1. Tam évé minwane mboan misese mia ye mane bet a dzôp été ?

 É NTOO mimbu, ayong Jehôva é nga sile naa, ‘Tam évé, é sugha minwane mboan mi ne a si va, mia ye mane bet a dzôp été ?’ Bi nga tare simane naa, ayôm minwane mboan mi y’été, mia ye tare tobe ô Paraíso a si vana, niène aluman ya Armaguédon da ye lôt. Ve, Ô momo ye Ngoan zangbwa, é too melu 15, ye mbu 2013, bi nga yeghe naa, minwane mboan misese mi ngen a si va, mia ye mane bet édzôô kaa naa aluman Armaguédon é sum (Mat. 24:31).

2. Dzam té é ne soo za nsili, ye naa, za mam bia ye yen ayeghle di été ?

² Ve, dzam té é ne soo nsili wi : Za dzam da ye biane « mintôma mivoo » Christ, mia ye sèhane Jehôva sôsôe a si vana é tam « bitsible binen » ? (Jean 10:16 ; Mat. 24:21) Ému wi, bevoo be ne ko wong naa, éyong minwane mboan misese mia ye mane bet a dzôp été, ba ye tobe n’laman. N’tamane yen minlang mibèñ mizing mi ya Bible mi ne be so ôsiman. Éyong té, bia ye yen mekalgha bi bele naa bi taa ko wong.

ZA DZAM DAA YE KI BOBAN ?

3-4. Bevoo bézing be ne sili za nsili, amu dzé ki ?

³ Bevoo bézing be ne ko wong naa, mintôma mivoo mia ye lum bebela mvus éyong baa ye ki fe bele bobedzang be ya Tsîn Ékôan nfa ya ve be melepgha. Be ne wôran aval té étom minlang mi ya Bible mizing. N’tamane yen bifônan bibèñ. Éfônan ôsua da tsinan é fara n’nen Jehoiadá nge ki Joad. A mbe sôsôe mbo-ésèñ Nzame. Éñe ya ngal, Jehosabeat nge ki Jehoshabath, be nga kame Joás éyong a mbe mong ye vole ñe naa a bo mbemba kéza a ne sôsôe. Nté sese n’nôm Joad a mbe a tèè, Joás a mbe éé bo é mam me ne mbeng. Ve, niène Joad a nga wu, ane Joas a nga sum wulu abé. A nga bèè é boan bekéza be mbe be bele mbia abo-dulu,  ane éé dzi ki fe bera sèhane Jehôva (1 Mila. 24:2, 15-19).

⁴ Éfônan évoo é ne édi bekristen be ye ntet mimbu bèè. Ntôl Juan nge ki Jean, éñi a nga sughlane lighe a tèè, a mbe mbemba éfônan akal abuiñ bekristen, éé vole be naa be tsini naa ba sèhane Jehôva ya sôsôe (3 Jean 4). Aval ane mintôl mivoo Yésu mi nga bo de, Jean a nga sèñ naa a kame Ékôan nfa é môt asese a nga yeghle bivus mesiman ye mbia mimboan (1 Jean 2:18 ; a daghe atoan akal ayeghle ye nten 2 Beth. 2:7). Ve, niène Jean a nga wu, abuiñ, ékôan été, be nga sum tông meyeghle é bôt be nga lum ña ékang mvus. Éde, ayôm mimbu ôsu, Ékôan é nga mane dzèñ ye mbia abo-dulu ya fe mbia mesiman.

5. Minlang mibèñ mité, miaa yiène ki ve naa bi simane yè ?

⁵ Ye minlang mi ya Bible mibèñ mité mia lere naa, dzam té da ye biane mintôma mivoo Christ mi ne a si va, éyong minwane mboan misese mia ye mane bet a dzôp été ? Tam té, ye besôsôe bekristen be ne a si va ba ye vu mbia éfônan Joas nge ki naa, ba ye lum ña ékang mvus ane abuiñ bekristen be ye ntet mimbu bèè ye metam mèè be nga bo de ? Éyalane ye nsili té, é ne naa kaa dzôm ! Bi ne bele ndzi-n’nem naa, éyong minwane mboan misese mia ye kôre a si vana, mintôma mivoo mia ye tsini naa mia sèhane Jehôva sôsôe aval da yiène, ye naa, ñ’a ye tsini ôsu naa a baghle be. Amu dzé bi ne bele ndzi-n’nem té ?

AYONG JEHÔVA DA YE K’ÔSU YA SÈHANE ÑE AVAL DA YIÈNE

6. Metam melal mevé bi nga zuhang yen ?

⁶ Amu dzé bi ne bele ndzi-n’nem naa, ayong Nzame da ye tsini naa da sèhane ñe aval da yiène metam me ne minzukh ma yane biè ? A ne amu é mam bi yeghe-yang a Bible été nfa metam bia ning. Metam meté, ma bira selan éma me ye Israël ye melu mvus y’éma bekristen be ye ntet mimbu bèè. Éde, n’tughane fas metam melal ma : (1) Metam Israël ye melu mvus, (2) metam me nga boban niène mintôl mi nga mane wu, ye (3) melu mèè, « metam ba bera mane kôm mam mesese » (Bisè mintôl 3:21).

7. A Israël ye melu mvus, amu dzé besôsôe bebo bisèñ Nzame béé dzi ki dzimlé mebun meba éyong bekéza ye é bôt bevoo be nga top mbia abo dulu ?

⁷ Metam Israël ye melu mvus. Ôyôm tam kaa naa a wu, Moisés a nga dzô be Israelitas naa : « Ma yem naa, niène ma ye wu, mia ye wule abé ye lum mvus é zen me nga lep mina » (Deut. 31:29). Moisés a nga bame ayong naa, nge Israël a bo melo, ba ye kee be minkôm (Deut. 28:35, 36). Ye bifiè bité bi nga dzalban ? Ôwé, bi nga dzalban. Tang mintet mimbu, abuiñ bekéza be nga bo é mam me ne abé é mis Jehôva, ye naa, ayong é nga tông be évus ékang été. Dzam té é nga ve naa, Jehôva a lame ayong dèñ étom mbia abo-dulu deba, kaa ki fe likh naa bekéza be ya Israël be djié évang dèñ (Ézéch. 21:25-27). Ve, é be Israelitas be mbe sôsôe, be nga ñong ayokh éyong be nga yen ane Nkobe Nzame ô nga dzalban (Esaïe 55:10, 11).

8. Ye bia yiène yaghane naa, Ékôan bekristen ye ntet mimbu bèè é nga mane dzèñ ya évus ékang ? Vakh ayilgha.

⁸ Metam me nga boban niène mintôl mi nga mane wu. Ye bia yiène yaghane naa Ékôan bekristen be ye ntet mimbu bèè é nga mane dzèñ y’évus ékang ? Kaa, biaa yiène ki de yaghan. Yésu a nga dzô naa, abuiñ bôt ba ye bira lumane ña ékang (Mat. 7:21-23 ; 13:24-30, 36-43). Mintôl Pablo, Pedro ya Juan nge ki Paul, Pierre  ya Jean, besese be nga ban naa nkulan adzô Yésu ô nga sum naa wa dzalban ntet mimbu ôsua ye metam mèè (2 Beth. 2:3, 7 ; 2 Pierre 2:1 ; 1 Jean 2:18). Ôyôm tam, niène sugha ntôl ô nga wu, ane bekristen be nga sukh évus ékang té, be nga bo môra ngap ye Babylone n’nen, nsama bivus min’yebe bi ya si ése ngura. Éyong té fe, nkulan adzô ô nga dzalban.

9. Nfa mbé metam bia ning ému ma selane metam Israël ye melu mvus, y’éma me y’Ékôan bekristen ye mintet mimbu bèè ?

⁹ « Metam ba bera mane kôm mam mesese. » Metam bia ñing ému ma selane ya metam Israël y’ôkua, ye fe metam bôt be nga bira lumane ña ékang ntet mimbu bèè ye melu mèè. Aval avé ba luè metam bia ñing ému ? Bi ne me tare luè naa « melu me y’asughlan » me ye mbia émo di (2 Tim. 3:1). Ve, Bible a lere fe naa, tam éfe é too édedèè éban, y’édedèè ayap, é nga sum éyong té. Tam té da ye bo yakekuiñ éyong Édjié Mesías nge ki Messie da ye bera mane ve naa éning é bo kaa nsem ye venghane si ngura Paradis. Tam té, be nga luè de naa, « metam ba bera mane kôm mam mesese » (Bisè mintôl 3:21). Tam té é nga sum mbu 1914. Éde, za dzam be nga kôm ? Be nga tele Yésu ane Kéza a dzôp été. Éde, Jehôva a nga bera bele é kéza a djié évang Dèñ, môt mboo y’é mvong sôsôe kéza David. Ve, Édjié té, déé se ki é dzam étam Jehôva a nga kôm. Ôyôm tam ôsu, Jehôva a nga vole bebo bisèñ bèñ be ne a si va naa be bera ñe kang aval da yiène ! (Esaïe 2:2-4 ; Ézéch. 11:17-20) Ye ékang té da ye bera dzèñ ya bivus meyeghle ?

10. (a) Za dzam Bible a nga dzô nfa nfufup ékang metam mèè ? (Esaïe 54:17) (b) Amu dzé aval minkulane medzô meté mia sili bia min’nem ôsi ?

¹⁰ A lang Esaïe 54:17. Simghane nkulan adzô wi : « Évol ézing ba luiñ naa da bo wa abé, daa ye ki wô wun ! » Bifiè bia so ébe Nzame alé, bia dzalban ému. É mbemba bifiè bia fôlô min’nem bia zu bi, bia dzalbane fe melu mèè : « Jehôva a ye yeghle bendôma besese buè, éde é mvoa bendôma buè beté da ye tobe édedèè abuiñ. Ba ye wô tele naa bip a sôsôe été. [. . .] Waa ye ki ko dzam ézing wong, ye naa, dzam ézing daa ye ki wô ve wong, amu daa ye ki wô yir bebéñ » (Esaïe 54:13, 14). Amben Satan, « nzame y’émo di », éé bele ki ngu’u ézing naa a sim ésèñ y’a yeghle bôt, ayong Jehôva da dzale ému (2 Becor. 4:4). Ña ékang da ye bera tobe, ye naa, daa ye ki vaghle bera dzèñ ya bivus meyeghle. É ne vèè naa da tobe mbèmbèè !

 ZA DZAM DA YE BOBAN ?

11. Za dzam da ve bia ndzi-n’nem naa baa ye ki lame môra nsama mintôma mivoo éyong minwane mboan misese mia ye mane ke a dzôp été ?

¹¹ Za dzam da ye boban niène minwane mboan misese mia ye mane bet a dzôp été ? Simghane naa, Yésu éñ’a ne mbaghle wèè. Éñ’a ne nlô y’Ékôan bekristen. Yésu a nga tugha dzô naa : « Mi bele fave Ndjié mboo, Christ » (Mat. 23:10). É kéza wèè, aa ye ki vaghle sim naa a bo ésèñ dèñ. Amu Christ a ye be lere zen, beyeghe bèñ be ne a si vana, baa ye ki ko dzôm ézing wong. É n’été, biaa yem ki é mam mesese ma tsinan aval Yésu a ye wulu ayong dèñ tam té. Édeeng, n’tamane yen bifônan bizing bi ya Bible bi ne bia sili min’nem ôsi.

12. Aval avé Jehôva a nga baghle ayong dèñ (a) niène Moisés a nga wu ? (b) niène Élie a nga ke akal nféféñ ayem dèñ ? (A daghe fe évaghle).

¹² Moisés a nga wu kaa naa ayong Israël é ñii Si ngiagh. Za dzam é nga lôrane y’ayong Nzame ? Ye Nzame a nga lame be amu sôsôe a môt té éé mbe ki fe ? Kaa dzôm. Nté sese be nga tobe Ñe sôsôe, Jehôva a nga vole be. Kaa naa Moisés a wu, Jehôva a nga dzô ñe naa, a tele Josué nfa ye naa a wulu ayong dèñ. Moisés a nga kômane Josué tang abuiñ mimbu (Akô. 33:11 ; Deut. 34:9). Ye fe naa, abuiñ befam be mbe nkoghane naa ba vole, ane bedjié betoyini, mintet, mewôm metan, ye fe mewôm (Deut. 1:15). Be nga tugha yem baghle ayong Nzame. Bia yen éfônan évoo y’été ye Élie. A nga sèñ ngu’u tang abuiñ mimbu naa a vole Bisraélite naa be sèhane Jehôva aval da yiène. Ve, ane é tam Jehôva a nga kee ñe ayem éfe nfa nkièñ ya Juda é nga kuiñ (2 Bed. 2:1 ; 2 Mila. 21:12). Ye be nga lame besôsôe bebo bisèñ Jehôva be ye édjié awôm meyong ya Israël ? Kaa. Akuane naa, Élie a nga yeghleyang Élisée ésèñ tang abuiñ mimbu. Ye fe naa, « bendôma bekulu medzô » ba be nga ñong fe ayeghle nfa y’avol ayong (2 Bed. 2:7). Dzam té da lere naa, abuiñ besôsôe bebo bisèñ Jehôva be mbe nkoghane naa ba wulu ya ayong Nzame. Jehôva a nga tsini naa a dzale nkômane wèñ ye baghle besôsôe bekang bèñ.

13. Za dzam Jehôva a kiagh bia nten Behébreu 13:5b ? (A daghe fe évaghle).

¹³ Ye bifônane bité ôsiman, za dzam mia simane naa da ye boban éyong minwane mboan mi ligheyang a si vana, mia ye mane bet a dzôp été ? Déé se ki éban naa bi fiang sili aval minsili mité. Bible a ve bia  é bebela é ne ébubu a wokh, ye sili bia min’nem ôsi : Jehôva aa ye ki vaghle lame ayong dèñ é ne a si va (A lang Behébreu 13:5b). Aval é nga boban metam Moisés ya Élie, moan nsama bekristen be ne minwane mboan be tele ôsu Ékôan été ému, ba wokh amu dzé é ne éban naa be yeghle é bôt bevoo. Tang abuiñ mewôm mimbu, bobedzang be ya Tsîn Ékôan ba yeghle befam be ye mintôma mivoo naa be yem wulu Ékôan. Éfônan, be nga kômane besikôlô naa be yeghle bemvene, bedeghe bikôan, bebu-fekh be ye mintem bikôan, ya fe, é bobedzang ba daghe bisèñ be Bethel. Bobedzang be ya Tsîn Ékôan be nga yeghle fe bevole beba nfa ya yem wulu bisèñ bi ye Ékôan Jehôva. Éndagha, bevole beté ba tugha yem dzale ya sôsôe é bura meyem ba ve be. Be ne fe mbemba nkôman nfa ya tsini ésèñ ya yem baghle mintôma Christ.

14. Za dzam bi ne ngônô ayeghle di été ?

¹⁴ É dzam bia ngônô ayeghle di été éé di : Éyong minwane mboan mi ligheyang a si vana mia ye mane bet a dzôp été, bébéñ amanegha bitsible bin’nen, nfufup ékang wa ye tsini naa wa boban a si vana. Amu Yésu a ye tsini naa a lere be zen, besôsôe bebo bisèñ Jehôva ba ye tsini naa ba sèhane Ñe aval da yiène. É n’été, tam té Gog ya Magog, môra nsama élat meyong, a ye lumane biè (Ézéch. 38:18-20). É mam ba ye bo naa ba lumane biè ébe avitsang tam té, maa ye ki wulu mbeng ; daa ye ki ve naa ayong Nzame é sim naa da kang Jehôva. Bebela a ne naa, a ye be kôre ! N’yenane y’ôsimane été, Ntôl Jean a nga yen « môra nsama bôt » ye mintôma mivoo Christ. N’yenane té été, be nga dzô Jean naa « môra nsama bôt » té, « wa so bitsible binen » (Mel. 7:9, 14). Ôwé, bia yem naa, Jehôva a ye be kôre !

15-16. Aval ane bia lang de nten Melere 17:14, za dzam beyeghe Christ be ne minwane mboan ba ye bo é tam aluman Armaguédon, ye naa, amu dzé dzam té da ve biè ngu’u ?

¹⁵ Amben aval té, bevoo bézing be ne sili naa : ‘Za dzam minwane mboan ba ye bo niène mia ye mane bet a dzôp été ?’ Bible  a yalane nsili té. A lere naa bidjié bi y’é si ñi « bia ye lumane Ntôma. » Bebela a ne naa, baa ye ki wun aluman. Bia lang naa : « Ntôma wa ye be mane wun. » Éde, beza ba ye ñe vole ? Éfus da yalane nsili té. Éba ba luè naa « minluèn », « mintopban », ye « besôsôe » (A lang Melere 17:14). Be ne beza ? Minwane mboan mi nga mane wôme ! Éde, éyong minwane mboan mi ligheyang a si va, mia ye mane bet a dzôp été, bébéñ amanegha bitsible binen, ésèñ ôsua ba ye bo é ne a luman. Za môra ésèñ ! Minwane mboan mizing mi mbe mi lumane bôt kaa naa be bo Bengaa Jehôva. Bevoo be y’été, be nga sèñ minsama bizima mizing mi y’é si ñi. Ve, ane ôsu vèè, be nga bo beña bekristen ye yeghe zen ya mvoa (Begal. 5:22 ; 2 Beth. 3:16). Be nga mane likh meluman mesese me y’é si ñi. Ve, niène ba ye mane bet a dzôp été, ba ye sèñ ya Christ ya minfufup bangele, béé bo sugha aluman asu minzizing Nzame.

¹⁶ Simghane dzam té ! A si vana, minwane mboan mizing mii ntoo min’nôm, ye fe mvoaran. Ve, éyong ba ye wôme a dzôp été, ba ye tobe minsisim mi ne édedèè ngu’u ye kaa wu ; ntopban naa ba lumane é ngam Yésu Christ, é Kéza wôba. Niène aluman Armaguédon da ye lôt, ba ye sèñ nsama mboo naa be vole éning ngura naa é tobe kaa nsem. Kaa bisô naa, éyong ba ye tobe a dzôp été, ba ye bo édedèè mbemba bemam akal é bobeñang ya bekal beba ba dzing be ne a si vana, a lôt mbeng be nga bo be éyong be mbe boan be-bôt a si va !

17. Aval avé bia yem naa bebo bisèñ Nzame ba ye tobe nkaman é tam aluman Armaguédon da ye boban ?

¹⁷ Ye ô ne môt mboo ye nsama mintôma mivoo ? Éde, wa ye bo za dzam éyong aluman Armaguédon da ye sum ? Fave é dzam di : A bunu Jehôva, ye béé é zen a lere wa. Dzam té da ye sili naa ô bo dzé ? Bible a dzô é mbemba bifiè bi : « Ñiighane bidzina bienan été, ye dzip mbéñ a mvus. Sobeghan ôyôm tam yakekuiñ ôlun wèñ wa lôt » (Esaïe 26:20). Besôsôe bebo bisèñ Nzame, besese, a dzôp été ya a si vana, ba ye tobe nkaman tam té. Ane ntôl Paul, bia besese bi bele ndzi-n’nem naa, « édjié ézing, nge ki é dzam ézing da boban éndagha, nge ki é mam ma ye boban melu ma zu [. . .] maa ye ki bia kane y’édzing Nzame » (Bero. 8:38, 39). Boghane mban naa mia siman é dzam di : Jehôva a dzing mina, éde, aa ye ki vaghle lame mina môs ézing !