1. Ụka oyina angịlẹ ká Ohe ya ida wụ́ à tị́ ka rụ ka epwoohe wuu?

 ẸKA lụmẹ-lụmẹ kẹkpẹ, angịnyị nya iJihova kaa tọ wo nyori, ‘Ụka oyina angị hihi nya angịlẹ ká Ohe ya ida wụ́ à tị́ ka rụ ka epwoohe?’ Ahị kaa kụ irya ene-ene nyori angịhyẹ nya angịlẹ ká Ohe ya ida wụ ka hi jam ị-ịParadayịsị pwụ ụka ọhẹ kori ká ẹwụ nya Amagẹdọn á myị́ kpá. Ma Ẹpwang ọ-Kụ Gbeji nya Ọya Ọharwiye 15, 2013 tị họ kahị jẹ́ nyori angịlẹ kị hi lẹpwụ nya angịlẹ ká Ohe ya ida wụ́ ka rụ ka epwoohe ene ká Amagẹdọn ka dọmwụ.—Mat. 24:31.

2. Ịtọ ẹla oyina ahị tị́ ka tọ myị́? Ẹlịyẹ ahị tị́ wẹẹ ka kụ ẹhị yẹ ẹ-ẹpwụ nya ang ọjẹ́jẹ ọlẹ?

² Angịhyẹ nyahị ka tọ wo myị́ nyori: Ịyẹ à tị́ ka họ ta angịlẹ kị ri ‘ịkpịlọ ịkịla’ nya ịKịrayịsị ịlẹ kị ka gbịgba ha iJihova kpẹẹkpẹẹ odehe lụka nya “akama ọtụka okpelego”? (Jọn. 10:16; Mat. 24:21) Angịhyẹ ka chuko alẹ myị́ nyori ịwa nyị́ ka yé ọngọhẹ kpa ịwa ụgbẹyị ụka ká aanahị ịlẹ ká Ohe ya ida wụ́ á rụ ka epwoohe kpá kaka. Ahị kụ ẹhị yẹ oja imiiye ịhyẹ bwu Ụpwụ Igọgọ ịlẹ kị du ká irya ọlịnyị ka wẹ ẹpwụ nyaa myị́ wẹẹ. Ọọwa ahị ka kụ ẹhị yẹ ang odudu kahị baba nyọka chuko kaka lẹlẹ.

ẸLỊYẸ À TỊ́ KA HỌ KA?

3-4. Uko nya ẹlịyẹ angịhyẹ à tị́ ka chị myị́? Ịyẹ à tị́ du?

³ Angịhyẹ ka chuko myị́ nyori ịkpịlọ ịkịla nyị ka hwahị hi ẹlịlẹhị ụka ká ọngọhẹ nya Angị Kpẹhị Rịrị Ogu á hi jam ka kpaa ụgbẹyị kaka. Ọ chịkpẹẹ myị́ ká oja ịhyẹ bwu ẹpwụ nya Ụpwụ Ịgọgọ à ka du ká uhi ọlịnyị ka wẹ ẹpwụ nyaa. Ahị kụ ẹhị yẹ ọ-chụ pwokwita imiiye wẹẹ. Ọhọhẹ ri oja nya iJehoyada Ọngọkiliya Ọgbahị. O ri ọnchẹ ọlẹ kọ kaa họ kpẹẹkpẹẹ ẹ-ẹga nya Ohe. Ọwa bala iJehochẹba ahụ nyamwụ chewu ke iJowachị ụka kọ ri onjwo bala ọ-dọọ ụbwọ nyọka ri adịrahụ  ọnyịịla ọlẹ kọ họ kpẹẹkpẹẹ. Lụka ọlẹ ká okwirichi iJehoyada ji lahị wuu, iJowachị kaa họ ang ọnyịịla. Ma nyọlẹ ká iJehoyada gbu kpá, iJowachị yẹ ka ri ọngịnyị ọtịpyọ. Ọ ke ụrụ wo la alegbeju ịtịpyọ nya ala iJuda gbee kọọ nyẹẹkpẹ da iJihova.—2 Ego. 24:2, 15-19.

⁴ Ọ-chụ pwokwita ọkịla ri ịnya Angịnyị nya ịKịrayịsị ịlẹ kị hịhị ku ẹkpẹ nya alẹrụ nya iJisọsị. Ọlẹrụ ịJọn à ri ọngọlẹ kọ hyẹẹkpẹ ẹ-ẹpwụ nya alẹrụ wuu ẹẹ. Ọ da iru nya Angịnyị nya ịKịrayịsị ụbwọ yẹẹyẹẹ kpụ ị jẹ́ gbịgba ha iJihova higu-higu. (3 Jọn. 4) Jaabwọ ká alẹrụ ịkịla họ, ịJọn họ ụkụrwọ yẹẹyẹẹ nyọka chewu ke ala ọjịra-jịra bwu ẹga nya angị ji ẹkpẹ da ogu. (1 Jọn. 2:18; yẹ ang ọjẹ́jẹ bwu 2 Tẹs. 2:7.) Ma ụka ká ịJọn gbu kpá, iru nya angịnyị dọmwụ nyọka ji ẹkpẹ da ogu. Ẹ-ẹpwụ nya ẹka iwo ịmanyị-manyị, angị ji ẹkpẹ da ogu ịịwa dọmwụ nyọka mẹ ịnịịkịla jẹ bala ọ-ya iwe da ha abwẹla ọtịpyọ ẹ-ẹpwụ nya ọjịra-jịra.

5. Ẹlịyẹ oja imiiye ịwẹ à tị́ ka kpahị irya ka ka?

⁵ Oja imiiye ịlẹ kahị wo bwu Ụpwụ Ịgọgọ wẹ mẹjẹ nyori ẹla ụma ọlịnyị ka họ ta ịkpịlọ ịkịla nya ịKịrayịsị kori ká angịlẹ ká Ohe ya ida wụ́ á rụ ka epwoohe kpá? Ụka ọọwa, Angịnyị nya ịKịrayịsị ịlẹ kị họ kpẹẹkpẹẹ ka hwahị hi ang ọlẹ kị mẹjáa, jaabwọ ká iJowachị họ, lee ọ-dọmwụ nyọka ji ẹkpẹ da ogu lala Angịnyị nya ịKịrayịsị ịlụka ọlẹ ká alẹrụ nya iJisọsị rụ kpá? Ọwẹwẹ ri ehe! Ahị ka jẹ́ myị̀myị̀ nyori ụka ká angịlẹ ká Ohe ya ida wụ́ á rụ bwu odehe ọlẹ kpá, angịlẹ kị ri ịkpịlọ ịkịla ka kịnyaa la ọ-gbịgba ha iJihova ụ-ụgbẹyị ọkpakpa, ọ tị ka kpahị jwaa ịnyịnyị. Ịyẹ tị́ du kahị ka jẹ́ ẹlẹwẹ myị̀myị̀?

ỊGBA ỌGBAGBA OCHERI-CHERI Á KA TA AYỊREJI KA

6. Ụka ịta iyina ahị tị́ wẹẹ ka ya ẹla rụ kpii?

⁶ Ịyẹ tị́ du kahị ka jẹ́ myị̀myị̀ nyori ịgba ọgbagba ocheri-cherị á ka ta ayịreji lụka olujwo ọlẹ kọ juwa ị-ịlahị ka? Chajị nya ang ọlẹ kahị jẹ́ bwu ịBayịbụụ u-uhye nya ụka ọlẹ kahị wẹẹ hịhị lẹẹlẹẹ ịnyị. Ụka ọlẹẹlẹẹ datị yẹẹyẹẹ hi ụka nya ala Isirẹlụ bala ụka ọlẹ ká alẹrụ gbu kpá. Lẹ ahị kụ ẹhị yẹ ụka ịta ịlẹ rige-rige wẹẹ: (1) Ụka nya ala Isirẹlụ inyogo, (2) ụka ọlẹ ká alẹrụ gbu kpá, bala (3) ụka nyahị, kọ ri “ụka ọlẹ ká Ohe Oluhye ka ma ang myị́ ang wuu họ onyeewe.”—Ụkụr. 3:21.

7. Nanana nyori ịdịrịhụ bala iru nya angịkịla chụ nyọka họ ang ọtịpyọ, ịyẹ tị́ du ká ẹhị ọrịrịị-rịrị á gụ ala Isirẹlụ ịhyẹ myị́ ka?

⁷ Ụka nya ala Isirẹlụ inyogo. Ụka ká iMosisi ja ka gbu, o byi ala Isirẹlụ yẹkẹẹ: “M̀ jẹ ụka kam gbu kpá, ala Isirẹlụ ka yụbwọ dụrụ ang onyobyi ọhọhọ kị ka pwa ẹla ọmẹjẹ nyam wuu deeji.” (Ehile. 31:29) IMosisi myị́myị́ da ọna-eji nyori kori ká ala Isirẹlụ nyị́ la egbeju ọngịrị, ị ka rụ ka ọpyị nya ọnyọhị. (Ehile. 28:35, 36) Ẹlẹwẹ họ jịra? Ee. Ẹ-ẹpwụ nya ẹka ohu ịmanyị tị́, ịdịrịhụ lụmẹ-lụmẹ chụ nyọka họ ang ọtịpyọ bala ọ-hụ angịnyị nya Ohe ahị. Ọọwa du ká iJihova yẹ angịtịpyọ nyaa akama, ọ́ tị ya iwe da adịrahụ ọhọ-lọhẹ kpeji kaka ịnyịnyị. (Isi. 21:25-27) Ma ụka kị yẹ nyori Omyi Ẹla nya Ohe họ jịra, ọọwa ya ugbodu ojuju haa nyọka gbịgba ha iJihova kịnyaa.—Ayị. 55:10, 11.

8. Ọ ka lahị ẹbyẹbyị nyọlẹ Angịnyị nya ịKịrayịsị ịla oyi oheeye juka ẹpwụ nya ang ọtịpyọ ọhọhọ? Ịyẹ tị́ du ká ya ịnyị?

⁸ Ụka ọlẹ ká alẹrụ gbu kpá. Ọ ka lahị ẹbyẹbyị nyọlẹ ká Angịnyị nya ịKịrayịsị ịlụka ọwẹ jẹ́ họ ang ọtịpyọ? Ọ́ ka lahị ịnyị kpong-kpong ka. IJisọsị ya neeji nyori ụmụmẹ nya angịnyị nyị ka nyẹẹkpẹ da ogu. (Mat. 7:21-23; 13:24-30, 36-43) Alẹrụ ịPọlụ, iPita, bala ịJọn họ kahị jẹ́ nyori ọmwụ ọyẹyẹ ọwẹ dọmwụ nyọka họ jịra lụka nyaa lẹ. (2 Tẹs. 2:3, 7; 2 Pit. 2:1; 1 Jọn. 2:18) Nyọlẹ ká ọngọhyẹẹkpẹ nya alẹrụ gbu kpá lẹ, angịlẹ kị ji ẹkpẹ da ogu à wẹ ka ri ụpa  nya ịBabịlọn Ọtụka, kọ ri ọ-tụ jula awụlẹ nya ịgba ọgbagba nya ịnịịkịla ịla odehe wuu, lẹlẹ. Ẹla ọlẹ ká iJisọsị ya neeji à wẹẹ họ jịra lẹ.

9. Ányị ụka ọlẹ kahị ji lẹẹlẹẹ à tị́ datị hi ụka nya ala Isirẹlụ bala ụka nya Angịnyị nya ịKịrayịsị ịla oyi oheeye?

⁹ “Ụka ọlẹ ká Ohe Oluhye ka ma ang myị́ ang wuu họ onyeewe.” Ụka nyahị datị hi ụka nya ala Isirẹlụ inyogo bala ụka nya oyi oheeye nya Angịnyị nya ịKịrayịsị. Ányị ị tị́ ka jẹ́-ẹ wụrụ ụka nyahị ọlẹ? Ahị kaa wụrụ ụka ọlẹ kahị ji lẹẹlẹẹ nya ‘ụka ohyẹẹkpẹ’ nya odehe onyobyi ọlẹ. (2 Tim. 3:1) Ma ịBayịbụụ họ kahị jẹ́ nyori ụka ọhẹ ọlẹ kọ lụmẹ bala ọ-la udiyo gụ́ nyị dọmwụ lụka ọwẹ-ọwẹ ịnyịnyị. Ọ ka kịnyaa gbee ká Ịpyị-Adịrahụ ka tịrị angịnyị ehe ẹkpẹ wẹ ka la kpẹẹkpẹẹ bala ọ-yẹ odehe la ịparadayịsị. Ụka ọọwa ị wụrụ nya “ụka ọlẹ ká Ohe Oluhye ka ma ang myị́ ang wuu họ onyeewe” lẹ. (Ụkụr. 3:21) Ụka ọwẹ dọmwụ la ẹka nya 1914. Ịyẹ à tị́ nwụ họ lụka ọwẹ? Ohe hu iJisọsị ri Adịrahụ e-epwoohe. Lẹ, iJihova la adịrahụ ọlẹ kọ ka ku ọmwakpa nyamwụ myị́myị́ bwu ugbiyegu nya Adịrahụ iDevidi lẹ. Ma, a-adịrahụ o-riri kem à ri ang ọlẹ ká iJihova nwụ họ ka. Nyọlẹ kọ nọ pyịnyẹng kịlahị, ịgba ọgbagba nya ịlẹhị dọmwụ nyọka tịrẹkpẹ wẹ ka yeji ịnyịnyị! (Ayị. 2:2-4; Isi. 11:17-20) Ịngịhyẹ ka chọọ ịrị myị́myị́ wẹẹ?

10. (a) Ẹlịyẹ ịBayịbụụ à tị́ ya neeji gbe ụka nyahị u-uhye nya ịgba ọgbagba ocheri-cheri? (Ayịsaya 54:17) (b) Ịyẹ tị́ du ká ọmwụ ọyẹyẹ ịlịnyị ya ọ-jẹ́ myị̀myị̀ hahị?

¹⁰ Wa Ayịsaya 54:17. Kụ irya nya ọmwụ ọyẹyẹ ọlẹ: “Ang-abwọ nya ẹwụ ọnyị myị ọnyị kị họ nyọka kpa jahị dang á ka jụng họ ịngịngịhyẹ myị́ ka”! Omyi ẹla ịwẹ wẹẹ họ jịra alẹ. Omyi ẹla ọ-kpụ ọngịnyị ẹjẹ ịlẹ wẹẹ họ jịra lụka nyahị ịnyịnyị: “Am lịlọm à ka mẹ ang jẹ angịnyị nyang lẹ, ị ka pyẹ pyọọ ẹ-ẹpwụ nya okpunyi. À ka godayị giri-giri bwula ẹla ọ-họ kpakpa, á ka chị uko nya angịhyẹ ọ-ka yẹng ba ka. À ka hụ lokpunyi, á ka ju uhi nya ịngịngịhyẹ kaka.” (Ayị. 54:13, 14) Ohe Onyobyi la ịlọmwụ ká angịnyị “kaa gbịgba ha lala ohe nyaa” á dọmwụ ka wu ụkụrwọ nya ang ọmẹjẹ ọlẹ ká angịnyị nya iJihova wẹẹ họ kpa myị́ ka. (2 Kọr. 4:4) Ịgba ọgbagba ocheri-cheri tịrẹkpẹ wẹ ka yeji lẹ, ọ́ tị ka jẹ́-ẹ chịrị ẹnẹnẹhẹ myị́myị́ kaka. Ọ wẹ ka yeji gboyi myị́ oyi lẹ. Ang-abwọ nya ẹwụ ọhẹ-lọhẹ kị kpa jahị dahị á ka jụ ẹlẹlẹhẹ họ myị́ kaka!

ẸLỊYẸ À TỊ́ KA HỌ?

11. Ịyẹ tị́ du kahị jẹ́ myị̀myị̀ nyori Ohe-é ka nyẹẹkpẹ da angị ka jam odehe ụka ká angịlẹ ká Ohe ya ida wụ́ á rụ ka epwoohe kpá ka?

¹¹ Ẹlịyẹ à tị́ ka họ ụka ká angịlẹ ká Ohe ya ida wụ á rụ ka epwoohe kpá? Kpịtịya nyori iJisọsị  à ri Ọngọgbikpịlọ nyahị lẹ. Ọwa à ri olegbeju nya ọjịra-jịra nya Angịnyị nya ịKịrayịsị lẹ. IJisọsị ya gbagbịla yẹkẹẹ: “Ayịbaba ookpokpo anụ la lẹ. Ọngọọwa a ri ịKịrayịsị lẹ.” (Mat. 23:10) IJisọsị Adịrahụ nyahị á ka nyẹẹkpẹ da ụkụrwọ nyamwụ ẹnẹnẹhẹ ka. Nyọlẹ ká ịKịrayịsị la ịlọmwụ à kpa ụkụrwọ ọwẹ ụ-ụbwọ wẹẹ, angịjụgbẹyị nyamwụ á la ịngịngịhyẹ ka ju uhi ka. Ịlẹhị lẹ, áhị jẹ́ jaabwọ ká ịKịrayịsị ka bwu kpa angịnyị nyamwụ ụgbẹyị kpangga ụka ọwẹ lẹka. Lẹ, ahị kụ ẹhị yẹ oja ịhyẹ bwu ịBayịbụụ ịlẹ kị ka jẹ́-ẹ ya ahị ọdahile hahị wẹẹ.

12. Ányị iJihova à tị́ bwu kpẹhị rịrị angịnyị nyamwụ (a) ụka ká iMosisi gbu kpá? (b) ụka kọ ya ụkụrwọ ọkịla ha Ịlayịja? (Yẹ ifoto ịnyịnyị.)

¹² Ene ká ala Isirẹlụ ka ju ka Ọpyị Omyọnụ Ha wẹẹ, iMosisi gbu lẹ. Ịyẹ à tị́ họ ta angịnyị nya Ohe? IJihova hwabwọ la ọ-da angịnyị nyamwụ ụbwọ nyọlẹ ká iMosisi gbu kpá? Ehe. Ụka myị́ ụka ọlẹ kị ja họ kpẹẹkpẹẹ, iJihova kaa ha ịbaba nyaa haa. Ene ká iMosisi ka gbu, iJihova byoo nyị chụ iJochuwa nyọka kpa angịnyị nyọwa ụgbẹyị. IMosisi mẹ ang jẹ iJochuwa ẹ-ẹpwụ nya ẹka lụmẹ-lụmẹ ene lẹ. (Ehe. 33:11; Ehile. 34:9) Da ọọwa u-uhye, iru nya angịkịla juwa kị jẹ́-ẹ kpa ịlahị, bwula ọ-kpẹhị rịrị ebwo nya angị ụnụnụụnọ, ohwohwoohu, iwo ịrwịrịịrụ, tụ́ iwiwiiwo ịnyịnyị. (Ehile. 1:15) Anchẹ nya Ohe la angị kpẹhị rịraa yẹẹyẹẹ. Ahị yẹ ọ-chụ pwokwita ọlịnyị ẹ-ẹga nya Ịlayịja. Ọ họ ụkụrwọ nya ịlẹhị-ịlẹhị ẹ-ẹpwụ nya ẹka ịmanyị tị́ nyọka da ala Isirẹlụ ụbwọ gbịgba ha iJihova yẹẹyẹẹ. Ma nyọlẹ kọ nọ chẹẹ, iJihova kpọọ rụ ka iJuda kaka ya ụkụrwọ ọkịla họọ ụ-ụwa. (2 Ịdị. 2:1; 2 Ego. 21:12) Angịlẹ kị juwa e-ebwo nya ọnẹẹgba iwo nya Isirẹlụ la ịlaa ụbwaa? Ehe. Ịlayịja mẹ ang jẹ Ịlayịcha ẹ-ẹpwụ nya ẹka lụmẹ-lụmẹ ene lẹ. Angịhyẹ ịlẹ kị wụrụ “ogu nya alọmwụ” tị juwa kị mẹ ang jẹ nyọka jẹ́-ẹ kpa ịlahị yẹẹyẹẹ ịnyịnyị. (2 Ịdị. 2:7) Lẹ, iru nya angị họ kpẹẹkpẹẹ juwa ịlẹ kị ka jẹ́-ẹ kpa angịnyị nya Ohe ụgbẹyị. IJihova kịnyaa la ọ-họ irya nyamwụ jịra, ọ tị kpẹhị rịrị anchẹ nyamwụ ịlẹ kị họ kpẹẹkpẹẹ ịnyịnyị.

13. Ẹlịyẹ iJihova à tị́ chịhị eye ụ-ụpwụ nya ala iHiburu 13:5? (Yẹ ifoto ịnyịnyị.)

¹³ Nyọlẹ kahị kụ ẹhị yẹ ọ-chụ pwokwita ịwẹ wẹẹ, ẹlịyẹ a tị́ me irya kọ ka họ ụka ká ọngọhyẹẹkpẹ nya angịlẹ ká Ohe ya ida wụ́ á rụ ka epwoohe kpá? Áhị baba nyọka kpa apwụ cha ala ka. ỊBayịbụụ ya ẹlịlẹhị ọlẹ kọ juwa ụ-ụgbẹyị ọchịkpẹẹ ị-ịlẹ: IJihova á ka tụụbwọ hi angịnyị nyamwụ ila odehe ẹnẹnẹhẹ ka. (Wa Ala iHiburu 13:5.) Lala iMosisi bala Ịlayịja, angị ịmanyị-ịmanyị bwu  ẹpwụ nya angịlẹ ká Ohe ya ida wụ́, kị wẹẹ kpa ẹhị rịrị ogu alẹ, jẹ́ ọbaba nyọka mẹ ang jẹ angịkịla. Angị Kpẹhị Rịrị Ogu ịwẹ dọmwụ nyọka mẹ ang jẹ aanahị ịlẹ kị ri ịkpịlọ ịkịla nyọka kpa ịlahị lụka ọtata lẹ. Ọ-chụ pwokwita, ị nwụla ebe-apwụ lụmẹ-lụmẹ nọ nyọka mẹ ang jẹ angịgbahị nya ọjịra-jịra, angị kpẹhị rịrị isekut, Angị Kpẹhị Rịrị Egbeju-Ẹpwa, angị kpa ịlahị ị-ịBẹtẹlụ, bala angịkịla. Angị Kpẹhị Rịrị Ogu la ịlaa kaa tọchị-tọchị mẹ ang jẹ angịlẹ kị kaa da ịkọmitii ịhyẹ bala ịkịla nya Angị Kpẹhị Rịrị Ogu ụbwọ. Angị da ụbwọ ịwẹ kaa họ ụkụrwọ ọtụka-ọtụka lẹẹlẹẹ. Ị tị nwụlanọ yẹẹyẹẹ nyọka kịnyaa la ụkụrwọ nya ẹhị ọ-kpa rịrị ịkpịlọ nya ịKịrayịsị.

14. Ẹlịyẹ à tị́ ri egbeju nya ẹla ọlẹ kahị ya wẹ wuu?

¹⁴ Egbeju nya ẹla ọlẹ kahị wẹẹ ya à lẹẹ ẹẹ: Ụka ká ọngọhyẹẹkpẹ nya angịlẹ ká Ohe ya ida wụ́ á rụ ka epwoohe tụ ahị ju ocheju nya akama ọtụka okpelego, ịgba ọgbagba ochericheri ka nwa kịnyaa ám̀ odehe. Ahị ji Ohe obe chajị nya eji ọkpakpa nya ịKịrayịsị, ịngịngịhyẹ á ka nyẹ anchẹ nya Ohe ka. Ahị jẹ́ nyori ịGọọgụ ọla ọpyị nya ịmagọọgụ, kọ ri ọtụchị awụlẹ nya ẹpwụma, ka gba mịlahị ụka ọọwa. (Isi. 38:18-20) Ma ọ-gba mịlahị lụka o-kpii ọọwa á ka jụ ẹlẹlẹhẹ họ myị́ ka; ọ́ ka jẹ́-ẹ hu anchẹ nya iJihova abwọ la ọ-ka gbịgba họọ kaka. Ọ ka chaa da pyii! Ẹ-ẹpwụ nya ọyị ọyẹyẹ, ọlẹrụ ịJọn yẹ “iru nya angịnyị lụmẹ-lụmẹ” lẹpwụ nya ịkpịlọ ịkịla nya ịKịrayịsị kị ri angị be “bwu ẹpewụ nya akama ọtụka” okpelego. (Ọwụ. 7:9, 14) Ee, ahị jẹ́ myị̀myị̀ nyori ị ka chịda!

15-16. Jaabwọ ká ụpwụ nya Ọwụrụụ-wụrụ 17:14 ya, ịyẹ angịlẹ ká Ohe ya ida wụ́ à tị́ ka họ lụka nya ẹwụ nya Amagẹdọn? Ịyẹ tị́ du ká ọọwa ya ọhụ ojuju hahị?

¹⁵ Ọ tị́ lịnyị odu lẹ, ahị ka tọ wo myị́: ‘Angịlẹ ká Ohe ya ida wụ́ tị bẹ? Ịyẹ ị tị́ ka họ ụka kị rụ ka epwoohe kpá?’ ỊBayịbụụ wẹ ịtọ ẹla ọwẹ kpụrụrụ. O ya nyori idịrịhụ nya odehe nyị ka “dẹwụ ta Ọnyị Ọkpịlọ nya Ohe Oluhye.” Ẹlịlẹhị tị ri, ị ka mịleji. Ahị wa yẹkẹẹ: “Ọnyị ọkpịlọ ọọwa tị ka kụrwaa ịwa wuu.” Owo à tị́ ka dọọ ụbwọ? Ọgba ọwẹ wẹ ịtọ ẹla ọwẹ. Angịlẹ kọ “be ẹkọ wụrụ,” “chụchụ,” bala “angị chịla o-hu ọkịlẹtụ ha” ịnyị. (Wa Ọwụrụụ-wụrụ 17:14.) Owo anyị à tị́ ri angịwẹ? Angịlẹ ká Ohe ya ida wụ́ kị wuleji  bwula igu ịnyị! Lẹ ụka ká ọngọhyẹẹkpẹ nya angịlẹ ká Ohe ya ida wụ́ á rụ ka epwoohe tụ ahị ju ocheju nya akama ọtụka okpelego lẹ aalẹ, ọhẹ lẹpwụ nya akụrwọ ịlẹ kị ka họ jene ka ri ẹwụ ọdada. Ụkụrwọ ọkpọnchị à wẹ lẹ! Angịhyẹ ịlẹ ká Ohe ya ida wụ́ ri angị dẹwụ ene kịị wẹ ka ri Alibenu nya iJihova. Angịhyẹ nyaa dọmwụ ri isoja nya odehe ọlẹ ụka ọhẹ lẹ. Ma ụka ohyẹẹkpẹ ọlẹ kị wẹ ka ri Angịnyị nya ịKịrayịsị wẹẹ, ị jẹ́ jaabwọ kị ka kụ la okpunyi bala angịkịla lẹ. (Gal. 5:22; 2 Tẹs. 3:16) Ị pehi ẹla nya ẹwụ wuu nọ ka ọka lẹ. Ma, ụka kị tị rụ ka epwoohe kpá, ị ka họ ụkụrwọ bala iJisọsị bala alegu-ẹrụ ịla ịgọgọ, nyọka dẹwụ ohyẹẹkpẹ-ẹkpẹ ta aluji nya Ohe.

¹⁶ Kụ irya ju ẹlẹwẹ wẹẹ! Ám̀ odehe, angịhyẹ nya angịlẹ ká Ohe ya ida wụ ri ikwirichi kwụnyẹ-kwụnyẹ lẹ. Ma ụka kị wuleji ka epwoohe lẹ aalẹ, ị ka yẹ ka ri olegu ọtụka-ọtụka ọlẹ kọ ka jẹ́-ẹ gbu ẹnẹnẹhẹ kaka, kpụ ị ka jẹ́-ẹ yẹ jula iJisọsị Ọgẹwụ Ọtụka ẹ-ẹpwụ nya ẹwụ ọdada lẹ. Ụka kị da ẹwụ nya Amagẹdọn kpá, ị ka họ ụkụrwọ bala iJisọsị nyọka họ ká angịnyị ehe ka la kpẹẹkpẹẹ. Ịwẹẹ ọdada á juwa ka, ị ka họ ang ọnyịịla ha aanaa alẹng bala anyang bwu epwoohe gụ́ ọlẹ kị jẹ́ họ haa ụka kị jam odehe ọlẹ la ịnyịrọ ọlẹ kọ la ọkpẹẹkpẹẹ ka!

17. Ịyẹ tị́ du kahị jẹ́ nyori anchẹ nya Ohe wuu ka ye ewu ọ-chịke lụka nya ẹwụ nya amagẹdọn?

¹⁷ À ri ọngọhẹ lẹpwụ nya ịkpịlọ ịkịla? Ịyẹ a tị́ ka baba nyọka họ ụka ká ẹwụ nya Amagẹdọn ka dọmwụ? Ẹla ọọwa ri: Dahịhile iJihova, ká dịrẹ ẹla ọmẹjẹ nyamwụ mẹ. Ịyẹ à tị́ ka ji ẹpwụ nya ọowa myị́? ỊBayịbụụ ya ẹla ọlẹ kọ ka kpụ́ụhị ẹjẹ yẹkẹẹ: “Anụ rụ ka ube ọ no une nyanụ mẹ, anụ angịnyị nyam, kanụ tu ugbeyi ku ịlọnụ; anụ kpụ ịlọnụ ibaa lụka okpii gbee pwụ ụka [ká] agbama ka chịpwụrụ kpa ene.” (Ayị. 26:20) Anchcẹ nya Ohe ịlẹ kị họ kpẹẹkpẹẹ wuu, ila epwoohe tụ́ ịlẹ kị jam odehe, ka la ewu ọ-chịke ụka ọwẹ. Lala ọlẹrụ ịPọlụ, ahị jẹ́ myị̀myị̀ nyori “ịngịrị ịtụka-ịtụka lee ang ilijata lee ang ịlịlahị ịlẹ kị juwa ka warị . . . á ka jẹ́-ẹ la ọngịrị chịhị ebwo hi ọháha” nya Ohe kaka. (Rom. 8:38, 39) Kpịtịya ụka myị́ ụka nyori: À há iJihova, lẹ ọ́ ka nyẹẹkpẹ dang ẹnẹnẹhẹ ka!