1. Ndigan nge kerina kalak si ipilih ku surga enggo lit i surga?

 UMAT Jahwe pernah tersungkun-sungkun, ‘Ndigan nge kerina kalak Kristen si ipilih ku surga iangkat ku surga?’ Mbarenda pernah siakap maka piga-piga kalak Kristen si ipilih ku surga tetap i doni Pardis piga-piga waktu dekahna kenca Harmagedon. Tapi bas Menara Pengawal 15 Juli 2013, enggo sipelajari maka kerina kalak si ipilih ku surga, si tading denga i doni, iangkat pagi ku surga sope terjadi Harmagedon.—Mat. 24:31.

2. Penungkunen kai si banci saja lit bas ukurta, janah kai kari sibahas bas artikel enda?

² Piga-piga arah kita banci saja tersungkun-sungkun: Uga kerna ‘biri-biri si deban’ si setia ngelayani Jahwe bas doni sedekah “kiniseran si mbelin”? (Joh. 10:16; Mat. 24:21) Gundari, lit si kuatir maka kenca turang senina si erpengarapen ku surga iangkat ku surga, lanai pagi lit si ngurus kalak e. Mari sibahas dua contoh si lit bas Pustaka si banci saja erban bage perukuren kalak e. Kenca si e, sibahas kari engkai maka la perlu kita kuatir kerna si e.

KAI PAGI SI LA TERJADI?

3-4. Banci saja kai si erban enterem kalak kuatir, janah engkai?

³ Banci saja lit si kuatir itadingken biri-biri si deban kebenaren sanga kalak e lanai iarahken Badan Pinpinen. Banci saja lit piga-piga cataten bas Pustaka si erban bage perukuren kalak e. Mari sibahas dua contohna. Pertama, kerna Imam si Mbelin Joyada ras Joas. Joyada enggo metua tapi tetap ia setia ngelayani Jahwe. Ia ras diberuna Jehosebat, ngelindungi Joas si kitik denga janah sampatina  ia jadi kalak si mehuli ras jadi raja si setia. Isembah Joas Jahwe janah lakokenna kai si mehuli sanga Joyada nggeluh denga. Tapi, kenca mate Joyada mulai lakoken Joas kai si jahat. Ibegikenna pejabat-pejabat si jahat, janah lanai layanina Jahwe.—2 Kro. 24:​2, 15-19.

⁴ Contoh si peduaken eme Rasul Johanes ras kalak Kristen bas abad si peduaken. Johanes eme rasul si terakhir si nggeluh denga paksa si e. Sampatina enterem kalak Kristen gelah tetap setia man Jahwe. (3 Joh. 4) Johanes ras rasul-rasul si debanna si setia enggo rusaha ngelindungi runggun Kristen arah ajaren kalak murtad si enggo mulai tersebar. (1 Joh. 2:18; 2 Tes. 2:7) Tapi kenca mate Johanes, ajaren kalak murtad enggo reh buena. Kenca puluhen tahun dekahna, enggo melala ajaren kalak murtad bas runggun Kristen.

5. Kai kesimpulen si salah arah duana contoh Pustaka e?

⁵ Arah duana contoh Pustaka e, banci nge sisimpulken maka kenca kalak si ipilih ku surga enggo iangkat ku surga, biri-biri si deban lanai pagi setia? Lanai nge pagi kalak e setia bagi Joas, ntah pe murtad kalak e bagi enterem kalak Kristen bas abad peduaken Masehi? Pasti lang! Tek kita, sanga itadingken kalak si ipilih ku surga doni enda, biri-biri si deban terus pagi setia ngelayani Jahwe alu cara si benar janah tetap pagi iperdiateken Jahwe kalak e. Ja nari siteh?

UMAT JAHWE LALAP PAGI NEMBAH IA ALU CARA SI BENAR

6. Lit telu jaman si nandangi sibahas, kai saja e?

⁶ Engkai maka tek kita umat Jahwe lalap pagi nembah Ia alu cara si benar, amin pe bas masa-masa si sulit? Perban enggo ijelasken bas Pustaka maka jamanta gundari beda kel ras jaman kalak Israel si mbarenda bage pe ras jaman kenca rasul-rasul mate. Emaka, mari sibahas terdauhen kerna teluna jaman e: (1) jaman Israel si mbarenda, (2) jaman kenca rasul-rasul mate, ras (3) jamanta sanga “kerina iban mulihi bagi si mbarenda.”—Perb. 3:21.

7. Bas Israel si mbarenda, engkai maka la kitik ukur kalak si setia sanga raja-raja ras enterem kalak ngelakoken si jahat?

⁷ Jaman Israel si mbarenda. Sope Musa mate, ikatakenna man kalak Israel, “Kuteh maka kenca mate pagi aku pasti jahat perbahanen kena, lanai ikutken kena kai si enggo kuperentahken man kena.” (Ul. 31:29) Ipersingeti Musa ka kalak Israel adi mberontak kalak e, itaban pagi kalak e. (Ul. 28:​35, 36) Terjadi nge kata-kata Musa e? Terjadi. Ratusen tahun dekahna, melala raja-raja si ngelakoken kai si jahat iakap Jahwe janah ibanna umat Dibata ngelakoken kai si jahat. Perban si e, ihukum Jahwe umatNa janah pediatNa lanai lit kalak Israel si merentah kalak e. (Esek. 21:​25-27) Tapi, uga kerna kalak Israel si setia? Sanga idah kalak e maka kai si ikataken Dibata enggo terjadi, reh belinna sura-sura kalak e guna tetap setia man Jahwe.—Jes. 55:​10, 11.

8. Engkai maka la ateta mamang melala ajaren kalak murtad i runggun Kristen bas abad si peduaken?

⁸ Jaman kenca rasul-rasul mate. Pasti la teta mamang melala ajaren kalak murtad i runggun Kristen bas abad si peduaken. Engkai? Perban enggo nubuatken Jesus kerna si e. (Mat. 7:​21-23; 13:​24-30, 36-43) Bas abad si pertama,  itulis Rasul Paulus, Petrus, ras Johanes maka nubuat e enggo mulai terjadi paksa si e. (2 Tes. 2:​3, 7; 2 Pet. 2:1; 1 Joh. 2:18) Kenca si e, kenca mate rasul-rasul, enggo mbue ajaren kalak murtad bas runggun Kristen janah kalak Kristen si murtad enggo jadi bagin arah Babilon si Mbelin, eme agama palsu i sebelang doni. Nubuat Pustaka terjadi ka sekali nari.

9. Kai bedana jamanta gundari ras jaman Israel si mbarenda bage pe abad si peduaken?

⁹ Sanga “kerina iban mulihi bagi si mbarenda.” Jamanta beda ras jaman Israel si mbarenda bage pe abad si peduaken si melala i je tersebar ajaren kalak murtad. Biasana jamanta gundari sikataken “wari-wari pendungi” arah doni si jahat enda. (2 Tim. 3:1) Tapi bas Pustaka, ikataken ka maka jamanta igelari “kerina iban mulihi bagi si mbarenda.” (Perb. 3:21) Jaman e imulai tahun 1914 bali bagi “wari-wari pendungi.” Tapi jaman pemulihen e lebih penting janah lebih ndekah waktuna, eme seh ngasa Kerajan Mesias enggo dung nampati manusia jadi sempurna ras erban doni jadi Pardis. Kai nge si iulihken bas tahun 1914? Bas tahun e, Jesus ilantik jadi Raja i surga. Dungna, lit ka penguasa si jadi wakil Jahwe arah keturunen Raja Daud. Tapi, labo Kerajan e ngenca si iulihken Jahwe. La ndekah kenca si e, carata nembah Jahwe pe mulihi benar bagi si mbarenda. (Jes. 2:​2-4; Esek. 11:​17-20) Terus nge pagi sembah kalak Jahwe alu cara si benar?

10. (a) Kai nge si inubuatken Pustaka kerna cara si benar bas nembah Jahwe bas jamanta? (Jesaya 54:17) (b) Engkai maka nubuat-nubuat e mpegegehi kita?

¹⁰ Baca Jesaya 54:17. Bas nubuat e ikataken, “Senjata kai pe si iban guna ngelawan kam labo pagi berhasil”! Kata-kata e tuhu-tuhu terjadi gundari. Kata-kata pengapul enda pe terjadi ka bas jamanta: “Ajari Jahwe pagi kerina anakndu, janah dame kel pagi akap kalak e. Keadilen pagi jadi pondasindu si nteguh. . . . La pagi kam mbiar kai pe janah la lit si erban kam nggirgir, sebap si e kerina labo pagi ndeheri kam.” (Jes. 54:​13, 14) Setan, “dibata doni enda” pe la ngasup mpengadi pendahin umat Jahwe guna ngajari kalak kerna Jahwe. (2 Kor. 4:4) Cara si benar bas nembah Jahwe enggo mulihi ka bagi si mbarenda, janah asa ndigan pe tetap bage. Banci ikataken, benar pagi carata nembah Jahwe  seh rasa lalap. Senjata kai pe si iban guna ngelawan kita labo berhasil.

KAI NGE PAGI SI TERJADI?

11. Kai si erban kita tek maka kelompok jelma si enterem labo pagi itadingken sanga kalak si ipilih ku surga enggo iangkat ku surga?

¹¹ Kai pagi si terjadi sanga kalak si ipilih ku surga enggo iangkat ku surga? Ingetlah, Jesus me Permakanta. Ia ka kepala runggun Kristen. Alu jelas ikataken Jesus, “Sada Peminpin kena, eme Kristus.” (Mat. 23:10) Jesus si merentah i surga, lalap pagi mperdiateken pengikutna si setia. Perban Kristus si minpin kalak e, pengikutna si tading i doni la perlu mbiar. Memang lenga jelas siteh uga pagi cara Jesus minpin umat Jahwe kenca kalak Kristen si ipilih ku surga, iangkat ku surga. Tapi, lit piga-piga contoh bas Pustaka si banci mpegegehi kita.

12. Uga Jahwe mperdiateken umatNa (a) kenca mate Musa? (b) kenca dat Elia tugas si deban? (Nen ka gambar.)

¹² Musa mate sope bangsa Israel masuk ku Negri Perjanjin. Kai si terjadi man umat Dibata? Ngadi nge Jahwe nampati umatNa e kenca mate Musa? Lang. Adi setia bangsa Israel, tetap bereken Jahwe keperlun kalak e. Enggo ilatih Musa Josua puluhen tahun dekahna. Sope mate Musa, isuruh Jahwe ia gelah ngelantik Josua jadi peminpin umatNa. (Kel. 33:11; Ul. 34:9) Selain si e, enterem ka dilaki si banci iandalken, si banci jadi peminpin. Lit peminpin man seribu kalak, man seratus kalak, lima puluh kalak, bage pe man sepuluh kalak. (Ul. 1:15) Contoh si debanna eme Elia. Enggo isampatina kalak Israel nembah Dibata alu cara si benar puluhen tahun dekahna. Tapi, bas pudi wari ibereken Jahwe tugas man bana janah arus ia pindah ku selatan, ku Juda. (2 Raj. 2:1; 2 Kro. 21:12) Itadingken nge kalak si setia si lit bas kerajan Israel sepuluh suku? Lang. Elia enggo ngelatih Elisa ertahun-tahun dekahna. Lit ka “keturunen nabi-nabi,” si enggo ndatken pelatihen. (2 Raj. 2:7) Emaka, enterem dilaki si banci nampati guna minpin umat Dibata. Sura-sura Jahwe tetap terjadi, janah umatNa pe lalap iperdiatekenNa.

13. Kai nge si ijanjiken Jahwe bas Heber 13:5b? (Nen ka gambar.)

¹³ Alu nginget contoh-contoh ndai, menurutndu kai nge pagi si terjadi kenca kerina kalak si ipilih ku surga iangkat  ku surga? Jawapenna enggo jelas. Ipetetap Pustaka ukurta maka labo ndigan pe itadingken Jahwe umatNa si lit i doni. (Baca Heber 13:5b.) Bali bagi Musa ras Elia, Badan Pinpinen eme sada kelompok kalak Kristen si ipilih ku surga, penting kel akap kalak e pelatihen. Enggo puluhen tahun dekahna ilatih kalak e dilaki-dilaki arah biri-biri si deban guna mereken petunjuk man umat Dibata. Contohna, enggo iban kalak e melala sekolah guna ngelatih pertua-pertua, pertua keliling, anggota Panitia Cabang, pengawas i Betel, ras si debanna. Langsung ka ilatih kalak e dilaki-dilaki si nampati bas erbage-bage panitia Badan Pinpinen. Kalak si nampati e gundari alu setia ndalanken melala tanggung jawapna bas organisasi. Kalak e enggo ersikap guna nerusken pendahin bas ngurus biri-biri Kristus.

14. Kai nge si banci sisimpulken arah pembahasen enda?

¹⁴ Kesimpulen arah pembahasenta enda eme sope dung kiniseran si mbelin, kerina kalak si ipilih ku surga iangkat pagi ku surga, tapi umat Dibata terus pagi nembah Dibata alu cara si benar i doni. Jesus Kristus, Peminpin kalak e terus pagi nampati kalak e ngelayani Dibata. Memang, iserang Gog arah Magog pagi umat Dibata. Gog arah Magog eme gabungen bangsa-bangsa. (Esek. 38:​18-20) Tapi kentisik ngenca serangen e janah labo kalak e berhasil erban umat Dibata ngadi ngelayani Dibata. Bas sada pengenehenen, idah Rasul Johanes “kelompok jelma si enterem” arah biri-biri si deban janah ibegina ka maka selamat kalak e ngelewati “kiniseran si mbelin.” (Ket. 7:​9, 14) Emaka, tek kita pasti iselamatken Jahwe pagi umatNa.

15-16. Menurut Ketangkasen 17:​14, kai pagi si ilakoken kalak si ipilih ku surga bas perang Harmagedon, janah engkai maka si e mpegegehi kita?

¹⁵ Uga kerna kalak si ipilih ku surga? Kai nge pagi si ilakoken kalak e kenca iangkat ku surga? Jelas jawapenna bas Pustaka. Pemerentah si lit i doni enda nandangi erperang “ngelawan Anak Biri-Biri.” Pasti  talu pagi kalak e. Ikataken bas Pustaka maka “taluken Anak Biri-Biri e pagi kalak e.” Ise si nampati ia? “Kalak si idilo, si ipilih, ras si setia.” (Baca Ketangkasen 17:14.) Kalak e eme kalak si ipilih ku surga si enggo ipekeke. Emaka, sope dung kiniseran si mbelin, kerina kalak si ipilih ku surga si lit i doni iangkat ku surga, janah salah sada tugas kalak e si pertama eme erperang. Luar biasa kel tugas e! Piga-piga kalak Kristen si ipilih ku surga pernah jadi pejuang sope jadi Saksi Jahwe. Lit ka si pernah jadi tentera. Tapi dungna, kalak e jadi kalak Kristen situhu-tuhu janah erlajar guna erdame ras kalak si deban. (Gal. 5:22; 2 Tes. 3:16) Kalak e lanai ikut perang. Amin pe bage, kenca iangkat ku surga, ikut kalak e erperang radu ras Kristus bage pe malekat-malekatna si badia. Erperang pagi kalak e bas perang si terakhir ngelawan musuh-musuh Dibata.

¹⁶ Cuba ukuri enda. Gundari, piga-piga kalak Kristen si ipilih ku surga enggo metua janah lalap reh urakna si banci ilakokenna. Tapi kenca kalak e iangkat guna nggeluh i surga, kalak e jadi mahluk roh si megegeh janah la banci mate. Erperang pagi kalak e radu ras Jesus eme Raja ras Pejuang si megegeh. Kenca menang kalak e bas perang Harmagedon, ikut kalak e nampati manusia jadi sempurna. Paksa si e, pasti banci ibereken kalak e penampat si seh kel belinna man turang seninana si lit i doni si keleng atena. Penampat kalak e ndauh belinen asangken si enggo pernah ilakoken kalak e sanga jadi manusia si la sempurna.

17. Arah ja siteh maka kerina umat Dibata selamat pagi bas perang Harmagedon?

¹⁷ Biri-biri si deban nge kam? Adi bage, kai si perlu lakokenndu sanga perang Harmagedon enggo ibenaken? Enda ngenca: Teklah man Jahwe janah ikutken petunjukNa. Banci saja si e termasuk ndalanken kai si ikataken Pustaka bas Jesaya 26:20: “Masuklah ku kamar-kamarndu si arah bas, janah tutuplah pintu. Cebunilah ntisik, seh ngasa ngadi rawa Dibata.” E ertina kerina umat Dibata si setia si lit i surga ras i doni aman pagi paksa si e. Bali bagi Rasul Paulus, tek kita la soal ‘pemerentah, ntah kai si lit gundari, ntah kai si lit pagi, la lit si banci nirangken kita arah kekelengen Dibata.’ (Rom. 8:​38, 39) Tetaplah inget maka keleng ate Jahwe kam janah labo ndigan pe kam itadingkenNa.