អត្ថបទសិក្សា ៥
ចម្រៀងលេខ២៧ គ្រាដែលកូនព្រះនឹងត្រូវបង្ហាញ
‹ខ្ញុំប្រាកដជាមិនបោះបង់ចោលអ្នក!›
«ព្រះបានមានប្រសាសន៍ថា៖ ‹ខ្ញុំប្រាកដជាមិនចាកចេញពីអ្នកឡើយ ហើយខ្ញុំក៏ប្រាកដជាមិនបោះបង់ចោលអ្នកដែរ›»។—ហេ. ១៣:៥ខ
ចំណុចផ្ដោត
ដើម្បីពង្រឹងទំនុកចិត្តរបស់អ្នកបម្រើព្រះនៅផែនដីថា ពួកគេនឹងមិនត្រូវបោះបង់ចោលពេលគ្រិស្តសាសនិកដែលបានត្រូវរើសតាំងទាំងអស់ដែលនៅសល់នៅផែនដីនឹងត្រូវឡើងទៅស្ថានសួគ៌។
១. តើពួកអ្នកដែលបានត្រូវរើសតាំងទាំងអស់នឹងនៅស្ថានសួគ៌នៅពេលណា?
ច្រើនឆ្នាំមុន រាស្ត្ររបស់ព្រះយេហូវ៉ាបានឆ្ងល់ថា ‹តើគ្រិស្តសាសនិកចុងក្រោយក្នុងចំណោមអ្នកដែលបានត្រូវរើសតាំងនឹងត្រូវឡើងទៅស្ថានសួគ៌នៅពេលណា?›។ យើងធ្លាប់គិតថា ពួកអ្នកដែលបានត្រូវរើសតាំងខ្លះប្រហែលជាបន្ដរស់នៅផែនដីជាសួនឧទ្យានអស់មួយរយៈពេលក្រោយពីសង្គ្រាមអាម៉ាគេដូន។ ប៉ុន្តែ ក្នុងទស្សនាវដ្ដីប៉មយាម ថ្ងៃទី១៥ ខែកក្កដា ឆ្នាំ២០១៣ យើងបានរៀនថាពួកអ្នករើសតាំងទាំងអស់ដែលនៅតែនៅផែនដីនៅឡើយនឹងត្រូវឡើងទៅស្ថានសួគ៌មុនសង្គ្រាមអាម៉ាគេដូនចាប់ផ្ដើម។—ម៉ាថ. ២៤:៣១
២. តើយើងប្រហែលជាឆ្ងល់អំពីអ្វី ហើយតើយើងនឹងពិចារណាអ្វីក្នុងអត្ថបទនេះ?
២ ប៉ុន្តែ យើងខ្លះប្រហែលជាឆ្ងល់ថា តើអ្វីនឹងកើតឡើងចំពោះ«ចៀមឯទៀត»របស់គ្រិស្តដែលបម្រើព្រះយេហូវ៉ាយ៉ាងស្មោះត្រង់នៅផែនដីក្នុងអំឡុងគ្រា«ទុក្ខវេទនាជាខ្លាំង»? (យ៉ូន. ១០:១៦; ម៉ាថ. ២៤:២១) សព្វថ្ងៃនេះ បងប្អូនខ្លះប្រហែលជាបារម្ភថាពួកគេនឹងមានអារម្មណ៍តែលតោលឬបានត្រូវគេបោះបង់ ពេលបងប្អូនដែលបានត្រូវរើសតាំងជាទីស្រឡាញ់របស់ពួកគេនឹងត្រូវឡើងទៅស្ថានសួគ៌។ សូមយើងពិចារណាអំពីកំណត់ហេតុពីរក្នុងគម្ពីរដែលអាចធ្វើឲ្យពួកគេគិតដូចនេះ។ បន្ទាប់មក យើងនឹងពិចារណាអំពីមូលហេតុដែលយើងមិនចាំបាច់ព្រួយបារម្ភ។
តើអ្វីនឹងមិនកើតឡើង?
៣-៤. តើអ្នកខ្លះប្រហែលជាឆ្ងល់អំពីអ្វី ហើយហេតុអ្វី?
៣ អ្នកខ្លះប្រហែលជាឆ្ងល់ថាតើចៀមឯទៀតនឹងវង្វេងចេញពីសេចក្ដីពិតឬយ៉ាងណា ពេលពួកគេលែងមានបងប្អូនប្រុសដែលបានត្រូវរើសតាំងដែលជាសមាជិកគណៈអភិបាលណែនាំពួកគេ។ ប្រហែលជាកំណត់ហេតុខ្លះក្នុងគម្ពីរនាំឲ្យពួកគេភ័យខ្លាចដូចនេះ។ សូមយើងពិចារណាឧទាហរណ៍ពីរ។ ទី១ជាប់ទាក់ទងនឹងសម្ដេចសង្ឃយេហូយ៉ាដា។ គាត់ជាអ្នកបម្រើដ៏ស្មោះត្រង់របស់ព្រះ។ គាត់និងប្រពន្ធគាត់យេហូសាបៀរ បានការពារបុរសវ័យក្មេងម្នាក់ឈ្មោះយេហូអាស ហើយបានជួយគាត់ឲ្យទៅជាស្ដេចដ៏ល្អនិងស្មោះត្រង់។ ដរាបណាយេហូយ៉ាដាដែលមានវ័យចាស់នៅរស់ ដរាបនោះយេហូអាសបានធ្វើអ្វីដ៏ល្អ។ ប៉ុន្តែក្រោយពីយេហូយ៉ាដាបានស្លាប់ យេហូអាសបែរជាចាប់ផ្ដើមធ្វើអ្វីដ៏អាក្រក់។ គាត់បានស្ដាប់ពួកអ្នកគ្រប់គ្រងដ៏អាក្រក់ ហើយបានចាកចេញពីព្រះយេហូវ៉ា។—២ប្រ. ២៤:២, ១៥-១៩
៤ ឧទាហរណ៍មួយទៀតគឺអំពីគ្រិស្តសាសនិកនៅសតវត្សរ៍ទី២។ សាវ័កយ៉ូហានដែលជាសាវ័កស្លាប់ចុងក្រោយគេ មានឥទ្ធិពលល្អទៅលើគ្រិស្តសាសនិកជាច្រើន ហើយជួយពួកគេឲ្យស៊ូទ្រាំក្នុងកិច្ចបម្រើព្រះយេហូវ៉ា។ (៣យ៉ូន. ៤) ដូចសាវ័កឯទៀតរបស់លោកយេស៊ូបានធ្វើ យ៉ូហានបានតយុទ្ធយ៉ាងខ្លាំងអស់មួយរយៈពេលនឹងការក្បត់ជំនឿដែលរីករាលដាល។ (១យ៉ូន. ២:១៨; ២ថែ. ២:៧) ប៉ុន្តែក្រោយពីយ៉ូហានបានស្លាប់ បុគ្គលជាច្រើនក្នុងក្រុមជំនុំបានធ្វើតាមសេចក្ដីបង្រៀនរបស់ពួកអ្នកក្បត់ជំនឿ។ ក្នុងប៉ុន្មានទសវត្សរ៍ ក្រុមជំនុំគ្រិស្តសាសនិកបានត្រូវបង្ខូចអស់។
៥. តើយើងមិនគួរសន្និដ្ឋានអ្វីពីកំណត់ហេតុទាំងពីរនេះ?
៥ តើកំណត់ហេតុទាំងពីរនោះក្នុងគម្ពីរបង្ហាញថាអ្វីស្រដៀងនេះនឹងកើតឡើងចំពោះចៀមឯទៀតរបស់គ្រិស្ត ពេលពួកអ្នកដែលបានត្រូវរើសតាំងឡើងទៅស្ថានសួគ៌ឬទេ? នៅពេលនោះ តើគ្រិស្តសាសនិកដ៏ស្មោះត្រង់នៅផែនដីនឹងងាកចេញពីការបង្ហាត់បង្រៀនដូចយេហូអាស ឬទៅជាអ្នកក្បត់ជំនឿដូចគ្រិស្តសាសនិកជាច្រើនក្នុងអំឡុងសតវត្សរ៍ទី២ គ.ស.ឬទេ? ចម្លើយគឺមិនមែនទាល់តែសោះ! យើងអាចប្រាកដថាពេលពួកអ្នកដែលបានត្រូវរើសតាំងចាកចេញពីផែនដី ចៀមឯទៀតនឹងទទួលការមើលថែយ៉ាងល្អ ហើយនឹងបន្ដគោរពប្រណិប័តន៍ព្រះតាមរបៀបត្រឹមត្រូវ។ ហេតុអ្វីយើងអាចជឿជាក់ដូច្នេះ?
ការគោរពប្រណិប័តន៍ពិតនឹងមិនត្រូវបង្ខូច
៦. តើយើងនឹងពិចារណាអំពីគ្រាបីអ្វី?
៦ ហេតុអ្វីយើងអាចជឿជាក់ថាការគោរពប្រណិប័តន៍ពិតនឹងមិនត្រូវបង្ខូច សូម្បីតែក្នុងអំឡុងគ្រាលំបាកនៅថ្ងៃខាងមុខក្ដី? គឺដោយសារអ្វីដែលយើងបានរៀនពីគម្ពីរអំពីគ្រាដែលយើងរស់នៅ។ គ្រានេះខុសគ្នាឆ្ងាយពីគ្រាអ៊ីស្រាអែលសម័យបុរាណនិងសម័យរបស់គ្រិស្តសាសនិកនៅសតវត្សរ៍ទី២។ ដូច្នេះ សូមឲ្យយើងពិនិត្យមើលយ៉ាងដិតដល់ជាងអំពីគ្រាទាំងបីនេះ៖ (១) គ្រាអ៊ីស្រាអែលសម័យបុរាណ (២) គ្រាបន្ទាប់ពីពួកសាវ័កបានស្លាប់ និង(៣) គ្រាយើង គឺជា«គ្រាដែលលោកធ្វើអ្វីៗទាំងអស់ជាថ្មីឡើងវិញ»។—សកម្ម. ៣:២១
៧. នៅអ៊ីស្រាអែលសម័យបុរាណ ហេតុអ្វីមនុស្សស្មោះត្រង់មិនអស់សង្ឃឹម ពេលប្រជាជាតិនិងស្ដេចរបស់ពួកគេសម្រេចចិត្តដើរតាមមាគ៌ាដ៏ទុច្ចរិត?
៧ គ្រាអ៊ីស្រាអែលសម័យបុរាណ។ មិនយូរមុនម៉ូសេស្លាប់ គាត់បានប្រាប់ជនជាតិអ៊ីស្រាអែលថា៖ «ខ្ញុំដឹងហើយថា ក្រោយពីខ្ញុំស្លាប់ទៅអ្នករាល់គ្នានឹងប្រព្រឹត្តអំពើទុច្ចរិតជាក់ជាមិនខាន។ អ្នករាល់គ្នានឹងបែរចេញពីផ្លូវដែលខ្ញុំបានបង្រៀនអ្នករាល់គ្នា»។ (បច. ៣១:២៩) ម៉ូសេក៏បានព្រមានថាបើជនជាតិអ៊ីស្រាអែលបះបោរ ពួកគេនឹងត្រូវនិរទេស។ (បច. ២៨:៣៥, ៣៦) តើពាក្យទាំងនោះក្លាយជាការពិតឬទេ? មែន។ អស់ជាច្រើនសតវត្សរ៍ ស្ដេចជាច្រើនបានសម្រេចចិត្តដើរតាមមាគ៌ាដ៏ទុច្ចរិត ហើយនាំរាស្ត្ររបស់ព្រះឲ្យវង្វេង។ ហេតុនេះ ព្រះយេហូវ៉ាបានដាក់ទោសមនុស្សទុច្ចរិតក្នុងចំណោមប្រជាជាតិអ៊ីស្រាអែល ហើយមិនអនុញ្ញាតឲ្យស្ដេចជនជាតិអ៊ីស្រាអែលគ្រប់គ្រងលើបណ្ដាជនអ៊ីស្រាអែលទៀត។ (អេគ. ២១:២៥-២៧) ប៉ុន្តែ ជនជាតិអ៊ីស្រាអែលដ៏ស្មោះត្រង់កាន់តែមានចិត្តក្លាហានពេលពួកគេបានឃើញថាប្រសាសន៍របស់ព្រះបានក្លាយជាការពិត។—អេ. ៥៥:១០, ១១
៨. តើយើងគួរភ្ញាក់ផ្អើលដែលក្រុមជំនុំគ្រិស្តសាសនិកនៅសតវត្សរ៍ទី២បានត្រូវបង្ខូចឬទេ? សូមពន្យល់។
៨ គ្រាបន្ទាប់ពីពួកសាវ័កបានស្លាប់។ តើយើងគួរភ្ញាក់ផ្អើលដែលក្រុមជំនុំគ្រិស្តសាសនិកនៅសតវត្សរ៍ទី២បានត្រូវបង្ខូចឬទេ? ប្រាកដជាអត់ទេ។ លោកយេស៊ូបានប្រកាសទុកជាមុនថានឹងមានការក្បត់ជំនឿដ៏ធំកើតឡើង។ (ម៉ាថ. ៧:២១-២៣; ១៣:២៤-៣០, ៣៦-៤៣) សាវ័កប៉ូល ពេត្រុស និងយ៉ូហានបានបញ្ជាក់ថា ទំនាយរបស់លោកយេស៊ូបានចាប់ផ្ដើមសម្រេចរួចហើយនៅសតវត្សរ៍ទី១ គ.ស.។ (២ថែ. ២:៣, ៧; ២ពេ. ២:១; ១យ៉ូន. ២:១៨) នៅសតវត្សរ៍ទី២ គ.ស. ក្រុមជំនុំគ្រិស្តសាសនិកបានត្រូវបង្ខូច។ គ្រិស្តសាសនាដែលក្បត់ជំនឿបានទៅជាផ្នែកមួយនៃបាប៊ីឡូនដ៏ខ្លាំងក្លា ដែលជាសាសនាមិនពិតទាំងឡាយនៅទូទាំងពិភពលោក។ អ្វីដែលលោកយេស៊ូបានប្រកាសទុកជាមុនបានត្រូវសម្រេច។
៩. តើគ្រាដែលយើងរស់នៅខុសពីគ្រាអ៊ីស្រាអែលសម័យបុរាណ និងគ្រាក្រុមជំនុំគ្រិស្តសាសនិកនៅសតវត្សរ៍ទី២យ៉ាងដូចម្ដេច?
៩ «គ្រាដែលលោកធ្វើអ្វីៗទាំងអស់ជាថ្មីឡើងវិញ»។ គ្រារបស់យើងខុសពីគ្រាអ៊ីស្រាអែលសម័យបុរាណ និងគ្រានៃការក្បត់ជំនឿដ៏ធំដែលកើតឡើងក្នុងអំឡុងសតវត្សរ៍ទី២ គ.ស.។ តើគ្រារបស់យើងហៅថាអ្វី? ជាធម្មតា យើងហៅគ្រានេះថា«គ្រាចុងក្រោយបង្អស់»នៃរបៀបរបបពិភពលោកទុច្ចរិតនេះ។ (២ធី. ៣:១) ប៉ុន្តែគម្ពីរបង្ហាញថាគ្រាដ៏អស្ចារ្យជាងនិងយូរជាងក៏ចាប់ផ្ដើមនៅដំណាលគ្នានឹង«គ្រាចុងក្រោយបង្អស់»នោះ។ គ្រានោះនឹងបន្ដរហូតដល់រាជាណាចក្រមេស្ស៊ីធ្វើឲ្យមនុស្សជាតិទៅជាល្អឥតខ្ចោះឡើងវិញ និងប្រែក្លាយផែនដីទៅជាសួនឧទ្យាន។ គ្រានេះបានត្រូវហៅថា«គ្រាដែលលោកធ្វើអ្វីៗទាំងអស់ជាថ្មីឡើងវិញ»។ (សកម្ម. ៣:២១) គ្រានេះបានចាប់ផ្ដើមនៅឆ្នាំ១៩១៤។ ពេលនោះតើអ្វីបានទៅជាថ្មីឡើងវិញ? លោកយេស៊ូបានទៅជាស្ដេចនៅស្ថានសួគ៌ ដូច្នេះព្រះយេហូវ៉ាមានអ្នកគ្រប់គ្រងម្ដងទៀតដើម្បីជាតំណាងលោកដែលជាអ្នកស្នងតំណែងពីដាវីឌដែលជាស្ដេចដ៏ស្មោះត្រង់។ ប៉ុន្តែមិនមានតែអំណាចគ្រប់គ្រងនោះប៉ុណ្ណោះទេដែលព្រះយេហូវ៉ាធ្វើឲ្យថ្មីឡើងវិញ។ មិនយូរក្រោយពីនោះ ការគោពប្រណិប័តន៍ពិតក៏បានត្រូវចាប់ផ្ដើមរៀបចំឡើងវិញ! (អេ. ២:២-៤; អេគ. ១១:១៧-២០) ប៉ុន្តែ តើនោះនឹងត្រូវបង្ខូចម្ដងទៀតឬទេ?
១០. (ក) តើគម្ពីរប្រាប់អ្វីទុកជាមុនអំពីការគោរពប្រណិប័តន៍ពិតនៅសម័យយើង? (អេសាយ ៥៤:១៧) (ខ) ហេតុអ្វីទំនាយបែបនេះពង្រឹងទំនុកចិត្តយើង?
១០ សូមអាន អេសាយ ៥៤:១៧។ សូមគិតអំពីទំនាយនេះ។ «ឯគ្រឿងអាវុធណាដែលគេធ្វើឡើងដើម្បីប្រឆាំងអ្នក នោះនឹងគ្មានប្រសិទ្ធភាពឡើយ»! ពាក្យទាំងនេះដែលបានត្រូវសរសេរក្រោមការដឹកនាំរបស់ព្រះកំពុងសម្រេចនៅសព្វថ្ងៃនេះ។ ពាក្យសម្រាលទុក្ខនៅបន្ទាប់នេះក៏សំដៅលើសម័យយើងដែរ ដែលថា៖ «កូនៗទាំងអស់របស់អ្នកនឹងទទួលការបង្ហាត់បង្រៀនពីព្រះយេហូវ៉ា ហើយសេចក្ដីសុខសាន្តរបស់ពួកគេនឹងមានជាបរិបូរ។ អ្នកនឹងត្រូវតាំងឡើងយ៉ាងមាំក្នុងសេចក្ដីសុចរិត។ . . . អ្នកនឹងមិនភ័យខ្លាចហើយក៏មិនតក់ស្លុតដែរ ព្រោះអ្វីដែលគួរឲ្យខ្លាចនឹងមិនមកជិតអ្នកទេ»។ (អេ. ៥៤:១៣, ១៤) សូម្បីតែសាថានដែលជា«ព្រះនៃរបៀបរបបពិភពលោកនេះ»ក៏មិនអាចបញ្ឈប់កិច្ចការដែលរាស្ត្ររបស់ព្រះយេហូវ៉ាកំពុងធ្វើដើម្បីបង្រៀនអ្នកឯទៀតអំពីព្រះយេហូវ៉ាបានឡើយ។ (២កូ. ៤:៤) ការគោរពប្រណិប័តន៍ពិតបានត្រូវរៀបចំឡើងវិញ ហើយនោះនឹងមិនត្រូវបង្ខូចម្ដងទៀតទេ តែនោះនឹងស្ថិតស្ថេរជារៀងរហូត។ គ្រឿងអាវុធណាដែលគេធ្វើឡើងដើម្បីប្រឆាំងយើង នឹងគ្មានប្រសិទ្ធភាពឡើយ!
តើអ្វីនឹងកើតឡើង?
១១. តើអ្វីធ្វើឲ្យយើងជឿជាក់ថាមនុស្សមួយក្រុមធំនឹងមិនបានត្រូវបោះបង់ចោលពេលពួកអ្នកដែលបានត្រូវរើសតាំងឡើងទៅស្ថានសួគ៌?
១១ តើអ្វីនឹងកើតឡើងពេលពួកអ្នកដែលបានត្រូវរើសតាំងឡើងទៅស្ថានសួគ៌? សូមចាំថាលោកយេស៊ូគឺជាគង្វាលរបស់យើង។ លោកជាប្រមុខនៃក្រុមជំនុំគ្រិស្តសាសនិក។ លោកយេស៊ូបានប្រាប់យ៉ាងច្បាស់ថា៖ «អ្នករាល់គ្នាមានអ្នកដឹកនាំតែមួយទេ គឺគ្រិស្ត»។ (ម៉ាថ. ២៣:១០) លោកយេស៊ូដែលកំពុងគ្រប់គ្រងជាស្ដេចនៅស្ថានសួគ៌នឹងតែងតែថែរក្សាពួកអ្នកកាន់តាមពិតរបស់លោក។ ដោយមានលោកយេស៊ូគ្រិស្តណែនាំពួកគេ ពួកអ្នកកាន់តាមលោកនៅផែនដីមិនចាំបាច់ភ័យខ្លាចអ្វីទេ។ ពិតមែន យើងមិនដឹងព័ត៌មានទាំងអស់អំពីរបៀបដែលគ្រិស្តនឹងដឹកនាំរាស្ត្ររបស់លោកនៅពេលនោះទេ។ ដូច្នេះ សូមយើងពិចារណាឧទាហរណ៍ខ្លះក្នុងគម្ពីរដែលអាចពង្រឹងកម្លាំងចិត្តយើង។
១២. តើតាមរបៀបណាព្រះយេហូវ៉ាបានថែទាំរាស្ត្ររបស់លោក (ក) ក្រោយពីម៉ូសេស្លាប់? (ខ) ក្រោយពីអេលីយ៉ាបានទទួលភារកិច្ចថ្មី? (សូមមើលរូបភាពផងដែរ)
១២ ម៉ូសេបានស្លាប់មុនប្រជាជាតិអ៊ីស្រាអែលចូលស្រុកដែលព្រះបានសន្យា។ តើអ្វីបានកើតឡើងទៅលើរាស្ត្ររបស់ព្រះ? តើពួកគេបានត្រូវបោះបង់ចោលដោយសារគ្មានបុរសស្មោះត្រង់នោះឬទេ? មិនដូច្នេះទេ។ ដរាបណាពួកគេស្មោះត្រង់ ដរាបនោះព្រះយេហូវ៉ាជួយពួកគេ។ មុនម៉ូសេស្លាប់ ព្រះយេហូវ៉ាបានប្រាប់គាត់ឲ្យតែងតាំងយ៉ូស្វេដើម្បីនាំមុខបណ្ដាជន។ ម៉ូសេបានបង្ហាត់បង្រៀនយ៉ូស្វេអស់ជាច្រើនឆ្នាំ។ (ដច. ៣៣:១១; បច. ៣៤:៩) បន្ថែមទៅទៀត មានបុរសជាច្រើននាក់ទៀតដែលមានសមត្ថភាពជាអ្នកនាំមុខ ពោលគឺមេលើ១.០០០នាក់ មេលើ១០០នាក់ មេលើ៥០នាក់ ហើយថែមទាំងមេលើ១០នាក់។ (បច. ១:១៥) រាស្ត្ររបស់ព្រះបានទទួលការថែទាំយ៉ាងល្អ។ យើងឃើញអ្វីស្រដៀងនឹងនេះក្នុងករណីអេលីយ៉ា។ គាត់បាននាំមុខប្រជាជាតិអ៊ីស្រាអែលក្នុងការគោរពប្រណិប័តន៍ពិតអស់ជាច្រើនឆ្នាំ។ ប៉ុន្តែក្រោយមក ព្រះយេហូវ៉ាបានចាត់គាត់ឲ្យបម្រើនៅស្រុកយូដា។ (២បស. ២:១; ២ប្រ. ២១:១២) តើមនុស្សស្មោះត្រង់ក្នុងកុលសម្ព័ន្ធ១០នៃរាជាណាចក្រអ៊ីស្រាអែលបានត្រូវបោះបង់ចោលឬទេ? មិនមែនទេ។ អេលីយ៉ាបានបង្ហាត់បង្រៀនអេលីសេអស់ជាច្រើនឆ្នាំ ហើយក៏មាន«កូនចៅរបស់ពួកអ្នកប្រកាសទំនាយ»ដែលបានទទួលការបង្ហាត់បង្រៀនដែរ។ (២បស. ២:៧) ដូច្នេះ មានបុរសស្មោះត្រង់ជាច្រើននាក់ដែលអាចជួយនាំមុខរាស្ត្ររបស់ព្រះ។ គោលបំណងរបស់ព្រះយេហូវ៉ាបន្ដទៅមុខទៀត ហើយលោកយកចិត្តទុកដាក់ចំពោះពួកអ្នកគោរពប្រណិប័តន៍ដ៏ស្មោះត្រង់របស់លោក។
ម៉ូសេ(រូបភាពខាងឆ្វេង)និងអេលីយ៉ា(រូបភាពខាងស្ដាំ)បានបង្ហាត់បង្រៀនបុគ្គលដែលអាចនាំមុខរាស្ត្ររបស់ព្រះបន្ទាប់ពីពួកគាត់ (សូមមើលវគ្គ១២)
១៣. តើព្រះយេហូវ៉ាសន្យាអ្វីនឹងយើងនៅហេប្រឺ ១៣:៥ខ? (សូមមើលរូបភាពផងដែរ)
១៣ ដោយគិតអំពីគំរូទាំងនោះ តើអ្នកគិតថាអ្វីនឹងកើតឡើងពេលបុគ្គលចុងក្រោយនៃពួកអ្នកដែលបានត្រូវរើសតាំងឡើងទៅស្ថានសួគ៌? យើងមិនចាំបាច់ឆ្ងល់ទេ។ គម្ពីរបង្ហាញថាព្រះយេហូវ៉ានឹងមិនបោះបង់រាស្ត្រលោកនៅផែនដីឡើយ។ (សូមអាន ហេប្រឺ ១៣:៥ខ) ដូចម៉ូសេនិងអេលីយ៉ា គ្រិស្តសាសនិកដែលបានត្រូវរើសតាំងមួយក្រុមតូចដែលនាំមុខសព្វថ្ងៃនេះយល់អំពីសារៈសំខាន់នៃការបង្ហាត់បង្រៀនអ្នកឯទៀត។ អស់ជាច្រើនឆ្នាំ សមាជិកគណៈអភិបាលបានបង្ហាត់បង្រៀនបងប្អូនប្រុសពីចំណោមចៀមឯទៀតឲ្យនាំមុខ។ ជាឧទាហរណ៍ ពួកគេបានរៀបចំសាលាជាច្រើនដើម្បីបង្ហាត់បង្រៀនពួកអ្នកចាស់ទុំ អ្នកធ្វើដំណើរត្រួតពិនិត្យ សមាជិកគណៈកម្មាធិការការិយាល័យសាខា អ្នកត្រួតពិនិត្យនៅបេតអែល និងអ្នកឯទៀត។ សមាជិកគណៈអភិបាលផ្ទាល់បានបង្ហាត់បង្រៀនជំនួយការរបស់គណៈកម្មាធិការផ្សេងៗនៃគណៈអភិបាល។ ឥឡូវជំនួយការទាំងនេះបំពេញភារកិច្ចជាច្រើនក្នុងអង្គការរបស់ព្រះយ៉ាងស្មោះត្រង់។ ពួកគេប្រុងប្រៀបជាស្រេចដើម្បីបន្ដធ្វើកិច្ចការថែរក្សាចៀមរបស់គ្រិស្ត។
គណៈអភិបាលបានខំប្រឹងដើម្បីបង្ហាត់បង្រៀនជំនួយការ ហើយរៀបចំសាលាសម្រាប់បង្ហាត់បង្រៀនពួកអ្នកចាស់ទុំ អ្នកធ្វើដំណើរត្រួតពិនិត្យ សមាជិកគណៈកម្មាធិការការិយាល័យសាខា អ្នកត្រួតពិនិត្យនៅបេតអែល និងសាសនទូតនៅទូទាំងពិភពលោក (សូមមើលវគ្គ១៣)
១៤. តើអ្វីជាចំណុចសំខាន់នៃការពិចារណារបស់យើង?
១៤ ចំណុចសំខាន់នៃការពិចារណារបស់យើងគឺ ពេលបុគ្គលចុងក្រោយក្នុងចំណោមពួកអ្នកដែលបានត្រូវរើសតាំងឡើងទៅស្ថានសួគ៌នៅជិតទីបញ្ចប់នៃគ្រាទុក្ខវេទនាជាខ្លាំង រាស្ត្ររបស់ព្រះយេហូវ៉ានៅផែនដីនឹងបន្តគោរពប្រណិប័តន៍លោកយ៉ាងស្មោះត្រង់។ ដោយសារការដឹកនាំរបស់លោកយេស៊ូគ្រិស្ត ការគោរពប្រណិប័តន៍ពិតនឹងមិនត្រូវបង្អាក់ឡើយ។ ពិតមែនថានៅពេលនោះយើងនឹងទទួលការវាយប្រហារពីកូកនៃស្រុកម៉ាកូកដែលជាប្រជាជាតិនានាដែលចងសម្ព័ន្ធភាពគ្នា។ (អេគ. ៣៨:១៨-២០) ប៉ុន្តែ ការវាយប្រហារដ៏ខ្លីនោះនឹងបរាជ័យ ពោលគឺនឹងមិនបញ្ឈប់រាស្ត្ររបស់ព្រះពីការគោរពប្រណិប័តន៍របស់ព្រះយេហូវ៉ាទេ។ លោកប្រាកដជានឹងសង្គ្រោះពួកគេ! ក្នុងការបើកបង្ហាញឲ្យឃើញក្នុងគំនិត សាវ័កយ៉ូហានបានឃើញ«មនុស្សមួយក្រុមធំ»នៃចៀមឯទៀតរបស់គ្រិស្ត។ យ៉ូហានបានត្រូវប្រាប់ថា«មនុស្សមួយក្រុមធំ»នេះ «ចេញផុតពីគ្រាទុក្ខវេទនាជាខ្លាំង»។ (បប. ៧:៩, ១៤) ដូច្នេះ យើងដឹងប្រាកដថាព្រះយេហូវ៉ានឹងសង្គ្រោះពួកគេ!
១៥-១៦. យោងទៅតាមការបើកបង្ហាញ ១៧:១៤ តើពួកអ្នកដែលបានត្រូវរើសតាំងរបស់គ្រិស្តនឹងធ្វើអ្វីក្នុងអំឡុងសង្គ្រាមអាម៉ាគេដូន ហើយហេតុអ្វីនេះគួរឲ្យលើកទឹកចិត្ត?
១៥ ប៉ុន្តែ អ្នកខ្លះប្រហែលជាឆ្ងល់ថា ‹ចុះយ៉ាងណាពួកអ្នកដែលបានត្រូវរើសតាំង តើពួកគេនឹងធ្វើអ្វីក្រោយពីពួកគេឡើងទៅស្ថានសួគ៌?›។ គម្ពីរផ្ដល់ចម្លើយចំពោះសំណួរនេះយ៉ាងចំៗ ដោយបង្ហាញថារដ្ឋាភិបាលរបស់ពិភពលោកនេះនឹង«ច្បាំងនឹងកូនចៀម»។ ពួកគេនឹងបរាជ័យ ដោយសារ«កូនចៀមនឹងឈ្នះពួកគេ»។ តើអ្នកណានឹងជួយលោក? ខនោះឆ្លើយថា៖ «ពួកអ្នកដែលព្រះបានហៅ» «បានជ្រើសរើស» និង«ដែលស្មោះត្រង់ចំពោះព្រះ»។ (សូមអាន ការបើកបង្ហាញ ១៧:១៤) តើពួកអ្នកទាំងនេះជាអ្នកណា? គឺពួកអ្នករើសតាំងដែលបានត្រូវប្រោសឲ្យរស់ឡើងវិញ! ដូច្នេះ ពេលពួកអ្នកចុងក្រោយនៃបុគ្គលដែលបានត្រូវរើសតាំងឡើងទៅស្ថានសួគ៌នៅជិតចុងបញ្ចប់នៃគ្រាទុក្ខវេទនាជាខ្លាំង ភារកិច្ចដំបូងមួយរបស់ពួកគេគឺការច្បាំង។ នេះជាឯកសិទ្ធិដ៏អស្ចារ្យមែន! គ្រិស្តសាសនិកដែលបានត្រូវរើសតាំងខ្លះ ធ្លាប់ជាអ្នកប្រយុទ្ធមុនពួកគេបានទៅជាសាក្សីព្រះយេហូវ៉ា។ ពួកគេខ្លះថែមទាំងធ្លាប់ធ្វើជាទាហាន។ ប៉ុន្តែក្រោយមក ពួកគេបានទៅជាគ្រិស្តសាសនិកពិត ហើយបានរៀនអំពីមាគ៌ានៃសេចក្ដីសុខសាន្ត។ (កាឡ. ៥:២២; ២ថែ. ៣:១៦) ពួកគេបានឈប់គាំទ្រសង្គ្រាម។ ប៉ុន្តែក្រោយពីពួកគេឡើងទៅស្ថានសួគ៌ ពួកគេនឹងបម្រើជាមួយគ្រិស្ត ព្រមទាំងទេវតាដ៏បរិសុទ្ធរបស់លោក ក្នុងសង្គ្រាមចុងក្រោយដើម្បីប្រយុទ្ធប្រឆាំងនឹងសត្រូវរបស់ព្រះ។
១៦ សូមគិតអំពីចំណុចនេះ។ នៅផែនដី គ្រិស្តសាសនិកដែលបានត្រូវរើសតាំងខ្លះមានវ័យចាស់ ហើយថែមទាំងខ្សោយកម្លាំង។ ប៉ុន្តែ ពេលឡើងទៅស្ថានសួគ៌ ពួកគេនឹងទៅជាបុគ្គលវិញ្ញាណដ៏ខ្លាំងក្លានិងមានជីវិតអមតៈ ដែលនឹងត្រូវចាត់ឲ្យទៅប្រយុទ្ធរួមដៃជាមួយលោកយេស៊ូគ្រិស្តជាស្ដេចនិងជាអ្នកចម្បាំង។ ក្រោយពីសង្គ្រាមអាម៉ាគេដូនបានច្បាំងចប់ ពួកគេនឹងសហការជាមួយលោកយេស៊ូដើម្បីជួយមនុស្សឲ្យទៅជាល្អឥតខ្ចោះ។ ពួកគេច្បាស់ជានឹងអាចជួយបងប្អូនជាទីស្រឡាញ់របស់ពួកគេនៅផែនដីពីស្ថានសួគ៌ ច្រើនជាងអ្វីដែលពួកគេអាចធ្វើពេលពួកគេជាមនុស្សមិនល្អឥតខ្ចោះ!
១៧. ហេតុអ្វីយើងដឹងថាអ្នកបម្រើរបស់ព្រះទាំងអស់នឹងមានសុវត្ថិភាពក្នុងអំឡុងសង្គ្រាមអាម៉ាគេដូន?
១៧ តើអ្នកនៅក្នុងចំណោមចៀមឯទៀតឬទេ? បើដូច្នេះ តើអ្នកនឹងត្រូវធ្វើអ្វីពេលសង្គ្រាមអាម៉ាគេដូនដែលជាសង្គ្រាមសំខាន់ណាស់ចាប់ផ្ដើម? គឺ ចូរទុកចិត្តព្រះយេហូវ៉ា ហើយធ្វើតាមការណែនាំពីលោក។ តើនោះប្រហែលជារួមបញ្ចូលអ្វី? គម្ពីរចែងថា៖ «ចូរចូលទៅបន្ទប់ខាងក្នុង ហើយបិទទ្វារឲ្យជិតទៅ។ ចូរលាក់ខ្លួនមួយរយៈរហូតដល់កំហឹងខ្ញុំកន្លងផុតទៅ»។ (អេ. ២៦:២០) អ្នកបម្រើដ៏ស្មោះត្រង់ទាំងអស់របស់ព្រះនៅស្ថានសួគ៌និងនៅផែនដី នឹងមានសុវត្ថិភាពក្នុងអំឡុងពេលនោះ។ ដូចសាវ័កប៉ូល យើងជឿជាក់ថាទោះជា«ពួកអ្នកគ្រប់គ្រង អ្វីៗនៅគ្រាឥឡូវនេះ អ្វីៗនៅគ្រាខាងមុខ . . . ក៏ដោយ ក៏មិនអាចធ្វើឲ្យយើងឃ្លាតចេញពីសេចក្ដីស្រឡាញ់របស់ព្រះ»ឡើយ។ (រ៉ូម ៨:៣៨, ៣៩) សូមចាំជានិច្ចថាព្រះយេហូវ៉ាស្រឡាញ់អ្នក ហើយលោកនឹងមិនបោះបង់ចោលអ្នកទេ!
ពេលបុគ្គលចុងក្រោយនៃគ្រិស្តសាសនិកដែលបានត្រូវរើសតាំងឡើងទៅស្ថានសួគ៌
-
តើអ្វីនឹងមិនកើតឡើង?
-
ហេតុអ្វីយើងអាចប្រាកដថាការគោរពប្រណិប័តន៍ពិតនឹងមិនត្រូវបង្ខូច?
-
ហេតុអ្វីយើងអាចជឿជាក់ថាព្រះយេហូវ៉ានឹងថែរក្សារាស្ត្ររបស់លោក?
ចម្រៀងលេខ៨ ព្រះយេហូវ៉ាជាទីពឹងពំនាក់របស់យើង
