1. Eko nyá néē gáā kpo ɛjɛɛji ācɛ néē lɛ anɔ tu uwa ɛyi a gā ɔkpanco a?

 IHAYI alɛwa nōo gáā yɛ a, ācɛ ɔlɛ Ujehofa gē gbɛla kahinii: ‘Eko nyá néē gáā kpo ācɛ ohile néē lɛ anɔ tu uwa ɛyi a gā ɔkpanco a?’ Gbɔbu a, alɔ tɛtɛ gē gbɛla ka ōhī ku ācɛ néē lɛ anɔ tu uwa ɛyi a, géē yɔ ipu ɛcɛ nyā nōo géē je piya Uparadais a eko kpii igbihi ku Amagɛdɔn. Amáŋ, ipu Ɔda Ō Gbaajɛ ku Ɔya Ɔmahaapa 15, 2013, alɔ nwu ka gbɔbu ɛɛ ku ɛfú ku Amagɛdɔn a kóō gbɔɔ, ɛjɛɛji ācɛ néē lɛ anɔ tu uwa ɛyi nōo wɛ acɛ ula ofu igwaahata a géē yɔ ɔkpanco ɛ.—Umát. 24:31.

2. Ɔka nyá nɛ ācɛ ōhī lɔfu da a, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nyā a?

² Amáŋ, ōhī ku alɔ lɔfu da ɔka kahinii: Ɔdi gáā ya da “aálá ɔhá” ku Ukraist, nōo géē yɔ i gba Ujehofa ɛ̄gbā kpaakpa ipu ɛcɛ nyā ɛpleeko ku “ōwē nɛ̄hi” a? (Ujɔ́n. 10:16; Umát. 24:21) Ōhī ku “aálá ɔhá” a lɔfu yɔ i lɛ ɔtooplico, ka igbihi néē kwu ayinɛ uwa néē lɛ anɔ tu uwa ɛyi a u kpo gā ɔkpanco, ka é gáā lɛ ɔcɛ duuma ō je otabɔ lɛ uwa amāŋ bi uwa jé ɔwɛ gɛ ŋ. Alɔ géē kɛla lɛyikwu aɔ̄kā ɛpa ŋma ipu Ubáyíbu nōo lɔfu ya kéē lɛ ɔtooplico a. Oŋma ɔɔma, alɔ géē kɛla lɛyikwu ɔdā nōo ya ɛɛ nɛ alɔ i cika ō lɛ ɔtooplico ŋ ma.

ƆDĀ NŌÓ GÁĀ YA DA AALA ƆHÁ A Ŋ MA

3-4. Ɔdi wɛ ɔtooplico nɛ ācɛ ōhī lɔfu lɛ a, ɔdi kē ya a?

³ Ācɛ ōhī lɔfu yɔ i lɛ ɔtooplico, ka aala ɔhá a géē ma ō gba Ujehofa ɛ̄gbā eko nɛ ayinɛ uwa néē lɛ anɔ tu uwa ɛyi nōo wɛ Ígwu Nōo Gē Leyi Kwu Ɔwa Ku Alɔ a i yɔ ō bi uwa jé ɔwɛ gɛ ŋ. Ɔtu lɔfu ya uwa lɛ a ohigbu aɔ̄kā ōhī nōo yɔ ipu Ubáyíbu a. Alɔ leyi yɛ ocabɔ ɛpa. Aflɛyi a lɛ ō ya mla Ujɛhoyada nōo wɛ Otrɛyi Nɛhi Ku Ācɛ Ogwɛɛya a. Ó wɛ ɔcɛ nōo gba Ɔwɔico ɛ̄gbā kpaakpa. Anu mla ɔnyā nu Ujɛhossɛba je ogbotu lɛ ɔyi nɔnyilɔ éyi nōo lé ka Ujowasi, klla je otabɔ lɛ ɔ kóō kwu piya ɔcɛ́ olɔhi ku ācɛ Isrɛlu nōo klla hayi kpaakpa. Eko nɛ Ujɛhoyada nōo le ya ɔnyakwɔcɛ ɛ  ma yeeyi a, Ujowasi gba Ujehofa ɛ̄gbā kpaakpa klla ya aɔdā olɔhi alɛwa. Amáŋ igbihi nɛ Ujɛhoyada gekwu a, Ujowasi gbɔɔ ō ya aɔdobɔbi. Ó gbɔɔ ō jahɔ tu aigabɔ nōó gē yuufi Ujehofa ŋ, klla ma ō gba Ujehofa ɛ̄gbā.—2 Úklɔ́ 24:​2, 15-19.

⁴ Ocabɔ ɔmpa a, wɛ ocabɔ ku Ācɛ O Yɛce Ukraist nōo yɔ i gba Ujehofa ɛ̄gbā igbihi nɛ ɛjɛɛji ayikpo ku Ujisɔsi a gekwu a. Ɔyikpo ku Ujisɔsi amoomɛ nōo kwū a wɛ Ujɔni. Ɛpleeko nɛ ó yeeyi a, ó je otabɔ lɛ alɛwa ku Ācɛ O Yɛce Ukraist kéē hayi kpaakpa lɛ Ujehofa. (3 Ujɔ́n. 4) Ɛgɛ nɛ ayikpo ohile ku Ujisɔsi ya a, Ujɔni yuklɔ lɔfu lɔfu ō je ogbotu lɛ ujɔ a ŋma ɛgiyi ācɛ duuma nōo gē nwu aɛlā ɛkɛmgbɛ, klla gē ya aɔdā nōó kpaakpa ŋ ma. (1 Ujɔ́n. 2:18; Má ɔdā ōhī néē ka ipu nwtsty lɛyikwu 2 Ācɛ Utesaloníka 2:7 a.) Amáŋ igbihi nɛ Ujɔni gekwu a, alɛwa ku Ācɛ O Yɛce Ukraist a lɛ igbihi ce kwu ɛ̄gbā ō gba ku Ujehofa. Abɔ eko yɔ i nyɔ a, ācɛ nōo cigbihi kwu ɛ̄gbā ō gba ku Ujehofa nyā gbɔɔ ō nwu aɛlā ɛkɛmgbɛ alɛwa, klla gbɔɔ ō jɛga lɛ auce ō ya obɔbi ipu ɛjɛɛji aujɔ a.

5. Ɔdi wɛ ɛlā nɛ alɔ i cika ō bi wa oŋmɛyi ŋma ipu aɔ̄kā ɛpa ɔɔma nōo yɔ ipu Ubáyíbu a ŋ ma?

⁵ Aɔ̄kā ɛpa nōo yɔ ipu Ubáyíbu nyā mafu ka igbihi néē kwu ācɛ néē lɛ anɔ tu uwa ɛyi a u kpo gā ɔkpanco, aala ɔhá ku Ukraist a géē gbɔɔ ō ya aɔdobɔbi ɛgɛ nɛ Ujowasi ya, amāŋ géē cigbihi kwu ɛ̄gbā ō gba ku Ujehofa ɛgɛ nɛ alɛwa ku Ācɛ O Yɛce Ukraist a ya igbihi nɛ ayikpo ku Ujisɔsi a gekwu a? Ohi a wɛ ehee! Alɔ lɔfu lɔtuce kpɔcii ka igbihi néē kwu ācɛ néē lɛ anɔ tu uwa ɛyi a u kpo gā ɔkpanco, aala ɔhá a géē gɔbu yɔ i gba Ujehofa ɛ̄gbā ɔwɛ nɛ ó dɔka a, Ujehofa kē géē gɔbu yɔ i teyi kwu uwa. Ɔdiya nɛ alɔ lɔfu lɛ ɔtu ō ce ɛgɛnyā a?

ĀCƐ ƆLƐ UJEHOFA GÉĒ GƆBU YƆ I GBA Ɔ Ɛ̄GBĀ ƆWƐ NƐ Ó DƆKA A

6. Eko ɛyɛɛyɛyi ɛta nyá nɛ alɔ gáā leyi yɛ ɔ a?

⁶ Ɔdiya nɛ alɔ lɔfu lɔtuce kpɔcii ka ācɛ ɔlɛ Ujehofa géē gɔbu yɔ i gba ɔ ɛ̄gbā ɔwɛ nɛ ó dɔka, kwu eko olɔnɔ nōo yɔ i wa ɛcɔbu a? Ohigbu ka Ubáyíbu lɛ ɔ teyi peee, ka eko nɛ alɔ lā anu a wɛ ɛyɛɛyi gwu eko ku ācɛ Isrɛlu mla eko ku Ācɛ O Yɛce Ukraist igbihi nɛ ayikpo a gekwu a. Ohigbu ɛnyā, alɔ leyi yɛ eko ɛyɛɛyɛyi ɛta nyā lɔɔlɔhi: (1) Eko ku ācɛ Isrɛlu ku ikee a, (2) eko ku Ācɛ O Yɛce Ukraist igbihi nɛ ayikpo a gekwu a, mla (3) eko ku alɔ nyā nōo wɛ ‘eko nēé tū kéē lɛ aɔ́dā dóódu yá ɛ̄yīpɛ̄’ a.—Ācot. 3:21.

7. Ɔdiya nɛ abɔ i hɛ ācɛ Isrɛlu nōo hayi kpaakpa a iyē eko nɛ aɔcɛ́ mla ācɛ Isrɛlu ɔhá a gbɔɔ ō ya ɔdobɔbi ŋ ma?

⁷ Eko ku ācɛ Isrɛlu ku ikee a. Eko kpii gbɔbu ɛɛ kóō kwū a, Umosisi da ācɛ Isrɛlu a kahinii: ‘N géē kwú eko kpiíí, n kē jé ka ɛ̄cɔ̄bū aa gáā lɛlá wu ɔdā nōo le kpaakpa mɛ́mla aɛ́nɛ̄ é le kpaakpa ŋ́ mā gɛ ŋ́. Aa géē tá ɛlā kú Ɔwɔicō géē nyɔ̄ í lā ɛdɔ oyēeyī ɛdɔ ɛyɛ́ɛ́yí gwū ɛ̄nɛ̄ n da aa ká aa lā ā tá.’ (Obla. 31:29) Umosisi klla pi ācɛ Isrɛlu a ahɔ̄ ka ɔdaŋ nēé lɛ ikpɛyi olɔfu ya tu Ujehofa, é géē je uwa kpo ɔfiyɛ. (Obla. 28:​35, 36) Aɛlā nɛ Umosisi ka nyā le ya jila ɔkwɔɔkwɛyi? Ii gboo. Ihayi alɛwa, ɛyinɛhi ku aɔcɛ́ ku ācɛ Isrɛlu a ya aɔdobɔbi alɛwa ipeyi ku Ujehofa, ācɛ a klla yɛce uwa ipu ō gba aɔwɔ ɛkɛmgbɛ ɛ̄gbā. Ohigbu ɛnyā, Ujehofa lɛ itala ya ācɛ Isrɛlu a ohigbu uce ō ya obɔbi ku uwa, ó klla jɛga lɛ aɔcɛ́ ku Isrɛlu a kéē lé ɔcɛ́ ikpɛyi ku uwa gɛ ŋ. (Isík. 21:​25-27) Amáŋ eko nɛ ācɛ Isrɛlu nōo hayi kpaakpa a le má ka ɛlā nɛ Ɔwɔico ka a le ya jila ɔkwɔɔkwɛyi a, ó ya kéē lɛ ɔtu lɛ ō gɔbu yɔ i gba Ɔwɔico ɛ̄gbā kpaakpa.—Ayis. 55:​10, 11.

8. Ó cika ō hɛ alɔ idaago ka Ācɛ O Yɛce Ukraist ɛpleeko nɛ ayikpo a gekwu a ma ō gba Ujehofa ɛ̄gbā ɔwɛ nɛ ó dɔka a? Lɛ ɔ teyi peee.

⁸ Eko ku Ācɛ O Yɛce Ukraist igbihi nɛ ayikpo a gekwu a. Ó cika ō hɛ alɔ idaago ka Ācɛ O Yɛce Ukraist nōo yɔ i gba Ujehofa ɛ̄gbā kpaakpa a, ma ō gba ɔ ɛ̄gbā ɔwɛ nɛ ó dɔka a igbihi nɛ ayikpo a gekwu a? Ehee. Ujisɔsi tɛtɛ le ka taajɛ ka ācɛ alɛwa géē cigbihi kwu ɛ̄gbā ō gba ku Ujehofa. (Umát. 7:​21-23; 13:​24-30, 36-43) Ɔyikpo Upɔlu, Upita, mla Ujɔni le má peee ka akacɛ ku  Ujisɔsi a gbɔɔ ō ya jila ɛpleeko ku uwa a ɛ. (2 Utes. 2:​3, 7; 2 Upít. 2:1; 1 Ujɔ́n. 2:18) Igbihi nɛ Ujɔni nōo wɛ ɔyikpo amoomɛ a gekwu a, ācɛ nōo cigbihi kwu ɛ̄gbā ō gba ku Ujehofa a gáā wɛ ipu Ubabilɔn Nɛhi, nōo kwɛyi ɛjɛɛji ɛ̄gbā ō gba ku ɛkɛmgbɛ a. Ɛlā nɛ Ujisɔsi ka taajɛ a yɔ i ya jila yiili a.

9. Ɛgɛnyá nɛ eko nɛ alɔ lā anu a wɛ ɛyɛɛyi gwu eko ku ācɛ Isrɛlu ku ikee, mla eko ku Ācɛ O Yɛce Ukraist ɛpleeko nɛ ayikpo a gekwu a?

⁹ ‘Eko nēé tū kéē lɛ aɔ́dā dóódu yá ɛ̄yīpɛ̄ a.’ Eko nɛ alɔ lā anu a wɛ ɛyɛɛyi gwu eko ku ācɛ Isrɛlu ku ikee a, mla eko nɛ Ācɛ O Yɛce Ukraist a gbɔɔ ō cigbihi kwu ɛ̄gbā ō gba ku Ujehofa igbihi nɛ ayikpo a gekwu a. Ɔdi néē gē hi eko nɛ alɔ lā anu a? Igbalɛwa, alɔ gē hi eko nɛ alɔ lā anu nyā ka “eko nɛ̄ ɛcɛ gáā mɛ ā,” anu kē wɛ eko nɛ ɛcɛ obɔbi nyā géē wɛ oŋmɛyi a. (2 Utím. 3:1) Amáŋ Ubáyíbu mafu ku aɔdā nɛhi nyā nōo klla ligbo nɛhi a gbɔɔ ō ya eko ekponu. Ó kē géē gɔbu jaa gbeeko nɛ Ajɔɔcɛ nɛ Ukraist géē lé ɔcɛ́ ku nu a géē ya ku alɛɛcɛ kéē kwu jila iyē, klla géē ya ku ɛcɛ nyā kóō kwu piya Uparadais. É hi eko nyā, ka ‘eko nēé tū kéē lɛ aɔ́dā dóódu yá ɛ̄yīpɛ̄’ a. (Ācot. 3:21) Eko nyā gbɔɔ ɛpla ihayi ku 1914. Ɔdi néē je ya ɛyipɛ eko ɔɔma a? Ɛpleeko ɔɔma, é kwu Ujisɔsi i piya Ɔcɛ́ ɔkpanco. Ohigbu ɛnyā, Ujehofa klla lɛ ɔcɛ nōo géē lé ɔcɛ́ kwɛyi nu a lɛ kpɔ, ɔcɛ nōo géē lé ɔcɛ́ kwɛyi Udefidi Ɔcɛ́ nōo hayi kpaakpa a. Amáŋ, ó wɛ ɔcɛ́ ō ce ɔɔma foofunu nɛ Ujehofa je ya ɛyipɛ a ŋ. Eko kpii igbihi ɔɔma, Ujehofa je otabɔ lɛ ācɛ nōo gē gba ɔ ɛ̄gbā nōo yɔ ipu ɛcɛ nyā a, kéē gbɔɔ ō gba ɔ ɛ̄gbā ɔwɛ okpaakpa nɛ ó dɔka a kpɔ! (Ayis. 2:​2-4; Isík. 11:​17-20) Ó lɛ a, ācɛ nōo gē gba Ujehofa ɛ̄gbā icɛ a, géē ma ō gba ɔ ɛ̄gbā ɔwɛ okpaakpa nɛ ó dɔka a kpɔ?

10. (a) Ɔdi nɛ Ubáyíbu ka taajɛ lɛyikwu ɛ̄gbā ō gba ku ɔkwɛyi ɛpleeko ku alɔ nyā a? (Ayisáya 54:17) (b) Ɔdiya nɛ aakacɛ ɛgɛnyā wɛ ɛlā ō ta ɔtu kwu ɔtu a?

¹⁰ Jé Ayisáya 54:17. Gbɛla tu akacɛ nōo yɔ ipu ɛga ku Ubáyíbu nyā a: “Ó lɛ íyɛ́fú dúúmā nēé bī wā gaá le nuunu tá uwɔ nōo géē lɔfú yá uwɔ ɔdā dúúmā glá ŋ́”! Aɛlā nōo yɔ ipu ɛga ku Ubáyíbu nyā a yɔ i ya jila icɛ. Aɛlā ó ta ɔtu kwu ɔtu nōo ba nyā klla tɛɛma kwu eko nɛ alɔ lā anu nyā duu: “Ami, abɔ̄yī um ā gē nwū ācɛ ɔlɛ́ uwɔ ɛlā, N klla géē cē abahi klá uwá, klla í yá kú aá bá ɛbɔ́. Ɔdā olɔhi nɛ̄ a gē yá ipéyī Ɔwɔicō ā géē cɛ̄ gā uwɔ lɔfú iyē. A klla gáā yúúfi gɛ ŋ́. . . . É klla gáā lɛ abɔ kwu uwɔ glá gɛ ŋ́.” (Ayis. 54:​13, 14) “Ɔwɔ obɔ̄bíipú kú ɛcɛ nyā” abɔyi nu nōo lé ka Usetan a, i gáā ci uklɔ nɛ ācɛ ɔlɛ Ujehofa yɔ i ya ō nwu ācɛ ɔhá ɛlā lɛyikwu Ujehofa a gla ŋ. (2 Ukɔ́r. 4:4) Ɛ̄gbā ō gba ku ɔkwɛyi a gáā kwaajɛ ɛ, ācɛ ɔlɛ Ujehofa i kē gáā ma ō gba ɔ ɛ̄gbā kpaakpa ɔwɛ nɛ ó dɔka a ŋ. Ó gáā kwaajɛ ɛ, ó kē géē yɔ gā ogboogbo ɛcɛ. Ó lɛ iyɛfu duuma  néē bi gáā le nuunu ta alɔ, nōo géē ya alɔ lé gla ŋ!

ƆDI GÁĀ YA ƐCƆBU A?

11. Ɔdi cɛ lɛ alɔ jé kpɔcii ku aala ɔhá a géē lɛ ācɛ nōo géē yɔ i teyi kwu uwa, eko néē kwu ācɛ néē lɛ anɔ tu uwa ɛyi a u kpo gā ɔkpanco a?

¹¹ Ɔdi gáā ya ɛcɔbu eko néē kwu ācɛ néē lɛ anɔ tu uwa ɛyi a u kpo gā ɔkpanco a? Bla, ka Ujisɔsi wɛ ɔcɛ nōo gē gbo alɔ a. Anu wɛ otrɛyi ku ujɔ ku Ācɛ O Yɛce Ukraist a. Ujisɔsi ka peee kahinii: “Aá lɛ ɔkpani ékpó, anú kē wɛ Ohɔ́nyɛtá á.” (Umát. 23:10) Ujisɔsi nōo yɔ i lé ɔcɛ́ ŋma ɔkpanco a, géē gɔbu yɔ i teyi kwu ācɛ nōo gē yɛce ɔ a eko doodu. Ohigbu ka Ujisɔsi yɔ i gbo uwa a, Ācɛ O Yɛce Ukraist nōo yɔ ipu ɛcɛ nyā a i lɛ ɔdā duuma ō yuufi nu ŋ. Ó wɛ ɔkwɛyi ku alɔ i jé ɛjɛɛji ɛlā lɛyikwu ɛgɛ nɛ Ujisɔsi géē gbo ācɛ ɔlɛ nu ɛpleeko ɔɔma a ŋ. Ohigbu ɛnyā, alɔ leyi yɛ ocabɔ ku Ubáyíbu ōhī nōo lɔfu je ɔtu ō tu kwu ɔtu lɛ alɔ a.

12. Ɛgɛnyá nɛ Ujehofa bi le teyi kwu ācɛ ɔlɛ nu (a) igbihi nɛ Umosisi gekwu a? (b) igbihi nɛ Ujehofa lɛ uklɔ ku Ɛlayija piyabɔ a? (Má ifoto a.)

¹² Gbɔbu ɛɛ ku ācɛ Isrɛlu a kóō gā ipu Ajɛ Nɛ Ɔwɔico Cokonu Ō Je Lɛ Uwa a, Umosisi gekwu. Ɔdiya da ācɛ ɔlɛ Ɔwɔico a? Ujehofa ma ō je otabɔ lɛ ācɛ ɔlɛ nu igbihi nɛ Umosisi nōo hayi kpaakpa lɛ ɔ a gekwu a nɛɛ? Ehee. Abɔ é yɔ i gba Ujehofa ɛ̄gbā kpaakpa a, Ujehofa yɔ i ta uwa abɔ. Gbɔbu ɛɛ ku Umosisi kóō kwū a, Ujehofa da ɔ kóō lɛ Ujosuwa fu kóō bi ācɛ ɔlɛ nu jé ɔwɛ. Umosisi humayi bi ihayi alɛwa le nwu Ujosuwa ɛlā. (Oyɛb. 33:11; Obla. 34:9) O ka tu ɔ, ó klla lɛ acɛnyilɔ alɛwa ɔhá nōo cika jɛ nōo yɔ i bi ācɛ ɔlɛ Ɔwɔico a jé ɔwɛ duu. Ācɛ bɛɛka aotrɛyi nōo gē leyi kwu ígwu uluula, aɛ̄nɛ̄ o gē leyi kwu ígwu ku ofu ɛhɔ, ōhī ofu ce igwo, ōhī kē wɛ ígwu igwo. (Obla. 1:15) É leyi kwu ācɛ ɔlɛ Ɔwɔico a lɔɔlɔhi. Ɛlayija wɛ ocabɔ ku ɔcɛ nōo ya ɔdā ekponu ɔɔma. Ó yuklɔ lɔfu lɔfu ihayi alɛwa ō je otabɔ lɛ ācɛ Isrɛlu a kéē gba Ujehofa ɛ̄gbā kpaakpa. Amáŋ igbihaajɛ, Ujehofa lɛ uklɔ ku nu piyabɔ ō gáā yuklɔ ipu Ujuda. (2 Aɔ́cɛ́ 2:1; 2 Úklɔ́ 21:12) Ācɛ nōo hayi kpaakpa ipɔɔma igwo ku ācɛ Isrɛlu a i klla lɛ ɔcɛ duuma ō bi uwa jé ɔwɛ gɛ ŋ? Ehee. Ɛlayija humayi bi ihayi alɛwa le nwu Ɛlayisa ɛlā. Ó klla lɛ ‘ayi ku ācomɛ́ɛbɛ’ a ōhī nōo humayi miyɛ ɛlā ō nwu a duu. (2 Aɔ́cɛ́ 2:7) Ohigbu ɛnyā, alɛwa ku acɛnyilɔ nōo hayi kpaakpa yɔ nōo gē yɔ i bi ācɛ ɔlɛ Ɔwɔico a jé ɔwɛ. Ujehofa gɔbu yɔ i ya ɔdā nōo wɛ ococɛ ku nu a jila, ó kē leyi kwu ācɛ nōo gē gba ɔ ɛ̄gbā kpaakpa a lɔɔlɔhi.

13. Ɔdi nɛ Ujehofa cokonu ku nu lɛ alɔ nōo yɔ ipu ɔkpá ku Ācɛ Uhíbru 13:5b a? (Má ifoto a.)

¹³ Mla aocabɔ nyā ipu ɔtu, ɔdi nɛ a gbɛla kóō géē ya ɛcɔbu eko néē kwu ācɛ ohile néē lɛ anɔ tu uwa ɛyi a u kpo gā ɔkpanco a? Alɔ i cɛgbá ō  lɛ ɔtooplico ŋ. Ubáyíbu da alɔ ɛlā ɔkwɛyi ō ta ɔtu kwu ɔtu nyā kahinii: Ujehofa i gáā cigbihi kwu ācɛ ɔlɛ nu nōo yɔ ipu ɛcɛ nyā a gboogboo ŋ. (Jé Ācɛ Uhíbru 13:5b.) Bɛɛka Umosisi mla Ɛlayija a, ígwu ligii ku Ācɛ O Yɛce Ukraist néē lɛ anɔ tu uwa ɛyi nōo yɔ i bi alɔ jé ɔwɛ icɛ a, jé ɛgbá kóō nwu ācɛ ɔhá ɛlā. Ŋmiifi ihayi alɛwa, ayinɛ alɔ nōo wɛ ipu Ígwu Nōo Gē Leyi Kwu Ɔwa Ku Alɔ a, humayi nwu acɛnyilɔ nōo wɛ ipu ígwu ku aala ɔhá ɛlā ɛgɛ néē géē bi ācɛ ɔlɛ Ɔwɔico jé ɔwɛ. Ocabɔ mafu, é lɛ ōmiya ku inɔkpa alɛwa kwaajɛ ō nwu anyakwɔcɛ ku ujɔ ɛlā, ācɛ o leyi kwu usɛkut, Ígwu Nōo Gē Leyi Kwu Abɔ Ku Ɛga O Yuklɔ Ku Alɔ, ayinɛ nōo gē leyi kwu aya ɛyɛɛyɛyi ipu Ubɛtɛlu, mla ācɛ ɔhá. Ígwu Nōo Gē Leyi Kwu Ɔwa Ku Alɔ a abɔyi uwa humayi nwu ayinɛ nōo gē je otabɔ lɛ uwa a ɛlā. Ayinɛ nōo gē je otabɔ lɛ uwa nyā hayi kpaakpa yɔ i yuklɔ alɛwa ipu ɔwa ku Ujehofa babanya. É kē le tutu lɔɔlɔhi ō yɔ i leyi kwu aala ku Ukraist a, igbihi néē lɛ ācɛ néē lɛ anu tu uwa ɛyi a kpo gā ɔkpanco.

14. Ɔdi wɛ ɔcɛla ku ɔka ō ka ku alɔ nyā a?

¹⁴ Ɛnyā wɛ ɔcɛla ku ɔka ō ka ku alɔ nyā a: Ɛpleeko nɛ eko ku owe nɛhi a le ba, néē kwu ācɛ ohile néē lɛ anɔ tu uwa ɛyi a u kpo gā ɔkpanco, ācɛ ɔlɛ Ujehofa nōo yɔ ipu ɛcɛ nyā a géē gɔbu yɔ i gba ɔ ɛ̄gbā kpaakpa. Alɔ ta Ujehofa ahinya ku ɛnɛɛnɛ ɔcɛ o gbo alɔ nɛ ó je lɛ alɔ Ujisɔsi Ukraist, nōo géē ta ācɛ ɔlɛ Ɔwɔico abɔ kéē gɔbu yɔ i gba Ujehofa ɛ̄gbā kpaakpa a. Alɔ jé ka ɛpleeko ɔɔma, opiyatɔha ku aéwo nɛ Ubáyíbu hi ka Ugɔgu ku Umagɔgu a géē gbɔɔ ō ya ācɛ ɔlɛ Ɔwɔico ŋmo. (Isík. 38:​18-20) Amáŋ o ya ŋmo ku eko kpii ɔɔma i gáā ya ku ācɛ ɔlɛ Ɔwɔico kéē ma ō gba Ujehofa ɛ̄gbā ŋ. Ujehofa géē nya ācɛ ɔlɛ nu ta piii! Ipu ɛbɛ éyi nɛ ó má a, ɔyikpo Ujɔni má “ɛwa nɛ̄hi” ku aala ɔhá ku Ukraist a. É da Ujɔni ka “ɛwa nɛ̄hi” nyā wɛ ācɛ nōo “wi ŋmá eko kú ákanya nɛ̄hi ā á.” (Mafú 7:​9, 14) Ohigbu ɛnyā, alɔ jé kpɔcii ka é géē lɛ ogbotu!

15-16. Ɛgɛ nɛ ɔkpá ku Ɔdā Nēé Mafú Lɛ Ujɔ́ni 17:14 ka a, ɔdi nɛ ācɛ néē lɛ anɔ tu uwa ɛyi a géē yɔ i ya ɛpleeko ku ɛfú ō kpo ku Amagɛdɔn a, ɔdiya nɛ ɔɔma kē wɛ ɔdā ō ta ɔtu kwu ɔtu a?

¹⁵ Naana kpɔ a, ācɛ ōhī lɔfu gbɛla kahinii: ‘Ɔdi nɛ ācɛ néē lɛ anɔ tu uwa ɛyi a gáā ya igbihi néē lɛ uwa kpo gā ɔkpanco a?’ Ubáyíbu lɛ ɔka ɔɔma  cila. Ubáyíbu ka ka aigɔmɛnti ku ɛcɛ nyā géē “kpɛ́fú tú Ɔyí álá ā.” Ku ɛlā ɔkwɛyi a, é gáā yale gla ŋ. Ubáyíbu da alɔ kahinii: “Ɔyí álá a . . . géē yá uwā lé.” Anyɛ kē gáā ta ɔ abɔ a? Ubáyíbu klla lɛ ɔka ɔɔma cila kpɔ. Ubáyíbu hi uwa ka ācɛ nɛ Ɔwɔico “hīgwú,” “fu,” néē “klla háyi kpaakpa ā.” (Jé Ɔdā Nēé Mafú Lɛ Ujɔ́ni 17:14.) Anyɛ néē wɛ a? Ācɛ néē lɛ anɔ tu uwa ɛyi néē heyi ŋma ɔlekwu a nɛ! Ohigbu ɛnyā, ɛpleeko nɛ eko ku owe nɛhi a le ba, néē lɛ ācɛ amoomɛ néē lɛ anɔ tu uwa ɛyi nōo yɔ ipu ɛcɛ nyā a kpo gā ɔkpanco, uklɔ aflɛyi néē lɛ ō ya a wɛ ō kpɛfú. Ɛnyā wɛ ɛnɛɛnɛ uklɔ ibi! Ōhī ku ācɛ néē lɛ anu tu uwa ɛyi a, wɛ ācɛ nōo gē nuunu tu ācɛ ɔhá gbɔbu ɛɛ néē je piya Ācɛ Ocijali Ku Ujehofa a. Ōhī ku uwa kóō wɛ icɔɔja gbɔbu duu. Amáŋ é kwu piya Ācɛ O Yɛce Ukraist ɔkwɛyi klla le nwu ō lā ɛbɔ mla ācɛ ɔhá. (Ugal. 5:22; 2 Utes. 3:16) É ma ō cɛtra ɛfú ō kpo. Amáŋ igbihi néē lɛ uwa heyi gā ɔkpanco, é géē ba Ujisɔsi mla aalelekwu otɛhɔ a iyē ō nuunu tu aolɛla ku Ɔwɔico ipu ɛfú ō kpo amoomɛ a.

¹⁶ Gbɛla tu ɛlā nyā! Ipu ɛcɛ nyā, ōhī ku ācɛ néē lɛ anɔ tu uwa ɛyi a kwu hilokplici ɛ, ōhī ku uwa i klla lɔfu iyē gɛ ŋ duu. Amáŋ boobu néē lɛ uwa heyi ō lā oyeeyi ɔkpanco, é géē je piya alelekwu olɔfu nɛhi nōó gáā kwū gboogboo gɛ ŋ. É klla géē fu uwa ō nuunu tɔha mla Ujisɔsi Ukraist nōo wɛ Ɔcɛ́ ku uwa, Icɔɔja Olɔfu a. Igbihi néē lɛ ɛfú ku Amagɛdɔn a kpo, é géē yuklɔ tɔha mla Ujisɔsi ō je otabɔ lɛ alɛɛcɛ nōo yɔ ipu ɛcɛ nyā a kéē kwu jila iyē. Ó lɛ aafu ŋ, ɛpleeko néē yɔ ɔkpanco a, ó géē tɔɔtɛ lɛ uwa ō je ɛnɛɛnɛ otabɔ lɛ ayinɛ uwa néē yihɔtu ku uwa nōo yɔ ipu ɛcɛ nyā, fiyɛ ɛgɛ néē lɔfu ya lɛ uwa eko néē wɛ ācɛ nōó jila iyē ŋ ma!

17. Ɛgɛnyá nɛ alɔ bi le jé ka ɛjɛɛji ācɛ nōo gē gba Ɔwɔico ɛ̄gbā a géē lɛ ogbotu ɛpleeko ku ɛfú ō kpo ku Amagɛdɔn a?

¹⁷ A wɛ ipu ígwu ku aala ɔhá a? Ɔdaŋ ka ó lɛ a, ɔdi wɛ ɔdā ocɛgbá nɛ a cika ō ya eko nɛ ɛfú ku Amagɛdɔn a gbɔɔ a? Ɔdā nɛ a cika ō ya a yɔ a: Kpɔtuce Ujehofa cɛɛ ku a yɛce ɔwɛ nɛ ó gē mafu a. Ɔdi nɛ ɔɔma lɛ ō ya mla ɔ a? Ubáyíbu ta alɔ ɔtu kwu ɔtu kahinii: “Aá le pɛ́ kwu ga ipú inū ɔlɛ́ aá ka aá gaá lɛ ɔwɛ gwū tū īyī aá. Aá kwú īyī aá í tayínū jāā gbéeko nɛ̄ ɔnū kú Óndú ā gaá le gla.” (Ayis. 26:20) Ɛjɛɛji ācɛ nōo gē gba Ɔwɔico ɛ̄gbā kpaakpa nōo yɔ ɔkpanco mɛmla ɛcɛ nyā a géē lɛ ogbotu ɛpleeko ɔɔma. Bɛɛka ɔyikpo Upɔlu a, alɔ jé kpɔcii ka “aígbómína, ámāŋ aɔ́dā nēe . . . bá ī yá abālɔbányā mɛ́mla ɔdā nōo í yá ɛ̄cɔ̄bū ā í gáā hɛ́ alɔ ŋ́má ihɔtū kú nū glá ŋ́.” (Uróm 8:​38, 39) Blakwu ɛlā nyā eko doodu: Ujehofa yihɔtu ku uwɔ, ó kē gáā cigbihi kwu uwɔ gboogboo ŋ!