1. ¿Ñongwane nitre dianinkä nänkäre kä kwinbiti ye jänäin jökrä kä kwinbiti?

 KIRABE, ni Jehová mikaka täte nämäne ngwentari jai: “¿Nitre kristiano diainkä nänkäre kä kwinbiti mrä ye ñongwane jänäin kä kwinbiti?” Kä ruäre te nitre dianinkä nänkäre kä kwinbiti ye täi kä tibienbätä aune rabaite nire rü Armagedón yebätä, ye bitikäre nünain kwe kä ruäre te kä mrä bä nuäre kä tibienbätä yete ye nütü nämäne. Akwa täräkwata Ni Mikaka Mokre 15 julio 2013 yete rababa gare nie, nitre dianinkä nänkäre kä kwinbiti ye jökrä näinna kä kwinbiti ye ngwane rü Armagedón kömikai (Mat. 24:31).

2. ¿Dre ngwantari raba nemen jai? ¿Dre rabai gare nie kukwe ja tötikara nebätä?

² Akwa ¿nitre “obeja mada” Kristokwe tä sribire Jehová kräke kä tibienbätä yebätä dre rabai bare “ja tare nikadi kri” näire? ye ngwantari raba nemen jai (Mat. 24:21; Juan 10:16). Nitre ruäre bätä kä jürä raba nemen, ja rabadre ruin nianinte aune kaibe ietre ñobätä ñan aune nitre dianinkä nänkäre kä kwinbiti ye ñan rabaira. Dre raba nitre mike töbike kore, ye ani mike gare jai kukwe namani bare ketebu yebätä. Arato ñan ja töibikadre yekäre kukwe tärä keta kabre rabai gare nie.

KUKWE NE ÑAN RABAI BARE

3, 4. ¿Kukwe meden ngwantari raba nitrekwe jai aune ñobätä?

³ Nitre dianinkä nänkäre kä kwinbiti ñan rabaira kä tibienbätä obeja mada mada ye jie ngwankäre ngwane niaratre yekwe kä mikaikä kukwe metre yebätä, ye nitre raba ngwentari jai. ¿Ñobätä? Kukwe ruäre abokänbätä töbikai kore nie raba. Kena ye abokän Sacerdote bäri Kri Jehoiadá, ni Ngöbö mikaka täte aune muko kwe Jehosabeat, niaratre Jehoás ngübabare  ye ngwane, dimikani kwe rei ja ngwanka metre aune töi kwin. Jehoiadá nämäne nire ngwane, Jehoás ja ngwani metre aune ñaka Jehová tuanimetre kwe. Akwa krütani ngwane, Jehoás jatani ja ngwen käme. Nitre príncipe töi käme ye kukwe nuani kwe aune Jehová tuanimetre kwe (2 Crón. 24:​2, 15-19).

⁴ Ketebukäre abokän, nitre kristiano siklo ketebu yebätä. Juan, ye apóstol mrä krütani, niara kukwe kwin bämikani nitre kristiano kwati käne aune dimikani kwe ja ngwen metre aune Jehová mike täte käre (3 Juan 4). Juan ja di ngwani ja mike kukwe apóstata ye rüere apóstol mada ja ngwanka metre nuainbare erere (1 Juan 2:18). Juan krütani bitikäre, bren tare tä neketekä nibätä erere, kukwe apóstata nebetaninkä kä jökräbiti tibien aune kä braibe te kukwe apóstata ye namani konkrekasion kristiana jökrä te.

5. ¿Dre ñaka nütüdre kukwe namani bare ketebu nebätä?

⁵ Nitre dianinkä jänäina jökrä kä kwinbiti ye ngwane, ¿ye erere rabai bare obeja mada kristokwe yebätä? ¿O kä mikaikä kwe Jehovabätä Jehoás erere? ¿Nitre kristiano siklo ketebukäre ja mikani apóstata ye erere rabai bare bätätre? ¡Ñakare jire! Nitre kristiano dianinkä nänkäre kä kwinbiti ñan rabaira kä tibienbätä, akwa obeja mada käkwe ja ngwandi metre ngwane, ngübadi kwin. ¿Ñokänti gare nie?

KUKWE METRE YE ÑAN MIKAI KÄME

6. ¿Drebätä ni bike ja kite bäri nguseta?

⁶ Kukwe tare ben nikwe ja tuadi ja känenkäre, akwa kukwe metre ye ñaka mikai käme, ¿ñokänti gare nie? Ñobätä ñan aune Biblia tä mike gare, ja ngwan nämäne ño nitre israelita näire aune nitre kristiano siklo kena näire ye ñaka ja erebe kä kä nengwane yebe. Ani kukwe ketamä ne mike gare bäri nguseta jai: 1) nitre israelita kira näire, 2) nitre apóstol krütani bitikäre näire aune 3) “jondron jökrä ükaite aune mikaita kwin näire ” ye abokän ni näire gärätä (Hech. 3:21).

7. ¿Rei aune nitre juta Israel käkwe kukwe käme nuainbare ye ñobätä ñaka rabadre nitre israelita ja ngwanka metre ye di gainkä?

⁷ Nitre israelita kira näire. Kä namanina braibe Moisés krütadre ngwane, kukwe ne niebare kwe nitre israelita ie: “Ti krütai bitikäre, mun ja ngwain käme krubäte, aune ji medenbti mun rikadre ti driebare munye, yebätä mun kä mikaikä gare tie” (Deut. 31:29). Arato niebare kwe, ñan ja mikai täte kwetre ngwane, juaintari juta yebätä mento (Deut. 28:​35, 36). ¿Moisés kukwe niebare ye namani bare? Jän. Nitre rei israelita ja töi mikani ñaka Jehová mike täte kä kwati krubäte te, aune nitre juta yete ja ngwanbare erere. Yebätä Jehovakwe mikani ja ngie nuin, aune ñaka nitre israelita mada mikani reire kwe (Ezeq. 21:​25-27). Kukwe niebare ye namani bare metre, ye nitre israelita ja ngwanka metre dimikani krubäte (Is. 55:​10, 11).

8. ¿Nitre kristiano konkrekasion siklo ketebukäre nikani ji blobiti ye ñobätä ñaka ni töi mikadre niä?

⁸ Nitre apóstol krütani bitikäre näire. Konkrekasion kristiana siklo ketebu ye nikani ji blobiti, ye ñaka ni töi mikadre niä. ¿Ñobätä? Nitre kwati krubäte käkwe ja ngwain apóstata, niebare Jesukwe (Mat. 7:​21-23; 13:​24-30, 36-43). Kukwe apóstata bätä Jesukwe blitabare ye kömikanina siklo kena ye ngwane ye apóstol Pablo, Pedro aune Juan käkwe mikani gare (2 Tes. 2:​3, 7; 2 Ped. 2:1; 1 Juan 2:18). Apóstol mrä krütani ye bitikäre, nitre kristiano apóstata ye namani Babilonia Kri ye ngätäite. Kukwe rakaikä niebare, erere namani bare.

9. ¿Párrafo käne känti blitani kä ketebubätä ye ñobätä ñaka ja erebe kä näire nita nüne nebe?

⁹ “Jondron jökrä ükaite aune mikaita kwin  näire” Nitre Israel kira näire aune nitre kristiano siklo ketebukäre känti kukwe apóstata namani konkrekasion jökrä te ye ñaka ja erebe kä ni näire yebe. Kä näire nita nüne, ¿ne kädekata ño? Kädekata “kä krüte” näire nita nüne (2 Tim. 3:1). Akwa kä, ne bäri nga aune ütiäte kömikai Biblia tä mike gare. Ne abokän kädekata ‘jändrän jökrä üketeta kuin amne mikaita kuin’ näire (Hech. 3:21). Kömikani 1914 ngwane, aune mikai krüte kä tibien ükaite bä nuäre ngwane, gobran Jesukwe yete, aune nitre rabaira töi metre gobran Jesukwe yete ngwane. Kä 1914 yete ¿dre ükaninte Jehovakwe? Jesús namani reire kä kwinbiti, yebiti Jehovakwe ni iti rei David mräkäkri mikani gobrane bobukäre. Ye bitikäre kä nikani ruäre ta ngwane, kukwe metre ye ükate jataninta (Is. 2:​2-4; Ezeq. 11:​17-20). ¿Kukwe metre ye mikaita käme?

10. a) ¿Kukwe metre mikata täte ni näire yebätä Biblia tä dre mike gare? (Isaías 54:17). b) ¿Kukwe rabai bare mikata gare Isaias bätä ye ñobätä tä ni dimike?

¹⁰ (Ñäkädre Isaías 54:17 yebätä). a “Jondron keta kabre rükäre ye kaikä mä rüere akwa kukwe tare ñaka nuaindi mäbätä”, nieta profeciabätä ne mike ñärärä. Ye tä nemen bare. Arato kukwe ne tä nemen bare kä nengwane: “Aune monsotre munkwe ye jökrä Jehovakwe tötikai, aune monsotre munkwe rabai nüne jäme krubäte. Kukwe metre ye ererebätä mä nünandikä dite. […] kukwe ñaka raba kä jurä mike jire chi mäbätä aune jondron ñaka kwain jire mä ngwankäre nikenkä ñobätä ñan aune ñaka rökrai mä ken” (Is. 54:​13, 14). Satana tä “ngöböre kä nebätä” ye ñaka raba juta Ngöbökwe tä nitre tötike Bibliabätä ye ketebätä jire chi (2 Cor. 4:4). Kukwe metre ye ükaninteta ¡ñaka mikaita käme jire! jondron keta kabre rükäre ye, kaikä mä rüere akwa kukwe tare ñaka nuaindi mäbätä.

KUKWE NE ABRÄ RABAI BARE

11. ¿Nitre dianinkä nänkäre kä kwinbiti ñan rabaira kä tibienbätä, akwa nitre kwati ja ngwanka metre ñaka täi kaibe ñokänti gare nie?

¹¹ Nitre dianinkä nänkäre kä kwinbiti ye jökrä näina kä kwinbiti ngwane, ¿dre abrä rabai bare? Jesús konkrekasion jie ngwanka aune ni jie ngwanka ye ngwandre törö jai. Niara kukwe ne niebare: “Mun Jie Ngwanka ye abrä itibe, ye abokän Kristo” (Mat. 23:10). Rei nikwe  ie nita ngübadre, ye ñaka ni tuainmetre jire chi. Monso Jehovakwe tä ni jie ngwen yebätä nitre kristiano täi kä tibienbätä ye ñaka kä jürä ngwandre jire chi jabätä. Ye ngwane, Jesukwe dre nuaindi juta Ngöbökwe kräke ñan gare nie. Akwa kukwe ruäre tä Bibliabätä abokän raba ni töi mike jäme. Ye ani mike gare jai.

12. a) ¿Moisés krütani ye bitikäre Jehovakwe juta ngübabare ño? b) ¿Elías nikani kä mada känti ngwane, nuainbare ño kwe? (Üai mikadre ñärärä).

¹² Juta Ngöbökwe ie kä käbämikani känti jämi nemen ngwane, Moisés krütani. Ye bitikäre, ¿dre namani bare bätätre? Moisés krütani yebätä, ¿niaratre namani ngwarbe aune kaibe? Ja ngwani metre Jehovai kwetre ngwane, Jehová nämäne bentre aisete ñan nämäne kaibe. Ñodre, Josué juta kwe jie ngwain Jehová niebare Moisés ie krütadre känenkri, aune kä kwati te Moisés nämänena Josué tötike (Éx. 33:11; Deut. 34:9). Ne madakäre, nitre brare ie kukwe gare nämäne juta jie ngwen siba, ñodre: Nitre ji ngwanka nitre milkwe, nitre cienkwe, nitre cincuentakwe aune nitre ni jätäkwe (Deut. 1:15). Käre juta Ngöbökwe nämäne ngibiabare kwin. Arato Eliasbätä kukwe namani bare yebätä ñäkä raba. Kä kwati te israel jie ngwani kwe aune dimikani kwe ja kete kwin Jehovabe. Akwa bati Jehovakwe niara juani kä bäri mötörikri kä Judá känti (2 Rey. 2:1; 2 Crón. 21:12). ¿Nitre juta keta jätä israel ja ngwanka metre ye ñaka jie ngwan namanina?, Ñakare, Elías, Eliseo kitani ne kwe rabadre juta ye jie ngwen. Ne madakäre, “ni Ngöbö kukwei niekä monsoi” nämänena dimikakäre, monsotre ne kita nämäne kwela ruäre te (2 Rey. 2:7). Nitre ja ngwanka metre Jehovai käkwe juta kwe jie ngwani käre. Aisete Jehová ja töi mikani nemen bare jankunu, aune nitre ja ngwanka metre kriemikani kwe.

13. ¿Hebreos 13:5b yekänti dre käbämikata? (Üai mikadre ñärärä).

¹³ Kukwe namani bare kädrieta Bibliabätä bätä mätä töbike ngwane, nitre dianinkä nänkäre kä kwinbiti ye jökrä jänäin kä kwinbiti ngwane, ¿dre rabai bare ruin mäi? Ñaka töbikadre krubäte kukwe yebätä, ñobätä ñan aune ni Jehová mikaka täte, ye ñaka tuainmetre jire kaibe kwe käbämikata kwe (Ñäkädre Hebreos 13:5b yebätä). Moisés aune Elías erere, nitre kristiano braibe dianinkä nänkäre kä kwinbiti tä juta Jehovakwe jie ngwen, ye ie gare nitre mada tötikadre ye ütiäte. Kä nikanina kwati ta yete Nitre Braibe Konkrekasion Jökrä Ngübabitikä, ye tä ja mräkätre  tä obeja mada ngätäite ye tötike, ne kwe kukwe drie ye jie ngwandre kwin kwetre. Ñodre kwela sribebare, nitre umbre ji ngwanka konkrekasionte, nitre circuito tuabitikä, nitre Comité Sukursalkwe aune nitre superintendente Betelte ye kräke, aune nitre mada ye kräke. Ne madakäre, Nitre Braibe Konkrekasion Jökrä Ngübabitikä ye tä ja mräkätre itire itire tötike kwin ne kwe rabadre dimike comité yete. Aune nitre ne tä sribi keta kabre ye nuainne kwin. Ne madakäre tä juto biare obeja Kristokwe jie ngwankäre ye bämikanina kwetre.

14. ¿Kukwe ütiäte meden nüke gare nie?

¹⁴ Kukwe ja tötikara nekänti kukwe bäri ütiäte nibi gare nie: Ye abokän nitre dianinkä jänäina kä kwinbiti ja tare nikadi kri bitikäre nitre Jehová mikaka täte kä tibienbätä ye täi mike täte jankunu. Jesús täi ji ngwen köböire ni Jehová mikaka täte niara mikadi täte jankunu, aune ñaka ja töi kwitai kwetre. Juta ja mikai ni Jehová mikaka täte rüere ye Biblia tä kädeke Gog kite kä Magog yekri (Ezeq. 38:​18-20). Juta käkwe ja mikadi ni Jehová mikaka täte rüere, ye ñan nuai raire aune ñan ganain kwe. Juta Ngöbökwe täi Jehová mike täte ye ñaka juain ngwarbe jire. Ñobätä ñan aune Jehovakwe mikai kwäre. Kukwe mikani tuare Juan ie, känti nitre kwati obeja mada Kristokwe tuani Juankwe aune “nitre obeja kwati” ye abokän namaninte kwäre “ja tare nikani kri” yebätä. Ye tä mike gare Jehová ara käkwe mikai kwäre (Apoc. 7:​9, 14).

15, 16. Apocalipsis 17:14 tä niere erere ¿nitre dianinkä nänkäre kä kwinbiti dre nuaindi rü Armagedón näire?, ¿Kukwe ne tädre gare nie ye ñobätä tä ni dimike?

¹⁵ Kukwe keteite abokän jämi gare nie: Nitre dianinkä nänkäre kä kwinbiti ye näina jökrä kä kwinbiti ngwane, ¿Dre nuaindi kwetre? Biblia tä mike gare mrebe nie, nitre político käkwe rüdi “ni Kordero kwrere” ben, akwa “ni Kordero kwrere” käkwe ganandi. ¿Nire dimikai ganane?, bersikulo tä mike gare: “nitre käräbare Ngöbökwe dianinkä jakrä” ye abokän nitre dianinkä nänkäre kä kwinbiti gaikröta gärätä (Ñäkädre Apocalipsis 17:14 yebätä). Aisete nitre kristiano  dianinkä nänkäre kä kwinbiti ye jökrä rabaira kä kwinbiti ngwane, niaratre ye ruäre käkwe sribi kena nuaindi, ye abokän rüdi kwetre. ¡Sribi ütiäte biain ietre! Akwa niaratre ruäre ye jämi ja mike testiko ngwane, töi nämäne ja metabätä, ruäre nämäne rüre aune ja ngwen blo. akwa ye tuanimetre jökrä kwetre aune töi namani jäme (Gál. 5:22; 2 Tes. 3:16). Nitre dianinkä nänkäre kä kwinbiti rabaira jökrä kä kwinbiti ye ngwane, niaratre angeletre aune Kristo käkwe rüdi nitre ja mikaka Ngöbö rüere yebe, rü kri gaikä ye ngwane.

¹⁶ Töbike kukwe nebätä: Nitre dianinkä nänkäre kä kwinbiti tätre kä tibienbätä ye ruäre niena umbre aune di näkäinte. Akwa rabaira kä kwinbiti ngwane, rabai üaire aune dite bätä ñan krütai jire, arato rüdi kwetre Rei Jesukristo ben rüe yebe. Rü Armagedón, bitikäre nitre kä tibienbätä dimikai kwe nemen töi metre. Niaratre rabaira kä kwinbiti üaire ngwane, ja mräkätre tare kwetre töi ngite tä kä tibienbätä dimikai bäri kwetre.

17. ¿Rü Armagedón näire ni Jehová mikaka täte rabai kwäre ye ñokänti gare nie?

¹⁷ ¿Mä obeja mada? ¿Erere ngwane, dre nuaindi mäkwe rü kri Armagedón rabai bare näire? Kukwe ne aibe nuaindre: Tö ngwen kwatibe Jehovai aune kukwe biandi kwe ja jie ngwankäre ye mikadre täte. Arato kukwe nieta Isaías 26:20 mikadre täte, yete nieta: “Mun rika cuarto munkwe ye teri, aune munkwe jukwe dika jabiti. Munkwe ja üka ken yete nememe ti töita rubun näin ta ye ngwane”. Nitre Jehová mikaka täte täi kriemikani kwin, kä kwinbiti aune kä tibienbätä ye tä ni töi mike jäme. Pablo niebare erere ‘gobran, jondron nengwane, jondron tä rakakakäre aune ni jökrä ñan raba nita Ngöbö tarere ye denkä nikän’ (Rom. 8:​38, 39). Ñaka kukwe ne käi kwitaka jabiti: Mä tare Jehovakwe aune ñaka mä tuainmetre kaibe kwe.