1. Ki ténpu ki tudu kes skodjedu ku spritu santu ta ba sta na séu?

 DJA ten uns anu ki povu di Jeová faze kel pergunta li: ‘Ki ténpu ki kes skodjedu ku spritu santu ta lebadu pa séu?’ Nu ta pensaba ma dipôs di Armajedon alguns di kes skodjedu ku spritu santu talvês ta fikaba na téra i es ta viveba duránti un ténpu na Paraízu. Má na Sentinéla 15 di julhu di 2013, nu prende ma tudu kes skodjedu ku spritu santu ta ba sta na séu antis di géra di Armajedon. — Mat. 24:31.

2. Ki perguntas nu pode faze, i kuzê ki nu sta ben odja na kel studu li?

² Má nu pode pergunta: Kuzê ki ta ben kontise ku kes “otu ovelha” di Jizus ki ta sta ta sirbi Jeová di manera fiel na téra duránti “grandi tribulason”? (Juan 10:16; Mat. 24:21) Alguns algen oji pode fika preokupadu sen sabe kuzê ki es ta ba faze, ô es pode xinti ma es ka ta ba ten ningen pa djuda-s i orienta-s dipôs ki kes irmon ku irmans skodjedu ku spritu santu lebadu pa séu. Nu ben odja dôs stória di Bíblia ki talvês pode pô-s ta pensa si. Dipôs, nu ta ben odja pamodi ki nu ka debe fika preokupadu.

KUZÊ KI KA TA BEN KONTISE?

3-4. Kuzê ki pode poi alguns algen preokupadu, i pamodi?

³ Alguns algen pode fika preokupadu si kes otu ovelha ta ben para di sirbi Jeová óras ki kes irmon skodjedu ki ta faze párti di Grupu Enkaregadu di Óbra ka ta sta na téra más pa orienta-s. Es pode xinti si pamodi alguns stória ki Bíblia ta pâpia di el. Nu ben odja dôs izénplu. Kel primeru é di saserdóti prinsipal Jioiada. El éra un sérvu fiel di  Deus. El ku se mudjer, Jiozeba, proteje un mininu ki txomaba Jioás, i es djuda-l bira un algen fiel i un bon rei. Na ténpu ki Jioiada staba bibu, Jioás ta adoraba Jeová i el ta fazeba kuzas dretu. Má lógu dipôs ki Jioiada móre, Jioás kumesa ta faze kuzas mariadu. El kumesa ta obi ku kes prínsipi mau i el bandona Jeová. — 2 Cró. 24:2, 15-19.

⁴ Kel otu izénplu é di kristons ki vive dipôs di ténpu di apóstlus. Juan foi kel últimu apóstlu ki móre. Timenti el staba bibu, el djuda txeu kriston aguenta firmi na ses sirvisu pa Jeová. (3 Juan 4) Sima kes otu apóstlu di Jizus dja fazeba, Juan sforsa txeu pa proteje kongregason di kalker algen ki bira kóntra verdadi. (1 Juan 2:18; 2 Tes. 2:7) Dipôs ki Juan móre, txeu irmon na kongregason bira kóntra verdadi. Alguns anu dipôs, kes ki bira kóntra verdadi staba ta inxina txeu ideia falsu i ta dexa konportamentu mariadu entra na tudu kongregason.

5. Ki konkluzon nu ka debe tra di kes dôs stória di Bíblia?

⁵ Kes dôs stória li krê fla ma ta ben kontise mésmu kuza ku kes otu ovelha di Jizus óras ki kes skodjedu ku spritu santu lebadu pa séu? Na kel ténpu, kes sérvu di Jeová fiel ki ta sta na téra ta ben kumesa ta faze kuzas mariadu, sima Jioás? Ô es ta ben bira kóntra verdadi, sima txeu kriston faze dipôs ki apóstlus móre? É klaru ki nau! Nu pode ten serteza ma óras ki kes skodjedu lebadu pa séu, kes otu ovelha ta kontinua ta sirbi Jeová sima el ta krê, i Jeová ta kontinua ta kuida di es. Pamodi ki nu pode ten kel serteza li?

ADORASON PURU TA KONTINUA PA TUDU TÉNPU

6. Ki três ténpu ki nu sta ben pâpia di el?

⁶ Pamodi ki nu pode ten serteza ma adorason puru ta kontinua, mésmu duránti kel ténpu más difísil ki sta pa ben? Pamodi kel ki nu prende na Bíblia sobri ténpu ki nu sta ta vive. Gósi nu sta vive na un ténpu diferenti di kel ténpu ki israelitas i kes kriston dipôs di apóstlus ta viveba. Nton, nu ben pâpia más sobri kes três ténpu li: (1) Na ténpu di Israel antigu, (2) ténpu dipôs ki apóstlus móre, i (3) nos ténpu ki é “ténpu di faze tudu kuza novu otu bês”. — Atus 3:21.

7. Na ténpu di israelitas, pamodi ki kes algen fiel ka dizanima kantu ki pesoas i reis disidi faze kuzas mariadu?

⁷ Na ténpu di Israel antigu. Poku ténpu antis di Muizés móre, el fla kes israelita: ‘N sabe dretu ma, dipôs di nha mórti, di serteza nhos ta ben faze kuzas mau, i nhos ta ben disvia di kaminhu ki N manda nhos sigi.’ (Deut. 31:29) Muizés tanbê fla ma si israelitas rabelaba, es ta baba prézu. (Deut. 28:35, 36) Kes kuza li kontise? Sin. Duránti un monti anu, txeu rei faze kuzas ki pa Jeová éra mariadu, i es poi pesoas ta adora deus falsu. Pamodi kel-li, Jeová kastiga-s i el ka dexa pa ninhun rei israelita governa-s. (Eze. 21:25-27) Má kes israelita ki éra fiel kontinua ta sirbi Deus ku koraji kantu ki es odja ma palavra di Deus kunpri. — Isa. 55:10, 11.

8. Dipôs ki apóstlus móre, kongregason fika kontaminadu. Nu ta fika dimiradu pamodi kel-li kontise? Splika.

⁸ Ténpu dipôs ki apóstlus móre. Dipôs ki apóstlus móre, kongregason fika kontaminadu. Nu ta fika dimiradu pamodi  kel-li kontise? Klaru ki nau. Jizus dja flaba ma txeu algen ta ben fikaba kóntra verdadi. (Mat. 7:21-23; 13:24-30, 36-43) Apóstlus Paulu, Pedru i Juan konfirma ma profesia di Jizus dja staba ta kunpri na ses ténpu. (2 Tes. 2:3, 7; 2 Ped. 2:1; 1 Juan 2:18) Poku ténpu dipôs ki kel últimu apóstlu móre, kes kriston ki bira kóntra verdadi fika ta faze párti di Babilónia Grandi, ki ta reprizenta tudu relijion falsu. Más un bês, kel ki Jizus fla kunpri.

9. Pamodi ki nos ténpu é diferenti di ténpu di Israel antigu i di kongregason dipôs ki apóstlus móre?

⁹ “Ténpu di faze tudu kuza novu otu bês”. Nos ténpu é diferenti di ténpu di Israel antigu i di kel ténpu ki kristons bira kóntra verdadi, dipôs ki apóstlus móre. Modi ki ta txomadu kel ténpu li ki nu sta vive na el gósi? Nu ta kustuma txoma-l “ténpu di fin” di kel mundu mau li. (2 Tim. 3:1) Má, Bíblia ta mostra ma na kel mésmu ténpu ki kumesa ténpu di fin, kumesa tanbê un ténpu más inportanti ki ta duraba más ténpu. Kel ténpu li ta tirmina dipôs ki Jizus, ki é Rei di reinu di Deus bira tudu algen perfeitu i bira téra na un paraízu. Kel ténpu li ta txomadu di “ténpu di faze tudu kuza novu otu bês”. (Atus 3:21) Kel ténpu li kumesa na anu 1914. Kuzê ki fazedu novu otu bês? Jizus bira Rei na séu. Di es manera, Jeová pasa ta ten otu bês un governanti ki ben di família di rei Davidi pa reprizenta-l. Má é ka sô kel govérnu li ki Jeová bira novu. Lógu dipôs di kel-li, adorason puru kumesa ta rekuperadu. (Isa. 2:2-4; Eze. 11:17-20) Má el ta ben fika kontaminadu otu bês?

10. (a) Kuzê ki Bíblia fla sobri adorason puru na nos ténpu? (Isaías 54:17) (b) Pamodi ki kes profesia li ta konsola-nu?

¹⁰ Lé Isaías 54:17. Pensa na kel profesia li: ‘Ka ten ninhun  arma ki fazedu kóntra bo ki ta ten bon rezultadu’! Kel profesia li sta ta kunpri oji. Alén di kel-li, kes palavra ki sta na Isaías 54:13, 14 tanbê sta ta kunpri oji i es ta da-nu txeu konsolu. El ta fla: ‘Jeová ta ben inxina tudu bus fidju, i pas di bus fidju ta ben ser txeu. Bu ta ben fika ben finkadu na justisa. Bu ka ta ben xinti medu di nada, nen bu ka ta ten motivu pa ten medu, pamodi medu ka ta ben txiga pértu bo.’ Nen Satanás, ki é “deus di kel mundu li”, ka ta konsigi para trabadju ki sta ta fazedu pa inxina  pesoas sobri Jeová. (2 Kor. 4:4) Adorason puru dja rekuperadu i nunka más el ka ta fika kontaminadu. El ta kontinua pa tudu ténpu. Ninhun arma ki fazedu kóntra nos ka ta ten bon rezultadu!

KUZÊ KI TA BEN KONTISE?

11. Kuzê ki ta da-nu serteza ma kes monti di algen ka ta bandonadu óras ki kes skodjedu lebadu pa séu?

¹¹ Kuzê ki ta ben kontise óras ki kes skodjedu lebadu pa séu? Lenbra ma Jizus é nos Pastor i el é kabésa di kongregason. Jizus fla klaru: “Nhos Líder é sô un, ki é Kristu.” (Mat. 23:10) Jizus ki é nos Rei ki dja sta ta governa, sénpri ta kontinua ta kuida di nos. Pamodi é Jizus ki sta ta gia-nu, nu ka meste xinti medu di nada li na téra. É klaru ki nu ka sabe tudu kuza sobri modi ki Jizus ta orienta se povu na kel ténpu. Pur isu, nu ben odja alguns izénplu di Bíblia ki pode konsola-nu.

12. Modi ki Jeová kuida di se povu (a) dipôs ki Muizés móre? (b) dipôs ki Elias resebe otu diziginason? (Odja dizenhu.)

¹² Antis di israelitas entra na kel téra ki Deus prometeba es, Muizés móre. Kuzê ki kontise ku povu di Deus? Jeová para di djuda se povu dipôs ki kel ómi fiel li móre? Nau. Timenti es ta kontinuaba fiel, Jeová ta kuidaba di es. Antis di Muizés móre, Jeová fla-l pa el skodje Juzué pa giaba povu. Muizés dja tinha txeu anu ta trenaba Juzué. (Êxo. 33:11; Deut. 34:9) Tanbê, txeu ómi staba priparadu pa tomaba kónta di povu. Kes ómi li éra kes xéfi di mil, xéfis di 100, xéfis di 50 i ti xéfis di 10. (Deut. 1:15) Povu di Deus kuidadu di el dretu. Otu izénplu sima kel-li é di Elias. El tevi txeu anu ta sforsa pa djuda israelitas kontinua ta adora Jeová. Má dipôs, Jeová da-l un otu diziginason na sul di Judá. (2 Reis 2:1; 2 Cró. 21:12) Kes algen fiel di kel reinu di 10 tribu di Israel fika bandonadu? Nau. Elias dja tinha txeu anu ta trenaba Elizeu. Tanbê, tinha ‘fidju di kes proféta’ ki staba organizadu pa grupus i ki ta resebeba algun tipu di trenu. (2 Reis 2:7) Pur isu, tinha txeu ómi fiel i disponível pa tomaba kónta di povu di Deus. Jeová kontinua ta kunpri se vontadi i ta kuida di se sérvus fiel.

13. Kuzê ki Jeová promete na Ebreus 13:5b? (Odja fotus.)

¹³ Dipôs di odja kes izénplu li, kuzê ki bu ta atxa ma ta kontise óras ki kes  últimu skodjedu ku spritu santu lebadu pa séu? Nu ka meste nen pensa txeu. Na Bíblia, nu ta prende un verdadi sinplis i ki ta pô-nu ta fika trankuilu: Jeová nunka ka ta bandona se sérvus li na téra. (Lé Ebreus 13:5b.) Sima Muizés i Elias, kel grupu pikinoti di skodjedu ku spritu santu ki sta toma kónta di povu di Deus oji, ta intende ma é inportanti trena otus. Pur izénplu, Grupu Enkaregadu di Óbra ta organiza txeu skóla pa ansions, pa enkaregadus di grupu di kongregason, pa irmons di Kumison di Filial, pa enkaregadus na Betel i otus irmon. Irmons di Grupu Enkaregadu di Óbra sta ta trena ajudantis na kes txeu kumison di Grupu Enkaregadu di Óbra. Kes ajudanti li sta ta kuida di manera fiel di kes txeu responsabilidadi ki es ten na organizason. Es sta priparadu pa kontinua kel trabadju di kuida di ovelhas di Jizus Kristu.

14. Kuzê ki dja nu odja klaru na kel studu li?

¹⁴ Ti gósi, dja nu odja klaru ma óras ki kes últimu skodjedu lebadu pa séu pértu di fin di grandi tribulason, adorason verdaderu ta kontinua ta fazedu na téra. Dja ki Jizus sta ta toma kónta di povu di Deus, nunka nu ka ta para di adora Jeová. Nu sabe ma na kel ténpu un grupu di nasons ki Bíblia ta txoma di Gogi di Magogi, ta ben ataka povu di Deus. (Eze. 38:18-20) Má kel ataki li ka ta dura txeu i el ka ta ten bons rezultadu. El ka ta konsigi inpidi povu di Deus di adora Jeová. Di serteza Jeová ta ben salva-nu! Na un vizon, apóstlu Juan odja kel “monti di algen” ki ta faze párti di otus ovelha di Kristu. Juan fladu ma kel “monti di algen” é kes ki “sai di grandi tribulason”. (Apo. 7:9, 14) Nton, nu sabe ku serteza ma Jeová ta ben salva-s!

15-16. Sima sta na Apokalipse 17:14, kuzê ki kes skodjedu ta ben faze duránti géra di Armajedon, i pamodi ki kel-li ta da-nu koraji?

¹⁵ Má simé, alguns algen pode pergunta: ‘Kuzê ki ta ben kontise ku kes skodjedu dipôs ki es lebadu pa séu?’ Bíblia ta da un respósta klaru. Bíblia ta fla ma govérnu  di es mundu ta “ben géra ku Korderu”. É klaru ki es ta ben perde. Bíblia ta fla: “Korderu ta ben ganha-s.” I kenha ki ta bai djuda Jizus? Kel versíklu ta fla ma é kes ‘ki ta txomadu di skodjedu i fiel’. (Lé Apokalipse 17:14.) Es é kenha? Es é kes skodjedu ki resusitadu! Nton, óras ki kes últimu skodjedu ku spritu santu lebadu pa séu pértu di fin di grandi tribulason, un di kes primeru diziginason ki es ta ben ten é géra. Kel-li é un grandi diziginason! Antis di bira Tistimunhas di Jeová, alguns skodjedu ku spritu santu ta brigaba ku otus algen. Alguns ti mésmu éra trópa. Má dipôs, es bira sérvus di Jeová i es prende modi ki es ta vive na pas ku otus algen. (Gál. 5:22; 2 Tes. 3:16) Es para di apoia géras. Má dipôs ki es lebadu pa séu, es ta ben géra djuntu ku Kristu i se anjus na kel últimu géra kóntra inimigus di Deus.

¹⁶ Pensa na kel-li! Alguns di kes skodjedu ku spritu santu ki sta na téra dja sta algen grandi i es sta fraku. Má óras ki es resusitadu pa es bai vive na séu, es ta ten korpus spritual, es ta ten txeu puder i es ka ta móre más. Tanbê, es ta diziginadu pa ben géra djuntu ku Jizus Kristu. Dipôs di géra di Armajedon, kes skodjedu ku spritu santu ta ben trabadja djuntu ku Jizus pa djuda-nu bira perfeitu. Di serteza óras ki es sta na séu, es ta konsigi faze más kuza pa ses irmon ku irmans ki es krê txeu, di ki kel ki es ta konsigiba faze kantu ki es staba na téra sima ómis inperfeitu!

17. Modi ki nu sabe ma tudu sérvu di Jeová ta sta protejedu duránti géra di Armajedon?

¹⁷ Bu ta faze párti di otus ovelha? Si bu ta faze párti, kuzê ki bu meste faze óras ki géra di Armajedon kumesa? Bu meste sô kunfia na Jeová i sigi se orientason. Kuzê ki talvês kel-li ta involve? Bíblia ta fla: ‘Nhos entra na nhos kuartu i nhos fitxa pórta nhos tras. Nhos sukundi pa poku ténpu, ti ki kel raiba pasa.’ (Isa. 26:20) Tudu sérvu fiel di Deus na séu i na téra ta ben sta protejedu na kel ténpu. Sima apóstlu Paulu, nu ten serteza ma “nen govérnus, nen kuzas di gósi, nen kuzas ki sta pa ben... ka ta konsigi sipara-nu di amor di Deus”. (Rom. 8:38, 39) Lenbra sénpri ma Jeová ta ama-u i ma nunka el ka ta bandona-u!