1. Christianfo a wɔasera hɔn no, ebɛn aber na hɔn dodow bɔbɔ ano wɔ sor?

 MFE bi a abɛsen kɔ no, nna Jehovah no nkorɔfo bisa hɔnho dɛ, ‘Christianfo a wɔasera hɔn a wɔaka wɔ asaase do no, ebɛn aber na wɔbɛfa hɔn nyinara akɔ sor?’ Nna yesusu dɛ ɔbɛyɛ dɛ hɔn a wɔasera hɔn a wɔaka wɔ asaase yi do no, bi a hɔn mu binom bɛtsena Paradise asaase no do mber kakra wɔ Har–​Magedon ko no ekyir. Naaso July 15, 2013 Ɔweɔn-Aban no maa yehun dɛ, ansaana Har–​Magedon ko no bɛhyɛ ase no, wɔbɛfa hɔn a wɔasera hɔn a wɔaka wɔ asaase yi do no nyina akɔ sor.—Matt. 24:31.

2. Ebɛn asɛm na yebotum ebisa, na ebɛnadze na yerubosusu ho wɔ adzesua yi mu?

² Naaso, bi a yebebisa dɛ: Ebɛn asɛm bɔto Christ no ‘nguan fofor’ no a wɔdze nokwardzi bɔsom Jehovah wɔ asaase yi do wɔ “ahohiahia kɛse” no mu? (John 10:16; Matt. 24:21) Obotum aba dɛ nguan fofor no mufo binom benya adwen dɛ sɛ wɔfa hɔn a wɔasera hɔn no nyinara kɔ sor a, worinnya obiara a ɔbɔboa hɔn ma wɔaakɔ do asom Jehovah. Yɛbɔhwɛ Kyerɛwnsɛm mu nhwɛdo ebien bi a obotum ama woenya adwen a ɔtse dɛm. Afei so, yɛbɔhwɛ siantsir a ɔnnsɛ dɛ wɔdze biribi a ɔtse dɛm haw hɔnho no.

DZA ORINNSI

3-4. Ebɛn adwen na binom botum enya, na ebɛnadze ntsi a?

³ Bi a, binom hɔn adwen bɛyɛ hɔn dɛ, sɛ hɔn a wɔasera hɔn a wɔyɛ Akwankyerɛ Kuw no mufo no nnyi hɔ a wɔbɛkyerɛ nguan fofor no mufo kwan a, annhwɛ a na woegyaa Jehovah som. Obotum aba dɛ, nsɛm bi a osisii a Kyerɛwnsɛm no ka ho asɛm no na ɔma wonya adwen a ɔtse dɛm. Hom mma yensusu no mu ebien bi ho. Dza odzi kan no fa Sɔfopanyin Jehoiada ho. Nna ɔyɛ obi a ɔmmfa ne nyamesom nndzi agor koraa. Ɔnye ne yer Jehoshabeath bɔɔ Jehoash a nna ɔyɛ abofra no ho ban na wɔboaa no ma ɔbɛyɛɛ ɔhen pa nye obi a odzi nokwar. Aber a Jehoiada tse ase  no, Jehoash soom Jehovah na ɔyɛɛ ndzɛmba pa. Naaso Jehoiada wui ara pɛ na ɔhyɛɛ ase yɛɛ ndzɛmba bɔn. Otsiee mbapɔmba a nna wɔatwe hɔnho efi Jehovah ho no, na iyi maa ɔno so twee noho fii Jehovah ho.—2 Mber. 24:​2, 15-19.

⁴ Nhwɛdo a otsia ebien nye asɛm a osii aber a asomafo no wuwui no. Asomafo no mu nyia otwa tun a owui nye John. Aber a ɔtse ase no, ɔdze sii n’enyi do dɛ ɔbɔboa Christianfo pii ma wɔdze nokwardzi aasom Jehovah. (3 John 4) Nna Jesus n’asomafo anokwafo no abɔ mbɔdzen dɛ wɔbɔbɔ asafo no ho ban efi ator nkyerɛkyerɛ nye ndzeyɛɛ bɔn biara ho. Na dɛmara na John so yɛe. (1 John 2:18; hwɛ 2 Thess. 2:7 ho nkyerɛkyerɛmu no.) Naaso John no wu ekyir no, awaafo nkyerɛkyerɛ tserɛwee wɔ asafo no mu tse dɛ mbrɛ gya atɔ beebi. Mfe bi ekyir no, awaafo no dze hɔn nkyerɛkyerɛ hyɛɛ Christianfo asafo ahorow no nyina ma.

5. Kyerɛwnsɛm mu nhwɛdo ebien a yeesusu ho no, ebɛn adwen na ɔnnsɛ dɛ ɔma yenya?

⁵ Kyerɛwnsɛm mu nhwɛdo ebien a yeesusu ho yi kyerɛ dɛ sɛ wɔfa hɔn a wɔasera hɔn a wɔaka wɔ asaase yi do no nyinara kɔ sor a, asɛm a ɔtse dɛm bɔto Christ no nguan fofor no anaa? Dɛm aber no, nokwar Christianfo a wɔwɔ asaase yi do no begyaa Jehovah som dɛ mbrɛ Jehoash yɛe no, anaa wɔbɔkɔ ekedzi awaafo nkyerɛkyerɛ ekyir dɛ mbrɛ Christianfo pii yɛe wɔ asomafo no wu ekyir no? Biribi a ɔtse dɛm rinnsi da! Yebotum enya ahotodo paa dɛ sɛ wɔfa hɔn a wɔasera hɔn no fi asaase do a, nguan fofor no bɔkɔ do ara asom Jehovah wɔ nokwar mu na ɔbɔkɔ do ahwɛ hɔn. Ebɛnadze ntsi na yebotum enya ahotodo a ɔtse dɛm?

JEHOVAH N’ASOMFO BƆKƆ DO ARA ASOM NO NOKWAR MU

6. Ebɛn mber ebiasa na yerubosusu ho kakra?

⁶ Ebɛnadze ntsi na yebotum agye edzi dɛ wɔ mber a no mu yɛ dzen a ɔda hɛn enyim mu no, Nyankopɔn n’asomfo bɔkɔ do ara asom no nokwar mu? Adze a ɔboa hɛn ma yenya dɛm gyedzi no nye dza Bible no ama yeehu afa mber a yɛtse mu yi ho no. Ɔno nye dɛ mber a yɛtse mu yi yɛ soronko koraa fi Israelfo no hɔn aber do nye aber a asomafo no wuwui ekyir no ho. Hom mma yensusu dɛm mber ebiasa yi ho nkɔ ekyir kakra: (1) Israelfo no hɔn aber do, (2) asomafo no hɔn wu ekyir, na (3) hɛn ber yi do, kyerɛ, ‘ber a wobesiesie ndzɛmba nyina.’—Andw. 3:21.

7. Israelfo no hɔn aber do no, aber a ɔmamfo no nye ahemfo no yɛɛ dza omuo wɔ Nyankopɔn n’enyiwa do no, ebɛnadze ntsi na anokwafo a nna wɔwɔ hɔn mu no abaw mu emmbu?

⁷ Israelfo no hɔn aber do. Wɔaka kakra ma Moses ewu no, ɔkaa kyerɛɛ Israelfo no dɛ: “Minyim dɛ mo wu ekyir no ɔsɛɛ na hom bɛsɛɛ homho, na hom adan efi ɔkwan a mahyɛ hom no do.” (Deut. 31:29) Afei so, ɔsanee bɔɔ hɔn kɔkɔ dɛ sɛ wɔtsew Jehovah do etua a, ɔbɛma wɔdze hɔn akɔ ndɔmmumfa mu. (Deut. 28:​35, 36) Nsɛm a Moses kaa kyerɛɛ Israelfo no baa mu anaa? Nyew, ɔbaa mu. Mfe ɔhaha pii ekyir no, Israel ahemfo pii enndzi Jehovah nokwar na wɔmaa Israelman no twee hɔnho fii Nyankopɔn ho. Osian ndzɛmba bɔn a Israelfo no yɛe ntsi, Jehovah twee hɔn aso na ɔamma Israel ahemfo enndzi tum bio. (Ezek. 21:​25-27) Naaso, aber a Israelfo a nna wodzi nokwar no hun dɛ dza Nyankopɔn kae no nyina aba mu no, ɔhyɛɛ hɔn gyedzi dzen na wɔkɔr do soom no.—Isa. 55:​10, 11.

8. Ɔsɛ dɛ ɔyɛ hɛn nwanwa dɛ asomafo no hɔn wu ekyir no, awaafo dze hɔn ator nkyerɛkyerɛ hyɛɛ Christianfo asafo no ma anaa? Kyerɛkyerɛ mu.

⁸ Asomafo no hɔn wu ekyir. Ɔsɛ dɛ ɔyɛ hɛn nwanwa dɛ asomafo no hɔn wu ekyir no, awaafo dze hɔn ator nkyerɛkyerɛ bɛhyɛɛ Christianfo asafo no ma anaa? Oho. Siantsir nye dɛ nna Jesus edzi kan aka dɛ nyimpa pii na wɔbɛba abɛyɛ awaafo. (Matt. 7:​21-23; 13:​24-30, 36-43) Paul, Peter, na John nyina yɛ asomafo a wosii do dua dɛ asɛm a Jesus kae no ahyɛ ase reba  mu wɔ Christianfo a wodzi kan no hɔn aber do. (2 Thess. 2:​3, 7; 2 Pet. 2:1; 1 John 2:18) Asomafo no hɔn wu ekyir no, awaafo dze hɔn ator nkyerɛkyerɛ no hyɛɛ Christianfo asafo no ma twom. Ator Christiansom gyee ndwow na wɔkɛkaa Babylon Kɛse a ɔyɛ wiadze nyina ator som ahenman no ho na wodzii mu akotsen. Iyi mu so, nna asɛm a Jesus kae no rinya ne mbamu.

9. Ebɛn kwan do na mber a yɛtse mu yi nntse dɛ Israelfo no hɔn aber do nye ber a asomafo no wuwui no?

⁹ ‘Ber a wobesiesie ndzɛmba nyina.’ Mber a yɛtse mu yi nntse dɛ Israelfo no hɔn aber do nye aber a nyimpa pii bɛyɛɛ awaafo wɔ asomafo no hɔn wu ekyir no. Sɛ dɛm dze a, wɔfrɛ mber a yɛtse mu yi dɛn? Yɛtaa ka mber a yɛtse mu yi ho asɛm dɛ wiadze yi ne “nda a odzi ekyir.” (2 Tim. 3:1) Naaso Bible no ma yehu dɛ mber tsentsen bi so hyɛɛ ase dɛm ber no ara. Mber tsentsen yi bɔkɔ do ara ekesi dɛ Messiah Ahendzi no bɛma nyimpa nyina ayɛ hɔn a bɔn nnyi hɔnho na ɔadan asaase no Paradise. Dɛm mber yi na Bible no frɛ no ‘ber a wobesiesie ndzɛmba nyina’ no. (Andw. 3:21) Dɛm aber no hyɛɛ ase wɔ afe 1914. Yembisa dɛ, ebɛnadze na wosiesiee no dɛm aber no? Wɔdze Jesus sii egua do dɛ Ɔhen wɔ sor. Iyi ntsi Jehovah sanee nyaa ɔnokwafo David n’asenyi a obesi Jehovah n’ananmu edzi adze dɛ ɔhen. Naaso ɔnnyɛ dɛm ahendzi no nkotsee na Jehovah sanee dze sii hɔ. Ɔno ekyir no, wɔannkyɛr biara na wɔsanee dze nokwar som sii hɔ! (Isa. 2:​2-4; Ezek. 11:​17-20) Ehwɛ a, ator nkyerɛkyerɛ botum akata nokwar som do bio anaa?

10. (a) Ebɛn asɛm na Bible no kae faa nokwar som ho wɔ hɛn aber yi do? (Isaiah 54:17) (b) Ebɛnadze ntsi na nkɔnhyɛ a ɔtsetse dɛm no hyɛ hɛn gyedzi dzen?

¹⁰ Kenkan Isaiah 54:17. Ɔwodze ma yensusu dɛm nkɔnhyɛ yi ho. Ɔka dɛ: “Akodze biara a wɔbɔ tsia wo no, ɔrennyɛ yie.” Nsɛm a Jehovah nam Isaiah do kae yi rinya ne mbamu ndɛ. Awerɛkyekyer nsɛm a odzi do yi fa mber a yɛwɔ mu yi ho. Ɔka dɛ: ‘Wo mba nyina Jehovah bɛkyerɛkyerɛ hɔn; na wo mba hɔn asomdwee bɔdɔɔ so. Na ndzeyɛtsenenee mu na wobetsim wo. Innkosuro, na biribiara rommbɔ wo hu, osiandɛ ɔnnkɛbɛn wo.’ (Isa. 54:​13, 14) Satan a ɔyɛ “wiadze yi nyame” no mpo runntum mma Jehovah n’asomfo nngyaa asɛnka edwuma a wɔreyɛ no wɔ wiadze nyina no da. (2 Cor. 4:4) Wɔdze nokwar som esi hɔ na biribiara nnyi hɔ a obotum asɛɛ no da. Iyi kyerɛ dɛ ɔbɛtsena hɔ afebɔɔ. Akodze biara a nnyi hɔ a wɔbɔbɔ etsia hɛn a ɔbɛyɛ yie da!

DZA OBESI

11. Ebɛnadze na ɔma yehu paa dɛ sɛ wɔfa hɔn a wɔasera hɔn no kɔ sor a, Christ bɔkɔ do ara aboa nyimpadodow kɛse no?

¹¹ Sɛ wɔfa hɔn a wɔasera hɔn no nyina kɔ sor a, ebɛn asɛm na obesi? Kaa dɛ Jesus nye hɛn Guanhwɛfo. Ɔno nye Christianfo asafo no ne  tsir. Jesus kaa no pefee dɛ: “Ɔbaako nye hom Kwankyerɛfo, ɔnye Christ.” (Matt. 23:10) Hɛn Hen Jesus bɔhwɛ n’ekyirdzifo na ɔdze dza wohia no ama hɔn aber biara. Osiandɛ Christ ridzi tum ntsi, n’ekyirdzifo a wɔwɔ asaase do no runnsuro hwee. Nokwasɛm nye dɛ, dza Christ bɛyɛ dze akyerɛ no nkorɔfo kwan dɛm aber no dze, yennyim ho nsɛm nyina. Dɛm ntsi hom mma yɛnhwɛ nsɛm bi a ɔwɔ Bible mu a obotum ahyɛ hɛn gyedzi dzen.

12. Ebɛn kwan do na Jehovah faa do boaa no nkorɔfo (a) aber a Moses wui no? (b) aber a ɔmaa Elijah dwumadzi fofor no? (Hwɛ mfonyin no so.)

¹² Moses wui ansaana Israelfo no rokɔ Anohoba Asaase no do. Ɔbaa no dɛm no, ebɛn asɛm too Nyankopɔn no nkorɔfo no? Jehovah yii n’enyi maa hɔn aber a Moses wui no anaa? Oho. Jehovah kɔr do boaa hɔn ber tsentsen a wɔkɔr do dzii no nokwar no. Ansaana Moses rubowu no, Jehovah kaa kyerɛɛ no dɛ onyi Joshua ma ondzi Israelman no enyim. Dɛm aber no, nna Moses dze mfe pii atsetse Joshua. (Ex. 33:11; Deut. 34:9) Afei so, nna mbarimba anokwafo bi so wɔ hɔ a wodzi ndzɛmba enyim. Nna binom yɛ asafohemfo a wɔhwɛ apem apem do, ɔha ɔha do, eduonum eduonum do, nye du du do. (Deut. 1:15) Nyankopɔn hwɛɛ no nkorɔfo no yie. Biribi a ɔtse dɛmara so sii wɔ Elijah n’aber do. Nna ɔdze mfe pii aboa Israelfo no ma wɔasom Jehovah nokwar mu. Naaso odur mber bi no, Jehovah sesaa no dwumadzi, na ɔmaa no dwumadzi fofor wɔ Judah n’anaafo afamu. (2 Ahe. 2:1; 2 Mber. 21:12) Ehwɛ a, nna iyi kyerɛ dɛ Jehovah eyi no nkorɔfo a wodzi nokwar a nna wɔwɔ Israel mbusuakuw du ahenman no mu no tokyen anaa? Oho. Nna Elijah dze mfe pii atsetse Elisha. Afei so nna “nkɔnhyɛfo mba no” so wɔ hɔ. Ɔda edzi dɛ nna wɔatsetse hɔn a wɔtse dɛm wɔ skuul ahorow bi mu. (2 Ahe. 2:7) Iyi ntsi, nna mbarimba anokwafo pii wɔ hɔ a wobotum edzi Nyankopɔn no nkorɔfo enyim ma wɔasom no nokwar mu. Jehovah kɔr do maa dza ɔpɛ baa mu, na n’asomfo anokwafo so ɔhwɛɛ hɔn.

13. Ebɛn asɛm a ɔhyɛ nkuran na ɔwɔ Hebrewfo 13:5b? (Hwɛ mfonyin no so.)

¹³ Aber a dɛm nhwɛdo ebien yi wɔ hɛn adwen mu no, sɛ wɔfa hɔn a wɔasera hɔn no nyina kɔ sor a, ehwɛ a ebɛn asɛm besi? Ɔnnsɛ dɛ yɛdwendwen iyi ho dze haw hɛnho koraa. Osiandɛ Bible no ma yehu nokwasɛm bi a ɔhyɛ hɛn gyedzi dzen. Ɔno nye dɛ: Jehovah remmpa n’asomfo a wɔwɔ asaase do no da biara da. (Kenkan Hebrewfo 13:5b.) Christianfo a wɔasera hɔn a wodzi ndzɛmba enyim ndɛ no nyim dɛ no ho hia dɛ wɔtsetse afofor dɛ mbrɛ Moses na Elijah yɛe no. Mfe pii nye yi na Akwankyerɛ Kuw no mufo dze ntsetsee ama mbarimba binom a wɔyɛ nguan fofor no mufo no mbrɛ ɔbɛyɛ a wobotum  edzi ndzɛmba enyim. Dɛ nhwɛdo no, wɔayɛ skuul ahorow ho nhyehyɛɛ mbrɛ ɔbɛyɛ a wɔdze ntsetsee bɛma asafo mu mpanyimfo, amansin do ahwɛfo, Nkorbata Egyinatukuw mufo, enuanom a wodzi ndzɛmba enyim wɔ Bethel nye afofor. Afei so, Akwankyerɛ Kuw no mufo ankasa dze ntsetsee ma hɔn aboafo a wɔsom wɔ egyinatukuw ahorow a ɔhyɛ Akwankyerɛ Kuw no ase no. Dɛm aboafo yi ridzi asodzi a no mu yɛ dur a wɔdze ahyehyɛ hɔn nsa wɔ Jehovah n’ahyehyɛdze no mu no ho dwuma pɛpɛɛpɛ. Wɔatsetse hɔn yie a ɔbɛma woetum ahwɛ Christ no nguan no yie.

14. Adze tsitsir a ɔsɛ dɛ yɛhyɛ no nsew wɔ adzesua yi mu nye dɛn?

¹⁴ Adze tsitsir a ɔsɛ dɛ yɛhyɛ no nsew wɔ adzesua yi mu nye yi: Sɛ aka kakra ma ahohiahia kɛse no aba n’ewiei na wɔbɛfa hɔn a wɔasera hɔn a wɔaka wɔ asaase yi do no nyina kɔ sor a, ɔno nnkyerɛ dɛ nokwar som bogu. Mbom, ɔbɔwɔ hɔ daa wɔ asaase yi do. Osiandɛ Jesus Christ yɛ kandzifo papa ntsi, biribiara nnyi hɔ a Nyankopɔn n’asomfo bɔhwer. Ɔyɛ nokwar dɛ dɛm aber no, Gog a ofi Magog a ɔyɛ aman ahorow a wɔbɛka hɔnho abɔ mu no bɔtow ahyɛ Nyankopɔn n’asomfo do. (Ezek. 38:​18-20) Naaso dɛm ber tsiabaa mu adzeyɛ yi rinnkesi hwee; Nyankopɔn no nkorɔfo bɔkɔ do ara asom no. Jehovah bɛgye no nkorɔfo efi dɛm atamfo yi nsamu! Ɔsomafo John hun “nyimpadodow kɛse” a wɔka Christ no nguan fofor no ho no wɔ enyido-adzehu mu. Wɔkaa kyerɛɛ John wɔ enyido-adzehu no mu dɛ, dɛm “nyimpadodow kɛse” yi, “wofi ahohia kɛse no mu.” (Nyi. 7:​9, 14) Iyi ma yehu paa dɛ Jehovah bɛgye hɔn nkwa!

15-16. Dɛ mbrɛ Nyikyerɛ 17:14 ma yehu no, ebɛnadze na Christ ne mfɛfo a wɔasera hɔn no bɛyɛ wɔ Har–​Magedon ko no mu, na ebɛnadze ntsi na iyi hyɛ hɛn gyedzi dzen?

¹⁵ Naaso bi a nyimpa binom bebisa dɛ: ‘Na hɔn a wɔasera hɔn no so ɛ? Sɛ wɔkɔ sor a, ebɛnadze na wɔbɛyɛ wɔ hɔ?’ Bible no ma yenya asɛmbisa yi ho mbuae tsenn. Ɔma yehu dɛ wiadze etumfo ‘nye Eguambaa no bedzi ako’ naaso wobedzi ɔkogu pɔtɔɔ. Bible no ka dɛ: “Eguambaa no bedzi hɔn do konyim.” Woananom na wɔbɔboa no? Kyerɛwsɛm kor no ara san ka dɛ “hɔn a wɔafrɛ hɔn,” “wɔapa hɔn” na “wodzi nokwar” no na wɔbɔboa no. (Kenkan Nyikyerɛ 17:14.) Woananom na kyerɛwsɛm yi reka hɔnho asɛm  yi? Hɔn nye hɔn a wɔasera hɔn a woenyan hɔn no! Iyi kyerɛ dɛ, sɛ ahohiahia kɛse no rokɔ n’ewiei na wɔbɛfa hɔn a wɔasera hɔn a wɔaka wɔ asaase yi do no nyina kɔ a, ndwuma a wobedzi kan ayɛ no, no mu kor nye dɛ wɔbɔko. Dɛm edwuma yi bɛyɛ ahomka paa. Christianfo a wɔasera hɔn yi mu bi wɔ hɔ a, ansaana wɔrebɛyɛ Jehovah Adasefo no nna wodzi ako. Nna binom mpo yɛ asogyafo. Naaso ekyir yi wɔbɛyɛɛ nokwar Christianfo, na wɔbɔɔ mbɔdzen dɛ wɔbɛma asomdwee atsena wɔnye afofor ntamu. (Gal. 5:22; 2 Thess. 3:16) Wɔammfa hɔnho annhyehyɛ akodzi biara mu bio. Naaso sɛ wɔkɔ sor a, wɔbɛka Christ nye n’abɔfodɔm a wɔwɔ sor no ho ma wɔaako etsia Nyankopɔn n’atamfo wɔ ɔko a otwa tun no mu.

¹⁶ Ɔwodze dwen ho hwɛ. Aber a dɛm Christianfo yi wɔ asaase do no, nna hɔn mu binom ayɛ mpanyimfo na wonnyi ahoɔdzen mpo. Naaso sɛ wonyan hɔn ma wɔkɔ sor a, hɔnho bɛyɛ dzen na wɔbɛyɛ sunsum abɔdze a owu nnyi hɔn do tum. Na wɔnye hɔn Hen Jesus Christ a onyim akodzi yie no bɔbɔ mu ako etsia Nyankopɔn n’atamfo. Afei, sɛ Har–​Magedon ko no ba ewiei a, wɔnye Jesus bɔbɔ mu aboa adasamba ma wɔaabɛyɛ nyimpa a bɔn biara nnyi hɔnho. Iyi ma yehu paa dɛ dza woenntum annyɛ ammboa hɔn nuanom aber a nna wɔwɔ asaase do no, seseiara a wɔabɛyɛ sunsum abɔdze yi, wobotum ayɛ ma wɔabor do!

17. Ebɛnadze na ɔma yɛgye dzi paa dɛ Nyankopɔn bɔbɔ n’asomfo nyina ho ban wɔ Har–​Magedon ko no mu?

¹⁷ Eka nguan fofor no ho anaa? Sɛ dɛm a, ebɛnadze na no ho behia dɛ eyɛ aber a Har–​Magedon ko no ahyɛ ase no? Dza ibotum ayɛ nye yi: Fa wo werɛ hyɛ Jehovah mu na dzi akwankyerɛ biara a wɔdze bɛma wo no do. Akwankyerɛ no bi botum ayɛ hendze? Bible no ma yenya awerɛkyekyesɛm bi. Ɔka dɛ: “Hom mbɛhɛn hom adankyir mu, na hom ntotow homho mbobow mu: hom nhuntsa ber kakra, ma onkodu dɛ ebufuhyew no botwa mu akɔ.” (Isa. 26:20) Dɛm aber no, Nyankopɔn bɔbɔ n’asomfo anokwafo a wɔwɔ sor nye asaase do nyina ho ban. Dɛ mbrɛ ɔsomafo Paul kae no, hɛn so yɛgye dzi paa dɛ “etumfo, anaa dza ɔwɔ hɔ sesei, anaa dza ɔrebɛba, . . . nnkotum atsew hɛn efi Nyankopɔn dɔ no” ho. (Rom. 8:​38, 39) Mma wo werɛ mmfir dɛm asɛm yi da: Jehovah dɔ wo, na ɔremmpa wo da biara da!