1. Kaba san dan sielu hamá sun kristiánugu anuadirúaaña?

 LÚMAGIÑE burí irumu le sügühalibei, álügüdaguatiwa wagía lubúeingu Heowá woungua: “Ídaba funa san hanügǘwa hagumuhóun kristiánu anuadirúaaña sielun?”. Afiñetiwa meha luagu aban dan, háfuriduba lan fiu kristiánugu anuadirúaaña lídangiñe Arümahedón ani hawinwanduba lan lidan Paraísu luagu fiu dan. Lau sun lira, furendeitiwa tidan Garüdia Atalaya to lánina 1 lidan sedü-hati irumu 2013, luagu sun lan kristiánugu anuadirúaaña ha ubouagubaña hanügǘba lan sielun lubaragiñe lagumeserun Arümahedón (Mat. 24:31).

2. Ka álügüdahani gayaraabei liabin wachügüwagun? Ani kaba wakutihani lidan aturiahani le?

² Ligíati, gayaraati liabin álügüdahani le hachügüwagun: Kaba san asusereda houn “amu mudún” ha eseriwidubaña lun Heowá ya ubouagu lidan “saragu asufuriruni”? (Mat. 24:21; Huan 10:16). Másiñati hadiheriduba lan fiu íbirigu ladüga ibidiñebei lan houn kaba lan hadüga danme úaaña kristiánugu anuadirúaaña ya ubouagu lun hadundehaniwa. Ariha wamá bián abahüdaguni le gayaraabei ladügün lun hasaminarun ítara. Warihuba giñe anihein lan saragu resun lun madiheridun wamá.

LE LUNBEI MASUSEREDUN LAN

3, 4. Ka gayaraabei hálügüdagun fiu íbirigu houngua, ani ka uagu?

³ Másiñati hálügüdagun fiu íbirigu houngua anhein hadiseduba lubéi amu mudún luéi inarüni danme le úaaña lílana Musu Úaraguati ya ubouagu lun hadundehaniwa. Ka uagu? Ariha wamá fiu abahüdaguni le adügübei lun hasaminarun ítara. Le furumiñeti layanuhaba luagu Hoyadá fádiri le íñutimabei, aban lubúein Heowá le buiti. Ligía tau sun lan weiriou Hosewa, aba hagüriahani aban irahü le gíribei Hoasi ani íderagua  hamuti lun aban lan urúei úaraguati ani le buiti. Dan meha le wínwangili Hoyadá, madisedunti Hoasi luéi Heowá. Gama lumoun, dan le lóunwenbei Hoyadá aba lagumeserun Hoasi adügei katei wuribati. Aba lígirun lun hadundehani ábutigu wuribatiña ha Hudaabaña ani aba ladisedun luéi Heowá (2 Kro. 24:​2, 15-19).

⁴ Le libiaman hénpulu, hawaguti kristiánugu ha lánina libiaman sígulu. Huan, le lagumuhóun apostolu le óunwebei, ruti meha aban lubuidun hénpulu houn saragu kristiánugu. Íderagua lumutiña kristiánugu ha lun úaragua hamá lun Heowá (3 Huan 4). Ani ítara kei meha lani Hesusu apostolugu ha úaraguabaña, ageindaguati apostolu Huan lau sun lere lun lóunigiruni damuriguaü hawéi ha agarabaagubaña lun inarüni (1 Huan 2:18). Lau sun lira, lárigiñebei lounwen apostolu Huan, aba laburuchagun arufudahani iyeeniti kei aban sandi galugurahati, ani fiu irumu lárigiñe aba laburuchagun arufudahani iyeeniti lidan sun damuriguaü kristiánugu sunsuinagubei.

5. Ka katei moun lubéi wasaminaruni luagu bián abahüdaguni le?

⁵ Lasusereduba funa san ligiaméme houn amu mudún danme le hanügǘn ha anuadirúaaña sielun? Hadiseduba funa san luéi Heowá ítara kei Hoasi? Hagarabaaguba san luagu arufudahani inarüniti ítara kei saragu kristiánugu lidan libiaman sígulu? Uá, mítaranbei! Chouru wamuti lau sun úaaña lanme kristiánugu anuadirúatiña ya ubouagu hasigiruba amu mudún eseriwida lun Heowá lau úaraguni ani lóunigirubaña buidu. Ida liña wasubudiruni?

MAWIYEDÚNBEI ÁHUDURAGUNI INARÜNITI

6. Ka ǘrüwa dan lunbei wakutihani?

⁶ Ka uagu chouru wabalin, mawiyedunbei lan áhuduraguni inarüniti lau sun anitebei lan dan hénrenguti? Ladüga arufudahatu Bíbülia amu lan dan le ídanbei wawinwanda luéi hadaani ísüraelina luma luéi hadaani kristiánugu ha lánina libiaman sígulu. Ligíati, akutiha waméi dan burí le: 1) lidaani binadu Ísüraeli, 2) lárigiñebei hóunwegun apostolugu luma 3) lidaani “laranseruni Bungiu sun katei”, mini lan, lidan wadaani (Adü. 3:21).

7. Ka uagu moun lumuti lubéi meha lábürühan harüna ísüraelina ha úaraguabaña dan le hadügün saragu ísüraelina hama urúeigu katei wuribati?

⁷ Lidaani binadu Ísüraeli. Murusun dan lubaragiñe lounwen Moisesi, ariñagati houn ísüraelina: “Ladüga subudi numuti lárigiñe lanme nounwen hagadeiruba lan ábanme hígiruni üma le úagubei nariñaga hun lun hafalaruni” (2 Lur. 31:29). Wéridi lumutiña giñe ánhaña lan agarabaagua luagu Heowá, lígiruba lan Heowá lun hanügǘn hageiragiñe (2 Lur. 28:​35, 36). Gúnfuliti san le lariñagunbei Moisesi? Anha. Luagu saragu sígulu, anúadiratiña saragu urúeigu lun maganbadi hamá lun Heowá ani falá hamutiña hiibe-agei ísüraelina. Ligíati, aba labeichuniña Heowá ha maganbadibaña ani aba mígirunhaali lan lun garúeite hamá ísüraelina (Ese. 21:​25-27). Ruti dǘgüdaguaü houn ísüraelina ha úaraguabaña harihini lagunfulirun sun katei le (Isa. 55:​10, 11).

8. Ka uagu moun lumuti lubéi taweiridun wanigi luagu lawiyedúniwa damuriguaü kristiánu lidan libiaman sígulu?

⁸ Lárigiñebei hóunwegun apostolugu. Maweiriduntu wanigi luagu lawiyedúniwa damuriguaü kristiánu lidan libiaman sígulu. Ka uagu? Ladüga ariñagaali meha Hesusu hagarabaaguba lan gürigia luagu inarüni (Mat. 7:​21-23; 13:​24-30, 36-43). Lidan furumiñeti sígulu, ariñagatiña apostolugu Pábulu, Féduru luma Huan gumeseeli lan agarabaaguni luagu inarüni le úagubei layanuha Hesusu (2 Tesa. 2:​3, 7; 2 Fe. 2:1; 1 Huan 2:18). Murusun dan  lárigiñe lounwen lagumuhóun apostolu, kristiánugu ha agarabaagubaña luagu inarüni, aba tánigu haña lan Babilónia to Wéiriboun, mini lan le, sun relihión mama inarünitu to ubouaguboun. Ábaya lagunfulirun le lariñagubei Hesusu.

9. Ida liña amu lan wadaani luéi bián dan le uágubei wayanuha lidan párafu le lubaragiñebei le?

⁹ Lidaani “laranseruni Bungiu sun katei”. Amu wadaani luéi lidaani binadu Ísüraeli luma damuriguaü le lídanbei libiaman sígulu, dan le meha laburuchagunbei agarabaaguni luagu inarüni lidan damuriguaü kristiánu. Ida liña laguarún lun dan le ídanbei wawinwanda? Wátiwa lun “lagumuhóun dan” (2 Tim. 3:1). Ariñagatu Bíbülia lídanmeme lan dan ligía aba lagumeserun amu dan le migifetimati ani le súdinitimati. Wáwati lun lidaani “laranseruni Bungiu sun katei” (Adü. 3:21). Gumeseti lidan irumu 1914 ani lagumuchuba danme le gidawaali figóu ani ábanhalime paraísu sun Ubóu lábugiñe larúeihan Mesíasi. Ani ka katei laranserubei Heowá lidan irumu 1914? Gumeseti Hesusu arúeiha sielu lidan larúeihan Heowá, ligíati, garúeite hali meha Heowá hádangiñe ladügawagun Dawidi. Mámarügüñein lira. Murusun dan lárigiñe, chülüdügaali meha dan lun laranseruni áhuduraguni inarüniti (Isa. 2:​2-4; Ese. 11:​17-20). Lawiyedayaba funa san áhuduraguni inarüniti?

10. a) Ka tariñagubei Bíbülia luagu áhuduraguni inarüniti lidan wadaani? (Isaíasi 54:17). b) Ka uagu líchiga dǘgüdaguaü woun le lariñagubei Isaíasi?

¹⁰ (Aliiha huméi Isaíasi 54:17). Teni wamá lun le lariñagubei profesía le: “Úagili ni aban adügütu áruma to lunboun tagünrinchagunibu”. Lagunfuliruña bérusu le uguñe weyu. Lagunfuliruña giñe dimurei burí le: “Narufudahaba houn sun birahüñü, buídubei dan houn sun hagía. Léredagüdübadibu irichaü bagidarúba lábugiñegiñe lidere dan luma anufudei mañawarihan láadibume anufudei” (Isa. 54:​13, 14). Mabafuti ni Satanási “lubungiute ubóu le” lun lararamuni arufudahani tídangiñeti Bíbülia le hadügübei lumutuniña Heowá (2 Ko. 4:4). Aranserúalime áhuduraguni inarüniti. Mawiyedun wáalime! Úatu ni aban áruma to lunboun tagünrinchaguniwa.

LE LUNBEI LASUSEREDUN

11. Ka uagu chouru wabalin mabulieidunwabaña lan saragu gürigia danme le hanügǘn kristiánugu anuadirúaaña sielun?

¹¹ Kaba asusereda danme le hanügǘn kristiánugu anuadirúaaña sielun? Haritagua waméi Hesusu lan Wábutibei ani ligía lan tichügüdinabei damuriguaü. Ligía guánarügü ariñagubei:  “Kristurügüñein Habuti” (Mat. 23:10). Hesusu le Warúeite lóunigirubadiwa súnwandan. Ligíati, lau lídehan úabei ni kata lun lanufudedagüdüniña kristiánugu ya ubouagu. Le linarün katei, ibidiñeti woun kábatima lan ladüga Hesusu hawagu lumutuniña Heowá lidan dan ligía. Íbini ítara, anihein fiu hénpulu tídangiñeti Bíbülia le gayaraabei líchugun darangilaü woun. Ariha wamá fiu lídangiñe.

12. a) Ida liña lóunigiruniña Heowá lumutuniña lárigiñe lounwen Moisesi? b) Ida liña ladügüni lárigiñe lidin Elíasi eseriwida lidoun amu fulasu? (Ariha huméi giñe dibuhu).

¹² Hilati Moisesi lubaragiñe hebelurun ísüraelina lidoun Fulasu Füramasewati. Kati asuseredubei houn lumutuniña Bungiu? Sin lídehan wügüri úaraguati le, rédeitiña funa san hábuguarügü úouga kaba lan íderaguaña? Úa, ladüga anihein meha Heowá hama sun dan le gaganbadi habéi lun. Kei hénpulu, lubaragiñe lounwen Moisesi, ariñagati Heowá lun Hosueba lan alidihaña lubúeingu, aban wügüri le meha arufudahaali Moisesi lun luagu saragu irumu (Afu. 33:11; 2 Lur. 34:9). Lanwoun lira, añahein meha saragu wügüriña ha chúbaña aau ha meha adundehabaliña lubúeingu Heowá, kéiburi: ha arihaña hawagu milu, ha arihibaña hawagu san, ha arihaña hawagu dimí san luma hawagu diisi (2 Lur. 1:15). Góunigiwatiña meha lumutuniña Heowá buidu. Anihein giñe lani Elíasi hénpulu. Luagu saragu irumu íderagua lumutiña ísüraelina lidan háhuduragun lun Heowá. Lau sun lira, chülüti dan lun lóunahani Heowá lidoun amu fulasu le luéigiñebei suru libiti Hudá (2 Uru. 2:1; 2 Kro. 21:12). Rédeitiña funa san lumutuniña Heowá ha lánina diisi türibu le Ísüraelibei hábuguarügü? Ua, ladüga arufudahaali meha Elíasi lun Eliséu luagu saragu irumu. Lanwoun lira, añahein meha harahüñü profetagu lun híderaguniña ani genegeti añahein lan meha “profetagu” ha tidan somu leskuela (2 Uru. 2:7). Kei aubei warihei, súnwandan añahein meha wügüriña úaraguatiña ha adundehabaliña lumutuniña Bungiu. Ligíati, sigiti Heowá agunfulira lau le labusenrubei ladügün ani góunigi lumutiña lumutuniña ha úaraguabaña.

13. Ka ichouruni líchugubei Ebüréu 13:5b woun? (Ariha humóun giñe iyawaü).

¹³ Lau wasaminarun luagu hénpulu burí le tídanbei Bíbülia, kaba san asusereda houn lubúeingu Heowá ha lúnbaña herederun ya ubouagu danme le houdin kristiánugu anuadirúaaña sielun? Mama mosu wasaminarun saragu luagu: chóurugüda tumuti Bíbülia woun maweiyasunbei lan Heowá ígiraña (aliiha huméi Ebüréu 13:5b). Ítara kei  meha Moisesi luma Elíasi, subudi hamuti kristiánugu anuadirúaaña ha adundehabaliña lumutuniña Heowá uguñe weyu súdiniti lan lun larufudahóun houn amu. Luagu saragu irumu, harufudahaña lílana Musu Úaraguati houn wügüriña ha hádangiñetiña amu mudún lun hadundehani apurichihani. Kei hénpulu, adügǘwaaru saragu leskuela lun larufudahóun houn wéiyaaña lidan afiñeni, houn óunigirutiña sirkuitu, houn ha arihibaña tau Sukursáli, houn betelitagu tuma amu leskuela tíbeina to. Lanwoun lira, harufudahaña giñe lílana Musu Úaraguati houn fiu íbirigu lun heseriwidun kei ídehatiña lidan burí ámuñegueinarügü sétanu. Ligíati, heteniruña ídehatiña ha lun saragu dasi. Chóuruti, aranseeña lan íbirigu ha lun hóunigiruniña lánigu Hesusu ya ubouagu.

14. Ka katei súdinitimabei lidan aturiahani le?

¹⁴ Anihán fánreinti le súdinitimabei lidan aturiahani le: danme le hanügǘn kristiánugu anuadirúaaña sielun lidan lagumuchagüle saragu asufuriruni, hasigiruba lubúeingu Heowá áhuduragua lun lau úaraguni ya ubouagu. Lau Hesusu kei Hábuti, hasigiruba lumutuniña Heowá áhuduragua lun. Inarüni lídanme dan ligía lábürühaba aban sétanu hani néchanigu furundeti hawagu, watu Bíbülia lun sétanu le Gogu le Magoguna (Ese. 38:​18-20). Lau sun lira, madurarunbei furundei ligía luagu saragu dan, ani mibihin habéi le habusenrunbei lun hígiruni lumutuniña Heowá háhuduragun lun. Chouru wamuti, lesefurubaña lan Heowá. Lidan aban arufudúni, arihati apostolu Huan “saragu gürigia” ha lídangiñetiña amu mudún ani ariñawagúati lun lídangiñe lan “óunwenbu asufuriruni” háfurida “saragu gürigia” hagía. Ligíati, furangu lubéi hesefuruba lan (Aruf. 7:​9, 14).

15, 16. Según Arufudúni 17:​14, kaba hadüga kristiánugu anuadirúaaña lidan wuribu Arümahedón, ani ka uagu ru lubéi dǘgüdaguaü woun wasubudiruni katei le?

¹⁵ Háfuga wálügüdagun woungua: Anti kristiánugu anuadirúaaña? Kaba hadüga danme le añaheinhaña súngubei sielu? Ariñaga tumuti Bíbülia furangu hageindaguba lan polítiku lánina ubóu le “luma Mudún”, gama lumoun, ‘lagañeirubaña Mudún’. Ani kaba íderaguei agañeira? Ariñagati bérusu le: “Sun  lánigu ha lanúadirubaña Bungiu ani gúnfuli hagía luma” híderagubei lan, mini lan le, kristiánugu anuadirúaaña ha águyugubaña sielu (aliiha huméi Arufudúni 17:14). Ligíati, danme le añaheinhaña sun kristiánugu anuadirúaaña sielu, aban lídangiñe furumiñeti dasi le lunbei hibihini, hageindagun. Ma lanarime lubuidun dasi le! Añahein meha hádangiñe anuadirúaaña ha hínsiñeti meha ageindaguni houn lubaragiñe meha gefén hamá luagu Heowá. Añahein giñe hádangiñe asudarahatiña meha. Íbini ítara, aba hadügagun houngua kristiánume ani ígira hamuti anarimeni ani furendeihaña awinwanda lidan darangilaü (Gal. 5:22; 2 Tesa. 3:16). Lau sun lira, danme le siéluhaña, hageindaguba úara luma Hesusu luma úara hama lani ánheligu lidan lagumuhóun wuribu hama láganigu Bungiu.

¹⁶ Samina wamá luagu le: añahein hádangiñe kristiánugu anuadirúaaña ya ubouagu derebuguhaña lidan irumudiri ani méreeña. Lau sun lira, danme le sielu haña, ánheligu hañame ha móunwedaditiña ani gabafubaña ani hageindaguba úara luma Hesusu Urúei le gawuribuhadibei. Lárigiñe wuribu Arümahedón, híderagubei Hesusu lun lagidarún figóu hawéi gürigia. Chóurutiwa, gíbetimabei lan le gayara habéi adüga siélugiñe hawagu íbirigu luéi le gayara habéi adüga ya ubouagu kei gürigia gafigountiwa.

17. Ida liña wasubudiruni hesefuruba lan sun lumutuniña Bungiu lídangiñe wuribu Arümahedón?

¹⁷ Hádangiñetün san amu mudún? Anhein ítara liña lubéi, ka lunbei hadügüni lidan wuribu Arümahedón, aban dan wéiriti lisudinin? Lérügüba hadüga: afiñe humá luagu Heowá ani falá huméi ladundehan. Másiñati mosu lan giñe gaganbadi humá lun le lariñagubei Isaíasi 26:20: “Belú humá húbiñoun hadouragueime bena haugua. Aramudagua humá luagu murusun dan, darí lásügürün ligañi Wabureme”. Ruti darangilaü woun wasubudiruni hesefuruba lan lidan dan le sun lumutuniña Bungiu dandu ha siélubaña kei ha ubouagubaña. Ítara kei apostolu Pábulu, chouru wamuti úa lan ni kata lun “lafanreinraguniwa luéi línsiñehabu Bungiu” ni gumadimatiña, “ni katei le guentobei, ni le lunbei liabin” (Rom. 8:​38, 39). Maweiyasun humá abulieidei: Hínsiñetün lun Heowá ani maweiyasunbei ígiraü.