1. ?Blɛ benin nun yɛ be nga Ɲanmiɛn kpali be sieli be ngunmin’n be kwlaa be ti yía ɲanmiɛn su lɔ-ɔ?

 LAA’N, Zoova i sufuɛ’m be usa be wun kɛ: ‘?Blɛ benin nun yɛ be nga Ɲanmiɛn kpali be sieli be ngunmin’n be nun kasiɛn’n ɔ́ kɔ́ ɲanmiɛn su-ɔ?’ E buli i kɛ, kɛ Aamagedɔn alɛ’n ko sin mɔ asiɛ’n ko kaci lika klanman’n, atrɛkpa’n be nga be kpali be sieli be ngunmin’n be nun wie’m bé ká asiɛ’n su le nɲɔn kun. Sanngɛ afuɛ 2013, Zuie 1 Sasafuɛ Tranwlɛ’n kleli e kɛ be nga Ɲanmiɛn kpali be sieli be ngunmin mɔ be te o asiɛ’n su’n, be kwlaa bé kɔ́ ɲanmiɛn su kwlaa naan Aamagedɔn alɛ’n w’a bo i bo.—Mat. 24:31.

2. (1) ?Kosan benin yɛ e kwla fa usa e wun-ɔn? (2) ?Yɛ ngue yɛ é wá kɛ́n i ndɛ like suanlɛ nga nun-ɔn?

² Sran wie kwla usa kɛ: ‘?Yɛ Klisi i bua wie mun mɔ bé sú Zoova kpa ɲrɛnnɛn dan blɛ nun’n be li? ?Be liɛ yó sɛ?’ (Zan 10:16; Mat. 24:21) Aniaan wie’m be kwla koko. Afin be kwla bu i kɛ, kɛ be nga be kpali be sieli be ngunmin’n be ko wɔ ɲanmiɛn su’n, be su ɲanman sran naan w’a kle be atin kun. Maan e fa e ɲin e sie i Biblu’n nun ndɛ nɲɔn mɔ i ti yɛ be kwla bu i sɔ’n be su. Kpɛkun é wá kán sa nga ti yɛ ɔ fataman kɛ e koko’n i ndɛ.

SA NG’Ɔ SU JUMAN’N

3-4. (1) ?Akunndan benin yɛ sran wie’m be kwla bu-ɔ? (2)?Yɛ ngue ti yɛ be kwla bu i sɔ-ɔ?

³ Aniaan wie’m be kwla bu i kɛ sɛ e Anuannzɛ’n i Ɲrun Dinfuɛ’m be nunman lɛ kun naan b’a kle e atin’n, ɔ cɛman naan Zoova i sufuɛ’m b’a yaci ndɛ nanwlɛ’n i su falɛ. Atrɛkpa’n Biblu’n nun ndɛ wie’m be ti yɛ be bu i sɔ-ɔ. Maan e fa e ɲin e sie i ndɛ sɔ’m be nun nɲɔn be su. I klikli’n yɛle Zoyada m’ɔ ti Ɲanmiɛn ɲrun jranfuɛ dan’n i su ndɛ’n. Ɔ ti Ɲanmiɛn i sufuɛ kpa. I nun mɔ Zoasi te yo bakan’n, Zoyada nin i yi Zosabeati be sɛsɛli i. Yɛ be ukɛli i naan w’a yo famiɛn kpa. I nun  mɔ Zoyada i ɲin te o su’n, ɔ suli Zoova yɛ ɔ fali ajalɛ kpa. Sanngɛ kɛ Zoyada wuli’n, i osu w’a cɛman yɛ ɔ boli ajalɛ tɛ falɛ bo-ɔ. Zida lɔ sran dandan mɔ be suman Zoova’n be nuan ndɛ’n su yɛ ɔ fali-ɔ. Kpɛkun ɔ yacili Zoova sulɛ.—2 Ɲol. 24:​2, 15-19.

⁴ Ndɛ’n i nɲɔn su’n yɛle sa ng’ɔ juli Klisifuɛ klikli’m be blɛ su’n. Akoto’m be nun kasiɛn ng’ɔ wuli’n yɛle Zan. I nun mɔ Zan i ɲin te o su’n, ɔ ukali Klisifuɛ kpanngban naan b’a kpɔciman Zoova. (3 Zan 4) Kɛ nga akoto onga’m be fa yoli’n sa’n, Zan dili junman kekle kpa naan w’a sasa asɔnun mun. Ɔ yoli sɔ naan sran wie w’a faman ato ndɛ wie annzɛ ayeliɛ tɛ wie w’a wluman asɔnun’n nun. (1 Zan 2:18; 2 Tes. 2:7) Sanngɛ kɛ Zan wuli’n, asɔnun nunfuɛ’m be nun sunman be fali be nga be nin Ɲanmiɛn b’a bu’n be ajalɛ’n su. Kɛ ɔ́ kɔ́ i ɲrun’n sran sɔ mɔ be nin Ɲanmiɛn b’a bu’n, be like nga be kle’n, ɔ nin be ayeliɛ tɛ’n be sacili asɔnun’n mlɔnmlɔn.

5. ?Ngue ndɛ yɛ ɔ fataman kɛ e jran Biblu’n nun sa nɲɔn sɔ’m be su e kan-ɔn?

⁵ ?Biblu’n nun ndɛ sɔ’m be kle kɛ, kɛ be nga Ɲanmiɛn kpali be sieli be ngunmin’n be ko wɔ ɲanmiɛn su’n, Klisi i bua wie mun bé fá ajalɛ tɛ kɛ Zoasi liɛ’n sa? ?Annzɛ kusu be nin Ɲanmiɛn bé bú, kɛ nga i nun mɔ akoto’m be wuli’n, Klisifuɛ klikli’m be nun sunman be fa yoli’n sa? E kwla lafi su kɛ, kɛ be nga Ɲanmiɛn kpali be sieli be ngunmin’n be ko wɔ ɲanmiɛn su’n, Klisi i bua wie’m be su yaciman Zoova i sulɛ le. ?Ngue ti yɛ e kwla lafi su sɔ-ɔ?

ZOOVA I SUFUƐ’M BÉ SÚ I KPA TITI KƐ Ɔ FA KLO’N SA

6. ?Blɛ nsan benin yɛ é wá kán be ndɛ-ɔ?

⁶ ?Ngue ti yɛ e kwla lafi su kɛ kannzɛ sa kekle’m bé tɔ́ e su e ɲrun lɔ’n, Zoova i sufuɛ’n bé sú i kpa titi kɛ ng’ɔ fa klo’n sa-ɔ? Blɛ nga e o nun yɛ’n i su ndɛ nga Biblu’n kan’n, i ti yɛ e lafi su sɔ-ɔ. Sa ng’ɔ juli laa Izraɛlifuɛ’m be blɛ su’n, nin sa nga kɛ akoto’m be wuli’n ɔ juli’n, ɔ nin e blɛ su liɛ’n be timan kun. Maan e fa e ɲin e sie i blɛ nsan sɔ’m be su. I klikli’n yɛle Izraɛlifuɛ’m be blɛ su’n. I nɲɔn su’n yɛle blɛ mɔ akoto’m be wuli’n. Yɛ i nsan su’n yɛle “blɛ nga like kwlaa káci uflɛ’n,” yɛle kɛ e blɛ su.—Yol. 3:21.

7. ?Kɛ Izraɛli famiɛn mun nin nvle nunfuɛ’m be fali ajalɛ tɛ’n, ngue ti yɛ Izraɛlifuɛ nga be ɲin yi Ɲanmiɛn’n be sa sin w’a bubuman be-ɔ?

⁷ Izraɛlifuɛ’m be blɛ su. Kɛ Moizi wá wú’n ɔ seli Izraɛlifuɛ’m be kɛ: “N si jrɛiin kɛ, kɛ n ko wu’n, amún yó sa tɛtɛ mun. Kpɛkun amún yáci atin nga n kleli amun’n i su falɛ.” (Mml. 31:29) Moizi seli be ekun kɛ sɛ be yo ɲin kekle’n, be kpɔfuɛ’m bé trá be kɔ́ be nvle liɛ’n nun lɔ. (Mml. 28:​35, 36) Ndɛ sɔ’n kpɛnnin su sakpa. Kɛ ɔ́ kɔ́ i ɲrun’n, famiɛn sunman b’a yoman like ng’ɔ ti kpa Zoova ɲrun’n. Yɛ nvle nunfuɛ’m be nun sunman be niannin be ajalɛ’n su. I sɔ’n ti’n, Zoova tuli Izraɛlifuɛ’m be fɔ, yɛ w’a kplinman su kɛ be famiɛn’m be sie be kun. (Eze. 21:​25-27) Kɛ Izraɛlifuɛ nga be ɲin Ɲanmiɛn’n be wunnin kɛ ndɛ nga Ɲanmiɛn kannin’n ɔ kpɛnnin su’n, i sɔ’n wlali be fanngan naan b’a su Ɲanmiɛn kpa titi.—Eza. 55:​10, 11.

8. ?Ngue ti yɛ kɛ akoto’m be wuli mɔ sran wie’m be sacili asɔnun’n, i sɔ’n boman e nuan-ɔn?

⁸ Kɛ akoto’m be wuli’n, sran wie’m be wa sacili asɔnun’n. I sɔ’n kusu boman e nuan. Afin Zezi seli kɛ be nga be nin Ɲanmiɛn b’a bu’n bé wá sáci asɔnun’n. (Mat. 7:​21-23; 13:​24-30, 36-43) Akoto Pɔlu nin Piɛli ɔ nin Zan be kleli kɛ ndɛ nga Zezi kannin’n, ɔ boli su kpɛnlɛ bo be blɛ su. (2 Tes. 2:​3, 7; 2 Piɛ. 2:1; 1 Zan 2:18) Kɛ akoto’m be wuli’n sran wie’m be wa sacili asɔnun’n.  Klisifuɛ sɔ mɔ be nin Ɲanmiɛn b’a bu’n, be wa kacili Babilɔnin Klɔ Dan’n mɔ yɛle Ɲanmiɛn sulɛ wafa kwlaa nga be timan su’n be nunfuɛ. Ndɛ nga Zezi kannin’n ɔ kpɛnnin su sakpa.

9. ?Ngue yɛ ɔ kle kɛ e blɛ liɛ’n, ɔ nin laa Izraɛlifuɛ’m be blɛ liɛ’n, ɔ nin Klisifuɛ nga be nin Ɲanmiɛn be buli’n be blɛ liɛ’n, ɔ timan kun-ɔn?

⁹ Blɛ mɔ like kwlaa káci uflɛ’n. E blɛ liɛ’n ɔ nin laa Izraɛlifuɛ’m be liɛ’n ɔ timan kun. Asa’n ɔ nin be nga be nin Ɲanmiɛn b’a bu’n be blɛ liɛ’n ɔ timan kun. Blɛ sunman’n, e flɛ blɛ nga e o nun yɛ’n kɛ “mɛn’n i awieliɛ blɛ.” (2 Tim. 3:1) Sanngɛ Biblu’n kle kɛ blɛ kunngba sɔ’n nun’n, blɛ kun m’ɔ su wieman icra’n, ɔ boli i bo. Kɛ Klisi i famiɛn diwlɛ’n wá yó maan fɔ su tranman sran’m be nun kun mɔ asiɛ’n wá káci mɛn klanman’n, yɛ blɛ sɔ’n wíe-ɔ. Blɛ sɔ’n yɛ Biblu’n flɛ i kɛ “blɛ nga like kwlaa káci uflɛ’n” niɔn. (Yol. 3:21) Blɛ sɔ’n boli i bo afuɛ 1914 nun. ?Wafa sɛ yɛ like kwlaa kacili uflɛ afuɛ sɔ’n nun-ɔn? Yɛle kɛ be sieli Zezi famiɛn ɲanmiɛn su lɔ. Kɛ ɔ yoli sɔ’n, Zoova ɲannin siefuɛ kun m’ɔ kwla jrɛn i ja nun di famiɛn-ɔn. Siefuɛ sɔ’n ti famiɛn Davidi i aja difuɛ. Ninnge nga Zoova yoli maan be kacili uflɛ’n, nɛ́n i ngunmin yɛle Zezi i famiɛn dilɛ’n. Kɛ Zezi kacili famiɛn’n, Zoova ukɛli i sufuɛ nga be o asiɛ’n su wa’n naan be su i kɛ ng’ɔ fa klo’n sa. (Eza. 2:​2-4; Eze. 11:​17-20) ?Wafa nga e su Zoova mɔ i klun jɔ su’n sran wie’m bé wá sáci i ekun?

10. (1) ?Wafa nga bé wá sú Ɲanmiɛn kɛ ng’ɔ nin i fata’n sa’n e blɛ liɛ nga su’n, i su ndɛ benin yɛ Biblu’n kan-ɔn? (Ezai 54:17) (2) ?Ngue ti yɛ Biblu’n nun ndɛ kɛ ngalɛ sa’m be gua e awlɛn su nzue-ɔ?

¹⁰ An kanngan Ezai 54:17 nun. Ndɛ mma sɔ’n se kɛ: “Alɛ kunlɛ ninnge kwlaa nga be yi i kɛ bé fá yó ɔ like yaya’n, ɔ su yoman ɔ like fi.” Ndɛ sɔ’m be kpɛn su andɛ. Ezai kannin ndɛ kun ekun m’ɔ kpɛn su e blɛ su-ɔ. Ɔ seli kɛ: “Zoova wá klé ɔ mma’m be kwlaa be like, yɛ fɔundi nga ɔ mma’m bé wá dí’n, ɔ́ yó dan. […] A su sroman like fi, yɛ like fi su kunman ɔ srɛ, afin ɔ su mantanman wɔ koko.” (Eza. 54:​13, 14) Satan bɔbɔ m’ɔ ti mɛn nga i ɲanmiɛn’n, ɔ kwlá jranman junman nga Zoova i sufuɛ’m be di naan b’a kle sran’m be like’n. (2 Kor. 4:4) Zoova yoli maan i sulɛ kpafuɛ’n wa takali kpa ekun. Yɛ be su sacimɛn i kun. Ɔ́ ká lɛ tititi. Alɛ kunlɛ ninnge kwlaa nga be yili i kɛ bé fá yó e like yaya’n, ɔ su yoman e like fi.

?SA BENIN YƐ Ɔ́ WÁ JÚ-Ɔ?

11. ?Kɛ be nga be kplali be sieli be ngunmin’n be ko wɔ ɲanmiɛn su’n, sa benin yɛ ɔ́ jú-ɔ?

¹¹ ?Kɛ be nga be kpali be seli be ngunmin’n  be kwlaa be ko wɔ ɲanmiɛn su’n sa benin yɛ ɔ́ jú-ɔ? Nán e wla fi su kɛ Zezi yɛ ɔ ti e su nianfuɛ’n niɔn. I yɛ ɔ ti asɔnun’n i su kpɛn’n niɔn. I bɔbɔ seli kɛ: “Atin Klefuɛ’n ti kunngba cɛ, yɛle Klisi’n.” (Mat. 23:10) Zezi m’ɔ su di famiɛn’n ɔ́ wá níɛn i sufuɛ’m be su titi. Kɛ mɔ Zezi Klisi yɛ ɔ́ wá klé i sɔnnzɔnfuɛ nga be o asiɛ’n su wa’n be atin’n ti’n, srɛ su kunman be. I yo, e siman wafa nga Zezi Klisi wá klé i sɔnnzɔnfuɛ’m be atin blɛ sɔ’n nun’n. Sanngɛ maan e fa e ɲin e sie i Biblu’n nun ndɛ wie mɔ be kwla cici e wla’n be su.

12. (1) ?Kɛ Moizi wuli’n wafa sɛ yɛ Zoova niɛnnin i sufuɛ’m be lika-ɔ? (2) ?Yɛ kɛ be mannin Eli i junman lika uflɛ’n, wafa sɛ yɛ Zoova niɛnnin i sufuɛ’m be lika-ɔ? (An nian desɛn’n wie.)

¹² Kwlaa naan Izraɛlifuɛ’m b’a ju mɛn nga Ɲanmiɛn seli kɛ ɔ́ fá mán be’n nun’n, Moizi wuli. ?Kɛ ɔ yoli sɔ’n Ɲanmiɛn i sufuɛ’m be liɛ yoli sɛ? ?Kɛ Moizi wuli’n, Ɲanmiɛn yacili i sufuɛ’m be ukalɛ? Cɛcɛ. Blɛ kwlaa nga Izraɛlifuɛ’m be ɲin yili Zoova’n, ɔ niannin be lika titi. Kwlaa naan Moizi w’a wu’n Zoova seli i kɛ ɔ se Zozie kɛ i yɛ ɔ́ wá dún Izraɛlifuɛ’m be ɲrun siɛn’n niɔn. Moizi kleli Zozie like afuɛ kpanngban naan w’a kwla di junman sɔ’n. (Tul. 33:11; Mml. 34:9) Asa’n, yasua kpanngban wie’m be o lɛ mɔ be nian nvlefuɛ’m be su-ɔ. Wie’m be ti sran akpi su kpɛn, wie’m be ti sran ya su kpɛn, wie’m be ti sran ablenun su kpɛn, wie mun bɔbɔ be ti sran blu su kpɛn. (Mml. 1:15) Be niannin Ɲanmiɛn i sufuɛ’m be lika kpa. Sa kunngba sɔ’n juli Eli blɛ su. Eli miɛnnin i ɲin ukali Izraɛlifuɛ mun afuɛ kpanngban kpa naan b’a kwla su Zoova. Sanngɛ blɛ wie wa juli’n, Zoova fɛ i ɔli Zida i ngua lɔ lika’n nun naan ɔ ko di junman uflɛ. (2 Fam. 2:1; 2 Ɲol. 21:12) ?Kɛ ɔ yoli sɔ’n Ɲanmiɛn i sufuɛ nga be o Izraɛli akpasua blu’n nun’n, b’a ɲanman sran w’a kleman be atin kun? Cɛcɛ. Eli kleli Elize like afuɛ kpanngban naan w’a kwla di junman sɔ’n. Asa ekun’n “Ɲanmiɛn nuan ijɔfuɛ’m be mma mun” mɔ be kleli be like wie’n be o lɛ wie. (2 Fam. 2:7) Ɔ maan yasua nga be ɲin w’a ti Ɲanmiɛn sulɛ’n nun mɔ be kwla uka Ɲanmiɛn i sufuɛ mun’n, be diman be yalɛ. Zoova yoli naan i klun sa’n kpɛn su titi. Yɛ ɔ niɛnnin i sufuɛ nanwlɛfuɛ’m be lika titi.

13. ?Ndɛ benin yɛ ɔ o Ebre Mun 13:5b nun m’ɔ cici e wla-ɔ? (An nian foto’n wie.)

¹³ ?Kɛ a bu sa sɔ’m be akunndan’n, kɛ be nga Ɲanmiɛn kpali be sieli be ngunmin’n be ko wɔ ɲanmiɛn su’n, sa benin yɛ ɔ́ jú-ɔ? Biblu’n uka e naan y’a wun i wlɛ. Ɔ se kɛ  Zoova su yiman i sufuɛ nga be o asiɛ’n su wa’n be ase le. (An kanngan Ebre Mun 13:5b nun.) Kɛ Moizi nin Eli be sa’n, e Anuannzɛ’n i Ɲrun Dinfuɛ’m be wun i wlɛ kɛ ɔ ti cinnjin kɛ be kle aniaan’m be like. I afuɛ kpanngban yɛ, e Anuannzɛ’n i Ɲrun Dinfuɛ’m be kle aniaan yasua wie mɔ be o bua’m be wie’m be nun’n be like naan b’a kwla nian Ɲanmiɛn i sufuɛ’m be lika. I wie yɛle kɛ be siesieli suklu wie mun naan b’a kwla kle asɔnun kpɛnngbɛn mun nin akpasua sunianfuɛ mun, nin Betɛli komite’n i nunfuɛ mun, nin Betɛli lɔ junman’m be sunianfuɛ mun, ɔ nin sran wie mun ekun be like. Asa’n, Anuannzɛ’n i Ɲrun Dinfuɛ’m be kle be ukafuɛ’m be like naan b’a si junman fanunfanun nga be di be be komite’m be nun’n be di kpa. Kɛ é sé yɛ’n, be fali junman cinnjin wie mun wlali be ukafuɛ sɔ’m be sa nun. Ɔ maan sɛ be nunman lɛ kun’n, be ukafuɛ sɔ’m be kwla nian Zezi i bua fa’n i lika titi.

14. ?Ndɛ cinnjin ng’ɔ fata kɛ ɔ ka e klun’n yɛle benin?

¹⁴ Ndɛ cinnjin ng’ɔ fata kɛ ɔ ka e klun’n yɛ. Kɛ ɲrɛnnɛn dan’n ko ju i bue nuan’n, mɔ be nga be kpali be sieli be ngunmin’n be nun kasiɛn’n ko wɔ ɲanmiɛn su’n, Ɲanmiɛn i sufuɛ onga’m bé sú Ɲanmiɛn kɛ ng’ɔ nin i fata’n sa titi. Zezi m’ɔ ti asɔnun’n i su kpɛn’n i fanngan nun’n, Ɲanmiɛn i sufuɛ’m be sa su mianman like fi wun. Blɛ sɔ’n nun’n, nvlenvle mɔ be bo wá yó kun mɔ Biblu’n flɛ be kɛ Gɔgu m’ɔ fin Magɔgu’n, bé wá fá alɛ wlá e sin. (Eze. 38:​18-20) Sanngɛ i sɔ’n su kwlá yoman naan Zoova i sufuɛ’m b’a yaci i sulɛ. Ɔ́ wá dé be. Aolia nun’n, akoto Zan wunnin “sran kpanngban kpa.” Be seli i kɛ “sran kpanngban” sɔ’m b’a fin “ɲrɛnnɛn dan’n” nun b’a fite. (Ngl. 7:​9, 14) Ɔ maan e si kɛ Zoova wá dé be.

15-16. (1) ?Kɛ nga Sa Nglo Yilɛ 17:14 fa kan’n sa’n, ngue yɛ be nga Ɲanmiɛn kpali be sieli be ngunmin’n, bé wá yó i Aamagedɔn alɛ’n nun-ɔn? (2) ?Ngue ti yɛ ndɛ sɔ’n wla e fanngan-ɔn?

¹⁵ Sanngɛ sran wie’m be kwla usa kɛ: ‘?Yɛ be nga Ɲanmiɛn kpali be sieli be ngunmin’n be li? ?Kɛ be ko wɔ ɲanmiɛn su’n, ngue yɛ bé yó-ɔ?’ Biblu’n tɛ kosan sɔ’n su  trele. Ɔ se kɛ mɛn’n nun famiɛn’m be nin “bua ba’n bé wá kún alɛ.” Sanngɛ be su ɲanman jranwlɛ. Biblu’n se kɛ “bua ba’n kwlá be.” ?Sanngɛ wan mun yɛ bé wá úkɛ i-ɔ? Biblu’n se kɛ “be nga Ɲanmiɛn flɛli be’n” m’ɔ “kpali be’n” mɔ be ti “nanwlɛfuɛ’n,” yɛ bé wá úkɛ i-ɔ. (An kanngan Sa Nglo Yilɛ 17:14 nun.) Be sɔfuɛ mun yɛle be nga Ɲanmiɛn kpali be sieli be ngunmin’n, m’ɔ cɛnnin be mɔ be o ɲanmiɛn su lɔ’n. Ɔ maan kɛ ɲrɛnnɛn dan’n ko ju i bue nuan’n, mɔ be nga be kpali be sieli be ngunmin’n be nun kasiɛn’n ko wɔ ɲanmiɛn su’n, junman klikli nga bé dí’n yɛle alɛ kunlɛ. Nanwlɛ, nán junman kaan yɛ Ɲanmiɛn fa mannin be-ɔ. Be nga Ɲanmiɛn kpali be sieli be ngunmin’n be nun wie’m be kunnin alɛ kwlaa naan b’a kaci Zoova i Lalofuɛ. Wie mun bɔbɔ be dili sonja. Sanngɛ i sin’n be wa kacili Klisifuɛ, yɛ be suannin anuansɛ dilɛ. (Gal. 5:22; 2 Tes. 3:16) B’a kunman alɛ kun. Sanngɛ kɛ be ko cɛn be mɔ be o ɲanmiɛn su lɔ’n, be nin Zezi nin anzi’m be bo yó kun kpɛkun be nin Ɲanmiɛn i kpɔfuɛ’m bé kún alɛ kasiɛn’n.

¹⁶ Amun bu i akunndan be nian. Be nga Ɲanmiɛn kpali be sieli be ngunmin mɔ be o asiɛ’n su wa’n, be nun wie’m b’a yo oke. Yɛ be leman wunmiɛn kun. Sanngɛ kɛ be ko cɛn be mɔ be o ɲanmiɛn su lɔ’n, be kaci aolia nun sran mɔ be le wunmiɛn kpa-ɔ. Be nin Zezi Klisi m’ɔ ti Famiɛn’n mɔ i kunngba’n ti Safuɲrɛn’n bé kún alɛ likawlɛ. Kɛ be ko kun alɛ’n ko wie’n, be nin Zezi bé úka klɔ sran mun naan fɔ w’a tranman be nun kun. Nanwlɛ, blɛ sɔ’n nun’n, bé kwlá yó be niaan nga be o asiɛ’n su wa’n be ye dan trá blɛ mɔ be te o asiɛ’n su mɔ fɔ o be nun’n.

17. ?Ngue yɛ ɔ kle e kɛ Aamagedɔn alɛ’n nun’n, Ɲanmiɛn i sufuɛ’m be kwlaa bé fíte nun-ɔn?

¹⁷ ?Sɛ a o bua’m be wie’m be nun’n, kɛ Aamagedɔn alɛ bó i bo’n ngue yɛ ɔ fata kɛ a yo-ɔ? Like ng’ɔ fata kɛ a yo’n yɛ. Fa ɔ wla gua Zoova su yɛ nanti atin ng’ɔ kle wɔ’n su. ?Blɛ sɔ’n nun’n, ngue yɛ be kwla se e kɛ e yo-ɔ? Biblu’n se kɛ: “Amun wlu amun sua ba’m be nun, yɛ amun to amun sin anuan. Amun fia lɔ kan lele maan ya dan’n sin.” (Eza. 26:20) Blɛ sɔ’n nun’n Ɲanmiɛn i sufuɛ nga be o ɲanmiɛn su lɔ’n, ɔ nin nga be o asiɛ’n su wa’n, be kwlaa bé fíte nun. Kɛ akoto Pɔlu sa’n e lafi su kɛ ‘awa mun, annzɛ andɛ sa mun, annzɛ ainman sa mun be su kwlá yoman naan Ɲanmiɛn w’a kloman e kun.’ (Rɔm. 8:​38, 39) Maan ɔ wla kpɛn su titi kɛ Zoova klo wɔ naan ɔ su yaciman wɔ le.