1. I diib kaay diikal bashing diisaby ba bulekel mwa kuy mu diiwul?

 KUKAADY mivw yivul, baat ba Yehow baakady bijooj neey, ‘I diib kaay diikal biin Krist bashing diisaby ba bulekel mwa kuy mu diiwul?’ Twaakady tulang neey, bamw biin Krist bashing diisaby baakady mwa kushaal ha bulab mu Paradiiz kalung kakeeh kuunyim kwa diivit dya Harmakedon. Ki tulongel mu Cibumb cya Muteetekel 15/7/2013 neey: bashing diisaby boos bacidy ha bulab biiyiiy kuy mu diiwul Kuuhal kwa diivit dya Harmakedon kutangedy.—Mat. 24:31.

2. I diijooj kaay ditudy mwa kwiiyiihanguj? Ni i biny bitwiiyiiy kulong mu ciin bwaal eecy?

² Bamw ba kutudy bady mwa kwiijooj neey: I biny biikal mwa kulongekel “mikook yikwaabw” ya Yeez yiikaakal ha bulab yend ni kukadil Yehow mudimw ni lulamat mu “ciisang cya mal miimiin meeh”? (Jah 10:16; Mat. 24:21) Biin-kweet bakwaabw ba mu mikook yikwaabw bady mwa kumvw bibiih balang neey, biiyiiy kukaakal cya kulong hiikal biin-kweet baan-balum ni baan-bakaj bashing diisaby badyobw bakat aab bay mu diiwul. Tukontononaay myand yibidy ya mu Bibl yidy mwa kwiibasak bwa kulang meej naak. Cikwaabw twiiyiiy kwiisambil ha tubingil tudy mwa kwiitwambulwiish bwa kaay twaaciin.

I BINY BIIKAL KABIY MWA KULONGEK?

3-4. I majooj kaay mady baat mwa kwiiyiihanguj? ni bwabiny?

³ Bakwaabw bady mwa kwiiyiihanguj ning mikook yikwaabw yidy mwa kwiiy kulek kukadil Yehow mudimw hiikaley kayiciy ni biin-kweet bashing diisaby ba mu Kasumbw Kaludik bwa kwiiyilombol. Bady mwa kwiiyumvw naak misang yikwaabw bwa yimw miisamb yidyobw balond mu Bibl. Tukontononaay bileejel bibidy. Cya  kuuhal, i cya mutam a balambul ba milambw Yoyadah. Waakady mwiin mudimw a Mawej a lulamat. Yiy ni mukaj indiy, Yokebah, balamin mwaan-mutofw dindiy Yowas ni bamwambulwiishil bwa kushaaley mukaleng mulengel a lulamat. Yowas waakady uhambidil Yehow ni ulong myand yilengel. Ki hafwiil Yoyadah, Yowas utangil kulong myand yibiih. Waakun bakaleng babiih mat, waalek teng ni Yehow.—2 Cif. 24:2, 15-19.

⁴ Cileejel ciibiidy i cya Biin Krist baakady ni buumy kuunyim kwa lufw lwa bapostol. Mupostol ufwiil wa bulekel i Jah, hacyaakadyey mutal, wambulwiishil biin Krist bavul bwa kushaalobw ni lulamat kudy Yehow. (3 Jah 4) Teng mulongel bapostol bakwaabw ba lulamat ba Yeez, Jah ukadil mudimw mukasakan bwa kulamey bisumbw kudy baat baakady balongweesh malongweesh ni bilel bya makos. (1 Jah 2:18; 2 Tes. 2:7) Kuunyim kwa lufw lwa Jah, baat bavul ba mu bisumbw batangil kulond malongweesh ma baat baakady banyang malongweesh ma Mawej. Mu mivw yilondel, baat baakady banyang malongweesh ma Mawej aab, balongweeshel malongweesh mavul ma makos, ni biitabil bwa baat baloolong myand yibiih biikal mu bisumbw byoos.

5. I biny bitudy katuy ni bwa kuleeb habitaatal myand yibidy yidyobw balond eey?

⁵ Miisamb ibidy ya mu Bibl eey, yileeleejok neey bwaal bwa mushind aakaabumw oobw bwiiyiiyok kulongekel mikook yikwaabw ya Krist hiikal bashing diisaby bay mu diiwul eeny? Mu ciisang aacy, biin Krist ba lulamat biikal ha bulab biiyiiy kulekok malongweesh maababw teng bu mulongel Yowas, eecy biiyiiy kutweel mu kunyang kwa malongweesh ma Mawej bu mulongel biin Krist bavul kuunyim kwa lufw lwa bapostol eeny? Dyaalabul didy biin-biin neey waakweeh! Twiikal bajaadik neey, hiikal bashing diisaby bay mu diiwul, mikook yikwaabw yiiyiiy kutungunuk teng ni kuhambidil Yehow mu mushind mulengel ni Yehow, wiiyiiy kutungunuk ni kwiibalam bilengel. Bwabiny tudy batwiishiibw naak?

BAAT BA YEHOW BIIYIIY TENG KUMUHAMBIDIL MU MUSHIND UKAAKAMEY

6. I biisang kaay bisat bitwiiyiiy kukontonon mu may makeeh?

⁶ Bwabiny tudy bajaadik neey, baat ba Yehow biiyiiy teng kumuhambidil mu mushind ukaakaamey ning mu biisang bikasakan biikal mwa kwiiy kuuhal ook? Bwaal Bibl umvumvwiij neey: ciisang ciitut eecy i cishiilangan menmen ni ciisang cya Biin Izaleel wa kal ni ciisang cya kuunyim kwa lufw lwa bapostol. Tukontononaayaak bilengel biisang bisat eeby: 1) Ciisang cya Izaleel wa kal, 2) ciisang cya kuunyim kwa lufw lwa bapostol, ni 3) “ciisang cyaakiiy Mawej kushiy biit byoos bihyaabihy,” biisang biitut eeby.—Yil. 3:21.

7. Mu Izaleel wa kal, bwabiny biin Izaleel ba lulamat kabaakady bakooyel mu mikon haakady cis cyaababw ni bakaleng balong myand yibiih?

⁷ Ciisang cya Izaleel wa kal. Mafuk makeeh kuuhal kwa lufw lwa Moyiz, wambiil biin Izaleel neey: “Bwaal nady mumanyik neey kuunyim kwa lufw lwa mim biin Izaleel biiyiiy kulong myand yibiih ni biiyiiy kwaaluk mu njil unaakady mwiibaleej.” (Mmu. 31:29) Cikwaabw Moyiz udimushil biin Izaleel neey: bab biikal mwa kutombokel Mawej, baakady mwa kukwaat cis cyaababw ku buhik. (Mmu. 28:35, 36) May aam mawaakeen eeny? Ing. Mu mivw kam yivul, bakaleng bavul balongel myand yibiih ku mees kwa Yehow ni baat biibalondel mu kuhambidil kwa baamawej ba makos. Bwa bwaal oobw, Yehow unyookel bakaleng babiih aab ni kiitabiloh cikwaabw bwa bakaleng aab bakookesh biin Izaleel. (Ez. 21:​25-27) Ki biin Izaleel ba lulamat, bahetel mucim mukasakan hatadilobw may ma Mawej mawaakan.—Ye. 55:​10, 11.

8. Tudy mwa kukemok bwa mwaakady biin Krist ba mu ciisang cya kuunyim kwa lufw lwa bapostol balek kuhambidil Yehow mu mushind ukaakaamey eeny? Umvwiij.

⁸ Ciisang cya kuunyim kwa lufw lwa bapostol. Tudyok mwa kukem bwa mwaakady biin Krist ba mu ciisang cya kuunyim kwa lufw lwa bapostol balek kuhambidil Mawej mu mushind  ukaakaamey eeny? Waakweeh. Yeez wanzanzilok kuleeb neey: baat banyanyang myand ya Mawej biiyiiy kwiikalok. (Mat. 7:21-23; 13:24-30, 36-43) Mupostol Pool, Pyeel ni Jah bajaadikil boos neey: may ma buprofet ma Yeez matwaadijil kukumban mu ciisang cyaababw. (2 Tes. 2:3, 7; 2 Py. 2:1; 1 Jah 2:18) Kuunyim kwa lufw lwa bapostol, biin Krist balekel kuhambidil Mawej mu mushind ukaakaamey. Ni biin Krist baakady banyang myand ya Mawej, biiyil cituh cya Baabiloon Mutam sangil wa bitendeleel bya makos. Nook, may ma buprofet ma Yeez mawaakeen.

9. I mushind kaay udy ciisang ciitut eecy cishiilangan ni ciisang cya Izaleel wa kal, ni ciisang cya kuunyim kwa lufw lwa bapostol?

⁹ “Ciisang cyaakiiy Mawej kushiy biit byoos bihyaabihy.” Ciisang ciitut eecy i cishiilangan ni ciisang cya Izaleel wa kal, ni ciisang cinyangilobw malongweesh ma mu Bibl kuunyim kwa lufw lwa bapostol. Ciisang ciitut eecy bicibiibiikan bicy? Civul, tubiibiikan ciisang citudy eecy neey: “mafuk ma bulekel” ma bulongolody bubiih myand oobw. (2 Tim. 3:1) Ki Bibl uleeleej neey: ciisang cikwaabw cilengel ni cileeh citangil teng diib dyaakaabumw aady. Ciisang eecy, ciiyiiy kutungunuk teng ni iikal Bukaleng bwa Mesih mwa kwiiy kushiy baat boos bawaakan ni kufutulul bulab Paradiiz. Babiibiikan ciisang eecy neey: “ciisang cyaakiiy Mawej kushiy biit byoos bihyaabihy.” (Yil. 3:21) Ciisang eecy citangil mu 1914. I biny bilongelobw bihyaabihy? Bateekel Yeez Mukaleng mu diiwul. Nook Yehow uhetel cikwaabw mukaleng waakady mwa kuleej hal indiy, hyaan a Mukaleng a lulamat Davih. Ki kabwiish teng Bukaleng kaayaabw budy Yehow mushiy buhyaabuhy. Kuunyim kwa bwaal oobw, Yehow wambulwiishil biin mudimw bindiy ba ha bulab bwa kumuhambidilobw cikwaabw mu mushind udyey mukat bwa bamuhambidil! (Ye. 2:2-4; Ez. 11:17-20) Biin mudimw ba Mawej biiyiiy kulekok cikwaabw kumuhambidil mu mushind oow eeny?

10. a) Bilondeshel Yeshaay 54:17, i biny byaakady Bibl muman kuleeb habitaatal kuhambidil kujilang bwa mafuk miitut aam? b) Bwabiny may ma buprofet aam i ma biin-biin?

¹⁰ Bal Yeshaay 54:17. Langil ha diiy dya buprofet eedy: “But boos bwiikalobw bahung bwa kukulongel bibiih kabwiish bwiiy kukulongel ciit.”! May mafundish ku spirit mujilang aam, mendend makumban leeloow. May makaakaashish ku micim maloolond aam, maleeleeb bwa ciisang citudy eecy: “Baan biibuh boos biiyiiy kwiikal biiyij ba mim, biiyiiy kwiikal ni bihak bivul. Wiiyiiy kushimat biin-biin kakuy udy mwa kukunyeekesh. . . . Kwiish wiiy kumvw mooy, bwaal mooy kiishon bend wiiy kukukwaat.” (Ye. 54:13, 14) Ning “Sataan mawej a bulab oobw,” kiish ni bukash bwa kwiimanyik mudimw udy baat ba Yehow balong wa kulongweesh baat bakwaabw  bwa kumanyikobw Yehow. (2 Kor. 4:4) Baat ba Yehow batangil kuhambidil Yehow mu mushind udyey ukaam. Ciineecy, i cyaab citudy mwa kushaal buyiil. But boos bwiikalobw bahung bwa kukulongel bibiih kabwiish bwiiy kukulongel ciit!

I BINY BIIYIIY KULONGEK?

11. I biny biitujaajaadikil neey, Yehow kaakwiiy kulekoh bend cisumbw citam kaayaacy hiikal bashind diisaby baman kuy mu diiwul?

¹¹ I biny biiyiiy kulongek hiikal bashing diisaby boos bay mu diiwul? Tumanyikaay neey: Yeez i mulamy iitut. I yiy udy ku mut kwa cisumbw cya biin Krist. Yeez uleebel hatook neey: “Nudy ni Mukaleng iinun teng waakaabumw Mesih.” (Mat. 23:10) Yeez ukookookesh mu diiwul wiiyiiy teng kutacil biiyij bindiy ba biin-biin. Bu mudy Krist i yiy wiibaloolombol, kabiish mwa kuciin ciit ning cyaakaabumw. Cya biin, katwiish bamanyik myand yoos habitaatal mushind wiikal Yeez mwa kulombol baat bindiy mu ciisang aacy. Nook, tukontononaay bimw bya ku bileejel bya mu Bibl bidy mwa kwiitujaadikil bwaal oobw.

12. I mushind kaay waakady Yehow mulam baat bindiy a) Kuunyim kwa lufw lwa Moyiz? b) kuunyim kwa baman kwaakish Elih mudimw mukwaabw? (Tal cikwaabw cifwaatul.)

¹² Kuuhal kwa biin Izaleel kutweelobw mu bulab bulay, Moyiz ufwiil. I biny byaakady bifikil baat ba Mawej? Ashaadilobw kabay ni muut a lulamat aaw, Yehow ulekel bwa kwiibambulwiish eeny? Waakweeh. Hacyaakadyobw teng ni lulamat Yehow waakady wiibakish biit byaakadyobw naaby diikeng. Kuuhal kwa Moyiz kufw, Yehow umwambiil bwa kwaakishey Jozuweh mudimw waakadyey nend wa kulombol baat. Moyiz ulongweeshel Jozuweh mukacy mwa mivw yivul. (Cim. 33:11; Mmu. 34:9) Cikwaabw, kwaakady baan-balum bavul bakumban bwa kulombol—kwaakady baakady kumut kwa bisak binun, bakwaabw bu bakaleng ba cisak cya baat lukam, bakwaabw cya baat makumy mataan eecy cya baat diikumy. (Mmu. 1:15) Baat ba Mawej baakady balam bilengel. Tutaatal cileejel cya mushind aakaabumw oow kudy Elih. Ukadil mudimw bikasakan mukacy mwa mivw yivul bwa kwambulwiish biin Izaleel bwa kuhambidilobw Yehow. Ahicil mafuk, Yehow umwaakishil mudimw mukwaabw wa kukal ku cyaash kwa Yuudah. (2 Bak. 2:1; 2 Cif. 21:12) Yehow ulekel baat ba lulamat ba mu bukaleng bwa bis diikumy bya Izaleel eeny? Waakweeh. Elih ulongweeshel Elizeh mukacy mwa mivw yivul. Kwaakady cikwaabw “baan ba baprofet,” baakadyobw balongweesh. (2 Bak. 2:7) Nook, baan-balum bavul ba lulamat aab baakadyok bwa kwambulwiish ni kulombol baat ba Mawej. Yehow utungunukil ni kukumbaj kiihacil kindiy ni utacil bahambidil bindiy ba lulamat.

13. I biny bidy Yehow mwiitulay bidy mu Biin Ebreh 13:5b? (Tal cikwaabw cifwaatul.)

 ¹³ Ni bileejel eeby mu meej, ulaalang bicy bwa ciikal mwa kulongek hiikal bashing diisaby ba bulekel bay mu diiwul? Katutatoh bend ni kwiiyiihanguj. Bibl wiitujaajaadikil bituh neey: Yehow kaakwiiyoh bend kulek baat bindiy ba ha bulab. (Bal Biin Ebreh 13:5b.) Teng bu Moyiz ni Elih, kasumbw kakeeh ka biin Krist bashing diisaby baloolombol leeloow, i bamanyik buseeb bwa kulongweesh bakwaabw. Kukaady mivw yivul, biin-kweet ba mu Kasumbw Kaludik bendend balongweesh biin-kweet ba mu mikook yikwaabw mushind a kulombol. Cileejel, i balongolol tulaas tuvul twa kulongweesh bakul, balombol ba bijeng, biin Komiteh wa Filiyal, balombol ba ku Betel ni bakwaabw. Biin-kweet ba mu Kasumbw Kaludik baloolongweesh biin-kweet bakwaabw biibakwaakwanjok bwa kumanyik midimw yivul ya mu ma Komiteh yishiil-shiilangan ya mu Kasumbw Kaludik. Bakwanjok aab, bakaakal ni lulamat loos mudimw udyobw biibaakish. I biibalongolol bilengel bwa kutungunuk ni kukal mudimw bwa kulam mikook ya Krist.

14. I bwaal kaay butam budy mu mwiisamb iitut oow?

¹⁴ Tal bwaal butam butwiisaasambil: hiikal bashaadil bashing diisaby mwa kuy mu diiwul haabwiih ni bulekel bwa Mal miimiin meeh, baat ba Yehow biikal ha bulab, biiyiiy kutungunuk ni kumuhambidil ni lulamat. Ku dyambulwiish dya bukookesh bwa Yeez Krist, baat ba Yehow biiyiiy kutungunuk ni kumuhambidil ni lulamat. Biin-biin, ciisang aacy biiyiiy kwiitulwiish kudy Kok wa mu bulab bwa Makok, bibunj biikong biikal mwa kulwiish baat ba Mawej. (Ezek. 38:18-20) Ki bulwiish bwa mu cikos oobw, bwiiyiiy kukaakal kiihacil kaabubw; kabwiish bwiiy bukaakeeshoh bend baat ba Mawej bwa kuhambidilobw Yehow. Wiiyiiy biin-biin kwiibalam! Mu bwaal butal bu mu cilot, mupostol Jah utadil “cisumbw citam” cya mikook yikwaabw ya Krist. Bambiil Jah neey: “baat bavul beeh aab” [cisumbw citam] baalaalukil “mu mal miimiin meeh.” (Yis. 7:9, 14) Ing, biiyiiy kwiibakuuloh!

15-16. Bilondeshel Myand Yisokolweel Jah 17:14, I biny biiyiiy kulong biin Krist bashing diisaby mu diivit dya Harmakedon? ni bwabiny biitukaakashish?

¹⁵ Ki bakwaabw bady mwa kwiijooj neey: ‘I biny biikal bashing diisaby mwa kulong bab baman kuy mu diiwul?’ Bibl utwaatwaal buludy-ludy  dyaalabul ku dijooj eedy. Bibl uleeleej neey: makaleng ma cidiidy ma bulongolody oobw, miiyiiy “kulwiish Mwaan a Mukook.” Ki biiyiiy kukaakal biin-biin. Tubaabaalomw neey: “Mwaan a Mukook wiiyiiy kwiibahit diikand.” I bangany biikal mwa kumukwanjok? Verseh utwaatwaal dyaalabul. I aab “babiikeeney,” “banooneneyoh,” ni “bady bamulamat.” (Bal Myand yisokolweel Jah 17:14.) I bangany? I bashing diisaby biiyiiyobw kusangul! Nook, hiikal bashaadil bashing diisaby mwa kuy mu diiwul habwiih ni bulekel bwa mal miimiin meeh, mudimw wiikalobw nend wa kuuhal, i wa kulwiish. Wiinoow wiiyiiy kwiikal mudimw a habwaah! Bamw biin Krist bashing diisaby baakady bal ba diivit kuuhal kwa kushaalobw Baatemw ba Yehow. Bakwaabw baakady basalaay mu bulongolody oobw. Ki kuunyim bashaadil biin Krist ba biin-biin, ni balongel mushind a kushikat talal ni bakwaabw. (Kal. 5:22; 2 Tes. 3:16) Ni balekel myand yoos ya mavit. Kuunyim kwa bab baman kuy mu diiwul, biiyiiy kulong mudimw haakaabumw ni Krist ni banjel bindiy bajilang mu diivit dya bulekel bwa kulwiish balwiish ba Mawej.

¹⁶ Langil ha bwaal oobw! Biin Krist bashing diisaby bakwaabw ha bulab aah bakaady banun ni kabaciish ni makand ma nyeet mavul. Ki musang umw hadyobw basanguk bwa kwiikal ni buumy mu diiwul, biiyiiy kwiikal ni makand mavul, baat ba mu spirit bakiish bafw, ni biiyiiy kwiibaakish mudimw a kulwiish haakaabumw ni Mukaleng aababw Yeez Krist udy cilobw cyaababw cya diivit. Kuunyim kwa diivit dya Armakedon, biiyiiy kukal mudimw haakaabumw ni Yeez Krist bwa kwambulwiish baat bwa kushaalobw bawaakan. Kakuy kulandul, biiyiiy kwambulwiish biin Krist naab bady ha bulab bwa kwiibalongel myand yivul diib diikalobw mu diiwul bishiilangan ni mwaakadyobw mwa kwiibalongel hacyaakadyobw baat bakiish bawaakan ha bulab!

17. I mushind kaay utudy bamanyik neey biin mudmw ba Yehow boos biiyiiy biibakuuloh mu diivit dya Harmakedon?

¹⁷ Udy mu mikook yikwaabw eeny? Biby biikal naak, i biny biwiikal mwa kwiiy kulong hiikal diivit dya buseeb buvul dya Harmakedon mwa kulongek? Ciwudy mwa kulong, i kuteekel Yehow micim ni kulond buludik bwindiy. Kulong nook, kukuloolomb bwa kulong biny? Bibl wiitukaakashish neey: “Nun baat ba mim, yindaay, nutweel mu mazubw miinun, nwiikangilomw. Nusokot ciilung cikeeh naak ni mwaahit cinj cya Mawej.” (Ye. 26:20) Biin mudimw boos ba Yehow ba lulamat, mu diiwul ni ha bulab, biiyiiy kwiibakuuloh ciisang aacy. Teng bu mupostol Pool, tudy bajaadik neey: ning “bakaleng, ni myand yidyok kaabaak, ni myand yaakiiy, kakwiishoh bend cidy mwa kwiitukabulul ku lukat lwiituleeleej Mawej. (Rom 8:38, 39) Iikal teng muvuluk neey: Yehow i mukukat ni kaakukulekoh bend!