1. Horoa taudia be edena nega ai guba dekenai do idia daekau?

 LAGANI momo gunanai, Iehova ena taunimanima idia laloa, ‘Edena nega ai Keristani horoa orena taudia be guba dekenai do idia daekau?’ Guna ita laloa Aramagedono murinai, horoa taudia haida be tanobada Paradaisona ai do idia noho sisina. To July 15, 2013 ena Gima Kohorona amo ita diba, tanobada ai idia do noho horoa taudia be Aramagedono tuarina do lasi neganai, guba dekenai do idia daekau.—Mat. 24:31.

2. Momo be dahaka idia laloa bona inai atikol ai dahaka do ita herevalaia?

² To reana do ita henanadai: “Hisihisi badana” lalonai Keriso ena “mamoe ma haida,” mai abidadama ida Iehova idia hesiai henia taudia unai, dekenai dahaka do ia vara? (Ioa. 10:16; Mat. 24:21) Reana hari, haida do idia laloa horoa tadikaka bona taihu be guba dekenai idia daekau neganai, ta do ia noho lasi idia ia hakaua totona. Reana Baibel ai idia noho sivarai rua dainai unai bamona lalohadai idia abia, mani ita herevalaia. Bena do idia lalohekwarahi lasi ena badina do ita herevalaia.

DAHAKA DO IA VARA LASI?

3-4. Haida be dahaka do idia laloa bona dahaka dainai?

³ Haida idia laloa, mamoe ma haida be Iehova hesiai henia karana do idia hadokoa, bema Hakaua Oreana ena horoa tadikaka idia noho lasi, idia ia hakaua totona. Reana Baibel sivarai haida dainai, unai bamona lalohadai idia abia. Mani haheitalai rua ita herevalaia. Ginigunana be, hahelaga tauna badana Iehoiada. Ia be mai abidadama ida Iehova ia hesiai henia. Bona ena adavana Iehosebata ida, mero matamata Iehoasa idia gimaia bona idia durua, King namona ai ia lao totona. Iehoiada  ia mauri noho lalonai, Iehoasa ese Iehova ia tomadiho henia, bona gau namodia ia karaia. To Iehoiada ia mase murinai, Iehoasa be kara dika ia karaia matamaia. Ia be lohia taudia dikadia ia kamonai henia bona Iehova ia hesiai henia lasi.—2 Siv. 24:​2, 15-19.

⁴ Haheitalai iharuana be, aposetolo taudia edia nega murinai idia noho Keristani taudia. Aposetolo Ioane be aposetolo ginigabena, bona ia do mauri noho lalonai, Keristani taudia momo ia durua Iehova idia hesiai henia totona. (3 Ioa. 4) Iesu ena aposetolo taudia ma haida bamona, Ioane ia gaukara goada aposteit karadia amo kongrigeisen ia gimaia totona. (1 Ioa. 2:18; 2 Tes. 2:7) To Ioane ia mase murinai, kongrigeisen lalonai momo be aposteit taudia ai idia lao. Lagani haida murinai, unai aposteit taudia ese kongrigeisen momo lalonai lalohadai koikoidia bona kara kereredia idia hadibaia.

5. Unai sivarai rua amo dahaka ita dibaia?

⁵ Unai sivarai rua ese idia hahedinaraia horoa taudia be guba dekenai idia daekau murinai, Keriso ena mamoe ma haida dekenai unai bamona do ia vara, a? Unai nega ai, Keristani taudia be Iehoasa bamona, idia dibaia gaudia do idia dadaraia, eiava idaunegai Keristani taudia bamona aposteit taudia ai do idia lao, a? Haere be lasi! Ita diba momokani horoa taudia be tanobada idia rakatania murinai, mamoe ma haida be dala maorona ai Iehova do idia tomadiho henia bona idia do ia naria. Dahaka dainai unai ita abia dae momokani?

TOMADIHO MOMOKANI DO IA DIKA LASI

6. Edena negadia toi do ita herevalaia?

⁶ Dahaka dainai ita abia dae momokani, nega aukadia lalonai tomadiho momokani do ia dika lasi? Badina Baibel amo hari ita noho negana ita dibaia. Inai nega be idaunegai Israela taudia bona aposetolo taudia edia nega murinai, idia noho Keristani taudia edia nega amo ia idau. Unai dainai mani inai nega toi ita laloa: (1) Israela taudia edia nega, (2) aposetolo taudia idia mase murinai, idia noho Keristani taudia edia nega, bona (3) iseda nega, “gau ibounai hanamoa lou negana.”—Kara 3:21.

7. Dahaka dainai, Israela taudia bona edia king ese kara dika idia karaia neganai, abidadama Israela taudia idia lalomanoka lasi?

⁷ Israela taudia edia nega. Mose be kahirakahira do ia mase neganai, Israela taudia ia hamaoroa: “Lau diba momokani lau mase murinai umui be . . . kara dika do umui karaia bona umui dekenai lau hadibaia dalana do umui rakatania.” (Deu. 31:29) Mose ese Israela besena ia hamaoroa, bema idia gwau-edeede igui hesiai taudia ai do idia lao. (Deu. 28:​35, 36) Unai ia vara momokani, a? Oibe. Lagani handred momo lalonai, king taudia be dala kererena idia badinaia bona Iehova ena taunimanima idia hakaua kerere. Unai dainai, Iehova ese unai kara dika taudia ia panisia bona king taudia ia abia hidi lou lasi ena taunimanima idia lohiaia totona. (Ese. 21:​25-27) Abidadama Israela taudia idia itaia Dirava ena hereva ia guguru neganai, unai ese idia ia hagoadaia ia idia hesiai henia lou totona.—Isa. 55:​10, 11.

8. Dahaka dainai aposetolo taudia edia nega murinai, idia noho Keristani taudia be aposteit taudia ai idia lao dainai ita hoa lasi? Herevalaia.

⁸ Aposetolo taudia edia nega murinai, idia noho Keristani taudia edia nega. Dahaka dainai aposetolo taudia edia nega murinai, idia noho Keristani taudia be aposteit taudia ai idia lao dainai ita hoa lasi? Badina Iesu ia peroveta aposteit karana be do ia bada ia lao. (Mat. 7:​21-23; 13:​24-30, 36-43)  Aposetolo taudia, Paulo, Petero, bona Ioane ese idia hamomokania, Iesu ena peroveta herevana be edia nega amo ia guguru matamaia. (2 Tes. 2:​3, 7; 2 Pet. 2:1; 1 Ioa. 2:18) Aposetolo ginigabena ia mase murinai, aposteit taudia be Babulonia Badana, tomadiho koikoi oreadia ena kahana ai idia lao. Oibe, Iesu ena peroveta herevana ia guguru.

9. Edena dala ai, hari iseda nega be Israela taudia bona aposetolo taudia idia mase murinai aposteit karana ia bada negana amo ia idau?

⁹ “Gau ibounai hanamoa lou negana.” Hari iseda nega be Israela taudia bona aposetolo taudia idia mase murinai, aposteit karana ia bada negana amo ia idau. Ita be edena bamona negana ai ita noho? Ita be inai nega oromana dikana ena “dina gabedia” ai ita noho. (2 Tim. 3:1) To Baibel ese ia hahedinaraia inai dina gabedia lalonai, mai anina bada negana ia matamaia danu. Unai nega be do ia lao ela bona Mesia Basileiana henunai, taunimanima be do idia goevadae bona tanobada be paradaiso ai do ia lao. Unai mai anina bada negana idia gwauraia, “gau ibounai hanamoa lou negana.” (Kara 3:21) Unai nega be lagani 1914 ai ia hamatamaia. Unai nega ai dahaka idia hanamoa lou? Oibe, Guba ai Iesu be King dagina ia abia. Momokani, Iehova be King ta ia abia hidi lou, ia totona do ia lohia bona ia be King Davida ena bese amo. To Iehova be unai sibona ia karaia lasi, ia ese ena hesiai taudia ia durua ia ura henia dalana ai, ia idia tomadiho henia lou totona! (Isa. 2:​2-4; Ese. 11:​17-20) Tomadiho momokani, do idia hadikaia lou, a?

10. (a) Baibel ese hari iseda nega ai, tomadiho momokani be edena bamona ia perovetalaia? (Isaia 54:17) (b) Dahaka dainai unai peroveta herevana ese ita ia hagoadaia?

¹⁰ Isaia 54:17 duahia. Mani inai peroveta herevana ita laloa: “Umui hadikaia totona idia karaia tuari kohu ta do ia kwalimu lasi”! Unai peroveta herevana be hari ia guguru. Bona inai hagoadaia herevana be iseda nega ia herevalaia danu, ia gwau: “Emu natudia be Iehova ese do ia hadibaia, bona idia be maino ai do idia noho. Kara maoromaoro ai do oi gini goada. . . . Gau ta dekenai do oi gari lasi bona gau ta ese oi do ia hagaria lasi, badina unai gaudia be oi kahirakahira do idia mai lasi.” (Isa. 54:​13, 14) “Inai nega oromana ena dirava,” Satani, be ia hegeregere lasi Iehova ena taunimanima ese idia karaia hadibaia gaukara ia koua totona. (2 Kor. 4:4) Tomadiho momokani idia haginia lou vadaeni, ta ese do ia hadikaia lou lasi bona do ia noho hanaihanai. Ita  hadikaia totona idia karaia tuari kohu ta do ia kwalimu lasi!

DAHAKA DO IA VARA?

11. Dahaka dainai ita abia dae horoa taudia be guba dekenai idia daekau neganai, Iehova ese hutuma bada taudia do ia rakatania lasi?

¹¹ Horoa taudia be guba dekenai idia daekau neganai, dahaka do ia vara? Laloatao, Iesu be iseda Mamoe Naria Tauna. Bona ia be Keristani kongrigeisen ena kwarana. Unai dainai, Iesu ia gwau: “Emui Hakaua Tauna be tamona, Keriso unai.” (Mat. 23:10) Iesu be guba ai ia Lohia noho bona hanaihanai ena murinai idia raka taudia do ia naria. Bona gau ta dekenai do idia gari lasi, badina Keriso ese idia ia hakaua noho. Oibe, unai nega ai Keriso ese ena taunimanima do ia hakaua dalana ita diba lasi. Unai dainai mani Baibel ena sivarai haida ita herevalaia, unai ese ita do ia hagoadaia.

12. Edena dala ai Iehova ese ena taunimanima ia naria (a) Mose ia mase murinai? (b) Elia ese asainmen ma ta ia abia murinai? (Laulau itaia danu.)

¹² Israela taudia be Gwauhamata Tanona dekenai idia do vareai lasi neganai, Mose ia mase. Dirava ena taunimanima dekenai dahaka ia vara? Unai abidadama tauna ia mase murinai, Iehova be ena taunimanima ia durua lasi, a? Lasi. Ia idia abidadama henia noho dainai, idia ia durua. Mose ia do mase lasi neganai, Iehova ese ia hamaoroa Iosua do ia abia hidi ena taunimanima ia hakaua totona. Lagani momo lalonai Mose ese Iosua ia treinia. (Eso. 33:11; Deu. 34:9) Danu, gunalaia taudia ma haida idia noho, idia ese orea 1,000 ta ta, 100 ta ta, 50 ta ta, bona 10 ta ta idia hakaua. (Deu. 1:15) Idia ese Dirava ena taunimanima idia naria namonamo. Elia danu be unai bamona ia karaia. Ia be lagani momo lalonai Israela taudia huanai tomadiho momokanina ia gunalaia. To gabeai, Iehova ese Iuda ena saut kahana dekenai ia siaia lao. (2 Ki. 2:1; 2 Siv. 21:12) Israela ena iduhu 10 basileiana ai idia noho taudia be ta ese ia naria lasi, a? Lasi. Lagani momo lalonai Elia ese Elisaia ia treinia. Bona “peroveta taudia edia bese taudia” be treinini idia abia danu. (2 Ki. 2:7) Unai dainai, abidadama taudia momo idia noho Dirava ena taunimanima idia hakaua totona. Iehova be ena ura ia hagugurua noho, bona ena abidadama hesiai taudia ia naria noho.

13. Heberu 13:5b ai Iehova be dahaka ia gwauhamatalaia? (Laulau itaia danu.)

¹³ Unai haheitalai hegeregerena, horoa orena taudia be guba dekenai idia daekau murinai, oi laloa dahaka do ia vara? Ita daradara lasi badina Baibel ese inai hagoadaia herevana  ia hahedinaraia, Iehova ese ena taunimanima do ia rakatania lasi. (Heberu 13:5b duahia.) Hari, Mose bona Elia hegeregerena, Keristani horoa orena taudia idia laloparara haida idia treinia be mai anina bada. Lagani momo lalonai, Hakaua Oreana ese mamoe ma haida huanai tatau haida ia treinia, Dirava ena taunimanima idia hakaua totona. Hegeregere, sikuli idauidau ia hegaegaelaia elda taudia, sekit naria taudia, Brens Komiti, Betele edia ovasia, bona ma haida ese treinini idia abia totona. Danu, Hakaua Oreana be ena durua taudia dekenai treinini ia henia. Hari unai durua taudia be mai abidadama ida orea lalonai maduna momo idia huaia noho. Unai taudia be idia hegaegae namonamo Keriso ena mamoe idia naria noho totona.

14. Inai atikol ena point badana be dahaka?

¹⁴ Inai atikol ena point badana be inai: Hisihisi badana ena dokonai horoa orena taudia be guba dekenai idia daekau neganai, Iesu ena hakaua henunai tanobada ai Iehova ena taunimanima be mai abidadama ida tomadiho momokanina do idia badinaia noho. Ita diba unai nega ai, Magoga tauna Goga, idia haboua tanobada besedia unai, be ita do idia tuari henia. (Ese. 38:​18-20) To unai tuari kwadogina be do ia kwalimu lasi, bona Dirava ena taunimanima do ia koua lasi Iehova idia tomadiho henia totona. Bona idia do ia hamauria! Matahanai ta lalonai, aposetolo Ioane ese Keriso ena mamoe ma haida, “hutuma bada” taudia ia itaia. Aneru ta ese Ioane ia hamaoroa, inai “hutuma bada” be “hisihisi badana amo idia hanaia mai” taudia. (Apok. 7:​9, 14) Unai dainai ita diba Iehova ese ena taunimanima do ia naria!

15-16. Apokalupo 17:14 hegeregerena, Aramagedono tuarina ai, Keriso ena horoa taudia be dahaka do idia karaia, bona dahaka dainai unai ese ita ia hagoadaia?

¹⁵ To reana haida do idia laloa: ‘Horoa taudia be guba dekenai idia daekau murinai, dahaka do idia karaia? Baibel ese unai henanadai ia haerelaia. Ia hahedinaraia tanobada gavamani ibounai be “Mamoe Natuna ida do idia tuari.” To do idia kwalimu lasi. Baibel ia gwau: “Idia do ia halusia.” Bona daika ese Mamoe Natuna do ia durua? Siri ia gwau, “Dirava  ese ia boiria,” “ia abia hidi taudia,” bona “ia idia badinaia taudia.” (Apokalupo 17:14 duahia.) Idia be daidia? Idia toreisi lou horoa taudia! Unai dainai hisihisi badana ena dokonai, horoa orena taudia be guba dekenai idia daekau neganai, edia asainmen ginigunana be do idia tuari. Unai be idau momokani! Horoa Keristani taudia haida be Iehova ena Witnes taudia ai idia do lao lasi neganai, haida idia heatu henia. Bona idia haida be guna soldia taudia. To gabeai Keristani taudia ai idia lao bona ma haida ida maino ai idia noho dalana idia dibaia. (Gal. 5:22; 2 Tes. 3:16) Bona tanobada ena tuari lalonai idia vareai lasi. To guba dekenai idia daekau murinai, Keriso bona ena aneru ida tuari ginigabena ai, Dirava ena inai taudia do idia tuari henia.

¹⁶ Mani inai ita laloa! Tanobada ai horoa Keristani taudia haida be idia buruka bona idia goada lasi. To idia toreisi lou bona guba dekenai idia noho neganai, idia be mase diba lasi maurina do idia abia, bona edia Tuari King, Iesu Keriso do idia durua idia tuari totona. Aramagedono tuarina ai idia kwalimu murinai, Iesu ida do idia gaukara hebou bona taunimanima do idia durua goevadae taudia ai idia lao totona. Idia ese edia tadikaka taihu tanobada ai do idia durua bada, unai be guna goevadae lasi maurina amo idia henia heduru do ia hereaia!

17. Edena bamona ita diba Aramagedono tuarina lalonai, Dirava ena hesiai taudia be do idia noho namonamo?

¹⁷ Oi be mamoe ma haida ena orea lalonai oi noho, a? Vadaeni Aramagedono tuarina ia matamaia neganai, dahaka do oi karaia? Namona be inai oi karaia: Iehova oi abidadama henia, bona iena hakaua dalana oi badinaia. Bona dahaka gaudia ma haida do oi karaia? Baibel ia gwau: “Emui lalona daiutu dekenai umui vareai, bona iduara umui koua. Nega sisina lalonai umui hunia ela bona badu ia ore.” (Isa. 26:20) Unai nega ai, guba bona tanobada dekenai idia noho Dirava ena abidadama hesiai taudia ibounai be do idia noho namonamo. Aposetolo Paulo bamona, ita diba momokani “gavamani, eiava hari idia noho gaudia, eiava gabeai do idia mai gaudia, . . . ese ita be Dirava ena lalokau . . . amo, . . . ita ia hapararaia diba lasi.” (Roma 8:​38, 39) Namona be oi laloatao: Iehova be oi ia lalokau henia bona oi do ia rakatania lasi!