1. A ki moman yo ké sanblé tout sé wen-la an syèl-la ?

 NI PLIZYÈ lanné dè sa, sèwvitè a Jéova té ka mandé-yo : « A ki moman sé dènyé wen-la ki asi latè la ké monté an syèl-la ? » Onlè, nou té ka di kè pétèt sèwten krétyen wen té’é rété asi latè apré Awmagédon, é kè yo té’é viv adan paradi-la pannan on ti moman. Men adan niméwo a 15 juiyé 2013 a Tou dè gad la, nou aprann kè tout sé wen-la ké sanblé an syèl-la avan lagè a Awmagédon koumansé (Mat. 24:31).

2. Ki kèsyon sèwten moun té’é pé pozé-yo, é ka nou ké vwè adan awtik-lasa ?

² Men sèwten moun té’é pé mandé-yo : Lèwvwè sé wen-la ké monté an syèl-la, ka ki ké rivé ‘sélézòt mouton-la’ ki ké rété fidèl pannan ‘gwo tribilasyon-la’ ? (Jan 10:16 ; Mat. 24:21). Jòdijou, pétèt ni sèwten adan sélézòt mouton-la ki pé ni lenprésyon kè Jéova ké lagé-yo davwa sé wen-la pé’é asi latè ankò. An-nou vwè 2 istwa adan Labib ki té’é pé fè-yo pansé sa. Aprésa, nou ké vwè déotwa rézon ki ka montré kè nou pa ni a enkyété-nou.

DÉ BITEN KI PÉ’É RIVÉ

3-4. Ki biten sèwten moun té’é pé mandé-yo, é poukwa ?

³ Sèwten frè é sè té’é pé mandé-yo ès sélézòt mouton-la pé’é fè chimen kochi lèwvwè sé frè wen la ki adan Komité santral la pé’é la ankò pou ban-nou on dirèksyon. Pétèt kè yo ka pansé sa, pas sé sa ki rivé an tan a Labib. An-nou vwè 2 ègzanp ki ka montré sa. Prèmyé-la, sé istwa a Joad gran prèt-la. Sé té on boug ki té fidèl a Jéova menm. Li é madanm a-y, Jéochabat, désidé pwotéjé on jenn tigason non a-y sé  Joas. Yo édé-y vin on bon wa é yo édé-y rété fidèl a Jéova a san pou san. Toutotan Joad té la, Joas té ka maché dwèt. Men dèstan Joad fenmé zyé a-y, Joas chanjé bout-pou-bout. I lésé sé prens-la ki té mové la détenn asi-y é i lagé Jéova (2 Kron. 24:2, 15-19).

⁴ Dézyèm istwa-la ka konsèwné sé krétyen-la ki viv o 2^èm syèk. Lapòt Jan, sé té dènyé apòt-la ki té ka rété la. Avan i mò, i édé onlo krétyen a rété fidèl a Jéova (3 Jan 4). Kon sélézòt apòt-la, i goumé rèd pou i té pwotéjé sé lasanblé-la kont moun ki té ka simé fo-ansègnman é ki té ka pousé lézòt fè dé biten ki pa bon (1 Jan 2:18 ; 2 Tés. 2:7). Men lèwvwè i mò, onlo lasanblé koumansé suiv ansègnman a sé apòsta-la. Onpakèt lanné apré, sé apòsta-la té ja pran lanmen asi tout sé lasanblé-la.

5. Lè nou ka li sé 2 istwa-lasa, kibiten nou pé rivé a kwè ?

⁵ Ès sa ki rivé adan sé 2 istwa-lasa, sé sa ki ké rivé sélézòt mouton-la lè sé wen-la ké monté an syèl-la ? Ès sé krétyen-la ké mèt sa yo aprann akoté kon Joas, oben ès yo ké suiv sé apòsta-la kon onlo krétyen ki viv o 2^èm syèk ? Awa, sa pé’é jen fèt ! Nou pé sèten kè, lè sé wen-la ké monté an syèl-la, sélézòt mouton-la ké kontinyé sèvi Jéova kon i ka mandé, é Jéova ké kontinyé pran swen a yo. Poukwa nou pé sèten dè sa ?

SÈWVITÈ A JÉOVA KÉ TOUJOU ADORÉ-Y KON I KA MANDÉ

6. Nou ké ègzaminé 3 épòk diféran. Kilès la ?

⁶ Poukwa nou pé sèten kè ayen pé’é pé anpéché sèwvitè a Jéova adoré-y kon i ka mandé, menm pannan sé épòk difisil la ki ka atann-nou la ? Ében, sé paskè Labib ka èspliké kè épòk an nou pa menm biten ki épòk a sé Izraélit-la ki viv an tan a Labib, é i pa menm biten ki épòk a sé krétyen-la ki viv o 2^èm syèk nonplis. Alò an-nou pran on ti tan pou nou vwè sé 3 péryòd-lasa : 1) épòk a sé Izraélit-la, 2) épòk-la ki vin apré sé apòt-la mò, é 3) épòk an nou, ki sé ‘moman-la ki rivé la pou tout biten wouvin kon yo té yé avan’ (Akt 3:21).

7. Lèwvwè pèp-la é sé wa-la chwazi ay dèyè do a biten ki pa bon, poukwa sé Izraélit-la ki té fidèl la pa pèd èspwa ?

⁷ An tan a Izrayèl. Tibwen tan avan Moyiz mò, mi sa i di sé Izraélit-la : « An sav byen zò ké fè sa ki mové apré an ké mò, é zò ké lagé chimen-la an té di-zòt suiv la » (Dét. 31:29). Anplisdisa, Moyiz avèti sé Izraélit-la. I di-yo, siwvwè yo ba Bondyé do, yo ké chayé-yo pa fòs adan on péyi ki pa ta yo (Dét. 28:35, 36). Ès sé pawòl-lasa réyalizé ? Wi. Pannan plizyè syèk, onlo wa ki té ka gouvèné pèp a Bondyé chwazi fè dé biten ki pa bon é yo fè pèp-la adoré fo-dyé. Kifè, Jéova pini-yo pou méchansté a yo é i fè ansòt pou pon wa izraélit pa gouvèné asi pèp a-y ankò (Ézék. 21:25-27). Men lè sé Izraélit-la ki té fidèl la vwè jan pawòl a Bondyé réyalizé, sa ba-yo kouraj é yo pa pèd èspwa (Iz. 55:10, 11).

8. O 2^èm syèk, sé lasanblé-la mété-yo ka fè chimen kochi. Ès fò sa étoné-nou ? Bay on èsplikasyon.

⁸ Épòk-la ki vin apré sé apòt-la mò. O 2^èm syèk, sé lasanblé-la mèt-yo ka fè chimen kochi. Ès fò sa étoné-nou ? Anponjan. Jézi té ja anonsé kè onlè, té’é ni onlo apòsta toubònman (Mat. 7:21-23 ; 13:24-30, 36-43). Lapòt Pòl, lapòt Pyè, é lapòt Jan té di kè pwofési-la Jézi té anonsé la té ja koumansé réyalizé o 1^é syèk (2 Tés. 2:3, 7 ; 2 Pyè 2:1 ; 1 Jan 2:18). Tibwen tan apré dènyé apòt-la mò, sé krétyen-la ki té apòsta la vin pi gwo pawti a Gran Babilòn-la ki ka rèprézanté tout sé fo rèlijyon-la. La ankò, sa Jézi té anonsé la réyalizé.

9. Poukwa péryòd-la nou ka viv adan-y la diféran dè épòk a sé Izraélit-la é dè épòk a sé krétyen-la ki viv o 2^èm syèk ?

 ⁹ Épòk an nou, ki sé ‘moman-la ki rivé la pou tout biten wouvin kon yo té yé avan’. Épòk an nou diféran dè épòk a sé Izraélit-la é dè épòk a sé apòsta-la ki té pran lanmen asi lasanblé-la o 2^èm syèk. Kijan nou ni labitid kriyé épòk-la nou ka viv adan-y la ? Pli souvan ki rarman, nou ka di kè nou ka viv adan « dènyé jou » a vyé mond-lasa (2 Tim. 3:1). Men Labib ka montré kè lèwvwè péryòd a « sé dènyé jou-la » koumansé, ni ondòt péryòd ki koumansé anmenmtan. Péryòd-lasa ké lontan pli long ki sé dènyé jou-la é i ké menné plis jwa osi. Péryòd-lasa ké diré jistan wayòm-la Jézi ka dirijé la ké woufè limanité vin pawfè é ké fè latè vin on paradi. Lè yo ka palé dè péryòd-lasa, yo ka di kè sé ‘moman-la ki rivé la pou tout biten wouvin kon yo té yé avan’ (Akt 3:21). Péryòd-lasa koumansé an 1914. Men lè yo ka palé dè ‘moman-la ki rivé la pou tout biten wouvin kon yo té yé avan’, dè ki biten yo ka palé ? Konm Jézi vin Wa an syèl-la an 1914, Jéova té ni on désandan a wa David pou rèprézanté-y kon avan. Men, a pa sa tousèl ki wouvin kon i té yé avan. Tibwen tan apré, Jéova fè ansòt pou pèp a-y asi latè woukoumansé adoré-y kon i té ka mandé ! (Iz. 2:2-4 ; Ézék. 11:17-20). Men ès ni ondòt biten ki té’é vin anpéché pèp a Bondyé adoré-y kon i ka mandé ?

10. a) Ka Labib ka anonsé anrapò èvè vré adorasyon-la yo woumèt si pyé a épòk an nou ? (Izayi 54:17). b) Poukwa sé pwofési-lasa ka rasiré-nou ?

¹⁰ (Li Izayi 54:17.) An-nou réfléchi asi pwofési-lasa : « Kèlkèswa zàm yo fè kont vou, ponyonn pé ké sèvi ayen. » Sé pawòl-lasa ka réyalizé a épòk an nou. Ni ondòt pwofési ankò ki ka réyalizé a épòk an nou é sa ka rasiré-nou. Mi sa pwofési-lasa ka di : « Sé Jéova ki ké anségné tout pitit a-w, é pitit a-w ké viv adan lapé toubònman. Ou ké byen chouké pas ou ka fè sa ki jis. […] Ou pé’é pè ayen é ayen pé’é ba-w lafrous, pas biten-lasa pé’é vin owa a-w » (Iz. 54:13, 14). Menm « dyé a mond-lasa », Satan, pé pa fè ahak pou arété travay-la pèp a Jéova ka fè la pou édé moun konnèt Jéova (2 Kor. 4:4). Jéova woumèt vré adorasyon-la si pyé, é pa ni ayen ki ké anpéché pèp a-y adoré-y kon i ka mandé ankò. A pa pou détwa jou i mété-y la, men i mété-y la pou touttan. Yo pé fabriké tout zàm yo vé pou ataké-nou, ponyonn pé’é rivé about an nou !

 SA KI KÉ PASÉ

11. Lèwvwè sé wen-la ké monté an syèl-la, ké toujou ni on moun pou dirèksyonné pèp a Bondyé. Poukwa nou sèten dè sa ?

¹¹ Lèwvwè rèstan a sé wen-la ki asi latè la ké monté an syèl-la, ka ki ké pasé ? Ében on biten pou nou pa jen oubliyé, sé kè Bèwjé an nou sé Jézi. Sé-y ki Chèf a lasanblé-la. Dayè pou yonn, limenm ni lokazyon di : « Zò ni onsèl Chèf : Lèkris » (Mat. 23:10). Antankè Wa, Jézi ké toujou fè travay a-y byen konm i fo. Nou pé sèten dè sa. É konm sé-y ki ka gouvèné, disip a-y ki asi latè pé’é bizwen pè ayen. Sé vré kè nou pa konnèt kijan Jézi ké dirijé pèp a-y ègzaktèman a moman-lasa. Men an-nou gadé déotwa ègzanp an Bib-la ki pé rasiré-nou.

12. Kijan Jéova pran swen a pèp a-y a) lèwvwè Moyiz mò ? b) lèwvwè i voyé Éli ondòt koté ? (gadé imaj-la osi).

¹² Lèwvwè sé Izraélit-la té kay rantré adan péyi-la Jéova té pwomèt-yo la, sé a moman-lasa kè Moyiz mò. Alò, kimoun ki té’é okipé dè nasyon-la ? Ès yo touvé-yo kon dé mouton ki pa ni mèt ? Awa ! Toutotan sé Izraélit-la té fidèl a Jéova, Jéova ba-yo tousa yo té bizwen. Avan Moyiz té mò, Jéova di-y mèt Joziyé an tèt a pèp-la pou i gidonné-y. A moman-lasa sa té ja ka fè plizyè lanné kè Moyiz té ka fòwmé Joziyé (Ègz. 33:11 ; Dét. 34:9). Anplisdisa, té ni onlo dòt nonm kapab ki té ka okipé dè pèp-la osi. Té ni sé diféran chèf-la : chèf asi 1000 moun, chèf asi 100 moun, chèf asi 50 moun é chèf asi 10 moun (Dét. 1:15). Alò sèwvitè a Bondyé té ka touvé-yo an men a moun ki té pé okipé dè yo byen konm i fo. Alèla, an-nou palé dè pwofèt Éli. Pannan onpakèt lanné, Éli travay rèd pou édé sé Izraélit-la adoré Jéova kon i ka mandé. Men aprésa, Jéova voyé-y ondòt koté. I voyé pwofèt-lasa an Jida (2 Wa 2:1 ; 2 Kron. 21:12). Ès sa vé di kè pa té ni ponmoun pou dirijé sé moun-la ki té ka fè pawti a sé 10 tribi-la ? Awa ! Éli té fòwmé Élizé pannan plizyè lanné. Anplisdisa té ni « gason a sé pwofèt-la » é i ka sanm sa yo té ka fòwmé-yo (2 Wa 2:7). Sa ka montré kè Jéova té ni onlo nonm anba men a-y pou dirijé pèp a-y. Kifè ayen pa frenné pwojé a Jéova é toujou té ni moun pou ba sèwvitè a-y ki fidèl on bon dirèksyon.

13. An Ébré 13:5b, nou ka touvé on garanti ki ka rasiré-nou. Ki garanti ésa ? (gadé imaj-la osi).

¹³ Lè ou ka tchenn kont dè sé ègzanp-la nou vwè la, dapré-w ka ki ké pasé lèwvwè  yo ké fè sé dènyé wen-la monté an syèl-la ? Anfèt nou pa menm bizwen pozé-nou kèsyon-lasa, piskè Labib ka di on biten ki senp é ki ka rasiré-nou. Mi sa i ka di : Jéova pé’é jen lagé sèwvitè a-y ki asi latè (li Ébré 13:5b). Kon Moyiz é Éli, ti gwoup a sé krétyen wen la ki ka dirijé-nou jòdila ka konprann jan sa enpòwtan kè yo fòwmé lézòt. Sa ka fè plizyè lanné sé frè a Komité santral la ka fòwmé dòt frè ki ka fè pawti a sélézòt mouton-la pou yo dirijé aktivité-la. Pa ègzanp, yo òwganizé plizyè lékòl pou fòwmé sé ansyen-la, sé rèsponsab a siwkonskripsyon la, sé frè la ki ka fè pawti a sé komité a sé filyal-la, sé frè-la ki rèsponsab a on sèwvis adan sé Bétèl-la, é dòt ankò. Kanta sé asistan a sé diféran komité-la ki anba rèsponsabilité a Komité santral la, sé sé frè a Komité santral la menm ki ka fòwmé-yo. Dépi aprézan, sé asistan-lasa ja ka fè onlo biten adan òwganizasyon a Jéova. Grasa fòwmasyon-la yo ka risivwè la, dèmen yo ké paré pou kontinyé pran swen a mouton a Jézikris.

14. Ki lidé nou vé woutyenn adan awtik-lasa ?

¹⁴ Mi lidé-la nou vé woutyenn adan awtik-lasa : lèwvwè gwo tribilasyon-la ké toupré fin, é kè sé dènyé wen-la ké monté an syèl-la, vré adorasyon-la ké kontinyé asi latè. Davwa Jézikri ké ka dirijé, sèwvitè a Bondyé ké kontinyé adoré-y. Nou sav kè a moman-lasa, on gwoup nasyon kè Labib ka kriyé Gòg dè Magòg ké ataké pèp a Bondyé (Ézék. 38:18-20). Yo ké ataké-nou men sa pé ké diré lontan é sa yo ké fè la ké échwé. Yo pé’é pé anpéché pèp a Bondyé adoré Jéova. Asiré pa pétèt, Jéova ké sové sèwvitè a-y. Adan on vizyon, lapòt Jan vwè ‘gran foulmoun-la’ kivédi sélèzòt mouton-la Jézikri ni la. Labib ka di kè ‘gran foulmoun-lasa sòti anba gwo tribilasyon-la’ (Rév. 7:9, 14). Donk Jéova ké pwotéjé sélézòt mouton-la é nou pa ni pon dout asi sa.

15-16. Dapré Révélasyon 17:14, pannan lagè a Awmagédon, ki biten sé krétyen wen la kè fè ansanm èvè Jézikri é poukwa sa ka ankourajé-nou ?

¹⁵ Men pétèt kè ni sèwten moun ki té’é pé mandé-yo : « Ka sé wen-la ké fè anho-la ? »  Labib ka ban-nou répons-la. I ka di-nou kè sé gouvènman-la ki asi latè la ké « goumé èvè Timouton-la ». Nou ka tou konprann kè yo ké pèd konba. Mi sa ki maké : « Timouton-la ké gangné-yo. » É kimoun ki ké èvè Timouton-la adan lagè-lasa ? Ében vèwsé-la ka réponn ankò, i ka di ‘séla yo kriyé la, kè yo chwazi la é ki fidèl la’ (li Révélasyon 17:14). Dè kimoun yo ka palé la ? Dè frè é sè ki wen é ki résisité ! Sa vé di kè lèwvwè gwo tribilasyon-la ké toupré fin é kè rèstan a sé wen-la ké monté an syèl, yonn adan sé 1^é biten-la yo ké fè la sé goumé èvè sé lènmi-la. Mi on bèl travay mi ! Avan yo vin Témwen a Jéova, ni sa adan yo ki té enmé goumé. Ni dòt ki té sòlda. Men aprésa, lèwvwè yo aksèpté lavérité, yo mèt-yo ka maché asi chimen a lapé (Gal. 5:22 ; 2 Tés. 3:16). Sa vé di kè yo mèt tousa ki anrapò èvè goumé dèyè do a yo. Men lèwvwè yo ké résisité an syèl-la, yo ké owa Jézi é zanj a-y pou goumé pannan dènyé lagè-la yo ké fè la kont lènmi a Bondyé.

¹⁶ Mi on biten pou ou sonjé : Sèwten wen ki asi latè toujou, ja ni on bèl laj é pétèt kè santé-la pa two flanbo. Men lèwvwè Bondyé ké résisité-yo an syèl-la, yo ké vin dé kréyati ki puisan é lanmò pé’é ni pon pouvwa asi yo ankò. 1^é biten yo ké ba-yo fè, sé goumé owa Wa Jézikri, Gran Sòlda-la. Lèwvwè lagè a Awmagédon ké fin, yo ké travay èvè Jézi pou édé sé moun-la ki asi latè la wouvin pawfè. Lè yo té asi latè, ni dé biten sé krétyen wen la pa té pé fè pou frè é sè a yo. Men toupannan yo ké an syèl-la, yo ké pé fè onlo biten pou frè é sè a yo ki toupatou asi latè é kè yo enmé onlo.

17. Kijan nou fè sav kè tout sèwvitè a Bondyé ké ansékirité pannan lagè a Awmagédon ?

¹⁷ Ès ou ka fè pawti a sélézòt mouton-la ? Si sé sa, ka ou ké ni a fè dè koté a-w lèwvwè lagè a Awmagédon ké koumansé ? Mi sa tousèl ou ké ni a fè : fè Jéova konfyans é fè tousa i ké mandé-w fè. Men kijan pou fè sa ojis ? Pa ègzanp, mi on biten Labib ka di kè ou ké ni a fè : « Rantré adan sé pyès a-w la ki pli fon la é fèmé sé pòt-la dèyè do a-w. Kaché on ti moman, jistan kòlè-la pasé » (Iz. 26:20). Pannan péryòd-lasa, tout sèwvitè a Bondyé ki fidèl ké ansékirité, ki yo an syèl-la, ki yo asi latè. Kon lapòt Pòl, nou sèten kè « ni gouvènman, ni biten ki la aprézan ni biten ki ké vin dèmen […] pé’é pé séparé-nou dè lanmou-la Bondyé ni pou nou la » (Wom. 8:38, 39). Pa jen oubliyé kè Jéova enmé-w é kè i pé’é jen lagé-w !