1. ¿Arakaʼépa umi unhído ohopáta yvágape?

 HETA áñore Jehová puévlo oñeporandu: “¿Arakaʼépa umi unhído ohopáta yvágape?”. Peteĩ tiémpore ojekalkula vaʼekue umi unhído oĩtaha gueteri ko yvy ape ári pe Armagedón aja ha oĩtaha pe múndo pyahúpe peteĩ tiémpore. Péro pe rrevísta Ñemañaha 15 de julio de 2013-pe, ñaaprende kuri umi unhído ohopataha yvágape oñepyrũ mboyve Armagedón (Mat. 24:31).

2. ¿Mbaʼépa ikatu oĩ oñeporandúva ha mbaʼépa ñaanalisáta ko artíkulope?

² Upéicharõ jepe ikatu oĩ oñeporandúva: “¿Mbaʼépa oikopáta umi ‘ótro ovechakuéragui’ pe ‘jehasa asy guasu’ aja?” (Juan 10:16; Mat. 24:21). Umi unhidokuéra ohopa vove yvágape, ikatu oĩ hína opensáva ndaiporimoʼãveimaha avave ogia vaʼerã umi opytávape ko yvy ape ári. Ha upévare ikatúma oñepyrũ okyhyje. Ñaanalisamína mokõi rreláto ñantende hag̃ua mbaʼérepa oĩ opensáva upéicha, ha upéi jahecháta mbaʼérepa natekotevẽi jajepyʼapy.

¿MBAʼÉPA LA NDOIKOMOʼÃIVA?

3, 4. ¿Mbaʼépa ikatu oĩ oñeporandúva, ha mbaʼérepa?

³ Ikatu oĩ heʼíva: “Ndaiporivéi vove umi ermáno oservíva pe Kuérpo Governántepe, ¿mávapa ogiáta umi ótro ovechakuérape? ¿Ohejapátapa hikuái Jehovápe?”. Oĩ opensáva upéva ikatuha oiko imanduʼa rupi unos kuánto rreláto bíblicore. Ñaanalisami mokõi umíva apytégui. Ñepyrũrã ñañeʼẽ pe súmo saserdóte Jehoiadáre. Haʼe ningo oservi vaʼekue Jehovápe fiélmente. Haʼe ha hembireko Jehosabeat oprotehe kuri Jehoáspe ha oipytyvõ chupe oiko hag̃ua chugui peteĩ  rréi ivuéno ha ifiélva. Oikove aja Jehoiadá, Jehoás ojapo iporãva ha oadora Jehovápe. Péro omano rire Jehoiadá, Jehoás oñepyrũ ojapo ivaíva. Por ehémplo ohendu umi prínsipe iñañávape ha ou ndoservivéi Jehovápe (2 Crón. 24:​2, 15-19).

⁴ Koʼág̃a jahechami la oiko vaʼekue umi kristiáno yma guarére áño 100 rire. Apóstol Juan haʼe pe último apóstol omano vaʼekue. Haʼe oikove aja oipytyvõ vaʼekue umi kristiánope osegi hag̃ua ifiél Jehovápe (3 Juan 4). Umi ótro apóstol ojapo haguéicha, haʼe oñehaʼãmbaite vaʼekue oprotehe ermanokuérape umi apóstatagui (1 Juan 2:18; 2 Tes. 2:7). Péro omano riremínte Juan, umi apóstata hetavéma ohóvo ha ojagarrapa umedáicha. Péicha pe kongregasión oñepyrũma oñembyaipaite pórke oheja hikuái Jehovápe.

5. ¿Mbaʼépa nañapensái vaʼerã jahecha rire umi mokõi rreláto bíblico?

⁵ Jahecha rire koʼã mokõi rreláto ikatu oĩ oñeporandúva: “¿Mbaʼépa oikopáta umi ótro ovechakuéragui ndaiporivéi vove umi unhído? ¿Ohejátapa hikuái Jehovápe ojapo haguéicha Jehoás? ¿Oñepyrũtapa oguerovia hikuái umi japu oiko haguéicha umi kristiáno yma guarére?”. Nahaniriete voi. ¿Mbaʼérepa? Pórke katuete Jehová osegíta okuida umi ótro ovechakuérare, jepe umi unhidokuéra ohopátama yvágape. Péro, ¿mbaʼérepa ikatu jajerovia upeichataha?

OJEADORÁTA JEHOVÁPE HAʼE OIPOTAHÁICHA

6. ¿Mbaʼépa umi mbohapy mbaʼe ñaanalisátava?

⁶ Oútaramo jepe umi tiémpo ijetuʼuetéva, ¿mbaʼépa ohechauka Jehová puévlo osegitaha oadora chupe haʼe oipotaháicha? Según jahecha la Bíbliape, ko tiémpo jaikohápe koʼág̃a idiferentete pe tiémpo oiko haguégui umi israelita ha umi kristiáno yma guare. Upévare ñantende porãve hag̃ua ñañeʼẽvéta umi mbohapy tiémpore: 1) pe tiémpo oiko haguépe umi israelita, 2) pe tiémpo oiko haguépe umi kristianokuéra áño 100 rire ha 3) pe tiémpo ‘oñembopyahu jeyhápe’ entéro mbaʼe, haʼéva hína ñane tiémpo (Hech. 3:21).

7. Israel tiémpope, ¿mbaʼérepa umi ifiélva noñedesanimái vaʼekue pe rréi ha pe puévlo odesidi vaíramo jepe?

⁷ Pe tiémpo oiko haguépe umi israelita. Moisés omano mboyvemi haʼe heʼi umi israelítape: “Che aikuaa porã, amano rire peẽ katuete pejapotaha ivaíva ha pejedesviataha pe tape ahechaukávagui peẽme peguata hag̃ua” (Deut. 31:29). Moisés oavisa porã pe puévlope oúramo ojerrevela ojeguerahataha umi israelítape peteĩ nasión ndoikuaáivape hikuái (Deut. 28:​35, 36). ¿Oñekumplípa raʼe koʼã mbaʼe? Si, oñekumpli. Hetaiterei áñore heta rréi ou ojapo ivaíva ha ogueraha vai Ñandejára puévlope. Haʼekuéra naiñeʼẽrenduvéi rupi Jehovápe, haʼe okastiga chupekuéra ha ndohejavéi oĩ rréi orrepresentáva chupe ko yvy ape ári (Ezeq. 21:​25-27). Péro umi israelita ifiélva ohechávo oñekumpliha umi mbaʼe Jehová heʼi vaʼekue, opyta ikyreʼỹve oservi hag̃ua chupe (Is. 55:​10, 11).

8. ¿Ñanesorprende vaʼerãpa umi kristiánogui oiko hague apóstata áño 100 rire? Emyesakã.

⁸ Pe tiémpo oiko haguépe umi kristiáno, áño 100 rire. Jesús heʼi vaʼekue umi apóstata hetavetaha ohóvo, upévare nañanesorprendéi umi kristiáno ou hague oiko chuguikuéra apóstata (Mat. 7:​21-23; 13:​24-30, 36-43). Apóstol Pablo, Pedro ha Juan ohecha vaʼekue koʼã profesía oñekumpliha haʼekuéra oikoha tiémpope voi (2 Tes. 2:​3, 7; 2 Ped. 2:1; 1 Juan 2:18). Omano rire pe último apóstol, umi kristianokuéra oñepyrũma ojapo heta mbaʼe vai. Upéicha opyta hikuái Babilonia Guasu poguýpe, oĩháme entéro rrelihión japu. Péicha ojekuaa porã oñekumpli hague la Jesús heʼi vaʼekue.

9. ¿Mbaʼérepa jaʼekuaa idiferenteha ñane tiémpo umi israelita ha umi kristiáno apóstata tiémpogui?

 ⁹ “Pe tiémpo oñembopyahu jey hag̃ua entéro mbaʼe”. Ko tiémpo jaikohápe koʼág̃a idiferentete umi israelita tiémpogui ha umi kristiáno apóstata tiémpogui, áño 100 rire. ¿Mbaʼéichapa héra pe tiémpo jaikohápe koʼág̃a? Ko tiémpope oñehenói ‘umi ára paha’ (2 Tim. 3:1). Péro oñepyrũrõ guare umi ára paha, oñepyrũ vaʼekue avei peteĩ tiémpo iñimportantevéva ha ipukuvéva, hérava “pe tiémpo oñembopyahu jey hag̃ua entéro mbaʼe” (Hech. 3:21). Ko tiémpo oñepyrũ 1914-pe, ha oñemohuʼãta entéro persóna haʼe vove perfékto ha oiko vove peteĩ paraísope ko yvy ape ári Jesucristo Rréino poguýpe. ¿Mbaʼépa la ombopyahu jey vaʼekue Jehová 1914-pe? Haʼe omoĩ jey peteĩ rréi haʼéva David familiare. Ko rréi ningo Jesús. Haʼe ogoverna yvága guive Ñandejára rérape. Péro ndahaʼéi upévante la oñembopyahu vaʼekue. Tiémpo riremi, oñeñepyrũ jeýma ojeadora Jehovápe haʼe oipotaháicha (Is. 2:​2-4; Ezeq. 11:​17-20). Péro, ¿oñembyai jeýtapa umi mbaʼe Jehová ombopyahúva?

10. a) ¿Mbaʼe profesíapa omombeʼu la Biblia oikotaha ñane tiémpope? (Isaías 54:17). b) ¿Mbaʼérepa ñanembopyʼaguapy koʼã profesía?

¹⁰ (Elee Isaías 54:17). Epensamína ko profesíare: “Tahaʼe haʼéva pe árma ojepurúva ne kóntrape, núnka nosẽporãmoʼãi”. Ko versíkulo heʼíva oñekumpli hína koʼág̃arupi. Ñanembopyʼaguapy jahechávo mbaʼéichapa oñekumpli avei la Isaías heʼi vaʼekue koʼã versíkulope: ‘Che, Jehová, ahekomboʼéta entéro ne familiakuérape, ha haʼekuéra oikóta pyʼaguapýpe. Nde territóriope siémpre ojejapóta hustísia, péva haʼetéta voi peteĩ simiénto nemopyenda porãva. Nderekyhyjemoʼãi mbaʼevete asýgui. Nderekyhyjemoʼãi pórke umi mbaʼe nemongyhyjéva, mombyry oĩta ndehegui’ (Is. 54:​13, 14). Satanás haʼéramo jepe “ko múndo jára”, ndaikatúi ojoko Jehová puévlope (2 Cor. 4:4). Upéicha rupi jasegi ñaipytyvõ la héntepe oikuaa porãve hag̃ua Jehovápe. Koʼág̃arupi oĩ jeýma oadoráva Jehovápe haʼe oipotaháicha ha avave ndaikatumoʼãvéima ombyai upéva, ni koʼág̃a ni amo gotyove. Upévare, tahaʼe haʼéva pe árma ojepurúva ñane kóntrape nosẽporãmoʼãi núnka.

¿MBAʼÉPA LA OIKÓTAVA?

11. ¿Mbaʼérepa umi ótro ovechakuéra ikatu oĩ segúro ndopytamoʼãiha haʼeño ág̃a umi unhído ohopa vove yvágape?

¹¹ ¿Mbaʼépa oikóta umi unhidokuéra ohopa vove yvágape? Ñanemanduʼákena Jesús haʼeha ñande pastór, haʼe hína pe omoakãva  pe kongregasión. Jesús heʼi vaʼekue voi: “Pende Líder peteĩnte, upéva hína Cristo” (Mat. 23:10). Jesucristo ogovernáva hína yvágape, siémpre okuida porãta Jehová siervokuérare. Haʼe akóinte ogiáta umi ótro ovechakuérape, upévare natekotevẽi okyhyje hikuái mbaʼevégui. Ndajaikuaái ningo añetehápe mbaʼe mbaʼépa Jesús ojapóta upe tiémpope ogia porã hag̃ua Jehová puévlope, upévare jahecháta unos kuánto rreláto oĩva la Bíbliape ikatúva ñanembopyʼaguapy.

12. a) ¿Mbaʼéichapa Jehová osegi vaʼekue okuida ipuévlore Moisés omano rire? b) ¿Mbaʼéichapa Jehová osegi vaʼekue okuida ipuévlore Elías oho rire oservi ótro lugárpe? (Ehecha pe taʼanga).

¹² Moisés omano vaʼekue umi israelita oike mboyvemi pe Tiérra Prometídape. ¿Mbaʼépa oiko raʼe upe rire Jehová puévlogui? ¿Hesaráipa Jehová chuguikuéra? Nahániri. Haʼekuéra iñeʼẽrendu aja Jehovápe, haʼe okuida porã vaʼekue hesekuéra. Upévare Moisés omano mboyve, Jehová heʼíma vaʼekue chupe ombokatupyry hag̃ua Josuépe odirihikuaa hag̃ua pe puévlope. Ha Moisés ojapo kuri upéva hetaiterei áñore (Éx. 33:11; Deut. 34:9). Upéva ári jey, oĩ vaʼekue avei Israélpe heta kuimbaʼe ikatupyrýva odirihi hag̃ua pe puévlope. Ha umívape oñemoĩ vaʼekue omoakã hag̃ua umi “grúpo de 1.000, de 100, de 50 ha de 10” (Deut. 1:15). Jahechaháicha, Jehová okuida porã vaʼekue la ipuévlo rehe. Upeichaite oiko vaʼekue avei Elías tiémpope. Hetaiterei áñore, haʼe oipytyvõ vaʼekue umi israelítape oadora hag̃ua Jehovápe haʼe oipotaháicha. Péro ohasa rire un tiémpo, Jehová heʼi vaʼekue chupe oho hag̃ua oservi Judápe sur gotyo (2 Rey. 2:1; 2 Crón. 21:12). Elías oho rire oservi ótro lugárpe, ¿mbaʼépa oiko raʼe pe rréino de 10 trívugui oĩva nórte gotyo? ¿Hesaráipa chuguikuéra Jehová? Nahániri. Heta áñore Elías ombokatupyrýma voi kuri oikóvo Eliséope. Ha avei oĩ vaʼekue umi “proféta raʼy”. Koʼãva posívlemente oñemondo vaʼekue voi peteĩ eskuéla joguahápe, oñembokatupyryhápe umi profétape (2 Rey. 2:7). Jahechaháicha, siémpre oĩ vaʼekue kuimbaʼe ikatupyrýva ogia vaʼerã Jehová puévlope. Upéicha Jehová volunta osegi oñekumpli ha upe aja ojekuida porã avei isiervokuérare.

13. ¿Mbaʼépa oasegura ñandéve Hebreos 13:5b? (Ehecha pe taʼanga).

¹³ Jahechávo entéro koʼã mbaʼe, ¿mbaʼépa nde ere oikotaha Jehová siervokuéragui umi unhído ohopa vove yvágape? Jahechaháicha la Biblia oasegura Jehová núnka ndohejamoʼãiha haʼeño isiervokuérape ko yvy ape  ári (elee Hebreos 13:5b). Ojapo haguéicha Moisés ha Elías, pe grúpo de unhído odirihíva koʼág̃a Jehová puévlope, ohechakuaa iñimportantetereiha ombokatupyry ótrope. Upévare pe Kuérpo Governánte are guivéma ombokatupyry oikóvo unos kuánto kuimbaʼépe oĩva umi ótro ovechakuéra apytépe. Por ehémplo, oorganisa hikuái umi eskuéla oñembokatupyryhápe ansianokuérape, superintendénte de sirkuítope, umi oservívape umi komite de sukursálpe, umi superintendénte de Betélpe ha hetave ermánope. Avei umi oĩva pe Kuérpo Governántepe ombokatupyry unos kuánto ermánope oservi hag̃ua kómo ajudánte umi komite orekóvape pe Kuérpo Governánte. Koʼã ajudánte oreko hetaiterei rresponsavilida ha ojapo porãiterei hembiapo. Upévare ndajadudái haʼekuéra oĩmaha preparádo osegi hag̃ua okuida Cristo ovechakuérare umi unhído ohopa vove yvágape.

14. ¿Mbaʼe iñimportántevapa ñaaprende?

¹⁴ Ñaanalisávo entéro koʼã mbaʼe, ñaaprende peteĩ mbaʼe iñimportantetereíva: Opa potávo pe jehasa asy guasu ha umi unhído ohopa vove yvágape, Jehová puévlo osegíta ifiél ha oadora chupe ko yvy ape ári. Jesús, ñande Líder, ñanepytyvõ rupi ndajaguevimoʼãi ni michĩmi. Jaikuaaháicha, upe tiémpope Gog de Magog haʼéva peteĩ grúpo de nasión oatakáta Ñandejára puévlope (Ezeq. 38:​18-20). Péro upe atáke sapyʼaitemítante ha nosẽporãmoʼãi. Ndaikatumoʼãi ojoko hikuái Jehová puévlope osegi hag̃ua oadora chupe. ¡Ndajadudái Jehová osalvataha isiervokuérape! Peteĩ visión rupive, apóstol Juan ohecha pe “aty guasu” haʼéva umi ótro ovechakuéra. Upéi ojeʼe chupe pe “aty guasu” osẽha “pe jehasa asy guasúgui” (Apoc. 7:​9, 14). Upévare ndajadudái ojesalvataha hikuái.

15, 16. Heʼiháicha Apocalipsis 17:​14, ¿mbaʼépa ojapóta umi unhído Armagedón aja ha mbaʼérepa ñanemokyreʼỹ upéva?

¹⁵ Péro ikatu oĩ oñeporandúva: “¿Mbaʼépa ojapóta umi unhído ohopa vove yvágape?”. La Biblia ohechauka porãiterei umi governánte ko yvy ape arigua oñorairõtaha pe “Ovecha Raʼy kóntrape”, péro haʼe oganáta chupekuéra.  ¿Mávapa oipytyvõta chupe ogana hag̃ua? La Biblia okontesta upéva heʼívo: ‘Umi iñeʼẽrendúva ha Ñandejára ohenói ha oelehi vaʼekue’ (elee Apocalipsis 17:14). ¿Mávapa hína koʼãva? Umi unhído orresusitámava yvágape. Upéicharõ pe último unhído oho vove yvágape, ág̃a opa potápe pe jehasa asy guasu, peteĩva umi asignasión primeroite orekótava hikuái haʼéta oñorairõ. ¡Ajépa impresionánte upéva! Umi unhído apytépe oĩ umi oñorairõkuaa vaʼekue oiko mboyve chugui Testígo, oĩ voi umi haʼe vaʼekue soldádo peteĩ ehérsitope. Péro oñepyrũ rire oservi Jehovápe naiviolentovéi ha oiko hikuái pyʼaguapýpe ótrondi (Gál. 5:22; 2 Tes. 3:16). Péro ohopaite rire yvágape, umi unhído omoirũta Jesucristo ha umi ánhelpe oñorairõ hag̃ua pe última gérrape Ñandejára enemigokuéra kóntrape.

¹⁶ Ñapensamína ko mbaʼére: Umi unhído oĩva ko yvy ape ári apytépe oĩ umi ijedámava ha naimbaretevéimava. Péro oho vove hikuái yvágape ipoderosoitereíta, nomanomoʼãvéima ha oñorairõta hikuái ñande Rréi ipoderosoitéva Jesucristo ykére. Armagedón rire, oipytyvõta hikuái umi héntepe oiko hag̃ua chuguikuéra perfékto. Ndajadudái ni michĩmi umi unhído oipytyvõ porãvetaha iñermanokuérape yvága guive, opytánte rangue ko yvy ape ári peteĩ persóna imperféktaicha.

17. ¿Mbaʼérepa jaʼekuaa entéro Jehová siervokuéra ojesalvataha Armagedón ou vove?

¹⁷ Ha nde, ¿reimépa umi ótro ovecha apytépe? Upéicharõ, ¿mbaʼépa tekotevẽta rejapo Armagedón aja? Ndahasyiete la rejapo vaʼerã upe moménto iñimportantetévape: Ekonfia Jehováre ha esegi umi instruksión. Por ehémplo, posívlemente tekotevẽta jajapo la heʼíva Isaías 26:20: “Peike pende kotýpe, pemboty porã pene rokẽ. Pekañy sapyʼaite ohasa peve pe ára pochy”. Ajépa ñandepyʼaguapy jaikuaávo enterove Jehová siervokuéra, tahaʼe umi oĩva yvágape térã ko yvy ape ári, ojesalvataha upe tiémpope. Heʼi haguéicha apóstol Pablo, ñande ndajadudái “ni umi goviérno ikatúva ojapo, ni umi mbaʼe koʼág̃a oĩva koʼápe, ni umi mbaʼe oútava” ndaikatumoʼãiha “ñandepeʼa Ñandejára mborayhúgui” (Rom. 8:​38, 39). Aníkena núnka nderesarái: ¡Jehová nderayhueterei ha núnka nanderejamoʼãi!