ATUAQQISSAAGASSAQ 5
ERINARSUUT 27 Guutip ernini saqqummersissavai
“Imminiinngisaannassavakkit”!
“[Guuti] oqarpoq: ‘Qimanngisaannarlutillu imminiinngisaannassavakkit.’” – HEBR 13:5b.
SAMMISAQ
Tanitat kinguleruttut qilaliartitaareerpata Guutip kiffai nunarsuarmiittut imminiiginnarneqassanngillat.
1. Tanitat kinguleruttut qaqugu qilaliartitaassappat?
UKIORPAALUIT matuma siorna Jehovap innuttaasa naluaat tanitat kinguleruttut qaqugu qilaliartitaassanersut. Isumaqarsimavugut tanitat ilaat Harmagedonnip kingorna paratiisimi nunarsuarmiikkallassasut. Kisianni Napasuliaq Alapernaarsuiffik juulip 15-iat 2013-imoortumi paasitinneqarpugut Harmagedonnip nalliutinnginnerani tanitat kinguleruttut tamarmik qilaliartitaassasut. – Mat 24:31.
2. Ilaasa suna eqqarsaatigisarpaat, allaaserisamilu matumani suna sammissavarput?
2 Imaassinnaavoq ilatta una eqqarsaatigisaraat: ‘Savat allat’ nunarsuarmi Jehovamut aalajaallutik kiffartortut ‘annikilliornartussarsuarmi’ qanoq pissappat? (Joh 10:16; Mat 24:21) Imaassinnaavoq ilaasa ernumassutigigaat tanitat qilaliartitaareerpata qimagaasutut misigissallutik imaluunniit sussanerlutik nalussallugu. Imaassinnaavoq Biibilimi oqaluttuat aalajangersimasut marluk eqqarsaatigigamikkit taama misigisut. Oqaluttuat taakku aamma annilaangassutissaqannginnissatsinnut pissutaasut sammissavagut.
QANOQ PISOQARNAVIANNGILA?
3-4. Ilaasa suna ernumassutigisinnaavaat, aamma sooq?
3 Ilaasa ernumassutigisinnaavaat Siulersuisoqatigiit akornatsinniikkunnaarpata savat allat ilumoortumit qimagutissanersut. Immaqa Biibilimi oqaluttuat aalajangersimasut eqqarsaatigaat. Taakkualu ilaat marluk sammeriartigit. Siullermi palasiuneq Jojada, Guutimut upperluartuusoq, oqaluttuarineqarpoq. Nulianilu Joshabati nukappiaraq Joashimik atilik isertorpaat kunngitullu Jehovamut ilumoorfiginnittuuniassammat ikiorlugu. Jojada utoqqaasoq inuutillugu Joashi ingerlalluarpoq. Jojadalli toqunerata kingorna Joashi Jehovap isaani ajortuliortalerpoq. Naalagartat ajortut tusaaniarnerugamigit Jehova qimappaa. – Nal 2. 24:2, 15-19.
4 Oqaluttuap aappaa apustilit toqunerisa kingorna pisimavoq. Apustili inuusoq kingulleq, Johannesi, kristumiunut amerlasuunut sunniuteqarluartarpoq, Jehovamullu kiffartornerminni pinertusaarniassammata ikiortarlugit. (Joh 3. 4) Jiisusip apustiliisa aalajaatsut allat iliorsimanerattut Johannesi tunussinermik siammariartuaartumik tunuarsimaartitsisimavoq. (Joh 1. 2:18; aamma takuuk Tessaluunikamiunut 2. 2:7). Johannesilli toqunerata kingorna ilagiinniittut amerlasuut tunussisunngorput. Ukiorpaaluit qaangiuttut tunussisut eqqunngitsumik ilinniartitsisarlutillu ilagiinni ajortuliortoqarnera akuerisarpaat.
5. Oqaluttuat marluk pissutigalugit qanoq isummissanngilagut?
5 Imaappa oqaluttuat Biibilimeersut taakkua ersersikkaat tanitat qilaliartitaareerpata savat allat Joashitulli ajortuliortalissasut, imaluunniit apustilit toqunerisa kingorna kristumiut amerlasuut ilaarlugit tunussisunngussasut? Naamerluinnaq! Tanitat qilaliarpata savat allat isumassorneqarluarlutillu anersaakkut ingerlalluassapput. Sooq tamanna upperisinnaavarput?
JEHOVAP INNUTTAI MINGUITSUMIK GUUTISIORTUASSAPPUT
6. Piffissat pingasut suut sammissavagut?
6 Sooq upperisinnaavarput siunissami allaat erloqinartorsiornermi guutisiorneq minguitsoq ingerlajuassasoq? Biibilimi nassuiarneqarmat piffissaq inuuffigisarput itsaq Israalikkut inuuffigisaannit aamma apustilit toqunerisa kingorna piffissamit allaanerungaartoq. Taamaattumik piffissat pingasut uku sammeriartigit: (1) Itsaq Israalikkut piffissaq inuuffigisaat, (2) apustilit toqunerisa kingorna piffissaq, aamma (3) ‘piffissaq sunik tamanik aaqqissuusseqqiffissaq’ nalitsinni pissasoq. – ApS 3:21.
7. Itsaq Israalimi innuttaasut kunngillu ajortuliortaraluartut sooq Jehovamut aalajaatsut neriuutaarutinngillat?
7 Itsaq Israalikkut piffissaq inuuffigisaat. Moorsisi utoqqalilluni Israalikkunnut ima oqarpoq: “[Nalunngilara] toqoreeruma aserorsimasumik iliuuseqarumaartusi aqqullu ingerlavigeqqusara nigorumaarlugu.” (Mos 5. 31:29) Moorsisi aamma mianersoqqusivoq Israalikkut pikitsitsigunik nunaminnit aallarussaassasut. (Mos 5. 28:35, 36) Oqaatsit taakku eqquuppat? Aap, ukiut hundredelikkuutaat ingerlaneranni kunngerpassuit Jehovap isaani ajortuliortarput innuttaanullu ajortumik sunniuteqarlutik. Taamaattumik Jehovap Israalikkut ajortuliortartut pillarpai Israalimilu kunngeqarunnaartitsilluni. (Ez 21:30-32) Israalikkulli Jehovamut aalajaatsut Guutip oqaasii eqquuttut takugaangamikkit tamanna ilumoorfiginnillutik kiffartortuarnissaminnut sapiissuseqalissutigisarpaat. – Es 55:10, 11.
8. Apustilit toqunerisa kingorna kristumiut ilarpassuisa tunussisunngorsimanerat tupaallaatigaarput? Nassuiaruk.
8 Apustilit toqunerisa kingorna piffissaq. Apustilit toqunerisa kingorna kristumiut ilarpassuisa tunussisunngorsimanerat tupaallaatigaarput? Naamik, Jiisusimmi siulittuutigaa tunussinersuaqassasoq. (Mat 7:21-23; 13:24-30, 36-43) Apustilit Paulusi, Petrusi Johannesilu tamarmik allapput Jiisusip siulittuutaa naliminni eqquutilereersimasoq. (Tes 2. 2:3, 7; Pet 2. 2:1; Joh 1. 2:18) Apustilillu toqummata kristumiut amerlasuut tunussisunngorlutik Babylonnersuarmut, tassa upperisarsiornernut eqqunngitsunut, ilaalerput. Tassa Jiisusip siulittuutaa eqquuppoq.
9. Piffissaq inuuffigisarput itsaq Israalikkut inuuffigisaannit aamma apustilit toqunerisa kingorna piffissamit qanoq allaanerua?
9 ‘Piffissaq sunik tamanik aaqqissuusseqqiffissaq.’ Piffissaq inuuffigisarput itsaq Israalikkut inuuffigisaannit aamma apustilit toqunerisa kingorna piffissamit allaaneruvoq. Qanoq taaneqarpa? ‘Ullunik kingullernik’ taagajuttarparput. (Tim 2. 3:1) Biibilimili ersersinneqarpoq piffissaq alla sivisunerusoq maluginiarnarnerusorlu aamma aallartereersoq. Piffissamilu tamatumani Guutip kunngeqarfiata Missiarsimit kunngiuffigineqartup inuit naammalluinnartunngortissavai nunarsuarlu paratiisinngortillugu. Ima taaneqarpoq: ‘Piffissaq sunik tamanik aaqqissuusseqqiffissaq.’ (ApS 3:21) 1914-imi aallartippoq. Taamani suna aaqqissuunneqarpa? Jiisusi qilammi kunnginngormat Jehova sinniisuutitaminik kunngeqaqqilerpoq, Jiisusilu kunngip Daavip ilumoorfiginnittup kinguaarivaa. Jehovali aamma allamik aaqqissuussaqarpoq. Jiisusimmi kunnginngornerata kinguninngua minguitsumik guutisiortoqaqqilerpoq. (Es 2:2-4; Ez 11:17-20) Minguitsumik guutisiortoqartuassava?
10. (a) Nalitsinni guutisiorneq minguitsoq pillugu Biibilimi qanoq siulittuuteqarpa? (Esaja 54:17) (b) Sooq siulittuutit taamaattut isumalluarnarpat?
10 Esaja 54:17 atuaruk. Siulittuut tamanna nalitsinni eqquuttoq eqqarsaatigiuk: “Sakkut ilinnut sakkuaatissatut saffiukkat atorsinnaassuseqassanngillat”! Siulittuut tuppallersaataasoq una aamma nalitsinni eqquuppoq: “Ernitit tamarmik Naalakkamit ajoqersorneqarsimassapput, ernitit iluanaangaarumaarput; iluarnermik tunngavilerneqassaatit. … Aarleqqutissaqanngilatit, annilaarnartup tungaalissanngilaatit [pallissanngilaatit, tastamantitoĸaĸ].” (Es 54:13, 14) Allaat “nalitsinni guutiusup” Saatanip ilinniartitsineq Guutip innuttaasa aallutaat unitsissinnaanngilaa. (Kor 2. 4:4) Guutisiorneq minguitsoq pilerseqqinneqarsimasoq naassaanngitsumik atajuassaaq. Sakkoq uagutsinnut sakkuaatissatut atorneqartoq sunaluunniit iluatsinnavianngilaq!
QANOQ PISOQASSAVA?
11. Tanitat qilaliartitaareerpata savat allat imminiiginnarneqarnavianngitsut sooq upperisinnaavarput?
11 Tanitat qilaliartitaareerpata qanoq pisoqassava? Eqqaamajuk Jiisusi paarsisigigatsigu. Taanna ilagiinnut kristumiunut niaquuvoq. Jiisusi ersarissumik ima oqarpoq: “[Ataaseq], tassa Kristusi, Siulersuisoraarsi.” (Mat 23:10) Jiisusip qilammi kunngiusup isumagiuassavaatigut. Kristumiut ilumoortut nunarsuarmiittut taassumannga siulersorneqaramik ernumassutissaqarnavianngillat. Soorunami naluarput Kristusip innuttani taamanikkussamut qanorpiaq siulersussagai. Taamaattumik oqaluttuat Biibilimeersut isumallualersitsisut sammilaariartigit.
12. (a) Moorsisip toqunerata kingorna Jehovap innuttani qanoq isumagisimavai? (b) Eliap allamik suliassinneqarnerata kingorna Jehovap innuttani qanoq isumagisimavai? (Aamma assiliaq takuuk).
12 Israalikkut nunamut neriorsuutigisamut isinngitsiarneranni Moorsisi toquvoq. Angut aalajaatsoq taanna toqummat Jehovap innuttani ikiortarunnaarpai? Naamik, aalajaakkaangata Jehovap isumagisarpai. Moorsisi suli inuutillugu Jehovap peqquaa Josva inuiannut siulersuisussatut piginnaanngorsassagaa. Moorsisillu ukiorpassuarni Josva piareersarsimavaa. (Mos 2. 33:11; Mos 5. 34:9) Taassuma saniatigut aamma angutit piukkunnartut allarpassuit siulersuisuupput, tassa naalakkat 1.000-nut, 100-nut, 50-inut allaallu qulinut. (Mos 5. 1:15) Guutip innuttai isumagineqarluarput. Eliap nalaani assingusumik pisoqarpoq. Israalikkut Jehovamik guutisiorniassammata ikiorniarlugit ukiorpassuarni ilungersorsimavoq. Kingusinnerusukkulli Jehovap allamik suliassippaa Juudamut aallartillugu. (Kng 2. 2:1; Nal 2. 21:12) Israalikkut naggueqatigiissortaanit quliusuneersunit aalajaatsut sumiginnarneqarpat? Naamik. Eliap Eliisa ukiorpassuarni piareersarsimavaa. Aamma “pruffiiteqatigiit” pikkorissartinneqartarsimagunarput. (Kng 2. 2:5) Tassa aalajaatsorpassuarnik anguteqarpoq Jehovap innuttaanik siulersuisinnaasunik. Jehovap kiffami aalajaatsut isumagiuarnissaat siunertarigamiuk isumagiuarpai.
13. Hebræerit 13:5b-mi qanoq neriorsorneqarpugut? (Aamma asseq takuuk).
13 Oqaluttuat taakku eqqarsaatigalugit tanitat qilaliartinneqarpata qanoq pisoqassasoraajuk? Qularuteqartariaqanngilagut. Biibilimi paasiuminartumik tuppallernartumillu ima neriorsorneqarpugut: Jehovap innuttani nunarsuarmiittut qimanngisaannassavai. (Hebræerit 13:5b atuaruk). Moorsisip Eliallu pisimanerattulli kristumiut tanitat eqimattannguit nalitsinni siulersuisut allanik ilinniartitsinerup pingaaruteqassusia paasivaat. Siulersuisoqatigiinnut ilaasortat ukiorpassuarni angutit savanut allanut ilaasut ilinniartillugit siulersuisunngornissaannut piareersarsimavaat. Ilaatigut utoqqaanertanut, ilagiinnik nakkutilliisunut, Immikkoortortaqarfiup Ataatsimiititaliaanut ilaasortanut, Betelimi nakkutilliisunut allanullu ilinniarfinnik aaqqissuussisimapput. Aamma Siulersuisoqatigiinnut ilaasortat namminneq Siulersuisoqatigiit ataatsimiititaliaanni ikiortit ilinniartissimavaat. Ikiortit taakku maannakkut peqatigiissortatsinni akisussaaffippassuarnik isumaginnilluartuupput. Kristusip savaataanik paarsinissaminnut piareersarluarneqarsimapput.
14. Allaaserisami matumani pingaarnerpaatut paasisarialik suua?
14 Allaaserisami matumani pingaarnerpaatut paasisarialik unaavoq: Annikilliornartussarsuup naggataatungaani tanitat kinguleruttut qilaliartinneqarpata Jehovap innuttai Jiisusimit Kristusimit siulersorneqarlutik Jehovamik minguitsumik guutisiortuassapput. Nalunngilarput taamanikkussamut Gogimit Magogimeersumit, tassa naalagaaffinnit iligiinnit, saassunneqassalluta. (Ez 38:18-20) Saassussineralli sivikillunilu iluatsissanngilaq, Jehovamik guutisiortugut unitsinnavianngilaatigut. Jehovammi aniguisissavaatigut! Apustilip Johannesip takorruuisinneqarluni “inupparpassuit” Kristusip savaataanut allanut ilaasut takuai. Johannesilu oqarfigineqarpoq “inupparpassuit” taakku tassaasut “annikilliornartorsuarmit aniguisut”. (Saqq 7:9, 14) Tassa qularissanngilarput Jehovap annaakkumaarai.
15-16. Saqqummersitat 17:14 naapertorlugu tanitat sorsunnermi Harmagedonnimi sussappat, aamma sooq tamanna tuppallernarpa?
15 Immaqali ima eqqarsartoqarpoq: ‘Tanitammi? Qilaliartitaareerunik sussappat?’ Biibilimi tamanna ersarissumik akineqarpoq. Ersersinneqarpoq nunarsuarmi politikkikkut pissaanillit savaaraq saassutissagaat. Soorunami ajorsassapput. Ima allassimavoq: ‘Savaaraq taakkununnga ajugaassaaq.’ Kikkut ikiussavaat? Allassimavoq “qaaqqusat, toqqakkat aalajaatsullu” ilagissagaat. (Saqqummersitat 17:14 atuaruk). Taakku kikkuuppat? Tassaapput tanitat qilaliartinneqartut. Tassa annikilliornartussarsuup naggataatungaani tanitat kinguleruttut qilaliartitaareerunik suliassaasa siulliit ilaat tassaassaaq sorsoqataanissaq. Suliassaq immikkuullaringaarami! Kristumiut tanitat ilaat Nalunaajaasunngunngikkallaramik nakuusertartuusimapput ilaallu allaat sakkutuujusimallutik. Kristumiunngoramilli ilumoortut eqqissisitsineq ilikkarpaat. (Gal 5:22; Tes 2. 3:16) Sorsunnernik tapersersueqataajunnaarput. Qilaliartitaareerunilli Kristusi inngilillu illernartut ilagalugit Guutip akeraanut inaarutaasumik sorsoqataassapput.
16 Eqqarsaatigeriaruk. Kristumiut tanitat nunarsuarmiittut ilaat utoqqalipput nukissaqarpiarunnaarlutillu. Qilaliartinneqareerunilli anersaajussapput pissaanillit toqusuitsut, kunngertillu Jiisusi Kristusi sorsuttartuusoq ilagalugu sorsoqataassallutik. Sorsunnerup Harmagedonnip kingorna Jiisusi ikiortigalugu inuit naammalluinnartunngortissavaat. Qularutissaanngilaq nunarsuarmiikkallarnerminninngaanniit qatanngutitik asasatik qilammiit ikiornerusinnaassagaat.
17. Sorsunnermi Harmagedonnimi Guutip kiffaasa ulorianartorsiunnginnissaat qanoq nalunngilarput?
17 Savanut allanut ilaavit? Taamaappat sorsunneq pingaarutilik Harmagedonni aallartippat illit susariaqarpit? Jehova tatigissavat ilitsersuutaalu maleruarlugit. Ilitsersuussutai suusinnaappat? Biibilimi ima allassimavoq: “Ininnguassinnut toqqoritsi matuilu matullugit; toqqorsimalaarniarallaritsi Naalakkap kamannera qaangiutserlugu.” (Es 26:20) Guutip kiffai aalajaatsut qilammiittut nunarsuarmiittullu tamarmik taamanikkussamut navianartorsiornavianngillat. Paulusitulli qularinngilarput ‘naalakkersuisut, maanna pisut pisussalluunniit Guutip asanninneranit avissaartissinnaanngikkaatigut’. (Rom 8:38, 39) Unalu eqqaamajuaruk: Jehovap asavaatit, qimanngisaannassavaatillu!
QANOQ AKISSAVIT?
-
Tanitat kinguleruttut qilaliartitaareerpata susoqassanngila?
-
Sooq qularinngilarput minguitsumik guutisiortuartoqassasoq?
-
Sooq upperisinnaavarput Jehovap innuttani isumagissagai?
ERINARSUUT 8 Jehova qimarnguffigaarput