1. ¿Kunapachas taqe ajllitanakajj alajjpachankjjapjjani?

 WALJA maranak nayrajja, Jehová Diosan servirinakapajj akham sasaw jisktʼasiyätanjja: “¿Kunapachas qhep qhepa ajllit cristianonakajj alajjpachar apatäpjjpachäni?” sasa. Mä tiempojja, inas mä qhawqha ajllit cristianonakajj Armagedón pasapjjchini, mä qhawqha tiempojj Paraisonkapjjchini sasaw amuyayätanjja. Ukampis Yatiyañataki 15 de julio de 2013 revistanjja, aka oraqenkir taqe ajllitanakajj janïr Armagedón qalltkipanwa alajjpachar apatäjjapjjani sasaw qhanañchasïna (Mat. 24:31).

2. ¿Kunjam jisktʼasiñas utjaspa? ¿Kunsa aka yatichäwin yatjjataskañäni?

² Ukampis akham sasaw jisktʼassna: “Aka oraqen Jehová Diosar servisipki, Criston ‘yaqha ovejanakapa’ sasin uñtʼatäpkaraki ukanakampejj ¿kunas ‘jachʼa tʼaqesiñ’ tiempon pasani?” sasa (Juan 10:16; Mat. 24:21). Ajllitanakajj jan aka oraqenkjjapjjani ukhajja, inas ‘yaqha ovejanakajj’ “¿kunsa lurañäni, khitis pʼeqtʼistani?” sasin jisktʼasipjjchini. Kunatsa ukham jisktʼasipjjaspa uk amuyañatakejj pä sarnaqäwit parlaskañäni. Kunatsa uka toqet jan llakisiñasäki uk amuyañatakejj mä qhawqha razonanakat amuytʼaskarakiñäni.

¿KUNAS JAN PASKANI?

3, 4. ¿Kunsa yaqhepajj jisktʼasipjjaspa, ukat kunatsa?

³ Cuerpo Gobernantenkirinakajj jan aka oraqenkjjapjjani ukhajj “¿yaqha ovejanakajj Jehová Diosar servisipkakiniti?” sasin inas yaqhepajj jisktʼasipjjchi. Kunatsa ukham jisktʼasipjje uk amuyañatakejj pä sarnaqäwit parltʼañäni. Nayrïrejj Jehoiadá sat jachʼa jilïr sacerdoten sarnaqäwipawa, jupajj Diosan mä suma serviripänwa. Jupampi Jehosabeat sat esposapampejj Jehoás sat yoqall wawaruw uywapjjäna, Diosat jan jitheqtir mä suma reyïñapatakiw yanaptʼapjjarakïna. Jehoiadá sacerdotejj  jakaskäna ukhakamajja, Jehoás reyejj janiw Jehová Diosat jitheqtkänti. Ukampis Jehoiadá sacerdotejj jiwjjäna uka qhepatjja, Jehoás reyejj jan walinakwa lurjjäna. Jan wali principenakan ewjjanakapwa katoqasïna, Jehová Diosarojj apanukjjarakïnwa (2 Crón. 24:2, 15-19).

⁴ Payïr sarnaqäwejj nayrïr pä patak maranakan jakir cristianonakan sarnaqäwipawa. Apóstol Juanajj walja cristianonakatakejj wali yateqaskañänwa. Jehová Diosat jan jitheqtapjjañapatakiw jupanakar yanaptʼarakïna, jupaw apostolonakat qhep jiwäna (3 Juan 4). Jesusat jan jitheqtir mayni apostolonakapjamarakiw Juanajj apostatanakar saykatañatak chʼamachasïna (1 Juan 2:18). Ukampis Juan apostolon jiwatap qhepat waljaniw congregacionanakan apostatanakan yatichäwinakapar arkjjapjjäna. Jutir maranakanjja, uka apostatanakajj kʼari yatichäwinak congregacionanakan yatichapjjäna, jan walinak utjayapjjarakïna.

5. ¿Kunsa uka pä sarnaqäwinakat jan amuyañasäki?

⁵ Ajllitanakajj alajjpachar apatäjjapjjani ukhajj ¿uka pachparakit Criston yaqha ovejanakampejj pasani? ¿Jehoás reyjamat Jehová Diosar apanukjjapjjani? ¿Nayrïr pä patak maranakan jakir cristianonakarjamat pasani, apostatanakan yatichäwinakaparut arkapjjani? ¡Janiw ukhamäkaniti! Jiwasajj janiw akat payachasktanti: janis aka oraqen ajllitanakajj utjkchinejja, yaqha ovejanakajj Jehová Diosar jan jitheqtas servisipkakiniwa, suma uñjatäpjjarakiniwa. ¿Kunjamatsa uk yattanjja?

JEHOVÁ DIOS SAPARUK ADORAÑAJJ JANIW QʼAÑUCHASKANITI

6. ¿Kuna kimsa tiemponakatsa yatjjataskañäni?

⁶ Jan wali urunakan jakkasas janiw Jehová Dios saparuk adorañajj qʼañuchaskaniti sasajj ¿kunatsa confiysna? Kuna laykutejj Bibliarjamajja, jakasktan uka urunakajj janiw israelitanakan tiempopjamäkiti ni nayrïr pä patak maranakan jakir cristianonakan tiempopjamäkisa. Ukatwa aka kimsa toqenakat yatjjataskañäni: 1) nayra Israel markan tiempopa, 2) apostolonakajj jiwjjapjjäna ukjjar jutir tiempo, 3) “taqe kun askichañataki tiemponakajj purinkani” uka pacha, mä arunjja jichha tiempo (Hech. 3:21).

7. Israel markas reyinakapas jan walinak lurapkäna ukhajj ¿kunatsa Diosat jan jitheqtir israelitanakajj jan desanimasipjjañapäkäna?

⁷ Nayra Israel markan tiempopa. Jiwañap jakʼajja, Moisesajj akham sasaw israelitanakar säna: “Nayajj sum yatta, jiwjjä uka qhepatjja jumanakajj cheqpachapuniw jan walinak lurapjjäta, nayajj sapksma uka thakitsa saranukupjjarakïtawa” sasa (Deut. 31:29). Dios contra saytʼasipjjäta ukhajj yaqha markar apatäpjjätawa sasaw Moisesajj jupanakar ewjjtʼäna (Deut. 28:35, 36). Moisesan arunakapajj phoqasïnwa. Walja patak maranakaw reyinakajj Dios contra saytʼapjjäna, markankirinakajj uka kikpwa lurapjjarakïna. Ukatwa Jehová Diosajj jan istʼasirinakar castigäna, janirakiw israelita reyinïpjjañap permitjjänti (Ezeq. 21:25-27). Ukampis Diosat jan jitheqtir israelitanakarojja, uka arunak phoqasir uñjañajj wal chʼamañchtʼäna (Is. 55:10, 11).

8. Nayrïr pä patak maranakan Diosan markapajj cheqa yatichäwinakat saranukkäna ukat ¿kunatsa jan mayjtʼasiñasäki?

⁸ Apostolonakajj jiwjjapjjäna ukjjar jutir tiempo. Nayrïr pä patak maranakan Diosan markapajj cheqa yatichäwinakat saranukkäna ukat janiw mayjtʼasiñasäkiti. Kuna laykutejj walja apostatanakaw utjani sasaw Jesusajj säna (Mat. 7:21-23; 13:24-30, 36-43). Nayrïr patak maranakanjja, apóstol Pablosa,  Pedrosa, Juanas kuntï Jesusajj siskäna uka arunakan phoqasiskatapwa qhanañchapjjäna (2 Tes. 2:3, 7; 2 Ped. 2:1; 1 Juan 2:18). Qhep qhepa apostolojj jiwjjäna uka qhepatjja, cristiano apostatanakajj Jachʼa Babilonia taypinkjjapjjänwa, Jachʼa Babiloniajj oraqpachankir falso religionanakawa. Kuntï Jesusajj siskäna ukaw phoqasiskäna.

9. Párrafos 7 y 8 ukanakan uñjaniwayktan uka tiemponakajj ¿kunatsa tiemposampejj jan igualäki?

⁹ “Taqe kun askichañataki tiemponakajj purinkani” uka pacha. Nayra Israel markan tiempopasa nayrïr pä patak maranakan apostatanakajj jiljjatkkäna uka tiemposa, janiw tiemposampejj igualäpkiti. ¿Jiwasajj jakktan uka tiempojj kunjam uñtʼatasa? Jilapartejj jan wali pachan ‘qhepa urunakapatwa’ uñtʼtanjja (2 Tim. 3:1). Ukampis Bibliajja, uka pachpa tiempon yaqha jaypach tiempo ukat wali wakiskir tiempow qallti sasaw qhanañchi. Ukajj “taqe kun askichañataki tiemponakajj purinkani” uka tiempowa (Hech. 3:21). 1914 maranwa qalltäna, Jesucristojj Diosan Reinopan apnaqjjani, aka oraqejj mä Paraisöjjani, jaqenakas perfectöjjapjjani ukhaw tukuyjjarakini. ¿Kunanaksa Jehová Diosajj 1914 maran askichäna? Jesusajj alajjpachanwa apnaqañ qalltjjäna, ukhamajj wasitatwa Jehová Diosajj jupar representañapatak mä apnaqer uttʼayäna, jupajj Diosat jan jitheqtir David reyit jutirïnwa. Janiw ukakïkänti. Mä jukʼa tiempotjja, Jehová Dios saparukiw wasitat adorasjjäna (Is. 2:2-4; Ezeq. 11:17-20). Ukajj ¿wasitat qʼañuchasispati?

10. 1) ¿Kunsa Bibliajj jichhürunakan Jehová Dios saparuk adorasiñapat qhanañchi? (Isaías 54:17). 2) Isaías libronkir profeciajj ¿kunatsa chʼamañchtʼistu?

¹⁰ (Isaías 54:17 liytʼäta). “Mä armatï jumar jan waltʼayañatak lurasini ukhajja, janiw ukajj kunatakis sirvkaniti” siski uka profeciat amuytʼañäni. Uka arunakajj jichhürunakanwa phoqasiski. “Taqe wawanakamajj Jehová Diosampi yatichatäpjjaniwa, wawanakaman sumankañapajj waljapunïniwa. Kunanakatï cheqapäki ukanak luratam laykojja jumajj suma uttʼayatäyätawa. [...] Janiw kunarus ajjsarkätati, janirakiw kunats wal ajjsarayaskätati, kuna laykutejj janiw ukajj jumar jakʼachaskaniti” siski uka arunakajj ukhamarakiw phoqasiski (Is. 54:13, 14). Jehová Diosan markapajj jaqenakar Diosat yatichaski uk janiw ‘akapachan diosapäki’ uka Supayas jarkʼkaspati (2 Cor. 4:4). Jehová Dios saparukiw wasitat adorasjje. ¡Janipuniw ukajj qʼañuchatäjjaniti! Janiw kuna armas jiwas contrajj sirvkaniti.

 ¿KUNAS PASANI?

11. Taqe ajllitanakajj alajjpachankjjapjjani ukhajj walja jaqenakat uñtʼatäpki ukanakajj janiw apanukutäpkaniti sasajj ¿kunatsa jan payachasktanjja?

¹¹ Ajllitanakajj alajjpachar apatäjjapjjani ukhajj ¿kunas pasani? Amtapjjapuniñäni, Jesusaw Awatirisajja, juparakiw cristiano congregacionan pʼeqtʼiripajja. Jesús pachpaw akham säna: “Maynikiw jumanakan Pʼeqtʼirimajja, jupasti Cristowa” sasa (Mat. 23:10). Alajjpachankir Jesucristo Reyisajj cuidapunistaniwa. Niyakejjay jupajj apnaqchinejja, aka oraqenkasipkani uka cristianonakajj janiw kunarus ajjsarapkaniti. Uka tiempon kunsa Cristojj Diosan markap laykojj lurani uk janiw sumpach yatktanti. Ukampis Biblian yaqhep sarnaqäwinakapaw uka toqet jan sint llakisiñatak yanaptʼistaspa. Uk jichhajj uñjañäni.

12. 1) Moisesajj jiwjjäna uka qhepat ¿kunjamsa Jehová Diosajj markapar uñjäna? 2) Eliasajj yaqha cheqar servir sarjjäna uka qhepat ¿kunjamsa Diosajj markapar uñjarakïna? (Dibujo uñjjattʼarakïta).

¹² Israelitanakajj janïr Suma Oraqer mantapkäna ukhaw Moisesajj jiwjjäna. ¿Kunas uka qhepat Diosan markapampejj pasäna? Diosat jan jitheqtir Moisesajj jiwjjäna ukhajj ¿sapaki jan khiti yanapirinit quedasipjjpachäna? Janiwa. Jehová Diosajj jupat jan jitheqtirinakarojj yanaptʼapunïnwa. Moisesan janïr jiwkipanjja, ‘Josué chachaw markan pʼeqtʼiripäjjani’ sasaw Jehová Diosajj säna. Juparojj Moisesaw walja maranak pʼeqtʼirïñapatak capacitäna (Éx. 33:11; Deut. 34:9). Ukhamarus markar irpañatakejj experienciani walja chachanakaw utjäna: 1.000, 100, 50 jaqenakar pʼeqtʼirinakaw utjäna, 10 jaqenakar pʼeqtʼirinakas utjarakïnwa (Deut. 1:15). Cheqas Diosan markapajj suma uñjatänwa. Jichhajj Eliasat parltʼarakiñäni. Jupajj walja maranakaw israelitanakarojj Diosar adorapjjañapatak yanaptʼäna. Ukampis mä kutejja, Jehová Diosajj Judá markat jukʼamp aynach toqeruw Eliasar khitäna (2 Rey. 2:1; 2 Crón. 21:12). Israelan tunka tribunakapajj ¿jaytanukutat uñjasipjjpachäna? Janiwa. Eliasajj walja maranakaw Eliseor capacitjjäna. Israelan tunka tribunakapar yanaptʼañatakejj ‘profetanakan yoqanakapas’ ukankapjjarakïnwa, amuyatajj jupanakajj yaqhep escuelanakan yatichatäpjjänwa (2 Rey. 2:7). Kunjamtï uñjktanjja, Diosan markapar irpañatakejj Diosat jan jitheqtir walja chachanakajj utjapunirïnwa. Ukhamajj Jehová Diosajj amtap phoqaskakïnwa, jupat jan jitheqtirinakarus uñjaskakïnwa.

13. Hebreos 13:5b texton ¿kunsa qhanañchistu? (Fotonak uñjjattʼarakïta).

¹³ Bibliankir uka sarnaqäwinakat amuytʼasajja, ajllitanakajj alajjpachar apatäjjapjjani  ukhajj ¿kunas aka oraqenkir Diosan servirinakapampejj pasani? Janiw uka toqet sint piensañasäkiti. Biblianjja, Jehová Diosajj janipuniw jupanakar jaytanukkaniti sasaw qhanañchistu (Hebreos 13:5b liytʼäta). Kunjamtï Moisesampi Eliasampejj lurapkänjja, ukhamarakiw Jehová Diosan markap irpapki uka ajllit cristianonakajj mayninakar capacitapjje, cheqas uk lurañajj jupanakatak wali wakiskiriwa. Cuerpo Gobernantenkir jilatanakajja, walja maranakaw yaqha ovejanak taypinkir jilatanakarojj pʼeqtʼapjjañapatak capacitasipki. Ancianonakaru, circuitonakaru, Comités de Sucursal ukankirinakaru, Betelankir superintendentenakaru, ukat yaqha ukhamanakar capacitañatakejj walja escuelanakaw utji. Ukhamarus Cuerpo Gobernantenkirinakajja, jupanakar yanaptʼapjjañapatakiw nayratpach wakichtʼasipki. Jupanakar yanapirinakajj walja lurañanakampiw wali sum phoqasipki. Ukhamajj Criston ovejanakapar uñjañatakejj suma wakichtʼatäjjapjjewa.

14. ¿Kunsa aka parrafot yateqtanjja?

¹⁴ Taqe ukanakajj ak amuyañatakiw yanaptʼistu: ajllitanakajj alajjpachar apatäjjapjjani, mä arunjja jachʼa tʼaqesiñajj tukuyañampïskani ukhajja, Jehová Diosan markapajj jan jitheqtasaw aka oraqen jupar adorasipkakini. Jesucriston Pʼeqtʼatajja, Diosan servirinakapajj nayrar sarantasipkakiniwa. Cheqas uka tiemponjja, mayachtʼat markanakaw Diosan markapar atacapjjani, Bibliarjamajj uka mayachtʼat markanakajj Magog oraqenkir Gog satawa (Ezeq. 38:18-20). Ukampis mä jukʼa tiempokiw atacapjjani, janiw uka kawsajj Diosan markapajj jupar adorañ jaytkaniti. Jehová Diosaw markapar salvani. Mä visionanjja, apóstol Juanajj Criston ‘yaqha ovejanakapa’ sasin uñtʼatäpki uka “walja jaqenakaruw” uñjäna, “jupanakajj jachʼa tʼaqesiñatwa mistunipjje” sasaw Diosajj jupar sarakïna. Ukhamajj jupanakajj salvasipjjaniwa (Apoc. 7:9, 14).

15, 16. Apocalipsis 17:14 textorjamajj ¿kunsa ajllitanakajj Armagedón guerran lurapjjani, ukat kunatsa ukajj chʼamañchtʼistu?

¹⁵ Inas akham jisktʼasirakstan: “Ajllitanakajj taqeni alajjpachankjjapjjani ukhajj ¿kunsa lurapjjani?” sasa. Bibliajja, aka mundonkir politiconakajj “Corderompiw nuwasipjjani” sasaw  qhanañchi, ukampis ‘Corderow jupanakar atipjani’ sasaw qhanañcharaki. ¿Khitinakas atipjañatakejj jupar yanaptʼapjjani? “Khitinakatejj jawsatäpki, ajllitäpki, jan jitheqtirïpki” ukanakaw yanaptʼapjjani siw Bibliajja, mä arunjja jiwatat jaktir ajllit cristianonakaw yanaptʼapjjani (Apocalipsis 17:14 liytʼäta). Ukhamajj taqe ajllitanakajj alajjpachankjjapjjani ukhajja, ¿ajllitanakan nayrïr asignacionapajj kunänisa? Nuwasiña. ¡Ukajj wali musparkañäniwa! Yaqhep ajllitanakarojj janïr Testigökasajj wal nuwasiñajj gustäna. Yamas yaqhepajj ejercitonkapjjänwa. Ukampis Criston arkiripäjjasajja, janiw nuwasirëjjapjjänti, mayninakamp sumankañwa yateqapjjarakïna (Gál. 5:22; 2 Tes. 3:16). Ukampis alajjpachankjjapjjani ukhajja, Cristompi ukat santo angelanakapamp chikaw Diosan enemigonakap contrajj qhep qhepa guerran nuwasipjjani.

¹⁶ Ak amuytʼañäni: aka oraqenkasipki uka ajllitanakat yaqhepajj wali jilïrëjjapjjewa, chʼama pistʼatäjjapjjarakiwa. Ukampis alajjpachan jakjjapjjani ukhajja, jan jiwir cuerponi wali chʼamani espiritunakäjjapjjaniwa, guerran nuwasir Jesucristo Reyimp chikaw nuwasipjjarakini. Armagedón guerra pasatatjja, taqe jaqenakaruw perfectöjjapjjañapatak yanaptʼapjjani. Cheqas alajjpachankjjasaw munat jilat kullakanakaparojj sum yanaptʼapjjani, janiw pantjasir jaqenakjamajj aka oraqen ukham yanaptʼañ puedipkaspati.

17. Diosan taqe servirinakapaw Armagedón guerran jarkʼaqatäpjjani, ¿kunjamats uk yattanjja?

¹⁷ ¿Jumajj yaqha ovejanak taypinkirïtati? Ukhamajj ¿kunsa wali importante Armagedón guerran luräta? Jehová Diosaruw confiyañama, instruccionanakaparuw istʼañamaraki. Inas kuntï Isaías 26:20 textojj siski uk lurañamächini, ukan akham siwa: “Nayan markaja, sarasin manqhäjjankir utanakamar mantam, punkunak llawkatasinim. Mä rat imantasim, Diosan colerasiñapajj pasañapkama” sasa. Uka tiemponjja, alajjpachansa aka oraqens Diosan servirinakapajj jarkʼaqatäpjjaniwa, uk yatiñajj wal chuymachtʼistu. Jiwasajj apóstol Pabljamarakiw aka toqet jan payachasktanti: “[Janiw] gobiernonakasa, ni kunanakatï jichhajj utjki ukanakasa, ni jutkani ukanakasa, [...] Diosan munasiñapat apaqkistaspati” (Rom. 8:38, 39). Ukhamajj janipun ak armamti: ¡Jehová Diosajj wal munastamjja, janipuniw jaytanukkätamti!