1. A wen aal a di wan dem we get pik fi go a evn a-go de iina evn?

 UOL iip a ier ago, wi yuus tu biliiv se som a di wan dem we get pik fi go a evn a-go de pan di ort iina Paradais likl afta Aamagedan don. Bot iina The Watchtower fi Julai 15, 2013, wi did lorn se aal a di wan dem we get pik fi go a evn we stil de pan di ort a-go go a evn bifuo Aamagedan staat.​—Mat. 24:31.

2. A wa som piipl mait-a a wanda bout, an wa wi a-go luk pan iina da lesn ya?

² Bot som piipl mait-a a wanda: Wa a-go apm tu Jiizas “ada shiip” we de pan di ort wen di wos sofarieshan a gwaan? (Jan 10:16; Mat. 24:21) Som piipl mait-a fiil laik se dem naa go av nobadi fi tek kier a dem an fi tel dem wa fi du wen aal a di wan dem we get pik fi go a evn gaan a evn. Mek wi luk pan tuu tuori we de iina di Baibl we mek dem mait-a de wanda bout dem sitn ya. An den wi a-go luk pan som riizn we mek wi si se wi na’afi wori an fret bout dat.

WA NAA GO APM?

3-4. A wa som piipl mait-a a wanda bout, an wa mek?

³ Som piipl mait-a wanda ef nof piipl a-go tap sorv Jeuova wen aal a di breda dem we de pan di Govanin Badi gaan a evn an dem no de ya fi tel wi wa fi du. An dem mait-a fiil so kaaz a som sitn we dem riid iina di Baibl. Mek wi taak bout tuu a dem. Di fos wan a wen di Liida fi di Priis we niem Jeyaiyada did a sorv Jeuova wid aal a im aat, im an im waif did mek dem no kil wan yong bwai we did niem Jewuo’ash, an dem elp im fi ton wan gud king.  Wen Jeyaiyada did alaiv, Jewuo’ash did a gwaan gud, bot wen Jeyaiyada ded Jewuo’ash tap du di gud sitn dem we im yuus tu du. Im staat fi lisn tu som a di wikid tap-a-tap man dem iina Juuda an tap sorv Jeuova.​—2 Kr. 24:2, 15-19.

⁴ Di sekan tuori we wi a-go luk pan av fi du wid di Kristiyan dem we did liv afta aal a di apasl dem ded. Jan weehn a di laas apasl fi ded, an wen im did alaiv im elp di breda an sista dem fi eng aan an gwaan sorv Jeuova. (3 Jan 4) Fi wan gud wail Jan an di ada apasl dem did afi tan op gens di wan dem we did de iina di kanggrigieshan we did a go gens Krais Jiizas. (1 Jan 2:18; 2 Tes. 2:7.) Bot afta Jan ded, di wan dem we did a go gens Krais Jiizas tek uova di wol a di kanggrigieshan.

5. Wen wi riid dem tuu tuori ya, wa wi no fi fiil se a-go apm?

⁵ Yu tingk dem tuu tuori ya we wi luk pan miin tu se wen di wan dem we get pik fi go a evn gaan a evn, di ada shiip dem naa go du di sitn dem we dem a lorn an dem a-go staat fi ton gens Jiizas laik ou Jewuo’ash an di Kristiyan dem did tap du wa dem fi du? Wi nuo fi shuor se dat naa go apm! Kaa wen di wan dem we get pik fi go a evn gaan a evn, Jeuova a-go mek shuor se di ada shiip we a-go de pan di ort a-go get di sitn dem we dem niid fi gwaan sorv im an no tap.

JEUOVA PIIPL DEM A-GO GWAAN WORSHIP IM DI WIE OU IM WAAHN DEM FI WORSHIP IM

6. Wa a di chrii difrant taim dem we wi a-go luk pan ya nou?

⁶ Wa mek wi nuo fi shuor se Jeuova piipl dem aalwiez a-go worship im di rait wie aal wen di wos sofarieshan a gwaan? Wi nuo dat kaaz a wa di Baibl tel wi bout da taim ya we wi a liv iina. An dem taim ya difrant fram di taim wen di Izrelait dem did a liv an afta di apasl dem did ded. So mek wi luk pan dem chrii difrant taim ya: (1) Bak iina di taim a di Izrelait dem, (2) di taim afta di apasl dem did ded aaf, an (3) iina fi wi taim wen “di taim kom fi Gad mek evriting nyuu.”​—Aks 3:21.

7. Wa mek aal wen di king dem tap du wa Jeuova tel dem fi du it neehn mek di piipl dem we lov Jeuova gi op?

⁷ Bak iina di taim a di Izrelait dem. Likl bifuo im ded, Muoziz did mek di Izrelait dem nuo se afta im ded, dem a-go du bie wikid sitn an tap du di sitn dem we im tel dem fi du. (Dyuu. 31:29) An im did mek dem nuo se ef dem no lisn tu Jeuova, Jeuova wuda mek som ada piipl tek dem we an kyari dem go a dem konchri an ton dem iina sliev. (Dyuu. 28:35, 36) An dat apm fi chuu. Kaa fi uol iip a ier, nof a di king dem we did de iina Izrel did mek di piipl dem tap sorv Jeuova. An dis mek Jeuova tap diil wid dem an no gi dem no muor king fi ruul uova dem. (Izii. 21:25-27) Bot di Izrelait piipl dem we did stil a du wa Jeuova waahn dem fi du did api fi si se wa Jeuova se a-go apm apm fi chuu.​—Aiz. 55:10, 11.

8. Yu tingk wi shuda fraitn fi nuo se dem Kristiyan ya did tap worship Gad di rait wie? Tel wi wa mek yu se so.

⁸ Di taim afta di apasl dem did ded aaf. Wi no fraitn fi nuo se som a di Kristiyan dem we did de bout afta di apasl dem ded did tap worship Gad di rait wie. Dis a kaa Jiizas did se som Kristiyan a-go ton dem bak pan Jeuova an mek ada piipl ton  dem bak tu. (Mat. 7:21-23; 13:24-30, 36-43) An di apasl Paal, Piita, an Jan did se wa Jiizas se did a-go apm did staat fi apm aredi iina fi dem taim. (2 Tes. 2:3, 7; 2 Pii. 2:1; 1 Jan 2:18) So afta di laas apasl ded, di faalz Kristiyan dem ton wan big paat a Powaful Babilan, we a aal a di rilijan dem we naa sorv Gad di rait wie. So wi si se wa di Baibl se wuda apm apm fi chuu.

9. Ou di taim we wi a liv iina difrant fram di Izrelait dem taim an fram di taim afta di apasl dem ded aaf?

⁹ “Di taim kom fi Gad mek evriting nyuu.” Fi wi taim difrant fram di taim a di Izrelait dem, an fram di taim wen nof a di Kristiyan dem did ton dem bak pan Jeuova an a chrai fi mek ada piipl ton dem bak pan im tu afta di apasl dem did ded. Wi wuda se di taim we wi a liv iina a “di laas die dem” fi da wikid worl ya. (2 Tim. 3:1) Bot di Baibl mek wi nuo tu se wi no jos a liv iina di laas die dem, wi a liv iina wan taim we a-go gwaan til Gad Kindom a-go mek evribadi we a liv pan ort porfek, an a-go mek di ort ton iina wan paradais. Di Baibl mek wi nuo se da taim ya a “di taim fi Gad mek evriting nyuu.” (Aks 3:21) Da taim ya staat iina 1914. An a da taim de Jeuova mek Jiizas ton King iina evn. So Jeuova nou av wan king we a ruul fi im agen, an da king ya kom fram Dievid fambili. So Jeuova no onggl av wan king a ruul agen, bot im a-go mek piipl kyan worship im iina di rait wie agen tu. (Aiz. 2:2-4; Izii. 11:17-20) Bot yu tingk notn a-go mek piipl tap worship Jeuova di rait wie agen?

10. (a) Wen it kom aan tu di rait wie ou wi fi worship Gad, wa di Baibl se a-go apm? (Aizaiya 54:17) (b) Wa mek dem sitn ya we di Baibl se a-go apm mek wi fiil gud?

¹⁰ Riid Aizaiya 54:17. Tingk bout ou Jeuova se “notn we dem du fi fait gens yu naa go wok out.” An a dat a apm tide. An wa di Baibl se ya-so mek wi fiil gud tu, it se: “A Jeuova a-go tiich aal a yu pikni dem, an yu pikni dem a-go aalwiez liv iina piis. Yu a-go aalwiez a du wa rait. . . . Yu naa go fried a notn an notn naa go fraitn yu, kaa notn we mek yu fried naa go de roun yu.” (Aiz. 54:13, 14) Aal di devl we a ruul da worl ya kyaahn tap di priichin wok we Jeuova piipl a du. (2 Kor. 4:4) So yu av piipl we a worship Jeuova di rait wie agen, an notn naa go mek wi no worship  Jeuova di rait wie agen. Notn we piipl du fi fait gens wi naa go wok out!

WA A-GO APM?

11. Wa mek wi nuo fi shuor se wen aal a di wan dem we get pik fi go a evn gaan a evn, wi stil a-go aarait?

¹¹ Wi na’afi wori bout wa a-go apm wen aal a di wan dem we get pik fi go a evn gaan a evn. Kaa memba se Jiizas a wi Shepad an a im a di ed a di kanggrigieshan. Di Baibl tel wi se: “Gad mek im di Liida.” (Ifii. 1:22) An wi nuo se im a-go du wa im fi du. So di piipl dem we im a ruul uova we de pan ort na’afi fret bout notn. Wi no nuo evriting we im a-go du wen im a liid im piipl. Mek wi luk pan som tuori we di Baibl tel wi bout we mek wi si se wi na’afi fret wen im a liid wi.

12. Ou Jeuova did tek kier a im piipl dem (a) afta Muoziz did ded? (b) afta Ilaija did get wan neda wok fi du? (Luk pan di picha tu.)

¹² Muoziz did ded bifuo di Izrelait piipl dem get fi go iina di Lan we Jeuova pramis dem. Bot aalduo Muoziz did ded, it neehn miin tu se dem neva av sumadi we a liid dem. Kaaz az lang az dem a du wa Jeuova waahn dem fi du, Jeuova did a tek kier a dem. An bifuo Muoziz ded, Jeuova did tel im se fi mek Jashwa liid di piipl dem. So Muoziz did a tiich Jashwa fi du dis fi wol iip a ier bifuo. (Ek. 33:11; Dyuu. 34:9) An yu did av som uol iip a ada man we did a liid wol iip a Jeuova piipl tu. An dem did av difrant difrant nomba a piipl iina di gruup dem we dem a liid. (Dyuu. 1:15) So wi si se Jeuova did a tek kier a im piipl dem. A siem so, fi uol iip a ier Ilaija did a elp di Izrelait dem fi worship Gad iina di rait wie. Bot Jeuova did a-go sen im go dong a di sout paat a Juuda fi du wan difrant wok fi im. (2 Ki. 2:1; 2 Kr. 21:12) So yu tingk di wan dem we de iina di ten-chraib kindom a Izrel we Ilaija did a liid wudn av nobadi fi luk afta dem? Nuo sa! Kaa Jeuova did mek im chrien Ilaisha fi uol iip a ier bifuo dat. An dem did chrien som prafit fi tel di piipl dem wa fi du tu. (2 Ki. 2:7) So a nof man did de de fi tek kier a Gad piipl so wa Jeuova did waahn fi apm did stil a apm an im did a tek kier a di piipl dem we did a worship im.

13. Ou di laas paat a Iibruu 13:5 mek wi si se Jeuova a-go tek kier a wi? (Luk pan di picha tu.)

¹³ So bies pan wa wi si, wi na’afi fret wen aal a di wan dem we get pik fi go a  evn gaan. Di Baibl mek wi nuo se: Jeuova naa go lef im piipl fi fen fi demself. (Riid Iibruu 13:5b.) So jos laik ou Muoziz an Ilaija did nuo se dem niid fi chrien ada piipl, a siem so di breda dem pan di Govanin Badi a chrien ada piipl tu. So fi uol iip a ier nou, dem a chrien di breda dem fi liid an tek kier a Gad piipl dem. Laik dem av uol iip a skuul fi chrien di elda dem, di sorkit uovasiya dem, di breda dem we de pan di Branch Komitii, an di breda dem we inchaaj a di difrant difrant ting dem we dem du a Betel. An dem chrien ada breda tu. Di breda dem pan di Govanin Badi chrien ada bredaz fi elp dem wid di difrant difrant wok dem we dem du tu. A som siiros wok dem breda ya a du fi elp di Govanin Badi. So dem breda ya a-go kyan gwaan tek kier a Jiizas Krais shiip dem we a-go de pan di ort.

14. A wa a di mien ting wi get fram da paragraaf ya?

¹⁴ So wa wi a se a dat wen taim di wos sofarieshan suun don an aal a di wan dem we get pik fi go a evn gaan a evn, wi stil a-go av piipl pan ort we a worship Jeuova kaa Jiizas Krais a-go mek shuor se wi gwaan worship Jeuova. Ye, wi nuo se som konchri we di Baibl kaal Gag we kom fram Miegag a-go kom kom fait gens Jeuova piipl. (Izii. 38:18-20) Bot dem naa go get fi du wa dem waahn fi du, an dem naa go tap Jeuova piipl dem fram worship im kaa Jeuova a-go siev dem. Di apasl Jan did get wan vijan we im did si wan “big kroud a piipl” we “go chuu di torbl torbl sofarieshan.” (Rev. 7:9, 14) So wi si se Jeuova naa go mek notn apm tu im piipl dem.

15-16. Azkaadn tu Revilieshan 17:14, wa di wan dem we get pik fi go evn a-go du wen di Aamagedan waar a gwaan, an wa mek dis mek yu fiil gud?

¹⁵ Som piipl mait-a stil a wanda wa di wan dem we get pik fi go evn a-go du wen dem go de, bot di Baibl mek wi nuo wa dem a-go du. It tel wi se di govament dem a-go “waar gens di Biebi Shiip”. Bot di Biebi Shiip a-go win kaa di  Baibl se: “Di Biebi Shiip a-go biit dem.” An di siem vors mek wi nuo se im speshal piipl dem we im “kaal, pik, an we du we im se” a-go elp im. (Riid Revilieshan 17:14.) Dem wan ya a di wan dem we kom bak alaiv an de a evn. So wen taim di wos sofarieshan suun don, an di wan dem we get pik fi go a evn gaan a evn, wan a di fos ting dem we dem a-go du a fait gens Gad enimi dem. An dat a-go bi wan big ting. Nof a dem we did get pik fi go a evn yuus tu lov fi fait. An som a dem yuus tu fait iina waar tu bifuo dem ton wan Jeuova Witnis. Bot afta dem ton wan Jeuova Witnis dem lorn fi liv iina piis wid piipl. (Gya. 5:22; 2 Tes. 3:16) Bot afta dem go a evn dem a-go elp Jiizas an im ienjel dem fait iina di laas waar gens Gad enimi dem.

¹⁶ An aal wen yu tingk bout it, som a di wan dem we get pik fi go a evn oul an wiik ya nou, bot wen dem kom bak alaiv iina evn, dem a-go bi som chrang ienjel we kyaahn ded. An a dem a-go elp Jiizas Krais fi fait. Afta di Aamagedan waar don, a dem an Jiizas a-go elp piipl fi get porfek. So wi si se wen dem de a evn, dem a-go kyan du nof muor sitn fi wi dan wen dem de pan di ort.

17. Wa mek wi nuo se notn naa go apm tu Jeuova piipl wen di Aamagedan waar a gwaan?

¹⁷ Ef yu a wan a dem we a-go liv pan di ort, wen di Aamagedan waar staat, aal yu afi du a chos iina Jeuova an du wa im se yu fi du. An dat mait-a miin tu se yu a-go du wa di Baibl se an “gwaan iina unu ruum dem go aid. An lak di duor dem baka unu, an wiet likl bit til di jojment don.” (Aiz. 26:20) So dem taim de aal a Jeuova piipl dem a-go sief, weda dem de a evn ar pan di ort. Jos laik di apasl Paal, wi nuo fi shuor se “no . . . ruula, ar . . . notn we a apm nou an notn we a-go apm, wi mek [Gad] tap lov wi.” (Ruo. 8:38, 39) So memba se Jeuova lov yu an im naa go lef yu fi fen fi yuself.