1. Ni lilali abasubwa bonse bakaya ku muulu?

 PA MYAKA iyapitapo, ababomfi ba kwa Yehova balepusha ukuti, ‘Ni lilali aba kulekeleshako pa Bena Kristu basubwa bakaya ku muulu?’ Akale twaletontonkanya ukuti nalimo abasubwa bamo bakekalako mu Paradaise pa nshita imo pa numa ya nkondo ya Armagedone ilyo tabalaya ku muulu. Nomba mu Ulupungu lwa kwa Kalinda ulwa July 15, 2013, twasambilile ukuti abasubwa bonse abacili pe sonde bakaya ku muulu ilyo inkondo ya Armagedone ishilatendeka.—Mat. 24:31.

2. Cipusho nshi nalimo twingayipusha, kabili finshi twalalandapo muli cino cipande?

² Nomba nalimo kuti twaipusha ukuti: Cikaba shani ku “mpaanga shimbi” isha kwa Kristu ishikalabombela Yehova ne cishinka pano isonde ilyo kukaba “ubucushi bukalamba”? (Yoh. 10:16; Mat. 24:21) Bamo aba mu mpaanga shimbi nalimo balasakamana ukuti ilyo bamunyinefwe batemwikwa bonse bakaya ku muulu, takwakabe aba kubafwilisha nelyo aba kubatungulula. Lekeni tulande pa malyashi yabili aya mu Baibo nalimo ayalenga baletontonkanya ifi. Lyena twalasambilila umulandu tushilingile ukusakamanina.

FINSHI FISHAKACITIKILE IMPAANGA SHIMBI ILYO ABASUBWA BONSE BAKAYA KU MUULU?

3-4. Finshi bamo bengasakamana, kabili mulandu nshi?

³ Bamo balasakamana ukuti aba mu mpaanga shimbi bamo bakaleka ukubombela Yehova ilyo ababa mwi Bumba Litungulula bonse bakaya ku muulu. Nalimo icilenga baletontonkanya ifi, malyashi yamo ayalembwa mu Baibo. Lekeni tulandeko pa malyashi yabili. Ilyashi limo ni lilya lilanda pali Shimapepo Mukalamba Yehoyada. Yehoyada alebombela Lesa ne cishinka. Yehoyada pamo no mwina mwakwe Yehoshabeati balicingilile Yehoashi kabili balimwafwile pa kuti abe imfumu iisuma kabili iya  cishinka. Yehoashi alitwalilile ukupepa Yehova no kucita ifisuma ilyo Yehoyada ali umumi. Nomba ilyo fye Yehoyada afwile, Yehoashi alitendeke ukucita ifyabipa. Aleumfwila bacilolo ababifi, ne ci calengele aleke ukubombela Yehova.—2 Imila. 24:​2, 15-19.

⁴ Ilyashi limbi ni lilya lilanda pa Bena Kristu abaliko ilyo abatumwa bonse bafwile. Umutumwa Yohane e walekelesheko ukufwa pa batumwa bonse. Ilyo ali no mweo alikoseleshe Abena Kristu abengi ukutwalilila ukuba ne cishinka kuli Yehova. (3 Yoh. 4) Nga filya fine abatumwa bambi aba kwa Yesu balecita, Yohane na o alebombesha pa kuti alecingilila icilonganino ku basangu abalesambilisha ifya bufi. (1 Yoh. 2:18; 2 Tes. 2:7) Nomba ilyo Yohane afwile, abengi mu cilonganino batendeke ukukonka ifyo abasangu balesambilisha. Pa numa fye ya myaka iinono, abasangu batendeke ukusambilisha ifya bufi ifingi kabili baleleka ifyabipa filecitika mu filonganino.

5. Finshi tushilingile ukusondwelela nga twatontonkanya pali aya malyashi yabili?

⁵ Bushe aya malyashi yabili yalelangilila ukuti ifi ifyacitike, e fikacitikila aba mu mpaanga shimbi ilyo abasubwa bonse bakaya ku muulu? Bushe Abena Kristu aba cishinka bakaleka ukubombela Yehova nga filya Yehoashi acitile, nelyo bakaba abasangu nga filya Abena Kristu bacitile ilyo abatumwa bafwile? Awe nakalya! Kuti twacetekela ukuti ilyo abasubwa bonse bakaya ku muulu, aba mu mpaanga shimbi bakatwalilila ukupepa Yehova mu nshila afwaya kabili akatwalilila ukubasakamana. Cinshi cingalenga twacetekela ifi?

ABANTU BA KWA YEHOVA BAKATWALILILA UKUMUPEPA UKULINGANA NE FYO AFWAYA

6. Ni nshita nshi shitatu isho twalalandapo?

⁶ Cinshi cingalenga twacetekela ukuti abantu ba kwa Yehova bakatwalilila ukumupepa mu nshila afwaya na lintu ifintu fikafya ku ntanshi? Pantu Baibo ilondolola ukuti inshita tuleikalamo yalipusana sana ne nshita abena Israele baleikalamo, kabili yalipusana ne nshita ya Bena Kristu ilyo abatumwa bafwile. Natulande pali ishi nshita shitatu: (1) Inshita ya bena Israele, (2) inshita ya Bena Kristu ilyo abatumwa bafwile, na (3) inshita tuleikalamo “inshita sha kubweseshamo fyonse.”—Imil. 3:21.

7. Cinshi calengele abena Israele abali ne cishinka batwalilile ukubombela Yehova nangu ca kuti imfumu na bantu balecita ifyabipa?

⁷ Inshita ya bena Israele. Ilyo Mose ali mupepi no kufwa, aebele abena Israele ukuti: “Ninjishiba ukuti ilyo nkafwa mukayonaula, kabili mukafuma mu nshila iyo namweba.” (Amala. 31:29) Mose asokele abena Israele no kuti nga bapondoka, bali no kubasenda bunkole. (Amala. 28:​35, 36) Bushe ifyo abebele fyalicitike? Ee fyalicitike. Pa myaka iingi, imfumu ishingi shalecita ifyabipa mu menso ya kwa Yehova, kabili shalelenga na bantu balapepa balesa ba bufi. Ici calengele Yehova akande abantu abalecita ifyabipa kabili calengele mu Israele mwiba imfumu ya kubateka. (Esek. 21:​25-27) Lelo abena Israele abali ne cishinka ilyo bamwene ifyo Yehova alandile fyafikilishiwa, balitwalilile ukubombela Yehova ne cishinka.—Esa. 55:​10, 11.

8. Bushe kuti twapapa ifi mu cilonganino ca Bena Kristu icaliko ilyo abatumwa bafwile mwaishileba abasangu? Londololeni.

⁸ Inshita ya Bena Kristu abaliko ilyo abatumwa bafwile. Bushe kuti twapapa ifi mu cilonganino icaliko ilyo abatumwa bafwile mwaishileba abasangu? Awe teti tupape, pantu Yesu alisobele ukuti kukaba abasangu abengi. (Mat. 7:​21-23; 13:​24-30, 36-43) Umutumwa Paulo, Petro na Yohane balilandilepo ukuti ifyo Yesu asobele ukuti kukaba abasangu fyalitendeke ukufikilishiwa mu nshita sha batumwa. (2 Tes. 2:​3, 7; 2 Pet. 2:1; 1 Yoh. 2:18) Ilyo  abatumwa bonse bafwile, mu cilonganino ca Bena Kristu mwaishileba abasangu. Aba Abena Kristu abaishileba abasangu, baishileba muli Babiloni Mukalamba, e kutila ukupepa konse ukwa bufi. Kanshi ifyo Yesu asobele fyalifikilishiwe.

9. Bushe inshita tuleikalamo yapusana shani ne nshita abena Israele baleikalamo, e lyo ne nshita kwali abasangu ilyo abatumwa bafwile?

⁹ “Inshita sha kubweseshamo fyonse.” Inshita tuleikalamo yalipusana sana ne nshita abena Israele baleikalamo kabili yalipusana ne nshita kwali sana abasangu ilyo abatumwa bafwile. Ni nshita nshi tuleikalamo? Ilingi line twita inshita tuleikalamo ukuti ni “nshiku sha kulekelesha” isha cino calo cabipa. (2 Tim. 3:1) Nomba Baibo ilangilila ukuti kwali inshita na imbi iikalamba iyatendeke. Iyi nshita yali no kutwalilila ukubako mpaka Ubufumu bwa kwa Mesia bukalenge abantu bonse bakabe abapwililika kabili bukalenge isonde likabe paradaise. Baibo ita iyi nshita ukuti “inshita ya kubweseshamo fyonse.” (Imil. 3:21) Iyi nshita yatendeke mu 1914. Finshi Yehova abweseshemo? Yesu alitendeke ukuteka ku muulu. Kanshi na kabili Yehova alikwete imfumu ya kumwimininako, iyafumine mu lupwa lwa Mfumu Davidi iyali ne cishinka. Nomba kwali na fimbi ifyo Yehova abweseshemo pa numa ya kubika Yesu pa Bufumu. Yehova alilengele ababomfi bakwe aba pe sonde batendeka ukumupepa na kabili ukulingana ne fyo afwaya. (Esa. 2:​2-4; Esek. 11:​17-20) Bushe na kabili ababomfi ba kwa Yehova bakaleka ukumupepa ukulingana ne fyo afwaya?

10. (a) Finshi Baibo yasobele pa kupepa kwasanguluka muno nshiku? (Esaya 54:17) (b) Mulandu nshi aya masesemo yatusansamushisha?

¹⁰ Belengeni Esaya 54:17. Tontonkanyeni pali ubu busesemo butila: “Icanso conse ico bakupangila tacakabombe”! Aya amashiwi ayafuma kuli Lesa yalefikilishiwa muno nshiku. Kwaliba amashiwi na yambi ayatusansamusha ayalefikilishiwa muno nshiku. Amashiwi ya kuti: “Abana bobe bonse bakasambilishiwa kuli Yehova, no mutende wa bana bobe ukafula. Ukalimbwa mu bulungami. . . . Tawakatiine nangu umo kabili tapali icikakutiinya nangu cimo, pantu ica kutiinya tacakakupalame.” (Esa. 54:​13, 14) Nangu fye ni Satana, “lesa wa bwikashi buno,” te kuti aleshe abantu ba kwa Yehova ukubomba umulimo wa kusambilisha abantu pali Yehova. (2 Kor. 4:4) Abantu ba kwa Yehova balitendeke ukupepa Yehova ukulingana ne fyo afwaya, kabili tabakaleke ukumupepa ukulingana ne fyo afwaya. Bakatwalilila fye ukumupepa umuyayaya. Takuli icanso nangu cimo ico batupangila icikabomba!

 FINSHI FIKACITIKILA IMPAANGA SHIMBI?

11. Finshi fyalenga tushininkishe ukuti aba mwi bumba likalamba tabakabalekeleshe ilyo abasubwa bakaya ku muulu?

¹¹ Finshi fikacitika ilyo abasubwa bonse bakaya ku muulu? Ibukisheni ukuti Yesu e Kacema wesu. E mutwe wa cilonganino ca Bena Kristu. Yesu alilandile ukwabula no kupita mu mbali ukuti: “Intungulushi yenu imo, Kristu.” (Mat. 23:10) Yesu uuli ni Mfumu mu muulu, akatwalilila ukusakamana abasambi bakwe aba cishinka. Abasambi ba kwa Kristu aba pe sonde tabafwile ukutiina nangu cimo pantu akalabatungulula. Ca cine ukuti tatwaishiba fyonse ifyo Kristu akalacita pa kutungulula abantu bakwe pali ilya nshita. Kanshi lekeni tulandeko pa fya kumwenako fimo ifyalembwa mu Baibo ifingalenga twashininkisha ukuti Yesu akalatungulula abantu bakwe.

12. Bushe Yehova alesakamana shani abantu bakwe (a) ilyo Mose afwile? (b) ilyo Eliya bamupeele imilimo imbi? (Moneni ne cikope.)

¹² Ilyo abena Israele bashilaingila mu Calo ca Bulayo, Mose alifwile. Finshi fyali no kucitikila abantu ba kwa Lesa? Ilyo ulya mwaume uwali ne cishinka afwile, bushe Lesa alilekele ukwafwilisha abantu bakwe? Awe. Alitwalilile ukubapeela ifyo balekabila ilyo batwalilile ukuba ne cishinka. Ilyo Mose ashilafwa, Yehova alimwebele ukuti asale Yoshua ukuti e o aletungulula abena Israele. Mose alisambilishe Yoshua pa myaka iingi. (Ukufu. 33:11; Amala. 34:9) Na kabili, kwali abaume na bambi abengi abafikapo abaletungulula abantu, pamo nga bacilolo ba pa bantu 1,000, pa bantu 100, pa bantu 50, e lyo na pa bantu 10. (Amala. 1:15) Abantu ba kwa Lesa balikwete aba kubasakamana bwino. Ifi fine e fyo cali na mu nshiku sha kwa Eliya. Pa myaka iingi aletungulula abena Israele pa kuti batwalilile ukupepa Yehova. Lelo inshita yalifikile ilyo Yehova amutumine ukuya mu kubombela ku Yuda. (2 Isha. 2:1; 2 Imila. 21:12) Bushe abantu ba cishinka abashele mu bufumu bwa mikowa 10 ubwa Israele bashele fye ukwabula uwa kubafwilisha? Awe, pantu pali iyi nshita ninshi Eliya alisambilisha Elisha pa myaka iingi. Na kabili kwali “abana ba bakasesema” abo nalimo balesambilisha mu masukulu. (2 Isha. 2:7) Kanshi kwali abaume ba cishinka abengi abali no kulatungulula abantu ba kwa Lesa. Yehova alitwalilile ukufikilisha ifyo alefwaya kabili alesakamana bakapepa bakwe aba cishinka.

13. Finshi ifyo Yehova atulaya ifyo tubelenga pa AbaHebere 13:5b? (Moneni ne cikope.)

¹³ Ukulingana ne fya kumwenako twalandapo, bushe cikaba shani ilyo abasubwa bonse  bakabasenda ku muulu? Tatufwile ukusakamana nangu cimo. Baibo yalilanda icishinka ca kuti: Yehova takalekeleshe abantu bakwe pano isonde. (Belengeni AbaHebere 13:5b.) Nga filya fine Mose na Eliya bali, ibumba ilinono ilya Bena Kristu basubwa abatungulula muno nshiku nabo balishiba ubucindami bwa kusambilisha bambi imilimo. Pa myaka iingi, bamunyinefwe aba mwi Bumba Litungulula balisambilisha abaume aba mu mpaanga shimbi ifya kutungulula. Ku ca kumwenako, balibikako amasukulu ayengi umo basambilisha baeluda, bakangalila ba muputule, aba muli Komiti ya Musambo, abatungulula mu madipartimenti ya pa Bethel, e lyo na bambi. Aba mwi Bumba Litungulula nabo balasambilisha bakafwa abengi ababa mu makomiti ye Bumba Litungulula. Aba bakafwa balabomba ne cishinka imilimo iingi mu cilonganino ca kwa Lesa. Balibasambilisha bwino ifya kutwalilila ukusakamana impaanga sha kwa Kristu.

14. Cishinka nshi icikalamba ico tulesambilila muli lino isambililo?

¹⁴ Icishinka icikalamba ico tulelandapo ni ci: Ilyo abasubwa aba kulekeleshako bakabasenda ku muulu ninshi ubucushi bukalamba buli mu kupwa, ukupepa kwasanguluka kukatwalilila pano isonde. Pa mulandu wa butungulushi bwa kwa Yesu Kristu, abantu ba kwa Lesa bakatwalilila ukumupepa ne cishinka. Ca cine, pali ilya nshita Goge wa ku Magoge, e kutila inko ishikomana akapi, akasansa abantu ba kwa Lesa. (Esek. 38:​18-20) Nangu ca kuti bakabasansa pa nshita iinono, abantu ba kwa Lesa bakatwalilila ukumupepa. Nangu cibe shani, akabapususha! Mu cimonwa, umutumwa Yohane amwene “ibumba ilikalamba” ilya mpaanga shimbi isha kwa Kristu. Yohane bamwebele ukuti ili “bumba likalamba” lyafuma “mu bucushi bukalamba.” (Ukus. 7:​9, 14) Ukwabula no kutwishika, Yehova akapususha abantu bakwe!

15-16. Ukulingana na Ukusokolola 17:​14, finshi abasubwa bakalacita ilyo kukaba inkondo ya Armagedone, kabili mulandu nshi ifi bakalacita fingatukoselesesha?

¹⁵ Na lyo line, bamo kuti balatontonkanya abati: ‘Bushe finshi abasubwa bakaya mu kucita ku muulu nga bafuma pe sonde?’ Baibo yalyasuka bwino bwino ici cipusho. Itila amabuteko ya muli cino calo ‘yakalwa no  Mwana wa mpaanga,’ lelo tayakacimfye. Baibo itila: ‘Umwana wa mpaanga akayacimfya.’ Ni bani bakamwafwa ukucimfya aya amabuteko? Baibo itila abakamwafwa bantu “baitwa,” “abasalwa,” kabili “aba cishinka.” (Belengeni Ukusokolola 17:14.) Bushe aba bene ni bani? Bantu basubwa ababuushiwa! Kanshi abasubwa aba kulekeleshako abo bakasenda ku muulu ninshi ubucushi bukalamba buli mu kupwa, pa milimo bakabalilapo ukubomba pakaba no kulwa. Uyu ukaba mulimo uukalamba! Abena Kristu basubwa bamo ilyo bashilaba Inte sha kwa Yehova baleuma abantu. Bamo balibombelepo no bushilika. Nomba ilyo baishileba Abena Kristu ba cine, balisambilile ukuba aba mutende mu nshila yonse. (Gal. 5:22; 2 Tes. 3:16) Balilekele ukutungilila inkondo. Nomba ilyo bonse bakabuushiwa, bakabombela pamo na Kristu na bamalaika bakwe aba mushilo kabili bakalwa inkondo ya kulekeleshako na balwani ba kwa Lesa.

¹⁶ Tontonkanyeni pali ici! Bamo abasubwa abacili pe sonde bakalamba sana kabili tabakwata na maka. Lelo ilyo bakabuushiwa no kuya mu kwikala ku muulu, bakaba ifibumbwa fya mupashi ifya maka kabili ifishifwa. Bakabapeela no mulimo wa kulwa pamo ne Mfumu ya Bulwi, Yesu Kristu. Pa numa ya nkondo ya Armagedone, bakabombela pamo na Yesu pa kulenga abantu bakabe abapwililika. Ukwabula no kutwishika ilyo bakaya ku muulu, bakalacitila bamunyinabo na bankashi ifisuma ukucila ifyo baali no kubacitila ilyo baali abantu abashapwililika pano isonde!

17. Twaishiba shani ukuti ababomfi ba kwa Lesa bonse bakacingililwa ilyo kukaba inkondo ya Armagedone?

¹⁷ Bushe mwaba pa mpaanga shimbi? Finshi mukafwaikwa ukulacita ilyo inkondo iyacindama iya Armagedone ikatendeka? Ifi e fyo mukafwaikwa ukulacita: Ukucetekela Yehova, no kukonka ifyo akalatweba. Finshi nalimo fimo ifyo akalatweba? Baibo ilatweba amashiwi ya kusansamusha aya kuti: “Ingileni mu miputule yenu iya mu kati, kabili isaleniko ifiibi. Fisameni inshita inono mpaka ubukali bupite.” (Esa. 26:20) Pali iyi nshita, bonse ababomfi ba kwa Lesa aba cishinka ku muulu na pano isonde bakacingililwa. Nga filya fine umutumwa Paulo ashininkishe, na ifwe twalishininkisha ukuti “nangu mabuteko nangu fintu ifyabapo nangu fintu ifikesabako . . . tafyakabe na maka ya kutupaatulako ku kutemwa kwa kwa Lesa.” (Rom. 8:​38, 39) Lyonse muleibukisha ukuti: Yehova alimutemwa icine cine kabili takamulekeleshe!