1. Wen di laas a di anointid Kristyanz gwehn da hevn?

 EENA di paas, Jehoava peepl yoostu wanda, ‘Wen di laas a di anointid Kristyanz wahn goh da hevn?ʼ Wi yoostu tink dat som a dehn mait stay pahn di ert eena Paradais fi wahn lee wail afta Armagedon. Bot eena di Joolai 15, 2013, kapi a The Watchtower, wi laan dat aala di anointid Kristyan dehn weh stil deh pahn di ert wahn goh da hevn bifoa Armagedon staat.—Mach. 24:31.

2. Weh kweschan wi mait aks, ahn weh wi wahn taak bowt eena dis aatikl?

² Bot som a wi mait aks, ‘Wen di “grayt chribyulayshan” staat, weh wahn hapm tu di “ada sheep” weh di serv Jehoava joorin da taim?ʼ (Jan 10:16; Mach. 24:21) Som a wi mait wori dat wi noh wahn ga enibadi fi help wi ahn gaid wi wans aala di anointid bradaz ahn sistaz goh da hevn. Mek wi luk pahn too Baibl egzampl weh mait mek wi tink da way. Den wi wahn taak bowt sohn reezn wai wi noh need fi wori.

WEH NOH WAHN HAPM TU DI ADA SHEEP?

3-4. Weh som a wi mait wanda bowt, ahn wai?

³ Som a wi mait wanda if di ada sheep wahn stap serv Jehoava wen di Govanin Badi noh deh pahn di ert fi gaid dehn nohmoh. Dehn mait feel da way sayka som a di egzampl eena di Baibl bowt sohn peepl weh mi du di saym ting. Mek wi luk pahn too egzampl. Di fers egzampl da wid Hai Prees Jehoyada ahn King Jehoawash. Jehoyada da-mi wahn faytful man weh mi serv Jehoava. Hihn an ih waif, Jehoshabiyat, mi protek wahn lee bwai weh naym Jehoawash, ahn dehn mi help ahn fi bee wahn gud king weh stay faytful tu Jehoava. Az lang az Jehoyada mi alaiv, Jehoawash mi du gud tingz. Bot afta Jehoyada mi ded, Jehoawash  mi staat du bad tingz. Hihn mi lisn tu di wikid prins dehn an ih mi stap serv Jehoava.—2 Chron. 24:​2, 15-19.

⁴ Di neks egzampl da bowt di Kristyanz eena di sekant senchri. Jan da-mi di laas apasl fi ded, ahn fi az lang az hihn mi alaiv ih mi help lata dehnya Kristyanz fi stay faytful tu Jehoava. (3 Jan 4) Jos laik Jeezas ada apasl dehn, Jan mi werk haad fi protek di kangrigayshanz fahn eni faals teechinz. (1 Jan 2:18; si di stodi noat dehn pahn 2 Tes. 2:7 eena di Study Bible.) Bot afta Jan mi ded, lata Kristyanz staat fala faals teechinz. Afta wahn fyoo yaaz, dehn mi ga lata apastayt eena di kangrigayshanz, ahn dehn mi eevn alow membaz a di kangrigayshan fi du rang tingz.

5. Weh wi noh fi tink dehnya too egzampl meen?

⁵ Yu tink di saym ting weh hapm eena dehnya too egzampl wahn hapm tu di ada sheep wen aala di anointid Kristyanz goh da hevn? Yu tink joorin da taim di ada sheep wahn staat du bad tingz, laik weh Jehoawash mi du? Er yu tink dat som a dehn wahn ton apastayt, jos laik weh mi hapm afta di faytful apasl dehn mi ded? Af koars nat! Wi noa fi shoar dat wen di anointid Kristyanz goh da hevn, di ada sheep wahn kantinyu fi wership Jehoava eena di rait way, ahn hihn wahn kantinyu tek kayr a dehn. Wai wi ku bee shoar a dat?

JEHOAVA PEEPL WAHN NEVA STAP WERSHIP HIHN EENA DI RAIT WAY

6. Wich chree taim peeryad wi wahn tek wahn kloasa luk pan?

⁶ Wai wi ku bee shoar dat Kristyanz wahn kantinyu wership Jehoava di rait way, eevn wen tingz geh haad? Wi ku bee shoar bikaaz di Baibl tel wi dat di taim weh wee di liv eena difrent fahn di taim wen di Izrelait dehn mi liv ahn fahn di taim afta di apasl dehn mi ded. Mek wi tek wahn kloasa luk pahn dehnya chree taim peeryad: (1) Di taim wen di Izrelait dehn mi liv, (2) di taim afta di apasl dehn mi ded, ahn (3) di taim weh wee di liv eena, wen “evriting wahn bee nyoo agen.”—Aks 3:21.

7. Wai di faytful Izrelaits neva geh diskorij wen ada Izrelaits ahn di king dehn mi ton gens Jehoava?

⁷ Di taim wen di Izrelait dehn mi liv. Lee wail bifoa Moaziz mi ded, ih tel di Izrelait dehn: “Ah noa dat afta Ah ded unu wahn du wikid tingz an unu wahn stap obay di komanment dehn weh Ah giv unu.” (Deut. 31:29) Moaziz mi aalso waan di Izrelaits dat if dehn ton gens Gaad, ada nayshanz mi wahn kehr dehn az priznaz fahn owta Izrel. (Deut. 28:​35, 36) Yu tink dat evriting weh hihn seh mi kohn chroo? Yes. Fi honjridz a yaaz, wahn lata di king dehn weh mi-di rool oava Izrel neva obay Jehoava, ahn di peepl fala dehn ahn wership faals gaadz. Soh Jehoava mi ponish di wikid Izrelait dehn an ih neva alow nohmoh Izrelait king afta dat. (Ezek. 21:​25-27) Bot som a di Izrelait dehn mi faytful, ahn wen dehn mi si dat evriting weh Jehoava seh mi-di kohn chroo, dat mi gi dehn di korij fi stay faytful.—Isa. 55:​10, 11.

8. Wai wi noh sopraiz dat lata di Kristyanz eena di sekant senchri mi ton apastayt?

⁸ Di taim afta di apasl dehn mi ded. Ih noh sopraiz wi fi si dat di Kristyan kangrigayshan mi geh korop afta di apasl dehn mi ded. Wai? Bikaaz Jeezas mi don prafesai dat mi wahn hapm. (Mach. 7:​21-23; 13:​24-30, 36-43) Di apasl Paal, Peeta, ahn Jan mi seh dat Jeezas prafesi  mi don staat tu kohn chroo eena di fers senchri C.E. (2 Tes. 2:​3, 7; 2 Peet. 2:1; 1 Jan 2:18) Joorin di sekant senchri C.E., di Kristyan kangrigayshan mi geh korop. Ahn di Kristyanz weh mi ton apastayt jain Babilan di Grayt, weh stan fi aala faals rilijan. Dis da jos moa proof dat Jeezas prafesi kohn chroo.

9. How di taim weh wee di liv eena difrent fahn di taim a di Izrelaits ahn di taim afta di apasl dehn mi ded?

⁹ Di taim wen “evriting wahn bee nyoo agen.” Fi wee taim difrent fahn di taim a di Izrelaits ahn di taim wen di apastayts mi korop di kangrigayshan dehn joorin di sekant senchri C.E. Weh wi kaal di taim wi di liv eena rait now? Wi mait kaal it “di laas dayz” a dis wikid werl. (2 Tim. 3:1) Bot di Baibl taak bowt wahn moa impoatant taim weh mi staat di saym taim laik di laas dayz. Da taim peeryad wahn kantinyu til wen Jeezas, az di King a Gaad Kingdom, ton dis ert intu wahn paradais ahn mek hyoomanz perfek. Dis da di taim peeryad weh di Baibl kaal di taim wen “evriting wahn bee nyoo agen.” (Aks 3:21) Dis taim peeryad mi staat eena 1914. Bot weh mi hapm wen da taim peeryad mi staat? Jeezas mi staat rool az King da hevn. Soh now Jehoava ga wahn roola hoo reprizent Ahn, wan weh kohn fahn Dayvid famili lain. Bot dat da noh di onli ting weh Jehoava du. Jehoava mi help ih faytful servants pahn di ert fi staat wership ahn eena di rait way agen! (Isa. 2:​2-4; Ezek. 11:​17-20) Bot yu tink dat pyoar wership wahn geh korop aal oava agen?

10. (a) Weh di Baibl prafesai wahn hapm tu pyoar wership eena fi wee taim? (Isaiah 54:17) (b) Wai dehndeh prafesi gi wi komfert?

¹⁰ Reed Isaiah 54:17. Now mek wi tink bowt da prafesi. Ih seh: “No wepan weh dehn bring gens yu wahn ga eni kaina sokses”! Dehnya werdz di kohn chroo rait now, ahn dis neks paat a da prafesi di kohn chroo joorin fi wee taim tu: “Jehoava wahn teech aala yu pikni, ahn yu pikni dehn wahn ga lata pees. Yu fongdayshan wahn bil pahn raichosnis. . . . Yu noh wahn frayd fi notn ahn yu noh wahn ga no reezn fi feel fraitn, kaaz notn weh fraitnin wahn kohn kloas yu.” (Isa. 54:​13, 14) Dat gi wi lata komfert, noh chroo? Wee ku chros dat nat eevn Saytan, “di gaad a dis werl,” ku stap di werk weh Jehoava peepl di du fi teech adaz bowt Jehoava. (2 Kor. 4:4) Pyoar wership wahn laas fareva an ih wahn neva geh korop eva  agen. No wepan weh dehn bring gens wi wahn ga eni kaina sokses!

WEH WAHN HAPM TU DI ADA SHEEP?

11. Wai wi ku bee shoar dat Jeezas falowaz weh deh pahn di ert noh wahn geh lef pahn dehn oan afta dehn anointid bradaz ahn sistaz goh da hevn?

¹¹ Wen di anointid bradaz ahn sistaz goh da hevn, weh wahn hapm tu Jeezas falowaz pahn ert? Wi noh need fi bee frayd, bikaaz Jehoava put ih Son in chaaj. Jeezas Krais da wi Shepad ahn di hed a di Kristyan kangrigayshan. Jeezas ihself seh: “Unu onli ga wan Leeda, ahn da di Krais.” (Mach. 23:10) Jeezas wahn mek shoar ih du ih jab az fi wee King. Di Baibl noh gi wi aal di deetaylz bowt how Jeezas wahn help ih peepl joorin da taim. Soh mek wi luk pahn sohn Baibl egzampl weh wahn giv wi komfert dat Jehoava ahn Jeezas wahn neva lef wi pahn wi oan.

12. How Jehoava mi tek kayr a ih peepl (a) afta Moaziz mi ded? (b) afta Ilaija mi geh wahn nada asainment? (Koment pahn di picha.)

¹² Moaziz mi ded bifoa di Izrelaits mi gaan eena di Pramis Lan. Soh weh hapm tu Gaad peepl? Yu tink Jehoava mi stap help ih peepl afta Moaziz mi ded? No! Az lang az fi hihn peepl mi stay faytful, Jehoava mi tek kayr a dehn. Bifoa Moaziz mi ded, Jehoava mi tel Moaziz fi pik Jashwa fi leed di peepl. Fi wahn lata yaaz, Moaziz don mi-di chrayn Jashwa fi leed di peepl dehn. (Eks. 33:11; Deut. 34:9) Pahn tap a dat, di nayshan a Izrel mi ga lata man weh mi kwalifai fi tek di leed. Fi egzampl, som a dehn da-mi cheef oava wahn towzn, wahn honjrid, fifti, an eevn ten peepl. (Deut. 1:15) Soh Jehoava mi mek shoar dat hihn tek gud kayr a ih peepl. Mek wi luk pahn Ilaija egzampl tu. Fi yaaz, Ilaija mi help di peepl eena di ten-chraib kingdom a Izrel fi wership Jehoava. Bot laytaraan, Jehoava mi giv ahn wahn nyoo asainment fi mek ih goh da Jooda. (2 Ki. 2:1; 2 Chron. 21:12) Soh weh mi hapm tu di faytful peepl weh mi liv eena di ten-chraib kingdom? Jehoava mi lef dehn pahn dehn oan? No! Eevn bifoa Ilaija geh ih nyoo asainment, ih mi don staat chrayn Ilaisha fi sohn yaaz. Joorin da taim, dehn mi aalso ga sohn kaina skool weh di prafit dehn mi geh chraynin. (2 Ki. 2:7) Soh wi si dat Jehoava mi aalwayz mek shoar dat ih ga lata faytful man fi tek di leed ahn help ih peepl. Notn mi stap Jehoava perpos fahn kohn chroo, ahn hihn mi aalwayz tek kayr a ih faytful servant dehn.

13. Weh Jehoava pramis wi da Heebrooz 13:5b? (Koment pahn di picha.)

 ¹³ Now dat wi don diskos dehnya egzampl, weh yoo tink wahn hapm tu Jeezas falowaz weh deh pahn ert wen aala di anointid bradaz ahn sistaz goh da hevn? Wi noh need fi wanda weh wahn hapm, bikaaz di Baibl tel wi playn ahn schrayt weh Jehoava wahn du fi ih peepl pahn ert. Jehoava wahn neva lef dehn ner stap help dehn. (Reed Heebrooz 13:5b.) Jos laik Moaziz an Ilaija, di smaal groop a anointid bradaz weh di tek di leed noa dat ih impoatant fi chrayn ada bradaz. Soh fi wahn lang taim now dehnya bradaz fahn di Govanin Badi di chrayn bradaz fahn di ada sheep fi tek di leed. Fi egzampl, dehn set op wahn lata skool fi chrayn eldaz, serkit oavaseeyaz, Branch Komiti membaz, Betel oavaseeyaz, an adaz. Membaz a di Govanin Badi chrayn bradaz fi help dehn eena di difrent Govanin Badi komiti. Dehnya faytful bradaz ga wahn lata rispansabiliti eena Jehoava aaganaizayshan. Soh Jehoava don pripyaa dehnya bradaz fi kantinyu di werk ahn tek kayr a Jeezas sheep afta di anointid goh da hevn.

14. Weh impoatant point wi need fi memba fahn dis diskoshan?

¹⁴ Fahn weh wi diskos soh faar, dis da di point: Kloas tu di en a di grayt chribyulayshan, wen di laas a di anointid bradaz ahn sistaz goh da hevn, Jehoava peepl weh deh ya pahn di ert wahn kantinyu wership hihn eena di rait way. Wi graytful fi wi Leeda, Jeezas Krais, kaaz hihn wahn mek shoar dat pyoar wership kantinyu! Joorin da taim, wahn groop a nayshan weh di Baibl kaal Gag a Maygag wahn atak Gaad peepl. (Ezek. 38:​18-20) Bot da atak wahn onli laas fi wahn lee wail, an ih noh wahn ga no sokses. Dehn wahn kyaahn stap Gaad peepl fahn wership hihn. Jehoava wahn sayv ih peepl fi shoar! Eena wahn vizhan, di apasl Jan mi si wahn “big krowd a peepl.” Dehnya peepl da Jeezas ada sheep. Jan mi fain owt dat dis “big krowd a peepl” da di wan dehn weh “paas chroo di grayt chribyulayshan.” (Rev. 7:​9,  14) Soh wi noa fi shoar dat Jehoava wahn sayv dehn!

15-16. Akaadn tu Revilayshan 17:​14, weh di anointid Kristyanz wahn du joorin di waar a Armagedon, ahn wai dat inkorijin fi noa?

¹⁵ Stilyet, wi mait wanda, ‘Weh di anointid wanz wahn du wen dehn goh da hevn?ʼ Di Baibl ansa dis kweschan wen ih tel wi dat di govament dehn a dis werl wahn “waar wid di Lam.” Af koars, dehn wahn looz dis waar. Di skripcha seh “di Lam wahn win di vikchri.” Bot hoo wahn help ahn? Di saym skripcha seh di wan dehn weh Gaad “kaal,” weh hihn “chooz,” ahn weh “faytful” tu hihn. (Reed Revilayshan 17:14.) Hoo dis vers di taak bowt? Di anointid wanz weh don geh rezorek ahn deh da hevn. Soh, kloas tu di en a di grayt chribyulayshan, eni anointid wanz weh stil deh pahn di ert gwehn da hevn. Wan a dehn fers asainment da hevn wahn bee fi fait eena da waar. Dat da wahn amayzin asainment! Som a di anointid Kristyanz yoostu fait wid adaz bifoa dehn mi staat serv Jehoava. Som eevn yoostu bee soaljaz, bot dehn mi chaynj ahn dehn mi laan fi bee chroo Kristyanz. Dehn mi laan how fi liv eena pees wid adaz. (Gal. 5:22; 2 Tes. 3:16) Dehn stap sopoat ahn tek paat eena eni waar. Bot wen dehn goh da hevn, dehn wahn fait lang wid Jeezas ahn di aynjelz eena di fainal waar gens Jehoava enimi dehn.

¹⁶ Dat amayzin, noh chroo? Rait ya pahn ert, som a di anointid Kristyanz don oal ahn week, bot wans dehn geh rezorek tu laif da hevn dehn wahn veri powaful ahn dehn wahn kyaahn ded. Dehn geh di asainment fi fait langsaid dehn King, Jeezas Krais, hoo da wahn maiti Wariya. Afta di waar a Armagedon finish, dehn wahn werk lang wid Jeezas fi help hyoomanz fi bee perfek. Fi shoar, wen dehn deh da hevn, dehn wahn ku du wahn lat moa fi dehn bradaz ahn sistaz dan wen dehn mi liv pahn ert az imperfek hyoomanz!

17. How wee noa dat aala Gaad servants wahn bee sayf joorin di waar a Armagedon?

¹⁷ If yoo da paat a di ada sheep, den weh yoo wahn du wen Armagedon staat? Di ansa simpl: Chros eena Jehoava ahn lisn tu eni dairekshan hihn gi wi. Weh kaina dairekshan wi mait get? Di Baibl seh: “Mi peepl, unu goh haid eena unu room ahn kloaz unu doa. Haid unuself fi wahn lee wail til Gaad anga paas.” (Isa. 26:20) Dat onli komfertin, noh chroo? Aala Gaad faytful servant dehn da hevn ahn pahn ert wahn bee sayf joorin da taim. Jos laik di apasl Paal, wee noa fi shoar dat no “govament, ner tingz weh deh ya, ner tingz weh wahn kom . . . ku stap Gaad fahn lov wi.” (Roam. 8:​38, 39) Neva ferget dat Jehoava lov yu, ahn hihn wahn neva lef yu!