1. Ni ryari obu abashukirweho omwika bona baritwarwa omu iguru?

 OMU myaka eyahwire, abahereza ba Yehova bakaba nibakira kwebuza obwire obu Omukristo wa nyima omu bashukirweho omwika aritwarwa omu iguru. Tukaba nitutecereza ku bamwe omu bashukirweho omwika barije kutura omu nsi bwanyima y’orutaro rwa Haramagedoni. Konka omu Munara g’Omurinzi gw’aha kiro ca 15 Okwamushanju 2013, tukega ku abashukirweho omwika bona baritwarwa omu iguru Haramagedoni etakatandikire.—Mat 24:31.

2. Ni kiha kibuzo eki turi kubasa kwebuza, kandi shi ni enki eki twaza kushwijuma omuri eki kicweka?

² Konka, nitubasa kwebuza ngu: Ni enki ekirije kuhika aha ‘b’ezindi ntama’ abariba bacakorera Yehova omu bwesigwa omu nsi omu bwire bw’‘okubonabona kwingi’? (Yoh 10:16; Mat 24:21) Abamwe omuri obu bwire nibabasa kutina ku barije kuhurira bari bonka ninga shi basigirweho, obu benetata abashukirweho omwika baritwarwa omu iguru. Reka tushwijume enkuru ibiri z’omuri Bibuli eziri kutuma batecereza basyoya. Bwanyima nitwija kushwijuma enshonga ahabw’enki tutashemerire kutina.

NI ENKI EKITARIJE KUBAHO

3-4. Ni kiha kintu eki abamwe bari kubasa kutina, kandi shi ahabw’enki?

³ Abamwe nibabasa kutina ku ab’omu zindi ntama barije kureka kukorera Yehova omu bwire obu hariba hatariho abashukirweho omwika b’omu Kakiko k’Abarisa b’okubahabura. Nibabasa kwehurira basyoya ahabw’enkuru zimwe eziri kugambwa omuri Bibuli. Reka tushwijume ibiri omuri zo. Ey’okubanza ni ey’omutambi mukuru Yehoyada. Akakorera Ruhanga omu bwesigwa. We n’omukazi weye, Yehoshabeyati bakarinda omwana w’omwojo ori kwetwa Yehowashi kandi bamukwasa kuba omugabe w’omwesigwa. Yehowashi akaramya Yehova kandi yakora ebirungi obu Yehoyada yabire acariho. Konka Yehoyada ku yafire, Yehowashi akatandika kukora ebibi.  Akahurikiza abanyiginya babi kandi yareka kukorera Yehova.—2 Bus 24:2, 15-19.

⁴ Ecokureberaho ca kabiri ni ec’Abakristo ababireho omu bwire bw’entumwa. Entumwa eyafire bwanyima y’ezindi ni Yohana. Obu yabire atakafire, akakwasa Abakristo bingi kugumizamu kuba abesigwa ahari Yehova. (3 Yoh 4) Yohana akekwatanisa n’ezindi ntumwa omu kutaho amani omu kurinda ekibina obuhakani. (1 Yoh 2:18; 2 Tes 2:7.) Konka Yohana ku yamazire kufa, obuhakani bukeyongera munonga. Omu myaka eyakuratireho, abo bahakani bakaba nibegesa enyegesa nyingi z’ebishuba kandi bikiririza n’abari kukora ebikorwa bibi kuguma omu kibina.

5. Ni eha nsharamu eyi tutashemerire kukora aha bw’enkuru ibiri z’omuri Bibuli?

⁵ Mbehi ezo nkuru ibiri z’omuri Bibuli nizereka ku ab’omu zindi ntama barije kureka kukorera Yehova, abashukirweho omwika ku barimara kutwarwa omu iguru nk’oku cabire ahari Yehowashi, ninga shi baba abahakani nk’oku byahikire aha Bakristo bingi entumwa ku zamazire kufa? Mazima eco tikirije kubaho. Nitubasa kwesiga tutari kubanganisa ku obwire obu abashukirweho omwika bariba batacari omu nsi, ab’omu zindi ntama barije kugumizamu kuramya Yehova kandi ku na we arije kugumizamu kubafaho. Ni enki ekiri kubituhamiza?

OKURAMYA KW’AMAZIMA TIKURIJE KUSISIKARA

6. Ni buha bwire bushatu obu twaza kushwijuma?

⁶ Ahabw’enki turi kubasa kwesiga tutari kubanganisa ku okuramya okw’amazima kutarije kusisikara n’omu bwire obugumire oburi hihi kwija? Ni ahabw’ebi turi kwega omuri Bibuli ebiri kukwata aha bwire obu turimu. Obwire obu turimu nibutana munonga n’obwire bwa Isirayeli ya kare, n’obwire bw’Abakristo ababireho bwanyima y’entumwa. Nimureke tushwijume ebikwatirine n’obwo bwire bushatu: (1) obwire bwa Isirayeli ya kare, (2) obwire bw’Abakristo ababireho entumwa zamara kufa, n’ (3) obwire obu turimu, ni okugamba, ‘obwire bw’okugarura ebintu byona busya.’—Byak 3:21.

7. Ahabw’enki Abisirayeli b’abesigwa babire batashemerire kuhwa amasiko obu abantu bingi n’abagabe bashaziremu kukora ebintu bibi?

⁷ Obwire bwa Isirayeli ya kare. Hari kuburayo obwire buce ngu Musa afe, akagambira Abisirayeli ati: ‘Nimanya ngu, ku ndiheza kufa, muryayesisira kimwe, muteshuce omuhanda ogu nabaragire.’ (Bir 31:29) Nambwenu akarabura Abisirayeli ku ihanga ryabo ryabire riratwarwe omu bunyage, bagomera Ruhanga. (Bir 28:35, 36) Mbwenu shi ebyo bigambo bikahikirira? Yego. Bwanyima y’emyaka myingi, abagabe bingi bakakora ebikorwa bibi catuma n’abandi bahereza ba Ruhanga bakuratira okuramya kw’ebishuba. Ebyo bikatuma Yehova yahana abantu babi kandi tarashubire kwikiririza abagabe kutegeka abantu. (Ezek 21:25-27) Konka Abisirayeli b’abesigwa ku barebire ebyo bigambo bya Ruhanga byahikirira, bakagira obumanzi bagumizamu kukorera Yehova.—Isa 55:10, 11.

8. Mbehi kuba ekibina c’Abakristo ababireho bwanyima y’entumwa casisikire, kishemerire kututungura? Shoborora.

⁸ Obwire bw’Abakristo ababireho entumwa zamara kufa. Mbehi kuba ekibina c’Abakristo ecabireho entumwa zamara kufa casisikire kishemerire kututangaza? Ingaha mazima. Yesu akaba yagambire ku habire harije kubaho abahakani bingi. (Mat 7:21-23; 13:24-30, 36-43) Entumwa Pawulo, Petero na Yohana bona bakahamya ku obwo buhanuzi bwa Yesu bwabire buri kuhikirira omu bwire bwabo. (2 Tes 2:3, 7; 2 Pet 2:1; 1 Yoh 2:18) Entumwa zona ku zamazire kufa, ekibina c’Abakristo kikasisikara. Abakristo b’Abahakani bakaba bamwe omu bagizire Babuloni orurembo orukuru, ni  okugamba amadini gona ag’ebishuba. Obwe rero, ebi Yesu yagambire bikaba nibihikirira.

9. Ahabw’enki obwire obu turimu buri kutana n’obwire bw’Abisirayeli ba kare n’obwire, bw’Abakristo ababireho bwanyima y’entumwa?

⁹ ‘Obwire bw’okugarura ebintu byona busya.’ Obwire obu turimu nibutana n’obw’Abisirayeli ba kare, kandi nibutana n’obwire bw’Abakristo ababireho entumwa zamara kufa. Mbehi obwire obu turimu nibwetwa ngu enki? Nitukunda kubweta, ‘ebiro by’aha muheru’ gw’eyi nsi mbi. (2 Tim 3:1) Konka Bibuli negamba ku obwo bwire obugumire kandi buringwa bwatandikire omu bwire bumwe. Nibwija kugumizamu okuhisya omu bwire obu Obukama bwa Mesiya burije kutuma abantu bona baba abahikirire n’okuhindura ensi yona paradiso. Obwo bwire nibwetwa ‘Obwire bw’okugarura ebintu byona busya.’ (Byak 3:21) Bukatandika omu mwaka gwa 1914. Mbwenu shi ni enki ecabireho omuri ogo mwaka? Ni bwo obu Yesu yatirweho ngu abe Omugabe omu iguru. Obwe rero, Yehova akashuba kwereka ku ayine omugabe ori kumujwecera w’omu ruzaro rwa Dawudi. Konka eco ti co eki Yehova yakozire conka. Bwanyima y’ebyo, okuramya okw’amazima kukashuba kwagarurwaho! (Isa 2:2-4; Ezek 11:17-20) Mbehi nikwija kushuba kusisikara?

10. (a) Ni enki eki Bibuli eri kutugambira aha bikwatirine n’okuramya okw’amazima omuri obu bwire? (Isaya 54:17) (b) Ahabw’enki obuhanuzi buri kukihamya?

¹⁰ Shoma omuri Isaya 54:17. Tecereza aha buhanuzi oburi kugira ngu: ‘Tihariho c’okurwanisa, eki baheshire kukurwanisa ekirije kukubasa’! Ebyo bigambo nibihikirira omuri obu bwire. Nambwenu hine ebindi bigambo ebiri kuhikirira omuri obu bwire. Nibigira ngu: ‘Batabani bawe bona baryayegesibwa Yehova, kandi baryagira obusinge bwingi. Omu kuhikirira ni mwo orihamibwa. . . . Okuhatwa kuryakuba hare, ahabw’okuba toritina; n’ebiri kwisa obwoba biryakuba hare.’ (Isa 54:13, 14) Na Sitane ‘Ruhanga w’eyi nsi,’ tayine obushoborozi bw’okwemereza omurimo g’okwegesa ogu abahereza ba Yehova bari kukora. (2 Kor 4:4) Okuramya okw’amazima kukagarurwaho, kandi tikurishuba kusisikara obundi. Kuryagumaho ebiro byona. Tihariho ec’okurwanisa, eki baheshire ninga eki bacuzire ekirije kubasa kuturwanisa!

NI ENKI EKIRIJE KUBAHO?

11. Ahabw’enki turi kubasa kwesiga ku ab’omu mutwe muhango batarije kuhurira basigirweho, abashukirweho omwika bamara kutwarwa omu iguru?

¹¹ Ni enki ekirije kubaho obu abashukirweho omwika barije kutwarwa omu iguru? Yijuka  ku Yesu ari Omurisa witu. Ni we mutwe gw’ekibina c’Abakristo. Yesu akagamba ati: ‘Mwine Omukama omwe ni we Kristo.’ (Mat 23:10) Ogo Mugabe witu ori kutegecera omu iguru nayija kugumizamu kufa aha bakurasi beye. Ahakuba Kristo ari we ori kwebembera abakurasi beye abari omu nsi, tibarije kutina ekintu cona. Ni amazima tituri kumanya buri kantu kona akari kukwata aha ku Kristo arije kwebembera abakurasi beye omuri obwo bwire. Obwe rero nimureke tushwijume ebyokureberaho bibiri ebiri kutuhamiza ku arije kukikora.

12. Ni bata oku Yehova yafire aha bahereza beye (a) Musa yamara kufa? (b) Eliya ku yamazire kuhebwa ogundi murimo? (Nambwenu reba ekishushani.)

¹² Musa akafa Abisirayeli batakahikire omu ihanga eryaraganisibwe. Ni enki ecahikire ahari abo bantu ba Ruhanga? Mbehi Yehova akareka kubafaho ogo mushija ku yamazire kufa? Ingaha. Omu bwire obu bagumire kuba abesigwa ahari we, Yehova akagumizamu kubafaho. Musa atakafire, Yehova akamugambira ngu ateho Yoshuwa kugira ngu ayebembere Abisirayeli. Musa akaba yamazire emyaka myingi ari kumanyiza Yoshuwa. (Kur 33:11; Bir 34:9) Nambwenu hakaba hariho abandi bashija ababire bine obushoborozi bw’okwebembera, abamwe bebembera abantu rukumi, abandi igana, abandi makumi atano, abandi ikumi. (Bir 1:15) Mazima Ruhanga akagumizamu kukwasa abahereza beye. Nambwenu ebintu nk’ebyo bikabaho omu bwire bwa Eliya. Akaba amazire emyaka myingi ari kwebembera Abisirayeli omu kuramya okw’amazima. Konka obwire bukahika yamuhindurira omurimo, yamutwara omu mashuma ga Yuda. (2 Bag 2:1; 2 Bus 21:12) Mbwenu shi abantu b’abesigwa b’omu bugabe bw’emiryango ikumi y’Abisirayeli bakahurira basigirweho? Ingaha mazima. Eliya akaba yamazire emyaka myingi ari kumanyiza Elisa. Nambwenu hakaba hariho ‘abana b’abahanuzi,’ ababire batwirwe omu mashomero kugira ngu na bo bamanyizibwe. (2 Bag 2:7) Obwe rero, hakaba hariho abashija bingi b’abesigwa b’okukwasa abahereza ba Ruhanga. Yehova akagumizamu kuhikiriza ekigendererwa ceye n’okufa aha bahereza beye.

13. Ni enki eki Yehova ari kuturaganisa omu Baheburayo 13:5b? (Nambwenu reba ekishushani.)

¹³ Mbwenu shi ocayijuka ebyo byokureberaho, notecereza ku eri enki ekirije kubaho ow’aha muheru omu bashukirweho omwika ku arimara kutwarwa omu iguru? Titushemerire kwebuza byingi. Bibuli netuhamiza ku Yehova atarisigaho abahereza beye abari omu nsi. (Shoma omu Baheburayo 13:5b.) Kimwe na Musa na Eliya, omutwe gw’Abakristo  abashukirweho omwika abari kwebembera omuri obu bwire, nibamanya omugasho g’okumanyiza abandi. Hahwa emyaka myingi benetata b’omu Kakiko k’abarisa bari kumanyiza abashija bamwe b’omu zindi ntama kugira ngu bije kwebembera. Ecokureberaho: Bakategura amashomero mingi g’okumanyiza abazehe, abareberezi abari kutayayira ebibina, ab’omuri komiti za Beteli, abari kwebembera ebishenge by’ahari Beteli n’abandi. Ab’omu Kakiko k’abarisa nibatura bari kumanyiza abari kuyamba omuri za komiti z’Akakiko k’abarisa. Abo bayambi nibakora emirimo eyi bari kuhebwa omuri obu bwire omu bwesigwa. Nibamanyizibwa kugira ngu bije kugumizamu kukora omurimo g’okufa aha ntama za Kristo.

14. Ni enki eki twaganiraho omuri eki kicweka?

¹⁴ Enshonga nkuru ezi ezi twashwijuma ni ezi: Obu ow’aha muheru omu bashukirweho omwika aritwarwa omu iguru turi hihi kuhendera okubonabona kwingi, abahereza ba Yehova b’omu nsi baryagumizamu kumuhereza omu bwesigwa. Nitwesimira obutegeki bwa Yesu Kristo ahakuba nibwija kutuma abahereza ba Ruhanga bagumizamu kumuhereza. Nitumanya ku omuri obwo bwire, amahanga ageterine agu Bibuli eri kweta Gogi owa Magogi, garije kutahirira abahereza ba Ruhanga. (Ezek 38:18-20) Konka eco kitero c’akire kace tikirije kugira eki cahikaho. Tikirije kuzibira abahereza ba Yehova kumuramya. Hatariho okubanganisa, Yehova nayija kubacungura! Omu korekwa kw’entumwa Yohana, akareba ‘omutwe muhango’ gw’ab’omu zindi ntama za Kristo. Yohana akagambirwa ku ab’omuri ogo mutwe muhango ‘barugire omu kubonabona kwingi.’ (Kush 7:9, 14) Mazima, Yehova nayija kubakiza!

15-16. Tukuratize ebiri omu Kushururwa 17:14, ni enki eki abashukirweho omwika barije kukora omu bwire bwa Haramagedoni, kandi shi ahabw’enki eco kiri kutugaruramu amani?

¹⁵ Konka, abamwe nibabasa kwebuza ngu: ‘Nibyija kugendecera bita aha bashukirweho omwika? Ni enki eki barije kukora ku bariruga omu nsi?’ Bibuli negarukamu ebyo bibuzo etari kuraba aha rubaju. Negamba ku za gavumenti z’omu nsi zirije ‘kurwanisa Omwana gw’entama.’ Hatariho okubanganisa tibarije  kusingura. Bibuli negamba ngu: ‘Omwana gw’entama aryabasingura.’ Kandi shi ni baha abarikwasa Omwana gw’entama? Orwo runyiriri nirutuha ecokugarukamu ruri kugamba ku ari ‘abayesirwe,’ ‘abatorinwe,’ kandi ‘abesigwa.’ (Shoma omu Kushururwa 17:14.) Mbwenu shi abo ni baha? Ni Abakristo abashukirweho omwika abarije kuzoka! Obwe rero ow’aha muheru omu bashukirweho omwika, ku arimara kutwarwa omu iguru hihi y’omuheru g’okubonabona kwingi, omurimo ogu baribanza kukora ni okurwana. Mazima ogo ni omurimo g’omuhendo! Abamwe omu bashukirweho omwika bakaba bari abarwani batakabire Abahamya ba Yehova. Abamwe omuri bo bakabaho abasirikare b’omuri egi nsi. Konka bwanyima bakaba Abakristo ab’amazima kandi bamanya omuhanda g’obusinge. (Gal 5:22; 2 Tes 3:16) Bakemereza kwekwatanisa omu ntaro. Konka, ku barimara kuza omu iguru, nibija kwekwatanisa na Kristo na ba marayika beye abari kwera, omu kurwanisa abangi ba Ruhanga omu rutaro rw’aha muheru.

¹⁶ Tecereza ahari eki: Abamwe omu Bakristo abashukirweho omwika bakuzire kandi nibarebeka nk’abine amani bace. Konka ku barimara kuzocera kuza omu iguru, nibija kuba ebyahangirwe by’omwika ebitari kufa kandi ebyine amani, bahebwe omurimo g’okurwana bari n’Omugabe wabo kandi Omurwani rugambwa Yesu Kristo. Ku barimara kurwana orutaro rwa Haramagedoni, nibija kwekwatanisa omu kukwasa abantu kuhika aha kuhikirira. Hatariho okubanganisa, nibija kukorera benetata abu bari kukunda abariba bari omu nsi ebintu byingi birungi kukira oku bakubikora babire bari abantu abatahikirire!

17. Nitumanya tuta ku abahereza ba Ruhanga bona barije kurindwa omu bwire bwa Haramagedoni?

¹⁷ Mbehi ori omu b’omu zindi ntama? Mbwenu shi ni enki eki orije kukora obu orutaro rwa Haramagedoni ruritandika? Eki orije kukora ni okwesiga Yehova n’okorobera obuhabuzi bweye. Mbwenu shi eco nikitwariramu enki? Bibuli netugumya eri kugira eti: ‘Mutahe omu bishenge byanyu, mube mwekingirinemu akanya kace, okuhisya ahu ekiniga kirahwere.’ (Isa 26:20) Abahereza ba Ruhanga b’abesigwa bona b’omu iguru n’ab’omu nsi, nibija kurindwa omuri obwo bwire. Kimwe na Pawulo, n’itwe nitwesiga ku hatariho abategeki ‘abari kutegeka, ninga ebiriho, ninga ebiribaho . . . ebiri kubasa kututanisa na rukundo ya Ruhanga.’ (Rom 8:38, 39) Burijo ogume oyijuka ku Yehova ari kukukunda kandi ku atarije kukusigaho!