.” (Som Lembanyutha 17:14.) Ju maenone gi ng’agi? Gitie ju ma juwiro ma gicer! Pieno, kinde ma juting’o dong Jukristu ma juwiro ma fodi gin’iwi ng’om pi nidok i polo ceng’ini i ajiki mi masendi ma dit, tic migi ma kwong’a ma gibiwok timo bibedo nikiedo lwiny. Etie tic mi wang’uic ma lee! I kind Jukristu ma juwiro, jumoko gibed gikiedo lwiny i wang’ nidoko Jumulembe pa Yehova. Jumoko gitimo kadok i kind udul mony mi ng’om maeni. Ento i ng’eye, gidoko Jukristu mandha man giponjo nikwo ku kwiyocwiny. (Gal. 5:22; 2 Thes. 3:16) Giketho lwiny mi kum cen. Re i ng’ey ma gibiidho i polo, gibidikiri karacelo ku Kristu man jumalaika ma leng’ pi nikiedo lwiny ma tokcen i dhu judegi pa Mungu.

¹⁶ Kepar nyanok! Kud iwi ng’om, Jukristu moko ma juwiro gidaru tii kobokobo, man tego de mbe i kumgi. Ento i ng’ey ma gibicer pi nicikwo i polo, gibidoko giracwiya mi tipo ma tek ma tho ngo, man gibikiedo karacelo ku Yesu Kristu ma Jatel wi mony migi ma dit. I ng’ey ma lwiny mi Armagedon uthum, gibidikiri i tic mi konyo dhanu gidok pwe. M’umbe jiji, kud i polo gibitimo bero dupa dit ni umego ku nyimego migi ma jumer ma gin’iwi ng’om, nisagu bero ma nwang’u giromo timo kinde ma gitie dhanu m’utie ku dubalaga.

17. Wang’eyo nenedi nia dhanu pa Mungu gibibedo museme i saa mi lwiny mi Armagedon?

¹⁷ Nyo itie acel m’i kind rombe mange? Tek eyo, bikwayu itim ang’o kinde ma lwiny ma pire tek mi Armagedon bicaku? Kende kende lembe ma e: Gen Yehova, man wor telowic pare. Eno uketho i iye ang’o? Biblia uyero wec mi tielocwiny ma e: “Mond i kusika peri, man icik dhugola peri i wii: pond i nindo ma nyagwil, maram ng’ecwiny ukadh ko.” (Isa. 26:20) Jutic pa Mungu ceke mi polo ku mi ng’om zoo, gibibedo museme i saa maeca. Tap calu jakwenda Paulo, wan bende cwinywa tek nia kadok “bimobim, kadi gin ma nuti kawoni, kadi gin ma bibino . . . bicero ngo Mungu ku maruwa.” (Rum. 8:38, 39) Bed ipoy saa ceke nia Yehova umeri, man nia ebiweki ki ngo!