1. Oruṋe ovatwirisiwa avehe tji mave twarewa keyuru?

 OZOMBURA nḓa kapita ovakarere va Jehova aave ripura kutja, ‘Oruṋe ovatwirisiwa Ovakriste ovasenina tji mave twarewa keyuru?’ Eṱe aatu ripura kutja ovatwirisiwa tjiva mape ya ave kara kombanda yehi moParadisa oure woruveze kaaṋi kombunda yovita vya Armagedon. Posi yokutja mokambo kOruhungu ka 15 ku Juli, 2013, twe rihonga kutja ovatwirisiwa avehe mbe ri kombanda yehi mave twarewa keyuru komurungu wovita vya Armagedon.—Mat. 24:31.

2. Epuriro riṋe ovandu tjiva ndi mape ya ave ripura, nu matu katara ku ye morupa ndwi?

² Nungwari tjiva vetu mape ya ave pura kutja: Maku tjitwa tjike ‘kozonḓu zarwe’ za Kristus nḓe karera Jehova nouṱakame kombanda yehi moruveze ‘rwozombamisiro ozonene tjinene’? (Joh. 10:16; Mat. 24:21) Tjiva ndino mape ave rikende kutja kape nomundu ngu me ve vatere poo ngu me ve hongorere po kombunda yaindu ovakambure ovakwao ovatwirisiwa tji va twarewa keyuru. Ngatu katare komahungi yevari mOmbeibela ngu mape ya aye tjiti kutja ve ripure nao. Okuzambo matu kahungirira komapu ngu maye raisa kutja kahepero okurikenda.

OTJIKEṊA TJI TJI HI NOKUTJITWA?

3-4. Tjiva mape ya ave ripura tjike, nu omena raye?

³ Tjiva mape ya ave ripura kutja ozonḓu zarwe maze isa okukarera Jehova indu tji pe hi novatwirisiwa vOrutu orunane okuvehongorera. Tjiva mape ya ave kara noumune mbwo mena romahungi tjiva wOmbeibela. Ngatu tare kovihorera vivari. Iho otjitenga ohunga nOmupristeri Omunene Jojada. Eye wa ri  omukarere wa Mukuru omuṱakame. Eye nomukazendu we wena Joseba, va yama omuzandona wena Joas nu ve mu vatera kutja ma rire ombara ombwa nonḓakame. Joas ee rikotamene ku Jehova nu aa tjiti oviṋa oviwa indu Jojada tja ri nomuinyo. Nungwari kombunda yaindu Jojada tja ṱa, Joas wa uta okutjita oviṋa ovivi. Eye wa puratena kovanane ovarunde na isa okukarera Jehova.—2 Ekuruh. 24:​2, 15-19.

⁴ Otjihorera otjitjavari otjOvakriste mba hupire meserewondo oritjavari. Johanes ongwa ri omuapostele omusenina okuṱa. Indu tja ri nomuinyo, eye aa vatere Ovakriste ovengi okurira ovaṱakame ku Jehova. (3 Joh. 4) Tjimuna ovaapostele varwe va Jesus, Johanes wa ungura oukukutu okutjevera ozombongo kovandu mbaave hongo oumune novitjitwa vyoposyo. (1 Joh. 2:18; 2 Tes. 2:7) Kombunda yonḓiro ya Johanes, ovandu ovengi mozombongo zOukriste va uta okukongorera omahongero wovandu mba isa okurikotamena ku Jehova nu mbaave mu pirukire. Oure wozombura ozengi, ovandu mba isa okurikotamena ku Jehova nu mbaave mu pirukire mba, aave hongo oumune ouingi woposyo nu aave yandjere ozongaro ozombi mozombongo.

5. Oumune uṋe mbu tu ha sokukara na wo indu tji matu ripurire komahungi ngo?

⁵ Hapo ovihorera vyOmbeibela mbyo mavi raisa kutja kombunda yaindu ovatwirisiwa tji va i keyuru, ozonḓu zarwe za Kristus mape ya aze utu okutjita ouvi tjimuna Joas tja tjita? Poo maze rire ovandu mba isa okurikotamena ku Jehova nokumupirukira tjimuna ovengi tji va tjita indu ovaapostele tji va ṱa? Kako, katjiperi. Eṱe tu nongamburiro kutja indu ovatwirisiwa tji va twarewa keyuru, ozonḓu zarwe maze kayenda komurungu okurikotamena ku Jehova momuano omusemba, neye ma kayenda komurungu okuvetjevera. Ongwaye tji matu yenene okukara nongamburiro ndjo?

OMERIKOTAMENENO KU MUKURU WATJIRI KAYE NOKUZUNḒAKA

6. Otuveze tuṋe tutatu ku matu katara?

⁶ Ongwaye tji matu yenene okukara nongamburiro kutja omerikotameneno ku Mukuru watjiri kaye nokuzunḓaka nandarire moruveze oruzeu ndu maru ya? Mena rokutja Ombeibela i kahurura kutja oruveze mu tu hupa rwa panguka tjinene koruveze rwOvaisrael noruveze kombunda yaindu ovaapostele tji va ṱa. Ku nao ngatu katare kotuveze tutatu twi: (1) Oruveze rwOvaisrael ovakuru, (2) oruveze kombunda yaindu ovaapostele tji va ṱa, (3) oruveze rwetu, ndu ri ‘otuveze swi oviṋa avihe tji mavi yarurwa koupe.’—Oviung. 3:21.

7. Omena raye ovandu ovaṱakame tji ve hi na va pandjara omaundjiro indu otjiwaṋa nozombara za tjo tji za toorora okutjita ouvi moIsrael otjikuru?

⁷ Oruveze rwOvaisrael ovakuru. Ousupi kombunda yonḓiro ye, Moses wa raera Ovaisrael kutja: “Ami me tjiwa kutja kombunda yonḓiro yandje eṋe tjiri mamu tjiti ourunde, namu yepe na imbi mbi mbe mu rakiza.” (Deut. 31:29) Moses wina wa rakiza Ovaisrael kutja, tji va pirukire Jehova, owo mave hindwa mouhuura. (Deut. 28:​35, 36) Hapo omambo nga ya yenenisiwa? Ii. Oure wozombura ozengi, ozombara ozengi aaze tjiti oviṋa ovivi komurungu wa Jehova nu ovakarere ve ve kongorera momerikotameno woposyo. Mena rotjiṋa hi, Jehova wa vera ovandu ovarunde va Israel nu kena pa yandjera ozombara za Israel okuvehonaparera po rukwao. (Esek. 21:​25-27) Indu Ovaisrael ovaṱakame tji va muna kutja imbi Mukuru mbya hungira vya yenenisiwa tjiri, ovyo vye ve pa ouvanḓe okukayenda komurungu okumukarera nouṱakame.—Jes. 55:​10, 11.

8. Hapo otjikumise kutja ombongo ya zunḓaka kombunda yaindu ovaapostele tji va ṱa? Kahurura.

⁸ Oruveze kombunda yaindu ovaapostele tji va ṱa. Hapo otjikumise kutja ombongo ya  zunḓaka kombunda yaindu ovaapostele tji va ṱa? Kako, katjikumise. Jesus wa hunganeka kutja maku kakara ovandu mbu mave hongo oumune novitjitwa vyoposyo. (Mat. 7:​21-23; 13:​24-30, 36-43) Ovaapostele Paulus, Petrus na Johanes va tja omaprofetero wa Jesus ya uta okuyenenisiwa moruveze rwawo. (2 Tes. 2:​3, 7; 2 Petr. 2:1; 1 Joh. 2:18) Ousupi kombunda yaindu omuapostele omusenina tja ṱa, Ovakriste mba isa okukarera Jehova nu mbaave mu pirukire va rira orupa rwa Babilon otjinene ndu kuramena po ozongamburiro azehe zoposyo mouye auhe. Imbi Jesus mbya hunganeka aavi yenenisiwa.

9. Hapo oruveze rwetu mu tu hupa ru haṋika vi na indwi rOvaisrael ovakuru noruveze kombunda yaindu ovaapostele tji va ṱa?

⁹ ‘Otuveze swi oviṋa avihe tji mavi yarurwa koupe.’ Oruveze rwetu ru haṋika ku na indwi rOvaisrael ovakuru noruveze kombunda yaindu ovaapostele tji va ṱa. Hapo oruveze rwetu ru isanewa vi? Eṱe tu tja tu hupa “momayuva omasenina” wouye ourunde mbwi. (2 Tim. 3:1) Posi ya Ombeibela i raisa kutja pe noruveze rwarwe orunene nu orure ndwa uta moruveze tjingero. Oruveze ndwi maru kayenda nga oruveze rwOuhona wa Messias tji maru katjita kutja ovandu ve rire ohomonena nokutja ehi ri rire oparadisa. Oruveze ndwi ru isanewa ‘otuveze swi oviṋa avihe tji mavi yarurwa koupe.’ (Oviung. 3:21) Oruveze ndwi rwa uta mombura ndji 1914. Ovikwaye mbya yarurwa koupe? Jesus wa zikwa otjOmbara meyuru. Ku nao, Jehova wa ri nomunane ngu me mu kuramene po, ngwa rumata otjihavero tjOmbara David. Posi ya, ouhona mbwo katjiṋa atjiyerike Jehova tja yarura koupe. Jehova wa vatera ovakarere ve kombanda yehi okurikotamena ku ye rukwao momuano eye mbwe yakura. (Jes. 2:​2-4; Esek. 11:​17-20) Hapo mape ya omerikotameneno ngo aye zunḓaka rukwao?

10. (a) Ombeibela ya hunganeka ye ohunga nomerikotameneno watjiri ku Mukuru moruveze rwetu? (Jesaja 54:17) (b) Ongwaye omaprofetero ngo tji ye tu tunduuza?

¹⁰ Lesa Jesaja 54:17. Ripura ohunga nomaprofetero nga: “Nungwari kape notjirwise tji matji yenene okukuhihamisa.” Omambo ngo ye yenenisiwa moruveze rwetu. Omambo omatunduuze ngu maye kongorere mba wina ye hungirira koruveze rwetu: “Ami omuini me hongo ovature voye, nu me ve pe ouṋingandu nohange. Ousemba mau ku zeuparisa. Ove mo yamwa koṋiṋikizire na kooma na kondiriro.” (Jes. 54:​13, 14) Nandarire ‘mukuru omurunde wouye mbwi’ Satan, kama yenene okutjaera  oviungura ovakarere va Jehova mbi ve ungura okuhonga varwe ohunga na Jehova. (2 Kor. 4:4) Ongamburiro youatjiri ya yarurwa koupe, nu kama i yenene okuzunḓaka rukwao, nungwari oyo mai karere nga aruhe. Kape notjirwise tji matji yenene okutuhihamisa.

MAPE KATJITWA TJIKE?

11. Otjikwaye tji matji tu vatere okutjiwa kutja otjimbumba hi otjinene katji nokuisiwa nokuhinondjeverero indu ovatwirisiwa tji va i keyuru?

¹¹ Mape katjitwa tjike indu ovatwirisiwa tji va i keyuru? Zemburuka kutja Jesus Omurise wetu. Jesus ongu ri otjiuru tjombongo yOukriste. Jesus wa tja: “Tjinga amu nOmuhongore umwe porwe ngu ri Kristus.” (Mat. 23:10) Jesus ngu honaparera meyuru ma tjevere ovemukongorere. Ovakongorere va Kristus kombanda yehi kave nokuhepa okutira otjiṋa, mena rokutja eye ongu me ve hongorere. Otjingaperi kutja, eṱe katu nokutjiwa ondjivisiro aihe ohunga nomuano Kristus mu ma hongorere ovakarere ve moruveze ndwo. Ngatu katare kovihorera tjiva vyOmbeibela mbi mavi tu vatere okukara nongamburiro.

12. Jehova wa vatera vi ovakarere ve (a) kombunda yonḓiro ya Moses? (b) kombunda yaindu Elia tja muna otjiungura tjarwe? (Wina tara kotjiperendero.)

¹² Moses wa ṱa indu Ovaisrael tji va ri pokuhita mEhi Ekwizikwa. Otjikwaye tji tja tjitwa kovakarere va Mukuru? Hapo Jehova wa isa okuvatera ovakarere ve indu omurumendu omuṱakame ngwi tja ṱa? Kako. Jehova ee ve parura indu tji va ri nonḓuviro ku ye. Jehova wa raera Moses ngunda e hi ya ṱa kutja nga zike Josua okuhongorera po otjiwaṋa tje. Moses aa hongo Josua oure wozombura ozengi. (Eks. 33:11; Deut. 34:9) Nu nandarire pa ri novarumendu varwe ovengi ozonongo mba ri ovanane veyovi novesere novomirongo vitano novomurongo. (Deut. 1:15) Ovakarere va Mukuru aave tjeverwa nawa. Tu muna otjiṋa tjingetjo motjihorera tja Elia. Eye aa ungura oukukutu oure wozombura ozengi okuvatera Ovaisrael okurikotamena ku Jehova. Posi ya Jehova we mu pa otjiungura tjarwe moJuda. (2 Ozomb. 2:1; 2 Ekuruh. 21:12) Hapo ovakarere va Jehova ovaṱakame mba ri mouhona womihoko omurongo vya Israel va nambirahirwe? Kako. Elia aa rongerisa Elisa oure wozombura ozengi. Wina pa ri ‘okambumba kovaprofete’ mba munine omahongero. (2 Ozomb. 2:7) Ku nao pa ri ovarumendu ovengi ovaṱakame mbaave vatere okuhongorera po ovakarere va Mukuru. Jehova wa kayenda komurungu okuyenenisa ondando ye nu eye wa vatera ovakarere ve ovaṱakame.

13. Jehova wa kwizika tjike mOvaheberi 13:5b? (Wina tara kotjiperendero.)

 ¹³ Otja tji mo ripurire kovihorera mbi, mo munu kutja mape tjitwa tjike indu ovatwirisiwa ovasenina tji va twarewa keyuru? Ombeibela i raisa kutja: Jehova ke nokuyesa ko ovakarere ve mbe ri kombanda yehi. (Lesa Ovaheberi 13:5b.) Okambumba okaṱiṱi kOvakriste ovatwirisiwa mbe hongorera po ndino, ve zuva nawa ounanḓengu wokuhonga varwe, tjimuna Moses na Elia. Oure wombura ozengi ovarumendu ovakambure mOrutu Orunane ve honga ovarumendu varwe mbe he ri ovatwirisiwa okuhongorera po. Otjotjihorera, owo ve rongerisa ozoskole ozengi okuhonga ovanene vombongo, ovatarere votukondwa, ouṋepo wOkomiti yOrutavi rwOmberoo, ovatarere poBetel na varwe. Orutu Orunane ru honga ovavatere mozokomiti pekepeke wOrutu Orunane. Ovavatere ovaṱakame mba nai ve nomerizirira omengi motjira tja Jehova. Owo ve rirongerisa nawa okukayenda komurungu okuungura otjiungura tjokutjevera ozonḓu za Kristus.

14. Epu enanḓengu romakonḓononeno nga ooriṋe?

¹⁴ Epu enanḓengu romakonḓononeno nga orondi: Indu ovatwirisiwa ovasenina tji va twarewa keyuru kuṱa komaandero wondatumisire ondirise, ovakarere va Jehova mave kayenda komurungu okurikotamena ku ye nouṱakame kombanda yehi. Mena rokutja Jesus Kristus ongu me ve honaparere po owo kamaave isa okutjita nao. Eṱe matu tjiwa kutja oruveze ndwo, otjimbumba tjoviwaṋa mbye rikuta kumwe, Ombeibela tji tji isana kutja Gog wa Magog, matji wire ovakarere va Mukuru. (Esek. 38:​18-20) Posi yokutja omawiro omasupi ngo kaye nokukara nondoṋeno. Oyo kaye nokutjita kutja ovakarere va Jehova ve ise okurikotamena ku ye. Eye tjiri me ve yama. Motjirimunikise, omuapostele Johanes wa muna “otjimbumba otjinene” tjozonḓu zarwe za Kristus. Johanes wa raerwa kutja “otjimbumba otjinene” hi tja zira “mondatumisire ondirise.” (Omavan. 7:​9, 14) Ku nao, eṱe matu tjiwa nawa kutja Jehova me ve yama.

15-16. Otja kOmavandururiro 17:​14, ovatwirisiwa mave ungura ye movita vya Armagedon, nu ongwaye tje ri otjiṋa otjitunduuze?

 ¹⁵ Posi yokutja ovatwirisiwa mave katjita tjike indu tji va zu nokuyenda keyuru? Ombeibela i zira epuriro ndo oukahu. Oyo i raisa kutja ozohoromende zouye mbwi maze “rwisa Ondjona movita.” Ozo kaze nokukara nondoṋeno. Matu lese kutja Ondjona “mai ze toṋa.” Ouṋe ngu mai vatere? Ezeva mari ziri kutja owomba “ovaṱakame mbu ya isana nokutoorora.” (Lesa Omavandururiro 17:14.) Hapo imba ooveṋe? Ovatwirisiwa mba pendurwa movakoke. Indu ovatwirisiwa ovasenina tji va twarewa keyuru popezu nomaandero wondatumisire ondirise, tjimwe tjoviungura vyawo ovitenga otjokurwa. Ihi tjiri otjiungura tjapeke. Ovatwirisiwa Ovakriste tjiva va ri ovarwe ngunda ave hi ya rira Ovahongonone va Jehova. Tjiva wina va ri ovasorondate. Posi ya owo kombunda va rira Ovakriste vatjiri nu ve rihonga okuhupa mohange ku na varwe. (Gal. 5:22; 2 Tes. 3:16) Owo va isa okuyandja oruvara kovita. Posi yokutja, owo tji va zu nokuyenda keyuru, owo mave karwisa ovanavita va Mukuru pu na Jesus novaengeli ovayapuke movita ovisenina.

¹⁶ Ripura ohunga notjiṋa hi. Ovatwirisiwa tjiva Ovakriste ovanene motjiwondo nu nandarire va ngundipara. Posi ya tji va pendurwa okuyenda keyuru, mave kakara nomasa notutu twombepo, okukarwa pamwe nOmbara yawo Jesus Kristus. Kombunda yovita vya Armagedon, owo mave ungura pamwe na Jesus okuvatera ovandu okurira ohomonena. Nokuhinomakeyakeyero, owo mave yenene okuvatera ovakambure ovakwao kombanda yehi okuza keyuru kombanda yaindu tji va ri kombanda yehi.

17. Hapo matu tjiwa vi kutja ovakarere va Mukuru avehe mave kara mondjeverero movita vya Armagedon?

¹⁷ Hapo oove wozonḓu zarwe? Tji pe ri nao, ove mo hepa okutjita vi indu ovita vya Armagedon tji vya utu? Mo sokutjita nai: Kara nongamburiro mu Jehova, nu kongorera omuhunga we. Hapo iho matji kamburire mo ye? Ombeibela i tja: “Hiteye momatuwo weṋu, . . . nu mu pate omivero vyeṋu. Ṱareye oruveze orusupi nga omazenge waNdjambi tji ya yanda.” (Jes. 26:20) Ovakarere va Mukuru avehe ovaṱakame mbe ri keyuru, na kombanda yehi mave kara mondjeverero oruveze ndwo. Tjimuna omuapostele Paulus, eṱe tu nongamburiro kutja “kape notjiṋa tji matji sora okutupora korusuvero rwaNdjambi: nangarire . . . ovinauvara . . . nangarire oviṋa vyanambano nangarire vyokombunda.” (Rom. 8:​38, 39) Aruhe zemburuka kutja Jehova we ku suvera nu kemee kwesa ko.