1. Kan ki tou Kretyen swazir ki ankor lo later pou ganny anmennen dan lesyel?

 PLIZYER lannen pase, pep Zeova ti mazinen, ‘Kan ki bann Kretyen swazir ki ankor lo later pou ganny anmennen dan lesyel?’ Oparavan, nou ti krwar ki i kapab ki serten Kretyen swazir i reste dan Paradi lo later pour en pe letan apre lager Armagedon. Me dan Latour Veyer le 15 Zilyet 2013, nou ti aprann ki tou Kretyen swazir ki ankor lo later pou ganny anmennen dan lesyel avan ki lager Armagedon i konmanse.—Mat. 24:31.

2. Ki kestyon serten i kapab demande e ki nou pou vwar dan sa lartik?

² Serten i kapab demande: Ki pou arive avek “lezot mouton” ki pou pe servi Zeova fidelman lo later pandan “gran ladetres”? (Zan 10:16; Mat. 24:21) Serten ki form parti lezot mouton i kapab enkyet ki zot pou napa personn pour ed zot e gid zot apre ki bann Kretyen swazir in ganny anmennen dan lesyel. Annou vwar de resi dan Labib ki kapab fer zot mazin dan sa fason. Apre, nou pou vwar bann rezon akoz nou pa bezwen enkyet.

KWA KI PA POU ARIVE?

3-4. Ki serten i kapab mazinen e akoz?

³ Serten i kapab mazinen ki lezot mouton pou kit laverite ler bann Kretyen swazir ki lo Konsey Direkter pou nepli la pour gid zot. Petet serten resi dan Labib i kapab fer zot mazin koumsa. Annou vwar de legzanp. Premyerman, annou vwar sa resi konsernan Granpret Zeoada. Zeoada ti en serviter fidel Bondye. Li ek son madanm Zeosabeat ti protez en pti garson ki ti apel Zeoas e ed li pour vin en lerwa ki bon e fidel. Tan ki Zeoada ti vivan, Zeoas ti ador Zeova e fer bann bon keksoz. Me apre ki Zeoada ti mor, Zeoas ti konmans fer sa ki mal. I ti ekout bann prens ki ti pe fer  bann move keksoz e i ti aret servi Zeova.—2 Kron. 24:2, 15-19.

⁴ Sa dezyenm legzanp ki nou pou vwar i sa ki ti arive avek bann Kretyen dan dezyenm syek. Dernyen zapot ki ti mor, ti zapot Zan. I ti annan en bon lenfliyans lo en kantite Kretyen e tan ki i ti ankor vivan, i ti ed zot pour reste fidel avek Zeova. (3 Zan 4) Parey bann lezot zapot Zezi, Zan ti travay dir pour protez kongregasyon kont bann dimoun ki ti ansenny bann fo lansennyman ek bann fo pratik. (1 Zan 2:18; vwar not letid dan nwtsty dan 2 Tesa. 2:7.) Me apre ki Zan ti mor, en kantite dan kongregasyon ti swiv lansennyman bann aposta. Dan zis detrwa lannen, kongregasyon ti ganny anvair avek bann fo lansennyman ek bann fo pratik.

5. Ki konklizyon nou pa devret tire avek sa de legzanp?

⁵ Eski sa de legzanp ki nou’n vwar i montre ki en keksoz en pe parey pou arive avek lezot mouton apre ki bann Kretyen swazir pou’n ganny anmennen dan lesyel? Ler bann Kretyen swazir i ganny anmennen dan lesyel, eski bann Kretyen ki lo later pou konmans fer sa ki mal parey Zeoas oubyen vin bann aposta parey bann Kretyen dan dezyenm syek? Larepons i definitivman non! Nou kapab asire ki ler bann Kretyen swazir i ganny anmennen dan lesyel, lezot mouton pou kontinyen ador Zeova dan sa bon fason e Zeova pou kontinyen pran swen avek zot. Kwa ki fer nou asire?

LADORASYON PIR PA POU GANNY SALI

6. Ki trwa peryod letan nou pou diskit lo la?

⁶ Akoz nou kapab asire ki ladorasyon pir pa pou ganny sali menm pandan bann letan difisil ki pe vini? Parski Labib i eksplike ki sa letan ki nou pe viv ladan i vreman diferan avek dan letan bann Izraelit e avek sa letan apre ki bann zapot ti’n mor. Alor annou diskit lo sa trwa letan: (1) dan letan bann Izraelit, (2) sa letan apre ki bann zapot ti’n mor e (3) dan nou letan, “sa letan kot Bondye pou retabli tou keksoz.”—Akt 3:21.

7. Dan letan bann Izraelit, akoz bann Izraelit ki ti fidel pa ti dekouraze ler pep Izrael ek zot lerwa ti fer sa ki mal?

⁷ Dan letan bann Izraelit. Pa bokou letan avan Moiz i mor, i ti dir bann Izraelit: “Mon konn tre byen ki apre mon lanmor, zot pou sirman fer sa ki mal e zot pou aret fer sa ki mon’n demann zot pour fer.” (Det. 31:29) Moiz ti osi averti bann Izraelit ki si zot rebel kont Zeova, zot pou ganny anmennen an egzil. (Det. 28:35, 36) Sa ki Moiz ti dir ti vin vre. Pour plizyer santenn lannen, en kantite lerwa ti fer sa ki mal dan lizye Zeova e zot ti fer pep Izrael elwannyen avek Zeova. Sa ti fer ki Zeova ti pini pep Izrael e i pa ti permet okenn lerwa Izraelit diriz lo son pep ankor. (Ezek. 21:25-27) Me bann Izraelit fidel ti demontre kouraz ler zot ti vwar ki sa ki Bondye ti’n dir ti vin vre.—Iza. 55:10, 11.

8. Eski nou devret sirprann ki bann kongregasyon dan dezyenm syek ti swiv bann fo lansennyman ek bann fo pratik? Eksplike.

⁸ Sa letan apre ki bann zapot ti’n mor. Eski nou devret sirprann ki bann Kretyen dan dezyenm syek ti swiv bann fo lansennyman ek bann fo pratik? Non. Akoz? Parski Zezi ti’n predir ki i pou annan bann aposta dan kongregasyon. (Mat. 7:21-23; 13:24-30, 36-43) Zapot Pol, Pyer ek Zan ti’n fini dir ki sa ki Zezi ti’n predir ti’n fini konmans ganny akonplir dan premye syek. (2 Tesa. 2:3, 7; 2 Pyer 2:1;  1 Zan 2:18) Pa bokou letan apre ki bann zapot ti’n mor, kongregasyon Kretyen ti’n ganny sali konpletman e zot ti konmans form parti gran Babilonn, ki reprezant tou fo larelizyon. Sa ki Zezi ti’n predir ti pe ganny akonplir.

9. Ki mannyer sa letan ki nou pe viv ladan i diferan avek dan letan bann Izraelit e avek sa letan apre ki bann zapot ti’n mor?

⁹ “Sa letan kot Bondye pou retabli tou keksoz.” Sa letan ki nou pe viv ladan i diferan avek dan letan bann Izraelit e avek sa letan apre ki bann zapot ti’n mor, ler bann aposta ti’n fini sali kongregasyon. Ki mannyer Labib i apel sa letan ki nou pe viv ladan? Normalman nou dir ki sa letan ki nou pe viv ladan i “bann dernyen zour” sa move lemonn. (2 Tim. 3:1) Me Labib i montre ki i annan en lot peryod letan ki ti konmans an menm tan avek bann dernyen zour. Sa peryod letan i pli merveye e i pou dire pour plis letan. I pou kontinyen ziska ki sa Rwayonm dirize par Kris i fer bann imen vin parfe e i fer later vin en paradi. Sa peryod letan i apel “sa letan kot Bondye pou retabli tou keksoz.” (Akt 3:21) I ti konmans an 1914. Me kwa ki ti ganny retabli? Sa letan Zezi ti vin lerwa dan lesyel. Ankor enn fwa, i ti annan en dirizan ki ti pe reprezant Zeova e sa ti en zeritye Lerwa David. Me i pa zis sa ki Zeova ti retabli. Pa bokou letan apre sa, ladorasyon pir ti ganny retabli. (Iza. 2:2-4; Ezek. 11:17-20) Eski ladorasyon pir pou ganny sali ankor?

10. (a) Ki Labib i predir konsernan ladorasyon pir dan nou letan? (Izai 54:17) (b) Akoz bann profesi koumsa i rekonfort nou?

¹⁰ Lir Izai 54:17. Reflesir lo sa profesi: “Okenn zarm ki’n ganny fer kont ou pa pou reisi”! Sa profesi pe ganny akonplir ozordi. Sa bann parol swivan i osi aplik pour nou letan: “Tou ou bann garson pou ganny ansennyen par Zeova, e lape ou bann garson pou en kantite. Ou pou solidman ganny etabli dan ladrwatir. . . . Ou pa pou per nanryen e ou pou napa rezon pour terifye, parski i pa pou vin pros avek ou.” (Iza. 54:13, 14) Menm Satan, ki “Bondye sa lemonn” pa kapab aret sa travay ki pep Zeova pe fer pour ansenny lezot lo Zeova. (2 Kor. 4:4) Ladorasyon pir in ganny retabli e i pa pou zanmen ganny sali ankor. I pou reste pour touzour. Okenn zarm ki ganny fer kont nou pa pou reisi!

 KI POU ARIVE?

11. Akoz nou kapab asire ki sa gran lafoul pa pou ganny abandonnen ler bann Kretyen swazir i ganny anmennen dan lesyel?

¹¹ Ki pou arive ler bann Kretyen swazir i ganny anmennen dan lesyel? Rapel ki Zezi i nou Berze e i sef kongregasyon Kretyen. Zezi ti dir: “Zot annan en sel Sef, Kris.” (Mat. 23:10) Zezi i nou Lerwa e i pou toultan pran swen avek son bann disip. Vi ki Kris ki pe diriz zot, son bann disip pou napa nanryen pour per. Byensir, nou pa konn tou detay konsernan ki mannyer Kris pou diriz son pep sa letan. Alor annou vwar serten resi dan Labib ki kapab reasir nou.

12. Ki mannyer Zeova ti pran swen avek son pep (a) apre ki Moiz ti’n mor? (b) apre ki Eliya ti’n ganny en lot responsabilite? (Vwar portre.)

¹² Moiz ti mor avan ki bann Izraelit ti antre dan Later Promiz. Ki ti arive avek pep Bondye? Eski Zeova ti aret ed son pep apre ki sa zonm fidel ti’n mor? Non. Tan ki zot ti reste fidel, Zeova ti pran swen avek zot. Avan ki Moiz ti mor, Zeova ti dir li apwent Zozye pour diriz pep Izrael. Alor, pour plizyer lannen Moiz ti donn Zozye formasyon. (Egz. 33:11; Det. 34:9) I ti osi annan en kantite zonm konpetan ki ti pe diriz pep Izrael. Zot ti bann sef mil dimoun, sef san dimoun, sef senkant dimoun e menm sef dis dimoun. (Det. 1:15) Sa bann zonm ti pran byen swen avek pep Bondye. Sa ki ti arive avek Eliya i en pe parey avek sa ki ti arive avek Moiz. Pour plizyer lannen, Eliya ti travay dir pour ed bann Izraelit pour ador Zeova. Me pli tar Zeova ti anvoy li pour al servi Zida. (2 Rwa. 2:1; 2 Kron. 21:12) Eski Zeova ti abandonn bann dimoun ki ti dan sa dis tribi Izrael? Non. Pour plizyer lannen, Eliya ti’n donn formasyon Elisa. I ti osi annan “garson bann profet” ki ti’n ganny bann formasyon. (2 Rwa. 2:7) Alor i ti annan en kantite zonm fidel pour ede gid pep Bondye. Zeova ti kontinyen akonpli son plan e i ti pran swen avek son bann serviter fidel.

13. Dapre Ebre 13:5b, ki nou kapab asire? (Vwar portre.)

¹³ Avek sa bann legzanp antet, ki ou krwar pou arive apre ki bann Kretyen swazir ki ankor lo later i ganny anmennen dan lesyel? Nou pa bezwen mazin lo la. Labib i donn en larepons senp e rekonfortan ki nou asire pou arive: Zeova pa pou zanmen abandonn son pep  ki lo later. (Lir Ebre 13:5b.) Zis parey Moiz ek Eliya, sa pti group Kretyen swazir ki pe diriz pep Zeova ozordi, i konpran ki i enportan pour donn formasyon lezot. Pour plizyer dizenn lannen, bann frer ki lo Konsey Direkter in donn formasyon bann frer ki form parti lezot mouton pour zot kapab diriz lorganizasyon Zeova. Par egzanp, zot in organiz plizyer lekol pour form bann ansyen, bann sirveyan rezyonal, bann manm Komite Biro Brans, bann sirveyan dan bann departman kot Betel ek lezot. Konsey Direkter in personnelman donn formasyon bann frer ki zot asistan pour diferan komite lo Konsey Direkter. Sa bann asistan pe fidelman desarz en kantite responsabilite dan lorganizasyon Zeova. Zot in ganny bann bon formasyon e zot pare pour kontinyen sa travay pour pran swen avek mouton Kris.

14. Ki bann pwen enportan nou’n vwar dan sa letid?

¹⁴ Annou vwar bann pwen enportan dan nou letid. Ler bann Kretyen swazir ki ankor lo later i ganny anmennen dan lesyel ver lafen gran ladetres, ladorasyon pir pou kontinyen isi lo later. Anba direksyon Zezi Kri, bann serviter Zeova pou kontinyen ador Zeova fidelman. Nou konnen ki sa letan, en group nasyon ki’n ralye ansanm ki Labib i apel Gog sorti dan pei Magog pou atak pep Bondye. (Ezek. 38:18-20) Me sa latak pa pou dire pour bokou letan e i pa pou anpes pep Bondye ador Bondye. Zeova pou sov zot! Dan en vizyon, Zan ti vwar en “gran lafoul” lezot mouton. Zan ti ganny dir ki sa “gran lafoul” i “pas atraver sa gran ladetres.” (Rev. 7:9, 14) Alor, nou asire ki Zeova pou sov zot!

15-16. Dapre Revelasyon 17:14, ki bann Kretyen swazir pou fer pandan lager Armagedon e akoz sa i ankouraz nou?

¹⁵ Me serten dimoun i kapab demande: ‘Ki pou arive avek bann Kretyen swazir? Ki zot pou fer apre ki zot al dan lesyel?’ Labib i reponn sa kestyon direkteman. Labib i montre ki bann gouvernman sa lemonn pou “lager avek sa Pti Mouton.”  Byensir zot pou perdi sa lager. Nou lir: “Sa Pti Mouton pou ranport laviktwar lo zot.” Lekel ki pou ed sa Pti Mouton? Sa verse i reponn. Bann ki’n “ganny apele,” “swazir” e “ki fidel.” (Lir Revelasyon 17:14.) Lekel zot? Sa i bann Kretyen swazir ki’n ganny resisite dan lesyel. Alor, ler bann Kretyen swazir ki ankor lo later pou ganny anmennen dan lesyel ver lafen gran ladetres, enn bann premye travay ki zot pou fer i pour lager. Sa pou en travay vreman spesyal! Serten sa bann Kretyen swazir ti abitye lager avek lezot avan zot vin Temwen Zeova e i annan ki ti menm bann solda. Me apre zot in vin bann disip Kris e zot in aprann pour viv anpe avek lezot. (Gal. 5:22; 2 Tesa. 3:16) Zot nepli siport bann lager. Me apre ki zot in ganny anmennen dan lesyel, zot pou lager akote Kris ek son bann lanz dan sa lager final kont bann lennmi Bondye.

¹⁶ Reflesir lo sa. Lo later, serten Kretyen swazir i aze e menm fay fizikman. Me ler zot pou ganny anmennen dan lesyel, zot pou vin bann kreatir spirityel for e imortel e zot pou lager ansanm avek Zezi, ki zot Lerwa. Apre ki zot pou’n partisip dan lager Armagedon, zot pou travay ansanm avek Zezi pour ed bann imen vin parfe. San dout, ler zot pou dan lesyel, zot pou kapab pli byen ed zot bann frer ek ser ki lo later, plis ki zot ti kapab fer ler zot ti bann imen enparfe.

17. Ki mannyer nou konnen ki tou serviter Bondye pou an sekirite pandan lager Armagedon?

¹⁷ Eski ou form parti lezot mouton? Si wi, ki ou pou bezwen fer ler lager Armagedon i konmanse? Larepons i senp: Annan konfyans dan Zeova e swiv son gidans. Ki sa i kapab enplike? Labib i dir en keksoz rekonfortan. I dir: “Antre dan ou bann lasanm anndan e ferm laport deryer ou. Kasyet ou pour en pti moman ziska ki mon lakoler in pase.” (Iza. 26:20) Pandan sa letan, tou bann serviter Bondye, dan lesyel e lo later, pou an sekirite. Parey zapot Pol, nou asire ki “ni gouvernman, ni keksoz la konmela, ni keksoz a lavenir . . . pa pou kapab anpes Bondye . . . kontan nou.” (Rom. 8:38, 39) Toultan gard antet: Zeova i kontan ou e i pa pou zanmen abandonn ou!