1. Wagati juman lo la kerecɛn mɔlenw bɛɛ bena lajɛn sankolo la?

 A SAAN caaman ye nin ye, Jehova sagokɛlaw tun b’u yɛrɛ ɲininga ko: “Kerecɛn mɔlen tɔɔ minw be dugukolo kan, olu bena taga sankolo la tuma juman do?” Fɔlɔ la, an tun b’a miiri ko n’a sɔrɔ kerecɛn mɔlen dɔw bena wagati dɔ kɛ n’an ye alijɛnɛ kɔnɔ dugukolo kan, Arimagedɔn kɛlɛ bannin kɔ. Nka saan 2013, zuwekalo tile 15nan ka Kɔrɔsili Sangaso y’an dɛmɛ k’a faamu ko kerecɛn mɔlen tɔɔ minw be dugukolo kan, u bɛɛ bena taga sankolo la sanni Arimagedɔn kɛlɛ ka daminɛ.—Mat. 24:31.

2. N’a sɔrɔ an b’an yɛrɛ ɲiningara mun lo la, ani an bena mun lo lajɛ barokun nin na?

² Nka n’a sɔrɔ an b’an yɛrɛ ɲiningara ko: “Krista ka ‘saga dɔ wɛrɛ’ mɔgɔ minw bena to ka Jehova sago kɛ kantigiya la dugukolo kan ‘tɔɔrɔba’ wagati la, mun lo bena olu sɔrɔ do?” (Zan 10:16; Mat. 24:21). N’a sɔrɔ u dɔw b’a miiri ko u balima kanulen minw ye kerecɛn mɔlenw ye, n’u tagara sankolo la, dɛmɛbaga tɛna sɔrɔ olu la. N’a sɔrɔ Bibulu ka maana fila dɔw lo b’a to u b’o miiri. An k’o maanaw lajɛ. O kɔ, an bena a filɛ kuun minw kama an man ɲi ka jɔɔrɔ ko dɛmɛbaga tɛna sɔrɔ an na.

MUN LO TƐNA KƐ?

3-4. N’a sɔrɔ dɔw be jɔɔrɔla mun lo la ani mun na?

³ Koow Ɲɛnabɔla Jɛnkulu mɔgɔw bɛɛ ye kerecɛn mɔlenw lo ye. N’a sɔrɔ dɔw be jɔɔrɔla ko n’u tɛ yen tugun k’an ɲɛminɛ, saga dɔ wɛrɛ mɔgɔw bena tiɲɛn sira bila. N’a sɔrɔ Bibulu ka maana dɔw lo b’a to u be jɔɔrɔla o la. An k’u la fila lajɛ. Maana fɔlɔ ɲɛsinna sarakalasebagaw kuntigi Yoyada lo ma. Ala sagokɛla kantigi tun lo. Ale n’a muso Yosabati ye cɛdennin Zowasi dɛmɛ a kɛra masacɛ  ɲuman ni masacɛ kantigi ye. Ka cɛkɔrɔba Yoyada to sii la, Zowasi tora ka koo ɲuman kɛ. Nka Yoyada sanin kɔ, Zowasi y’a daminɛ ka koo jugu kɛ. Kuntigi minw tun ye mɔgɔ juguw ye, a ye mɛnni kɛ olu fɛ ka Jehova to yen.—2 Til. Kib. 24:2, 15-19.

⁴ Maana 2nan ɲɛsinna saan kɛmɛkulu 2nan kerecɛnw lo ma. Ciden Zan lo kɛra laban ye ka sa Yezu ka cidenw cɛma. K’a to sii la, a ye kerecɛn caaman dɛmɛ u tora ka kantigiya kɛ Jehova ye (3 Zan 4). I ko ciden kantigi tɔɔw, Zan y’a jija kosɔbɛ ka kerecɛn kafo latanga ngalon kalanw ni kɛwale juguw ma (1 Zan 2:18; 2 Tes. 2:7). Nka Zan sanin kɔ, ngalon kalanw jɛnsɛnna kosɔbɛ, i ko ni tasuma ye biin minɛ. A ma mɛɛn, kerecɛn murutininw y’u ka kɛwale juguw n’u ka ngalon kalanw jɛnsɛn kafow bɛɛ kɔnɔ.

5. An man ɲi ka mun lo miiri o maana fila koo la?

⁵ Yala o maana fila b’a yira ko Krista ka saga dɔ wɛrɛ mɔgɔw bena bɔ Jehova kɔ kerecɛn mɔlenw lajɛnnin kɔ sankolo la wa? O wagati la, yala kerecɛn kantigiw ye fɔrɔmasɔn min sɔrɔ, u bena o to yen, i ko Zowasi y’a kɛ cogo min na wa? Wala u bena sɔn ngalon kalanw ma i ko kerecɛn caaman y’a kɛ cogo min na saan kɛmɛkulu filanan na wa? Ayi, o tɛna kɛ fewu! An be se ka la a la ko ni kerecɛn mɔlenw tagara sankolo la, saga dɔ wɛrɛ mɔgɔw bena to ka Jehova bato cogo bɛnnin na ani Jehova bena to k’a janto u la. Mun na an lanin be o la?

BATOLI SENUMAN TƐNA NƆGƆ

6. An bena kuma dɔɔni wagati saba jumanw lo koo la?

⁶ Mun na an be se ka la a la ko batoli senuman tɛna nɔgɔ, hali wagati gwɛlɛ nataw la? Bibulu be min fɔ an ka wagati koo la, o lo b’a to an lanin b’o la. An ka wagati be dan na pewu ni Israɛldenw ka wagati ani saan kɛmɛkulu filanan wagati ye. O la, an k’o wagati saba lajɛ koɲuman: 1) Israɛldenw ka wagati, 2) cidenw sanin kɔ, ani 3) an ka wagati, o min na “yɛlɛmani [be donna] diɲɛ koow bɛɛ la.”—Kɛw. 3:21.

7. Mun na Israɛlden kantigiw jaa gwɛlɛyara tuma min na Israɛldenw fanba n’u ka masacɛw tun be kojuguw kɛra?

⁷ Israɛldenw ka wagati. Dɔɔni sanni Musa ka sa, a y’a fɔ Israɛldenw ye ko: “Ne b’a lɔn ko ne sanin kɔ, aw bena kɛ mɔgɔjuguw yɛrɛ yɛrɛ ye. Ne ye sira min yira aw la, aw bena aw yɔrɔ jaɲa o la.” (Deter. 31:29). Musa tun kɔnna k’a fɔ u ye fana ko n’u murutira Jehova ma, u juguw bena taga n’u ye jɔnya la (Deter. 28:35, 36). O kumaw dafara wa? Ɔnhɔn. Saan kɛmɛkulu caaman kɔnɔ, Israɛldenw ka masacɛ caaman ye koo jugu kɛ Jehova ɲɛɛ kɔrɔ ani jama tugura u kɔ ka ngalon alaw bato. O kama, minw tun be koo jugu kɛ, Jehova ye olu ɲangi ani a tun ye labɛn min kɛ masacɛw sigiko la, a ye daan sigi o la (Ezek. 21:30-32). Nka Israɛlden kantigiw jaa gwɛlɛyara sabu u y’a ye ko Jehova ka kuma be dafara.—Ezayi 55:10, 11.

8. Yala a ka ɲi ka bari an na k’a ye ko ngalon kalanw jɛnsɛnna kerecɛn kafo kɔnɔ saan kɛmɛkulu filanan na wa? A ɲɛfɔ.

⁸ Cidenw sanin kɔ. Yala a ka ɲi ka bari an na k’a ye ko ngalon kalanw jɛnsɛnna kerecɛn kafo kɔnɔ saan kɛmɛkulu filanan na wa? Ayi. Yezu tun kɔnna k’a fɔ ko kerecɛn murutininw bena caya kosɔbɛ (Mat. 7:21-23; 13:24-30, 36-43). Ciden saba bɛɛ y’a yira ka gwɛ k’o kuma  y’a daminɛ ka dafa saan kɛmɛkulu fɔlɔ la. O ciden saba nunu ye Pol, Piyɛri ani Zan lo ye (2 Tes. 2:3, 7; 2 Piyɛri 2:1; 1 Zan 2:18). Saan kɛmɛkulu filanan na, ngalon kalanw jɛnsɛnna kerecɛn kafo kɔnɔ. Kerecɛn tɔgɔtigiw cayara ani u kɛra Babilonɛba faan jɔnjɔn dɔ ye. Babilonɛba ye duniɲa kuru bɛɛ ka ngalon diinanw jɛnkulu lo ye. O koo fana tun be kiraya kuma lo dafara.

9. Cogo juman na an ka wagati be dan na ni Israɛldenw ka wagati ani saan kɛmɛkulu filanan wagati ye?

⁹ Wagati min na “yɛlɛmani [be donna] diɲɛ koow bɛɛ la.” An ka wagati be dan na ni Israɛldenw ka wagati ani saan kɛmɛkulu filanan wagati ye, o min na kerecɛn murutininw cayara kosɔbɛ. An ka wagati weelela cogo di? An ka teli k’a weele ko duniɲa ni “laban tuma.” (2 Tim. 3:1). Nka Bibulu b’a yira ko wagatijan diiman dɔ daminɛna o wagati kelen na. O wagati bena mɛɛn fɔɔ tuma min na Krista ka Masaya bena adamadenw dɛmɛ u ka kɛ mɔgɔ dafaninw ye ani ka dugukolo kɛ alijɛnɛ ye. O wagati weelela ko wagati min na “yɛlɛmani [be donna] diɲɛ koow bɛɛ la.” (Kɛw. 3:21). A daminɛna saan 1914. Mun lo yɛlɛmana o wagati la? Jehova ye Yezu sigi masaya la sankolo la. O la sisan, masacɛ dɔ be yen min ye Jehova ka lasigiden ye ani masacɛ kantigi Dawuda bɔnsɔn dɔ lo. Nka o masacɛ sigiko dɔrɔn lo ma kɛ yɛlɛmani ye. Dɔɔni o kɔ, batoli senuman fana sigira sen kan kokura (Ezayi 2:2-4; Ezek. 11:17-20). Yala o batoli senuman bena nɔgɔ tugun wa?

10. a) Ka ɲɛsin an ka wagati ma, Bibulu tun kɔnna ka mun lo fɔ tiɲɛn batoli koo la? (Ezayi 54:17). b) Mun na o kiraya kumaw be mɔgɔ hakili sigi?

¹⁰ Ezayi 54:17 kalan. Miiri kiraya kuma nin na: “Kɛlɛkɛminan fɛɛn o fɛɛn dilanna i kama, o si tena foyi ɲa”! O kiraya kuma be dafara an ka wagati la. Dususalo kuma nunu fana ɲɛsinna an ka wagati ma: “I deenw bɛɛ bena kɛ Masaba ka kalandenw ye, i deenw ka hɛrɛ bena boɲa. I sigicogo bena ɲa. . . . I tena siran tugu. Jatigɛko yɔrɔ bena jaɲa i la, o tena se i ma tugu.” (Ezayi 54:13, 14). Jehova sagokɛlaw be min kɛra walisa ka mɔgɔw kalan Jehova koo la, see tɛ “diɲɛ kuntigi Sutana” yɛrɛ ye k’o bali (2 Kor. 4:4). Batoli senuman sigira sen kan ani foyi tɛ se k’a nagasi. A bena to kudayi.  Kɛlɛkɛminan fɛɛn o fɛɛn mana dilan an kama, o tɛna se an kɔrɔ!

MUN LO BENA KƐ?

11. Mun na an lanin b’a la ko ni kerecɛn mɔlenw bɛɛ tagara sankolo la, Yezu tɛna jamaba mɔgɔw to yen?

¹¹ Mun lo bena kɛ ni kerecɛn mɔlenw bɛɛ tagara sankolo la? A to i hakili la ko Yezu lo ye an Ɲɛminɛbaga ye. Ale lo ye kerecɛn kafo kuntigi ye. Yezu y’a fɔ ka gwɛ ko: “Aw kuntigi ye kelen ye, o ye Ala ka Mɔgɔ wolomanin nin ye.” (Mat. 23:10). An ka Masacɛ tɛna dɛsɛ fewu a ka baara la. Komi Krista lo b’an ɲɛminɛna, an tɛna siran foyi ɲɛ. An t’a lɔn a bena an ɲɛminɛ cogo min na tigitigi o wagati la. O la, an ka misali dɔw lajɛ Bibulu kɔnɔ minw be se k’an hakili sigi.

12. Jehova y’a janto a sagokɛlaw la cogo di a) Musa sanin kɔ? b) Tuma min na cii wɛrɛ kalifara Eli ma? (jaa lajɛ fana).

¹² Musa sara sanni Israɛldenw ka don Layidu jamana kɔnɔ. Mun lo ye Ala sagokɛlaw sɔrɔ? Komi o cɛɛ kantigi tun tɛ yen tugun, yala Jehova y’a ka mɔgɔw to yen wa? Ayi. U tora kantigiya la wagati minw bɛɛ la, Jehova tora k’a janto u la. Sanni Musa ka sa, Jehova tun y’a fɔ a ye ko a ka Zozuwe sigi jama kun na. Musa ye fɔrɔmasɔn di Zozuwe ma saan caaman kɔnɔ (Ɛkiz. 33:11; Deter. 34:9). Ka fara o kan, cɛɛ setigi caaman wɛrɛw tun be yen minw tun ye ɲɛmɔgɔw ye. A tun y’u sigi mɔgɔ waa kelen kelen kun na, ni mɔgɔ kɛmɛ kɛmɛ, ni bi duuru duuru, ani hali mɔgɔ tan tan yɛrɛ kun na (Deter. 1:15). Ala sagokɛlaw tun t’u kelen na. Eli fana ka koo b’o lo yira. Saan caaman kɔnɔ, a y’a jija kosɔbɛ ka Israɛldenw dɛmɛ u ka Jehova bato. Nka wagati dɔ nana se, Jehova ye Eli ta ka taga n’a ye Zuda, Israɛl mara worodugu fan fɛ (2 Mas. 2:1; 2 Til. Kib. 21:12). Yala Israɛl siya tan mɔgɔ kantigiw tora u kelen wa? Ayi. Saan caaman kɔnɔ, Eli ye fɔrɔmasɔn di Elize ma. Siga t’a la, “kiraw denkɛw” fana ye fɔrɔmasɔn dɔ sɔrɔ (2 Mas. 2:7, Bible senuma). O la, cɛɛ kantigi caaman tun be yen walisa ka Ala ka jama ɲɛminɛ. Jehova tora k’a sagonata dafa ani k’a janto a sagokɛla kantigiw la.

13. Hakilisigi kuma juman lo be sɔrɔ Eburuw 13:5 yɔrɔ filanan na? (jaa lajɛ fana).

¹³ K’o misaliw to an hakili la, ele fɛ mun lo bena kɛ tuma min na kerecɛn mɔlen tɔɔw bena taga sankolo la? Kuun  t’a la an ka siran. Bibulu b’an hakili sigi ko Jehova sagokɛla minw be dugukolo kan, a tɛna u bila abada! (Eburuw 13:5b kalan). I ko Musa ni Eli, kerecɛn mɔlen jɛnkulu dennin min b’an ɲɛminɛna dugukolo kan bi, olu b’a faamu ko a kɔrɔtanin lo u ka fɔrɔmasɔn di tɔɔw ma. Kabi saan caaman, Koow Ɲɛnabɔla Jɛnkulu be fɔrɔmasɔn dira cɛɛ dɔw ma saga dɔ wɛrɛ mɔgɔw cɛma, walisa u ka Ala ka baara ɲɛminɛ. Misali la, u ye lakɔli caaman labɛn walisa ka fɔrɔmasɔn di diinan mɔgɔkɔrɔw, kɔrɔsibaga tagamakɛlaw, tɔnbolo ka kɔmite mɔgɔw, Betɛli ka birow ɲɛminɛbagaw ani mɔgɔ wɛrɛw ma. Koow Ɲɛnabɔla Jɛnkulu mɔgɔw yɛrɛ lo be fɔrɔmasɔn di u ka kɔmitew dɛmɛbagaw ma. Kabi sisan, o dɛmɛbagaw be baaraba yɛrɛ lo kɛra kantigiya la! U labɛnnin lo koɲuman ka se k’u janto Krista ka sagakulu la ni kerecɛn mɔlenw bɛɛ tagara sankolo la.

14. Kalan nin ka miiriya jɔnjɔn ye mun lo ye?

¹⁴ Kalan nin ka miiriya jɔnjɔn ye nin ye: Tuma min na kerecɛn mɔlen tɔɔw bena taga sankolo la tɔɔrɔba wagati laban fan fɛ, tiɲɛn batoli bena to ka yiriwa dugukolo kan yan. Yezu Krista bena to ka Jehova sagokɛlaw ɲɛminɛ minkɛ, u bena to ka Jehova bato kantigiya la. O wagati la le, jamanaw bena ɲɔgɔn lajɛn ka wuli Ala sagokɛlaw kama. O jamanaw lajɛnni lo be weele ko Gɔgi min be Magɔgi (Ezek. 38:18-20). O kɛlɛ tɛna mɛɛn ani u tɛna see sɔrɔ sabu u tɛna se ka daan sigi batoli senuman na. Jehova bena an kisi, siga t’o la! Ciden Zan ye Krista ka saga dɔ wɛrɛ mɔgɔw “jamaba” ye yelifɛn dɔ la. Bibulu b’a fɔ ko o “jamaba” “bɔra tɔɔrɔba” la (Yir. 7:9, 14). Tiɲɛn na, Jehova bena u kisi!

15-16. Ka kɛɲɛ ni Yirali 17:14 ye, kerecɛn mɔlenw bena mun lo kɛ Arimagedɔn kɛlɛ tuma na, ani mun na o be mɔgɔ jija?

¹⁵ N’a sɔrɔ dɔw bele b’u yɛrɛ ɲiningara ko: “Kerecɛn mɔlenw bena mun lo kɛ u taganin kɔ sankolo la?” O ɲiningali jaabili fɔra ka gwɛ Bibulu kɔnɔ. A b’a fɔ ko duniɲa ka gofɛrɛnɛmanw “bena  Sagaden . . . kɛlɛ.” Nka, u tɛna see sɔrɔ. A fɔra ko: “Sagaden bena se u kɔrɔ.” Jɔn lo bena a dɛmɛ do? A fɔra o yɔrɔ kelen na ko: “Mɔgɔ weleninw, [ni mɔgɔ] wolomaninw, ni kantigiw.” (Yirali 17:14 kalan). Olu ye jɔnw lo ye? Kerecɛn mɔlen minw suu kununa! O la, tɔɔrɔba laban fan fɛ, kerecɛn mɔlen tɔɔ minw be dugukolo kan, u bena taga sankolo la. N’u tagara, u ka baara fɔlɔ dɔ bena kɛ min ye, o ye ka kɛlɛ kɛ. O ye kunkanbaaraba yɛrɛ lo! Sanni kerecɛn mɔlen dɔw ka kɛ Jehova Seerew ye, u tun ye kɛlɛkɛla waraw lo ye. Dɔw yɛrɛ ye sɔrɔdasiya kɛ tuma min na u tun be duniɲa nin na. Kɔfɛ, u nana kɛ kerecɛn sɔbɛw ye ani u y’a degi ka kɛ hɛɛrɛ la ni tɔɔw ye (Gal. 5:22; 2 Tes. 3:16). U tɛ kɛlɛ kɛ tugun. Nka, n’u tagara sankolo la, u bena fara Yezu ani mɛlɛkɛ senumanw kan ka kɛlɛ laban kɛ: U bena Ala juguw kɛlɛ.

¹⁶ Miiri nin na: Dugukolo kan yan, kerecɛn mɔlen dɔw kɔrɔla fɔɔ fanga t’u la tugun. Nka n’u suu kununa ka taga sankolo la, u bena kɛ danfɛn barikamanw ye minw tɛ sa. U bena fara Masacɛ Yezu Krista kan, ale min ye kɛlɛkɛla ŋana ye ka kɛlɛ kɛ. Arimagedɔn kɛlɛ kɔ, olu ni Yezu bena jɛn ka adamadenw dɛmɛ u ka kɛ mɔgɔ dafaninw ye. Tuma min na u tun ye adamaden dafabaliw ye dugukolo kan, u tun be to k’u balima kanulenw dɛmɛ. Nka n’u tagara sankolo la, siga t’a la u bena se k’u balimaw dɛmɛ koɲuman ka tɛmɛ fɔlɔ kan!

17. An b’a lɔn cogo di ko Ala sagokɛlaw bɛɛ latanganin bena kɛ Arimagedɔn kɛlɛ tuma na?

¹⁷ Yala i be saga dɔ wɛrɛ mɔgɔw cɛma wa? N’o lo, i ka ɲi ka mun lo kɛ ni Arimagedɔn kɛlɛ wulila? I ka ɲi k’i jigi la dɔrɔn Jehova kan ani ka tugu a ka cikanw kɔ. O kɔrɔ ko di tigitigi? Bibulu b’a fɔ ko: “Aw ka don aw ka soow kɔnɔ, ka daaw tugu. Aw ka dogo waati kunkurunnin kɔnɔ, fɔɔ Masaba ka dimi waati ka tɛmɛ.” (Ezayi 26:20). O kumaw be mɔgɔ jija yɛrɛ le! Ala sagokɛla kantigi minw be dugukolo kan ani sankolo la, u bɛɛ latanganin bena kɛ o wagati la. I ko ciden Pol, an lanin b’a la ko gofɛrɛnɛmanw wo, “walima fɛɛn minw be diɲɛ na bii, walima minw bena kɛ yen sini, . . . fɛɛn si te yen min be se k’an faran ka bɔ Ala ka kanuya la min yirala an Matigi Yezu Krista sababu la.” (Ɔrɔm. 8:38, 39). Kana ɲinɛ abada ko Jehova b’i kanu ani ko a tɛna i to yen fewu!