1. O polong manilnilay no fangcalay saocor a Krisciyang hahacowa tayra i kakarayan a masaˈopo?

 ˈAYAW no adihayay mihecaan, iraay ko sasa no finawlan ni Yihofa, ‘o polong manilnilay no fangcalay saocor a Krisciyang hahacowa tayra i kakarayan hani?’ Iˈayaw miharateng kita, itini ikor no Armakiton a lalood, o papina manilnilay no fangcalay saocor a Krisciyang wa itiniho fafekang no sera a Lakoing maˈorip to cecay liyad alatek. Nikawrira mikitini 2013 miheca saka 7 folad 15 romiˈad a Mikecolay mananamay ita, itini ˈayaw no Armakiton a lalood, polong maˈoripayho i hekal a manilnilay no fangcalay saocor a Krisciyang mamasaˈopoto tayra i kakarayan.​​—⁠Matay 24:⁠31.

2. (1) O roma tamdaw alatek ira ko maanan sasa no falocoˈ hani? (2) Onini lalakaw mamilengo to maanan?

² Nikawrira, mifekaday ko roma salicay: Itini ‘taˈangayay padiing’ a tatokian, o madimadiay midoko ci Yihofaan a ‘roma lopayˈay siri’ tatahalifa to maanan hani? (Matay 24:21; Yohani 10:16) Ano awato i fafekang no sera ko manilnilay no fangcalay saocor a salikaka i, o roma lopayˈay siri a tamdaw o cacalemcem mafokil to sasamaan ko demak, malecad o mifalahan saan ko harateng han? O ilalomaˈay no roma lopayˈay siri romaroma tamdaw wa ira ko mahaenay a cariraw alatek. Onini lalakaw mamilengo maharatengay nangra alatek ko tosa maˈoningay i Fangcalay Cudad, dotoc mamifolfol hano cowa ko cacalemcem kita.

COWA KO MAMIFEKAD KO MAANAN A DEMAK?

3-4. O roma tamdaw alatek calemcemay to maanan? Misamaanay hani?

³ Calemcemay ko romaroma tamdaw alatek, ano awato ko sakayat no Malohemay Malitengay i Congpo, o roma lopayˈay siri mamiliyas to soˈlinay kimad hokira. Ira ko hatiniay a calemcem nangra, maharatengay ko pina maˈoningay i Fangcalay Cudad alatek. Nengnengen ita ko tosa tinakoan. Saka cecay tinakoan milingatay  to Taˈangayay Saysi ci Yihoyataan, o madimadiay sikawdan no Kawas cingra, malacafayay to fafahi ci Yihosipa midipot toya kaemangay a Yoasan, hanaca padama ci Yoasan malo madimadiay midoko to Kawas a ngaˈayay hongti. Maˈoripho ci Yihoyata i, ngaˈayay ko pidemak ni Yoas. Kawra ikor no mapatay ci Yihoyata, kalikiay ci Yoas misatapang midemak to kapiliˈan ni Yihofa a demak. Pakasoˈlinay cingra to mangah no ˈaˈideman no Yuta, miliyasay ci Yihofaan.​​—⁠2 Rayray 24:⁠2, 15-​19.

⁴ Saka tosa tinakoan milingatay to saka 2 hahekalan a Krisciyang. O tarokos ci Yohani o salikoray mapatay a tarokos, maˈoripho cingra padamaay to ˈalomanay Krisciyang madimadi ci Yihofaan. (3 Yohani 4) Malacafayayho cingra to romaroma madimadiay a tarokos micoˈay to misafelitay to kimad a ˈicel i kasakopang. (1 Yohani 2:​18; 2 Tisalonika 2:⁠7) Kawra mapatay ci Yohani ikor, o misafelitay a ˈicel mahecaday to namal kalikiay a midapdap. Ikor no pina miheca, masongilaˈayto mapohed ko kasakopang no Krisciyang.

5. Cowa ka ngaˈay kita mikitini toniya tosa maˈoningay no Fangcalay Cudad ira ko masamaanay a harateng hani?

⁵ Onini a tosa maˈoningay no Fangcalay Cudad paihkalay, noikor ano tayrato i kakarayan ko polong a manilnilay no fangcalay saocor a Krisciyang ikor, o roma lopayˈay siri wa malecad ko malifaay hokira? O mamahaen cangra ci Yoasan misatapang midemak to kapiliˈan ni Yihofa a demak, anca malecad to saka 2 hahekalan a ˈalomanay Krisciyang misatapang misafelit to kimad hokira? Co:wa ko mamahaen! Wa ngaˈay pakasoˈlin kita, o manilnilay no fangcalay saocor a Krisciyang ano tayrato i kakarayan ikor, o roma lopayˈay siri mamicada to sangaˈayay noka pidimokos, o papadadotoc madimadi midoko to Kawas. Hano ngaˈay kita mihaen a pakasoˈlin hani?

O MATATODONGAY A PIDOKO COWA KO MAMAPOHED

6. Mamifolfol kita to ihacowaay tolo a lalintadan?

⁶ Hano ngaˈay kita pakasoˈlin, soˈlin noikor itini kapasangaran a tatokian, o matatodongay pidoko cowa ko mamapohed hani? Samanen mahapinangayto ita mikitini i Fangcalay Cudad, itiniay kita i masamaanay a lintad nohatini. Onini a lintad cowa ka lecad to lintad no nolitengan a Israil ato saka 2 hahekalan a Krisciyang. Dotoc, songilaˈen ita minengneng ko pakayraan nonini tolo a lalintadan: (1) Nolitengan Israil tamdaw a lintad, (2) ikor no mapatay ko tarokos a lintad, (3) o lintad ita nohatini, ‘miliyaway tomireng ko matatodongay pidoko a lintad.’​​—⁠Dmak 3:​21.

7. Itini nolitengan, soˈlin ˈalomanay a hongti no Israil ato Israil tamdaw midemakay to kapiliˈan ni Yihofa a demak, kawra o madimadiay tamdaw hano cowa ka matoled ko falocoˈ hani?

⁷ Nolitengan Israil tamdaw a lintad. ˈAyaw no mapatay ci Mosi pasowalay to Israil tamdaw: ‘Ihkalay ko kafanaˈ ako ikor no mapatay kako, o mamidemak kamo to tatiihay a demak, miliyas to palimoˈotan ako tamowanan rarakaten a lalan.’ (Limoˈot 31:29) Mirikecay ci Mosi to Israil tamdaw, ano mitowakang cangra ci Yihofaan, o mamaholiw a mala koli. (Limoˈot 28:​35, 36) Onini a sowal ni Mosi soˈlinay a malaˈosi. Itini lalomaˈ no pina soˈot mihecaan, ˈalomanay hongti no Israil midemakay to kapiliˈan ni Yihofa a demak, ano Israilto a tamdaw mikotoday cangranan midemak to tatiihay. Telocto, misayfangan ni Yihofa koya tatiihay a finawlan, mihayi to ˈada miholiw cangranan, cowato papikowanen ko hongti no Israil to finawlan no Kawas. (Icikil 21:​25-​27) Kawra o madimadiay a Israil tamdaw pakaˈaraw to kalaˈosi no sowal no Kawas i, matongalay ko timolo padadotoc midoko ci Yihofaan.​​—⁠Isaya 55:⁠10, 11.

8. Mafanaˈ to mapoheday ko saka 2 hahekalan a kasakopang no Krisciyang, hano cowa ko mamacekid kita hani?

⁸ Ikor no mapatay ko tarokos a lintad. Kasakopang no Krisciyang i saka 2 hahekalan mapohedayto, cowa ko fafahkaˈ kita, samanen paˈayawayto ci Yis o mamifekad ko misafelitay to kimad a demak. (Matay 7:​21-​23; 13:​24-​30, 36-​43) Itini saka 1 hahekalan, tarokos ci Pawlo, ci Pitiro aci Yohani somowalay, misatapangayto malaˈosi  ko sapairasol ni Yis. (2 Tisalonika 2:​3, 7; 2 Pitiro 2:​1-3, 17-19; 1 Yohani 2:​18) Tahini saka 2 hahekalan, kasakopang no Krisciyang mapohedayto, misafelitay to kimad a Kristokiyo malenakay, masalalomaˈayto no Taˈangayay Papilon. O Taˈangayay Papilon o polong mararaway a pihakelongan no hekal ko mitoroˈan. Miliyaway aca malaˈosi ko sapairasol no Kawas.

9. O lintad ita ato nolitengan Israil a lintad, ato saka 2 hahekalan a kasakopang no Krisciyang a lintad, hano cowa ka lecad hani?

⁹ ‘Miliyaway tomireng ko matatodongay pidoko a lintad.’ O lintad ita ato nolitengan Israil a lintad, ato saka 2 hahekalan adihayay misafelitay to kimad a lintad cowa ka hecad. Mihaenay, panganganan no Fangcalay Cudad toniya lintad ita to maanan hani? Tangsol a maharateng ita ko ‘salikoray romiˈad’ no hekal ni Satan alatek. (2 Timoti 3:⁠1) Kawra paihkalay ko Fangcalay Cudad, misatapang ko ‘salikoray romiˈad’ i, o cecay kasapaan a lintad misatapangayto. Itini kahererekan no ‘salikoray romiˈad’ ikor, papadadotoc koniya kasapaan a lintad, tahira i pipadama no Misiya a Hongti Kitakit to tamdaw a malefot, hanaca palo lakoing to polong no cikiw. Onini a lintad panganganan no Fangcalay Cudad to ‘miliyaway tomireng ko matatodongay pidoko a lintad.’ (Dmak 3:​21) Onini a lintad mikitiniay 1914 miheca misatapang, itiya miliyaway ko Kawas patireng to maanan hani? Salakat, pala Hongtian ni Yihofa ci Yis itini i kakarayan. Mikitiya misatapang, ilalomaˈ no teloteloc no Hongti ci Tafiti, iraay aca ko cecay mikowanay mitaypiyaway ci Yihofaan. Cowa konini aca, caka halafin misatapangayho ci Yihofa miliyaw patireng to matatodongay pidoko! (Isaya 2:​2-4; Icikil 11:​17-​20) Ano mahaenay i, o matatodongay pidoko mamiliyawho a mapohed han?

10. (1) Pakayni i matatodongay pidoko, malaˈosiay nohatini ko maanan sapairasol no Fangcalay Cudad hani? (Isaya 54:17) (2) Oniya sapairasol hano pakalalokay kitanan hani?

¹⁰ ˈOsien ko Isaya 54:17. Haratengen ko pikayat no Kawas to tamdaw mitilidan a sapairasol: ‘O kihcod sapilood tisowanan a lalosidan, sahto awaay ko kapo.’ Malaˈosiay koniya sapairasol anini. Maˈarawayho ita ko kalaˈosi no ilaenoay mihinomay to tamdaw a sowal: ‘O wawa iso mamicada to sapasifanaˈ ni Yihofa, kakadofah ko rihaday no wawa iso. O moecelay papatanektek tisowanan. . . . Ano mananto cowa ko mamatalaw kiso, cowa ko mamacekid, cowa ko aira ko katalawan a demak.’ (Isaya 54:​13, 14) Matatodongay pidoko miliyawayto tomireng, hanaca cowato ko mamiliyaw a mapohed, ano o ‘kawas nonini a lekakawa’ ci Satan cowa ko papakaconged to mitosilay pasifanaˈay to tamdaw a tayal no finawlan ni Yihofa i paro no kakarayan. (2 Korinto 4:⁠4) Matatodongay pidoko o mamaterek, tahira i daˈodaˈoc. O kihcod sapilood tisowanan a lalosidan, sahto awaay ko kapo!

 MAMIFEKAD KO MAANAN A DEMAK?

11. Hano ngaˈay kita pakasoˈlin, manilnilay no fangcalay saocor a Krisciyang tayrato i kakarayan ikor, cowa ko mamafalah ko taˈangayay ˈopo a tamdaw?

¹¹ O manilnilay no fangcalay saocor a Krisciyang ano macada tayra i kakarayan ikor, mamifekad ko maanan a demak hani? Aka mapawan, o Pakaenay kitanan ci Yis, o ˈaˈideman no kasakopang no Krisciyang. Ihkalay ci Yis pasowal kitanan: ‘O ˈAˈideman namo cecayay aca, o ci Kristo.’ (Matay 23:10) O Hongti ita mikowanay i kakarayan nohatini, o lalahcien ningra ko tayal ningra. Ira cingra mikowan, itiniay i fafekang no sera soˈliˈlinay Krisciyang cowa ko mamatalaw. Pakayni sasamaan ci Kristo mikayat kitanan itiya, cowa ka songilaˈ ko kafanaˈ ita, kawra misimsim kita to pina maˈoningay i Fangcalay Cudad o rarihadayto ko falocoˈ ita.

12. (1) Mapatay ci Mosi ikor, samaanay ci Yihofa midimokos to finawlan no Niyah? (2) Maocor ci Iliya micada to faelohay ˈinorong ikor, samaanay ci Yihofa midimokos to finawlan no Niyah? (Nengnengen ko coka.)

¹² Itini ˈayaw no micomod ko Israil tamdaw to Mikiˈokan no Kawas sapafeli cangranan a Pala i, oya mikeriday cangranan a Mosian mapatayayto. Itiya, mifalahanto ko finawlan no Kawas han? Cowa. Madimadi cangra ci Yihofaan i, padotocay ci Yihofa midimokos cangranan. ˈAyaw no mapatay ci Mosi, palimoˈotan ni Yihofa ci Mosi minilnil ci Yosuwaan mikerid to Israil tamdaw, hanaca maherekayto pahatatanam ci Mosi ci Yosuwaan to pina poloˈ mihecaan. (Kasadakan 33:11; Limoˈot 34:⁠9) Roma i, ˈalomanay citanengay a faˈinayan ngaˈayay malo mikeriday, tinakoen iraay ko cecay a patek ko tamdaw, cecay a soˈot ko tamdaw, lima a poloˈ ko tamdaw ato moetep ko tamdaw to mikeriday. (Limoˈot 1:​15) Mihaenay, milifokay ko finawlan no Kawas to sangaˈayay a pidimokos. Nengnengen ko roma tinakoan. Cecay halafinay a tatokian, ci Iliya itini Kaˈamisay moetepay ngasaw a Israil kitakit padamaay to finawlan tano matatodongay a pakayraan midoko ci Yihofaan. Kawra ikor, miocoran ni Yihofa ci Iliya tayra i Katimolay a Yuta matayal. (2 Hongti 2:1; 2 Rayray 21:12) Itiya, o madimadiay midoko ci Yihofaan i Kaˈamisay a Israil kitakit mifalahanto han? Cowa, samanen iraayho ko ˈalomanay madimadiay faˈinayan ngaˈayay mikotay ci Iliyaan mikerid to finawlan no Kawas. Tinakoen ci Ilisa, maherekayto pahatatanamen ni Iliya to adihayay mihecaan. Iraayho ko cecay ˈopo milikakawaan a pairasolay. (2 Hongti 2:3 ato roma pihongyak.) Padadotocay ci Yihofa palaˈosi to araaw no Niyah, hanaca padadotocay midimokos to madimadiay midoko Cingranan a tamdaw.

13. Mikitini Hipray 13:5b makilimay ita ko maanan mihinomay to falocoˈ a soˈlinay kimad? (Nengnengen ko coka.)

¹³ Maherek minengneng tonini a tinakoan ikor, miharateng kiso ano tayrato i kakarayan ko polong manilnilay no fangcalay saocor a Krisciyang i, cowato ko mamilifok to sadimokos ko  fafekangay no sera a finawlan no Kawas han? Cowa ko cacalemcem kita. Ihkalay somowal ko Fangcalay Cudad: Co:wa ko mamifalah ci Yihofa to finawlan Ningra i fafekang no sera. (ˈOsien ko Hipray 13:5b.) Malecad ci Mosian aci Iliyaan, cipinangay ko Malohemay Malitengay i Congpo to kalimlaan ko pahatatanam to romaroma tamdaw. Adihayay a mihecaan, padotocay pahatatanam ko Malohemay Malitengay i Congpo to pinapina faˈinayan ilalomaˈ no roma lopayˈay siri, padama cangranan malo mikeriday i likakawa no Kawas. Tinakoen, milimasmasay ko Malohemay Malitengay i Congpo to adihayay pahatatanamay a demak, pahatatanam to malohemay malitengay, kasakilac kantok, Iing no Fenpo, kantok no Pitil, ato romaroma tamdaw. O Malohemay Malitengay i Congpo pahatatanamay to madimadiay ngaˈayay pakasoˈlinen a hadama nangra, midamaay cangra to Malohemay Malitengay i Congpo i kahacecay a kapot no iing misaysay to adihayay kalimlaan a tayal. Maherekayto cangra misaday padadotoc a midimokos to lopayˈay siri ni Kristo.

14. O manan ko mananamay ita a kalimlaan?

¹⁴ Komoden ko mananamay ita a kalimlaan: Ano mamaherekto ko taˈangayay padiing i, o maˈoripayho i fafekang no sera a manilnilay no fangcalay saocor a Krisciyang tayrato i kakarayan ikor, o matatodongay pidoko papadadotoc a materek itini fafekang no sera, samanen papadadotocen ni Yis Kristo mikerid ko finawlan no Kawas i fafekang no sera. Soˈliˈlin mamaˈodis no Makok a Kok (makomoday a kalo kitakit) ko finawlan no Kawas, kawra ora saˈodis cowa ko hahalafin ko toki, hanaca cowa ko mamalaˈosi cangra. (Icikil 38:​18-​20) Orira noka piˈodis cowa ko papakaconged to finawlan ni Yihofa padadotoc midoko Cingranan. O lalidongen no Kawas cangra! Itini i mapolosi no Paˈarawan, maˈaraway no tarokos ci Yohani ko ‘taˈangayay ˈopo’ no roma lopayˈay siri, pasowalan no coyoh ci Yohani: ‘Onini a tamdaw mikitiniay i taˈangayay padiing a masadak.’ (Paˈarawan 7:​9, 14) Mihaenay, o dadipayal a rihaday ko taˈangayay ˈopo a tamdaw.

15-16. Mikitini Paˈarawan 17:​14, itini Armakiton a lalood a tatokian, manilnilay no fangcalay saocor a Krisciyang mamidemak to maanan? Mafanaˈ tonini hano pakalalokay kitanan hani?

¹⁵ Nikawrira, saan miharateng ko roma tamdaw alatek: ‘Manilnilay no fangcalay saocor a Krisciyang tayra i kakarayan mamidemak to maanan hani?’ Ihkalay ko caˈof no Fangcalay Cudad. Sowal no Fangcalay Cudad o sifo no hekal  ‘malalooday to Tofor a Siri,’ kawra o mamasongilaˈ a mapadik cangra, samanen ‘papakalowid ko Tofor a Siri cangranan.’ Itiya, o cima ko kakalacafay to Tofor a Siri milood hani? ‘Oyaan matahidangay ato mipiliˈan no Kawas madimadiay a tamdaw.’ O patikolay maˈorip manilnilay no fangcalay saocor a Krisciyang cangra. (ˈOsien ko Paˈarawan 17:14.) Mihaenay, o polong manilnilay no fangcalay saocor a Krisciyang masaˈopoto tayra i kakarayan ikor, salakatay hademak nangra o mamilood. O mikiriwiˈay a ˈinorong konini! O romaroma manilnilay no fangcalay saocor a Krisciyang ˈayaw no malo Misawacayay Tamdaw ni Yihofa i, mananamay tano milooday a misaysay to pasangaray, o roma tamdaw mala sofitayay. Ikor malo soˈliˈlinayto a Krisciyang cangra, minanamay dipayal a malacafay to tamdaw, cowato ka pidama cangra to lalood no hekal. (Kalatiya 5:​22 ato roma pihongyak; 2 Tisalonika 3:​16 ato roma pihongyak.) Kawra patikol maˈorip cangra tayra i kakarayan ikor, wa malacafay ci Kristoan ato coyoh itini i salikoray a lalood palaˈafo to ˈada no Kawas.

¹⁶ Haratengen hena, o romaroma manilnilay no fangcalay saocor a Krisciyang nohatini matoˈasayto, tada malonayayto ko tireng. Kawra patikol maˈorip cangra i kakarayan ikor, tangsolay malo taˈangayay ko ˈicel, tahadaˈoc caayto ka patay a ˈadingoan a tireng. Wa malacafay to Hongti ci Yis Kristo a milood. Mahererek ko Armakiton a lalood i, wa malacafay cangra aci Yis mikayat to tamdaw palidlid sa patikol malefot. Awaay ko hasasa, tayra cangra i kakarayan o midemakan saki kaolahan nangra a salikaka, ikakaay ko nika adihay to midemakan nangra i fafekangho no sera, samanen nohatini o malefotayto a ˈadingo a tireng cangra.

17. Hano mafanaˈ kita, itini Armakiton a lalood a tatokian, o madimadiay a sikawdan no Kawas o rarihaday maemin?

¹⁷ Masalalomaˈay no roma lopayˈay siri kiso han? Ano hatiraay i, ano mifekad ko Armakiton a lalood i, mamidemak kiso to maanan hani? Tadiˈecen ci Yihofa, tengilen ko sakayat Ningra. Alatek mahawpay ko pihakelong to limoˈot no Fangcalay Cudad: ‘Ka picomod i lomaˈ namo, ˈedefen ko fawahan. Milimek to cecay liyad, tahira i kafasawan no keter.’ (Isaya 26:20) Polong a madimadiay sikawdan no Kawas, ano ikakarayanto anca ifafekang no sera, o rarihaday cangra tora tatokian. Malecad to tarokos ci Pawloan pakasoˈlinen ita, ano ‘o sifoto, aniniayto a demak, noikoranto a demak . . . cowa ko papakaconged to olah no Kawas kitanan.’ (Loma 8:​38, 39) Aka mapawan, tada maolahay ci Yihofa tisowanan, tahadaˈoc co:wa ko mamifalah tisowanan.