1. Ini ewe ke kpukpru mbon emi ẹyetde aran ẹdidu ke heaven?

 EDIWAK isua ko ke edem, ikọt Abasi ẹma ẹsikere m̀mê ini ewe ke ẹdimen akpatre ke otu mbon emi ẹyetde aran ẹka heaven. Ikesikere ke ekeme ndidi ndusụk mmọ ẹyesụk ẹdu ekpri ke Paradise ke isọn̄ Armageddon ama okụre. Edi ke Enyọn̄-Ukpeme July 15, 2013, ima ikpep ke kpukpru mbon emi ẹyetde aran, emi ẹsụk ẹdude ke isọn̄, ẹyeka heaven mbemiso ekọn̄ Armageddon ọtọn̄ọde.​—Matt. 24:31.

2. Nso ke ndusụk nnyịn ikeme ndibụp? Nso ke idineme ke ibuotikọ emi?

² Edi ndusụk nnyịn imekeme ndibụp: Nso iditịbe inọ “mme erọn̄ en̄wen” emi Christ enyenede, emi ẹdisụk ẹsọn̄ọde ẹda ẹnam n̄kpọ ẹnọ Jehovah ke isọn̄ ke ini “akwa ukụt”? (John 10:16; Matt. 24:21) Ndusụk owo ẹkere ke ẹma ẹtan̄ kpukpru ndima nditọete mmimọ emi ẹyetde aran ẹka heaven ke mmimọ ididiọn̄ọke se ikpanamde aba, ke idinyụn̄ idụhe eke edidade mmimọ usụn̄. Ẹyak ineme mbụk Bible iba emi ẹkemede ndinam mmọ ẹkere ntre. Ekem iyeneme ntak emi mîkpanaha ifịna idem.

NSO MÎDITỊBEKE?

3-4. Nso ke ndusụk owo ẹkeme ndikere? Ntak-a?

³ Ndusụk owo ẹkeme ndikere m̀mê nditọete emi ẹyetde aran, emi ẹdide mbon Otu Emi Ẹsede Ẹban̄a Utom Mme Ntiense Jehovah, mîdụhe aba ndida ikọt Abasi usụn̄ m̀mê mme erọn̄ en̄wen ẹyekpọn̄ Jehovah. Etie nte ndusụk mbụk ke Bible ẹsịn mmọ utọ ndịk oro ke esịt. Imọn̄ ineme utọ mbụk oro iba. Akpa edi enye emi aban̄ade Jehoiada emi ekedide akwa oku. Ete oro ekedi ata owo Abasi. Enye ye Jehoshabeath an̄wan esie ẹma ẹkpeme ekpri eyen erenowo emi ekekerede Jehoash ẹnyụn̄ ẹn̄wam enye edi eti edidem onyụn̄ anam n̄kpọ ọnọ Jehovah. Jehoash ama okpono Jehovah onyụn̄ anam nti n̄kpọ ini Jehoiada emi ọkọsọn̄ọde enye okosụk odude uwem. Edi Jehoiada  akakpa, enye oforo n̄kpọ en̄wen. Enye ama akpan̄ utọn̄ ọnọ mbọn̄ Judah emi mîkedịghe se ẹkpediande idem onyụn̄ ọkpọn̄ Jehovah.​—2 Chron. 24:2, 15-19.

⁴ Ọyọhọ mbụk iba edi eke mme Christian emi ẹkedude uwem ke mme apostle ẹma ẹkekpan̄a. Apostle John ekedi akpatre apostle emi akakpade. Ini enye mîkakpaha kan̄a, enye ama an̄wam ata ediwak Christian ẹsọn̄ọ ẹda ye Jehovah. (3 John 4) Enye ye nti apostle Jesus eken ẹma ẹtịme etieti ndikpeme nditọete nsio ke ubọk mbon emi ẹkedọn̄ọde ke esop ẹkpep nsu. (1 John 2:18; se se ẹwetde ẹban̄a 2 Thess. 2:7 ke nwtsty.) Ke John ama akakpa, n̄kpọ oro ama atara asuana. Ediwak owo ẹma ẹkpobi nsu emi ẹkekpepde. Ke mme isua emi ẹketienede, mbon emi ẹkedọn̄ọde ẹkpep nsu do ẹma ẹkpep ata ediwak n̄kpọ emi mîkenenke ke kpukpru mme esop, ẹnyụn̄ ẹyak mme owo ẹdọn̄ọ do ẹnam etịme etịme n̄kpọ.

5. Nso ke mîkpanaha ikere ke ntak mbụk iba oro?

⁵ Ndi mbụk Bible iba oro ẹwụt ke mbiet n̄kpọ oro eyetịbe ọnọ mme erọn̄ en̄wen emi Christ enyenede ẹma ẹmen mbon emi ẹyetde aran ẹka heaven? Ndi nti ikọt Abasi emi ẹdidude ke isọn̄ ini oro ẹyekpọn̄ usụn̄ nte Jehoash ọkọkpọn̄de, mîdịghe ẹtọn̄ọ ndikpep nsu nnyụn̄ nnam se mîkpanaha ẹnam nte ediwak mme Christian emi ẹkedude uwem ke mme apostle ẹma ẹkekpan̄a ẹkenamde? N̄wan̄ansa-o! Imenịm ke mbon emi ẹyetde aran mîdụhe aba ke isọn̄ ke mme erọn̄ en̄wen idikpọn̄ke Jehovah, ẹyenyụn̄ ẹka iso ẹse ẹban̄a mmọ. Nso inam inịm?

IKỌT JEHOVAH ẸYEKA ISO ẸTUAK IBUOT ẸNỌ JEHOVAH NTE ENYE OYOMDE

6. Siak ini ita emi idinemede iban̄a ekpri ekpri.

⁶ Nso ikeme ndinam inen̄ede inịm ke ikọt Jehovah ẹyeka iso ẹtuak ibuot ẹnọ enye nte enye oyomde idem ke n̄kpọsọn̄ ini emi ẹsụk ẹdide? Se ikpepde ke Bible iban̄a ini nnyịn emi anam ikeme ndinịm. Ini nnyịn emi enen̄ede okpụhọde ye ini nditọ Israel oro ye ini mme Christian emi ẹkedude uwem ke mme apostle ẹma ẹkekpan̄a. Ẹyak ineme iban̄a ini ita emi: (1) Ini nditọ Israel, (2) ini mme Christian emi ẹkedude uwem ke mme apostle ẹma ẹkekpan̄a, ye (3) ini nnyịn emi, “ini emi ẹdinamde kpukpru n̄kpọ ẹtọn̄ọ ntak ẹfọn ẹma.”​—Utom 3:21.

7. Nso ikanam idem okûmem nti nditọ Israel ini ndidem ye nditọ idụt mmọ ẹkemekde ndinam ndiọi n̄kpọ?

⁷ Ini nditọ Israel. Esisịt ini mbemiso Moses akpade, enye ama ọdọhọ nditọ Israel ete: “Mmọfiọk nte ke mma n̄kpa mbufo iditreke ndinam se idade nsobo idi nnyụn̄ n̄wọn̄ọde n̄kpọn̄ usụn̄ emi n̄ketemede mbufo.” (Deut. 31:29) Moses ama onyụn̄ odụri mmọ utọn̄ ete ke mmọ ẹkpesọn̄ ibuot ye Abasi, ke Abasi ayayak idụt en̄wen ẹditan̄ mmọ ẹnyọn̄. (Deut. 28:35, 36) Ndi ama etịbe ntre? Ama etịbe-o. Ke ediwak isua, ediwak ndidem ẹma ẹnam se Jehovah asuade, ẹkpono nsunsu abasi, ẹnyụn̄ ẹdụri ikọt mmọ ẹsịn ke idiọk afan̄ oro. Ntre Jehovah ama eyet ubọk ọkpọn̄ ikọt esie emi ẹkenamde se ikọdiọkde, onyụn̄ anam eyen Israel ndomokiet idịghe aba edidem. (Ezek. 21:25-27) Ekedi nti nditọ Israel ẹkụt nte se Abasi ama eketetịn̄ oro etịbede, mmọ ẹda oro ẹsọn̄ idem esịt ẹnyụn̄ ẹka iso ẹnam n̄kpọ Jehovah.​—Isa. 55:10, 11.

8. Ndi akpana akpa nnyịn idem nte nsu akatarade asuana ke esop ke mme apostle ẹma ẹkekpan̄a? Nam an̄wan̄a.

⁸ Ini mme Christian emi ẹkedude uwem ke mme apostle ẹma ẹkekpan̄a. Ndi akpana akpa nnyịn idem nte nsu akatarade asuana ke esop ke mme apostle ẹma ẹkekpan̄a? Ihih-o. Jesus ama etetịn̄ ke ata ediwak owo ẹyedọn̄ọ ke esop ẹkpep nsu. (Matt. 7:21-23; 13:24-30, 36-43) Se apostle ita emi, Paul, Peter, ye John ẹketịn̄de ama ọsọn̄ọ ke prọfesi Jesus oro ọtọtọn̄ọ ndisu ke eyo mmọ. (2 Thess. 2:3, 7; 2 Pet. 2:1;  1 John 2:18) Ke mme apostle ẹma ẹkekpan̄a, nsu emi ẹkedọn̄ọde ke esop ẹkpep ama atara asuana ke kpukpru mme esop, ẹma ẹnyụn̄ ẹyak mme owo ẹdọn̄ọ do ẹnam etịme etịme n̄kpọ. Esop Christian ama editiene esịne ke Akwa Babylon emi adade aban̄a kpukpru nsunsu ido ukpono ke ofụri ererimbot. Se Jesus eketịn̄de akafiak osu oro.

9. Didie ke ini nnyịn emi okpụhọde ye ini nditọ Israel oro ye ini mme Christian emi ẹkedude uwem ke mme apostle ẹma ẹkekpan̄a?

⁹ “Ini emi ẹdinamde kpukpru n̄kpọ ẹtọn̄ọ ntak ẹfọn ẹma.” Ini nnyịn emi okpụhọde ye ini nditọ Israel oro ye ini mme Christian emi ẹkedude uwem ke mme apostle ẹma ẹkekpan̄a. Ẹkot didie ini nnyịn emi? Isiwak ndikot enye “mme akpatre usen” idiọk ererimbot emi. (2 Tim. 3:1) Edi se ikụtde ke Bible owụt ke ini en̄wen emi akande mme akpatre usen onyụn̄ ọniọn̄de akan oro ama ọtọn̄ọ kpa ke ini mme akpatre usen ọkọtọn̄ọde. Ini oro editre ke ukara emi Christ osụk akarade mi ama an̄wam mme owo ẹfọn ẹma, onyụn̄ anam isọn̄ emi akabade Paradise. Ẹkot ini oro “ini emi ẹdinamde kpukpru n̄kpọ ẹtọn̄ọ ntak ẹfọn ẹma.” (Utom 3:21) Okonyụn̄ ọtọn̄ọ ke 1914. Nso ke ẹkenam afiak odu isua oro? Ẹma ẹnam Jesus edi Edidem ke heaven. Ntre Jehovah ama afiak enyene owo emi eketiede ke ebekpo akara ọnọ Enye, owo oro okonyụn̄ oto ubon Edidem David emi ekedide eti owo Abasi. Edi ikokụreke ke oro. Ke ẹma ẹkenam Jesus Edidem, ikebịghike Jehovah ama an̄wam ikọt Esie ẹfiak ẹtọn̄ọ ndituak ibuot nnọ Enye nte Enye oyomde! (Isa. 2:2-4; Ezek. 11:17-20) Ndi ikọt Abasi ẹyefiak ẹkekpep nsu ẹnyụn̄ ẹnam se mîkpanaha ẹnam?

10. (a) Nso ye nso ke Bible etịn̄ aban̄a nte ẹdinamde n̄kpọ Abasi ke eyo nnyịn emi? (Isaiah 54:17) (b) Ntak emi mme prọfesi ntre ẹsọn̄ọde nnyịn idem?

¹⁰ Kot Isaiah 54:17. Kere se prọfesi oro etịn̄de: “N̄kpọekọn̄ ekededi eke ẹdibotde ẹban̄a fi idikwe unen”! Prọfesi oro ke osu mfịn. Kop ikọ ndọn̄esịt efen mi: “Kpukpru nditọ fo ẹdidi mbon oro Jehovah ọnọde ukpep, ndien emem nditọ fo oyokpon. Ẹyesọn̄ọ ẹwụk fi ke edinen ido. . . . Afo udufeheke baba n̄kpọ kiet​—ye n̄kpọndịk ekededi, koro enye idisan̄ake ikpere fi.” Enye oro n̄ko ke osu. (Isa. 54:13, 14) Idem Satan emi edide “abasi editịm n̄kpọ emi” ikemeke ndikpan ikọt Jehovah ndikpep mme owo mban̄a Jehovah. (2 Cor. 4:4) Ẹtuak ibuot idahaemi ẹnọ Jehovah nte enye oyomde, ndien ikọt Abasi idikpọn̄ke usụn̄ aba tutu amama. Ẹma ẹketọtọn̄ọ do, ẹtọn̄ọ; edidi n̄kpọ nsinsi. Se ededi emi ẹyomde ndida nsuan ikọt Abasi idikwe unen!

 NSO IDITỊBE?

11. Nso inam inen̄ede inịm ke mbon emi ẹyetde aran ẹma ẹka heaven, ke Abasi idikpọn̄ke mbon akwa otuowo?

¹¹ Nso iditịbe ẹma ẹmen mbon emi ẹyetde aran ẹka heaven? Ti ke Jesus edi Andikpeme nnyịn. Enye edi ibuot esop Christian. Jesus ọkọdọhọ ete: “Adausụn̄ mbufo edi kiet, kpa Christ.” (Matt. 23:10) Edidem nnyịn emi osụk akarade idahaemi ke heaven iditreke ndise mban̄a nti ikọt esie. Christ ada nnyịn usụn̄, ntre mbet esie ke isọn̄ emi ikpanaha ẹfehe n̄kpọ ndomokiet. Edi nnyịn idiọn̄ọke kpukpru se Christ edinamde ida ikọt esie usụn̄ ini oro. Ntre ẹyak ineme ndusụk mbụk ke Bible emi ẹkemede ndisọn̄ọ nnyịn idem.

12. Didie ke Jehovah ekese aban̄a ikọt esie (a) ke Moses ama akakpa? (b) ke Abasi ama ọkọnọ Elijah utom efen? (Se ndise n̄ko.)

¹² Moses ama akpa mbemiso nditọ Israel ẹdụkde Isọn̄ Un̄wọn̄ọ. N̄kpọ eketie didie ye ikọt Abasi? Ke eti owo Abasi oro ama akakpa, ndi ikọt Abasi ẹma ẹdi ẹtụn ẹka nnasia, ẹtụn ẹka ufien? Ihih-o. Adan̄a nte mmọ ẹkenamde se inemde Jehovah esịt, enye ama ese aban̄a mmọ. Mbemiso Moses akakpade, Jehovah ama ọdọhọ enye emek Joshua ada ikọt Esie usụn̄. Moses ama ekpekpep Joshua se akpanamde ke ata ediwak isua. (Ex. 33:11; Deut. 34:9) Ediwak irenowo efen ẹma ẹdu n̄ko emi ẹkesidade mme owo usụn̄. Mmọ ẹkedi etubom mme tọsịn, etubom mme ikie, etubom mme aba ye duop, ye idem etubom mme duop. (Deut. 1:15) Ẹma ẹtịm ẹse ẹban̄a ikọt Abasi. Mbiet n̄kpọ oro okonyụn̄ etịbe ke eyo Elijah. Ke ediwak isua, Elijah ama esịn idem an̄wam nditọ Israel ẹtuak ibuot ẹnọ Jehovah nte Enye oyomde. Edi ekem Jehovah ama edinọ enye utom efen ke Judah. (2 Ndi. 2:1; 2 Chron. 21:12) Ndi oro ọkọwọrọ ke Jehovah ọkpọn̄ nti ikọt Esie emi ẹkedude ke obio ubọn̄ esien Israel duop? Ihih-o. Elijah ke ekekpep Elisha se akpanamde ke ediwak isua. “Nditọ mme prọfet” ẹma ẹdu n̄ko. Etie nte ẹkebahade mmọ ẹdọn̄ ke otu ke otu man ẹkpep mmọ se ẹkpenamde. (2 Ndi. 2:7) Ntre ediwak irenowo emi ẹkesọn̄ọde ẹda ye Jehovah ẹma ẹdu ndida ikọt Abasi usụn̄. Ẹma ẹka iso ẹnam se Jehovah okoyomde ẹnam, Jehovah ama onyụn̄ ese aban̄a nti ikọt esie.

13. Ikụt nso ke Mme Hebrew 13:5b emi ọsọn̄ọde nnyịn idem? (Se ndise n̄ko.)

¹³ Ke ima ikeneme kpukpru uwụtn̄kpọ oro, ekere ke nso iditịbe ẹma ẹmen akpatre ke otu mbon emi ẹyetde aran ẹka heaven? Ufọn ekikere idụhe. Jehovah ididehedei ikpọn̄ ikọt esie emi ẹdude ke isọn̄. Se Bible anamde idiọn̄ọ oro isọn̄ke, onyụn̄ edi n̄kpọ emi ọsọn̄ọde owo  idem. (Kot Mme Hebrew 13:5b.) Ibat ibat nditọete emi ẹyetde aran, emi ẹdade ikọt Abasi usụn̄ mfịn ẹdiọn̄ọ ufọn ndikpep mbon en̄wen se ẹkpenamde nte Moses ye Elijah ẹkediọn̄ọde. Ke ediwak isua idahaemi, mbon Otu Emi Ẹsede Ẹban̄a Utom Nnyịn ẹmek ndusụk irenowo ke otu mme erọn̄ en̄wen, ẹnyụn̄ ẹkpep mmọ nte ẹkpedade ikọt Abasi usụn̄. Se uwụtn̄kpọ mi: Mmọ ẹtịm ediwak ufọkn̄wed emi ẹdade ẹkpep mbiowo, mme esenyịn oro ẹsan̄ade-san̄a, mbon Kọmiti N̄kọk Itieutom, nditọete emi ẹsede ẹban̄a mme itieutom ke Bethel, ye mbon en̄wen se ẹkpenamde. Mbon Otu Emi Ẹsede Ẹban̄a Utom Nnyịn ẹkpep nditọete emi ẹdide mme andin̄wam ke nsio nsio kọmiti Otu Emi Ẹsede Ẹban̄a Utom Nnyịn se ẹkpenamde. Mmọ ke idemmọ ẹkpep irenowo emi mme n̄kpọ emi. Utom emi mme andin̄wam oro ẹkamade idahaemi idịghe ekpri, mmọ ke ẹnyụn̄ ẹsịn idem ẹnam. Ntre mmọ ẹnen̄ede ẹben̄e idem ndika iso nse mban̄a mme erọn̄ Christ ini mbon emi ẹyetde aran mîdidụhe aba.

14. Nso idi akpan n̄kpọ ke kpukpru se isụk inemede emi?

¹⁴ Se akpan n̄kpọ ke kpukpru se inemede mi: Ẹma ẹmen akpatre owo ke otu mbon emi ẹyetde aran ẹka heaven mbemiso akwa ukụt okụrede, ikọt Abasi ke isọn̄ ẹdisụk ikaka iso ituak ibuot inọ Jehovah nte enye oyomde. Ke ntak usụn̄ emi Jesus Christ edidade nnyịn usụn̄, ikọt Abasi idiwahake ikpọn̄ usụn̄ ndomo esisịt. Imọdiọn̄ọ ke ini oro kpukpru mme idụt emi ẹdidianade kiet ẹdi en̄wan ye ikọt Abasi, oro edi Gog isọn̄ Magog, ẹyedi en̄wan ye nnyịn. (Ezek. 38:18-20) Edi en̄wan oro idibịghike, mmọ ẹdinyụn̄ ẹbiat idem ini sia se mmọ ẹnamde idikpanke ikọt Abasi ndituak ibuot nnọ enye. Jehovah iditreke ndinyan̄a ikọt esie! Ke n̄kukụt kiet, apostle John ama okụt mbon “akwa otuowo” emi ẹsịnede ke otu mme erọn̄ emi Christ enyenede. John ọkọdọhọ ke mbon “akwa otuowo” oro “[ẹketo] akwa ukụt ẹwọn̄ọ.” (Edi. 7:9, 14) Oro owụt ke Jehovah idiyakke n̄kpọ ndomokiet anam mmọ!

15-16. Ediyarade 17:14 owụt ke mbet Christ emi ẹyetde aran ẹdinam nso ke ini ekọn̄ Armageddon? Nso inam oro ọsọn̄ọ nnyịn idem?

¹⁵ Edi ndusụk owo ẹkeme ndisụk n̄kere: ‘Nso ke mbon emi ẹyetde aran ẹdinam mmọ ẹma ẹka heaven?’ Bible ọbọrọ mbụme oro nnennen nnennen. Enye anam ikụt ke mbon ukara  ererimbot emi “ẹyen̄wana ekọn̄ ye Eyenerọn̄.” Mmọ idikanke. Mmọ ẹkededi mmanie? Bible ọdọhọ n̄ko ete: “Eyenerọn̄ ayakan mmọ.” Mmanie ẹdin̄wam eyenerọn̄? Ufan̄ikọ oro ọbọrọ n̄ko ete: “Mbon oro ẹkotde ẹnyụn̄ ẹmekde emi ẹnyụn̄ ẹnamde akpanikọ.” (Kot Ediyarade 17:14.) Mmọ ẹdi mmanie? Mmọ ẹdi mbon emi ẹyetde aran emi ẹma ẹkenam ẹset! Ntre akpatre owo ke otu mbon emi ẹyetde aran ke isọn̄ emi ama esịm heaven mbemiso akwa ukụt okụrede yak mmọ ẹkekem ibat, kiet ke otu akpa utom emi mmọ ẹdinamde edidi ndin̄wana ekọn̄. Akamba utom edi oro! Ndusụk mme Christian emi ẹyetde aran ẹma ẹsin̄wana en̄wan mbemiso mmọ ẹdide Ntiense Jehovah. Ndusụk mmọ ẹkekam ẹdi mbonekọn̄ ke ererimbot emi. Edi ekem mmọ ẹma ẹdidụk esop Abasi ẹnyụn̄ ẹkpep ndinam n̄kpọ emem emem. (Gal. 5:22; 2 Thess. 3:16) Mmọ inyụn̄ in̄wamke mbon emi ẹn̄wanade ekọn̄ aba. Edi ẹma ẹnam mmọ ẹset ẹka heaven, mmọ ẹyetiene Christ ye ndisana angel esie ẹn̄wana akpatre ekọn̄ emi ẹdin̄wanade ye mme asua Abasi.

¹⁶ Kere ise se iyomde nditịn̄ emi. Ke isọn̄ emi, ndusụk nditọete emi ẹyetde aran ẹkpon owo, ndusụk ata ibifịk ntem idụhe. Edi ẹma ẹnam mmọ ẹset ẹkedu ke heaven, mmọ ẹdidi mme okop-odudu spirit emi mîkemeke ndikpa. Utom emi ẹdinọde mmọ edi mmọ ndidiana ye Jesus Christ Edidem mmọ emi edide uko ke ekọn̄ n̄n̄wana ekọn̄. Ekọn̄ Armageddon ama okụre, mmọ ẹyedian ubọk ye Jesus ẹn̄wam mme owo ẹfọn ẹma. Imenịm ke ini oro, ke mmọ ẹyekeme ndinen̄ede n̄n̄wam ndima nditọete mmọ mi ke isọn̄ n̄kan nte mmọ ẹken̄wamde ini mmọ n̄ko ẹkedude mi ke isọn̄, inyụn̄ ifọnke ima!

17. Inam didie idiọn̄ọ ke n̄kpọ ndomokiet idinamke kpukpru ikọt Abasi ke ini ekọn̄ Armageddon?

¹⁷ Ndi esịne ke otu mme erọn̄ en̄wen? Ntre, nso ke ediyom yak afo anam ini ekọn̄ Armageddon emi edide ata akpan ekọn̄ editọn̄ọde? Buọt idem ye Jehovah nyụn̄ nam se enye ọdọhọde. Okụre ke oro! Edi oro ekeme ndisịne nso? Bible etịn̄ enye ke usụn̄ emi ọdọn̄de nnyịn esịt ete: “Ẹka ẹkedụk esịt ubet mbufo, ẹnyụn̄ ẹberi usụn̄ ẹbaha idem mbufo. Ẹdịbe ke esisịt ini tutu ifụtesịt ebe.” (Isa. 26:20) N̄kpọ idinamke kpukpru nti ikọt Jehovah, edide mmọ ẹdu ke heaven m̀mê ke isọn̄. Ukem nte apostle Paul, imenen̄ede inịm ke n̄kpọ ekededi, m̀mê edi “mme ukara m̀mê mme n̄kpọ eke ẹdude ke emi m̀mê mme n̄kpọ eke ẹdidide . . . idikemeke ndidian̄ade nnyịn ke ima Abasi.” (Rome 8:38, 39) Jehovah ama fi, enye ididehedei ikpọn̄ fi; kûfre ikọ oro!