1. Ineet meinisin ekkewe mi kepit repwe nóm lón láng?

 FITU ier a ló, néún Jiowa kewe aramas ra ekieki, ‘Ineet ekkewe sáingoon Chón Kraist mi kepit repwe feitá láng?’ Me lóóm sia ekieki pwe ekkóch ekkewe Chón Kraist mi kepit eli repwe mwo nóm lón ewe Paratis ren ekis fansoun mwirin ewe Armaketon. Nge sia káé seni ewe Leenien Mas minen July 1, 2013, pwe me mwen poputáán ewe maunen Armaketon, meinisin ekkewe mi kepit repwele nóm lón láng.—Mat. 24:31.

2. Ifa ewe kapas eis a tongeni ppiitá, me met sipwe pwóróusfengen wóón lón ei lesen?

² Iwe nge, a tongeni ppiitá ei kapas eis: Met epwe fis ngeni néún Kraist kewe ‘ekkóch siip’ iir kewe repwe angang ngeni Jiowa fán túppwél wóón fénúfan atun ewe “riáfféú mi lapalap”? (Jon 10:16; Mat. 24:21) Ekkóch me lein ekkewe ‘ekkóch siip,’ eli repwe lólilen iká resap silei met repwe féri mwirin án chiener kewe mi kepit feitá láng. Sipwe etittina ruu pwóróus lón Paipel mi tongeni efisi ar repwe eáni ena esin ekiek. Mwirin, sipwe pwóróus wóón ekkewe popun pwata sisap lólilen.

MET ESAP FIS NGENI EKKEWE EKKÓCH SIIP?

3-4. Eli met ekkóch ra ekieki, me pwata?

³ Eli ekkóch repwe ekieki iká ekkewe ekkóch siip repwe úkútiw le angang ngeni Jiowa iká ewe Mwichen Soupwúngúpwúng rese chúen nóm pwe repwe emmweniir. Eli ekkóch ra eáni ena esin ekiek pokiten ra silei ekkóch pwóróus lón Paipel. Áwewe chék ren pwóróusen ewe Souasor mi Lapalap Jehoiata. I emén néún Kot chón angang mi túppwél. Iir me pwúlúwan we Jehosepa, ra túmúnú ewe át itan Joas me álisi an epwe wiliiti emén king mi múrinné me túppwél. Lón ánein manawen ewe chinnap Jehoiata, Joas a féri minne mi pwúng. Nge mwirin  málóón, Joas a poputá le féri minne mi ngaw. A aúseling ngeni ekkewe samol mi ngaw me úkútiw le fel ngeni Jiowa.—2 Kron. 24:​2, 15-19.

⁴ Pwal eú pwóróus, ina pwóróusen ekkewe Chón Kraist mi manaw mwirin málóón ekkewe aposel. Aposel Jon, ewe sáingoon aposel le máló, a álisi chómmóng Chón Kraist ar repwe likiitú le angang ngeni Jiowa. (3 Jon 4) Jon a pwal ussun ekkewe ekkóch aposel mi túppwél, a angang weires le túmúnú ekkewe mwichefel seni angangen chón rikiló mi chéúfetál. (1 Jon 2:18; 2 Tes. 2:7) Iwe nge mwirin málóón Jon, chómmóng chón ekkewe mwichefel ra wiliiti chón rikiló. Mwirin fite fite ier, ekkena chón rikiló ra unusen eingawaló meinisin ekkewe mwichefel.

5. Ikkefa ekkewe ekiek sisap eáni seni ekkewe ruu pwóróus?

⁵ Itá ekkena ruu pwóróus lón Paipel ra áiti ngenikich pwe epwe pwal fis ena sókkun ngeni néún Kraist kewe ekkóch siip atun ekkewe mi kepit ra feitá láng? Lón ena atun, itá ekkewe Chón Kraist mi túppwél repwele likitaaló met ra káé, ussun chék Joas, are wiliiti chón rikiló ussun chék met chómmóng ra féri mwirin málóón ekkewe aposel? Fókkun aapw! Sia tongeni lúkúlúk pwe atun ekkewe mi kepit ra ló seni fénúfan, ekkewe ekkóch siip repwe sópweeló le fel ngeni Jiowa me i epwe sópweeló le túmúnúúr. Pwata sia tongeni lúkú ena?

FEL MI LIMÉCH ESAP LIMENGAWOLÓ

6. Ikkefa ekkewe úlúngát fansoun sipwele pwóróusfengen wóón?

⁶ Pwata sia tongeni lúkúlúk pwe fel mi liméch esap limengawoló, pwal mwo nge lón ekkan fansoun weires epwele feito? Sia silei ena pokiten met sia káé seni Paipel ussun ei fansoun sia nóm lón. A fókkun sókkóló ei fansoun sia nóm lón seni fansoun ekkewe chón Israel me fansoun ekkewe Chón Kraist mwirin málóón ekkewe aposel. Iei sipwe etittinafichi ekkeei úlúngát fansoun: (1) Fansoun ekkewe chón Israel lóóm, (2) ewe fansoun mwirin málóón ekkewe aposel, me (3) ach ei fansoun, atun “poputáán liwinsefálin meinisin ekkewe mettóch.”—Féf. 3:21.

7. Lón fansoun ekkewe chón Israel lóóm, pwata ese wor án ekkewe aramas mi túppwél ápilúkúlúkúngaw mwirin án ekkewe king me chómmóng filaatá le féri minne mi ngaw?

⁷ Fansoun ekkewe chón Israel lóóm. Ekiseló mwen án Moses epwele máló, iei met a ereni ekkewe chón Israel: “Üa silei pwe mürin ai mäla oupwe fokun föri föför mi ngau o aleasolap ngeni mine üa allük ngenikemi.” (Tut. 31:29) Moses a pwal ereni ekkewe chón Israel pwe iká repwe álleasolap, iwe repwe késúúló. (Tut. 28:​35, 36) A pwénútá ekkena kapas? Ewer. Ren fitepúkú ier, chómmóng king ra filaatá le féri met mi ngaw mwen mesen Jiowa, me ekkewe aramas ra fitiireló lón ar fel mi chofona. Pokiten ena, Jiowa a asúroló me ese chúen mut ngeni ekkewe kingen Israel ar repwe nemenem. (Is. 21:​25-27) Nge mwirin án ekkewe chón Israel kúna pwénútáán met Kot a apasa, a apworaar le sópweeló le angang ngeni fán túppwél.—Ais. 55:​10, 11.

8. Itá sipwe máirú ren limengawolóón ekkewe mwichefel mwirin málóón ekkewe aposel? Áweweei.

⁸ Fansoun mwirin málóón ekkewe aposel. Itá sipwe máirú pwe ekkewe mwichefel mwirin málóón ekkewe aposel ra limengawoló? Aapw. Jises a fen osuni pwe epwe fis eú watteen angangen rikiló. (Mat. 7:​21-23; 13:​24-30, 36-43) Ekkewe aposel Paul, Piter, me Jon ra fen apasa pwe án Jises oesini a fen poputá le pwénúetá lón ar we fansoun. (2 Tes. 2:​3, 7; 2 Pit. 2:1; 1 Jon 2:18) Mwirin málóón ekkewe aposel, ekkewe mwichefel ra limengawoló. Mwirin málóón ewe  sáingoon aposel, ekkewe Chón Kraist mi wiliiti chón rikiló, ra chóni Papilon mi lapalap, ewe mwicheichen lamalam chofona. Iwe a pwal pwénúetá minne Jises a osuni.

9. Ifa ussun a sókkóló ach ei fansoun seni fansoun ekkewe chón Israel lóóm, me seni ewe fansoun mwirin málóón ekkewe aposel?

⁹ Fansoun “poputáán liwinsefálin meinisin ekkewe mettóch.” A sókkóló ach ei fansoun seni fansoun ekkewe chón Israel lóóm, me seni ewe fansoun a poputá ewe watteen angangen rikiló mwirin málóón ekkewe aposel. Met sia kan eita ngeni ach ei fansoun? Lape ngeni, sia kan eita ngeni “ránin lesópwólóón” ei ótót mi ngaw. (2 Tim. 3:1) Nge ewe Paipel a áiti ngenikich pwe epwe fisippék eú fansoun mi fókkun watte me ttam. Epwe sópwósópwoló tori án ewe Mwúún Messaia epwe ounuséchúsefálli aramas me ewilisefálli ei fénúfan ngeni eú paratis. Ena fansoun a iteni “poputáán liwinsefálin meinisin ekkewe mettóch.” (Féf. 3:21) Ena fansoun a poputá lón ewe ier 1914. Met ena a liwinsefál? Jises a seikitá pwe epwe King lón láng. Iwe, a pwal wor sefál emén sounemenem mi tupuni Jiowa, emén mi álemwiri ewe wis king seni ewe mi túppwél, King Tafit. Iwe nge, esap chék ina met Jiowa a eliwinisefáli. Ekiseló mwirin ena, fel mi liméch a poputá le liwinsefál! (Ais. 2:​2-4; Is. 11:​17-20) Itá epwe pwal limengawsefál?

10. (a) Met ewe Paipel a osuni ussun fel mi liméch lón ach ei fansoun? (Aisea 54:17) (b) Pwata ekkena oesini ra oururu letipach?

¹⁰ Álleani Aisea 54:17. Ekieki ussun ei oesini: “Esap wor och pisekin maun epwe tongeni afeiengauok”! Ekkena kapas ra fen pwénúetá lón ach ei fansoun. Nge, ekkeei wokisin mi apéchékkúla letipach ra pwal weneiti ach ei fansoun, a erá: “Noum kewe mwän meinisin repwe kaiö seniei, üpwe awöüür o fang ngeniir kinamwe. Pwüng epwe anükücharok, . . . kosap chüen niueitiir, nge niuokus mi afeiengau esap arap ngonuk.” (Ais. 54:​13, 14) Pwal mwo nge Setan, “ewe koten ei ótóten fénúfan,” esap tongeni aúkatiw ewe angang néún Jiowa kewe aramas ra féfféri le áiti ngeni aramas ussun i. (2 Kor. 4:4) Fel mi liméch a liwinsefál me esap fókkun chúen limengawsefál, epwe chék nónnóm tori feilfeiló! Esap wor eú pisekin maun epwe efeiengawakich!

MET EPWE FIS?

11. Met a alúkúlúkú ngenikich pwe Kot esap péútaaló chón ewe mwiich mi fókkun chóchó atun án ekkewe mi kepit ra feitá láng?

¹¹ Met epwe fis atun ekkewe mi kepit ra ló  láng? Chemeni pwe Jises, i néúch we Chón Masen Siip. I mékúren ewe mwichefelin Chón Kraist. Jises a apasa: “Mi wor emén néúmi Souemmwen, ewe Kraist.” (Mat. 23:10) Néúch na King mi nemenem seni láng, epwe kan túttúmúnúkich. Pokiten Kraist a wisen emmweni chókkewe mi tapweló mwirin wóón fénúfan, iwe ese fókkun wor och mettóch repwe niwokkus ren. Ewer, sise silei tichikin ifa ussun Kraist epwe emmweni néún kewe aramas lón ena fansoun. Iei sipwele ppii ekkóch pwóróus lón Paipel mi tongeni alúkúlúkúkich.

12. Ifa ussun Jiowa a túmúnú néún kewe aramas (a) mwirin málóón Moses? (b) mwirin án Elias kewis ngeni pwal eú angang? (Pwal ppii ewe sasing.)

¹² Me mwen án ekkewe chón Israel tolong lón ewe Fénúen Pwon, Moses a máló. Iwe, met a fis ngeni néún Kot kana aramas? Itá a úkútiw le álisiir mwirin málóón ena mwán mi túppwél? Aapw. Iká ra túppwél ngeni Jiowa, i epwe sópweeló le awora met mi lamot ngeniir. Me mwen án Moses we epwele máló, Jiowa a ereni an epwe ewisa ngeni Josua an epwe emmweni ekkewe aramas. Moses a fen ákkáiti Josua ren fite fite ier. (Eks. 33:11; Tut. 34:9) Pwal och, a fen wor chómmóng mwán mi lipwákéch le wisen emmwen. Ra nemenem wóón ngéréú, púkú, nime, pwal mwo nge wóón engol. (Tut. 1:15) Néún Kot kewe aramas ra fókkun túmún. A pwal fis ena lón fansoun Elias we. A fen angang weires ren fite fite ier le álisi ekkewe chón Israel le fel ngeni Jiowa. Nge mwirin, Jiowa a ewisa ngeni an epwe álillis lón Juta. (2 King 2:1; 2 Kron. 21:12) Itá Jiowa a likitaaló ekkewe aramas mi túppwél lón ekkewe engol einangen mwúún Israel? Aapw. Elias a fen ákkáiti Elisa ren fite fite ier. Me a pwal wor ekkewe “mwän seni ewe mwichen soufos” mi angei káit. (2 King 2:7) Ina minne, a wor chómmóng mwán mi túppwél ra tongeni álillis le emmweni néún Kot kana aramas. Jiowa a sópweeló le apwénúetá letipan, me a túmúnú chókkewe mi fel ngeni fán túppwél.

13. Met Jiowa a pwonei ngenikich lón Ipru 13:5b? (Pwal ppii ewe sasing.)

¹³ Óm silei ekkena pwóróus, óm ekiek, met epwe fis atun ekkewe sáingoon mi kepit ra feitá láng? A fen ffat pélúwan. Paipel a fen áiti ngenikich ei pwóróus mi enlet mi oururu letipach: Jiowa esap fókkun péútaaló néún kewe aramas wóón ei fénúfan. (Álleani Ipru 13:5b.) Ewe kúkkún kúmiin Chón Kraist mi kepit mi emmweni néún Jiowa kewe aramas lón ei fansoun ra ussun chék  Moses me Elias, ra weweiti aúchean ar ákkáiti ekkewe ekkóch. Ren fite fite ier, ekkewe mwán lón ewe Mwichen Soupwúngúpwúng ra kan asukula ekkewe mwán lein ekkewe ekkóch siip le emmweni néún Kot kewe aramas. Áwewe chék, ra fen akkóta chómmóng sukul pwe epwe asukula ekkewe mwán mi ásimaw, chónemmwen mi wisen sáifetál, ewe Kúmiin Chón Túmúnú Keangen Ofesilap, chón emmwen lón Bethel, me pwal ekkóch. Chón ewe Mwichen Soupwúngúpwúng ra pwal akkasukula ekkewe chón álillis lón ar kewe sókkopaten kúmi. Ekkena chón álillis, ra túppwél le féri chómmóng angang lón án Jiowa we mwicheich. Ra fókkun mmólnetá le sópweeló ar angangen túmúnú néún Kraist kewe siip.

14. Ifa ewe pwóróus mi aúchea sia káé lón ei lesen?

¹⁴ Iei ewe pwóróus mi aúchea seni ach ei lesen: Atun ekkewe sáingoon mi kepit repwele feitá láng arapakkan lesópwólóón ewe riáfféú mi lapalap, néún Jiowa kewe aramas wóón ei fénúfan repwe sópweeló le fel ngeni fán túppwél. Sia kilisou pún ren án Jises Kraist emmwen, sisap fókkun úkútiw le fel ngeni Jiowa. Sia silei pwe lón ena fansoun, eú mwicheich Paipel a eita ngeniir Kok seni Makok, epwe maunei néún Kot kewe aramas. (Is. 38:​18-20) Nge repwe sópwongaw lón ar maun. Resap tongeni aúkatiw néún Jiowa aramas lón ar fel ngeni. Jiowa epwe fókkun selániir! Ewe aposel Jon a kúna lón eú lángipwi “eú mwiich mi fókkun chóchó,” iir néún Kraist kewe ekkóch siip. Jon a rong pwe ena “mwiich mi fókkun chóchó” ra “towu seni lón ewe riáfféú mi lapalap.” (Pwár. 7:​9, 14) Ewer, repwe nóm lón núkúnúkéch!

15-16. Me ren Pwáraatá 17:​14, met chienen Kraist kewe mi kepit repwe féri atun ewe maunen Armaketon, me pwata ena pwóróus a apéchékkúlakich?

¹⁵ Iwe nge, eli ekkóch repwe ekieki: ‘Ifa ussun ren ekkewe mi kepit? Met repwe féri mwirin ar ló seni fénúfan?’ Ewe Paipel a affata pélúwen ena kapas eis. A pwáári pwe ekkewe mwúún fénúfan “repwe maun ngeni ewe Laam.” Iwe nge, repwe fókkun lus. Paipel a erá pwe ewe Laam “epwe okkufuur.” Nge ié epwe álisi? Paipel a pwal erá: “Iir kewe mi ké me fil me túppwél.” (Álleani Pwáraatá 17:14.) Ié kana? Ekkewe mi kepit mi  fen manawsefál! Ina popun atun ekkewe sáingoon mi kepit wóón fénúfan repwe ló láng arapakkan lesópwólóón ewe riáfféú mi lapalap, repwe maun, ina eú me lein wiser kewe repwe akkomw féri. A ifa me aúchean wiser na! Me mwen án ekkóch me lein ekkewe Chón Kraist mi kepit wiliiti Chón Pwáraatá Jiowa, iir ra kan fiu ngeni aramas. Ekkóch me leir, ra pwal mwo nge fiti maun. Nge mwirin, ra wiliiti Chón Kraist mi enlet me ra káé manawen kinamwe. (Kal. 5:22; 2 Tes. 3:16) Ra úkútiw le álisaatá angangen maun. Iwe nge, mwirin ar feitá láng, repwe fiti Kraist me néún kewe chónláng mi pin lón ewe sáingoon maun, ina ar maun ngeni chókkewe mi oputa Kot.

¹⁶ Ekieki ei! Ekkóch Chón Kraist mi kepit mi manaw wóón ei fénúfan, ra chinnap pwal mwo nge apwangapwang. Nge atun repwe manawetá ngeni ewe manaw lón láng, repwe fókkun péchékkúl me inisini eú inis ese tongeni máló, me repwe fiti néúr we Soufiu me King, Jises Kraist, le maun. Mwirin ar maun lón ewe maunen Armaketon, repwe fiti Jises le álisi aramas le unuséchúló. Ese wor tipemwárámwár pwe repwe tufichin álisi chiener kewe wóón fénúfan lón chómmóng mettóch atun ra nóm láng lap seni met ra tongeni féri ewe atun ra inisini inisin aramas ese unuséch!

17. Pwata sia silei pwe meinisin néún Kot chón angang repwe kúna túmún atun ewe maunen Armaketon?

¹⁷ En emén me lein ekkewe ekkóch siip? Iwe, met kopwe féri atun epwe poputá ewe maun mi fókkun aúchea, ewe maunen Armaketon? Iei met kopwe féri: Lúkúlúk wóón Jiowa, me álleasochisi an emmwen. Met a kapachelong lón ena? Ewe Paipel a erá: “Oupwe tolong lon imwemi, ämi nei aramas, o apüngala asamemi. Iwe, oupwe aopakemi eu fansoun mochomoch tori än Kot song epwe wesila.” (Ais. 26:20) Meinisin néún Kot kewe chón angang mi túppwél lón láng me wóón fénúfan, repwe kúna túmún lón ena fansoun. Sia ussun chék ewe aposel Paul le lúkúlúk pwe ese wor eú “mwú are ekkewe mettóch mi nónnóm iei are ekkewe mettóch repwe feito . . . repwe tongeni áimukicheló seni án Kot we tong.” (Rom 8:​38, 39) Iteitan kopwe chechchemeni pwe Jiowa a tongeek, me esap fókkun péútukoló!