1. Chiti thuhmi dihlak cu zeitik ah dah vancung ah an kai lai?

 A LUAN cia kum tampi chung ah Jehovah miphun pawl nih ‘zeitik ah dah a tang rihmi chiti thuhmi pawl vancung ah an kai lai?’ tiah an ruah. Armageddon raldohnak a dih hnuah chiti thuhmi cheukhat cu caan cheukhat chung vawleicung Paradis ah an um kho rih men tiah kan rak ruah. Asinain 2013, July 15, Vennak Innsang ning in chiti thuh mi dihlak cu Armageddon aa thawk hlan ah vancung ah an kai lai ti kha kan hngalh.—Matt. 24:31.

2. Zei biahalnak dah a chuak kho, hi capar ah zei kong dah kan i ruah hna lai?

² Asinain mah biahalnak hi a chuak kho men: “Harnak” nganpi chung ah vawleicung ah zumhfek tein Jehovah a biami, Khrih “tuu dang” pawl cung ah zeidah a cang lai? (Johan 10:16; Matt. 24:21) Tuchan zong ah tuu dang cheukhat cu chiti thuhmi pawl vancung an kai tikah zei tuah awk kan hngal lai lo ti an phang. An lung ah a chuak kho menmi Baibal tuanbia pahnih kha i ruah hna u sih. Cun thinphan a herh lonak a ruang kong zong kha i ruah hna u sih.

Zeidah A Cang Lai Lo?

3-4. Mi cheukhat nih zei kong dah an ruah khawh men, zeicah?

³ Mi cheukhat nih anmah lam a hruaitu chiti thuhmi Uktu Bu unaupa pawl an um lo ahcun tuu dang pawl nih Jehovah biak kha an ngol sual lai ti an phang. Baibal tuanbia cheukhat ruang ah cutin an thin a phanmi a si kho men. Baibal tuanbia pahnih kong kha i ruah hna u sih. Pakhatnak ah Tlangbawi Ngan Jehoiada kong kha zoh hmanh hna u sih. Anih cu zumhfekmi Pathian sal a si. Amah le a nupi Jehoshabeath nih mino Jehoash timi pa kha an kilven i a ṭhami le zumhfekmi siangpahrang a si  nakhnga an bawmh. Kum upa Jehoiada a nun chung cu Jehoash nih Jehovah kha a biak i thil ṭha a tuah. Asinain Jehoiada a thih hnuah thil ṭhalo a hun tuah. A ṭha lomi siangpahrang pawl bia kha a ngaih i Jehovah kha a kaltak.—2 Chan. 24:2, 15-19.

⁴ Pahnihnak cu kumzabu pahnihnak Khrihfa hna kong a si. Lamkaltu hna lakah hmanung bik a simi Johan cu a thi. A nun chung ah Khrihfa tampi kha Jehovah cung ah zumhfek tein an um nakhnga a bawmh hna. (3 Johan 4) A dang zumhfekmi Jesuh lamkaltu hna bantuk in a hmaan lomi ruahnak le cawnpiaknak in Khrihfabu kilven awkah fakpi in a rak i zuam. (1 Johan 2:18; 2 Thes. 2:7.) Asinain Johan a thih hnuah mi tampi nih zumhpialmi hna i a hmaan lomi cawnpiaknak kha an hun zulh. Kum tlawmpal chung ah zumhpial mi hna nih Khrihfabu kha a hmaan loin an cawnpiak hna i a ṭha lomi tuahsernak zong an umter.

5. Mah Baibal tuanbia pahnih kong ruang ah zeitindah kan ruah awk a si lo?

⁵ Mah Baibal tuanbia nih chiti thuhmi pawl vancung an kai hnuah Jehoash le zumhpialmi bantuk in asiloah lamkaltu pawl an thih hnu i mi tampi bantuk in an si ve lai ti kha a langhter duhmi a si maw? A phi cu a si hrimhrim lo! Chiti thuhmi pawl vancung an kai tikah tuu dang pawl nih a hmaanmi lam in Jehovah kha an biak peng lai i Pathian nih a zohkhenh peng hna lai ti kha kan zumh khawh. Zeicah cutin kan zumh khawh?

A Thiangmi Biaknak Cu A Hmun Lai

6. Zei chan thum kong dah kan i ruah hna lai?

⁶ A ra dingmi harnak caan hmanh ah a thiangmi biaknak cu a hmun lai tiah zeicah kan zumh khawh? Baibal nih atu kan chan cu Israel mi hna chan le lamkaltu pawl an thih hnu chan he aa dang tuk lai tiah a ti caah a si. Cucaah mah chan thum kong hi i ruah hna u sih: (1) Hlanlio Israel mi hna chan (2) lamkaltu pawl an thih hnu chan le (3) “zei zong vialte a thar in ser caan” a simi kanmah chan kong a si.—Lam. 3:21.

7. Siangpahrang pawl le mi tampi nih thil ṭha lo an tuah tikah zumhfekmi Israel mi pawl cu zeicah an lung a dongh lo?

⁷ Hlanlio Israel mi hna chan. Moses nih a thih hlan te ah Israel mi kha hitin a ti hna: “Zeitintiah ka thih hnuah cun thil ṭhalo kha nan tuah hrimhrim lai i nawl kaan pekmi hna lam khan nan pial lai tiah ka hngalh ko.” (Deut. 31:29) Moses nih Pathian nan ralchanh ahcun sal ah nan tang lai ti zong in ralrin a pek hna. (Deut. 28:35, 36) Mah bia cu a tling taktak maw? A tling. Kum tampi chung ah siangpahrang tampi nih a ṭha lomi lam kha an zulh i Pathian miphun pawl kha lam an pialter hna. Cucaah Jehovah nih a ṭha lomi a miphun pawl kha dan a tat hna i siangpahrang in a ṭhumh hna. (Ezek. 21:25-27) Asinain zumhfekmi Israel mi cu Pathian chimmi bia a tlinmi an hmuh tikah ralṭhatnak an ngei.—Isa. 55:10, 11.

8. Kumzabu pahnihnak Khrihfabu ah zumhpialmi hna an hung ummi cu khuaruahhar awk a si maw? Fianter.

⁸ Lamkaltu pawl an thih hnu chan. Lamkaltu pawl an thih hnu ah Khrihfabu a hmunh lomi cu khuaruahhar awk a si maw? A si lo. Jesuh nih zumhpialmi hna an hung um lai tiah a chimchung. (Matt. 7:21-23; 13:24-30, 36-43) Lamkaltu Paul, Peter le Johan nih an chan ah Jesuh nih a chimchungmi bia cu tlin hram aa thawk cang ti kha an hngalh. (2 Thes. 2:3, 7; 2 Pet. 2:1; 1 Johan 2:18) AD kumzabu pahnihnak ah Khrihfabu ah zumhpialmi an hung um. Hmanung bik lamkaltu pawl an a thih hnu tlawmpal ah zumhpialmi Khrihfa hna cu a Liannganmi Babilon cheubang an hung si. Jesuh chimchungmi bia cu a hung tling.

9. Kan chan cu hlanlio Israel mi hna chan le kumzabu pahnihnak i Khrihfabu chan he zeitindah aa thleidan?

 ⁹ “Zei zong vialte a thar in ser caan.” Kan chan cu hlanlio Israel mi hna chan le AD kumzabu pahnihnak i zumhpialmi hna chan he aa thleidang. Kan chan cu zeitindah auh a si? Hi chan ṭha lo i “ni hmanung bik” caan tiah auh a si. (2 Tim. 3:1) Asinain Baibal nih caankhat te ah aa thawkmi aa thleidang deuhmi le a sau deuhmi caan kong kha a langhter. Mah cu Messiah Pennak nih minung kha mitling a siter hna tiang le vawlei kha paradis ah a can tiang a si lai. Cucaah mah caan cu “zei zong vialte a thar in ser caan” tiah auh a si. (Lam. 3:21) Mah caan cu 1914 ah aa thawk. Zeidah a thar in ser a si lai? Jesuh nih Siangpahrang in vancung in a uk lai. Cucaah Jehovah nih zumhfekmi David tefa kha amah aiawh in uktu ah a canter ṭhan. Asinain Jehovah nih uknak kongkau lawng kha a thar in a sermi a si lo. Mah hnu tlawmpal ah a thiangmi biaknak cu dirh ṭhan a si. (Isa. 2:2-4; Ezek. 11:17-20) Dirh ṭhanmi biaknak tah a hmun lai maw?

10. (a) Kan chan i a thiangmi biaknak he aa tlaiin Baibal nih zeidah a chimchung? (Isaiah 54:17) (b) Mah chimchungbia hna cu zeicah hnemtu an si?

¹⁰ Isaiah 54:17 rel. Mah chimchungbia kong hi ruathmanh: “Sermi hriamnam zeihmanh nih khan nangmah cu aan pem kho lai lo.” Mah bia cu tuchan ah a tling cang. Mah thazaang a pemi a tanglei bia zong hi kan chan he aa pehtlaimi a si: “Keimah hrimhrim nih na mi cu ka cawnpiak hna lai i ṭhanchonak le daihnak ka pek hna lai. Dinnak le ṭhatnak nih an in ṭhawnter lai . . . ṭihphannak in na him cang lai.” (Isa. 54:13, 14) Jehovah miphun pawl nih a kong midang an cawnpiakmi hna kha “hi vawlei khuazing ṭha lo” Satan hmanh nih a ngolter kho hna lo. (2 Kor. 4:4) A thiangmi biaknak cu dirh ṭhan a si cang i a hmun zungzal cang lai. Zungzal ca in a si i a kan ralchanhtu zei bantuk hriamnam hmanh a hlawh a tling lai lo.

Zeidah A Cang Lai?

11. Chiti thuhmi pawl vancung an kai tikah mi bupi cu hlawt an si lai lo ti kha zeinihdah a kan zumhter?

¹¹ Chiti thuhmi pawl vancung an kai tikah zeidah a cang lai? Jesuh cu kan Tuukhal a si ti kha philhhlah. Anih cu Khrihfabu lu a si. Jesuh nih fiang tein hitin a ti: “Khrih tiah auhmi Hruaitu pakhat lawng nan ngei.” (Matt. 23:10) Vancung in uktu a simi Jesuh nih a zultu pawl kha a zohkhenh zungzal hna lai. Khrih nih a hruai hna lai caah vawleicung ah a ummi Khrih zultu hna nih zei thil hmanh an ṭih a  hau lo. Mah caan ah Khrih nih a miphun pawl zeitindah lam a hruai hna lai ti kha a dikthliar in kan hngal lo. Cucaah a kan hnem khomi Baibal tuanbia cheukhat kong kha i ruah hna u sih.

12. Jehovah nih a miphun kha (a) Moses a thih hnuah zeitindah a zohkhenh hna? (b) Elijah rian dang pek a si hnuah zeitindah a zohkhenh hna? (Hmanthlak zong zoh.)

¹² Moses cu Israel mi pawl Biakammi Ram an luh hlan te ah a thi. Cucaah Pathian miphun pawl cung ah zeidah a cang? Jehovah nih mah zumhfekmi pa Moses a thih hnuah a miphun pawl kha bawmh ti loin a um hna maw? A um hna lo. Zumhfek tein an um chung paoh cu Jehovah nih a rak bawmh hna. Jehovah nih Moses kha a thih hlanah a miphun pawl hruaitu ding in Joshua kha rian pek awkah a fial. Moses nih Joshua a cawnpiaknak cu kum tampi a si cang. (Ex. 33:11; Deut. 34:9) Mah leng ah a thong thong haotu, a za za haotu, sawm nga pawl haotu le pahra pawl haotu tiin sining a tlinhmi hruaitu tampi an um. (Deut. 1:15) Pathian miphun cu ṭha tein zohkhenh an si. Elijah kong zong hi ruathmanh. Israel mi nih Jehovah an biak khawh nakhnga kum tampi chung fakpi in aa zuam. Asinain a hnuah Jehovah nih Elijah kha Judah ram i ṭhial ding in a fial. (2 Si. 2:1; 2 Chan. 21:12) Israel phun hra pennak tang ah a ummi zumhfekmi Israel mi pawl cu hlawt an si maw? An si lo. Elijah nih Elisha kha kum tampi chung a cawnpiak. Cawnpiak a simi “profet fapa hna” zong an um. (2 Si. 2:7) Mah zumhfekmi pa hna nih Pathian miphun kha an bawmh peng hna. Jehovah nih aa tinhnak kha a tlinter peng i zumhfek tein amah a biami hna kha a zohkhenh peng hna.

13. Hebru 13:5b ah Jehovah nih zei bia dah a kan kamh? (Hmanthlak zong zoh.)

¹³ Mah kong ruah buin a tang rihmi chiti thuhmi pawl vancung an kai tikah zeidah a cang lai tiah na ruah? Thinphan a hau lo. Baibal nih hitin bia a kan kamh: Jehovah nih hi vawlei ah a ummi a miphun kha zeitik hmanh ah a hlaw bal hna lai lo. (Hebru 13:5b rel.) Moses le Elijah bantuk in tuchan ah hruaitu a simi chiti thuhmi phu hmete nih midang cawnpiak cu a biapi tukmi a si ti kha an hngalh. Uktu Bu i unaupa pawl nih tuudang chung i unaupa pawl hruaitu si awkah an cawnpiak hnanak cu kum tampi a si cang. Tahchunhnak ah, Khrihfa upa pawl, khualtlawng rianṭuantu pawl, Zung Ṭengnge Kawmiṭi chungtel pawl, Bethel ah zohkhenhtu a simi pawl le a dang pawl caah tinṭan hna kha an timhtuah. Uktu Bu nih Uktu Bu i kawmiṭi  a phunphun ah bawmtu a simi hna kha an cawnpiak hna. Cucaah mah bawmtu a simi unaupa hna nih atu ah a biapi tukmi rian hna kha zumhfek tein an ṭuan. Annih cu Khrih tuu pawl zohkhenhnak rian ṭuan peng khawh awkah ṭha tein cawpiak an si.

14. Kan i ruahmi i a bik in langhtermi kong cu zeidah a si?

¹⁴ Mah hi kan i ruahmi i a bik in langhtermi kong a si: Harnak nganpi a donghlei, a tang rihmi chiti thuhmi pawl vancung an kai tikah a thiangmi biaknak cu vawleicung ah a hmun peng lai. Jesuh Khrih nih a hruai hna lai caah a miphun pawl nih Jehovah kha zumhfek tein an biak peng lai. Mah caan chung ah Baibal nih Magog ram i Gog tiah a auhmi ram tampi in dirhmi phu pakhat nih Pathian miphun a doh hna lai ti kha kan hngalh. (Ezek. 38:18-20) Asinain mah dohnak cu caan tlawmpal lawng a si lai i a sung colh lai. Cucaah mah nih Pathian miphun pawl kha Jehovah an biaknak a ngolter kho hna lai lo. Jehovah nih a miphun kha a khamh hrimhrim hna lai. Lamkaltu Johan nih langhnak ah Khrih tuu dang a simi “mibu nganpi” kha a hmuh hna. Johan nih “mibu nganpi” cu “hremnak nganpi” in a luatmi an si tiah a ti. (Biat. 7:9, 14) Cucaah Jehovah nih a khamh hrimhrim hna lai ti kha kan hngalh.

15-16. Biathlam 17:14 ning in Armageddon raldohnak ah Khrih i chiti thuhmi hna nih zeidah an tuah lai, mah cu zeicah thazaang petu a si?

¹⁵ Mi cheukhat nih hitin an ruah men lai: ‘Chiti thuhmi hna cu vancung an kai hnuah zeidah an tuah lai?’ Baibal nih mah kong kha fiang tein a langhter. Hi vawlei cozah pawl nih “Tuufa kha an doh lai” tiah a ti. Asinain annih cu an sung hrimhrim lai. Hitin a ti: ‘Tuufa nih a tei hna lai.’ Aho nih dah a bawmh lai? Mah Baibal caang ah a phi a pek. Annih cu “a kawh hna,” “a thim hna” i “zumhawktlak” tein a ummi an si. (Biathlam 17:14 rel.) Annih cu ahote dah an si? A tho ṭhanmi chiti thuhmi an si. Cucaah harnak nganpi a donghnaklei ah hi vawlei ah a tang rihmi chiti thuhmi hna cu vancung ah an kai lai i a hmasa bik an rian cu raldoh a si lai. Mah cu aa thleidang tukmi rian a si. Chiti thuhmi unau cheukhat cu Jehovah Tehte an si hlan ah midang he aa si i aa velmi  an si. Cheukhat cu ralkap hmanh an rak si. Asinain a hmaanmi Khrihfa an si hnu ah daihnak langhter khawh ning lam kha an cawn. (Gal. 5:22; 2 Thes. 3:16) Raltuknak kha an bawm ti lo. Asinain vancung an kai hnuah cun Khrih le a thiangmi vancungmi hna he Pathian ral pawl kha an doh hna lai.

¹⁶ Mah kong hi ruathmanh. Vawleicung ah an um lioah chiti thuhmi Khrihfa cheukhat cu a kum a upami le a derthawmmi an si. Asinain vancung nunnak in an thawhṭhan tikah cun a ṭhawng i a thi kho lomi thlarau pum an ngei cang lai i an Siangpahrang Jesuh Khrih he ral an doṭi lai. Armageddon raldohnak a dih hnuah mi pawl kha mitling an si nakhnga an bawmh hna lai. An dawtmi unau pawl kha mitling lo an si lio, vawleicung an um lio i an bawmhmi hna nakin ṭha deuh in an bawmh khawh hna lai.

17. Armageddon raldohnak chung ah Pathian salle dihlak cu himnak an hmu lai ti kha zeitindah kan hngalh?

¹⁷ Nang cu tuudang na si maw? Na si ahcun a biapi tukmi Armageddon raldohnak aa thawk tikah zeidah na tuah a hau lai? Mah hi na tuah a hau: Jehovah kha i bochan law a lamhruainak kha zul. Mah ah zeidah aa tel? Baibal nih hitin a ti: “Nan inn chung ah lut u law innka i kharkhumh u. Pathian thinhunnak a dih hlantiang caan tawite chung cu i thup u.” (Isa. 26:20) Mah caan chung ah van le vawlei ah a ummi zumhfekmi Pathian salle dihlak cu himnak an hmu lai. Lamkaltu Paul bantuk in “uktu le ṭhawnnak nih si hna seh, atu caan nih siseh, hmailei caan nih siseh . . . Pathian dawtnak he a kan ṭhen khotu ding . . . zeihmanh a um lo” ti kha kan zumh. (Rom 8:38, 39) Mah hi i cinken peng: Jehovah nih aan dawt i zeitik hmanh ah aan hlaw lai lo.