1. ¿144.000rãra sõbede jõma ʉ̃tʉ bʼai?

 DÃÃRABADE Daizeze pʉwʉrʉba naʉ̃ta widibasi: «¿144.000 nama egorode waidide panʉrãra, sõbede ededai ʉ̃ta?». Nãã krĩchapanasi 144.000rãra drʉa kĩrãwãreãnẽ panaita Daizeze yõ ewari berabarida tẽã, mamina karta La Atalaya 15 julio 2013de kʼawuasida 144.000ra yi nama egorodebʉrãra ʉ̃ta ededaibasita Daizeze yõ ewari zei nãã (Mat. 24:31).

2. ¿Ʉ̃kʉrʉba kʼãrẽta widiseabʉ, adewara kʼãrẽta kʼawuadai naʉ̃ artikulodera?

² Maʉ̃ kʼarea ʉ̃kʉrʉba widiseabʉ, ¿kʼãrẽta sãwũãi awuru obejara Jeoware kʼẽrẽpapanʉrãra zʉbʉria zroma zebʉrʉdera? (Juan 10:16; Mat. 24:21). Ʉ̃kʉrʉra krĩcha oseabʉ kʼawua ẽ bai baera kʼãrẽta sãwũã oita akʉza krĩchadai baera ãyira kʼaiba kʼarebai neẽãta 144.000rata ʉ̃ta wãsi baera. Akʉdaya bedʼea ũme Daizeze Bedʼeadebʉta ãyi kʼãrẽa mãwũã krĩchaseabʉta, tẽã kʼawuadayi kʼãrẽa mawũã krĩchada ẽ baibarata.

¿KʼÃRẼTA BERABARI Ẽ BAI?

3, 4. ¿Kʼãrẽta widiseabʉ ʉ̃kʉrʉba akʉza kʼãrẽa?

³ Ʉ̃kʉrʉra krĩcha oseabʉ Daizeze ode kʼẽrẽpapanai kʼawuaita Zõrãrã Burubiata neẽ baera ãyi kʼarebaita. Mawũã krĩchaseabʉ Daizeze Bedʼeade nebʉra maʉ̃ kĩrãkʼabʉta ũdubʉ baera. Akʉdaya nebʉra ũme, yi nããrabemata Jehoiadádeta. Iyira sumo saserdotebasi akʉza Daizezeʉ̃me kʼẽrẽpabasi, iya yi kima Jehosabeatʼʉ̃meba kʼarebasida wũãwũã aba yi trʉ̃ Jehoásta. Ãya kʼarebasi naʉ̃ wũãwũãta nokʼo bia bamarẽã akʉza  Jeowaʉ̃me kʼẽrẽpa bamarẽã. Jehoiadá zokʼai bʉedara Jehoásʼra Jeowaba jarabʉde basi akʉza nebiata obasi. Jehoiadá beida tẽã Jehoásʼra ẽbẽra kayiruabasi, ũrĩ jʉ̃drʉsi prinsipe kayiruara bedʼeata akʉza Jeowata idubʉsi (2 Crón. 24:​2, 15-19).

⁴ Yi ababema yizara, kristianora siglo ũmenebemata iyi. Apostol Juanʼra yiza biabasi wuabemara kristianoraitara, iya kʼarebasi baera ãyita kʼẽrẽpa bamarẽã (3 Juan 4). Yi wuabemara apostolera kĩrãkʼa, Juansida zarea trajasi kongregasionʼra bia akʉita, mawũã apostatara yi sewabida ẽ marẽã (1 Juan 2:18; akʉra nota estudio 2 Tes. 2:7). Juan beida tẽãra, mejãchaʉta kongregasionebemarãra apostatara basida. Maʉ̃ dããra ẽãne kongregasionebemara jõmaʉ̃ta yi sewabisida.

5. Naʉ̃ra nebʉraraba jara ũrĩbibʉ kʼarea, ¿kʼãrẽta krĩcha ẽ baibara?

⁵ ¿Naʉ̃ yizara ũmeba ũdubibʉka 144.000ra ʉ̃ta wãna tẽãra, yi wuabemara kristianorabara yi kayiruata oita Jehoásba oda kĩrãkʼa, mawũã ẽ bʉrʉ, ãyira apostatara bʼaika mebẽrã siglo ũmenebemaba oda kĩrãkʼa? Mawũã ẽ. Dayirãba ĩjãseapanʉ 144.000ra ʉ̃ta wãna tẽãra, yi wuabemara kristianora nama egorode panʉrabara opanaita Jeowaba kãgabʉta akʉza iya kʼarebaita ãyira, ¿kãrẽa ĩjãseapanʉ maʉ̃ ʉ̃rʉ?

JEOWA PɄWɄRɄBARA EWARI JÕMAɄ̃NẼ IYAʼA YIWIDʼIBAYI IYA KÃGABɄ KĨRÃKʼA

6. ¿Kʼãrẽ ewarira ũbea ʉ̃rʉ kʼawuadai?

⁶ Aranʉbai bedʼea zroma mejãcha zeimina Jeowa pʉwʉrʉbara ewari jõmaʉ̃nẽ iyaʼa yiwidʼiyi, ¿kʼãrẽa mawũã jarapanʉ? Daizeze Bedʼeaba jara ũrĩbibʉ baera idi ewade dayirã sãwũãbʉra, awuarabʉta israelitara ewaride sãwũã badaira akʉza kristianora siglo ũmenebemara sãwũã badaira. Maʉ̃ba audre kʼawuadaya naʉ̃ra ewarira ũbea ʉ̃rʉ: Yi nããrabemata, Israel ewaride sãwũã badata. Yi ũmeta, kristianora siglo ũmenebema sãwũã badata. Yi ũbeata, «Daizezeba ne jõma araa okuai [ewari]» sãwũã bʼaita (Hech. 3:21).

7. Israelitara ewari basidera, ¿kʼãrẽa israelitara kʼẽrẽpapanʉrabara yi kayiruata oẽ basi ãyi pʉwʉrʉde bada kĩrãkʼa, mawũã ẽ bʉrʉ nokʼoraba oda kĩrãkʼa?

⁷ Israelitara ewaride sãwũã basita. Móisésba iyi bei nãã israelitara naʉ̃ta jarasi: «Mʉ̃a biʼia kʼawuabʉ mʉ̃ beida tẽãra, marabara nekayiruata ojʉ̃drʉdaita akʉza ãĩ wãnaita mʉ̃a zokʼa amaena odeba» (Deut. 31:29). Adewara Moisésba ãyaʼa jarasi Jeowa bedʼeata ũrĩna ẽ bʉrʉ, ãyira awuru pʉwʉrʉeda ededaibasita (Deut. 28:​35, 36). ¿Aripe berabarisika maʉ̃ bedʼeara? Mawũã, poaga bio berarida tẽã, nokʼora mejãchaʉba yi kayiruata ojʉ̃drʉsida akʉza Daizeze pʉwʉrʉta o jãpe wãbisi, maʉ̃ kʼarea Jeowabara iyi pʉwʉrʉra zʉbʉriade berabaribisi akʉza wua nokʼora zokʼabi ẽ basi ãyira (Ezeq. 21:​25-27). Israelitara kʼẽrẽpapanʉraba ũdusidade Jeowaba jarada aripe berabarisita, naʉ̃ba so zarea diasi ãyi Jeoware kʼẽrẽpa bʼaita (Is. 55:​10, 11).

8. ¿Kristianora siglo ũmenebemaba yi kayiruata osida baera dayirãra maʉ̃ kʼarea kĩrãmigabaibaraka? Jara ũrĩbira.

⁸ Kristianora siglo ũmenebemata. Kristianora siglo ũmenebemarabara yi kayiruata ojʉ̃drʉsida, ¿dayirãra maʉ̃ kʼarea kĩrãmigabaibaraka? Mawũã ẽ, Jesuba  jarasi baera maʉ̃ ewaride maʉ̃ta berabarita (Mat. 7:​21-23; 13:​24-30, 36-43). Pabloba, Pedroba akʉza Juanba jarasida Jesuba propesia jaradara siglo nããrabemane aripe berabarinʉmasita (2 Tes. 2:​3, 7; 2 Ped. 2:1; 1 Juan 2:18). Kristianora siglo ũmenebemarabara yi kayiruata ojʉ̃drʉsida akʉza maʉ̃ba ãyira Babilonia yi Zromanebema basida, naʉ̃ba ũdubibʉ propesiaba jarabadara akʉza aripe berabarinʉmasita.

9. ¿Kʼãrẽne awuarabʉ idibema ewarita Israel akʉza kristianora siglo ũmenebema ewarira?

⁹ «Daizezeba ne jõma araa okuai [ewarita]». Dayirã ewarira awuarabʉ Israel ewari sãwũã badaira akʉza kristianora siglo ũmenebema sãwũã badaira, ¿saʉ̃ dayirã ewari trʉ̃ra? Jaraseapanʉ maʉ̃ trʉ̃ra naʉ̃ta: Ewari jõbodoare (2 Tim. 3:1). Daizeze Bedʼeaba jara ũrĩbibʉ nei jʉ̃drʉsita iyabaʉ ewaride, naʉ̃ra audre yibia akʉza audre ewari biobayi, adewara naʉ̃ ewarira bayi Jesuba naʉ̃ drʉa ẽjũã kĩrãwãreã babiyeda akʉza ẽbẽrarãsida kayirua oka babiyeda. Naʉ̃ ewari trʉ̃ra naʉ̃ «Daizezeba ne jõma araa okuai [ewarita]» (Hech. 3:21). Maʉ̃ ewarira jʉ̃drʉsi poaga 1914de, ¿kʼãrẽta ara osi maʉ̃nera? Jesura ʉ̃tʉ nokʼobasi, maʉ̃neba ʉ̃ta Jeowaba erbasi nokʼo aba iyi bari zokʼamarẽã, naʉ̃ra Davidʼdeba zesi. Mamina bari maʉ̃trʉ ara oẽ basi Jeowabara, maʉ̃ ara oda tẽãra iyara kʼarebasi iyi pʉwʉrʉba jẽda iyaʼa yiwidʼimarẽã iya kãgabʉ kĩrãkʼa (Is. 2:​2-4; Ezeq. 11:​17-20). ¿Daizeze pʉwʉrʉra jẽda jĩga bʼaika Daizezedeba?

10. (1) ¿Daizeze Bedʼeaba kʼãrẽta jarabʉ Daizeze pʉwʉrʉba iyaʼa sãwũã yiwidʼi bʼai ʉ̃rʉ? (Isaías 54:17). (2) ¿Kʼãrẽa yibia naʉ̃ra propesiarãra?

¹⁰ (Akʉra Isaías 54:17). Krĩchara naʉ̃ propesia ʉ̃rʉ: «Nekʼãrẽ kayirua parãmabʉbara neida oẽbayi». Naʉ̃ bedʼeara idi ewade aripe berabarinʉmʉ. Naʉ̃ bedʼeaba mejãcha kʼarebabʉ dayirãta idi ewade: «Jõma bʉ wũãwũãrãra Jeowaba jaradiayi akʉza bʉ wũãwũãrãra biode neneẽãpanañi. Jõma bʉa aripe obʉra ariya piki teitea erbayi [ . . . ], bʉra mia kʼãrẽ kʼarea pera ẽ bãyi akʉza mia kʼãrẽba so perabida ẽ bayi, maʉ̃ra bʉ kʼawa neẽbai baera» (Is. 54:​13, 14). Mia Diaruba obe ẽ bayi Daizeze odepanʉraba Jeowa ʉ̃rʉ jaradiapanʉta idubʉdamarẽãra (2 Cor. 4:4). Daizeze odepanʉraba Jeowaba kãgabʉde yiwidʼibʉra  ewari jõmaʉ̃nẽ mawũãbayi, nekʼãrẽ baduba oẽbayi ãya maʉ̃ta idubʉdamarẽã.

¿KʼÃRẼTA BERABARI?

11. ¿Kʼãrẽba kʼawuabibʉ 144.000ra ʉ̃ta wãna tẽãra Jeowabara iyi pʉwʉrʉra doba amae ẽãta?

¹¹ 144.000ra ʉ̃ta wãna tẽã, ¿kʼãrẽta berabari? Kĩrãbeidua Jesuta dayirã obeja akʉbarita, iyira kongregasion buru, Jesuba jarasi: «Nokʼora abʼabai bʼʉ baera mʉta zhãrã Ẽdrʉbita» (Mat. 23:10). Jesubara ʉ̃tʉ zokʼanʉmʉ akʉza iyi kʼaidubemara iyara ewari jõmaʉ̃nẽ akʉyi akʉza ãyira kʼãrẽa peraira neẽbayi. Bia kʼawuada ẽ Jesuba iyi pʉwʉrʉ sãwũã zokʼaira. Akʉdaya ʉ̃kʉrʉ yizara Daizeze Bedʼeadebema dayirã aduʼa babibʉta.

12. (1) ¿Jeowaba sãwũã akʉsi iyi pʉwʉrʉra Moisés beida tẽãra? (2) ¿Jeowaba sãwũã akʉsi iyi pʉwʉrʉra Elías awuru trajo omarẽã jarada tẽãra? (Akʉra potota).

¹² Israel pʉwʉrʉ Jeowaba drʉa bia diaya adama jʉ̃ẽi nãã, beisi Moisésʼra. ¿Kʼãrẽta berabarisi mawũẽra Daizeze pʉwʉrʉra? Moisés beida tẽãra, ¿Jeowabara iyi pʉwʉrʉra wua kʼareba ẽ basika? Mawũã ẽ, ãyi kʼẽrẽpabʉedara Jeowabara diasi ãya nesidabʉta. Moisés bei nãã, Jeowaba iyaʼa jarasi Josuéʼa jaradiamarẽã sãwũã zokʼaita iyi pʉwʉrʉta (Éx. 33:11; Deut. 34:9). Akʉza basi ʉ̃kʉrʉ yumakẽrãra pʉwʉrʉ nãã edebʉta, ʉ̃kʉrʉra ẽbẽrarã 100bʉ burubasi akʉza ʉ̃kʉrʉra 50bʉ burubasi, ʉ̃kʉrʉra 10bʉ burubasi (Deut. 1:15). Jeowabara iyi pʉwʉrʉra biʼia akʉsi. Akʉza akʉdaya awuru yiza maʉ̃ kĩrãkʼabʉta, Elíasdeta. Iyira zarea trajasi poaga biobayeda israelitara kʼarebaita Jeowaba kãgabʉde yiwidʼidamarẽã, mamina tẽã Jeowaba iyaʼa awuru trajota omarẽã diasi Judáde (2 Rey. 2:1; 2 Crón. 21:12). Ẽbẽrarã kʼẽrẽpapanʉra Israeldebema nokʼoba zokʼabadarãra, ¿Elíasta wãsi baera Daizezebara doba amaesika? Mawũã ẽ. Elíasbara Eliseoʼa jaradiasi akʉza basi propetara warrarata, ãyabida jaradiasida (2 Rey. 2:7). Mawũẽra mejãchabʉ yumakẽrãra kʼẽrẽpapanʉrata Daizeze pʉwʉrʉ kʼarebaita, mawũã Jeowaba iya oita krĩchabʉ aripe berabarimarẽã.

13. Hebreos 13:5​ba jarabʉbara, ¿sãwũã so zarea diabʉ dayirã? (Akʉra potota).

¹³ Naʉ̃ra yizara ʉ̃rʉ krĩchabʉdadera, ¿kʼãrẽba sãwũãi 144.00ra ʉ̃ta wãna tẽãra? Daizeze Bedʼeaba jara ũrĩbibʉ kʼãrẽta berabarita: Jeowabara iyi pʉwʉrʉra doba  amae ẽ bayi (akʉra Hebreos 13:5). Abarika Moisés akʉza Elíasde kĩrãkʼa, Zõrãrã Burubiadebemarabara kʼawuapanʉ kʼãrẽaba yibiata awurura jaradiara akʉza ãyara mebẽrã yumakẽrãra awuru obejadebemara jaradiapanʉ, mawũã Jeowa pʉwʉrʉta bia akʉdamarẽã. Bari jaraita, opanʉ eskuelara zõrãrãita, kongregasionʼra akʉbarira zõrãrãita, mebẽrã Beteldebemaraita akʉza nekʼãrẽ awuruita. Zõrãrã Burubiadebemarabara jaradiapanʉ mebẽrã Zõrãrã Burubiadebema kʼarebabarira, naʉ̃ra mebẽrãbara mejãcha kʼarebapanʉ Jeowa organizasione ãyi trajo bia opanʉne. Ãyara biʼia jaradiapanʉ, mawũã Jeowa pʉwʉrʉ biʼia akʉdamarẽã.

14. ¿Dayirãbara kʼãrẽ ʉ̃rʉ krĩchaibara?

¹⁴ Atia krĩchadaya naʉ̃ ʉ̃rʉ, 144.000ra ʉ̃ta wãbʉrʉdera zʉbʉria zroma jõbodoare, Daizeze pʉwʉrʉra iyaʼa yiwidʼipanañi iya kãgabʉ kĩrãkʼa. Jesuba ãyi bia zokabʉ baera, Daizeze odepanʉrabara kʼẽrẽpa opanañi iya kãgabʉta. Kʼawuapanʉ maʉ̃ ewaridera dayirãra Gog de Magogba pẽwãita, maʉ̃rãra nokʼora ãba yi jʉrebʉ Daizeze pʉwʉrʉ pẽwãita (Ezeq. 38:​18-20). Mamina ãya mawũã pẽwãbʉba oẽ bayi Daizeze pʉwʉrʉba Daizezeʼa yiwidʼibʉta idubʉmarẽã, iya wãrĩnu ẽdrʉbiyi iyi pʉwʉrʉra. Juanba ũdusi mejãcha ẽbẽrarã awuru obejadebemarata, iyaʼa jarasida naʉ̃ra mejãcha ẽbẽrarãra zebʉta zʉbʉria zromaneba (Apoc. 7:​9, 14). Ãyira bei ẽã ẽdrʉyi.

15, 16. Apocalipsis 17:14​ba jarabʉdebara, ¿kʼãrẽta odai 144.000rabara Armagedón yõ ewaridera akʉza naʉ̃ba kʼãrẽa so zarea diabʉ dayirãʼa?

¹⁵ Mamina 144.000ra ʉ̃ta wãna tẽãra, ¿ãyara kʼãrẽta oi? Daizeze Bedʼeaba panʉbʉ maʉ̃ bedʼeara. Jarabʉ nokʼorãra korderoʉ̃me yõita. Mamina ãyira korderoba ãyi juwa edre baebiyi, maʉ̃nera ¿kʼaiba kʼarebai iyira? Yi bersikuloba jara ũrĩbibʉ Jeowaba jidakʉadaraba akʉza kʼẽrẽpapanʉraba (akʉra Apocalipsis 17:14). ¿Kʼaira maʉ̃rãra? Maʉ̃rãra ʉ̃ta wãira, maʉ̃ba ãyi ʉ̃ta wãbʉrʉdera zʉbʉria  zroma jõbodoarera ãyara naʉ̃ta oyi: yõita. Naʉ̃ trajo oira jipade zarebaibara ãyitara, ʉ̃kʉrʉra 144.000rãra ãyi Jeowa ʉ̃rʉ Kʼawuabipanʉrã bʼai nããra, yõmiarabasi baera akʉza ʉ̃kʉrʉra gorogororane edapanasi baera, mamina ãyi Daizeze ode wãside kʼawuasida baera sãwũã aduʼa bʼaita awururabawara (Gál. 5:22; 2 Tes. 3:16). Adewara ãyara idubʉsida yõra, mamina naʉ̃ra 144.000ra ʉ̃ta wãna tẽãra, ãyira Jesuʉ̃me akʉza angeleraʉ̃me ãba trajayi yõita Daizeze nejʉraraʉ̃me.

¹⁶ Krĩchara naʉ̃ta, ʉ̃ta wãira nama egorode bʉedara ãyira zõrãrãyiru. Mamina ãyi ʉ̃ta wãbʉrʉdera jauredepanañi, zarea mejãcha erpanañi akʉza beikabayi, adewara ãyira Jesu kʼawa yõñi. Armagedón berabarida tẽãra ãyira Jesuʉ̃me trajayi kʼarebaita ẽbẽrarãta kayirua oka bamarẽã. 144.000rabara mejãcha kʼarebayi mebẽrãra ãyi ʉ̃ta wãbʉrʉdebʉrʉ, ãyi nama egorodebaside kʼarebadaira.

17. ¿Sãwũã kʼawuapanʉ Daizeze ode kʼẽrẽpapanʉrãra neida berabari ẽ baita Armagedón yõ ewaridera?

¹⁷ ¿Bʉra awuru obejadebemaka? Mawũãbʉrʉ, ¿kʼãrẽta oibara Armagedón yõ ewari zebʉrʉdera? Ĩjãibara Jeowa ʉ̃rʉ akʉza oibara iya zokʼabʉta. ¿Kʼãrẽta jarakĩrãbʉ maʉ̃ba? Daizeze Bedʼeaba naʉ̃ bedʼea biata jarabʉ: «Wãidua mʉ̃ pʉwʉrʉra, mõbe eda wãidua mayi deda aramaʉ̃ta puertara serraidua. Mama eda mĩrʉ totoidua, naʉ̃ jõma berabariyeda» (Is. 26:20). Daizeze ode kʼẽrẽpapanʉra ʉ̃tʉpanʉta akʉza nama egorodepanʉta neneẽãpanañi. Abarika Pablode kĩrãkʼa dayirãbara kʼawuapanʉ «mia nokʼoraba, mia atia berabarinʉmʉba, mia nekʼãrẽ ʉ̃rabʉrʉ zeiba, mia zarearaba, mia ʉ̃tʉba, mia eidubʉba, mia awuru nekʼãrẽ parãnaba jĩgara bʉ ẽ bayi Daizeze kãgadebara» (Rom. 8:​38, 39). Kĩrãbera Jeowabara bʉra kãgata akʉza doba amae ẽ baita.