1. Pu cristiano ngümintungelu, ¿chumül mülepoai huenu mu?

 CUIFI mu, Jehová ñi pu che ramtuuquefui: “¿Chumül am com pu dullin cristiano mülepualu ta huenu?”. Cuifi raquiduamquefuiñ deu rupale Armagedón, quiñeque dullinque cristiano mülecayaingün mapu mu pichiñma mu. Huelu feula quimiyiñ ñi femnoal. La Atalaya tripalu 15 conchi julio 2013 tripantu quimeltueiñmu: petu tañi acunon Armagedón, com pu dullinque cristiano mülepuaingün ta huenu (Mat. 24:31).

2. ¿Chem ramtuhuabüiñ? ¿Chem ngüneduamaiñ tübachi papiltun mu?

² Quimfiel mu ñi mülehuetunoal tati pu dullin cristiano, ramtuhuafuiñ: “¿Chem dungu meu rupayaingün tati pu ‘caquelu ufisa’ ti ‘fütra cutrancahun’ mu?” (Juan 10:16; Mat. 24:21). Quiñeque peñi, lamngen raquiduamafuingün inei no rume tañi adnienoaeteu, feimu huesa duamcüleafuingün. Papeltufiel Biblia mu ñi rupan Jehoás ca tati pu cuifique cristiano, raquiduamcülehueingün. Feula doi peafiyiñ tüfachi epu nütram ca chumngelu ngelai taiñ llicaleal mülehuetunole pu dullin cristiano.

¿CHEM DUNGU UPALAAI?

3, 4. Quiñeque che, ¿chem ramtuhuabingün ca chemu?

³ Quiñeque ramtuhuafuingün chi: “Mülehuenole mapu mu ti Troquiñ Adniechequelu, ¿püntütripapeaingün  mai Jehová mu ti caquelu ufisa?”. ¿Chemu femngechi raquiduamqueingün? Biblia mu mülei epu nütram. Lalu tati loncolequefulu, tati pu che püntütripaingün Jehová mu. Hune nütramcayaiñ Jehoás mu. Quisu tremümeyu ti lonco sacerdote Jehoiadá ca tañi domo. Ti lonco sacerdote cüme poyequefi ta Jehová, feimu quellufi ta Jehoás ñi ca femngechi femal ca ñi cüme lonco ülmen-ngerpual. Ti lonco sacerdote mongelelu, Jehoás serfiniefi ta Jehová ca cümeque dungu femi. Huelu lalu ti lonco sacerdote, Jehoás allcütui huesaque ngülam, femngechi serfihuelafi ta Jehová (2 Crón. 24:2, 15-19).

⁴ Feula nütramcayaiñ chem ñi rupan tati pu cuifique cristiano. Caquelu pu apostol com lafuingün, Juan müten mülehuefui. Fei quellufi fentren cristiano ñi serfinieafiel ta Jehová (3 Juan 4). Juan nehuentu cüdahui ñi connoal coilaque quimeltun ti trahunche mu (1 Juan 2:18). Huelu lalu ta Juan, fentren cristiano eluhuingün ñi inayafiel tüfachi coilaque quimeltun. Quiñeque tripantu müten rupalu, trahunche mu quimeltungequei fentren coilaque quimeltun, feimu pu cristiano huesaque dungu femürpuingün.

5. Tübachi pu ngütram mu, ¿chem raquiduamlaabüiñ?

⁵ ¿Ca fempeaingün mai tati pu caquelu ufisa ngehuenole pu dullinque cristiano mapu mu? Jehoás reque, ¿püntütripapeaingün mai Chau Jehová mu? Pu cuifique cristiano reque, ¿inapeafingün mai coilaque quimeltun? ¡Femllelayaingün llemai! Iñchiñ cüme quimnieiñ mülehuetunole pu dullinque cristiano mapu mu, ti caquelu ufisa serfinieafingün ta Jehová ca nieaingün tañi adnieaeteu. ¿Chumngechi quimiyiñ? Peafiyiñ.

CHAU DIO TAÑI HUENUPÜRAMNGEL PODÜMNGELAAI

6. ¿Chem cüla dungu ngüneduamaiñ?

⁶ Pichiñma mu rupayaiñ huesaque dungu mu, huelu ¿chemu cüme quimnieiñ taiñ püntütripanoal Jehová mu? Biblia feipieiñmu taiñ mülen antü trürlai pu Israel che ñi antü mu ca tati pu cuifique cristiano. Feula peafiyiñ cüla dungu: 1) chem ñi rupan cuifi Israel mu, 2) chem rupai lalu pu apostol, ca 3) amulei chi antü ñi “huecünungetual com dungu” (Hech. 3:21).

7. Pu israelche ca tañi pu lonco ülmen bemlu hueyaque dungu, ¿chemu abeluulaabüingün pu israelche püntütripanolu Jehová mu?

⁷ Chem ñi rupan cuifi Israel mu. Pichi faltalu ñi layal Moisés, feipifi pu Israel che: “Cüme quimnien, deu tañi lan, eimün femaimün huesaque dungu. Eimün huichutripayaimün tati cüme rüpü iñche tañi feipicünuel” (Deut. 31:29). Ca feipifi famentufilmün ta Jehová, yengeaimün caque mapu mu (Deut. 28:35, 36). ¿Femtripai tañi feipiel ta Moisés? Femi llemai. Fentrenque tati pu rey feyentulafingün ta Jehová, ca femngechi inayentueyu caquelu pu Israel che. Feimu Jehová castigafi tati pu Israel che, fei eluhuelafi tañi nieal engün ta quiñe rey (Ezeq. 21:25-27). Huelu tati pu Israel che püntütripanolu Jehová mu, müna yafültucuhuingün pefilu ñi huechutripamequen Jehová tañi feipicünuel (Is. 55:10, 11).

8. Epungechi siglo mu tati cristiano trahunche podcahui, ¿chemu amatul-laiñmu?

 ⁸ Chem rupai lalu pu apostol. Rupachi tripantu mu, tati pu cuifique cristiano püntütripaingün Jehová mu, huelu tüfa afmatulquelaeiñmu. ¿Chemu am? Jesús deu feipicünui tañi peufaluhual fentren coilaque cristiano (Mat. 7:21-23; 13:24-30, 36-43). Quiñeque tripantu rupalu, pu apostol Pablo, Pedro ca Juan feipingün ñi ruparupangen ñi feipicünuel Jesús (2 Tes. 2:3, 7; 2 Ped. 2:1; 1 Juan 2:18). Pu cristiano elcünufilu ti rüf dungu coneltuingün ti Fütra Babilonia mu, tüfa tati coilaque religion. Femngechi tripai ñi feipicünuel ta Jesús.

9. Taiñ antü ca tati epu dungu taiñ ngüneduampel, ¿chemu trürlaingün?

⁹ Amulei chi antü ñi “huecünungetual com dungu”. Taiñ mülen antü, trürlai tati pu cuifique Israel che ñi antü mu ca pu cuifique cristiano mu. ¿Chemu feipiafuiñ? Biblia feipieiñmu fantepu mu amulei feichi antü ñi “huecünungetual com dungu” (Hech. 3:21). Feichi antü coni 1914 tripantu mu, ca fentepuhuai afle ti huaranca tripantu ñi ngünenietual ta Jesús. Feichi mu com pu che culpan chengehuelayai, ca com ti mapu adcületuai. ¿Chemu feipiafuiñ 1914 tripantu mu coni ñi huecünungetual com dungu? Feichi mu Jesús loncocünungei huenu mu, femngechi ca huiño mületui quiñe rey Jehová tañi dulliel. Rupachi tripantu mu, Jehová adcünui tañi huiño poyengetual chumngechi tañi ayünieel quisu (Is. 2:2-4; Ezeq. 11:17-20). Felei llemai, Jehová amulei ñi huecünutufiel com dungu.

10. 1) ¿Chem eipi Biblia ñi upaal taiñ antü mu? (Isaías 54:17). 2) ¿Chemu yabültucuqueiñmu tüba?

¹⁰ (Papeltunge Isaías 54:17). Tüfachi versiculo feipilei: “Chumngechi rume hueichangelmi, hueungelayaimi”. Isaías ca feipicünui: “Com tami pu fotüm ca pu ñahue enseñanietuaeyu ta Jehová, ca quisu engün rume cüme feletuaingün. Cüme nehuencüleaimi tati nor dungu mu. [...] Chem rume llicalcalayaimu. Tati llican dungu fülcontulayaimu rume” (Is. 54:13, 14). Com feitachi dungu huechutripamequei fachantü. Tati Huecüfü ngünenielu rume ti mapu, pepi catrütuquelaeiñmu taiñ quimeltucheal Chau Jehová mu (2 Cor. 4:4). Jehová tañi pin mu, turpu fentecünulayaiñ  taiñ serfiafiel catrütungeliyiñ rume.

¿CHEM DUNGU UPAAI?

11. Yengealu hula pu cristiano ngümintungelu huenu mu, ¿chemu cüme quimniiñ elcünongelaaiñ?

¹¹ ¿Chem rupayai yengele pu dullinque cristiano huenu mu? Quisulelayaiñ. Jesús fei taiñ adnieteu ca tati loncolelu ti trahunche mu. Jesús feipi: “Quiñe Ñidol müten nielu cai eimün, tati Cristo” (Mat. 23:10). Jesús rumel cuidanieai tañi pu serfiqueteu. Cristo am cuidanieteu iñchiñ, feimu pu caquelu ufisa llicalelayai mülehuetunole pu dullinque cristiano mapu mu. Iñchiñ com quimlaiñ ñi chumal ta Jesús feichi mu, huelu tüngcüleafuiñ, ¿chemu? Peafiyiñ quiñeque dungu rupalu cuifi mu.

12. 1) Lalu hula Moisés, Jehová, ¿chumngechi cuñiutubi tañi pu che? 2) Huercübilu Elías ca mapu mu, ¿chumi Jehová? (Pebinge tati adentun).

¹² Moisés adniequefui tati pu Israel che, huelu lai petu ñi conpunon engün ti Feipicünuelchi Mapu mu. ¿Quisulehuepeingün mai? Femlai llemai. Tañi femmequen mu engün cümeque dungu, Jehová elcünulaeyu. Jehová feipifi ta Moisés ñi pepicayafiel ta Josué ñi adnieafiel pu Israel che. Fentren tripantu quiñentrür cüdahuingu (Éx. 33:11; Deut. 34:9). Ca mülefui fentrenque quimque huentru adniefilu doi pichique troquiñ Israel che (Deut. 1:15). Feimu feipiafuiñ, lalu rume ta Moisés, Jehová tañi pu che niefuingün tañi adnieteu. Ca femngechi dungu rupai Elías ñi antü mu. Fentren tripantu mu Elías quellufi pu Israel che ñi poyeafiel ta Chau Jehová. Huelu rupachi tripantu mu Jehová huercüeyu ca mapu mu (2 Rey. 2:1; 2 Crón. 21:12). ¿Quisulehuepeingün mai pu Israel che? Femlai llemai. Fentren tripantu mu Elías pepicamequefui ta Eliseo. Ca mülefui caquelu quimque huentru pepicangequelu ñi adnieafiel pu che (2 Rey. 2:7). Feimu taiñ ngüneduampeel, rumel mülequei huentru ñi adniefiel Jehová tañi pu che. Femngechi Jehová amulniei ñi cüdau ca cuidaniefi tañi pu che.

13. ¿Chem eipieiñmu Hebreos 13:5b? (Pebinge pu adentun).

¹³ Taiñ peel mu, ¿chem piafuiñ? Mülehuetunole pu dullinque cristiano  mapu mu, ¿chem dungu rupayai? Biblia feipi Chau Jehová chumcaunorume quisucünulayafi tañi pu che (papeltunge Hebreos 13:5b). Fachantü quiñe pichi troquiñ dullinque cristiano adnieiñmu, tüfa engün Troquiñ Adniechequelu cam Cuerpo Gobernante pingei. Chumngechi ñi femün ta Moisés ca Elías, ti Troquiñ Adniechequelu pepicaquefi caquelu pu huentru ñi adnieafiel Jehová tañi pu che, huelu feita engün coneltulelai tati pu dullinque cristiano mu. Feimu mülei fentren escuela ñi amual pu loncolelu, pu huitran-ngepaquechi loncolelu, pu adniequelu ta Betel ca caquelu quimque huentru. Tüfachi Troquiñ Adniechequelu ca quimeltuquefi quiñeque pu peñi ñi quelluaeteu ñi cüdau mu engün. Feitachi pu peñi deu adniequefingün fütraque cüdau, ca rume cüme enturpuquefingün. Feimu feipiafuiñ ñi pepicaucülen engün ñi adnieafiel Jesús tañi pu ufisa.

14. ¿Chem balin quimelün entuiñ tübachi papiltun mu?

¹⁴ ¿Chem doi falin dungu quimeltueiñmu tüfachi troquiñ mu? Tati pu dullinque cristiano yengele huenu mu, Jehová tañi pu che amuleaingün tañi serfinieafiel ta Jehová. Jesús adnieaeyu engün, feimu huiño huitraulayaingün ñi serfiafiel ta Jehová. Feichi mu, Jehová tañi pu che lefcontuaeyu quiñe troquiñque gobierno, Gog tuulu Magog pingelu (Ezeq. 38:18-20). Huelu Jehová tañi pu che hueungelayai, serfinieafingün müten ta Jehová. Quisu montulaeyu engün. ¿Chemu quimiyiñ? Quiñe vision mu, Juan pei quiñe “fütra troquiñche” mongetripalu ti fütra cutrancahun mu, tüfa engün tati caquelu ufisa (Apoc. 7:9, 14).

15, 16. Apocalipsis 17:14 ñi eipin, pu ngümintulechi cristiano, ¿chumaingün Armagedón hueichan mu? Ca, ¿chemu yabultucuqueiñmu tüba?

¹⁵ Huelu tati pu dullinque cristiano, ¿chumpuaingün huenu mu? Quellu  hueichayafingün ta Jesús. ¿Chemu feipiafuiñ? Biblia feipi tati pu gobierno “hueichayafi tati Cordero”, fei ta Jesús, huelu hueulayaingün. ¿Inei engün quelluntucuafi ta Jesús? Biblia feipi tati pu “mangelngelu, dullingelu ca manelfalngelu”, tüfa engün tati pu dullinque cristiano huenu mu mülelu (papeltunge Apocalipsis 17:14). Feimu com puule pu dullinque cristiano huenu mu, feipingeai tañi hueichayal engün. Raquiduamnge tüfa, quiñeque dullinque cristiano petu ñi testigongenon, quehuatufengequefuingün. Quiñeque engün amuquefuingün hueichan mu. Huelu cristianongetulu engün, famentufingün ti quehuan dungu, ñom chengerpuingün (Gál. 5:22; 2 Tes. 3:16). Huelu huenu mülepule engün, quiñehuai Jesús ca pu cümeque püllü engün ñi hueichayafiel Chau Dios tañi pu caiñe.

¹⁶ Quiñeque tati pu dullinque cristiano petu mülelu mapu mu müna füchafuingün, nehuen-ngehuelafuingün. Huelu amule ta huenu mu engün, lahuelayaingün, rume nehuen-ngetuaingün, feimu hueichayaingün Jesús engün. Deu rupale Armagedón, quelluafingün tati pu che ñi culpan chengehuenoal engün. Felei llemai, tati pu dullinque cristiano mülepule huenu mu engün, doi cüme quelluafingün tañi pu peñi ca pu lamngen mapu mu.

17. Armagedón hueichan mu, ¿chumngechi quimniiñ com pu cüdahuelquebilu Jehová montulngeaiñ?

¹⁷ Eimi coneltulelmi ti caquelu ufisa mu, ¿chumaimi acule ta Armagedón? Mülei tami maneluhual Jehová mu ca inayal com tami feipieteu Jehová. Feipingeafuimi chi tami inayafiel tüfachi versiculo: “Concülenge ponhui ti catrüntucu ruca mu, ca racümcünunge ti hulngiñ tami furi püle. Pichintu ellcaucülenge fentepuule ñi rupan tati fütra illcun” (Is. 26:20). Com pu serfiquefilu ta Jehová huenu ca mapu mu montulngeaingün Armagedón mu. Rüf maneluucüleiñ “chem no rume catrütulayafui Chau Ngünechen taiñ piuqueyeaeteu”, “chem gobierno no rume, ti müleyechi dungu ca cüpaleyechi dungu no rume” (Rom. 8:38, 39). Ngoimanentulayaimi, Chau Jehová piuqueyenieimu ca turpu elcünulayaimu.