1. Mu kithangana kyebhi o Jikidistá joso a undu anda kala ku dyulu?

 MIVU ku dima, o mundu wa Jihova exile mu dibwidisa,‘kithangana kyebhi kyandaya ku dyulu o Jikidistá ja undu a subuka mu ixi?’ Twexile mu xinganeka kwila amoxi ku Jikidistá a undu eji kala hanji mu ixi ni kutunga mu Palayizu mu ithangana yofele kyoso kyeji bhita o ita ya Alumajedone. Maji mu Mulangidi wa 15 wa Kavwa wa 2013 twadilongo kwila ande dya ita ya Alumajedone kumateka, o Jikidistá joso a undu anda kala kya ku dyulu.—Mat. 24:31.

2. Kibhwidisu kyebhi nange ki dibhanga amoxi, ni ihi i twanda mona mu milongi yiyi?

² Maji phe, amoxi nange a dibhwidisa: Ihi yanda bhita ni “jimbudi ja mukwá” ja Kidistu janda suluka mu kusidivila Jihova ni ufiyele woso mu kithangana kya “hadi yadikota”? (Nzw. 10:16; Mat. 24:21) Amoxi ku jimbudi jamukwa nange a tena kuthandanganya mu kuxinganeka kwila kanda kala ni muthu phala ku a endesa ni ku a kwatekesa kyoso o jiphange a tokala ku Jikidistá a undu kyandaya ku dyulu. Twanda zwela yalungu ni misoso iyadi mu Bibidya nange itena ku abhangesa kuxinganeka kiki. Mu kusuluka, twanda mona se mukonda dyahi kikubhingi kuthandanganya.

IHI KI YANDA BHITA NI JIMBUDI JAMUKWA?

3-4. Amoxi nange a dibhwidisa ihi, ni mukonda dyahi?

³ Amoxi nange a dibhwidisa se o jimbudi jamukwa anda kweha kusidivila Jihova, kyoso mu ixi kimwanda kala dingi jiphange Jikidistá a undu atokala ku Kibuka Kya Utuminu phala kwa endesa. Nange sayi misoso ya Bibidya yene mu abhangesa kudivwa kiki. Tumone misoso iyadi. O wa dyanga walungu ni Mukunji Wadikota,  Joyada. Mwene wexile selevende ya fiyele ya Nzambi. Mwene ni muhatu we, Jozabate, alangele kamunzangala amwixanene Jowaji, ya a mukwatekesa kukituka sobha yambote, wexile fiyele kwa Nzambi. Mu kithangana kyoso o mwadyakime Joyada kyexile ku mwenyu, Jowaji wexile mubheza Jihova ni kubhanga ima yambote. Maji kyoso Joyada kyafu, kikulaleka kyavulu, Jowaji wamateka kubhanga ima yayibha. Mwene wabhana matwi ku itendelesu ya ilamba yayibha, yu weha kubheza Jihova.—2 Mal. 24:​2, 15-19.

⁴ O musoso wa kayadi, walungu ni Jikidistá atungile mu kithangana kyafu o jipoxolo joso. Poxolo Nzwá mwene wasukina mu kufwa. Kyoso kyexile hanji ku mwenyu, mwene wexile mukwatekesa Jikidistá javulu kusuluka mu kukala fiyele kwa Jihova. (3 Nz. 4) Kala kyabhitile ni jipoxolo jamukwa ja Jezú, poxolo Nzwá wabhingile kubhanga nguzu yavulu phala kulanga o ilunga ku ilongesu ya akwa kulungulukila o kidi, yexile mudimwanga. (1 Nz. 2:18; 2 Te. 2:7) Maji kyoso poxolo Nzwá kyafu, avulu mu ilunga a kayela o ilongesu ya akwa kulungulukila o kidi. Mu mivu ya kayela, o Jikidistá jenyojo jexile mu longa milongi yavulu ya makutu ni kwehela o ukexilu wayibha mu ilunga yoso.

5. Yalungu ni misoso iyadi yiyi, ima yahi ki tutokala ku ixinganeka kwila yanda bhita?

⁵ O kwila o misoso iyadi yiyi ya Bibidya, ilondekesa kwila kyoso o Jikidistá a undu kyandaya ku dyulu, o jimbudi jamukwa ja Kidistu, janda mateka kubhanga ima yayibha, kala kya bhitile ni Jowaji, mba janda lungulukila o kidi, kala kya bhiti ni athu avulu kyoso kyafu o jipoxolo? Tutena kutambwijila ni kidi kyoso kwila, kana! Tutena kudyelela kwila kyoso o Jikidistá a undu kyandaya ku dyulu, o jimbudi jamukwa anda suluka mu kubheza Jihova mu ukexilu watokala, ni kwila Jezú wanda suluka mu ku alanga. Mukonda dyahi tutena kukala ni kidyelelu kiki?

O MUNDU WA JIHOVA WANDA SULUKA MU KUMUBHEZA JINGA MU UKEXILU WAMESENA MWENE

6. Twanda zwela bhofele yalungu ni ithangana itatu yebhi?

⁶ Mukonda dyahi tutena kudyelela kwila o ubhezelu wa kidi kanda ufunyisa, ne mwene mu ithangana yabhonzo yanda kwiza kupholo? Mukonda o Bibidya ijimbulula kwila o izuwa yetu kiyadifu ni izuwa ya akwa Izalayele, kiyadifu we ni izuwa ya Jikidistá mu kithangana kyafu o jipoxolo. Kyenyiki tuzwele dingi bhofele yalungu ni ithangana yiyi: (1) O kithangana kya akwa Izalayele yokulu, (2) o kithangana kyafu o jipoxolo, ni (3) Kithangana kyetu “o kithangana kya Nzambi kuyukisa o ima yoso.”—Ika. 3:21.

7. Mukonda dyahi o akwa Izalayele exile jifiyele, kabhingile kuthandanganya kyoso o jisobha ni athu avulu amukwa kyasolele kubhanga ima yayibha?

⁷ O kithangana kya akwa Izalayele yokulu. Ithangana ande dya kufwa kwe, Mozé watangela akwa Izalayele: ‘Eme nga k’ijiya kyambote mwene kwila o ki ngi zubha o kúfwa, sé phata, enu mwanda bhanga ima yayibha, o njila i ngamixindile mwanda isondoloka.’ (Mate. 31:29) Mozé wa dimuna we akwa Izalayele kwila se ene a bhukumukine Jihova, eji kwa ambata ku ubhika. (Mate. 28:​35, 36) O kwila o izwelu yiyi ya dikumbidila mwene? Kyene. Jisobha javulu mu Izalayele jexile mubhanga ima yayibhila Jihova mu mivu yavulu, ya abhangesa we o mundu ku akayela mu ubhezelu wa makutu. Mukonda dya kiki Jihova wa kaxtikala o kifuxi kya Izalayele anga kehela dingi muthu mukwa Izalayele kutumina kala Sobha. (Ize. 21:​25-27) Maji o akwa Izalayele exile fiyele, kyoso kyamono kwila o ima ya zwelele Nzambi ya dikumbidila, kiki kya abhana kuswina phala kusuluka mu kumusidivila ni ufiyele woso.—Iza. 55:​10, 11.

8. O kwila twatokala kudiwana mu kwijiya kwila, kyafu o jipoxolo, o kilunga kya Jikidistá kyezalele ni athu akwa kulungulukila o kidi? Jimbulula.

⁸ O kithangana kyafu o jipoxolo. Mu kithangana  kyafu o jipoxolo, o kilunga kya Jikidistá kyezalele ni athu akwa kulungulukila o kidi. O kwila kiki kima kya kudiwana? Kana. Mukonda Jezú wa kanene kya kwila, kweji moneka athu avulu akwa kulungulukila o kidi. (Mat. 7:​21-23; 13:​24-30, 36-43) O jipoxolo Phawulu, Phetele, ni Nzwá alondekesa kwila, o kikanenu kya Jezú kyexile kya mu dikumbidila mu izuwa ya. (2 Te. 2:​3, 7; 2 Ph. 2:1; 1 Nz. 2:18) Kyoso kyafu o poxolo ya sukina, kikulaleka kyavulu, o Jikidistá akwa kulungulukila o kidi a kituka mbandu ya Babilonya Yadikota, kifwa o kisangela kya jingeleja joso ja makutu. O kikanenu kya Jezú, kya dikumbidila.

9. Mu ukexilu webhi o izuwa yetu, kiyadifu ni izuwa ya akwa Izalayele yokulu, kiyadifu we ni kithangana kyafu o jipoxolo?

⁹ “O kithangana kya Nzambi kuyukisa o ima yoso.” O izuwa yetu, kiyadifu ni izuwa ya akwa Izalayele yokulu, kiyadifu we ni kithangana kyafu o jipoxolo anga o ilunga yezalele ni akwa kulungulukila o kidi. O izuwa yetu a ixana kyebhi? Etu twene mwixana o kithangana kiki kala “izuwa isukidilaku” ya mundu yu wayibha. (2 Ti. 3:1) Maji o Bibidya ilondekesa kwila sayi kithangana kya katunda kyamateka we kumoxi ni izuwa ya isukidilaku. O kithangana kiki, kyanda suluka kate kyoso o Utuminu wa Mexiya wanda bhangesa o athu oso kukala athu ayuka ni ku kitula o ixi palayizu. O kithangana kiki a kixana “kithangana kya Nzambi kuyukisa o ima yoso.” (Ika. 3:21) O kithangana kiki kyamateka mu muvu wa 1914. Ihi-phe ya yukisa Nzambi? Jezú a mutumbika kala Sobha ku dyulu. Mu kubhanga kiki, Jihova wexile dingi ni muthu ku unguvulu We. O nguvulu yiyi watokalele ku mbutu ya selevende ye ya fiyele, Sobha Davidi. Maji o unguvulu, kikyene ngo o kima kya yukisa Jihova. Jihova wakwatekesa o jiselevende je mu ixi kumubheza dingi lwamukwa mu ukexilu uxikina Mwene! (Iza. 2:​2-4; Ize. 11:​17-20) O kwila o ubhezelu yu anda ku ufunyisa dingi?

10. (a) Ihi ya kanena o Bibidya yalungu ni ubhezelu wa kidi mu izuwa yetu? (Izaya 54:17) (b) Mukonda dyahi o ikanenu yiyi itutululukisa?

¹⁰ Tanga Izaya 54:17. Xinganeka mu kikanenu kiki: “Falamenda yoso-yoso yòbhange phala ku kukwama, ya-nda kulweza”! O izwelu yiyi ya Nzambi ya mudikumbidila mu izuwa yetu. O izwelu yakayela iswinisa, ya mudikumbidila we mu izuwa yetu: ‘A’né oso a ka alonga kwa Jihova; o kutululuka kwa an’é kwanda vula. Nga kà ku xikika ku thandu’a uyukilu. . . . Eye ki wanda kala dingi ni kekenya ya kima; ki wanda kala dingi ni woma wa kima, kana-ku dingi kizwelu kya kà ku bhixila.’ (Izaya 54:​13, 14) Ne mwene Satanaji, “o nzambi ya mundu yú,” kanda tena kufidisa o kikalakalu  kya mubhanga o mundu wa Jihova, kya kulonga akwa yalungu ni Nzambi. (2 Ko. 4:4) O ubhezelu wa kidi a uyukisa kya, nuka dingi anda ku ufidisa. Wene wanda nangenena kate ku hadya ni hadya. Seku uta wobhange phala kutukwama, wanda tena ku tutolola!

IHI YANDA BHITA?

11. Ihi itudyelelesa kwila o mundu wavulu kanda ku abwazeka kyoso o Jikidistá a undu kyandaya ku dyulu?

¹¹ Ihi yanda bhita kyoso o Jikidistá a undu kyandaya ku dyulu? Lembalala kwila, Jezú mwene o Mubhidi wetu. Mwene o mutwameni wa kilunga. Jezú wambe ni kidi kyoso: “Sayi Ngana yenu imoxi ngó, mwéne Kidistu.” (Mat. 23:10) Jezú, o Sobha yetu wala ku dyulu, wanda suluka jinga mu kulanga o akayedi’e. Kuma Kidistu mwene wanda kwa endesa, o akayedi yê mu ixi mumu, kanda bhinga kukala ni woma wa kima kyoso-kyoso. Mu kidi, ki twejiya o ima yoso yalungu ni kyebhi Jezú kyanda kwendesa o mundu we mu kithangana kyenyokyo. Mu kiki, tumone misoso ya Bibidya itena kutuswinisa.

12. Kyebhi Jihova kyalange o mundu we (a) kyoso kyafu Mozé? (b) kyoso Elija kya tambula kikalakalu kyengi? (Tala we ofoto.)

¹² Ande dya akwa Izalayele kubokona mu Ixi ya a Kanene, Mozé wafu. Ihi ya bhiti ni mundu wa Nzambi? O kwila Jihova weha kukwatekesa o mundu we kyoso kyafu o selevende yiyi ya fiyele? Kana. Kyoso kyexile mu musidivila ni ufiyele woso, Jihova wexile mu alanga. Ande dya Mozé kufwa, Jihova wa mutendelesa kusola Jozuwé phala kwendesa o mundu. Mozé walongele Jozuwé mu mivu yavulu. (Mak. 33:11; Mate. 34:9) Ku mbandu yamukwa, kwexile we mayala avulu akudile mu nzumbi phala kwendesa o kifuxi—amoxi phala kwendesa ji midi ja athu, ji hama, makwinyi atanu, ni dikwinyi. (Mate. 1:15) O mundu wa Nzambi exile mu alanga kyambote. Kyene we kyabhiti mu izuwa ya Elija. Mu mivu yavulu, mwene wakalakala ni nguzu yoso phala kukwatekesa akwa Izalayele kubheza Jihova. Maji kupholo dya kwenda, Jihova wa mutumikisa ku mbandu ya lwiji ya Judá, phala kusidivila kwenyoko. (2 Jis. 2:1; 2 Mal. 21:12) O kwila o jiselevende ja fiyele ja Jihova atokalele ku dikwinyi dya miji dya Izalayele, a xala se mwendexi? Kana. Mukonda Elija wabhitile mivu yavulu mu kulonga Elizewu. Kwexile we o “an’a jipolofeta,” o athu enyo a alongele we. (2 Jis. 2:7) Kyenyiki, tutena kumona kwila kwexile mayala avulu afiyele, phala kwendesa o mundu wa Nzambi. Jihova wa suluka mu kukumbidila o vondadi ye, ni kulanga o abhezi’e a fiyele.

13. Kidyelelu kyebhi ki tusanga mu divulu dya Jihebelewu 13:5b? (Tala we ofoto.)

¹³ Mu kuxinganeka mu misoso yiyi, ihi yanda  bhita ni jiselevende ja Nzambi mu ixi, kyoso o Jikidistá joso a undu, kyandaya ku dyulu? Kitubhingi kuthandanganya. O Bibidya itutangela o kidi kiki, ki tutululukisa: Jihova nuka wanda bwazeka o mundu we mu ixi. (Tanga Jihebelewu 13:5b.) Kala kyabhiti ni Mozé ni Elija, o kibuka kyofele kya Jikidistá a undu, a mukwendesa o mundu wa Nzambi lelu, ejiya o mbote ya kulonga akwa. Mu mivu yavulu, o jiphange a tokala ku Kibuka Kya Utuminu, ene mulonga jiphange ja mala ja tokala ku jimbudi jamukwa, phala kwendesa o mundu wa Nzambi. Mu kifika, o jiphange a tokala ku Kibuka Kya Utuminu, ene mu sokejeka jixikola phala kulonga tufunga, tufunga twa ilunga, jiphange abhanga mbandu ku Kibuka kya Filiyale, jiphange phala kwendesa o ikalakalu ku Betele, ni jiphange jamukwa. Ene we akalakala ni akwatekexi abhanga mbandu mu ibuka yavulu ya Kibuka Kya Utuminu phala ku alonga. Ne mwene kindala, o akwatekexi enya, ene mulanga kya ikalakalu yavulu mu kilunga kya Jihova. Ene ala polondo phala kusuluka ni kikalakalu kya kulanga o jimbudi ja Kidistu.

14. Yebhi o pondo yabeta-kota ya milongi yiyi?

¹⁴ O pondo yabeta-kota ya milongi yetu yeniyi: Kyoso o Jikidistá a undu a sukinaku kyandaya ku dyulu, ku disukilu dya kithangana kya hadi yadikota, o mundu wa Jihova mu ixi wanda suluka mu kumubheza ni ufiyele woso. Ni kikwatekesu kya Jezú kala mutwameni wa, o abhezi a Nzambi nuka anda kweha kumusidivila. Twejiya kwila mu kithangana kyenyokyo, o kibuka kya ifuxi a kixana mu Bibidya kala Ngôngo dya Mangongo, kyanda zukutisa o mundu wa Nzambi. (Ize. 38:​18-20) Maji o kizukutisu kyenyokyo kyanda lweza; kyene kikyanda fidisa o mundu wa Nzambi kubheza Jihova. Se phata mwene wanda bhulula o mundu we! Bhukaxi ka kisumwa, poxolo Nzwá wamono o “mundu wavulu” wa jimbudi jamukwa ja Kidistu. Nzwá a mutangela kwila o “mundu wavulu” yu, “watundu ku hadi yadikota.” (Dij. 7:​9, 14) Kiki kilondekesa ni kidi kyoso kwila, Jihova wanda ku abhulula!

15-16. Kala kilondekesa Dijingunwinu 17:​14, ihi yanda bhanga o akayedi a Kidistu a undu, mu kithangana kya ita ya Alumajedone, ni mukonda dyahi kiki kituswinisa?

¹⁵ Maji ne kiki, amoxi nange a dibhwidisa:  ‘Abha o yalungu ni Jikidistá a undu? Ihi yanda bhanga kyoso kyanda kala kya ku dyulu?’ O Bibidya itambwijila o kibhwidisu kiki sé kubhana jihonda. Yene itutangela kwila, o jinguvulu ja ngongo yiyi janda “lwa ita ni Kambudi.” Se phata kwila ene kanda tena. O Bibidya yamba: “O Kambudi wanda ku atolola.” Nanyi phe wanda kwatekesa o Kambudi? O velusu yeniyi itambwijila. O athu “a exana,” “a asolo,” “o jifiyele.” (Tanga Dijingunwinu 17:14.) O athu enya a ananyi? O Jikidistá a undu a afukununa! Mu kiki phe, kyoso o Jikidistá a undu a sukinaku kyandaya ku dyulu, ku disukilu dya kithangana kya hadi yadikota, o kikalakalu kya kimoxi kya dyanga kyanda tambula, o kubhânga. Kiki kikalakalu kya katunda! Amoxi ku Jikidistá a undu, exile mulwa ita ni akwa, ande dya kukituka Jimbangi ja Jihova. Amoxi kate mwene exile masoladi. Maji ku pholo dya kwenda, ene a kituka Jikidistá jakidi, ya adilongo kutunga ni kutululuka ni akwa. (Nga. 5:22; 2 Te. 3:16) Ene eha kukwatekesa ni kudita mu ita. Maji, kyoso kyanda ku afukununa phala kuya ku dyulu, ene anda kala ku mbandu ya Jezú ni jianju je, phala kulwa mu ita yasukina phala kutolola o jinguma ja Nzambi.

¹⁶ Xinganeka mu maka enya! Amoxi ku Jikidistá a undu ala mu ixi, akuka kya, kala dingi ni nguzu yavulu. Maji kyoso kyanda kwa fukununa phala kukala ku dyulu, ene anda kala ni kutena, ni kwila anda kala athu mu nzumbi, katena dingi kufwa. Anda ku abhana we o kikalakalu kya kulwa ita kumoxi ni Sobha, Jezú Kidistu. Kyoso kyanda bhwa o ita ya Alumajedone, ene anda kalakala ni Jezú phala kukwatekesa o athu mu ixi kukituka athu ayuka. Se phata, ene anda bhanga dingi ima yavulu tunde ku dyulu phala kukwatekesa o jiphange ja jakazola mu ixi, o ima yabhangele kyoso kyexile hanji akwa ituxi, ndenge!

17. Kyebhi ki twejiya kwila o jiselevende joso ja Nzambi anda ku alanga mu kithangana kya ita ya Alumajedone?

¹⁷ O kwila eye watokala ku jimbudi jamukwa? Se kyene, ihi iwanda bhinga o kubhanga kyoso o ita ya Alumajedone yanda mateka? Ubhanga ngo kiki: Dyelela kwa Jihova, kayela o itendelesu ye. Nange o kubhanga kiki kwalungu ni ihi? O Bibidya ituswinisa mu kwamba: “Ndenu, mu bokone mu jinzo jenu, mu dijikile momo, mu swame ngó kathangana, katé ki somboka o njinda.” (Iza. 26:20) O jiselevende joso ja fiyele ja Nzambi, ku dyulu ni mu ixi, anda ku alanga mu kithangana kyenyokyo. Kala poxolo Phawulu, etu twadyelela ni kidi kyoso kwila “né jinguvulu, né ima ya kindala, né ima yanda kwiza . . . Kana-ku kima kyoso-kyoso kitena ku tufidisa kutambula o henda ya tulondekesa Nzambi.” (Lom. 8:​38, 39) Lembalala jinga kwila: Jihova wakuzolo, ni kwila nuka wanda ku kubwazeka!