1. Namman chya hkam ai ni yawng gara aten hta sumsing lamu de shaga la hkrum na kun?

 NGAM nga ai namman chya hkam ai Hkristan ni, sumsing lamu de gara aten hta shaga la hkrum na kun? ngu, lai wa sai shaning law law hta Karai a mayam ni myit wa ai. Hara Magedon majan ngut ai hpang, aten loi mi daram, mungkan Hparadisu hta namman chya hkam ai nkau mi matut nga yang nga na ngu sawn la wa ai. Raitim, mungkan ga hta naw nga nga ai namman chya hkam ai ni yawng gaw, Hara Magedon majan n hpang shi yang, sumsing lamu de shaga la hkrum na ngu, 2013, July 15, Sin Langchyi kaw na chye wa ai.—Mat 24:31.

2. Gara ga san pru wa ai kun? Ndai sumhpa hta hpa lam bawngban na kun?

² Mungkan ntsa na Yehowa hpe sadi dung let nawku ai, Hkristu a “sagu kaga” ni “ru tsang kaba” laman, hpa byin na kun? ngu ai ga san pru wa ai. (Yhn 10:16; Mat 24:21) Tsawra ai namman chya hkam ai hpunau nauna ni, sumsing lamu de du mat ai hpang, kau da hkrum na hpe sagu kaga nkau mi myit tsang chye ai. Chyum Laika labau lahkawng a majaw myit tsang mat ai re. Gara labau ni kun? Hpa majaw myit n tsang ra ai kun? ngu ai lam ni hpe bawngban yu ga.

BYIN NA N RE AI LAM NI?

3-4. Nkau mi hpa hpe myit tsang chye ai kun? Hpa majaw kun?

³ Woi awn na Uphkang Hpung shang, namman chya hkam ai hpunau ni n nga mat yang, sagu kaga ni tengman lam kaw na shai mat na hpe nkau mi myit tsang chye ai. Chyum Laika labau nkau a majaw dai zawn myit tsang ai re. Labau lahkawng  hpe yu yu ga. Langai, Yosha ngu ai ma hpe sadi dung ai Hkinjawng Agyi Yehoiada hte madu jan Yehosheba makawp maga ya wa ai. Sadi dung ai hkawhkam byin na matu bau maka wa ai. Yehoiada asak hkrung nga ai laman, Yosha jaw ai hpe galaw ai. Yehoiada si mat ai hpang hta gaw nhkru wa ai. Nhkru ai du salang ni a ga hpe madat nna, Yehowa hpe kau da wa ai.—2 Hl 24:2, 15-19.

⁴ Kaga labau langai gaw, A.D. tsa ban 2 na Hkristan ni a lam re. Yawhan gaw kasa ni hta, hpang jahtum asak hkrung ngam nga ai wa re. Yehowa hpe matut sadi dung na matu, Hkristan ni hpe karum ya wa ai. (3 Yh 4) Yesu a kaga kasa ni zawn sha, shut ai sharin achyin lam ni, shut ai lailen ni, nawku hpung de n shang wa na matu, Yawhan shakut nna makawp maga ya wa ai. (1 Yh 2:18; 2 Ht 2:7) Raitim, Yawhan si ai hpang, nawku hpung na masha law law makam masham htak mat ai. Shaning loi mi laman, nawku hpung de makam masham htak ai lam ni chyam bra wa ai.

5. Labau 2 a majaw gara hku n sawn la ging ai kun?

⁵ Dai Chyum Laika labau 2 hpe yu nna, namman chya hkam ai ni sumsing lamu de lung mat ai shaloi, sagu kaga ni mung Yosha zawn, tengman lam kaw na shai mat na, A.D. tsa ban 2 na Hkristan ni zawn, makam masham htak mat na re ngu, sawn la ging ai kun? N sawn la ging ai. Shanhte sumsing lamu de du mat ai hpang, Karai Kasang hpe sagu kaga ni, jaw ai hku matut nawku na, shanhte hpe Karai Kasang matut lanu lahku na hpe kam mai ai. Hpa majaw kun?

CHYOI PRA AI NAWKU DAW JAU LAM GRIN NGA NA

6. Gara aten ladaw 3 a lam hkaja na kun?

⁶ Chyoi pra ai nawku daw jau lam grin nga na hpe hpa majaw kam mai ai kun? Anhte asak hkrung ai prat gaw, moi na Israela prat hte mung, A.D. tsa ban 2 prat hte mung grai shai ai ngu, Chyum Laika hta tsun da ai majaw re. Dai majaw, (1) moi na Israela prat, (2) kasa ni si ai hpang na prat, (3) anhte a aten re ai “nga yawng danghta hpe nnan bai gram ai prat” ngu ai aten ladaw 3 a lam ahkri ahkrai hkaja yu ga.—Kas 3:21.

7. Israela ni hte hkawhkam ni lam shut ai shaloi, sadi dung ai ni hpa majaw myit n daw mat ai kun?

⁷ Moi na Israela prat. “Ngai si mat ai hpang nanhte gaja wa htak mat nna, ngai hkang da ai lam hta na dam mat wa na ma rin dai gaw, ngai chye nga nngai” ngu, Mawshe n si shi yang Israela ni hpe tsun ai. (Trj 31:29) Gumlau yang bawng masha hku nna sa kau hkrum na ngu sadi jaw ai. (Trj 28:35, 36) Dai ga ni hte maren byin wa ai. Tsa ban shaning ni hta, hkawhkam law law gaw shut ai lam galaw nna, Karai a amyu masha ni hpe lam shai shangun wa ai. Dai majaw, nhkru ai Israela ni hpe Yehowa ari jaw ai. Israela ni hpe uphkang na ahkang n jaw sai. (Eze 21:30-32) Karai Kasang tsun ai hte maren byin wa ai shaloi, sadi dung ai Israela ni n-gun lu wa ai.—Esa 55:10, 11.

8. A.D. tsa ban 2 hta, Hkristan nawku hpung de makam masham htak ai lam ni chyam bra wa ai hpe mau ging ai kun? Sanglang dan u.

⁸ Kasa ni si ai hpang na prat. A.D. tsa ban 2 hta, Hkristan nawku hpung de makam masham htak ai lam ni chyam bra wa ai hpe mau ging ai kun? N mau ging ai. Yesu tau hkrau tsun da ai majaw re. (Mat 7:21-23; 13:24-30, 36-43) Kasa Pawlu, Petru, Yawhan ni gaw, shanhte a aten, A.D. tsa ban 1 hta, Yesu tsun wa ai hte maren, makam masham htak ai ni paw pru nga sai ngu tsun wa ai. (2 Ht 2:3, 7; 2 Pe 2:1; 1 Yh  2:18) A.D. tsa ban 2 hta gaw, Hkristan nawku hpung hta makam masham htak ai lam chyam mat ai. Shut shai ai nawku htung re ai Galu Kaba Ai Babelon a madung daw byin wa ai. Yesu tau hkrau tsun ai zawn gaja wa byin wa ai.

9. Anhte a aten gaw moi na Israela prat hte mung, A.D. tsa ban 2 na prat hte mung gara hku shai ai kun?

⁹ “Nga yawng danghta hpe nnan bai gram ai prat.” Anhte a aten gaw, moi na Israela prat hte mung, A.D. tsa ban 2 na prat hte mung shai ai. Anhte a aten hpe gara hku shaga ai kun? “Hpang jahtum na nhtoi ni” ngu kalang ta myit hkrup na re. (2 Tm 3:1) Hpang jahtum na nhtoi hte rau hpang nna, hpang jahtum na nhtoi htan aten grau na na prat a lam hpe mung Chyum Laika hta tsun da ai. Dai prat hpe “nga yawng danghta hpe nnan bai gram ai prat” ngu shaga ai. (Kas 3:21) Dai prat gaw 1914 hta hpang ai. Shinggyim masha ni hkum tsup mat hkra, mungkan ga hparadisu byin mat hkra, Meshia mungdan galaw ya ngut ai aten hta htum na re. Hpa ni hpe nnan bai gram ya wa sai kun? Yehowa gaw, Yesu hpe sumsing lamu Hkawhkam hku nna hkaw dung shangun ai. Sadi dung ai Hkawhkam Dawi a hkawhkam rusai bai paw pru wa shangun ai re. Uphkang ai lam hpe sha nnan bai gram ai n re. Kade n na ai aten hta sha, chyoi pra ai nawku daw jau lam hpe mung bai gram ya wa ai. (Esa 2:2-4; Eze 11:17-20) Bai gram da ai chyoi pra ai nawku daw jau lam gaw matut grin nga na kun?

10. (a) Anhte a aten na chyoi pra ai nawku daw jau lam hte seng nna Chyum Laika hta gara hku myihtoi htoi da ai kun? (Esaia 54:17) (b) Dai myihtoi ga ni gaw hpa majaw shalan shabran lam lu shangun ai kun?

¹⁰ Esaia 54:17 hpe hti u. “Nang hpe hpyen na matu galaw ai ri nhtu, langai mi tai na n rai” ngu ai myihtoi ga, dai ni hpring tsup nga ai. “Na a kashu kasha ni yawng, Yehowa a sharin achyin ai hkam la nna, shanhte a ngwi pyaw ai lam gaw, kaba la nga ai. Nang gaw ding hpring ai hte grin nga na rin dai: . . . hkrit kajawng ai mung, nang hte tsan wa nna, na a makau de ni lu na n rai” ngu ai myihtoi ga mung hpring tsup nga ai. (Esa 54:13, 14) Yehowa a masha ni a hpaji jaw ai bungli hpe “ndai mungkan ga na Hpara” Satan pyi hkum pat lu na n re. (2 Ko 4:4) Chyoi pra ai nawku daw jau lam chyam bra nga sai. Matut nna grin mat na re. Anhte hpe gasat na matu galaw ai laknak langai mi mung awng dang na n re.

 BYIN WA NA LAM NI

11. Namman chya hkam ai ni sumsing lamu de lung mat ai shaloi, masha wunawng wuwa kaba gaw n kau da hkrum na hpe hpa gaw kam shangun ai kun?

¹¹ Namman chya hkam ai ni sumsing lamu de lung mat ai shaloi hpa byin na kun? Yesu gaw anhte a sagu rem, Hkristan nawku hpung a baw re ai hpe dum u. “Nanhte a Agyi wa gaw Hkristu ngu ai wa sha rai nga ai” ngu Yesu asan sha tsun ai. (Mat 23:10) Hkaw dung nga sai Hkawhkam gaw, shi a lit hpe kangka hkra galaw na re. Hkristu nan, woi awn lam madun nga ai majaw, mungkan ga na shi a hpang hkan ai ni n hkrit ra ai. Dai aten, Hkristu gara hku woi awn lam madun na hpe ahkri ahkrai n chye ai. Raitim, shalan shabran lam lu shangun ai Chyum Laika labau nkau hpe yu yu ga.

12. (a) Mawshe si ai hpang, Karai a masha ni hpe Yehowa gara hku lanu lahku ai kun? (b) Elia kaga lit lu mat ai hpang Karai a masha ni hpe Yehowa gara hku lanu lahku ai kun? (Sumla hpe mung yu u.)

¹² Israela ni Ga Sadi Tawn Ai Mung de n shang shi yang, Mawshe si mat ai. Israela ni hpa byin mat ai kun? Sadi dung ai Mawshe n nga mat ai majaw, shanhte kau da hkrum ai kun? N hkrum ai. Shanhte sadi dung nga dingsa, Yehowa madi shadaw ya ai. Shanhte hpe matut woi awn na lit Yawshu hpe jaw na matu, Mawshe n si shi yang, Yehowa tsun wa ai. Dai majaw, shaning law law Yawshu hpe Mawshe shaman ya wa ai. (Pru 33:11; Trj 34:9) Dai hta n-ga, woi awn na atsam hpring ai, hkying mi a agyi, latsa a agyi, manga shi a agyi, marai shi a agyi ngu nna law law nga ai. (Trj 1:15) Karai a masha ni lanu lahku hkrum ai. Elia a lam hpe mung myit yu u. Chyoi pra ai nawku daw jau lam hta Karai a masha ni hpe shaning law law woi awn wa ai. Raitim, hpang de, Yuda mung dingda maga hta, magam gun na matu Yehowa lit jaw ai. (2 Hk 2:1; 2 Hl 21:12) Israela amyu lakung 10 mungdan a sadi dung ai ni kau da hkrum ai kun? N hkrum ai. Elia gaw, Elisha hpe shaning law law shaman da ya ai. Ngut nna, shaman da hkrum ai “myihtoi ma ni” mung nga ai. (2 Hk 2:7) Dai sadi dung ai la ni gaw, Karai a masha ni hpe matut karum ya ai. Yehowa gaw, shi a yaw shada lam hpring tsup hkra galaw nga ai. Shi hpe sadi dung let nawku ai ni hpe matut lanu lahku nga ai.

13. Hebre 13:5b hta, Yehowa gara ga sadi jaw da ai kun? (Sumla hpe mung yu u.)

¹³ Ngam nga ai namman chya hkam ai ni, sumsing lamu de lung mat ai hpang, hpa  byin wa na ngu shadu ai kun? Yehowa gaw mungkan ga na shi a masha ni hpe n kau da ai ngu Chyum Laika hta amahkam da ai. (Hebre 13:5b hpe hti u.) Mawshe, Elia ni zawn dai ni aten hta Karai a masha ni hpe woi awn nga ai namman chya hkam ai Hkristan hpung kaji gaw, kaga ni hpe shaman ya na matu grai ahkyak ai lam chye da ai. Dai majaw, sagu kaga kaw na lasha ni hpe shaman ya nga ai gaw, shaning grai na sai. Myitsu salang, ninghtawn hpung kawan, ginjaw garan rung komiti hpung shang, Behtela hpa-awn hte kaga ni hpe shaman ya na matu sharin jawng law law lajang ya ai. Uphkang hpung a komiti amyu myu hpe karum ya ai ni hpe atsawm sharin ya ai. Shanhte mung, lit kaba ni hpe sadi dung let gunhpai nga ai. Hkristu a sagu ni hpe matut lanu lahku na matu atsawm shaman da hkrum ai.

14. Bawngban wa ai lam ni kaw na kadun dawk tsun dan u.

¹⁴ Bawngban wa ai lam ni kaw na kadun dawk gaw hpa rai kun? Ru tsang kaba jahtum hta, ngam nga ai namman chya hkam ai ni sumsing lamu de lung mat ai hpang, mungkan ga na Karai a mayam ni, Karai Kasang hpe sadi dung let matut nawku nga na re. Yesu Hkristu mung woi awn ya na re. Magoga mung na Goga re ai, mungdan ga daga gasat ai hpe gaw hkrum na re. (Eze 38:18-20) Raitim, dai gasat ai lam aten kadun mi sha rai na re. Shanhte sum na re. Karai a masha ni Yehowa hpe matut n nawku lu hkra, dingbai dingna jaw lu na n re. Shi a masha ni hpe Karai Kasang teng sha hkye la na re. Sagu kaga re ai wunawng wuwa kaba gaw, “ru tsang kaba kata na hkrang pru wa” ai hpe kasa Yawhan shingran mu wa ai. (Shr 7:9, 14) Shim lum na ngu ai lachyum re.

15-16. Shingran 17:14 hku nga yang, Hara Magedon majan hta Hkristu a namman chya hkam ai ni hpa galaw na kun? Dai gaw hpa majaw n-gun lu shangun ai kun?

¹⁵ Namman chya hkam ai ni sumsing lamu de du mat ai shaloi, hpa galaw na kun? ngu nkau mi myit ai. Chyum Laika hta ding tawk mahtai jaw da ai. Ndai mungkan a asuya ni gaw, “Sagu Kasha hte hpyen gasat na” ngu Chyum Laika hta tsun da ai. Raitim,  “Sagu Kasha gaw shanhte hpe dang kau na” re. “Shaga da ai ni, lata la ai ni, kangka re ai ni” karum ya na re. (Shingran 17:14 hpe hti u.) Shanhte gaw kadai ni kun? Bai hkrung rawt mat ai namman chya hkam ai ni re. Ru tsang kaba jahtum hta ngam nga ai namman chya hkam ai ni, sumsing lamu de shaga la hkrum ai hpang, namman chya hkam ai ni shawng nnan lu na lit gaw, majan gasat na matu re. Grai laklai ai lit re. Namman chya hkam ai Hkristan nkau gaw, Yehowa Sakse n byin shi yang, kaga ni hte htawng hkat, htwi hkat ai ni re. Nkau gaw, hpyen la ni re. Jet ai Hkristan byin wa ai shaloi gaw, kaga ni hte ngwi pyaw simsa lam nga hkra sharin la ai. (Gal 5:22; 2 Ht 3:16) Shanhte majan hta n shang lawm mat sai. Sumsing lamu de hkrung rawt ai hpang, Karai a hpyen ni hpe hpang jahtum gasat ai majan hta, Hkristu, lamu kasa ni hte rau gasat lawm na re.

¹⁶ Myit yu u. Mungkan ga hta nga ai shaloi, namman chya hkam ai Hkristan nkau asak grai kaba nga sai. Gari kawa rai nga sai. Raitim, sumsing lamu de hkrung rawt ai hpang, n si lu ai, hpung atsam kaba ai wenyi hkum lu na re. Hkawhkam Yesu Hkristu hte rau majan gasat na re. Hara Magedon majan ngut ai hpang, masha ni hkum tsup wa hkra karum ya na re. Mungkan ga hta n hkum tsup ai ni hku nna nga ai shaloi, hpunau nauna ni hpe karum ya wa ai hta grau nna karum ya lu na re.

17. Hara Magedon majan laman Karai a mayam yawng shim lum na hpe gara hku chye lu ai kun?

¹⁷ Nang gaw sagu kaga rai yang, Hara Magedon majan hpang ai shaloi, hpa galaw ra na kun? Yehowa hpe kamhpa u. Lam matsun hpe hkan sa u. Lam matsun hta hpa ni lawm na kun? “Kata gawk de shang nna, chyinghka la da u: pawt sindawng ai lai mat ai du hkra, na hkum hpe chyahkring mi makoi da u” ngu Chyum Laika hta tsun ai. (Esa 26:20) Sumsing lamu hte mungkan ga kaw na Karai a sadi dung ai mayam yawng shim lum na re. “Tawa magam rai ti mung; ya e nga ai arai htawm hpang e du na arai . . . Karai Kasang a tsaw ra ai hta na, anhte hpe n jahka kau lu na” hpe kasa Pawlu kam ai zawn, anhte mung kam mai ai. (Rom 8:38, 39) Nang hpe Yehowa tsawra ai, galoi n kau da ai hpe dum nga u.