1. Mangochi abashigwa boshi baja embingu?

 HAMAGERA myaka minene ey’abantu ba Yehova bali bachibaza ntya: ‘Mangochi Abakristu bashigwa bazinda nji baj’embingu?’ Rhwaliri rhwawaza okw’Abakristu baguma bashigwa balikwanene kuyorha oku gulu, n’okulama omu paradizo enyuma w’evita lye Armagedoni. Aliko omu Munara g’Omulanzi g’okuyiga gwa Siku 15 Mwezi gwa 7, 2013, rhwaliyigire oku embere evita lye Armagedoni lirhondere, abashigwa boshi nji baba eyi bajire embingu.—Mt. 24:31.

2. Chibazo chihe rhwakachibaza, na bichi rhwaganirako mu gunola mwazi?

² Aliko, baguma mu rhwewe bakachibaza ntya: Bichi nji byahikira “ezindi ntama” za Kristu nji zaba zili zakolera Yehova oku bwimana oku gulu amango “m’amalibuko makulu”? (Yoh. 10:16; Mt. 24:21) Baguma b’omu zindi ntama nkabaga bakayubaha bichi nji bajira amango bene-berhu na bali-berhu bashigwa nji baba bamaja omu mbingu. Lekaga rhuganire ku mifano 2 eli omu Biblia yakarhuma bawaza ntyo. Kandi rhwaganira oku zindi mpanvu ziyerekene bulagurhe barhakwanene kuyubaha.

BICHI BIRHAKAHIKIRA EZINDI NTAMA?

3-4. Bichi bantu baguma bakachibaza, na bulagurhe?

³ Baguma bakayubaha okw’ezindi ntama nji zaleka kukolera Yehova amango bene-berhu bashigwa be Baraza Lirhambwire nji baba barhachiliho yibabayerekeza. Nkabaga bakachiyunva ntyo eju y’engani ziguma zili omu Biblia. Lekaga rhuganire ku mifano ebiri. Omufano g’oburhanzi guli g’Omudahwa Mukulu Yehoyada. Aliri mukozi mwimana wa Mungu. Yewe na mukage Yehoshabeati balilangire omwana w’obusole Yehoashi banamurhabala abe mwami mwinja na mwimana. Omu myaka yoshi y’obushaja ya Yehoyada, Yehoashi aliri aharamya Yehova analiri  ajira ebintu binja. Aliko Yehoyada aber’afa, Yehoashi arhondera kujira ebintu bibi. Ayunviriza abarhwali babi analeka Yehova.—2 Ny. 24:2, 15-19.

⁴ Omufano gwa kabiri guderhere Abakristu balilamire enyuma w’amango m’entumwa. Entumwa y’obuzinda y’afaga, ali Yohana. Amango moshi alilamire, alirhabere Bakristu banene bayorhe bemana emwa Yehova. (3 Yo. 4) Kuguma n’okw’ezindi ntumwa za Yesu zajiraga, Yohana alikolere bwenene omu kulanga ebibaga kubuli yeshi waliri wayigiriza emyazi y’obubeshi n’okujira ebintu bibi. (1 Yo. 2:18; olole amahugulo m’okuyiga ma 2 Watesalonike 2:7) Aliko amango Yohana afa, banene omu bibaga barhondera kukulikira enyigirizo z’ebigamba. Omu myaka yakulikiragaho, ebyola bigamba by’obwemere byaliyigirize myazi minene y’obubeshi n’okurhuma abantu bagwarha olugenzi lubi omu bibaga byoshi.

5. Bichi rhurhakwanene kuderha oku bilolere eyila mifano ebiri?

⁵ K’eyola mifano ebiri ye Biblia eyerekene oku ebintu bili nk’ebyola nji byahikira ezindi ntama za Kristu amango abashigwa nji baba bamaja embingu? Mw’agola mango Abakristu bemana nji baba bali oku gulu, nji baleka ebi bayigire nk’oku Yehoashi ajiraga, changwa nji baba bigamba nk’oku Bakristu baguma bajiraga omu mango m’entumwa? Ejibu ali nanga! Rhwakachizera okw’amango Abakristu bashigwa barhenga oku gulu, ezindi ntama nji zagenderera kuharamya Yehova omu njira nyinja n’okugenderera kushishikalwa. Bulagurhe rhwakachizera ntyo?

AMANGO MOSHI ABANTU BA YEHOVA NJI BAGENDERERA KUMUHARAMYA OMU NJIRA ALONZEZE

6. Bihe 3 bihe rhwaganirako oku bugeke?

⁶ Bulagurhe rhukwanene kuchizera ok’obuharamye b’okuli burhakaja mw’enyigirizo z’obubeshi chiro n’omu mango m’ebihe bikomere bili embere zerhu? Bulala Ebiblia efasiriye oku binola bihe rhulamiremo bilekene bwenene n’echihe ch’Abaizraeli, n’amango m’enyuma w’okufa kw’entumwa. Bobola, leka rhuganire oku bunene ku bihe bisharhu: 1) Echihe ch’Abaizraeli ba mira, 2) echihe ch’enyuma y’okufa kw’entumwa, 3) n’omu mango merhu, “echihe ch’okushuba kugalula buhyahya ebintu byoshi.”—Mdo. 3:21.

7. Bulagurhe Abaizraeli bemana, barhalikwanene kuheza obulangalire amango abami n’abandi bantu banene bachishoga kujira amabi?

⁷ Echihe ch’Abaizraeli ba mira. Bisanzi bigeke embere Musa afe, alibwirire Abaizraeli ntya: “Imenyere bwinja okw’enyuma w’olufu lwani, kweri mwakola ebintu bibi n’okuleka enjira nababwirire mukulikire.” (Kum. 31:29) Musa kandi abaga akengusize Abaizraeli oku bakachijira bigamba, bakahekerwe buhungiro. (Kum. 28:35, 36) Ebyola binwa byaliyinjire kuyenera si? Nechi. Omu magana m’emyaka, bami banene balijirire ebintu bibi omu mesho ma Yehova, n’abantu babakulikira omu mparamyo z’obubeshi. Eju y’echola, Yehova ahana abantu babi b’olubaga lwe Izraeli lurhalikengere, arhanachizigaga abami be Izraeli barhambula. (Eze. 21:25-27) Amango babona gurhe ebi Mungu abaga aderhere byayenera, ebyola byabaha obushiru b’okumukolera oku bwimana.—Isa. 55:10, 11.

8. Rhwakasomerwa si okuyunva okw’echibaga ch’omu kagana ka kabiri chalijire mw’enyigirizo z’obubeshi? Fasiriya.

⁸ Echihe ch’enyuma w’okufa kw’entumwa. Echola chakarhusomeza si okuyunva okw’echibaga ch’Echikristu chalijire mw’enyigirizo z’obubeshi enyuma w’okufa kw’entumwa? Nanga habanakatyu. Yesu abaga alebere oku hakabere obugamba bunene b’obwemere. (Mt. 7:21-23; 13:24-30, 36-43) Entumwa Paulo, Petro na Yohana boshi baliyemerere bwinja bwinja  ok’obulebi bwa Yesu bwarhonderaga kuyenera omu kagana k’aburhanzi N.K.Y. (2 Te. 2:3, 7; 2 Pe. 2:1; 1 Yo. 2:18) Bisanzi bigeke enyuma w’okufa kw’entumwa y’obuzinda, Abakristu b’ebigamba baba chigabi cha Babiloni Mukulu, k’okuderha amadini moshi m’obubeshi m’omugulu lyoshi. Kandi ahola, ebi Yesu abaga alebere byayenera.

9. Nka gurhe echihe rhulamiremo chilekene n’echihe ch’Abaizraeli bamira n’echibaga ch’Echikristu ch’omu kagana ka kabiri?

⁹ “Echihe ch’okushuba kugalula buhyahya ebintu byoshi.” Echihe rhulamiremo chilekene n’ech’Abaizraeli ba mira, n’ech’amango m’obugamba bunene bwabaga omu kagana ka kabiri N.K.Y. Gurhe chinola chihe cherhu chiyirikirwe? Rhunazigana kuchiyirika “siku z’obuzinda” za linola gulu libi. (2 Ti. 3:1) Aliko, Ebiblia eyerekene okw’echihe chinja bwenene chinalehere, charhondere omu siku zizinda zenazinola. Chanagenderera kuhika amango Obwami bwa Masiya nji bwaba bwajirire abantu bashinganyanya n’okuhindamula egulu libe paradizo. Echola chihe chiyirikirwe, “chihe ch’okushuba kugalula buhyahya ebintu byoshi.” (Mdo. 3:21) Charhonderaga omu mwaka gwa 1914. Bindi bichi byagalwirwe bihyahya? Ech’okusimisa Yesu ashimikwa nka Mwami omu mbingu. Bobola Yehova aba eyi kandi amapata omurhegesi oyerekene oburhwali bwage, omuntu w’okurhegeka ahali h’omwami mwimana Daudi. Aliko, arhali obola bwami bonyine bu Yehova agalwire buhyahya. Enyuma wabisanzi bigeke, Yehova alirhabere abakozi bage oku gulu bamuharamye kandi omu njira alilonzeze bamuharamyemo! (Isa. 2:2-4; Eze. 11:17-20) Ka nji rhwashuba kushumikwa n’enyigirizo z’obubeshi si?

10. a) Bichi Ebiblia yali lebere oku bilolere obuharamye b’okuli na mu manola mango merhu? (Isaya 54:17) b) Bulagurhe obulebi buli nk’obola buli bwakuchizera?

¹⁰ Osome Isaya 54:17. Rhuwaze k’obula bulebi: “Entwaro yoshi yoshi yekolwe eju yawe ntacho nji yajira”! Ebyola binwa birongwezwe yibyayenera mu zinola siku. Ebila binwa bikulikire by’okuheba omurhima, yibyayenera kandi na muchinola chihe cherhu: “Bagala bawe boshi nji bayigirizwa na Yehova n’omurhula gwa bagala bawe nji gwaba gunene. Nji wayorha buzira kushaganyika omu kunali. . . . Ntacho nji wayubaha orhakanagwarha empanvu y’okugwarha obuba, bulala birhakakuyegera.” (Isa. 54:13, 14) Chiro na Shetani “mungu walinola gulu libi,” arhakagala kuyumanza akasi abantu ba Yehova bali bajira k’okuyigiriza abandi eju ya Yehova. (2 Ko. 4:4) Obuharamye buchere bwagalwirwe burhakanachifa bwajire mw’enyigirizo z’obubeshi habanakatyu. Obuharamye  b’okuli buliho zene, bwagenderera kubaho esiku n’amango. Entwaro yoshi yoshi nji yakolwa eju yerhu ntacho nji yajira!

BICHI NJI BYABA?

11. Bichi birhuyemezeze okw’abantu kamama (chigusho chinene) barhakalekererwa amango abashigwa nji baba bamagenda embingu?

¹¹ Bichi nji byaba amango abashigwa nji baja embingu? Oyibuke, oku Yesu ye Mungeri werhu. Yewe y’erhwe ly’echibaga ch’Echikristu. Yesu aderhere ntya bwinja bwinja: “Omurongozi wenyu ali muguma, Kristu.” (Mt. 23:10) Yesu oli warhambula omu mbingu, amango moshi ashishikala abanafunzi bage b’okuli. Bulala Kristu yeli warhegeka abanafunzi bage hanola oku gulu, ntacho bakwanene kuyubaha. Nechi, rhurhamenyere bintu binene oku bilolere okuntu Kristu nj’arongoza abantu bage mw’echola chihe. Bobola rhuganire ku mifano miguma eli omu Biblia yakarhuyemeeza.

12. Gurhe Yehova alishishikere abantu bage a) amango Musa amala kufa? b) amango Eliya ahabwa eyindi ngabane? (Olole n’efoto.)

¹² Abaizraeli bajaga omu Chihugo Chilaganano eyi Musa abaga afire. Bichi byalihikire abantu ba Mungu? Alilekere kugenderera kurhabala abantu bage amango omukozi wage mwimana afa si? Nanga. Amango moshi bali genderere kuyorha bemana, Yehova aliri abashishikala. Embere Musa afe, Yehova alimubwirire okw’ahe Yoshua engabane y’okuyerekeza abantu bage. Musa amalire myaka minene ey’ali akoomeza Yoshua. (Kut. 33:11; Kum. 34:9) Kandi haliri bandi balume banene baligwerhe obuhashe b’okurongoza, k’okuderha abakulu b’ebihumbi, b’amagana, b’amakumi marhano na chiro ab’amakumi. (Kum. 1:15) Abantu ba Mungu baliri bashishikalwa bwinja. Rhugwerhe omufano gwa Eliya. Alikolere n’obushiru mu myaka minene omu kurhabala Abaizraeli bakolere Yehova. Aliko, hagera amandi mango Yehova ashuba kumurhuma omu yindi ngabane elekene n’eyola omu Yuda. (2 Fa. 2:1; 2 Ny. 21:12) Abantu bemana b’omu buko ekumi bw’Abaizraeli balilekererwe si? Nanga. Eliya abaga amakoomeza Elisha mu myaka minene. Haliri “n’abagala b’abalebi,” baliri bakoomezwa. (2 Fa. 2:7) Bobola, haliri balume banene bemana bakagalire kurhabala kuyerekeza abantu ba Mungu. Yehova aligenderere kuyeneza omuhigo gwage ey’anali ashishikala abakozi bage bemana.

13. Bichi Yehova arhulaganyize omu lwandiko lwa Waebrania 13:5b? (Olole n’efoto.)

¹³ Ok’onagwerhe eyola mifano yoshi omu bwenge, bichi owazize oku nji byarhengerera amango abashigwa bazinda nji baba bamaja embingu? Nta mpanvu rhugwerhe z’okushiba  rhwachibaza echola chibazo. Ebiblia eyerekene obukweri buyorohere, bunarhuyemezeze ntya: Yehova arhakalekerera haba n’eliguma abantu bage bali oku gulu. (Osome Waebrania 13:5b.) Kuguma na Musa na Eliya, echigusho chigeke ch’Abakristu bashigwa bali bayerekeza zene, bamenyere akachiro k’okukoomeza abandi. Omu magana m’emyaka bene-berhu b’omu Baraza Lirhambwire bakoomeze bene-berhu b’omuzindi ntama okuntu bakayerekeza. Omufano, bahebere amasomo manene m’okukoomeza abashamuka b’ebibaga, abemangizi b’emizunguluko, bene-berhu b’omu Komite Y’emirhabi, abemangizi oku Beteli, n’abandi. Ebaraza Lirhambwire lyowe lyonyine lyahwanzize kukoomeza abagwasi omu komite zoshi ze Baraza Lirhambwire. Abola bagwasi bemana bali bakola ngabane zinene bwenene omu lubaga lwa Yehova. Bali barheganywa bwinja yibagenderera kukola akasi k’okushishikala entama za Kristu abashigwa bamala kuja embingu.

14. Ewazo likulu lya gunola mwazi gwerhu liri lihe?

¹⁴ Ewazo likulu lya gunola mwazi rhuli rhwaganirako lye linola: Amango Abakristu bashigwa bayorhere nji baba bamaja embingu hofi n’obuzinda bw’amalibuko makulu, abantu ba Yehova hanola oku gulu nji bagenderera kumuharamya oku bwimana. Kugerera obwerekezi bwa Yesu Kristu, abakozi ba Mungu ntacho nji babula. Omu kuderha okuli, rhumenyere oku mw’akola kasanzi echigusho ch’amashanja, Ebiblia eyirikire Gogu w’omu Chihugo cha Magogu, nji charhera abantu ba Mungu. (Eze. 38:18-20) Aliko, rhumenyere oku echola chirhero cha bisanzi bigeke ntacho nji chahikako; chirhakabuza abantu ba Mungu kugenderera kuharamya Yehova. Rhuchizerere kweri oku nji rhwayokolwa! Omu chibonekezi, entumwa Yohana alibwene “bantu kamama” b’omu zindi ntama za Kristu. Babwira Yohana okw’abola “bantu kamama” abwene barhengere “omu malibuko makulu.” (Ufu. 7:9, 14) Bobola, rhumenyere bwinja oku Yehova nj’abayokola!

15-16. Nk’ok’olwandiko lwa Ufunuo 17:14 luderhere, bichi Abakristu bashigwa nji bajira amango m’evita lye Armagedoni, na bulagurhe ebyola bihebere omurhima?

¹⁵ Aliko, baguma bakachibaza ntya: ‘Bichi abashigwa nji baja bajira hanola nji bagera omu  mbingu?’ Ebiblia eshubize bwinja bwinja echola chibazo. Ederhere okw’eguvernema z’epolitike za linola gulu nji “zalwisa Omwana-buzi.” Rhuchizerere kweri oku nj’abahima. Ebiblia ederhere ntya: “Omwana-buzi nj’abahima.” Bande nji bamurhabala? Olola lwandiko lugwerhe ebishubizo kw’echola chibazo. Balala “ahamagere,” “abachishogere,” banali “bemana.” (Osome Ufunuo 17:14.) Babande abola? Bali bashigwa bafukire! Hofi oku buzinda bw’amalibuko makulu, abashigwa bayorhere nji bahekwa omu mbingu, nguma omu ngabane zabo z’oburhanzi kuli kulwa evita. Eyola ngabane eli y’akamaro bwenene! Baguma omu Bakristu bashigwa bagendaga balwa entambala barhaza kuba Bahamirizi ba Yehova. Abandi baliri basoda. Aliko enyuma waho, baba Bakristu b’okuli banayiga kujira omurhula haguma n’abandi. (Gal. 5:22; 2 Te. 3:16) Baleka kushigikira amavita. Aliko, hanola nji bamala kugera embingu, nji bakola haguma na Kristu na bamalaika bage bachesibwa, omu kulwa evita lizinda ly’okulwisa abanzi ba Mungu.

¹⁶ Waza kw’echila. Hanola oku gulu, Bakristu baguma bashigwa bakola bashaja, banazambire. Aliko, amango nji bafuuka n’okuja kulama embingu, nji baba bilemwa bye roho biherhe emisi, birhakanafa, n’okuyemera kulwa evita haguma n’Omwami-Muhimanyi, Yesu Kristu. Enyuma y’okumala kulwa evita lye Armagedoni, nji bakola haguma na Yesu omu kurhabala abantu babe bashinganyanya. Buzira ngangane, hanola abashigwa nji bagera embingu, nji bagala kurhabala bene-babo na bali-babo bali oku gulu bwenene loshi, kulusha okuntu baliri babarhabala amango baliri bantu barhashinganene hanola oku gulu!

17. Gurhe rhumenyere okw’abakozi boshi ba Mungu nji baba omu bulanzi amango m’evita lye Armagedoni?

¹⁷ Oli w’omu zindi ntama si? Akaba ntyo kubili bichi nji byakuhema ojire amango evita ly’akamaro lye Armagedoni nji lyarhondera? Ech’okwanene kujira chonyine: Ogwarhe obulangalire mu Yehova, onakulikire obwerekezi bwage. Ebyola bihebere mu bichi na bichi? Ebiblia eherhe ebinwa birhulirize biderhere ntya: “Muyingire omu byumba byenyu bya ndani, muchinge emilyango enyuma zenyu. Muchibishe mu bisanzi bigeke kugera ah’oburhe bwahwera.” (Isa. 26:20) Abakozi boshi bemana ba Mungu, b’omu mbingu n’oku gulu, nji baba omu bulanzi mw’agola mango. Kuguma n’entumwa Paulo, rhuchizerere oku mabe “marhegesi changwa echindi chintu choshi choshi chakarhengerera . . . chirhakafa charhukulire omu buzigire bwa Mungu.” (Ro. 8:38, 39) Amango moshi muyibuke oku: Yehova abazigire, arhakanafa abakabulire habanakantyu!