1. Nuarin dadarahon sa langit an gabos na linahidan na yaon pa sa daga?

 SA NAKALIHIS na mga taon, naihahapot kan mga lingkod ni Jehova, ‘Nuarin dadarahon sa langit an natatada sa linahidan na mga Kristiyano?’ Iniisip ta kaidto na tibaad an nagkapira sa mga linahidan posibleng magdanay sa Paraisong daga nin pirang panahon pagkatapos kan giyera nin Armagedon. Pero sa Hulyo 15, 2013, na isyu kan An Torrengbantayan, nanudan niyato na an gabos na linahidan na yaon pa digdi sa daga bubuhayon sa langit bago magpuon an Armagedon.​—Mat. 24:31.

2. Ano an tibaad maihapot kan iba, asin ano an pag-uulayan ta?

² Minsan siring, tibaad may maghapot: Ano an mangyayari sa “ibang mga karnero” ni Cristo na maimbod na naglilingkod ki Jehova sa daga sa panahon nin “dakulang kasakitan”? (Juan 10:16; Mat. 24:21) An nagkapira sa ngunyan tibaad naghahadit kun ano an saindang gigibuhon pag an saindang namumutan na linahidan na mga tugang darahon na sa langit. Siyasaton ta an duwang pangyayari sa Bibliya na posibleng naiisip ninda. Dangan pag-ulayan ta an mga dahilan kun taano ta dai ta kaipuhan na maghadit.

ANO AN DAI MANGYAYARI?

3-4. Ano an tibaad maisip kan iba, asin taano?

³ Posibleng may mga nahahadit na tibaad bayaan kan ibang mga karnero an katotoohan pag mayo na an linahidan na mga tugang sa Namamahalang Grupo na magiya sa sainda. Tibaad naiisip ninda iyan huli sa nagkapirang pangyayari sa Bibliya. Pag-ulayan ta an duwang halimbawa. An inot iyo an manungod sa Halangkaw na Saserdoteng si Jehoiada. Saro siyang maimbod na lingkod nin Diyos. Siya saka an saiyang agom na si Jehosabet prinotektaran an sarong aking lalaki na si Jehoas asin tinabangan ini na magin sarong marahay asin maimbod na hadi. Kan buhay pa an may edad  nang si Jehoiada, marahay an ginigibo ni Jehoas. Pero pagkagadan ni Jehoiada, dai nahaloy nagin maraot si Jehoas. Nagdangog siya sa maraot na mga pamayo asin binayaan si Jehova.​—2 Cron. 24:2, 15-19.

⁴ An sunod na halimbawa iyo an mga Kristiyano kan ikaduwang siglo. Si apostol Juan, an huring natatadang buhay na apostol, sarong marahay na impluwensiya sa dakul na mga Kristiyano, na tinatabangan sindang makatagal sa saindang paglilingkod ki Jehova. (3 Juan 4) Arog kan ibang maimbod na mga apostol ni Jesus, medyo haloy nang pinagmamaigutan ni Juan na labanan an paglakop kan apostasya. (1 Juan 2:18) Minsan siring, pagkagadan ni Juan, marikason na luminakop iyan. Sa laog nin pirang dekada, an Kristiyanong kongregasyon impluwensiyado nang marhay nin apostasya.

5. Ano an dai ta dapat pag-isipon sa duwang pangyayaring iyan?

⁵ Ipinapahiling daw kan duwang pangyayaring iyan sa Bibliya na arog man kaiyan an mangyayari sa ibang mga karnero ni Cristo pag an mga linahidan dinara na sa langit? Sa panahon na iyan, tatalikdan daw kan maimbod na mga Kristiyano an saindang pagsasanay, arog ni Jehoas, o mapaimpluwensiya daw sinda sa apostasya arog kan ginibo kan dakul na Kristiyano kan ikaduwang siglo C.E.? Dai nanggad! Makakasigurado kita na pag naghali na an mga linahidan sa daga, an ibang mga karnero padagos na mapapangatamanan na marhay asin mag-uuswag sa espirituwal. Taano ta makakasigurado kita diyan?

DAI MARARAMUGAN AN DALISAY NA PAGSAMBA

6. Anong tulong peryodo nin panahon an pag-uulayan ta?

⁶ Taano ta makakasigurado kita na dai mararamugan an dalisay na pagsamba dawa sa masakit na mga panahon na maabot? Huli sa nanudan ta sa Bibliya manungod sa peryodo nin panahon na kinabubuhayan ta. An peryodo nin panahon na ini napapalain na marhay sa panahon kan suanoy na Israel asin sa panahon kan mga Kristiyano kan ikaduwang siglo. Kaya urog ta pang siyasaton an tulong peryodo nin panahon na ini: (1) An panahon kan suanoy na Israel, (2) an peryodo nin panahon pagkagadan kan mga apostol, asin (3) sa satong panahon, “an mga panahon nin pagbabalik sa dati kan gabos na bagay.”​—Gibo 3:21.

7. Sa suanoy na Israel, taano ta dai pinangluyahan nin buot an maimbod na mga lingkod kan an nasyon asin mga hadi kaiyan piniling magin maraot?

⁷ An panahon kan suanoy na Israel. Kan madali nang magadan si Moises, sinabihan niya an mga Israelita: “Aram ko nanggad na pagkagadan ko siguradong magibo kamo nin maraot asin masuway sa dalan na ipinagbuot kong lakawan nindo.” (Deu. 31:29) Nagpatanid man si Moises na kun an Israel magrebelde, an saindang nasyon madidistiyero. (Deu. 28:35, 36) Nagkatotoo daw an mga tataramon na idto? Iyo. Sa paglihis nin mga siglo, dakul na hadi an nagin maraot asin ilinagalag ninda an banwaan nin Diyos. Dahil diyan, pinadusahan ni Jehova an maraot na banwaan asin tinapos an linya nin mga hadi kan mga Israelita. (Ezek. 21:25-27) Pero kuminusog an buot kan maimbod na mga Israelita kan mahiling nindang nagkatotoo an Tataramon nin Diyos.​—Isa. 55:10, 11.

8. Dapat ta daw ipagngalas na naimpluwensiyahan nin apostasya an Kristiyanong kongregasyon kan ikaduwang siglo? Ipaliwanag.

⁸ An peryodo nin panahon pagkagadan kan mga apostol. Dapat ta daw ipagngalas na naimpluwensiyahan nin apostasya an Kristiyanong kongregasyon kan ikaduwang siglo? Dai nanggad. Ihinula ni Jesus na malakop an grabeng apostasya. (Mat. 7:21-23; 13:24-30, 36-43) An mga apostol na si Pablo, Pedro, asin Juan kinumpirmar na nagpupuon nang mautob an propesiya ni Jesus kan inot na siglo C.E. (2 Tes. 2:3, 7; 2 Ped. 2:1; 1 Juan 2:18) Kan ikaduwang siglo C.E., an Kristiyanong kongregasyon impluwensiyado na  nin apostasya. Naglataw an apostatang Kristiyanismo asin nagin prominenteng parte iyan kan Dakulang Babilonya, an pambilog na imperyo nin palsong relihiyon. Sa giraray, nautob an ipinasabong na propesiya.

9. Paano an panahon na kinabubuhayan ta napapalain sa panahon kan suanoy na Israel asin sa panahon kan Kristiyanong kongregasyon kan ikaduwang siglo?

⁹ “An mga panahon kan pagbabalik sa dati kan gabos na bagay.” An satong panahon iba kisa sa panahon kan suanoy na Israel asin sa panahon nin grabeng apostasya na nagin lakop kan ikaduwang siglo C.E. Ano an apod sa peryodo nin panahon na kinabubuhayan ta? Parati ta iyan inaapod na “huring mga aldaw” kan maraot na sistemang ini nin mga bagay. (2 Tim. 3:1) Pero ipinapahiling kan Bibliya na kan panahon na iyan nagpuon man an mas importante asin mas halawig na peryodo nin panahon. Mapadagos iyan sagkod na maibalik na kan Mesiyanikong Kahadian sa pagkaperpekto an mga tawo asin gibuhon nang paraiso an daga. An peryodo nin panahon na iyan inaapod na “an mga panahon nin pagbabalik sa dati kan gabos na bagay.” (Gibo 3:21) Nagpuon iyan kan 1914. Ano an ibinalik kan panahon na iyan? Buweno, pinatukaw si Jesus sa trono bilang Hadi sa langit. Kaya nagkaigwa giraray nin sarong tagapamahala na marepresentar ki Jehova, sarong tagapagmana kan maimbod na si Hading David. Pero bako lang iyan an ibinalik ni Jehova. Dai nahaloy pagkatapos kaiyan, napunan man giraray na ibalik an dalisay na pagsamba! (Isa. 2:2-4; Ezek. 11:17-20) Mararamugan daw giraray iyan?

10. (a) Ano an ihinula kan Bibliya manungod sa dalisay na pagsamba sa panahon ta? (Isaias 54:17) (b) Taano ta nakakaasigurar an siring na mga propesiya?

¹⁰ Basahon an Isaias 54:17. Pag-isipan an propesiyang iyan: “Mayong armas na ginibo laban sa saimo an magigin mapanggana”! Nauutob na ngunyan an ipinasabong na mga tataramon na iyan. An minasunod na nakakarangang mga tataramon nangyayari man sa panahon ta ngunyan: “An gabos mong aking lalaki tutukduan ni Jehova, asin an katuninungan kan saimong mga aking lalaki magigin abunda. Marigon kang maeestablisar sa katanusan. . . . Mayo kang kakatakutan asin mayong dahilan na matakot ka nin grabe, huling dai iyan marani sa saimo.” (Isa. 54:13, 14) Dawa an “diyos kan sistemang ini nin mga bagay,” si Satanas, mayong magigibo tanganing mapapundo an pagtutukdo na ginigibo kan mga lingkod ni Jehova. (2 Cor. 4:4) Ibinalik na an dalisay na pagsamba, asin dai na iyan nuarin man mararamugan. Magdadanay iyan sagkod sa panahon na daing katapusan. Mayo nanggad nin armas na ginibo laban sa sato an magigin mapanggana!

 ANO AN MANGYAYARI?

11. Taano ta kumbinsido kita na an dakulang kadaklan dai mapapabayaan pag yaon na sa langit an mga linahidan?

¹¹ Ano an mangyayari pag an mga linahidan darahon na sa langit? Tandaan, si Jesus an satong Pastor. Siya an payo kan Kristiyanong kongregasyon. Malinaw na sinabi ni Jesus: “Saro sana an saindong Lider, an Cristo.” (Mat. 23:10) An satong namamahalang Hadi nungkang magigin pabaya sa saiyang paninimbagan. Sa paggiya ni Cristo, mayong dapat ikatakot an mga parasunod niya digdi sa daga. Siyempre, dai ta aram an gabos na detalye kun paano gigiyahan ni Cristo an saiyang mga lingkod sa panahon na iyan. Kaya pag-ulayan ta an nagkapirang halimbawa sa Bibliya na makakaasigurar sa sato.

12. Paano inataman ni Jehova an saiyang banwaan (a) pagkagadan ni Moises? (b) pagkatapos na tawan nin panibagong asignasyon si Elias? (Hilingon man an ritrato.)

¹² Nagadan si Moises bago maglaog an Israel sa Dagang Panuga. Ano an nangyari sa banwaan nin Diyos? Pinabayaan na daw ni Jehova an saiyang mga lingkod pagkagadan kan maimbod na lalaking iyan? Dai. Inataman sinda ni Jehova sagkod na maimbod sinda. Bago magadan si Moises, sinabihan siya ni Jehova na nombrahan si Josue para giyahan an banwaan. Sinanay ni Moises si Josue sa laog nin dakul na taon. (Exo. 33:11; Deu. 34:9) Saro pa, dakul pang ibang may kakayahan na lalaki an nanginginot​—na namamayo sa kada 1,000, sa kada 100, sa kada 50, asin sa kada 10 pa ngani. (Deu. 1:15) Napangatamanan na marhay an banwaan nin Diyos. Arog man kaiyan kan panahon ni Elias. Sa laog nin mga dekada, siya an nanginot sa mga Israelita sa dalisay na pagsamba. Pero pag-abot nin panahon sinugo siya ni Jehova sa ibang asignasyon sa Juda. (2 Ha. 2:1; 2 Cron. 21:12) Pinabayaan daw an mga maimbod sa sampulong tribo nin Israel? Dai. Dakul na taon na sinanay ni Elias si Eliseo. Igwa man nin “mga aki kan mga propeta,” na minalataw na inorganisar para mag-ako nin pagsasanay. (2 Ha. 2:7) Kaya igwa nin dakul na maimbod na lalaki na puwedeng magtabang sa paggiya sa banwaan nin Diyos. Padagos na inuutob ni Jehova an saiyang katuyuhan, asin dai niya pinapabayaan an saiyang maimbod na mga parasamba.

13. Anong asigurasyon an mababasa ta sa Hebreo 13:5b? (Hilingon man an ritrato.)

¹³ Kun pag-iisipan an mga halimbawang iyan, ano sa hiling mo an mangyayari pag an natatada sa mga linahidan darahon na sa langit? Aram ta na an simbag. Ihinahayag kan Bibliya an simple, asin nakakaasigurar na katotoohan: Dai nuarin man papabayaan ni Jehova an saiyang mga lingkod digdi sa daga. (Basahon an Hebreo 13:5b.) Arog ni Moises asin Elias, nasasabutan  kan sadit na grupo nin linahidan na mga Kristiyano na nanginginot sa ngunyan an kahalagahan kan pagsasanay sa iba. Sa laog nin mga dekada, an mga brother sa Namamahalang Grupo padagos na nagsasanay nin mga lalaki na kabilang sa ibang mga karnero para manginot. Halimbawa, nag-organisar sinda nin dakul na paadalan para sanayon an mga elder, mga nagbibiyaheng paraataman, mga miyembro kan komite kan Sangay, mga paraataman sa Bethel, asin iba pa. Personal na nagsasanay an Namamahalang Grupo nin mga paratabang sa manlain-lain na komite kan Namamahalang Grupo. Maimbod na isinasagibo sa ngunyan kan mga paratabang na ini an saindang magabat na responsabilidad. Andam sindang marhay na ipagpadagos an pangangataman sa mga karnero ni Cristo.

14. Ano an panginot na punto kan satong pinag-ulayan?

¹⁴ Ano an panginot na punto kan satong pinag-ulayan? Pag an mga natatada sa mga linahidan darahon na sa langit sa panahon na madali nang matapos an dakulang kasakitan, magpapadagos an dalisay na pagsamba digdi sa daga. Huli sa panginginot ni Jesu-Cristo, an mga lingkod ni Jehova padagos na maimbod na magsasamba sa Saiya. Iyo, sa panahon na iyan aatakihon kita kan Gog nin Magog, an maringis na koalisyon nin mga nasyon. (Ezek. 38:18-20) Pero mayong magigibo an halipot na pag-atakeng iyan; dai kaiyan mapapapundo an mga lingkod nin Diyos sa pagsamba ki Jehova. Siguradong ililigtas niya sinda! Sa sarong bisyon, nahiling ni apostol Juan an “dakulang kadaklan” kan ibang mga karnero ni Cristo. Sinabi ki Juan na an “dakulang kadaklan” na ini nakabalyo “hali sa dakulang kasakitan.” (Kap. 7:9, 14) Iyo, magdadanay sindang ligtas!

15-16. Sigun sa Kapahayagan 17:14, ano an gigibuhon kan mga linahidan ni Cristo sa ralaban nin Armagedon, asin taano ta nakakapakusog iyan?

¹⁵ Pero tibaad maisip pa man giraray kan iba: ‘Ano an mangyayari sa mga linahidan?’ ‘Ano an gigibuhon ninda pag yaon na sinda sa langit?’ Direktang sinisimbag kan Bibliya an mga hapot na iyan. Ihinahayag kaiyan na an pulitikal na mga elemento kan kinaban na ini “makikipaglaban . . . sa Kordero.” Siyempre, madadaog sinda. Mababasa ta: “Dadaugon sinda kan Kordero.” Asin sairisay an matabang saiya? Sigun sa teksto, sinda idtong mga “inapod,” mga “pinili,” saka  mga “maimbod.” (Basahon an Kapahayagan 17:14.) Sairisay an mga ini? An binuhay liwat na mga linahidan! Kaya pag an natatada sa mga linahidan sa daga darahon na sa langit pag madali nang matapos an dakulang kasakitan, an saro sa inot nindang gigibuhon iyo an makipaglaban. Pambihirang asignasyon nanggad! An nagkapira sa mga linahidan na mga Kristiyano mga parapakilaban bago sinda nagin mga Saksi ni Jehova. An iba pa ngani sainda naglingkod sa puwersa armada kan kinaban na ini. Pero kan huri nagin tunay na mga Kristiyano sinda asin nanudan an dalan nin katuninungan. (Gal. 5:22; 2 Tes. 3:16) Binayaan ninda an ano man na pisikal na pakikigiyera. Pero, pag binuhay liwat na sinda sa langit, maglilingkod sinda kaiba ni Cristo asin kan saiyang banal na mga anghel, tanganing makipaglaban sa pangultimong giyera laban sa mga kaiwal nin Diyos.

¹⁶ Isipa na sana! Sa daga, an nagkapirang linahidan na mga Kristiyano mga gurang na, an iba ngani maluluya na an hawak. Pero pag binuhay na sinda sa langit, magigin sindang makapangyarihan asin imortal na mga espiritung linalang, na aasignaran na makipaglaban kaiba kan saindang Parapakilaban na Hadi, si Jesu-Cristo. Pagkatapos kan ralaban sa giyera nin Armagedon, makikipagtabangan sinda sa paggiya sa katawuhan pasiring sa pagkaperpekto. Sigurado nanggad, dakulaon an magigibo ninda para sa saindang namumutan na mga tugang sa daga pag yaon na sinda sa langit kumpara kan sinda mga tawo pa na bakong perpekto!

17. Taano ta masasabi niyato na gabos na lingkod nin Diyos magigin ligtas sa ralaban nin Armagedon?

¹⁷ Kabilang ka daw sa ibang mga karnero? Kun iyo, ano an kaipuhan mong gibuhon pag nagpuon na an pangultimong giyera nin Armagedon? Simple lang: Magtiwala ki Jehova asin sunudon an saiyang paggiya. Ano an puwedeng kaiba diyan? Nakakaranga an sinasabi kan Bibliya: “Lumaog ka . . . sa saimong tagong mga kuwarto, asin isara mo an saimong mga pinto. Magtago ka nin kadikit na panahon sagkod na makalihis an grabeng kaanggutan.” (Isa. 26:20) An gabos na maimbod na mga lingkod nin Diyos, sa langit man o sa daga, magigin ligtas sa panahon na iyan. Arog ni apostol Pablo, kumbinsido kita na maski pa “an mga gobyerno o an mga bagay na yaon ngunyan o an mga bagay na maabot . . . dai makakayang isuway kita sa pagkamuot nin Diyos.” (Roma 8:38, 39) Pirming tandaan: Namumutan ka ni Jehova, asin dai ka niya nuarin man papabayaan!