1. Ihē yip tö hachāmö elkui Kristīön nö ṙòkhöre nö chuh el halīöng?

 SAMYEŪHEU ṙô-angen mufē yin më tarik Yāvē nö ngölōn, ‘ihē aich min më tö ōttit töhachāmö elkui Kristīön nö chuh el halīöngö?’ Ngöṙôlōn inrē sin ayī-ö tö më rīkre tö hachāmö elkui Kristīön nö rahëichtökūö sin min nö ikūö ngih panam yěn Peretāis unôichrit ngam Armakētòn. Mikahtökūö pöri ayī-ö öi in ngam Chūökamahati, 15 Chulāi 2013 nö kēlöng min më töhachāmö elkui Kristīön nö chuh el halīöngö urěhēkūö ranulten ngam Armakētòn.—Mët. 24:31.

2. Asuh nup yamih intöönö elkuilōn yip rīkre tarik hēk asuh nup tö hòṅ mikahkūö hī?

² Lohten inrē yip rīkre tarik nö ngölōn: Sitih inlahen aich min më tahëng kiteūm Kristīön nö chiplö nö löklōn Yāvē ip ṙētak öp tökiröng kanihngen? (Yôh. 10:16; Mët. 24:21) Pön ngölōn cha-a yěn ṙòkhöre min më tö hachamö elkui prötör sistör nö chuh el halīöngö ngaich höng öt mahayöngkūöṙen min cha-a. Töi ngëichkö në tö nët inlahngen imat ngam Paipöl tö lāinyngen më prötör sistör hī nö ngatī mufē. Töi chumkūöṙen pöri tö në tahëng lainyngen öi kūö yòh öi ötkô ngatī mufē.

ASUH ÖP MIN TÖT INLAHEN?

3-4. Asūp afēkö yip rīkre prötör sistör, ngaich kūö yòh?

³ Ngö mufē më rīkre prötör sistör tö cha nö öt köp nö im kanô-en yēḵ më Yōm La-en min nö öt ōt nö ing panam. Lohten inrē cha-a nö kūö nup haköpre inlahngen imat  ngam Paipöl nö ngatī mufē. Töi chumkūöṙen ngëichkö në tö nët inlahngen. Ngam raneh ik hē ṙētak ngam mākūö kūönṙô Yēhōyata. Tö chiplö anga-aṅ nö Tarik Yāvē. Nëtre tak cha-a tö ngam pīhö ò Yēhōsapēat nö laklö ngam nyīö Yô-as. Haköpten ò cha-a tö ngam tölöng talöökö, lökten anga-aṅ nö tö akaha nö rācha. Hanöng sā ngam mākūö kūönṙô nö ṙömöng aṅ köp ang Yô-as nö löklōn Yāvē hēk kēken minë tötlöök inrē la-en. Unôchrit inlahen Yēhōyata nö kapah, hangṙô yik tötlöök rācha ngaich anga-aṅ aṅ Yūta hēk ṙāngenre inrē anga-aṅ nö löklōn Yāvē—2 Kin. 24:2, 15-19.

⁴ Ngih inrē inlahen yik Kristīön ik innëtö senchurī (unôichrit ngam tö 100 B.C.). Ik sā yik haköptö Yēsū nö ṙömöng aṅ, pōyen tī cha-a nö hayööken yip Kristīön nö i linöökö lōn Yāvē. Ngatī inlahen ök inrē Yôhan nö söl kinpahare nö hayööken cha. (3 Yôh. 4) Ma-anyre ang Yôhan nö laklen më Kristīön tö minë töminyôny inköphöti el minë māṅ. Sā ma-asökngöröön u anga-aṅ nö sā inlahen yik rīkre tanīnöṙô. (1 Yôh. 2:18; 2 Tös. 2:7) Unôichrit kinpaha Yôhan ngaich ngam tövaich inköphöti nö keuheūtngöre nö chūök nö parāti nö sā inlahen ngam tameūyö nö el minë māṅ. Lökten ngaich nö öt köpsören hanëtö minë maṅ.

5. Asūp I tötkô nö afēkö hī yěi haköp inlahen në tö nët inlahngen imat ngam Paipöl?

⁵ Tö ngö manah hòng në tö nët inlahngen tö më tahëng kiteūm Yēsū nö ngatī inlahen min yēḵ më tö hachāmö elkui Kristīön nö chuh el halīöngö? Ṙāngenre hòng min më töchiplö Kristīön nö lök el ngam tölöng talöökö nö sā inlahen Yô-as hēk tö yik Kristīön inrē ik innëtö senchurī? Hö-ö, Öthō nö ngatī! Mihôiṅ in ṙatö-ellōnre tö më tahëng kiteūm min nö chiplö nö löklōn Yāvē, pò Yāvē min nö chumkūöṙen tö cha pòrô më tö hachamö elkui Kristīön min nö ngaich nö chuh el halīöngö. Kūö yòh öi mihôiṅ ṙatö-ellōnre in e?

ÖT HĒK MIN NÖ HACHŌICHI NGAM TÖHET VINË-EKŪÖ YĀVĒ

6. Asuh nup i min tö lūöi ṙētak kahakkö hī?

⁶ Kūö yòh öi mihôiṅ ṙatö-ellōnre tö ngam töhet vinë-ekūö ngam Tēv nö öthō nö chōichngöre, yěn pòrô nö yih minë kanihngen? Kūö hī öi vënyu nang tö ngam Paipöl tö inlahen në ṙētak hī töngamuh. Harīkngöre në ṙētak hī tö nuk ṙētak yik Israel hēk tö yik innëtö senchuri Kristīön inrē. Ta-a chěi töi kakkö në tö lūöi ṙētak: (1) Ṙētak yik Israel, (2) ṙētak unôichrit kinpaha yik tanīnöṙô, hēk (3) ṙētak nup “taṙòkhöre min nö havantu inlahen nö sā nuk urěh.”—Inl. 3:21.

7. Kūö yòh më tö chiplö Israel nö teūngen tö nganöönöre, pòrô më rācha aṅ Israel tö më tarik nö kēken minë tötlöök la-en?

⁷ Ṙētak yik aṅ Israel. Urēhěkūö kinpahare ang Môsös nö ngö ṙô nö in yik aṅ Israel: “Tön akahalōn chin tö yīö keuheūtngöre tī min hachōichngöre unôichrit kinpaha chu, öi kānngöre tö ngam talöökö ngam tinöölô yīö tö chu.” (Chöö. 31:29) Kētö inlēnö yik aṅ Israel ang Môsös tö cha yěn öt hang ṙô Yāvē min ngaich kē-ě min cha-a nö haköövö. (Chöö. 28:35, 36) Kô-en angū-ö nö ngatī inlahen. Pōyen ngaich yik rācha aṅ Israel tötlöökö la-en hēk ṙūöhngen më tarik inrē tö Yāvē. Lökten ngaich Yāvē nö sō-en cha hēk öt köpsören inrē ngam inyööngö tö cha. (Isi. 21:25-27) Ik sā yip tö chiplö tarik aṅ Israel nö meuk minë ṙô Yāvē nö teungtakūö, löktö in u ngaich cha-a nö teūngen tö nganöönöre hēk köp inrē nö lök in ngam talöökö kanô-en.—Isa. 55:10, 11.

8. Kūö yòh öi ötkô pingangkūö tö inlahen minë māṅ nö chōichngöre in ngam innëtö senchuri? Mikahtökūö hī.

⁸ Unôichrit kinpaha yik tanīnöṙô. Keuheūtngöre ngaich minë māṅ nö chōichngöre im innëtö senchurī. Pingangkūö hòng ayī-ö öi hāngö u? Hö-ö. Pön urěhngöre ṙô ang Yēsū tö inlahen më tarik min nö halôngen ngam tinlööken tökô-en Kristīön. (Mët. 7:21-23;  13:24-30, 36-43) Teungtökūö ngam vahënyö Yēsū nö ik raneh sanchurī. Kūichi inlahen angū-ö tö Pôl, Pītör hēk Yôhan inrē. (2 Tös. 2:3, 7; 2 Pīt. 2:1-3, 17-19; 1 Yôh. 2:18) Chōichngöre ngaich minë māṅ in ngam innëtö senchurī, angū-ö ranultökūö ngam tövaich tinlööken ngam tunö alaha ngam tökiröng Pēpilön. Kô-en minë ṙô Yēsū nö teungtakūö.

9. Sitih inlahen nö harīkngöre ngih ṙētak hī tö nuk ṙētak yik Israel hēk tö nuk ṙētak yik innëtö senchurī Kristīön?

⁹ Ṙētak ‘nup taṙòkhöre min nö havantu inlahen nö sā nuk urěh.’ Ngih ṙētak töngamuh nö öt sā ṙētak yik aṅ Israel misī hēk öt sā ṙētak yik tarik mahalôngen ngam tinlööken tökô-en Kristīön ik innëtö senchurī. Asuh pöri ngih ṙētak hī ayī-ö? Chöngṙen in ṙung öi ngö ṙô tö e nö “manā-aṅ sakāmö” ngam tötlöök. (2 Tim. 3:1) Löktö in ngam Paipöl pöri ayī-ö öi akahakūö tö ngam tahëng hēk ṙētak nö ngaich nö rultenre im 1914, söl im manāngörit ngam tö 1,000 samyeūheu inyööngö tö Yēsū Kristū. Hanöng sā hī öl öi ṙòkhöre hët hēk yēḵ ngih panam inrē nö vī-i nö peretāis. Angū-ö ngih ṙētak nup taṙòkhöre min nö havantu inlahen nö sā nuk urěh. (Inl. 3:21) Asuh nup tö ngaich nö havantöre inlahen nö sā nuk urěh? Vīlöng ang Yēsū nö Rācha ik 1914. Havantöre ngaich ngam inyööngö tö Yāvē nö löktö im rācha ngam lamöknyö in Tāvit. Hěng inrē ngam tö havantu inlahen tö Yāvē, löktö in ò më tarik nö havanlö ngam töhet vinë-ekūö ò! (Isa. 2:2-4; Isi. 11:17-20) Hēk hòng min nö hachōchiyö ngam töhet vinë-ekūö ò?

10. (a) Asuh nup tö urěngöre vīnënyi in në ṙētak hī inlahen ngam töhet vinë-ekūö ngam Tēv? (Isayā 54:17) (b) Kūö yòh öi mihôiṅ teūngen tö nganöönöre öi löktö in në tö vënyu?

¹⁰ Vë-evkūö Isayā 54:17. Töi fēkö inlahen ngih pròfēsi: “Öt hĕng nup min nyahati tövīlöng nö nyahā meh nö kô-òlkui”! Teungtökūö an ngaich ngih ṙô Yāvē nö in ngih ṙētak hī töngamuh, hěng inrē ngih pròfēsi tö ngaich nö teungtakūö in në ṙētak hī: “Ṙòkhöre inrē min yip kūön meh kikōnyö nö haköptu tö ngam Mā Tēv, ngaich pōyen inrē min kanôlòṙen yip kūön meh kikōnyö. Haköpi man min im lanöökö. . . . lökten yī-ö min öt pa-ekūö; ip vanööṙö inrē, pò e min nö öt yih nö röhta nö in yīö.” (Isa. 54:13, 14) Nup la-en më tarik Yāvē töngamuh nö keuheūtngöre chūök nö ing panam nö haköphöti. Öt kanò-òv ngam ‘Tēv ngih panam’ ngam Satān nö asökngen ngih la-en cha. (2 Kòr. 4:4) Havanlöre hēk ngam töhet vinë-ekūö ò ngam töthō min hēk nö chōichngöre. Örheūheu min më tarik Yāvē nö hëtö inlahen nö vë-ekūö ò. Öt hĕng nup min nyahati tövīlöng nö nyahā hī nö kò-òlkui!

 ASŪP MIN UNÔICHRIT INLAHEN YIP TÖ HACHĀMÖ ELKUI KRISTĪÖN YĔN CHUH EL HALĪÖNGÖ?

11. Asūp mihôiṅ ṙinātö-ellōn hī tö më tökiröng kiteūm nö öt ṙā-ayö, pòrô më tö hachāmö elkui min nö chuh el halīöngö?

¹¹ Asuh nup min inlahen yěn chuh el halīöngö më tö hachamö elkui Kristīön? Köpölōn tö Yēsū nö amahten hī öi sīṅp. Anga-aṅ inrē kui ngam māṅ, ngö ṙô anga-aṅ: “Höng hěngtak an ngam mā hī hēk mahachōkūö hī, ang Kristū.” (Mët. 23:10) Löktö el halīöngö ang Yēsū Kristū nö hayöng hēk örheūheu inrē anga-aṅ nö chumkūöṙen tö më tarikre. Öt kihngen ayī-ö yěi hachō-okūö tö Kristū, lökten öi öt yaha mufē. Hö-ö in akahakūö tö inlahen tī Yēsū nö hachōkūö hī, mihôiṅ pöri öi ṙātö-ellōnre tö ò min nö hateungngö ngam la-enre. Töi ngëichken minë inchōḵelmat chěi imat ngam Paipöl, hòn ṙūöhlöre hēk min ngam ṙinātö-ellōn hī.

12. (a) Sitih inlahen ang Yāvē nö chumkūöken më tarikreunôichrit Môsös nö kapah? (b) Sitih inlahen ang Yāvē nö chumkūöṙen tö yik tarikre, ik sā ò nö tīngen Ĕlaicha? (Ngëichköm nyat.)

¹² Kapah ngaich Môsös, urēhěkūö inlahen më aṅ Israel nö chuh im Panam Kinlēḵngô. Ṙāngen më tarik re hòng Yāvē ik sā Môsös nö hö-öv? Hö-ö. Hanöng sā cha nö chiplö nö i linöklōn Yāvē, ngaich chumkūöken cha ang Yāvē. Urēhěkūö kinpaha Môsös ang Yāvē nö ṙò-òv nö in ò tö Yôsuā min nö halēnlöng nö mahachōkūö më tarik. Samyeūheuv rò-òten inrē ang Môsös nö haköpten Yôsuā. (Man. 33:11; Chöö. 34:9) Rö-ö nöng anū-ö, pön pōyen yik tö heuveū-en in më aṅIsrael tö halēnlöng nö, mākūö tököṅnyu, mākūö töṙôngö, mākūö tö taneui anāi hēk mākūö tösöm inrē. (Chöö. 1:15) Chumkūöṙen ang Yāvē tö më tarikre. Töi ngëichkö ngih töhěng inchōḵelmat, ngam ṙētak inlahen Ělaicha ik sā ò nö pròfět më aṅ Israel. Samyeūheuv anga-aṅ nö hayööken më aṅ Israel nö löklōn Yāvē. Tīni ngaich anga-aṅ tö Yāvē nö chuh lā chuhöt i Yūta. (2 Rā. 2:1; 2 Kin. 21:12) Höng ṙā-ayö hòng pökeh më tö söm miyööngö Israel tö chiplö? Öthěng tak hòng mahachōkūö cha? Öt ngatī. Pön samyeūheuv rò-òten ang Ĕlaicha nö haköpten Ĕlaisa. Ngatī inrē më kūön më pròfět nö haköptu. (2 Rā. 2:3) In e mikahkūö ayī-ö tö më tarik ngam Tēv tö chiplö nö hachōkūö më tarik lamölōn ò. Löktö in hī tī inrē ang Yāvē nö hateungngö minë kuilōnre nö chumkūöken më tarik re.

13. Asūp ṙinātö-ellōn hī in ngam Heprāi 13:5b? (Ngëichköm nyat.)

¹³ Yěi chumkūöṙen öi afēkö minë tö vënyu imat ngam Paipöl inlahen më tö hachāmö elkui Kristīön min nö chuh el halīöngö, ngaich asuh min öp unôichrit e? Ötkô in yaha mufē öi fēken u, pöi kētu ṙinātu-ellōn tö ngam Paipöl  tö Yāvē min nö öthō nö ṙāngen më tarik re. (Vë-evkūö Heprāi 13:5b.) Sā inlahen nā Môsös nā Ĕlaicha yin më prötör Yōm La-en nö akaha elmat tö ngam kinëtö trēning më tahëng nö tötṙanāngen. Samyeūheu rò-òten inrē cha-a nö kētö trēning më prötör aṅ el ngam tahëng kiteūm, hòṅ cha nö hachōkūö më sīṅp Yāvē. Rö-ö nöng anū-ö, pön halēnlöng inrē minë iskul më minṙöinylen, iskul më sörkit ovörsīör, Mupakö më Kömiti hēk tö më prötör mahayōmken më aṅ el ngam Pētěl, më misnörī tö më tahëng inrē. Hěnghöre më prötör inrē mahayööken më Yōm La-en ngam kömitī, hakôten re inrē më Yōm La-en nö harunten më prötör. Löktökūö ing töngamuh yin inrē më prötör nö kēken minë tökiröng la-en el ngam söngkötön hēk hīnöre inrē cha-a nö chumkūöken më sīṅp Kristū.

14. Asuh öp mihôiṅ ṙinātö-ellōn hī in minë tö kakka taheui tö hī?

¹⁴ Sön min nö köp ngam töhet vinë-ekūö ngam Tēv nö ing panam, yěn ngaich min nö röhta inlahen më chöḵtit mëtöhachāmö elkui Kristīön nö chuh el halīöngö. Iṙūöhen inrē min më tarik tö chiplö nö löklōn Yāvē më tö hayōmkaṙen tö Kristū. Akahakūö in tö ngam Kōk, ngam Panam Mākōk nö holtö tanānyöre min nö lökṙen më tarik ngam Tēv. (Isi. 38:18-20) Töng rahëichtaṙen ngam inlahen cha min nö hakihten hī hēk öt kanò-òv inrē cha-a, pön iṙūöhen min më tarik Yāvē nö löklōn ò. Öthō inrē min Yāvē nö öt laklen më tarik re. Meuk më “tömaṙôngö” ang Yôhan nö im heūvö ngam tönôlhöt nö in më tahëng kiteūm Kristū. Vënyu nang ang Yôhan tö më “tömaṙôngö” min nö kunyī-inyre nö löknyö el ngam “tökiröng kanihngen.” (Inm. 7:9, 14) In e ṙinātö-ellōn ayī-ö tö Yāvē min nö öthō nö öt laklen më tarik re!

15-16. Sā ṙô ngam Inmeukhömat 17:14, asūp min inlahen yip tö hachāmö elkui Kristīön ip ṙētak öp Armakētòn, ngaich kūö yòh ayī-ö min öi teūngen tö nganöönöre?

¹⁵ Ōt pöri lohten yip tö ngölōn: ‘Asūp min la-en yip tö hachāmö elkui nö chuh el halīöngö? Halöknyôre an ngam Paipöl nö kētö sanap ṙô e. Vënyu angū-ö nö in e tö minë inyööngö ing panam min nö la-al ngam Satān, akahakūö inrē ayī-ö tö cha nö öt mihôiṅ. Ngö kinūichngö angū-ö nö imat ngam Paipöl “mihôiṅ min ngam sīṅp tö cha.” Achīö min öp mahayööken më sīṅp? Ngö ṙô hēk ngam miröökö. “Ngaich  cha-a min inrē yip hol ò nö mihôiṅ yip tö havëka, tö katöllöng, tökô-en inrē.” (Vë-evkūö Inmeukhömat 17:14.) Achīö yip cha-a? Cha-a yin më tö hachāmö elkui Kristīön, tö kē-ěvkūö tö ngam nômö nö chuh el halīöngö. Yēḵ yip chöḵtit yip tö hachāmö elkui Kristīön min nö chuh el halīöngö ip manā-angrit ngam tökiröng kanihngen, asuh öp min raneh kinëkūö cha la-en? Kiyung min cha-a. Ōt yip in cha sin lama-alkūö holre hēk kamëtöre nö im kinyūngö urēhěkūö cha nö vītöre nö Vamënyen Yāvē. Ik sā pöri nö vītöre nö Kristīön ngaich haköp ngam lanāmö cha-a. (Kal. 5:22; 2 Tös. 3:16) Ṙāngenre ngaich cha-a nö kētöre in minë kinyūngö. Yēḵ cha pöri min nö chuh el halīöngö ngaich im manā-aṅ min cha-a nö hol Kristū tö yip ma-ahānga nö la-al yip tö kunyaha elmat tö ngam Tēv.

¹⁶ Töi fēken në! Ngaich yin töngamuh më tö hachāmö elkui nö köiny hēk öt kalē-en inrē. Yēḵ cha pöri min nö kē-ěvkūö tö ngam nômö el halīöngö ngaich īnu min cha-a tö ngam kumlēḵ re hēk öt kinpahav inrē. Holṙen ngam Rācha re inrē min cha-a nö kiyung, unôichrit ngam Armakētòn inrē min cha-a nö holṙen Yēsū nö hayööken më tarik nö chuh im hanëtö. Kirööngen ṙinātö-ellōn in yěn ṙòkhöre min më tö hachāmö elkui Kristīön nö chuh el halīöngö, ngaich kirööngen min nup mineukṙen hī tö cha nup tötkô nö la-en cha töngamuh!

17. Kūö yòh öi mihôiṅ ngöṙô tö Yāvē min nö laklen yip tarikre ip hē ngam Armakētòn?

¹⁷ Mi-in yip tahëng kiteūm öm më-eṅ? Yěn heūṅ, ngaich hòṅ asuh min öp inlahen meh yěn rultenre ngam kinyūngö Armakētòn? Hayönglenre më-eṅ in Yāvē ngaich hang minë inlēnöre kahëtö ò. Hòṅ sā ṙô ngih tö kūichiyö inrē min më-eṅ imat ngam Paipöl, ngam tö ngö ṙô: “Kuhēthötre el minë urôhò yī-ö, ngaich öptökūö minë inkūp mahavīlen meh: rahëchtaṙen öm hayunngöre, hanöng saha chanuhu ngam lanīnö.” (Isa. 26:20) Öt höhlö öm yěm hang ngih? Tö yip tö chiplö min tarik ngam Tēv nö laklöng tö ò, pòrô cha-a nö chamuh el halīöngö hēk ing panam inrē. Ṙātö-ellōnre in ayī-ö inrē öi sā Pôl nö “öt rēhĕn pūlngö, öt rēhĕn në töngamuh, öt rēhĕn nup yamih nö kô min nö haköhngen hī tö ngam hanāngenlōn ngam Tēv, ngam in Kristū Yēsū ngam Mā hī.” (Rōm. 8:38, 39) Köplōn tö Yāvē nö hangenlōn takô tö meh ngaich öthō inrē min anga-aṅ nö Ṙāngen meh!