1. Sonu anni nga egga ta langi i ngamin nga nazelugan?

 PIGA ragun ngana i nappasa, nanono na totolay ira ni Jehova, ‘Sonu anni nga mappalangi i nabattang ira nga nazelugan nga Cristiano?’ Dati, abbo tam nga kabalin na Armagedon, posible nga maddian labbi tu manganannuan ta Paraiso i nazelugan ira. Ngem ta Hulio 15, 2013 nga isyu na Ang Bantayan, nagigiammu tam tu ngamin nga nazelugan ira nga egga paga ta davvun ay mappalangi nige nga mamegafu i Armagedon.—Mat. 24:31.

2. Anni i pakkiavu nga awayya na nga luttuag, anna anni i gigiammuattam taw nga artikulo?

² Megafu tatun, egga i pakkiavu nga luttuag: Anni i mesimmu ta “tanakuan nga karneru” ni Cristo nga matalo nga massesserbi kani Jehova ta davvun ta tiempo na “dakal nga ziga”? (Juan 10:​16, NW; Mat. 24:​21, NW) Mavurung i karuan nga baka mapagurayan ira sonu umay ta langi i meddu nga nazelugan ira nga wawwaragi da. Gigiammuattam i dua nga istoria ta Biblia nga basehadda nu ngatta awayya na tu manono da yatun. Tapus pabbiridattam nu ngatta ariattam nakuan mavurung tatun.

ANNI I ARI NGA MESIMMU?

3-4. Anni i awayya na nga nonopan na karuan, anna ngatta?

³ Nonopan na karuan nu panawan kari saw na tanakuan nga karneru i kinakurug sonu awan ngana i nazelugan ira nga brother nga miembro na Manangngal nga Baggi nga mangigiya ta nira. Egga gare i dua nga istoria ta Biblia nga manono da. I ollu ay meyannung ta Atannang nga Pari nga si Jehoiada. Matalo yayya nga aripan na Dios. Prinotektadda dua na atawa na nga si Jehoshabet i abbing nga si Jehoas anna zinuffunadda yayya  nga mabbalin tu mapia anna matalo nga patul. Adde turi ta sigga-matolay i manakam nga si Jehoiada, kingngua ni Jehoas i makasta. Ngem turi ta natay si Jehoiada, kingngua ngana ni Jehoas i marake. Nagginna yayya ta marake ira nga prinsipe anna pinanawan na si Jehova.—2 Cro. 24:​2, 15-19.

⁴ I mekadua ay nesimmu ta Cristiano ira ta mekadua nga siglo. I ultimu nga apostol nga natay ay si Juan. Ta katolena, aru i noffunan na nga makapagattam ta passerbi da kani Jehova. (3 Juan 4) Kagitta na kingngua na karuan nga apostol ni Jesus, kingngua ni Juan i adde na mawayya na tapenu labanan i pawwara na apostasia. (1 Juan 2:18; innan i study note ira na 2 Tes. 2:7.) Ngem ta patay ni Juan, paspas nga nawwara i apostasia nga kagitta na pawwara na afi. Ta piga nga dekada laman, natallung ngana na apostasia i ngamin nga Cristiano nga kongregasion.

5. Anni nakuan i ariattam nonopan nga mesimmu base ta dua nga istoria ta Biblia?

⁵ Ipasingan kari na dua nga istoria ta Biblia nga kunnatun saw i mesimmu ta tanakuan nga karneru ni Cristo sonu nappalangi ngana i nazelugan ira? Tatun nga tiempo, marake kari ngana saw i kuan na tanakuan nga karneru ni Cristo kagitta na kingngua ni Jehoas, onu magapostata ira kagitta na aru nga Cristiano kabalin na patay na apostol ira? Magga ari! Makasiguradu ittam nga sonu awan ngana ta davvun i nazelugan ira, matangngallan lagapa i tanakuan nga karneru anna tulu-tuloy ira nga maddayaw kani Jehova. Ngatta makasiguradu ittam tatun?

ARI NGA MAGIMMANG I MARENU NGA PADDAYAW

6. Anni nga tallu nga tiempo i gigiammuattam?

⁶ Ngatta makapakkomfiansa ittam nga ari magimmang i marenu nga paddayaw maski ta mariga ira nga tiempo ta mappange? Megafu ta nagigiammu tam ta Biblia i meyannung ta tiempo nga pattolayattam. Neruma yaw nga tiempo ta tiempo na Israel anna ta tiempo na Cristiano ira ta mekadua nga siglo. Innattam tu mapia yatun ira nga tallu nga tiempo: (1) tiempo na Israel, (2) tiempo kabalin nga natay i apostoles, anna (3) i tiempo tam, i “tiempo na ketoli na ngamin nga gannug.”—King. 3:​21, NW.

7. Ngatta ari nga nadismaya i matalo ira nga Israelita turi ta pinili na totolay anna patul ira nga kuan i marake?

⁷ Tiempo na Israel. Nige nga natay si Moises, nikagi na ta Israelita ira: “Ammù nga sonu patè, siguradu nga kuan nu i marake anna likuran nu i dalan nga nituddù nikamu.” (Deut. 31:29) Inabisowan gapa ni Moises i Israelita ira nga nu marrebelde ira, maaripan ira. (Deut. 28:​35, 36) Nesimmu kari yatun nga uvovug ira? Wan. Ta unag na ginatu ira nga dagun, pinili na aru nga patul nga kuan i marake anna siminuttul i totolay ta falsu nga paddayoda. Megafu tatun, kinastigo ni Jehova i marake nga totolena anna arian na ngana nipamavulun nga egga i mappatul ta Israel nga mangirepresenta ta nisa. (Eze. 21:​25-27) Ngem nassikan i nono na matalo ira nga Israelita turi ta nasingadda nga natuppal i kinagi na Dios.—Isa. 55:​10, 11.

8. Makaddagan ittam kari nu nakatallung i apostasia ta Cristiano nga kongregasion ta mekadua nga siglo? Ipakanawag.

⁸ Tiempo kabalin nga natay i apostoles. Makaddagan ittam kari nu nakatallung i apostasia ta kongregasion na Cristiano ira ta mekadua nga siglo? Ari. Niprofesiya ngana gare ni Jesus nga mas maggrabe i apostasia. (Mat. 7:​21-23; 13:​24-30, 36-43) Kinagi gapa mismu ni apostol Pablo, Pedro, anna Juan nga namegafu nga matuppal i profesiya ni Jesus ta tiempo da turi ta ollu nga siglo C.E. (2 Tes. 2: 3, 7; 2 Ped. 2:1; 1 Juan 2:18) Ta mekadua nga siglo C.E., nakatallung ngana i apostasia ta ngamin nga Cristiano nga kongregasion. I apostata ira nga Cristiano ay nabbalin tu parte na Babilonia nga Dakal, i imperio na falsu nga relihion ta interu mundo. Natuppal i niprofesiya ni Jesus.

9. Anni i nadduman na tiempo nga pattolayattam ta tiempo na Israel anna ta tiempo na Cristiano nga kongregasion ta mekadua nga siglo?

⁹ “Tiempo na ketoli na ngamin nga gannug.” Neruma i tiempo tam ta tiempo na Israel anna ta tiempo na pawwara na apostasia ta mekadua nga siglo C.E. Anni kari i tiempo nga pattolayattam sangawe? Agalattam yatun tu “pangurianan ira nga aggaw” naw nga marake nga mundo. (2 Tim. 3:1) Ngem ipasingan na Biblia nga egga paga i tadday nga tiempo nga magalan tu “tiempo na ketoli na ngamin nga gannug.” (King 3:​21, NW) Yatun nga tiempo ay namegafu kagiddang na pangurianan ira nga aggaw turi ta 1914. Ngem mas mabayag yatun anna mas anaddu. Mattulu-tuloy gare yatun adde sonu mapabbalin tu perfekto na Mesianiko nga Pappatulan i ngamin nga totolay anna mapabbalin natun tu paraiso i davvun. Ngem anni kari i netoli? Nappatul ngana si Jesus ta langi. Yatutta netoli i mammaguray nga mangirepresenta kani Jehova. Yatun nga patul i nangirensia ta trono na matalo nga patul nga si David. Ngem ari laman tu yatun nga pammaguray i nitoli ni Jehova. Ari gare nabbayag kabalin natun, namegafu nga netoli i marenu nga paddayaw! (Isa. 2:​2-4; Eze. 11:​17-20) Mattulu-tuloy kari i marenu nga paddayaw?

10. (a) Anni i niprofesiya na Biblia meyannung ta marenu nga paddayaw ta tiempo tam? (Isaias 54:17) (b) Ngatta makapasikan yatun ira nga profesiya?

¹⁰ Bibbigan i Isaias 54:17. Pannonopan yaw nga profesiya: “Awan tu armas nga mapadday kontra nikaw i mavviktoria”! Matuttuppal yatun ta tiempo tam. Magaplika gapa ta tiempo tam i tumunug nga makapabannay ira nga uvovug: “Tudduan ni Jehova i ngamin nga ána mu, anna mannanayun nga memammo i ána mu ira. Kinatunung i mabbalin tu fundasiommu. . . . Awan vuluvuga noka tu ikassimmu anna awan tu rason tapenu mamippig ka, megafu ta ari yatun nga makaranni nikaw.” (Isa. 54:​13, 14) Maski si Satanas nga “dios noye na mundo,” ay ari na mapagimmang i trabahu nga panuddu nga kukukuan na totolay ni Jehova. (2 Cor. 4:4) Netoli ngana i marenu nga paddayaw anna ari ngana vuluvuga matallung yatun na apostasia. Mattalupaddian yatun adde ta  mannanayun. Awan tu armas nga mapadday kontra nittam i mavviktoria!

ANNI SAW I MESIMMU?

11. Anni i mangipasiguradu nga ari mapagurayan i dakal nga ammung sonu egga ngana ta langi i nazelugan ira?

¹¹ Anni saw i mesimmu sonu nappalangi ngana i nazelugan ira? Daddamman nga si Jesus i Pastor tam. Yayya i ulu na Cristiano nga kongregasion. Manawag nga kinagi ni Jesus: “Tattadday laman i Yafu nu, nga yaya i Cristo.” (Mat. 23:10) Kanayun nga tangngallan na maddaggun nga Patul tam i kurug nga tagatuttul na. Mismu nga si Cristo i mangigiya yatutta awan vuluvuga tu ikassing da. Ariattam ammu i ngamin nga detalye nu kunnasi saw nga igiya ni Jesus i totolena tatun nga tiempo. Yatutta ikonsidera tam i karuan nga angngarigan ta Biblia nga makoffun nittam.

12. Kunnasi nga sinangngallan ni Jehova i totolena (a) turi ta natay si Moises? (b) turi ta nanguli i annungan ni Elias? (Innan gapa i letratu.)

¹² Natay si Moises nige nga nakatallung i Israel ta Nepromesa nga Davvun. Nagimmang kari i panguffun ni Jehova ta totolena turi ta natay yatun nga matalo nga lalaki? Ari. Adde ta matalo ira, niyawa ni Jehova i pakawagadda. Nige nga natay si Moises, nikagi ni Jehova nisa nga iyawa na kani Josue i annungan nga mangirollu ta totolay. Ngem nige paga natun, piga dekada ngana nga sinanay ni Moises si Josue. (Ex. 33:11; Deut. 34:9) Fuera paga tatun, aru paga i lallaki nga makawayya nga mangirollu kagitta na panakallan na rinivi-rivu, ginatu, taggi-limafulu, anna taggi-mafulu. (Deut. 1:15) Natangngallan gafu tu mapia i totolay na Dios. Kunnatun gapa i kingngua ni Elias. Piga dekada nga nirolluan na i marenu nga paddayaw na Israelita ira. Ngem zimittal i tiempo nga nanguli i annungan na megafu ta niyali yayya ni Jehova ta zita na Juda. (2 Pat. 2:1; 2 Cro. 21:12) Napagurayan kari i matalo ira nga totolay ta mafulu nga tribu na pappatulan na Israel? Ari. Dati ngana nga sinanay ni Elias si Eliseo ta piga nga dagun. Egga gapa i “ána na profeta ira” nga nakalawa tu passanay. (2 Pat. 2:7) Yatutta aru nga matalo nga lallaki i makaduffun ta pangirollu ta totolay na Dios. Tatun ira nga tiempo, netuppal lagapa ni Jehova i gakkag na anna natangngallan na i matalo ira nga maddayaw ta nisa.

13. Anni nga pamagaram i netura ta Hebreo 13:5b? (Innan gapa i letratu.)

¹³ Tatun ira nga angngarigan, anni i manono mu nga mesimmu sonu nappalangi ngana i nabattang ira nga nazelugan? Ikagi na Biblia i simple anna makapagaram nga kinakurug:  Ari vuluvuga pagurayan ni Jehova i totolena ta davvun. (Bibbigan i Hebreo 13:5b.) Kagitta ni Moises anna Elias, ammu na baddi nga grupo na nazelugan ira nga Cristiano nga mangirollu sangawe i kabalor na passanay ta tanakuan. Piga dekada ngana nga sana-sanayan na Manangngal nga Baggi i lallaki nga naggafu ta tanakuan nga karneru tapenu mangirollu. Angngarigan na, nangiyunnug ira tu aru nga eskuela tapenu sanayan i elder ira, manangngal ta sirkito, miembro na Branch Committee, overseer ira ta Bethel, anna karuan paga. I Manangngal nga Baggi mismu i massanay ta helper ira ta madduruma nga committee na Manangngal nga Baggi. Matalo nga kuan natun ira nga helper i napakaru nga annungan ta organisasion. Preparadu ira nga ituloy i trabahu nga panangngal ta karneru ira ni Cristo.

14. Anni i pinakapunto na paguruvovugattam?

¹⁴ Yaw i pinakapunto na paguruvovugattam: Maski nu mappalangi i nabattang ira nga nazelugan sonu aranni nga mangultimu i dakal nga ziga, ari lagapa nga magimmang i marenu nga paddayaw taw ta davvun. Si Jesu-Cristo gare i mangirollu. Kurug tu tatun nga tiempo, atakeyan ittam na Gog na Magog, i alyansa na nasa-nasion. (Eze. 38:​18-20) Ngem ari nga mavviktoria yatun nga manganannuan nga pangatake da. Ari nga mapagimmang natun i totolay na Dios ta paddayoda kani Jehova. Siguradu nga ipaliag na ira! Ta tadday nga sirmata, nasingan ni apostol Juan i “dakal nga ammung” na tanakuan nga karneru ni Cristo. Nakagi kani Juan nga “mallawan maggafu ta dakal nga ziga” yatun nga “dakal nga ammung.” (Nep. 7:​9, 14, NW) Siguradu gafu nga tangngallan saw ira ni Jehova!

15-16. Base ta Nepakannammu 17:​14, anni saw i kuan na nazelugan ira sonu gerra na Armagedon, anna ngatta makapagaram yatun?

¹⁵ Awayya na tu nonopan na karuan: ‘Anni i kuan na nazelugan sonu egga ngana ira ta langi?’ Nakagi ta Biblia nga i gobiernu ira na mundo ay “makiggerra noka ira ta Kordero.” Siempre, maffu ira. Kunnaw i kagian na Biblia tatun: “Patulukan noka ira na Kordero.” Ngem sinni i manuffun nisa? Danuri i “inagalan,”  “pinili,” anna “napasikkal nga siminuttul.” (Bibbigan i Nepakannammu 17:14.) Sinni yatun ira? I napaginnolay nga nazelugan ira! Yatutta sonu nappalangi ngana i nabattang ira nga nazelugan nige nga mangultimu i dakal nga ziga, i ollu nga trabahu da ay makillaban. Daka-dakal yatun nga pribilehio para ta nira! Napurueban na karuan nga nazelugan nga Cristiano nga makillaban ta tanakuan nige da nabbalin tu Saksi ni Jehova. Nasserbi paga lagu ta militar i karuan ta nira. Ngem nabbalin ira tu kurug nga Cristiano anna nagigiammu da i mattolay tu memammo kavulu i tanakuan. (Gal. 5:22; 2 Tes. 3:16) Ari ira nga nakisali ta gerra. Ngem kabalidda nga mapaginnolay ta langi, kavulu da nga makiggerra si Cristo anna i masanto ira nga anghel ta ultimu nga gerra kontra ta kalaban ira na Dios.

¹⁶ Pannonopan yaw. Manakam ngana i karuan ta nazelugan ira taw ta davvun anna makafi paga lagu. Ngem sonu mapaginnolay ira ta langi, mabbalin ira tu masiki-sikan anna imortal nga espiritu anna makiggerra ira kavulu na Minakkigerra nga Patul da nga si Jesu-Cristo. Kabalin saw na gerra na Armagedon, makipattrabahu ira kani Jesus tapenu uffunan i totolay nga mabbalin tu perfekto. Siguradu nga mas aru i makua da tapenu moffunan i iddeddu da nga wawwaragi taw ta davvun sonu egga ngana ira ta langi anne ta makua da habang imperfekto paga ira nga tolay!

17. Ngatta siguradu ittam nga awan tu mesimmu nga marake ta ngamin nga masserbi ta Dios sonu gerra na Armagedon?

¹⁷ Tadday ka kari ta tanakuan nga karneru? Anni gafu i kuammu sonu mamegafu ngana i kuruga importante nga gerra na Armagedon? Yaw laman: Mattalo ka kani Jehova anna tuttulammu i pangigiya na. Anni i awayya na nga nelavu tatun? Makapabannay i kinagi na Biblia: “Tullukkamu ta unu-unag ira nga kuarto nu, anna iserra nu i puerta ira. Mattagu kamu tu manganannuan adde ta mabalin i poray.” (Isa. 26:20) Tatun nga tiempo, awan tu mesimmu nga marake ta ngamin nga matalo nga masserbi ta Dios ta langi onu ta davvun. Kagitta ni apostol Pablo, kumbinsidu ittam nga ‘awan tu makawayya nga mangigungay nittam ta aya na Dios maski paga i pammaguray onu maski paga i maddaggun onu i mappange ira nga mesimmu.’ (Roma 8:​38, 39) Kanayummu nakuan nga daddamman yaw: Iddeddu naka ni Jehova, anna arian naka vuluvuga pagurayan!