1. Nayaimpiniam pujuartin ainiasha urutain mash nayaimpinmasha wearat?

 Nayaimpiniam pujuartin ainiana nusha urutain mashish wearat yaunchuka tu enentaimniuyaji. Nayaimpiniam pujuartin ainiana nu Armagedón jeamtai iwiakuk shiiram nunkanam nankaamakiar ishichik tsawan iijiai pujuartatui yaunchuka tu enentaimniuyaji. Tumaitkiusha La Atalaya 15 de julio 2013 uwitiniun nui nayaimpiniam pujuartin ainiana nuka Armagedón jeatsain mash nayaimpiniam weartatui tu jintinkratma unuimiatramji (Mat. 24:31).

2. Warintia enentaimminiaitiaj? Yamaisha wariniua unuimiatrattaj?

² Tumaitkiusha ti waitsatin tsawan atatna nuisha ju nunkanam tuke iwiaku pujuartatna nusha urukawartin tu enentaimminiaitji (Mat. 24:21; Juaṉ 10:16). Nayaimpiniam pujuartatna nu mash wearmatainkia iik juaktatjipia tu enentaimsar sapijmiamniaitji. Urukamtai tu enentaimiarminiait nuna nekaatai. Urukamtai tu enentaimiu pujushtiniaitiaj nusha nekaattaji.

WARI URUKASHTATAJ?

3, 4. Chikichkia warintia enentaimiarminiait? Urukamtai ainis enentaimiarminiait?

³ Testigos de Jehová takatrin irunturar chichampruiniana nu nayaimpiniam wearmatainkia ju nunkanam pujuartatna nuka Yuusan umirkatniunka iniaisachartimpiash tu enentaimminiaitji. Urukamtai tu enentaimminiaitiaj? Nu nekaatai. Jehoiadá ni nuari Jehosabeatjai  Jehoasan tsakatmararmiayi. Penker tsakatmarma asa Jehoás uunt anaikiamu ajas pujumiania nui penkera nuna turamiayi. Jehoiadá iwiaku pujumiania nuinkia Jehoaska Yuusnaka tuke umirniuyayi. Jehoiadá jakamtai Jehoaska yajauch aents armiania nuna anturak yajauchin najanatniun juarkimiayi (2 Crón. 24:​2, 15-19 TNM).

⁴ Yamaikia yaunchu Kristu aents urukawarmia nu nekaatai. Jesusan nemarsar weka wearmiania nui Juansha nemaras wekainiuyayi. Ni ainkia mash jakaru ai ninki juakmiayi. Ninkia Yuusan penker umirniuyayi tura chikitcha Yuusan penker umirkarat tusa yainkiarmiayi (3 Juaṉ 4). Yuusan nakitraru tuiniamun Kristu aentska nuna antukarain tusa Juan aneartarum tu wemiayi (1 Juaṉ 2:18) Juan jakamtai arusan Yuusan nakitraru armiania nu unuikiartamun Kristu aentscha nuna unuikiarturtinian juarkiarmiayi. Sunkur ukakamniana aitkiasan nu jintinkratma warik ukakamiayi.

5. Warintia enentaimsashtiniaitiaj?

⁵ Nayaimpiniam pujuartatna nu mash wearmatainkia Jehová umirkatin iniaisatjiash? Jehoás turamiania ainis Yuus umirkatin iniaisatjiash? Yaunchunia Kristu aents Yuusan nakitrarmiania ainis turatjiash? Atsa nuka turashtatji. Nayaimpiniam pujuartin mash wearmataisha iikia Yuuska tuke umirkartatji. Urukamtai ainis taji?

JEHOVÁ ENENTAIMTAMUKA MENKAKASHTATUI

6. Wariniua unuimiatrattaj?

⁶ Itiurchat nankaamastatkuisha Jehová enentaimtamuka menkakashtatui urukamtai ainis taji? Israel aents tura yaunchunia Kristu aentscha nankaamasarmiania nuka yamaiya juijiai apatkamka metekchaiti Yuusa chichame ainis tawai. Tuma asamtai Israel aents urukawarmia nuna tura Jesusa unuiniamuri jakarmatai wari nankaamasmia nunasha nuya ashi iwiarnartatna nu tsawan Yuus papiinium aujmatna nunasha nekaawartai (Tur. 3:21).

7. Israel aentscha warinma enentaimsar kakararminiuya?

⁷ Israel aents urukawarmia. Moisés jasattuk ajas Israel aents armia nuna junis timiayi: “Wi jakamtai̱ṉkia átumka ti yajauch túrakrum péṉker wekasatniun jintintiáitjiarmena nuka iniaisattarme” tu timiayi (Muis. 31:29). Nuyasha Yuus umireashkurmeka aran jukimiu atatrume tu timiayi (Muis. 28:​35, 36). Moisés timiania nu timiatrusan nankaamasmiashia? Ee. Uunt naamkaru armiania nu yajauchin turuiniakui Israel aentscha yajauchin turawarmiayi. Tuma asamtai Jehová Israel aents armiania nuna waitkiasarat tusa iniaisamiayi tura aintsan Israel aentsnumianka uunt anaikiamu achartatui tu timiayi (Isk. 21:​25-27). Antsu Jehovan umiriarmiania nuka Jehovaka ni tana nunaka timiatrusan turiniaiti tu enentaimsar kakararminiuyayi (Isa. 55:​10, 11).

8. Warimpia timiatrusan nankaamasmia?

⁸ Jesusa unuiniamuri jakarmatai wari nankaamasmia. Yuusan nakitraru ainiana nu nankamas jintiawartatui Jesús timiania nuka imiatrusan nankaamasmiayi (Mat. 7:​21-23; 13:​24-30, 36-43). Apóstol Pablo, Pedro nuyasha Juansha Yuusan nakitraru ainiana nu Kristu aentsun anankatniun juarkiarai  tu etserkarmiayi (2 Tis. 2:​3, 7; 2 Pit. 2:1; 1 Juaṉ 2:18). Jesusa unuiniamuri armiania nu mash jakarmatainkia Kristu aents Yuusan nakitraru armiania nuka wait chichaman jintinkratatniun juarkiarmiayi tura ninkia Uunt Babilonianam pachitkia ajasarmiayi. Uunt Babiloniaka antar religión ainiana nuna tawai. Ainis turunattawai tu tiarmiania aintsan nankaamasmiayi.

9. Israel aents tura yaunchunia Kristu aents pujuarmiania nujai metek urukamtai yamaikia aintsachuit?

⁹ Ashi iwiarnartatna nu tsawan. Israel aents tura yaunchunia Kristu aents nankaamasarmiania yamaikia aintsachuiti. Iikia amuukatin tsawannum pujaji (2 Ti. 3:1). Ashi iwiarnartin nu tsawancha jeattawai Yuus papii timiayi. Nu tsawanka yamai nankaamawai (Tur. 3:21). 1914 uwitin juarnakmiayi tura ashi aents tunaartincha ajasarmatai nuyasha ju nunka shiiram ajasmatai nui aminkiattawai. 1914 uwitincha Jehová warinia turamia? Davidnumia akinian Jehová Jesusan uunt anaik ekentsamiayi nu turunamtai arusan ataksha Jehová penker enentaimtamu juarnakmiayi (Isa. 2:​2-4; Ezeq. 11:​17-20 TNM). Jehová enentaimtamu ataksha menkakatpiash?

10. a) Jehová enentaimtajnia nuna aujmatuk Yuus papiisha warintiua? (Isaías 54:17 TNM). b) Isaías papiinium tana nusha urukamtai ikiakatmaj?

¹⁰ (Isaías 54:17 TNM aujsata). Jui junis tawai: “Warijainsha ajunmartaj tukama tujintramkattarme”. Nu yamai uminniawai. Nuyasha Yuus papii junis tawai: “Tura ashí ame uchirmeka Uunt Yus jintintiámu ártatui tura ni aṉkant pujustinkia ti núkap átatui. Nekas tuke péṉker túramuja̱i̱ umuchkiachmin matsastatme tura emetamunmaya̱ akankámu asam ashamkashtatme. Tura sapijmiaktin ashammainkia amiya̱ṉka yajá pujá asa jeartámchattawai” tu tawai. Nu chichamsha yamai uminniawai (Isa. 54:​13, 14). Yuusa chichame etsereajnia nuna iwianch penkesha emetashminiaiti (2 Kur. 4:4). Yamaikia Jehová ataksha penker enentaimtaji. Wait chichaman unuikiartamuka atak atsuttawai. Ii nemasri warinkish turuiniakuisha Jehová enentaimtamuka penkesha menkakashtatui.

 WARI URUKATTAJ

11. Nayaimpiniam weartin ainiana nu mash wearmataisha urukamtai sapijmiakchattaj?

¹¹ Nayaimpiniam weartin ainiana nu mash wearmatai wari turunat? Jesuska Kristu aentstin ti penker waitmaji nuya niyaiti ii uuntrinkia. Ninkia junis timiayi: Atumí uuntri aya Kristuiti tu timiayi (Mat. 23:10). Ninkia tuke ti penker waitmattaji. Tuma asamtai uruma nui nayaimpiniam weartin ainiana nu mash wearmatainkia iikia penkesha sapijmiakchattaji. Nu tsawantincha Jesús itiur yainmaktataj nu nekatsji. Tumaitkiusha Yuus papiinium aujmatna nu unuimiatkur shiir enentaimsamniaitji. Yamaikia nu nekaatai.

12. a) Moisés jakamiania nui Jehová Israel aentsun itiura wainkiarmia? b) Elías chikich nunkanam wemiania nui Jehová Israel aentsun itiura wainkiarmia? (Nakumkamusha iista).

¹² Canaán nunkanam jeatsuk Moiseska jakamiayi. Israel aentscha urukawarmia? Pachischamu juakarmiashia? Atsa antsu Israel aents umiarmiania nuinkia Jehová penker wainkiarmiayi. Ame jakakminkia Josué uuntri ajastatui Jehová Moisesan tu timiayi. Josuenka uuntri ajastin asamtai Moisés ti jintintiamiayi (Jiin. 33:11; Muis. 34:9). Nuyasha chikitcha Israel aents armia nuna penker wainkiatniun yaimkiarat tusar anaikiamusha iruniarmiayi (Deut. 1:15 TNM). Israel aentska ajapamu pujucharmiayi. Eliassha aintsan Israel aents armiania nu Jehovan enentaimtusarat tusa yainkiarmiayi. Israel aents nunkaani matsamiarmiania nuna yainkiat tusa Jehová Eliasan akupkamiayi (2 Ak. 2:1; 2 Crón. 21:12 TNM). Eliasan akupkamiania nui Israel aents araakani pujuarmiania nusha urukawarmia? Ajapamu ninki juakcharmiayi. Elías Eliseon yaunchuk unuiniaruyayi. Nuyasha Yuusna etserniu uchiri armiania nusha Israel aentsnaka yainkiarminiuyayi. Yuusna etserniu uchiri armiania nuka unuimiaru armiayash tumainti (2 Ak. 2:7). Yuusa chichame tana aintsan Yuusan umirin armiania nuna wainiainiasha tuke irunin armiayi.

13. Israernum 13:5 nuisha wari nekaamniaitiaj? (Nakumkamusha iista).

¹³ Nayaimpiniam pujuartatna nu mash wearmatainkia iisha urukattaj? Jehovaka penkesha ikiurmakchattaji Yuus papii tu tawai (Israernum 13:5 aujsata).  Moisés Eliasjai turawarmiania aintsan Testigos de Jehová takatrin irunturar chichampruiniana nusha chikich ni yachi ainian jintintin ainiawai. Kristu aents ainian penker wainkiarat tusar jintintin ainiawai. Uuntri ainiana nu tura wekas iikratin nuyasha Comité de Sucursalnum nui pachitkia tura Betelnum chikichan wainkiarat tusar anairamu nu mash unuimiatai iruneawai tura chikitcha ainis unuimiatai iruneawai. Testigos de Jehová takatrin irunturar chichampruiniana nusha nijiai takakmainiancha unuiniainiawai. Nijiai takakmainiasha ti nukap takatan achiakainiawai tura nu takatan ti penker najanainiawai. Ninkia ti penker jintintiamu ainiawai tuma asar Kristu aentsun penker wainkiartatui.

14. Nayaimpiniam pujuartin mash wearmataisha ju nunkanam pujuartatna nusha urukawartata?

¹⁴ Nayaimpiniam pujuartin mash wearmataisha ju nunkanam tuke iwiaku pujartatna nusha Jehovanka tuke enentaimtiartatui. Jesuska ii uuntri ajasu asa penker waitmaktatji. Uunt anaikiamu eketainiana nu Jehová enentaimtajnia nuna jatetmakartatji (Isk. 38:​18-20). Tumaitkiusha nukape tsawanka jatetmakchartatji. Jehovan enentaimtusarain tusar warinkisha turuiniaksha tujinkiartatui. Jehová uwemtikramprattaji. Untsuri aents ti waitsatin tsawannumia iwiaku jiniainian Juan iimiaj tukama wainkiamiayi. Jehová uwemtikrampratajnia nuna Juan iismiayi (Apu. 7:​9, 14).

15, 16. a) Apukarípsis 17:14 nui nayaimpiniam weartatna nusha Armagedontincha warinia turawartatui ta? b) Nu neka asar itiur enentaimiaj?

¹⁵ Nayaimpiniam weartatna nusha nayaimpiniam jeawarsha wariniak turawarat nuna Yuus papii aujmatui. Uunt naamkaru eketainiana nu “murikji̱a̱i̱sha mesetan najanawartatui” tu tawai. “Túrasha Murik nupetkartatui” nunasha tawai. Murikniasha nupetkatniun yaki yainkiarat? Yaki nayaimpiniam pujusartin ainiana nu yainkiartatui (Apukarípsis  17:14 aujsata). Nayaimpiniam pujuartin mash nayaimpiniam jeawarka arusan maniamunam pachinkiartatui. Nayaimpiniam pujuartatna nuka testigo de Jehová ajatsuk suntarnumkesha pachitkia armiayi turutskesha maniktinian wakerin armiayi. Tumaitkiusha testigo de Jehová ajasar shiir amajnaisar pujustinian unuimiatrarmiayi (Gál. 5:22 TNM; 2 Tis. 3:16). Tumaitkiusha nayaimpiniam jeawar Jesusjai tura Yuusa suntari ainiajai iruntrar Yuusa nemasri ainiajai manikiartatui.

¹⁶ Nayaimpiniam pujuartatna nu yamaiya jui ju nunkanam matsatainiana nuka uuntmantu ajasarush iruneawai tuma asar kakarmachu ainiawai. Tumaitkiusha nayaimpiniam wearka jacha artatui tura kakaram asar Jesusjai maniamunam pachinkiartatui. Armagedón nankaamasmatai ju nunkanam matsamsartatna nuna tunaartichu ajasarat tusar yainkiartatui. Nayaimpiniam pujuinia asar iin ti nukap yainmakartatji.

17. Armagedón tsawantinsha Jehová enentaimtatikia urukamtai itiurchat nankaamaschattaj?

¹⁷ Amesha ju nunkanam tuke iwiaku pujustaj takumka Armagedontincha warin itiurkatniuitiam? Jehová uwemtikrurtatui tu enentaimiu asam ni tana nu umirkatniuitme nuyasha Isaías 26:20 [TNM] nui tana nusha najanatniuitme, nuinkia junis tawai: “Wii shuar arumna nutirmeka, atumi pujutairin wayarum waiti apentiarum. Winia kajetair nankaamam umkatarum” tu tawai. Nayaimpiniam pujuartatna nu tura ju nunkanam pujuartatajnia nusha nu tsawantinkia ti shiir enentaimsattaji. Uunt naamkaru ainiana nusha yamai irunna nusha ukunam atatna nusha Yuusa anenkrattairiya penkesha akantamkichminiaitji tu taji (Rum. 8:​38, 39). Jehovaka anenma asa ajapa iniaitiamsashtatna nu penkesha kajinmatkip.